Ol Yangpela​—⁠Skulim Tingting Bilong Yupela!

“Strongpela kaikai em i bilong ol man i kamap bikpela pinis. Ol kain man olsem ol i bin traim planti taim long skelim wanem ol pasin i gutpela na wanem ol pasin i nogut, na nau ol i save gut pinis na tingting bilong ol i klia.”​—⁠HIBRU 5:​14.

1, 2. (a) Skelim dispela taim yumi stap long en wantaim taim bilong ol Kristen bilong bipo long Efesus. (b) Wanem ol pasin inap lukautim yu na bai yu no kisim hevi? Olsem wanem yu inap kisim ol dispela pasin?

“YUPELA i mas lukaut gut long wokabaut bilong yupela. Yupela i no ken wokabaut olsem man i no gat save. Nogat. Yupela i mas wokabaut olsem man i gat save. Nau yupela i gat taim bilong mekim pasin bilong God. Tasol dispela taim nau yumi stap long en, em i taim nogut, olsem na yupela i mas lukaut, nogut dispela taim i lus nating.” (Efesus 5:​15, 16) Bihain long taim aposel Pol i raitim dispela tok olsem 2,000 yia i go pinis, ‘ol man nogut na ol giaman profet i wok long giamanim ol manmeri.’ Yumi stap long ‘taim bilong planti hevi nogut tru.’​—⁠2 Timoti 3:​1-5, 13.

² Tasol yu inap abrusim ol hevi i laik bagarapim yu sapos yu kisim “gutpela tingting, na . . . gutpela save [na] . . . gutpela pasin bilong wokabaut.” (Sindaun 1:⁠4) Sindaun 2:​10-​12 i tok: “Bai yu kisim planti gutpela tingting na bai yu belgut long gutpela save bilong yu. Pasin bilong tingting gut bai i banisim yu na gutpela save bai i was long yu. Na bai yu no bihainim ol man i save mekim pasin nogut na i save mekim tok i no stret.” Tasol olsem wanem yu inap kisim ol dispela pasin? Hibru 5:​14 i tok: “Strongpela kaikai em i bilong ol man i kamap bikpela pinis. Ol kain man olsem ol i bin traim planti taim long skelim wanem ol pasin i gutpela na wanem ol pasin i nogut, na nau ol i save gut pinis na tingting bilong ol i klia.” Bilong mekim olsem, yu mas skulim gut tingting bilong yu. Tok Grik Pol i kolim, insait bilong en i olsem ‘wanpela man i skul long mekim kain spot olsem kalap kalap na tanim tanim.’ Orait, olsem wanem yu inap skulim tingting bilong yu?

Skulim Tingting Bilong Yu

 3. Taim yu tingim samting yu mas mekim, olsem wanem yu inap wokim gut tingting bilong yu?

³ Tingim: Yu mas “traim planti taim,” olsem wokim wokim tingting bilong yu, na bai yu inap skelim wanem ol pasin i gutpela na wanem ol pasin i nogut. Taim wanpela samting i kamap na yu mas tingim wanem samting bai yu mekim, nogut yu kirap wantu na mekim nating o bihainim nating ol narapela​—⁠dispela i no inap helpim yu long bihainim gutpela tingting. Bilong skelim gut ol samting yu mas mekim, yu mas wokim gut tingting bilong yu. Olsem wanem yu inap mekim olsem? Pastaim yu mas skelim gut dispela samting na kisim save long olgeta samting bilong en. Kamapim sampela askim sapos i gat wok long mekim olsem. Tingim ol narapela rot i op long yu. Sindaun 13:16 i tok: “Olgeta man i gat gutpela tingting, ol i save tingting gut pastaim na mekim samting.” Orait nau wok long tingim ol lo bilong Baibel i stret long dispela samting. (Sindaun 3:⁠5) Tasol bilong mekim dispela samting, pastaim yu mas save long ol tok bilong Baibel. Olsem na Pol i tokim yumi long kisim “strongpela kaikai”​—⁠olsem kisim save long tok i tru, em dispela save i “bikpela tru, na i go longpela moa, na i go antap tru, na i go daun moa.”​—⁠Efesus 3:​18.

