Skelim Wok Bilong Ol Gavman

Ol King i Olsem Ol Sta—Ol i Kamap na Bihain Ol i Pundaun

Monaki: wok bilong bosim gavman i stap long wanpela lain famili tasol, na wanpela bilong dispela famili i holim na em i stap king, na taim em i dai narapela bilong famili i kamap bos o king; Kingdom: wanpela gavman em king o kwin i bosim; Empaia: em wanpela kantri i gat sampela lain o kantri moa i stap aninit long en na wanpela bikman olsem king i bosim.

STAT 14:1 i tok, “Bera em i king bilong taun Sodom.” Em namba wan taim Baibel i kolim dispela tok “king.” Tasol wok king i bin kirap sampela handet yia paslain long dispela taim. Nimrot em i wanpela king, tasol Baibel i no kolim olsem. Tasol Nimrot em i namba wan man bilong graun long kamap king.​—Stat 10:​8-12.

Tru, i no gat wanpela samting nau i stap na i gat rait i stap long en olsem “King Nimrot.” Wanpela buk (The New Encyclopædia Britannica) i tok, ‘Enmebaragesi i bin stap king bilong kantri Kis, na i no gat narapela king bilong Mesopotamia paslain long dispela man na i gat sampela rait i stap na yumi ken save long ol.’ Ol Kis i bin kolim wanpela tok olsem “king” o “bikman.” Ol man i makim taim Enmebaragesi i bin i stap king, na i wankain liklik olsem Baibel i makim, na bikpela samting tru, em ol i makim ples ol man i kirap pastaim long mekim wok king​—em long hap bilong Mesopotamia, na Baibel tu i makim olsem.

Wanpela Tasol i Stap Bos

Ol man i tok namba wan gavman monaki i bin kirap long Saina long bipo bipo, na famili Sang i bosim. Gavman monaki i kirap paslain long ol narapela kain gavman, na i gat planti i stap.

As bilong dispela nem “monaki” em tupela tok Grik: em moʹnos, olsem “wanpela,” na ar·kheʹ, olsem “bos.” Olsem na wanpela man tasol i stap bos long gavman monaki, olsem wanpela king, na wanem samting em i tok long en, ol man i mas bihainim tasol.

Ol man i ting gavman monaki, olsem king, i save helpim ol lain man long i stap wanbel. Wanpela tisa, em John H. Mundy, em i tok, bipo ol man bilong politik i ting gavman monaki i gutpela, long wanem, em i ken bosim ol narapela narapela lain wantaim. Planti taim king i save kirapim lain bilong em long pait wantaim ol narapela lain na daunim ol na nau em i bosim graun bilong ol. Wanpela man bilong raitim stori bilong ol samting i bin kamap bipo, em W. L. Warren, em i tok, sapos king i winim pait, ol man bai tok em bai mekim gutpela wok king.

Sapos kantri i gat gavman monaki, em i gat rot long kamap wanpela bikpela gavman empaia long graun, olsem kantri Grik i bin mekim long taim Aleksanda i bosim, na olsem Rom i bin mekim long taim ol Sisar i bosim, na olsem ol king na kwin bilong Inglan i bin mekim. Inglan i bin kisim bikpela hap bilong graun, na wanpela king o kwin tasol i bosim ol dispela hap.

Monaki na Lotu i Bung

Planti king bilong bipo ol i tok ol i olsem god. Man bilong raitim stori bilong ol samting i bin kamap bipo, em George Sabine, em i tok, ‘ol Grik i makim King Aleksanda i olsem wanpela god na bihain long em ol i mekim olsem long ol narapela king bilong ol; long hap bilong Is ol i save lotu long king, na bihain ol i mekim olsem long ol empera bilong Rom.’ Sabine i tok, dispela pasin i bin stap long Yurop inap long nau.

Long Sentral na Saut Amerika long bipo, ol Astek na Inka i gat king, na king bilong ol i olsem god bilong ol. Na ol Japan i bin givim biknem long Empera Hirohito na em i olsem god bilong ol, na ol i bin tok em i namba 124 tumbuna pikinini bilong san, em god meri, nem bilong en Amaterasu Omikami. Tasol long 1946 Hirohito i tok, dispela bilip i giaman.

