Tingim Yet Olsem Taim i Sot Pinis
“Yu mas givim bel tru long autim tok.”—2 TIM. 4:2.
YU INAP STORI LONG DISPELA?
Bilong wanem ol Kristen long taim bilong ol aposel i mekim wok autim tok olsem taim i sot pinis?
Olsem wanem yumi ken holimpas tingting olsem taim i sot pinis?
Wanem samting i mekim na wok autim tok i bikpela samting moa long nau?
1, 2. Bai yumi kisim bekim bilong wanem ol askim long sait bilong autim tok?
OL MAN husat i gat wok long seivim laip bilong ol arapela, ol save givim bel tru long wok, ol i mekim olsem taim i sot pinis. Olsem, ol paiaman i go hariap taim haus i paia, long wanem, ol i save laip bilong ol man inap lus.
2 Yumi ol Witnes Bilong Jehova i laik helpim ol man na bai God i ken kisim bek ol. Dispela i as na wok bilong autim gutnius bilong Kingdom na skulim ol man long en i bikpela samting tru long yumi. Tru yumi givim bel long wok bilong yumi olsem taim i sot pinis, tasol i no olsem yumi mekim hariap tasol na yumi no tingting gut pastaim. Long 2 Timoti 4:2 Pol i tok, “Yu mas givim bel tru long autim tok.” Tok Grik ol i tanim olsem “givim bel tru” i makim tu pasin bilong “mekim wok olsem taim i sot pinis.” Olsem na wanem mining bilong tok bilong Pol? Olsem wanem yumi ken givim bel tru long autim tok olsem taim i sot pinis? Bilong wanem yumi mas mekim olsem?
WOK OLSEM TAIM I SOT PINIS—WAI?
3. Wanem samting inap painim ol man husat i harim tok bilong Kingdom? Wanem samting inap painim ol man i no harim?
3 Taim yu tingim olsem wanem wok autim tok bilong yumi inap seivim laip bilong man, ating yu pilim olsem em i bikpela samting long autim gutnius long ol arapela. (Rom 10:13, 14) Baibel i tok: “Mi save tokim ol man nogut, bai ol i mas i dai. Tasol sapos wanpela man bilong mekim sin, em i givim baksait long sin bilong en, na i wok long mekim stretpela pasin, . . . orait dispela man i no inap i dai. Nogat. Em bai i stap gut. Bai mi no ken tingim ol sin em i bin mekim bipo.” (Ese. 33:14-16) Baibel i tokim ol man i save autim gutnius: “Yu bai kisim laip na ol man i harim tok bilong yu, ol tu bai kisim laip.”—1 Tim. 4:16; Ese. 3:17-21.
4. Bilong wanem pasin bilong tromoi tok i tru i mekim na wok bilong autim tok long taim bilong ol aposel i bikpela samting tru?
4 Bilong kliagut long as na Pol i tokim Timoti long mekim wok autim tok olsem taim i sot pinis, yumi mas ritim tim skripsa wantaim ol ves i stap klostu long en. Ol dispela ves i tok: “Yu mas autim tok bilong God. Yu mas givim bel tru long autim tok bilong God long gutpela taim na long taim nogut. Yu mas stretim ol man, tok strong long ol, kirapim ol, na yu no ken les kwik long ol man na yu mas mekim gutpela wok tisa. Long wanem, wanpela haptaim bai kamap na ol man bai les long ol gutpela tok. Ol bai bihainim laik bilong ol yet na kisim ol tisa husat bai mekim ol tok em yau bilong ol i amamas long harim. Ol bai i no laik harim moa tok i tru, nogat.” (2 Tim. 4:2-4) Jisas i bin tok profet olsem bihain bai ol man i tromoi tok i tru. (Mat. 13:24, 25, 38) Olsem na Timoti i mas “autim tok bilong God” insait long kongrigesen tu na bai dispela pasin bilong tromoi tok i tru i no ken pulim ol Kristen na giamanim ol. Laip bilong ol inap lus. Olsem wanem long nau?
5, 6. Ol manmeri yumi bungim long autim tok i gat wanem ol bilip?
5 Dispela pasin bilong tromoi tok i tru i go bikpela na i kamap long planti hap. (2 Tes. 2:3, 8) Wanem ol tok giaman i pulim ol man long nau? Long planti hap ol i skulim ol man long evolusen, olsem em samting ol i bilip tru long en wankain olsem ol manmeri i bilip long lotu bilong ol. Maski ol i save kolim ol tok bilong saiens bilong eksplenim na sapotim evolusen, i olsem evolusen i kamap wanpela lotu, tasol em lotu i no gat God. Dispela bilip i bosim tingting ol man i gat long God na long ol arapela man. Narapela tok planti man i bilipim, em olsem God i no save tingim yumi, so yumi no ken tingim em. Bilong wanem planti milion manmeri i bilipim ol dispela tok we i pasim ol long pas gut wantaim God? Dispela tupela tok i mekim na ol manmeri i ting ol i ken mekim ol samting long laik bilong ol yet, long wanem, i no gat wanpela bilong kotim ol. Ating em ol tok ol i amamas long harim na bilipim.—Ritim Song 10:4.
