Tok Bilong Jehova i Gat Laip
Sampela Bikpela Tok Bilong Ol Pas i Go Long Taitus, Filemon, na Ol Hibru
APOSEL Pol i bin kalabus long Rom long namba wan taim, na liklik taim bihain long em i lusim kalabus long 61 C.E., em i go long ailan Krit. Taim Pol i lukim olsem ol kongrigesen long Krit i mas strongim pasin bilong ol long pas gut wantaim Jehova, em i askim Taitus long i stap wantaim ol. Bihain, ating taim Pol i stap long Masedonia, em i raitim wanpela pas i go long Taitus bilong stiaim em long mekim ol wok bilong em na Pol i kamapim olsem Taitus i kisim namba long Pol bilong mekim dispela wok.
Paslain liklik long Pol i lusim kalabus long 61 C.E., em i raitim wanpela pas i go long pren bilong em Filemon, em wanpela brata Kristen i sindaun long Kolosi. Em wanpela pas i go long wanpela pren.
Long 61 C.E. samting, Pol i raitim tu wanpela pas i go long ol bilipman Hibru i stap long Judia, na dispela pas i soim olsem pasin Kristen i winim pasin em ol Juda i stap aninit long en. Dispela tripela pas i gat ol gutpela tok bilong helpim yumi.—Hi. 4:2.
BILIP TRU LONG GOD
Taim Pol i givim pinis sampela tok bilong stiaim Taitus long “makim ol hetman bilong sios long olgeta taun,” em i tokim Taitus long “givim strongpela tok long ol [man bilong sakim tok], bilong stretim gut pasin bilong ol, bai ol i bilip tru long God.” Em i tokim olgeta manmeri long ol kongrigesen long Krit long ol i mas “lusim pasin bilong givim baksait long God na . . . tingting gut na wokabaut stret.”—Ta. 1:5, 10-13; 2:12.
Pol i givim sampela tok moa bilong helpim ol brata long Krit long stap gut long ol samting bilong spirit. Em i tokim Taitus long em i “no ken putim yau long ol kranki tok bilong ol man . . . na long pait long toktok long as bilong ol tok i stap long lo bilong Moses.”—Ta. 3:9.
Bekim Bilong Ol Askim Bilong Baibel:
1:15—Olsem wanem ‘olgeta samting’ i ‘klin long ol manmeri i stap klin,’ tasol i doti long ‘ol manmeri i bihainim pasin i doti na i no save bilip long Krais’? Bilong save long bekim bilong dispela askim, yumi mas kliagut long tingting bilong Pol long dispela tok ‘olgeta samting.’ Em i no toktok long ol samting em ol lo bilong Baibel i tambuim, nogat, em i toktok long ol samting em Baibel i larim ol bilipman yet i ken skelim na bihainim maus bilong bel bilong ol. Long ol man em tingting bilong ol i stret wantaim ol lo bilong God, ol dispela samting i klin. Tasol long ol man em tingting bilong ol i no wok gut na bel bilong ol i doti, olgeta samting i doti.a
3:5—Olsem wanem God i “kisim bek” ol Kristen em i bin makim taim em i “wasim” ol na ‘Holi Spirit i givim nupela laip long ol’? God i “wasim” ol bilong “kisim bek” ol, olsem God i bin klinim ol long rot bilong blut bilong Jisas em i bin givim bilong baim bek ol man. ‘Holi Spirit i givim nupela laip long ol,’ na ol i kamap “nupela man tru” olsem ol pikinini bilong God em holi spirit i makim.—2 Ko. 5:17.
Skul Yumi Kisim:
1:10-13; 2:15. Ol wasman Kristen i mas i gat
strongpela bel bilong stretim ol samting i no stret insait long kongrigesen.
2:3-5. Olsem long taim bilong ol aposel, ol strongpela sista Kristen long nau i mas “wokabaut long pasin God i laikim. Ol i no ken tok nogut long ol arapela. Ol i no ken larim wain i bosim tingting bilong ol. Ol i mas skulim ol arapela long mekim gutpela pasin.” Long dispela rot, ol inap mekim gutpela wok long skulim “ol yangpela meri” bilong kongrigesen.
3:8, 14. Pasin bilong “wok strong long mekim ol gutpela pasin . . . i save helpim [yumi], na em i samting tru,” long wanem, em i helpim yumi long mekim planti gutpela wok bilong God, na i helpim yumi long i stap longwe long ol pasin nogut bilong dispela graun.
GIVIM STRONGPELA TOK NA MEKIM WANTAIM ‘PASIN LAIKIM’
Aposel Pol i tok amamas long Filemon long em i stap olsem gutpela piksa long pasin bilong ‘givim bel tru long Jisas na bilip tru long em.’ Filemon i save strongim tru bel bilong ol wanwok Kristen, na dispela i givim “amamas moa yet” long Pol na “bel bilong [em] i stap isi tru.”—Fm. 4, 5, 7.
