“Ol Strongpela Wok Bilong God” i Kirapim Ol

“Yumi olgeta i harim ol i autim tok bilong ol strongpela wok bilong God long ol tok ples bilong yumi.”​—⁠APOSEL 2:⁠11.

1, 2. Wanem narapela kain samting i bin kamap long Jerusalem long Pentikos 33 C.E.?

LONG wanpela moning bilong yia 33 C.E., long taim bilong kol i pinis, narapela kain samting tru i kamap long wanpela lain manmeri, em ol disaipel bilong Jisas Krais i bung i stap long haus bilong wanpela man long Jerusalem. “Wantu wanpela nois i kam long heven, em i olsem krai bilong strongpela win, na i pulapim tru dispela haus ol i sindaun i stap long en. Na ol i lukim samting olsem paia i kamap, na i luk olsem planti tang bilong man. . . . Na Holi Spirit i pulap long olgeta dispela manmeri, na ol i stat long mekim tok long ol kain kain tok ples.”​—⁠Aposel 2:​2-4, 15.

² Bikpela lain i kirap bung long fran bilong dispela haus. Namel long ol lain hia i gat sampela Juda em mama i bin karim ol long narapela kantri, “ol i man bilong lotu long God,” na ol i kam long Jerusalem long bung bilong bikpela de Pentikos. Ol i kirap nogut, long wanem, olgeta wan wan i harim ol disaipel i toktok long “ol strongpela wok bilong God” long tok ples bilong ol yet. Ol disaipel i man bilong Galili tasol na olsem wanem ol inap toktok long ol narapela tok ples?​—⁠Aposel 2:​5-8, 11.

 3. Aposel Pita i tok wanem long bikpela lain i bung long Pentikos?

³ Wanpela bilong ol dispela man bilong Galili em aposel Pita. Em i tokim ol olsem long sampela wik i go pinis ol man nogut i bin kilim i dai Jisas Krais. Tasol God i kirapim bek Pikinini bilong em long matmat. Bihain Jisas i kamap long planti disaipel bilong em​—⁠Pita wantaim sampela narapela em ol i sanap nau na toktok, ol i insait long dispela lain. Inap tenpela de tasol i go pinis, Jisas i bin go antap long heven. Em tasol i bin kapsaitim spirit holi long ol disaipel bilong em. Yu ting ol samting Pita i stori long en bai bikpela samting bilong ol lain i kam long bung bilong de Pentikos? Yes, em i bikpela samting tru. Sapos ol i bilip long Jisas, indai bilong em bai opim rot bilong God i ken lusim sin bilong ol na ol i ken kisim “Holi Spirit” olsem presen. (Aposel 2:​22-24, 32, 33, 38) Orait, tok bilong “ol strongpela wok bilong God,” i bin kirapim ol dispela man long mekim wanem? Na olsem wanem dispela stori inap helpim yumi long skelim wok bilong Jehova yumi yet i mekim?

Bel i Kirap Long Mekim Wok!

 4. Truim bilong wanem tok profet bilong Joel i bin kamap long de Pentikos bilong 33 C.E.?

⁴ Ol disaipel i kisim spirit holi na kwiktaim ol i autim tok long ol narapela long gutnius bilong God i kisim bek ol man. Pastaim ol i autim tok long bikpela lain i bung long dispela moning bilong Pentikos 33 C.E. Wok autim tok bilong ol i truim wanpela bikpela tok profet em Joel, pikinini man bilong Petuel, i bin kamapim inap 800 yia paslain long dispela taim: “Bai mi kapsaitim spirit bilong mi long olgeta manmeri. Na ol pikinini man na pikinini meri bilong yupela bai i autim tok bilong mi olsem ol profet. Na bai ol lapun man bilong yupela i driman, na ol yangpela man bai i lukim ol samting olsem driman. Na long dispela taim bai mi kapsaitim spirit bilong mi tu long ol wokboi na ol wokmeri nating. . . . Na bihain bai De bilong Bikpela i kamap.”​—⁠Joel 1:1; 2:​28, 29, 31; Aposel 2:​17, 18, 20.