6 Tasol i gat ol arapela samting ol man i bilipim. Sampela husat i go lotu i amamas long harim olsem maski ol i mekim wanem rong, God i laikim ol. Sampela man i amamas taim ol pris pasto i tokim ol olsem ol pasin bilong lotu, olsem misa, tingim ol bikpela de bilong lotu, na beten long ol imis, em inap helpim ol long kisim blesing i kam long God. Ating ol dispela man i no luksave olsem hevi inap painim ol. (Sng. 115:4-8) I olsem tingting bilong ol i slip na ol i no tingim laik bilong God. Tasol Kingdom bilong God inap helpim ol sapos yumi kirapim ol long lusim dispela slip na helpim ol long kliagut long tok i tru bilong Baibel.
AUTIM TOK OLSEM TAIM I SOT PINIS—I MAKIM WANEM SAMTING?
7. Olsem wanem yumi ken soim olsem yumi tingim taim i sot pinis?
7 Taim dokta i wokim operesen em i mas tingim tru wok em i mekim, long wanem, laip bilong sikman inap lus. Olsem tasol yumi ken soim olsem yumi tingim taim i sot pinis long rot bilong tingim tru wok autim tok. Yumi inap mekim olsem long rot bilong tingim gut ol toktok, ol askim, o ol arapela samting ol man i gat laik long stori long en. Na tu, yumi kliagut olsem dispela wok em i bikpela samting, olsem na ating yumi inap senisim sediul bilong yumi, na bai yumi ken go lukim ol man long taim we ol bai amamas moa long putim yau long tok bilong yumi.—Rom 1:15, 16; 1 Tim. 4:16.
8. Taim yumi mekim wok olsem taim i sot pinis, dispela i makim wanem?
8 Na tu, taim yumi mekim wok olsem taim i sot pinis, bai yumi mekim ol bikpela samting pastaim. (Ritim Stat 19:15.) Kain olsem: Yu go long haus sik na ol i sekim yu na nau dokta i singautim yu long ofis bilong en, na tok: “Yu gat wanpela bikpela sik, na insait long wanpela mun yu mas mekim samting bilong stretim dispela sik.” Bai yu mekim wanem? Ating yu no inap lusim ofis wantu na mekim samting bilong stretim dispela sik. Nogat. Bai yu putim gut yau long tok dokta i mekim long samting em i ting yu mas mekim, na bihain bai yu go long haus na wokim disisen long samting yu bai mekim.
9. Bilong wanem yumi ken tok olsem, taim Pol i stap long Efesus em i bin mekim wok autim tok olsem taim i sot pinis?
9 Taim yumi ritim tok Pol i mekim long ol elda long Efesus long wok autim tok bilong em long provins Esia, yumi ken kisim skul long pasin bilong em long mekim wok olsem taim i sot pinis. (Ritim Aposel 20:18-21.) Kirap long namba 1 de em i kam kamap long hap, em i bisi long go long ol haus bilong ol man na autim gutnius long ol. Na inap 2-pela yia, “long olgeta de em i mekim ol tok long haus bung bilong skul bilong Tiranus.” (Apo. 19:1, 8-10) Pasin bilong Pol long mekim wok olsem taim i sot pinis i bosim ol samting em i mekim. Dispela tok olsem yumi mas mekim wok autim tok olsem taim i sot pinis, i no bilong kirapim yumi long ting olsem dispela wok i bikpela tumas long yumi mekim. Tasol wok autim tok i mas i stap olsem wanpela bikpela samting tru long laip bilong yumi.
10. Bilong wanem yumi ken amamas olsem ol Sumatin Bilong Baibel i bin mekim wok autim tok olsem taim i sot pinis?
10 Paslain long 1914 ol Sumatin Bilong Baibel, i kirap mekim wok autim tok. Eksampel bilong ol i kamapim klia pasin bilong mekim wok olsem taim i sot pinis. Maski ol i liklik lain tasol, ol i save ol i stap long wanpela bikpela taim na ol i kirap givim bel long autim gutnius bilong Kingdom. Long planti handret niuspepa ol i prinim ol tok bilong Baibel, na ol i soim piksa “Photo-Drama of Creation,” em wanpela muvi i gat ol slait na ol kala kala piksa. Long wok ol Sumatin Bilong Baibel i mekim, planti milion manmeri i harim gutnius. Ol Sumatin Bilong Baibel i bin mekim wok olsem taim i sot pinis, na long dispela rot planti bilong yumi i bin harim tok bilong Kingdom.—Ritim Song 119:60.