Tru, i no olgeta king i tok ol i olsem god, tasol planti king i tok, God i givim dispela wok long ol, olsem na ol i stap olsem rot bilong ol man i ken kamap long God. John H. Mundy i tok, ‘Ol man bilong bipo i ting ol king i olsem pris, na dispela tingting i kisim hap bilong Wes, na nau king i olsem namba wan bos bilong lotu; as bilong dispela pasin, em bipo Konstantin i bungim wok gavman wantaim lotu, na ol tok bilong Plato tu i as bilong en.’ Na taim king i laik kisim dispela wok, ol man i mekim bikpela bung bilong lotu, na nau ol i ting wok king bilong em i samting bilong God.

Long 1173 King Henri Namba 2 bilong Inglan i tok, God i orait long man i holim wok king, na bihain ol man i tok, God i givim wok king long sampela lain, na taim king i dai, God i makim pikinini bilong em long kamap king. Long 1661 Luis Namba 14 bilong Frans i kirap bosim olgeta wok bilong gavman, na em i tok, sapos man i sakim tok bilong em dispela man i brukim lo bilong God.

Na taim King Jems Namba 6 i bosim Skotlan em i tok, “Ol i kolim ol king olsem ol God, long wanem, ol i save sindaun long sia king bilong GOD long graun na mekim wok bilong em.” Long 1603 em i kamap King Jems Namba 1 bilong Inglan, na em i orait long ol man i tanim tok bilong Baibel long tok Inglis (King James Version), na planti Talatala i save mekim wok long en long nau tu.

Monaki i Kamap Strong

Kirap long yia 1400 samting gavman monaki i kamap long planti hap. Ol king i tingim wanpela rot bilong helpim ol yet long bosim ol man na ol i no gat hatwok: Ol i givim namba long sampela papa bilong graun, em ol bikpela man, na ol dispela man i kamapim sampela lain bilong politik na ami, na narapela lain i birua long narapela lain. Wok bilong ol long pait wantaim ol dispela birua, na pe ol i kisim, em papa bilong graun i save givim hap graun long ol. Tasol taim ol dispela papa bilong graun i kamap strong, ol i save bruk long king na ol yet i kamap olsem liklik gavman, na narapela i birua long narapela.

Dispela kain gavman i save mekim ol man i kamap olsem man nating i no gat nem na i stap olsem kalabus. Ol i wok nating long ol bikman, na ol bikman i bosim na daunim ol, na ol i no inap skul samting. Wanpela buk (Collier’s Encyclopedia) i stori long ol man i wok kalabus long ol dispela bikman, na buk i tok, ‘I no gat polis o gavman o kot samting bilong helpim ol, na i tambu long ol i marit, na ol i mas askim bikman pastaim sapos ol i laik raun liklik.’

Tasol sampela king i save larim sampela man i lukautim hap wok bilong gavman, na sapos king i laik rausim ol, em i ken rausim ol. Na sampela king i larim sampela lain i kamapim liklik hap gavman bilong bosim ol liklik ples, na ol i ken bihainim pasin bilong ples long mekim dispela wok. Ol dispela kain gavman i no gutpela tumas, tasol maski i no gutpela, tupela man bilong raitim buk em ol i bin i stap olsem 300 yia samting bipo, em Robet Filma bilong Inglan na Jaks-Benin Bosnet bilong Frans, ol i ting dispela kain gavman i gutpela. Ol i tok, i mas i gat wanpela man tasol bilong bosim olgeta wok bilong gavman. Tasol dispela kain gavman i no stap longtaim.

Ol “God” i Pundaun

Pastaim ol i tok, king i mas daun long God tasol, tasol bihain ol man i strong long king tu i mas daun long ol lo bilong gavman. Wanpela buk (The Columbia History of the World) i tok, ‘kirap long yia 1700 samting sampela pasin bilong mekim wok king i senis, tasol ol i holim yet wok king. Bihain King Fredrik i tok, em i man bilong go pas long ol narapela long bihainim lo bilong gavman, na God i no bin makim em bilong kamap king, tasol em i no tingting long lusim wok king.

Tasol bikpela pait i kamap long Inglan long 1688 na long Frans long 1789, na nau ol king i no stap namba wan olsem bilong bipo. Nau ol gavman monaki i gat lain bilong kamapim ol lo ol man i mas bihainim, na long nau planti king o kwin i no gat bikpela strong long mekim wok politik.

