Ol Mama​—Kisim Skul Long Eksampel Bilong Yunis

1-2. (a) Yunis em i husat, na olsem wanpela mama em i bungim wanem hatwok? (b) Stori long fran pes piksa.

BAIBEL i no stori long ol samting i kamap long de Timoti i kisim baptais, tasol yumi ken piksaim bikpela amamas mama bilong em, Yunis, i kisim long dispela de. (Prov. 23:25) Piksaim em i amamas tru taim em i lukim Timoti i sanap insait long wara. Em i smail taim bubu meri bilong Timoti, Lois, i sanap klostu na putim han long solda bilong em. Yunis i pulim win isi na em i holim win bilong em taim Timoti i go insait long wara. Wara i pairap bikpela, na Timoti i kamaut long wara na em i amamas tru, na Yunis i amamas na em i aiwara. Maski i hatwok, Yunis i bin skulim pikinini bilong em long laikim Jehova na Pikinini bilong em, Jisas Krais. Em i bungim wanem ol hatwok bilong skulim pikinini bilong em?

² Timoti i kamap bikpela long famili we papamama i gat narapela narapela lotu. Papa bilong em i bilong Grik, na mama na bubu meri bilong em i bilong lain Juda. (Apo. 16:1) Ating Timoti i bin tineja taim Yunis na Lois i joinim narapela lotu—lotu Kristen. Tasol papa bilong em i no kamap wanpela Kristen. Timoti bai bihainim wanem lotu? Ating em i bikpela pinis na em inap mekim ol disisen bilong em yet. Em bai bihainim lotu bilong papa bilong em? Em bai bihainim kastam bilong ol Juda we em i bin lainim taim em i liklik mangi? O em bai kamap wanpela disaipel bilong Jisas Krais?

 3. Olsem Provep 1:8, 9 i kamapim, Jehova i pilim olsem wanem long wok ol mama i mekim bilong helpim ol pikinini long kamap pren bilong Em?

³ Long nau tu, ol mama Kristen i laikim famili bilong ol. Winim olgeta narapela samting, ol i laik helpim ol pikinini bilong ol long kisim pasin bilong pas gut wantaim Jehova. Na God bilong yumi i tingim tru hatwok bilong ol. (Ritim Provep 1:8, 9.) Jehova i bin sambai long planti mama taim ol i helpim ol pikinini bilong ol long laikim em na mekim wok bilong em.

 4. Ol mama i bungim wanem ol hatwok long nau?

⁴ Sampela taim em nomol long wanpela mama inap tingting planti olsem pikinini bilong em bai mekim wok bilong Jehova olsem Timoti i bin mekim o nogat. Ol papamama i save olsem ol pikinini bilong ol i save bungim planti presa long dispela graun em Satan i bosim. (1 Pita 5:8) Na tu, planti mama i mas mekim bikpela long ol pikinini insait long famili i no gat papa, o man bilong ol i no lotuim Jehova. Olsem, wanpela sista nem bilong em Christineb i tok: “Man bilong mi em i gutpela papa na het bilong famili, tasol em i no laik bai mi mekim bikpela long ol pikinini long kamap ol Witnes Bilong Jehova. Insait long planti yia mi krai, na mi save tingting olsem ol pikinini bilong mi bai lotuim Jehova o nogat.”

 5. Yumi bai stori long wanem samting long dispela atikol?

⁵ Sapos yu wanpela mama Kristen, yu ken mekim gut wok bilong yu olsem Yunis i bin mekim. Long dispela atikol, yumi bai stori long hau yu ken bihainim eksampel bilong em long skulim ol pikinini bilong yu long rot bilong ol tok yu mekim na ol samting yu mekim. Na tu, yumi bai stori long hau Jehova bai helpim yu.

 6. Olsem 2 Timoti 3:14, 15 i kamapim, hau na Timoti i kamap wanpela Kristen?

⁶ Taim Timoti i liklik mangi, mama bilong em i givim bel tru long skulim em long “ol Rait Holi” long wei ol Juda i kliagut long en. Yunis i gat liklik save tasol bikos em i no save long wanpela stori bilong Jisas Krais. Maski i olsem, ol samting Timoti i lainim long Ol Skripsa inap helpim em long kamap wanpela Kristen. Tasol em bai kamap wanpela Kristen? Olsem wanpela yangpela man, Timoti i gat rait long makim olsem em bai kamap wanpela Kristen o nogat. I klia tru olsem mama bilong Timoti i “helpim [em] long bilip,” olsem na em inap bilip long tok i tru i stori long Jisas. (Ritim 2 Timoti 3:14, 15.) Yunis i amamas tru olsem em i bin skulim pikinini bilong em long Jehova maski i hatwok long mekim olsem! Yunis i inapim tru mining bilong nem bilong em, nem bilong em i kam long wanpela wed em mining bilong en “winim.”