HOLIMPAS TINGTING OLSEM TAIM I SOT
11. Bilong wanem sampela i lusim pasin bilong tingim olsem wok bilong Jehova i nambawan?
11 Kain kain samting inap pulim nabaut tingting bilong yumi na yumi no tingim olsem wok autim tok em i bikpela samting. Satan i yusim ol samting bilong dispela graun long pulim yumi long bisi long ol samting bilong yumi yet na ol arapela samting, na bai yumi no tingim tumas wok bilong Jehova. (1 Pita 5:8; 1 Jon 2:15-17) Bipo sampela i putim wok bilong Jehova i stap nambawan, tasol nau ol i no mekim olsem. Olsem Demas, em wanpela Kristen husat i bin wok wantaim aposel Pol, tasol bihain tingting bilong dispela graun i pulim em. Em i no stap wantaim Pol na strongim em long taim bilong hevi, nogat, Demas i lusim em.— 2 Tim. 4:10; File. 23, 24.
12. Yumi inap mekim wanem wok long nau? Yumi inap mekim wanem samting long bihain?
12 Sapos yumi laik holimpas dispela tingting olsem taim i sot pinis, yumi mas sakim ol samting i save pulim yumi long lusim wok autim tok. Yumi mas wok hat long “holim strong dispela laip em i laip tru.” (1 Tim. 6:18, 19) Yumi save gut olsem taim yumi kisim laip oltaim long graun aninit long Kingdom Bilong God, bai yumi amamas long mekim planti samting. Tasol wok yumi mekim nau bilong helpim ol man long winim Armagedon bai i no inap kamap gen.
13. Yumi mas mekim wanem bilong holimpas tingting olsem taim i sot pinis?
13 Klostu olgeta manmeri i no save long Jehova. So yumi mas mekim wanem bilong holimpas tingting olsem taim i sot pinis? Ating bipo yumi no bin save long God na yumi no wetim gutpela samting bai kamap bihain. Tasol yumi kisim save long Jehova na Jisas, na nau yumi gat gutpela wok long skulim ol arapela long tok i tru. (Ritim Efesus 5:14.) Pol i tok: “Yupela i mas was gut tru long wokabaut bilong yupela. Yupela i no ken wokabaut olsem ol man i no gat savetingting, nogat, yupela i mas wokabaut olsem ol man i gat savetingting. Yupela i mas yusim gut taim bilong yumi, long wanem, nau em i taim nogut.” (Efe. 5:15, 16) Long dispela graun bilong Satan, em bikpela samting long yumi mas mekim ol wok i helpim yumi long i stap klostu long Jehova.
YUMI STAP LONG TAIM BILONG PINIS
14-16. Wanem samting i mekim na wok autim tok i bikpela samting moa long nau?
14 Kirap long bipo yet na i kam, wok autim tok bilong ol Kristen i bikpela samting. Tasol nau em i bikpela samting moa yet. Kirap long 1914 na i kam yumi lukim planti samting i kamap long graun i wankain stret olsem Baibel i tok profet long en. (Mat. 24:3-51) Long nau bagarap inap painim olgeta man. Maski ol strongpela kantri i wokim ol kontrak bilong stap wanbel, ol i holim yet 2,000 nuklia roketbom ol i ken sutim i go long olgeta hap. Ol gavman i tok, planti samting bilong wokim bom nuklia i lus. Yu ting sampela teroris i holim sampela bilong ol dispela samting? Sampela i tok olsem olgeta manmeri inap bagarap long wanpela woa em ol teroris i kirapim. Tasol i gat ol arapela samting tu inap bagarapim olgeta manmeri, i no woa tasol.
15 Nius The Lancet na Yunivesiti Kolis, London, i bin kamapim ripot long 2009 i tok long taim bilong yumi olsem: “Senis bilong weda em i namba 1 samting i laik givim hevi long olgeta manmeri long graun.” Ripot i tok dispela senis inap bagarapim helt bilong klostu olgeta manmeri, na laip bilong planti bilion man inap lus. Kain kain samting inap mekim na planti hap inap kisim bagarap, olsem, mak bilong solwara i go antap, bikpela san, ol tait wara, ol saiklon, na ol woa i kirap bikos ol man i sot long ol samting. Tru tumas, ol woa na ol bikpela bagarap i laik bagarapim ol man.
