Yupela Papamama—Stap Olsem Gutpela Piksa Ol Pikinini i Ken Bihainim

“OL SAVEMAN i bin wok inap wan handet yia bilong painim nambawan gutpela rot bilong mekim bikpela long ol pikinini na bai ol i ken lusim dispela wok. Tasol i no olsem ol i painim pinis dispela gutpela rot, nogat, i olsem dispela rot i no stap.” Em ol tok nius Time i mekim long wanpela buk i stori long wok bilong mekim bikpela long ol pikinini. Buk i tok, ol pikinini i save kisim ol tingting na pasin bilong ol wanlain bilong ol, na i no bilong papamama.

Tru tumas, ol wanlain i gat strong long pulim ol pikinini. (Sindaun 13:20; 1 Korin 15:33) Man bilong raitim nius, William Brown, i tok: “Pasin bilong bihainim ol tingting na laik bilong ol wanlain em bikpela samting tru long ol yangpela, olsem God bilong ol. . . . Ol yangpela i ting i no gat narapela samting i nogut moa winim pasin bilong i stap narapela kain long ol wanlain.” Sapos papamama i no kamapim pasin laikim na amamas insait long famili, o ol i no save lusim bikpela haptaim wantaim ol pikinini​—⁠olsem yumi lukim long planti famili long nau​—⁠i olsem papamama i opim dua long ol wanlain yangpela i paulim ol pikinini bilong ol.

Na tu, nau long “taim bilong las de” ol famili i kisim taim stret, long wanem, olsem Baibel i tok profet, ol man i tingting tumas long mani, na amamas, na ol samting bilong ol yet tasol. Olsem na yumi no kirap nogut long lukim ol pikinini i bikhet na ‘sakim tok bilong papamama, ol i no tenkyu, ol i givim baksait long ol pasin bilong God, ol i no stap pren bilong ol narapela.’​—⁠2 Timoti 3:​1-3.

Dispela tok long Baibel olsem “stap pren,” em i makim pasin bilong laikim narapela insait long famili. Dispela pasin sori i save pasim famili wantaim na i kirapim papamama long lukautim gut ol pikinini, na ol pikinini i pas gut wantaim papamama. Tasol taim papamama i no mekim gut long pikinini, em nau, pikinini bai go painim narapela lain em ol bai mekim gut long em​—⁠olsem ol wanlain, na ating em bai kisim ol tingting na pasin bilong ol na bihainim. Tasol ating dispela pasin i no ken kamap sapos papamama i larim ol stiatok bilong Baibel i bosim sindaun bilong famili.​—⁠Sindaun 3:​5, 6.

Famili​—⁠God Yet i Kamapim

Taim God i pasim pinis Adam na Iv olsem tupela marit, God i tokim tupela: “Yupela i mas kamap planti na i go sindaun long olgeta hap bilong graun.” Em nau, famili i kamap​—⁠i gat papa, mama, na ol pikinini. (Stat 1:28; 5:​3, 4; Efesus 3:​14, 15) Bilong helpim ol manmeri long mekim bikpela long ol pikinini, God i putim sampela pasin bilong mekim dispela wok long bel bilong ol. Tasol ol manmeri i no olsem ol animal; ol i mas i gat sampela helpim moa bilong mekim dispela wok, olsem na Jehova i raitim sampela stiatok bilong ol long Baibel. Sampela tok bilong stiaim ol em ol samting bilong stretpela pasin na bilong lotu, na bilong mekim stret wok bilong skulim na stretim ol pikinini.​—⁠Sindaun 4:​1-4.

God i tokim ol papa: “Ol dispela tok nau mi givim long yupela, yupela i mas putim long bel bilong yupela.” “Na yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.” (Lo 6:​6, 7; NW; Sindaun 1:​8, 9) Em nau, ol papamama i mas putim lo bilong God long bel bilong ol yet pastaim. Bilong wanem dispela em i bikpela samting? Long wanem, ol tok bilong skulim ol man na kirapim ol tru, em i no ol tok i kamap long maus tasol​—⁠em ol tok i kirap long bel na maus i autim. Taim papamama i skulim pikinini long ol tok i stap long bel bilong ol, long dispela taim tasol ol dispela tok bai i go daun long bel bilong pikinini. Na papamama bai stap olsem gutpela piksa bilong ol pikinini husat i save luksave kwik long ol pasin giaman.​—⁠Rom 2:⁠21.