Pol i olsem gutpela piksa long olgeta wasman. Em i stretim ol samting bilong Onesimus long ‘pasin laikim,’ na em i no givim strongpela tok long Filemon. Em i tokim Filemon olsem: “Mi save gut olsem, yu bai bihainim dispela tok bilong mi, olsem na mi raitim dispela pas long yu. Mi save, pasin yu bai mekim long Onesimus, em bai i winim tru dispela pasin nau mi askim yu long mekim.”—Fm. 8, 9, 21.
Bekim Bilong Ol Askim Bilong Baibel:
Filemon 10, 11, 18—Bipo Onesimus “i no save mekim gutpela wok,” tasol olsem wanem na nau em i “mekim gutpela wok”? Onesimus i no laik i stap olsem wokboi nating na em i ranawe long bos bilong em Filemon husat i stap long Kolosi. Onesimus i ranawe i go long Rom. Ating Onesimus i stilim tu sampela mani samting long bos bilong em bilong baim rot bilong em i go long Rom—Rom i stap longwe olsem 1,400 kilomita. Tru tumas, em i no bin mekim gutpela wok bilong helpim Filemon. Tasol long Rom, Pol i helpim Onesimus long kamap Kristen. Nau em i wanpela Kristen, olsem na dispela man bipo “i no save mekim gutpela wok” nau em i “mekim gutpela wok.”
Filemon 15, 16—Bilong wanem Pol i no askim Filemon long larim Onesimus i go fri? Pol i laik stap gut long wok bilong em long ‘autim tok bilong kingdom bilong God na skulim ol manmeri long ol tok bilong Bikpela Jisas Krais.’ Olsem na em i no laik insait long ol wok bilong helpim sindaun bilong man, olsem stretim ol hevi bilong ol wokboi nating.—Ap. 28:31.
Skul Yumi Kisim:
Filemon 2. Filemon i orait long ol miting Kristen i kamap long haus bilong em. Em wanpela gutpela samting long yumi ken larim ol brata i mekim bung bilong autim tok long haus bilong yumi.—Ro. 16:5; Kl. 4:15.
Filemon 4-7. Em i gutpela samting long yumi tok amamas long ol wanbilip bilong yumi long strongpela bilip bilong ol na pasin bilong ol long laikim tru ol arapela.
Filemon 15, 16. Sapos sampela samting long sindaun bilong yumi i no gutpela tumas, yumi no ken larim dispela i mekim na yumi tingting planti tumas. Ol samting i kamap inap helpim yumi, olsem i bin kamap long Onesimus na i bin helpim em.
Filemon 21. Pol i tingting olsem Filemon i mas lusim rong bilong Onesimus. Yumi tu i mas lusim tingting long rong wanpela brata i bin mekim long yumi.—Mt. 6:14.
“KISIM OLKAIN SKUL BILONG OL MAN I BIKPELA PINIS”
Bilong soim olsem pasin bilong bilip long ofa bilong Jisas i winim ol wok bilong Lo, Pol i kamapim olsem Man Bilong Kamapim lotu Kristen, wok pris bilong em, ofa bilong em, na nupela kontrak, ol dispela samting i nambawan tru. (Hi. 3:1-3; 7:1-3, 22; 8:6; 9:11-14, 25, 26) Dispela save i bin helpim tru ol Kristen Hibru long karim hevi long ol pasin birua ol Juda i bin mekim long ol. Pol i kirapim ol wanbilip Hibru long “kisim olkain skul bilong ol man i bikpela pinis.”—Hi. 6:1, 2.
Pasin bilong bilip i bikpela samting long ol Kristen olsem wanem? Pol i tok: “Man i no bilip long God, em i no inap bihainim laik bilong God.” Em i kirapim ol Hibru olsem: “Yumi mas strongim bel na ran strong long dispela resis God i bin makim bilong yumi ran long en,” na yumi mas mekim olsem long pasin bilong bilip.—Hi. 11:6; 12:1.
Bekim Bilong Ol Askim Bilong Baibel:
2:14, 15—Satan “i gat strong bilong mekim ol manmeri i dai.” Olsem wanem? Dispela i makim olsem em i gat strong long kilim ol man i dai, maski i no taim yet bilong ol long i dai? Nogat, em i no inap. Tasol kirap long taim Satan i mekim pasin nogut long Iden, ol tok giaman bilong em i mekim na ol man i dai, long wanem, Adam i bin mekim sin na i givim sin na dai long olgeta man bilong graun. (Ro. 5:12) Na tu, ol lain bilong graun em ol i bihainim laik bilong Satan ol i bin mekim nogut long ol wokman bilong God na kilim planti i dai, olsem ol i bin mekim long Jisas. Tasol dispela i no makim olsem Satan i gat strong bilong kilim olgeta man em i gat laik long kilim ol i dai, nogat. Sapos em inap long mekim olsem, yumi save olsem longtaim yet em i pinisim olgeta manmeri i lotuim Jehova. Jehova i lukautim lain bilong em olsem wanpela grup na em i no larim Satan i pinisim ol. Tru, God i larim Satan i kilim i dai sampela bilong yumi, tasol yumi ken bilip tru olsem God inap stretim olgeta samting nogut Satan i mekim long yumi.