 4. Bilong wanem yumi mas save long ol lo bilong God bilong stiaim yumi?

⁴ Em bikpela samting long yumi mas mekim olsem, long wanem, yumi no gutpela man olgeta, na yumi save mekim sin. (Stat 8:​21; Rom 5:​12) Jeremaia 17:9 i tok: “Bel bilong olgeta man i save tingting oltaim long mekim pasin giaman.” Sapos i no gat ol lo bilong Baibel bilong stiaim yumi, yumi inap giamanim yumi yet na yumi ting samting nogut em i gutpela​—⁠long wanem, laik nogut bilong skin i laik tumas long kisim. (Skelim wantaim Aisaia 5:20.) Man bilong raitim Song i tok: “Olsem wanem na yangpela man i ken wokabaut long klinpela pasin? Em i mas bihainim tok bilong yu na bai em i stap klin. Lo bilong yu i save givim gutpela tingting long mi, olsem na mi no laik tru long olgeta pasin nogut.”​—⁠Song 119:​9, 104.

 5. (a) Bilong wanem sampela yangpela i kirap na bihainim kain kain pasin nogut? (b) Wanpela yangpela i bin mekim wanem bambai em inap pilim tru tok i tru?

⁵ Sampela yangpela i bin go bikpela insait long famili Kristen, bilong wanem ol i bihainim pasin nogut? Yu ting ol i bin mekim olsem, long wanem, ol i no bin ‘save tru long laik bilong God na ol pasin i gutpela na ol pasin God i laikim tumas na ol pasin i inap tru na i stret olgeta’? (Rom 12:⁠2) Ating sampela i save go wantaim papamama bilong ol long ol miting na ol inap kolim ol bikpela as tok bilong Baibel. Tasol taim yu askim ol long kamapim as bilong ol bilip ol i holim o kamapim gut sampela strongpela tok bilong Baibel, ol i no inap​—⁠ol i sot long save. I no hatwok long ol narapela i giamanim kain yangpela olsem. (Efesus 4:​14) Sapos i olsem long yu, orait tingting strong long stretim dispela samting. Wanpela yangpela sista i tok: “Mi wok long painim sampela save moa long rot bilong ol buk samting. Mi askim mi yet, ‘Olsem wanem mi save dispela em lotu i tru? Olsem wanem mi save i gat wanpela God, nem bilong em Jehova?’ ”a Em i stadi na skelim gut ol tok bilong Baibel na dispela i strongim bilip bilong em olsem ol samting papamama i bin lainim em i tru!​—⁠Skelim wantaim Aposel 17:11.

 6. Olsem wanem yu inap “save long ol pasin Bikpela i save laikim”?

⁶ Sapos yu save gut long ol lo bilong Jehova, bai yu no hatwok tumas long “save long ol pasin Bikpela i save laikim.” (Efesus 5:​10) Tasol olsem wanem sapos wanpela samting i kamap na yu no save long rot i stret long yu mas bihainim? Orait beten askim Jehova long soim rot long yu. (Song 119:144) Toktok wantaim papamama o wanpela strongpela Kristen long dispela samting. (Sindaun 15:22; 27:17) Na long rot bilong stadi long Baibel na ol buk bilong Sosaiti bai yu painim sampela gutpela tok bilong stiaim gut tingting bilong yu. (Sindaun 2:3-5) Sapos planti taim yu mekim wok long tingting bilong yu, tingting bai wok gut na dispela bai helpim yu long skelim gut ol samting.

Tingim Gut Ol Amamas

7, 8. (a) Olsem wanem yu inap wokim gut tingting bilong yu long taim yu laik skelim olsem yu bai go long wanpela bung o nogat? (b) Wanem tingting bilong Baibel long pasin bilong amamas?

⁷ Orait nau yumi ken toktok long olsem wanem yu inap wokim gut tingting bilong yu taim sampela samting i kamap. Long tingting bilong yu, tingim olsem sampela i bin singautim yu i kam long wanpela bung. Ating yu bin kisim wanpela tanget i toksave long dispela bung. Ol i bin tokim yu olsem planti yangpela Witnes bai kam long dispela bung. Tasol ol i singaut long mani bilong go insait, em bilong baim ol samting bilong bung. Olsem wanem? Bai yu go long dispela bung?

