Ripot long Wok Bilong Kingdom
Tok i Tru Bilong Baibel “i Wok Strong i Stap”
OL MAN bilong graun i save lusim bikpela hap taim na mani bilong pasim ol man bambai ol i no ken mekim pasin nogut. Ol i putim lo na tambuim pasin bilong kisim drak, na stil, na kilim man i dai; tasol ol dispela lo i no kirapim ol man nogut long tanim bel na bihainim gutpela pasin. Nogat. Tasol Tok Bilong God, em Baibel, em i gat strong bilong kirapim ol man long senisim pasin bilong ol, na ol manmeri i bihainim ol lo na tok bilong Baibel ol i kamap stretpela man, ol i no save stil o giaman, na ol i bihainim pasin daun.—Rom 12:2.
◻ Olsem: Tupela Witnes long Australia i go bek lukim sampela yangpela man ol i no gat wok. Ol i kamap long haus ol dispela yangpela man i stap long en na ol i go insait long wanpela rum i tudak na smok i pulap long en. Ol samting bilong kisim drak maruana i stap long tebol, na i gat ol bikpela piksa bilong ol man i save wokim rokmusik i stap long banis. Long wanpela hap bilong rum ol bikpela bikpela masin i stap em bilong mekim krai bilong lektrik-gita i go bikpela. Wanpela ben i pilaim rok-musik ol i save praktis long dispela rum. Tupela Witnes hia i bin kirapim Baibel-stadi long 3-pela bilong ol dispela yangpela man, em ol i brata wanblut. Sampela yia bipo mama bilong ol i bin stadi wantaim ol Witnes na lainim tok bilong Baibel long rot bilong buk Yu Inap i Stap Oltaim long Paradais long Graun. Mama i bin lainim tripela long tok promis bilong God long paradais bai kamap. Bihain dispela famili i lusim hap ol i stap long en na ol i go sindaun long narapela hap na mama i no stadi moa. Nau 3-pela hia i amamas long harim gen ol tok i tru ol i bin laikim tumas, na kwiktaim tupela poroman bilong ol tu i insait long stadi.
Tripela mun bihain na wanpela i kirap long autim tok. Wanpela mun moa na narapela tupela i kirap long mekim. Ol i lusim dispela ben, na insait long 4-pela mun tripela wantaim i insait long wok bilong autim tok. Na mama bilong ol wantaim liklik brata bilong ol na bikpela susa bilong ol em i marit pinis, ol tu i kirap long stadi long Baibel. Liklik taim bihain narapela poroman bilong ol i tok em i laik stadi. Ol Witnes i amamas tru long lukim 5-pela ol i kisim baptais wantaim long wanpela kibung sekit! Tupela moa i wok long kamap strong bambai ol inap kisim baptais, na mama wantaim pikinini meri bilong em, tupela tu i wok long kamap strong. Tru tumas, Tok Bilong God i wok strong i stap.
◻ Wanpela man long Ajentina em i gat wanpela wokboi em i save les na giaman na em i gat bikpela dinau long bos bilong em. Bihain dispela wokboi i kirap lusim em na i go pinis. Sampela yia bihain man hia i bungim dispela wokboi long rot klostu long haus bilong em. Wokboi i tok, “Mi laik i go lukim yu long haus na mi kam long dispela hap. Mi laik bekim dinau. Em hia mani bilong yu. Tenkyu tru. Mi no bekim kwik, tasol plis, yu mas lusim tingting long rong bilong mi.” Dispela bos bilong em long bipo em i kirap nogut na em i tok: “Wanem samting i kirapim yu long i kam mekim olsem?” Wokboi i tok: “Nau mi save stadi long Baibel, na mi kamap wanpela Witnes Bilong Jehova. Baibel i tok, yumi no ken dinau. Dispela wanpela dinau tasol i stap, em dinau bilong givim bel long ol narapela man na sori long ol. Olsem na mi kam bekim dinau long yu.” Bos i tok: “Baibel i gat wanem strong na em inap kirapim man long senisim tru pasin bilong em olsem yu bin mekim?” Nau dispela bos tu i stadi na em i kisim save long tok i tru, long wanem tok i tru bilong Baibel i bin kirapim dispela wokboi bilong em long bipo long senisim tru pasin bilong em.
Long nau planti manmeri long Ajentina, em ol i gat gutpela bel, ol i kirap na bilip long ol tok i tru bilong Baibel na ol i senisim tru pasin bilong ol. Lukim dispela stori hia:
◻ Wanpela Witnes i stori olsem: “Wanpela taim mipela i autim tok na mipela i go long wanpela haus na paitim dua na nau mipela harim sampela insait long haus ol i krai na singaut strong. Wanpela man i kam opim dua—em i belhat nogut tru. Mipela kirap long stori long wok mipela i mekim na mipela i kam long haus bilong em, tasol em i tok em i laik rausim mipela. Mipela i stap bel isi na wok long toktok yet long em. Isi isi bel bilong em i go kol. Mipela lukim olsem belhat bilong em i wok long i dai, olsem na mipela i stori moa long ol gutpela samting Jehova i laik mekim bilong helpim ol man. Em i pilim tru ol dispela tok na mipela i kirap nogut, long wanem em i tok: ‘God yet i bin salim yupela i kam.’ Nau em i singautim mipela i go insait long haus na mipela lukim ‘meri’ bilong em wantaim ol pikinini ol i hait i stap long rum na ol i krai i stap. Dispela man i tok: ‘Taim yu kam long haus mi redi long kilim i dai famili bilong mi na skin bilong mi yet. Mi no inap moa! Mi no gat wok na nau ol i laik rausim mipela long dispela haus na mi gat bikpela dinau.’ ”
Gutpela samting i kamap bihain. Wanpela sista i painim pinis wanpela wok bilong dispela man na em i kisim narapela haus. Em wantaim dispela meri tupela i kirap long stadi na lainim ol tok bilong Baibel. Tupela i bin sindaun wantaim inap 15 yia pinis olsem man na meri marit, tasol nau tupela i kirap na marit tru.
Ol dispela stori i kamapim long ples klia olsem tok i tru bilong Baibel “i wok strong i stap.” Tru tumas, sapos man i gat pasin daun na em i lainim ol tok bilong Baibel na bihainim, em inap senisim pasin bilong em.
[Rait long pes 7]
“Tok bilong God i gat laip, na em i wok strong i stap.”—HIBRU 4:12