16 Sampela inap ting olsem nuklia woa inap kamapim ol samting i truim tok profet bilong Jisas long las de. Tasol klostu olgeta man i no kliagut long mining bilong tok profet bilong Jisas. Inap planti yia pinis, yumi lukim ol samting i soim olsem tru tru Jisas i kam i stap na pinis bilong pasin nogut bilong nau i kam klostu. (Mat. 24:3) I no gat narapela taim we yumi bin lukim planti samting i kamap i truim tok profet bilong Jisas. Nau em taim bilong ol man long luksave olsem ol i mas pas gut wantaim God. Autim tok yumi mekim inap helpim ol.
17, 18. (a) Yumi stap long taim bilong las de. Dispela i mekim wanem long yumi? (b) Wanem samting inap kirapim ol man long harim tok bilong Kingdom?
17 Yumi gat sotpela taim tasol bilong kamapim olsem yumi laikim Jehova na bilong pinisim wok em i givim yumi long mekim long dispela taim bilong las de. Tok Pol i mekim long ol Kristen long Rom em i bikpela samting long yumi long nau, em i tok: “Yupela i save long dispela taim nau yumi stap long en. Nau em taim bilong yupela long lusim slip na kirap. Long wanem, taim bilong God long kisim bek yumi em i klostu moa, winim taim yupela i bin kirap bilip long Jisas.”—Rom 13:11.
18 Ol samting em ol tok profet i makim bai kamap long las de inap helpim ol man long luksave olsem ol i mas pas gut wantaim God. Sampela i save harim tok bilong Kingdom taim ol i luksave olsem ol gavman i no mekim gutpela wok. Ol gavman i no inap pinisim hevi bilong mani, pret long pait nuklia, pasin raskol, o ol man i bagarapim graun. Sampela i harim tok bilong Kingdom taim ol i gat ol hevi insait long famili, olsem bikpela sik, divos, o wanpela ol i laikim tumas i dai. So taim yumi autim tok, yumi inap helpim ol kain man olsem.
OL I PILIM TRU OLSEM TAIM I SOT PINIS
19, 20. Planti Kristen i pilim olsem taim i sot pinis, olsem na dispela i kirapim ol long mekim wanem?
19 Planti Kristen i pilim tru olsem taim i sot pinis, olsem na ol i mekim sampela senis bilong ol i ken mekim bikpela wok moa long autim tok. Olsem, tupela yangpela marit long Ekwado i kirap lusim sampela samting bilong ol yet bihain long ol i harim program bilong Spesel De Kibung bilong 2006, “Ai i Mas Holim Wanpela Tingting.” Ol i wokim lista long ol samting ol i no gat wok long en. Na insait long 3-pela mun ol i lusim flet i gat 3-pela rum slip na ol i go sindaun long flet i gat 1-pela rum slip. Ol i salim sampela kago, na bekim olgeta dinau bilong ol. I no longtaim na ol i kirap mekim wok painia haptaim na ol i bihainim tok bilong wasman sekit long i go long wanpela kongrigesen i sot long ol pablisa.
20 Wanpela brata long Amerika i tok: “Taim mi na meri bilong mi i go long wanpela kibung bilong 2006, mipela i bin baptais inap 30 yia pinis. Bihain long kibung, taim mipela wok long draiv i go bek long haus, mipela i stori long olsem wanem mipela inap bihainim tok na lusim sampela samting.” (Mat. 6:19-22) Ol i gat 3-pela haus, hap graun, ol kar bilong maniman, wanpela bot, na wanpela haus kar. Ol i pilim olsem ol i westim taim na strong bilong ol long bungim mani kago, olsem na ol i pasim tok long putim mak bilong mekim wok painia oltaim. Long 2008 ol i kirap painia wantaim pikinini meri bilong ol. Ol i kisim bikpela amamas taim ol i lukim ol man i harim na kliagut long tok i tru bilong Baibel. Brata i tok moa olsem: “Mipela kisim bikpela amamas long wok gut wantaim ol brata! Mipela i bin mekim wok long hap i no gat planti pablisa. Na tu, mipela i mekim bikpela wok moa bilong Jehova na dispela i helpim mipela long i go klostu moa long em.”
21. Yumi save long wanem samting na dispela i kirapim yumi long mekim wok autim tok olsem taim i sot pinis?
21 Yumi save olsem klostu nau “de bilong bikpela kot” bai kamap na “ol man i sakim tok bilong God, ol bai bagarap olgeta.” (2 Pita 3:7) Yumi save long Tok Bilong God, olsem na yumi givim bel long autim tok long dispela traipela hevi tru bai kamap na long nupela taim bai kamap. Yumi pilim yet olsem taim i sot pinis na yumi tokim ol man long gutpela samting em bai kamap bihain na ol inap bilip tru long en. Taim yumi mekim wok autim tok olsem taim i sot pinis, yumi kamapim olsem yumi laikim God na ol manmeri.