 5. Olsem wanem ol Kristen long taim bilong ol aposel i bin mekim tok profet? (Lukim sta.)

⁵ Yu ting dispela i makim olsem God bai kamapim wanpela lain profet, em ol man na meri wantaim, olsem Devit, Joel, na Debora, na givim wok long ol long tokaut long ol samting bilong bihain? I no olsem. Spirit bilong Jehova bai kirapim ol Kristen, ol ‘pikinini man na pikinini meri, ol wokboi na ol wokmeri nating,’ long autim tok long “ol strongpela wok bilong God,” em ol wok Jehova i mekim pinis na ol wok em bai mekim bihain, na long dispela rot i olsem ol i mekim tok profet. Olsem na ol bai stap mausman bilong God Antap Tru.a Tasol bikpela lain i bung hia i mekim wanem?​—⁠Hibru 1:​1, 2.

 6. Taim dispela bikpela lain i harim tok bilong Pita, bel bilong planti i kirap tru long mekim wanem?

⁶ Taim bikpela lain i harim pinis tok bilong Pita, bel bilong planti i kirap tru long mekim sampela samting. Ol i pilim tru tok bilong em na ol i kisim baptais, na “long dispela de samting olsem 3,000 manmeri i kam insait long lain bilong ol manmeri i bilip long Jisas.” (Aposel 2:41) Em ol Juda bilong skin wantaim ol man bilong ol narapela lain i bihainim lotu Juda, olsem na ol i save pinis long ol bikpela tok bilong buk bilong God. Dispela save, wantaim bilip ol i kisim long ol tok Pita i lainim ol long en, i as na ol inap kisim baptais “long nem bilong Papa na bilong Pikinini na bilong Holi Spirit.” (Matyu 28:19) Bihain long ol i baptais, ol “i strong long harim tok bilong ol aposel.” Na tu, ol i kirap toktok wantaim ol narapela long nupela bilip bilong ol. Yes, “long olgeta de ol i save bung wantaim long tempel. . . . Oltaim ol i save litimapim nem bilong God, na olgeta manmeri i belgut long ol.” Wok witnes bilong ol i mekim na “long olgeta de Bikpela i wok long kisim bek sampela manmeri.” (Aposel 2:​42, 46, 47) Kwiktaim ol kongrigesen Kristen i kamap long planti kantri we ol dispela nupela bilipman i sindaun long en. Wanpela as na wok i go bikpela em pasin bilong ol long givim bel long autim “gutnius” long taim ol i bin go bek long ples bilong ol.​—⁠Kolosi 1:23.

Tok Bilong God i Gat Strong

 7. (a) Wanem samting i kirapim ol manmeri bilong olgeta lain long kam long oganaisesen bilong Jehova long nau? (b) Yu ting wok inap go bikpela moa long hap yu stap long en na long graun olgeta? Stori long dispela. (Lukim sta.)

⁷ Olsem wanem long ol man i gat laik long kamap wokman bilong God long nau? Ol tu i mas stadi gut long tok bilong God. Taim ol i mekim olsem, ol i kisim save olsem Jehova em i God bilong ‘marimari na sori. Na em i no save belhat kwik. Em i save laikim tru olgeta manmeri, na em i save bihainim olgeta tok bilong em.’ (Kisim Bek 34:6; Aposel 13:48) Ol i kisim save long samting Jehova i mekim bilong baim bek ol man long rot bilong Jisas Krais, olsem blut bilong em inap mekim ol i kamap klin na i no gat sin moa. (1 Jon 1:⁠7) Na tu, ol i amamas long kisim save olsem God i tingting pinis long “kirapim bek ol man i dai pinis, em ol stretpela man na ol man nogut wantaim.” (Aposel 24:15) Pasin bilong laikim tru Man i As bilong ol dispela “strongpela wok” i kamap strong long bel bilong ol, na ol i kirap autim tok long ol dispela tok tru i gutpela tumas. Bihain ol i kamap wokman bilong Jehova i dediket na baptais, na ol i wok long kisim stretpela save long God, na ‘oltaim dispela save i kamap bikpela moa.’b​—⁠Kolosi 1:10b; 2 Korin 5:⁠14.

8-10. (a) Olsem wanem ekspiriens bilong wanpela meri Kristen i kamapim klia olsem Tok Bilong God “i wok strong i stap”? (b) Dispela ekspiriens i givim wanem save long yu long Jehova na pasin em i mekim long ol wokboi bilong em? (Kisim Bek 4:⁠12)

⁸ Save ol wokman bilong God i kisim long rot bilong stadi long Baibel i no antap antap tasol. Kain save olsem i kirapim tru bel bilong ol, na i mekim tingting bilong ol i senis, na i stap oltaim long tingting bilong ol. (Hibru 4:12) Olsem: Wanpela meri, nem bilong em Camille, em i mekim wok mani long lukautim ol lapun. Wanpela meri em i lukautim, em Martha, em i wanpela Witnes Bilong Jehova. Martha i karim bikpela hevi long sik longlong, na oltaim i mas i gat wanpela i lukautim em. I mas i gat wanpela i kirapim tingting bilong em long kisim kaikai​—⁠na long daunim kaikai i stap long maus bilong em. Tasol olsem yumi bai lukim, wanpela samting i stap strong long tingting bilong Martha na i no inap lus.