Baibel i tokim ol papamama olsem taim ol pikinini i liklik yet ol i mas kirap “stretim gut ol . . . na skulim ol long tok bilong Bikpela.” (Efesus 6:4; 2 Timoti 3:15) Tru ol i mas kirap mekim taim pikinini i liklik yet? Yes! Wanpela mama i tok: “Sampela taim yumi ol papamama i ting ol pikinini i no inap skelim ol samting long tingting. Tasol ol inap mekim. Yumi ol papamama i mas helpim ol.” Tru tumas, ol pikinini i save laik tru long kisim save, na taim papamama i lotuim God ol i skulim ol pikinini, ol pikinini bai lain tu long laikim tru ol narapela. Ol lo ol papamama i putim, dispela bai helpim ol pikinini long i stap isi. Olsem na ol papamama husat i mekim gut dispela wok, ol i stap gutpela poroman bilong ol pikinini, toktok gut wantaim ol na isi long ol, tasol ol i strong long skulim ol, na dispela bai mekim na i gat gutpela pasin insait long famili bilong helpim ol pikinini long kamap gutpela.a

Lukautim Gut Ol Pikinini

Wanpela het tisa long Jemani i raitim pas long ol papamama na i tok: “Mipela i laik kirapim yupela ol gutpela papamama long wok strong long skulim ol pikinini taim yupela i mekim bikpela long ol, na yupela i no ken larim televisen o ol mangi bilong rot i mekim samting em i wok bilong yupela yet long mekim bilong helpim ol pikinini long kisim gutpela tingting na pasin.”

Bilong putim pikinini long han bilong televisen o ol mangi bilong rot i olsem yumi larim ol tingting bilong dispela graun i stiaim pikinini. (Efesus 2:​1, 2) Ol tingting o spirit bilong dispela graun i pait wantaim spirit bilong God. Dispela spirit bilong graun i olsem strongpela win i karim pikinini bilong gras nogut samting, olsem tingting ‘bilong dispela graun tasol, em i save kamap long olpela bel na Satan em i papa bilong en,’ na i olsem strongpela win i tromoi ol dispela samting i olsem pikinini bilong gras nogut i go long tingting na bel bilong ol man i no gat save o ol longlong man. (Jems 3:15) Dispela gras nogut i save bagarapim tingting i stap long bel bilong man. Jisas i mekim tok piksa long samting i save kamap taim ol tingting nogut i kamap long bel bilong man. Em i tok: “Gutpela man i gat planti gutpela tingting i stap long bel bilong en. Olsem na em i save mekim gutpela pasin. Man nogut em i gat planti tingting nogut i stap long bel bilong en. Olsem na em i save mekim pasin nogut. Kain tingting i pulap long bel, em maus i save autim.” (Luk 6:45) Olsem na Baibel i tok: “Gutpela tingting bilong stiaim laip bilong yu, em i save kamap long tingting [“bel,” NW ] bilong yu, olsem wara i save kamap long hul wara. Olsem na olgeta taim yu mas was gut tru long tingting bilong yu.”​—⁠Sindaun 4:⁠23.

Tru, ol pikinini i save mekim pasin olsem pikinini, na sampela i save bikhet na sakim tok. (Stat 8:21) Orait papamama i ken mekim wanem? Baibel i tok: “Ol pikinini i save mekim olkain longlong pasin. Tasol sapos yu givim kanda long ol, bai ol i lusim dispela pasin.” (Sindaun 22:15) Sampela man i ting long nau i no stret long mekim olsem long ol pikinini. Na Baibel i no orait long pasin bilong pait na mekim nogut long man. Tru, sampela taim dispela “kanda” em i kanda tru tru, tasol em i makim wok bilong papamama long bihainim pasin laikim na pasin i stret long skulim na stretim pikinini, long wanem, ol i laik helpim pikinini long i stap oltaim oltaim.​—⁠Hibru 12:​7-11.