 7. Olsem wanem Yunis inap helpim yet pikinini bilong em bihain long em i kisim baptais?

⁷ Taim Timoti i kisim baptais, em i winim wanpela bikpela mak long laip bilong em. Tasol Yunis i wari yet long pikinini bilong em bihain long em i kisim baptais. Pikinini bilong em bai mekim wanem long laip olgeta bilong em? Em bai bihainim ol poroman nogut? Em bai go skul long Atens na kirap bilipim ol tok giaman bilong ol saveman bilong lain haiden long dispela hap? Em bai westim taim, strong, na laip bilong em long wok strong long kamap maniman? Yunis i no inap mekim ol disisen bilong Timoti, tasol em inap helpim em. Hau? Em i ken wok strong yet long putim pasin bilong laikim Jehova na tenkyu long Pikinini bilong Em long bel bilong Timoti. Ol bratasista em poroman marit bilong ol i no stap long tok i tru, ol i save bungim ol hatwok long helpim ol pikinini long laikim Jehova. Na tu, maski papamama wantaim i stap long tok i tru, ol inap hatwok long helpim ol pikinini bilong ol long lotuim Jehova. Ol papamama inap lainim wanem samting long eksampel bilong Yunis?

 8. Ol meri marit i ken mekim wanem bilong helpim man bilong ol long lukautim ol pikinini long sait bilong bilip?

⁸ Stadi long Baibel wantaim ol pikinini bilong yu. Ol sista, sapos man bilong yu i stap long tok i tru, Jehova i laik bai yu helpim em long lukautim ol pikinini long sait bilong bilip. Wanpela rot yu ken mekim olsem em long sapotim Famili Lotu long olgeta taim. Mekim ol gutpela tok long taim bilong famili lotu, na tingim ol rot we yu inap mekim sampela samting bilong helpim yupela olgeta long enjoim famili lotu. Ating yu ken helpim man bilong yu long plenim wanpela Baibel stadi projek. Na tu, sapos sampela pikinini i winim pinis krismas we ol inap kisim helpim long pesenel Baibel stadi long buk Stap Amamas Oltaim!, orait yu ken helpim man bilong yu long stadi wantaim ol pikinini.

 9. Wanpela meri marit em man bilong em i no stap long tok i tru inap kisim helpim long we?

⁹ Sampela mama i mas go pas long stadi long Baibel wantaim ol pikinini bilong ol, ating ol i mekim olsem bikos ol i mama wanpis o man bilong ol i no stap long tok i tru. Sapos yu stap long kain famili olsem, no ken tingting planti. Jehova bai helpim yu. Yusim ol gutpela tul bilong skulim ol man em i givim long rot bilong oganaisesen bilong em long stadi wantaim ol pikinini bilong yu. Yu ken askim ol narapela ekspiriens papamama long hau ol i yusim ol dispela tul long famili lotu bilong ol.c (Prov. 11:14) Na tu, Jehova inap helpim yu long toktok gut wantaim ol pikinini bilong yu. Askim em long helpim yu long save long wanem samting i stap long bel na tingting bilong ol. (Prov. 20:5) Wanpela simpol askim olsem ‘Yu bungim wanem bikpela hatwok long skul?’ inap helpim yu long toktok gut wantaim pikinini.

10. Yu ken mekim wanem narapela samting bilong helpim ol pikinini long kisim save long Jehova?

¹⁰ Painim ol rot bilong skulim ol pikinini long Jehova. Stori long ol long Jehova na planti gutpela samting em i mekim bilong helpim yu. (Lo 6:6, 7; Ais. 63:7) Dispela em bikpela samting sapos oltaim yu no inap stadi wantaim ol pikinini bilong yu long haus. Christine em yumi stori pinis long em, em i tok: “Planti taim i no gat rot long mi ken stori wantaim ol pikinini long Jehova, olsem na wanem taim rot i op mi save mekim olsem. Mipela i save go wokabaut o kalap long kanu na pul i go aut na mi save tokim ol long ol naispela kriesen bilong Jehova na planti samting we inap helpim ol long kamap pren bilong em. Taim ol pikinini i kamap bikpela, mi kirapim ol long mekim stadi bilong ol yet long Baibel.” Na tu, taim yu toktok wantaim ol pikinini mekim ol gutpela tok long oganaisesen bilong Jehova na long ol bratasista bilong yu. No ken mekim ol tok bilong daunim ol elda. Ol tok yu mekim long ol, dispela bai helpim ol pikinini long kisim helpim long ol elda long taim ol i gat hevi o nogat.