⁹ Wanpela de Martha i lukim Camille i krai long sampela hevi bilong em. Martha i holim Camille na toksave olsem em i laik stadi wantaim em long Baibel. Tasol yu ting wanpela i gat sik olsem Martha em inap lukautim wanpela Baibel-stadi? Yes, em inap! Tru planti samting em i bin save long en i lus, tasol Martha i no lusim tingting long strongpela God bilong em, na tu, em i no lusim tingting long ol gutpela tok tru em i bin lainim long Baibel. Taim ol i stadi, Martha i tokim Camille long ritim ol wan wan paragraf, na mekim wok long Baibel na skelim ol skripsa i stap long paragraf, ritim askim daunbilo long pes, na bekim. Ol i stadi olsem i go i go na maski Martha i no inap mekim planti samting, save bilong Camille long Baibel i wok long go bikpela. Martha i save olsem Camille i mas bung wantaim ol narapela i laik mekim wok bilong God. Olsem na em i givim su long sumatin bilong em na wanpela dres, bambai Camille i gat klos i stret long werim long taim em i go long namba wan miting bilong em long Haus Kingdom.

¹⁰ Camille i pilim tru pasin bilong Martha long tingim em, na i stap olsem gutpela piksa, na holimpas strongpela bilip. Em i ting samting Martha i laik lainim em long Baibel i mas bikpela samting tru, long wanem, Martha i bin lusim tingting pinis long klostu olgeta narapela samting, tasol save bilong em long Baibel, nogat. Bihain, taim Camille i go wok long narapela haus sik bilong lukautim ol lapun, em i save olsem em i mas kirap na mekim sampela samting. Namba wan taim rot i op, em i werim dispela dres na su Martha i givim em na em i go insait long Haus Kingdom na askim wanpela long stadi wantaim em long Baibel. Camille i wok long kamap strong na bihain em i kisim baptais.

Ol i Gat Laik Long Bihainim Ol Lo Bilong Jehova

11. Yumi givim bel long autim tok, tasol yumi ken mekim wanem samting moa bilong soim olsem tok bilong Kingdom i kirapim tru yumi?

¹¹ Long nau, namba bilong ol Witnes Bilong Jehova i winim 6 milion, na olsem Martha na Camille, ol i wok long autim “gutnius bilong kingdom” long olgeta hap bilong graun. (Matyu 24:14; 28:​19, 20) Olsem ol Kristen long taim bilong ol aposel, ol i pilim tru “ol strongpela wok bilong God.” Ol i amamas long ol i holim gutpela wok bilong kamapim nem bilong Jehova, na long em i bin kapsaitim spirit bilong em long ol. Olsem na ol i wok strong tru long “wokabaut long pasin bilong ol manmeri tru bilong Bikpela, na bai em i laikim olgeta pasin bilong [ol],” na ol i save tingim stretpela lo bilong em long olgeta samting ol i mekim. Na tu, ol i save rispektim ol tok bilong God long ol samting bilong bilas na mekim gut skin.​—⁠Kolosi 1:10a; Taitus 2:10.

12. Long 1 Timoti 2:​9, 10 yumi lukim wanem tok long pasin bilong bilas na mekim gut skin?

¹² Yes, Jehova i bin putim mak yumi mas bihainim long pasin bilong bilas. Aposel Pol i bin tokaut long ol samting God i laik yumi mas mekim. “Mi laik bai ol meri i mas putim ol gutpela klos samting, inap tasol long ol. Ol i no ken hambak na bilasim gras na skin bilong ol long ol kain kain bis na bilas gol na ol klos i dia tumas. Nogat. Ol meri i laik bihainim tok bilong God, ol i mas mekim ol kain kain gutpela wok. Dispela em i bilas tru bilong ol.”c Dispela tok i givim wanem save long yumi?​—⁠1 Timoti 2:​9, 10.