4:9-11—Olsem wanem yumi inap ‘i go insait long malolo bilong God’? Long pinis bilong namba 6 de long taim God i wokim ol samting, em i malolo long ol dispela wok, em i save tru olsem ol samting em i tingting pinis long mekim long dispela graun na long ol manmeri, em bai kamap tru. (Stt. 1:28; 2:2, 3) Yumi inap ‘i go insait long dispela malolo’ taim yumi sakim pasin bilong ting olsem yumi stretpela man, na yumi bilip long ofa bilong Krais long kisim bek yumi. Taim yumi bilip strong long Jehova na bihainim tok bilong Pikinini bilong em na yumi no bihainim laik nogut bilong yumi yet, yumi inap kisim ol gutpela blesing na malolo long olgeta de.—Mt. 11:28-30.
9:17—Husat dispela “man i mekim” nupela kontrak? Jehova em i As bilong nupela kontrak, tasol Jisas em i dispela “man i mekim kontrak.” Jisas em i Namelman bilong dispela kontrak, na long rot bilong indai bilong em, em i givim ofa bilong strongim dispela kontrak.—Lu. 22:20; Hi. 9:15.
11:10, 13-16—Wanem dispela “taun” Abraham i wetim? Em i no wanpela taun tru tru, em tok piksa tasol. Abraham i wetim “taun Jerusalem i stap long heven,” em Krais Jisas na ol 144,000 manmeri i wok king wantaim em. Dispela lain i wok king wantaim Krais na i kisim pinis biknem long heven, Baibel i kolim ol tu olsem “taun bilong God, em nupela Jerusalem.” (Hi. 12:22; KTH 14:1; 21:2) Abraham i wetim dispela taim long i stap aninit long Kingdom Bilong God.
12:2—Jisas i tingting long wanem “amamas” na ‘em i stap strong na i dai long diwai’? Em amamas bilong lukim ol gutpela samting wok autim tok bilong em bai kamapim—olsem mekim nem bilong Jehova i stap holi, kamapim klia olsem God tasol i nambawan bos, na baim bek olgeta manmeri long i dai. Na tu, Jisas i wetim gutpela prais bilong mekim wok olsem King na Hetpris bilong helpim olgeta manmeri.
13:20—Bilong wanem Baibel i tok nupela kontrak i bilong “stap oltaim”? I gat 3-pela as, olsem: (1) Bai i no gat senis bilong en, (2) ol gutpela samting dispela kontrak i kamapim bai stap oltaim, na (3) “ol arapela sipsip” bai kisim yet ol gutpela samting bilong dispela nupela kontrak bihain long Armagedon.—Jo. 10:16.
Skul Yumi Kisim:
5:14. Yumi mas i stap gutpela sumatin bilong Baibel, na bihainim ol samting yumi lain long en. I no gat narapela rot long “skelim wanem ol pasin i gutpela na wanem ol pasin i nogut, na nau [yumi] save gut pinis na tingting bilong [yumi] i klia.”—1 Ko. 2:10.
6:17-19. Taim Baibel na tok promis bilong God i as bilong samting yumi bilip na wet long en, dispela bai helpim yumi na yumi no ken lusim pasin bilong wokabaut long rot bilong tok i tru.
12:3, 4. Taim ol liklik traim o pasin birua i painim yumi, yumi ‘no ken les long sanap strong, na bel bilong yumi i guria,’ nogat. Yumi mas wok long kamap strongpela Kristen na strongim bel bilong yumi long karim ol hevi. Yumi mas tingting strong na redi long sanap strong i go inap long ‘blut bilong yumi i kapsait,’ olsem inap long yumi dai.—Hi. 10:36-39.
12:13-15. Yumi no ken larim “diwai i karim kaikai i gat pait”—olsem wanpela insait long kongrigesen i sutim tok long ol pasin ol Kristen i mas bihainim—i pasim yumi long “wokabaut long ol stretpela rot.”
12:26-28. Ol samting God i no bin “wokim”—olsem pasin bilong dispela graun, na “skai” nogut—ol bai guria na pinis. Taim dispela samting i kamap, “ol samting em i no inap mekim ol i guria,” em Kingdom na ol man i sapotim Kingdom, ol dispela samting bai stap. Em i bikpela samting long yumi mas givim bel tru long autim tok bilong Kingdom na bihainim ol stiatok bilong en, a?
13:7, 17. Pasin bilong bihainim tok bilong ol wasman bilong kongrigesen na aninit long ol bai helpim yumi long wok gut wantaim.
[Futnot]