11. Olsem Jems 3:18 i kamapim, wai na em i bikpela samting long strongim bel isi insait long famili?

¹¹ Strongim bel isi insait long famili. Long olgeta taim soim olsem yu laikim man bilong yu na ol pikinini bilong yu. Toktok long man bilong yu long gutpela pasin na long pasin rispek, na trenim ol pikinini long mekim wankain pasin. Taim yu mekim olsem, em bai isi moa long ol pikinini bilong yu long kisim save long Jehova. (Ritim Jems 3:18.) Skelim eksampel bilong Jozsef, em i spesel painia long Romenia. Taim em i wok long kamap bikpela, papa bilong em i mekim na i hatwok long em, mama, na ol bratasista bilong em long lotuim Jehova. Jozsef i tok: “Mama bilong mi i wok strong tru long kamapim bel isi insait long famili. Taim pasin bilong papa i wok long i go hat moa, mama i wok long mekim gutpela pasin moa yet long em. Taim em i luksave olsem mipela i hatwok long rispektim papa na bihainim tok bilong em, em i save stori wantaim mipela long Efesus 6:1-3. Na bihain em i save stori long mipela long ol gutpela pasin bilong papa na helpim mipela long kliagut long risen na mipela i mas laikim em. Long dispela rot em i helpim famili bilong mipela long stap bel isi.”

12. Olsem 2 Timoti 1:5 i kamapim, hau na gutpela eksampel bilong Yunis i helpim Timoti?

¹² Ritim 2 Timoti 1:5. Yunis i stap gutpela eksampel long Timoti. Ating em i skulim Timoti olsem bilip tru i stap ples klia long ol samting yumi mekim. (Jems 2:26) Timoti i lukim olsem mama bilong em i laikim tru Jehova na dispela i stap ples klia long ol samting em i mekim. Tru tumas, Timoti i lukim olsem mama bilong em i stap amamas taim em i mekim wok bilong Jehova. Hau gutpela eksampel bilong Yunis i helpim Timoti? Olsem aposel Pol i tok, Timoti i bihainim bilip bilong mama bilong em. Dispela samting i no kamap nating. Timoti i lukim gutpela eksampel bilong Mama na dispela i kirapim em long bihainim pasin bilong em. Wankain olsem, planti mama long nau “i no mekim wanpela tok” na ol i helpim ol wanfamili bilong ol long lotuim Jehova. (1 Pita 3:1, 2) Yu ken mekim wankain. Hau?

13. Wai na ol mama i mas putim pasin pren bilong ol wantaim Jehova i stap nambawan?

¹³ Putim pasin pren bilong yu wantaim Jehova i stap nambawan. (Lo 6:5, 6) Olsem planti mama, yu save daunim planti laik bilong yu. Yu lusim taim, mani, slip, na ol narapela samting bilong lukautim ol pikinini long ol samting ol i nidim. Tasol yu no ken bisi tumas long mekim ol dispela samting na yu no gat taim long strongim pasin pren bilong yu wantaim Jehova. Long olgeta taim makim taim bilong mekim ol beten bilong yu yet, mekim pesenel stadi long Baibel, na go long ol miting bilong kongrigesen. Taim yu mekim olsem, yu bai strongim yu yet long bilip, na yu bai stap gutpela eksampel long famili bilong yu na ol narapela tu.

14-15. Yu kisim wanem skul long eksampel bilong Leanne, Maria, na João?

¹⁴ Skelim eksampel bilong sampela yangpela em ol i kirap long laikim Jehova na trastim em bikos long ol samting ol i lainim long gutpela eksampel bilong mama bilong ol. Leanne em pikinini meri bilong Christine, na em i tok: “Mipela i no inap stadi long Baibel taim papa i stap long haus. Tasol Mama i save givim bel tru long go long olgeta miting. Maski mipela i no save long planti tok bilong Baibel, pasin bilong Mama i helpim mipela long kisim strongpela bilip. Mipela i luksave olsem dispela em i tok i tru paslain long mipela i kirap long go long ol miting.”

¹⁵ Maria, em sampela taim papa bilong em i save panisim famili bilong ol taim ol i go long ol miting, em i tok: “Mama bilong mi em wanpela sista i gat strongpela bel tru. Taim mi liklik, sampela taim mi no save laik mekim ol samting bikos mi save pret olsem ol narapela bai ting wanem long mi. Tasol taim mi lukim mama i gat strongpela bel na oltaim em i putim Jehova i stap nambawan long laip bilong em, dispela i helpim mi long daunim pasin bilong pret long ol man.” João, em papa bilong em i tambuim famili bilong ol long stori long ol samting bilong bilip long haus, em i tok: “Samting mi pilim tru long bel em olsem Mama i redi long lusim olgeta samting bilong amamasim papa bilong mipela, tasol Mama i no lusim pasin bilong em long laikim Jehova.”