13. (a) Dispela tok “putim ol gutpela klos samting” i makim wanem samting? (b) Bilong wanem yumi ken tok mak God i putim i no hatwok tumas long bihainim?

¹³ Tok bilong Pol i soim olsem ol Kristen i mas “putim ol gutpela klos samting.” Nogut klos bilong ol i bruk bruk na i doti, o ol i no komim gras, o skin i smel. Olgeta man, na ol rabisman tu, ol inap winim ol mak olsem Pol i kolim, olsem lukautim gut klos na bai klos i klin na i stap stret. Olsem: Long olgeta yia ol Witnes long wanpela kantri long Saut Amerika ol i wokabaut inap planti kilomita long bikbus na bihain raun long kanu inap planti aua bilong go long kibung distrik bilong ol. Sampela i save pundaun i go insait long wara, o hap diwai o sampela narapela samting long raun bilong ol i save brukim klos bilong ol. Olsem na taim ol dispela lain i kamap long ples kibung, lukluk bilong ol i olsem man i raun long bus longpela taim. Olsem na ol i lusim hap taim long samapim baten long klos bilong ol, stretim ol sipa, na wasim na ainim ol klos ol bai werim long kibung. Ol i pilim tru gutpela singaut ol i kisim long kam kaikai long tebol bilong Jehova, na ol i laik pasim ol klos i stret.

14. (a) Olsem wanem long dispela tok olsem yumi mas bilas “inap tasol long [yumi]”? (b) Yumi mas mekim wanem na bai yumi bilas olsem man i “bihainim tok bilong God”?

¹⁴ Pol i tok tu long yumi mas bilas “inap tasol long [yumi].” Dispela i makim olsem yumi no ken putim bilas i pulim ai bilong ol narapela, o i narapela kain, o i kirapim bel bilong narapela, o klos i no karamapim gut skin, o yumi givim bel long werim ol nupela nupela stail klos. Na tu, yumi mas bilas long pasin i soim olsem yumi save “bihainim tok bilong God.” Yumi mas tingim gut dispela samting, a? I no olsem yumi laik pasim klos i stret long taim yumi go long miting bilong kongrigesen na yumi mekim nabaut long ol narapela taim. Oltaim lukluk bilong yumi i mas soim olsem yumi save tingim Bikpela na bihainim gutpela pasin, long wanem, yumi stap Kristen na wokman bilong God inap 24 aua long olgeta de. Tru, klos yumi pasim bilong go long wok o long skul bai i stret long ol samting yumi bai mekim long dispela hap. Tasol oltaim yumi mas bilas stret na bilas long pasin i no daunim nem bilong yumi. Sapos oltaim bilas bilong yumi i kamapim klia olsem yumi save bilip long God, ating bai i no gat wanpela taim yumi surik long autim tok long man long kain kain taim na ples long wanem yumi sem long lukluk bilong yumi.​—⁠1 Pita 3:⁠15.

“No Ken Laikim Ol Pasin Bilong Graun”

15, 16. (a) Bilong wanem em i bikpela samting long yumi mas abrusim pasin bilong ol man bilong graun long bilas? (1 Jon 5:19) (b) I gat wanem as na yumi mas abrusim pasin bilong bihainim tasol ol nupela nupela stail bilong bilas?

¹⁵ Tok bilong 1 Jon 2:​15, 16 tu i givim gutpela tingting long yumi long samting yumi mekim bilong bilas na mekim gut skin. Em i tok: “Yupela i no ken laikim ol pasin bilong graun na olgeta samting bilong graun. Sapos wanpela man i laikim ol pasin bilong graun, orait em i no save laikim tru Papa. Yumi save, olgeta pasin bilong ol man bilong graun, em pasin bilong bel kirap na aigris na bikhet, ol dispela pasin i no kam long Papa. Nogat. Ol i pasin bilong graun tasol.”

¹⁶ Dispela tok i stret tru long nau! Long nau pasin bilong bihainim wankain tingting olsem ol wanlain i strong tru, winim long bipo, olsem na yumi no ken larim ol man bilong graun i bosim pasin bilong yumi long bilas. Kirap long sampela yia i go pinis ol man i no strong long bilas gut olsem bipo. Na pasin bilong bilas em ol bisnisman na ol man i holim ol narapela bikpela wok i save bihainim, sampela taim dispela tu i no gutpela mak bilong ol Kristen long bihainim. Dispela em i narapela as na oltaim yumi mas tingting strong olsem yumi “no ken wokabaut wankain olsem ol man bilong dispela graun” sapos yumi laik bihainim ol mak God i putim na “givim biknem long tok yumi save autim, em tok tru bilong God, em Man bilong kisim bek yumi.”​—⁠Rom 12:2; Taitus 2:⁠10.