Tru sampela king i gat bikpela strong liklik, tasol ol i no olsem “god” moa. Ol i stap yet olsem namba wan, tasol ol i no gat strong moa long bosim ol samting. Sampela gavman i olsem hap monaki tasol​—ol i lusim pasin nogut olsem ol king i bin mekim bipo, na ol i larim wanpela lain i putim ol lo bilong bosim ol man.

Sampela kantri i laikim dispela kain gavman. Long 1983 namba wan bilong wanpela lain politik long Nepal, ol i kolim Nepali Kongres Pati long Nepal (nem bilong em Krishna Prasad Bhattarai) em i tokaut olsem em i laikim gavman monaki, long wanem dispela kain gavman i save pasim rot na bai ol man i no ken longlong nabaut na pait samting, na em i tok, ‘King i save helpim ol long i stap wanbel.’ Long 1987 ol Frans i redi long wokim pati bilong tingim pait i bin kamap 200 yia bipo taim ol i daunim king bilong Frans, olsem gavman monaki. Tasol sampela Frans i laikim yet dispela kain gavman. Wanpela i tok, i mas i gat king na bai ol man i ken stap wanbel, long wanem, wok politik i paul na i brukim ol man.

Ol i Sot

Gavman monaki, olsem wanpela king tasol i bosim kantri, i no kamapim gutpela wok na helpim gut ol man. Ol i no strong tumas, long wanem, king i save dai na i mas i gat helpim bilong em, em wanpela bilong famili bilong em, na sampela taim pasin bilong em i no stret, o em i no gat save o gutpela tingting. Taim king i dai na pikinini bilong em i kamap king, olsem wanem sapos em i man nogut? O sapos papa i man nogut, olsem wanem ol man i ken save pikinini bai stap gutpela king? Ol i no inap, a?

Cristiano Grottanelli i tok, taim king i dai ol i no makim klia husat bai kamap king, olsem na sampela taim olgeta bilong famili i resis long kisim wok king em papa i bin holim, na i gat planti toktok i go i kam long dispela samting.

Sapos wanpela man tasol i holim stia, olsem king, na sapos em i no mekim gut wok bilong bosim gavman, gutpela samting i no inap kamap long wok bilong em, maski em i bilong lain king. Dispela man em i man bilong graun tasol, na em tu i save popaia. Tasol sapos i gat wanpela king i gutpela olgeta, dispela kain king tasol inap kamapim gutpela gavman na inapim laik bilong ol man na gutpela sindaun long ol.

Na gavman monaki i gat palamen, em tu i sot, olsem gavman bilong Inglan i gat king bilong en. Bipo em i bikpela strongpela gavman, winim olgeta narapela gavman i bin kamap long graun, tasol long taim bilong yumi, em i wok long i go liklik, maski king o kwin i bosim.

Narapela Kain Sta

Ol king i olsem ol sta​—ol i save kamap, na bihain gen ol i pundaun​—tasol wanpela nogat, em Krais Jisas. Em i tok long em yet olsem: “Mi tasol mi dispela Kru i kamap long ol lain tumbuna bilong King Devit, na mi Pikinini Bilong Devit. Na mi dispela sta i save lait tumas long moningtaim tru.” (Kamapim Tok Hait 22:16) King Devit em tumbuna bilong Jisas, olsem na em inap long holim wok king long gavman bilong God. Em i “dispela sta i save lait tumas long moningtaim,” na Pita tu i tok em i olsem “sta bilong moningtaim.”​—2 Pita 1:19; Namba 24:17; Song 89:​34-37.

Olsem na i no gutpela sapos yumi bilip tumas long ol “sta” i save pundaun, olsem ol king bilong graun, a? Ol i no inap helpim yumi tumas. Yumi mas tingim Krais Jisas, em God i makim em long holim wok king. “Em i King bilong olgeta king, na Bikpela bilong olgeta bikman. Em wanpela tasol i no save dai.” (1 Timoti 6:​15, 16) Em i kamap king pinis long heven, na klostu nau em bai kamapim nupela taim long olgeta hap. Em i wanpela sta o king i kam antap pinis, na em i no inap pundaun!

[Piksa long pes 16]

Taim king i dai, narapela i kisim wok bilong em