16. Gutpela eksampel bilong ol mama Kristen inap mekim wanem long ol narapela?

¹⁶ Ol mama, tingim olsem eksampel bilong yu inap mekim sampela samting long ol narapela. Wai na yumi tok olsem? Tingim hau eksampel bilong Yunis i bin strongim aposel Pol. Em i luksave olsem bilip bilong Timoti i no gat pasin giaman long en, na “pastaim dispela bilip i bin stap long . . . Yunis.” (2 Tim. 1:5) Wanem taim Pol i luksave long bilip bilong Yunis? Ating em long fes misineri raun bilong em taim em i bin bungim Lois na Yunis long Listra, na em i helpim tupela long kamap Kristen. (Apo. 14:4-18) Tingim dispela: Taim Pol i raitim pas i go long Timoti​—inap 15 yia bihain—​Pol i tingim yet ol gutpela pasin bilong Yunis na em i kirapim ol narapela long bihainim eksampel bilong em! I klia tru olsem eksampel bilong Yunis i strongim tru dispela aposel na ol narapela Kristen long dispela taim. Sapos yu mama wanpis na yu mekim bikpela long ol pikinini o poroman marit bilong yu i bilong narapela lotu, yu ken save tru olsem gutpela eksampel bilong yu i strongim na helpim tru ol narapela.

17. Yu mas mekim wanem sapos yu lukim olsem pikinini i no bihainim ol samting em i lainim?

¹⁷ Olsem wanem sapos yu wok hat long skulim pikinini, tasol yu lukim olsem em i no bihainim ol samting em i lainim? Tingim olsem bikpela haptaim i mas lus bilong yu ken trenim wanpela pikinini. Olsem piksa i soim, taim yu planim wanpela liklik sid, sampela taim yu inap tingting olsem em bai gro na karim kaikai o nogat. Yu no inap kontrolim olsem em bai karim kaikai o nogat, tasol yu ken wok yet long givim wara bilong helpim em long gro. (Mak 4:26-29) Olsem tasol, olsem wanpela mama yu inap tingting planti olsem yu wok long putim tok i tru i go daun long bel bilong ol pikinini o nogat. Yu no inap kontrolim ol disisen ol pikinini bilong yu i mekim. Tasol sapos yu wok yet long mekim ol samting yu inap mekim bilong trenim ol, yu opim rot long ol i ken kamap strong long bilip.​—Prov. 22:6.

18. Olsem wanem Jehova inap helpim ol pikinini bilong yu long kamap strong long bilip?

¹⁸ Long taim bilong ol man i raitim Baibel, Jehova i bin helpim planti yangpela long kamap pren bilong em. (Sng. 22:9, 10) Em i ken helpim ol pikinini bilong yu tu long kamap strong long bilip, sapos dispela em laik bilong ol. (1 Kor. 3:6, 7) Maski sapos ol pikinini bilong yu i lusim Jehova, em bai wok yet long was long ol. (Sng. 11:4) Taim ol i soim olsem “bel bilong ol i gutpela,” em bai redi tasol long helpim ol long i go klostu long em. (Apo. 13:48; 2 Sto. 16:9) Em inap helpim yu long mekim rait tok long rait taim—taim ol pikinini bilong yu i nidim stret kain tok olsem. (Prov. 15:23) O em inap kirapim wanpela gutpela brata o sista long kongrigesen long tingim ol na helpim ol. Maski sapos ol pikinini bilong yu i kamap bikpela man o meri, Jehova inap helpim ol long tingim bek ol samting em yu bin skulim ol taim ol i liklik. (Jon 14:26) Taim yu wok yet long trenim ol pikinini long rot bilong ol tok na ol samting yu mekim, Jehova bai blesim hatwok bilong yu.

19. Wai na yu ken save tru olsem Jehova i amamas long yu?

¹⁹ Maski ol pikinini bilong yu i mekim wanem disisen, oltaim Jehova bai laikim yu. Em i laikim yu bikos yu laikim em. Sapos yu mama o papa wanpis, Jehova i promis olsem em bai kamap Papa bilong ol pikinini bilong yu na Man Bilong Lukautim yu. (Sng. 68:5) Yu no inap subim ol pikinini bilong yu long lotuim Jehova. Tasol sapos yu wok yet long trastim helpim yu kisim long Jehova na yu mekim olgeta samting yu inap mekim, Jehova bai amamas long yu.