17. (a) I gutpela long tingim wanem ol askim taim yumi laik baim klos o bihainim wanpela pasin bilong bilas? (b) Bilong wanem ol het bilong famili i mas tingim pasin bilong ol wan wan bilong famili long bilas?

¹⁷ Taim yu laik makim wanpela klos yu laik baim, em i savepasin long askim yu yet: ‘Bilong wanem stail bilong klos hia i pulim ai bilong mi? Em i stail bilong wanpela i gat nem long TV na mi save laikim em? Em i makim stail bilong ol lain raskol, o lain i save kirapim ol man long hambak o sakim tok?’ Na tu, yumi mas skelim gut klos yet. Sapos em wanpela dres o sket, longpela bilong en i olsem wanem? Ol i wokim bilong pas olsem wanem long skin? Klos i karamapim gut skin, na i stret long wok mi bai mekim long en, na i litimapim gutpela pasin? O klos i pas tumas long skin, o klos i bilong kirapim bel bilong man, o i bikpela tumas na hangamap long skin bilong mi? Askim yu yet, ‘Klos mi pasim bai pundaunim narapela, o nogat?’ (2 Korin 6:​3, 4) Bilong wanem yumi mas tingim gut dispela samting? Long wanem, Baibel i tok: “Krais tu i no bin ting long helpim em yet tasol.” (Rom 15:⁠3) Ol het bilong famili Kristen i mas tingim pasin bilong ol wan wan bilong famili long bilas. Ol i mas rispektim God ol i save lotu long en, olsem na ol het bilong famili i no ken surik long stretim narapela long pasin sori long taim ol i gat wok long mekim.​—⁠Jems 3:⁠13.

18. Wanem samting i kirapim yu long tingim gut bilas bilong yu?

¹⁸ Tok yumi autim i save kam long Jehova, em i as tru bilong gutpela pasin na pasin holi. (Aisaia 6:⁠3) Baibel i kirapim yumi long bihainim pasin bilong em olsem ol “pikinini.” (Efesus 5:⁠1) Bilas bilong yumi inap givim biknem long Papa bilong yumi long heven o em inap daunim nem bilong em. Tru tumas, yumi laik mekim em i belgut, a?​—⁠Sindaun 27:⁠11.

19. Wanem ol gutpela samting i kamap long rot bilong autim “ol strongpela wok bilong God” long ol narapela?

¹⁹ Yu pilim olsem wanem long “ol strongpela wok bilong God” yu kisim save long en? Yumi tenkyu tru long yumi bin kisim save long tok i tru! Yumi bilip long ofa bilong Jisas Krais, na long dispela rot God i lusim tingting long sin bilong yumi. (Aposel 2:38) Olsem na yumi no sem long beten long God. Yumi no pret long dai olsem ol man husat i no gat bilip. Nogat. Yumi save long tok promis bilong Jisas olsem wanpela taim bai kamap na “olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:​28, 29) Jehova i bihainim gutpela pasin na givim save long yumi long ol dispela samting. Na tu, em i bin kapsaitim spirit bilong em long yumi. Olsem na pasin bilong tenkyu tru long ol dispela gutpela presen i mas kirapim yumi long daun long ol mak em i putim na givim bel long litimapim nem bilong em, na tokaut long ol man long ol dispela “strongpela wok.”

[Ol Futnot]

Bai Yu Bekim Olsem Wanem?

• Long Pentikos 33 C.E. ol manmeri i bin harim stori bilong wanem ol “strongpela wok”? Tok ol i harim i kirapim ol long mekim wanem?

• Man i mas mekim wanem bilong kamap wanpela disaipel bilong Jisas Krais? Wanem samting i insait long dispela wok disaipel?

• Bilong wanem em i bikpela samting long tingim pasin yumi bihainim long bilas?

• Yumi mas tingim wanem ol samting taim yumi laik skelim wanem kain klos i stret long werim?

[Piksa long pes 15]

Pita i tokaut olsem Jisas i kirap bek long matmat

[Ol Piksa long pes 17]

Yu ting pasin bilong yu long bilas i givim biknem long God yu lotu long en?

[Ol Piksa long pes 18]

Ol papamama Kristen i mas tingim pasin bilong ol wan wan bilong famili long bilas