Pilai na Amamas Wantaim Pikinini

Olgeta man i save pinis olsem, bilong pikinini i ken kamap gutpela, em i mas pilai na kisim amamas. Ol papamama i gat gutpela tingting ol i save mekim olkain pilai wantaim ol pikinini bambai ol i ken pas gut wantaim ol. Long dispela rot, papamama i stiaim pikinini long makim ol amamas i stret, na tu, ol i soim pikinini olsem ol i laik tru long poroman wantaim em.

Wanpela papa Witnes i tok, planti taim em i bin pilai bal wantaim pikinini man bilong em taim em i pinis wok na kam bek long haus. Wanpela mama i tok ol pikinini bilong em i save laik long pilaim ol liklik gem nabaut. Na wanpela meri i tok taim em i stap pikinini, famili i save kisim amamas long raun wantaim long baiskol. Long nau ol dispela pikinini i bikpela pinis, tasol laik bilong ol long papamama​—⁠na long Jehova​—⁠i strong yet na i wok long kamap strong moa.

Tru tumas, taim ol papamama i soim long rot bilong ol tok na pasin bilong ol olsem ol i laikim tru ol pikinini na ol i laik i stap wantaim ol, ol pikinini i save pilim yet dispela samting long bel taim ol i bikpela pinis. Planti sumatin long wanpela klas bilong Wastaua Baibel Skul Bilong Gileat ol i tok, samting i bin kirapim laik bilong ol long mekim wok bilong God fultaim, em pasin bilong papamama long i stap olsem gutpela piksa, na gutpela tok bilong strongim bel ol i bin givim long ol pikinini. Em gutpela samting tru ol dispela pikinini i bin kisim, na ol papamama tu i kisim gutpela blesing! Tru, i no olgeta pikinini inap insait long wok autim tok fultaim taim ol i kamap bikpela, tasol olgeta bai kisim gutpela samting na daun long papamama i save lotuim God, na papamama i kamap nambawan pren bilong ol na gutpela piksa ol pikinini i ken bihainim.​—⁠Sindaun 22:6; Efesus 6:​2, 3.

Ol Papa o Mama Wanpis

Long nau planti pikinini i kamap bikpela insait long famili i gat papa o mama tasol i stap. Tru, kain papa o mama olsem ol i gat hatwok moa, tasol wok bilong ol long mekim bikpela long ol pikinini em inap kamap gutpela. Ol i ken tingim stori bilong Yunis long Baibel, em i wanpela meri Juda i Kristen na em i bin stap long taim bilong ol aposel. Man bilong Yunis i no bilip, olsem na yumi ken ting em i no bin helpim Yunis long ol samting bilong lotuim God. Tasol Yunis i bin skulim gut Timoti. Kirap long taim Timoti i liklik yet, gutpela pasin bilong mama na bubu bilong em Lois i gat bikpela strong moa long stiaim Timoti, winim pasin nogut bilong sampela wankrismas bilong Timoti.​—⁠Aposel 16:​1, 2; 2 Timoti 1:5; 3:⁠15.

Planti yangpela long nau ol i kamap bikpela insait long famili em papa o mama i no bilip, o i gat papa o mama tasol i stap, na ol i kamapim ol wankain gutpela pasin olsem yangpela man Timoti. Yumi ken tingim Ryan, nau em i gat 22 krismas na em i save mekim wok bilong God fultaim. Em i kamap bikpela insait long famili i gat mama tasol na bikbrata wantaim susa bilong em. Papa em i man bilong dring na em i bin lusim famili taim Ryan i gat 4-pela krismas. Em i tok: “Mama i strong long mipela i mekim yet wok bilong Jehova, na em i givim bel tru long bihainim dispela tok em i bin pasim long bel.”

Na Ryan i tok: “Mama i strong long mipela i mas poroman wantaim ol pikinini i bihainim gutpela pasin tasol. Em i no bin larim mipela i bung wantaim ol lain em Baibel i tok ol i poroman nogut, maski ol i stap ausait o insait long kongrigesen. Na em i skulim gut mipela long stretpela tingting mipela i mas i gat long bikpela skul bilong graun.” Maski mama bilong Ryan i gat planti wok na planti taim skin bilong em i les, dispela i no bin pasim em long mekim ol samting bilong helpim ol pikinini. Ryan i tok: “Oltaim em i laik i stap wantaim mipela na toktok wantaim mipela. Em i isi long mipela tasol em i strong long skulim mipela, na oltaim em i strong long mekim famili Baibel stadi wantaim mipela. Na em i strong long mipela i mas bihainim gut ol stiatok bilong Baibel na no ken lusim liklik.”

Ryan i luksave olsem, namba wan samting tru i bin stiaim wokabaut bilong em wantaim brata na susa bilong em, em pasin bilong mama, em i laikim tumas God na ol pikinini bilong em. Olsem na yupela ol papamama Kristen​—⁠maski yupela i marit o poroman marit i dai pinis, o poroman i bilip o i no bilip​—⁠taim yupela i wok strong long skulim ol pikinini bilong yupela, yupela i no ken larim sampela bel hevi bilong dispela wok, o sampela pasin ol pikinini i mekim, i daunim yupela na mekim yupela i les. Sampela taim, sampela yangpela i save lusim tok i tru, olsem stori bilong Baibel long pikinini i bin lusim papa. Tasol taim ol i lukim olsem ol lain bilong dispela graun i tingim ol samting bilong nau tasol na i no gat sori liklik, ol inap kam bek. Tru tumas, “sapos papa i stretpela man na i save bihainim gutpela pasin, orait ol pikinini bilong en i ken amamas.”​—⁠Sindaun 20:7; 23:​24, 25; Luk 15:​11-24.

[Futnot]

[Blok/Ol Piksa long pes 11]

God i Makim Papamama Bilong Jisas

Taim Jehova i salim Pikinini bilong em i kam long graun na kamap nupela pikinini, Em i tingting gut na i makim papamama bilong en. Em i makim man na meri i gat pasin daun na ol i lotuim God, na ol i no larim pikinini i mekim laik bilong em yet, nogat; ol i skulim em long Tok Bilong God na long wok strong long mekim ol wok bilong em. (Sindaun 29:21; Krai 3:27) Josep i skulim Jisas long wok kamda, na ating Josep wantaim Maria ol i askim namba wan pikinini, Jisas, long em i mas helpim ol long lukautim ol liklik bratasusa bilong em, olsem 6-pela samting.​—⁠Mak 6:⁠3.

Yu ken tingim famili bilong Josep i wok gut wantaim long taim bilong Pasova bilong redim ol samting bilong go long Jerusalem, em olsem 200 kilomita long go na kam bek, na i no gat ka samting long dispela taim. Yumi save, dispela famili i gat olsem 9-pela long en, ol i mas stretim gut olgeta samting bambai ol i ken wokabaut longwe olsem. (Luk 2:​39, 41) Na maski i gat hatwok, yumi ken ting Josep na Maria i tingim dispela raun bilong ol i gutpela samting, na taim ol i wokabaut ating ol i bin skulim ol pikinini long ol bikpela samting i bin kamap bipo, em Baibel i stori long en.

Taim Jisas i stap yet wantaim papamama, “oltaim em i save bihainim tok bilong tupela,” na em i wok long “kamap bikpela, na save bilong en i kamap gutpela tru. Na God i laikim em tru na ol man tu i laikim em.” (Luk 2:​51, 52) Tru tumas, Josep na Maria ol inap tru long Jehova i ken bilip long ol. Tupela i stap olsem gutpela piksa tru ol papamama i ken bihainim long nau!​—⁠Song 127:⁠3.