⁸ Orait, wokim gut tingting bilong yu. Pastaim kisim sampela save olsem: Hamas manmeri bai go long dispela bung? Husat ol bai kam? Em bai kirap long wanem taim? Em bai pinis long wanem taim? Ol i bin stretim rot long mekim wanem long dispela bung? Husat bai bosim dispela bung? Orait nau lukim sampela buk bilong painim save​—⁠yu ken lukim het-tok “Social Gatherings” na “Entertainment” long Watch Tower Publications Index.b Yu bai kisim save long wanem samting? Wanpela samting i olsem: Jehova i no tok yumi no ken bung wantaim na amamas. Saveman 8:​15 i tok long wok strong, tasol em i tok tu olsem “i no gat arapela gutpela rot bilong yumi bihainim. Olsem na yumi mas kaikai na dring na amamas long ol samting.” Krais Jisas yet i bin i go sindaun long sampela bikpela kaikai na long wanpela bung bilong marit. (Luk 5:​27-​29; Jon 2:​1-​10) Sapos yumi bihainim stretpela tingting, pasin bilong bung wantaim inap givim nupela strong long yu.

9, 10. (a) Wanem ol hevi inap kamap long sampela bung? (b) Taim yu laik skelim olsem yu bai go long wanpela bung o nogat, wanem sampela askim yu ken tingim?

⁹ Tasol sapos i no gat man bilong bosim gut ol bung, hevi inap kamap. Namba wan Korin 10:8 i stori long pasin bilong poromanim ol man nogut i bin pulim ol Israel long mekim pasin pamuk na “long wanpela de tasol 23,000 bilong ol [Israel i no stap gut long God] i bin lus.” Narapela toksave i stap long Rom 13:13: “Yumi mas wokabaut stret, olsem man i wokabaut long san. Yumi no ken hambak nabaut na spak. Yumi no ken mekim pasin pamuk na pilai nabaut long pasin doti. Yumi no ken kros nabaut na bel nogut long ol arapela man.” (Skelim wantaim 1 Pita 4:⁠3.) Tru, yumi no inap makim stret hamas man i ken kam long wanpela bung. Tasol ol samting i bin kamap i soim olsem sapos planti man i kam long bung, i hatwok moa long bosim. Sapos ol bung i liklik na ol i bosim gut, ating ol i no ken kamap olsem “pati nogut.”​—⁠Galesia 5:​21, Baibel Byington.

¹⁰ Ating ol tok yu kisim save long en bai kirapim yu long kamapim sampela askim moa, olsem: Bai i gat sampela strongpela Kristen i bikpela pinis i stap long dispela bung? Husat i kamapim dispela bung? Dispela bung i bilong yumi ken bung wantaim ol gutpela poroman o i bilong wanpela man i ken kisim winmani? Ol bai skelim husat i ken kam long dispela bung? Sapos bung i kamap long Sarere, em bai pinis long wanem taim? Nogut em i winim biknait na ol man i go long dispela bung ol i no inap i go autim tok long de bihain? Sapos i gat musik na danis, dispela musik na danis bai i stret long ol lo Kristen? (2 Korin 6:⁠3) Ating bai i hatwok liklik long kamapim kain askim olsem. Tasol Sindaun 22:3 i tok: “Man i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.” Tru tumas, sapos yu wokim gut tingting bilong yu, bai yu inap abrusim hevi.

Skelim Gut Skul Yu Laik Kisim

11. Olsem wanem ol yangpela i ken wokim gut tingting bilong ol taim ol i tingim ol samting ol i laik mekim long bihain?

¹¹ Baibel i tok i gutpela sapos yu stretim ol samting bilong i stap bilong yu long bihain. (Sindaun 21:⁠5) Olsem wanem? Yu bin toktok wantaim papamama bilong yu long i stap bilong yu long bihain? Ating yu laik go insait long wok bilong autim tok long olgeta de, olsem painia. I no gat narapela wok inap mekim yu i stap belgut olsem. Sapos yu wok long kisim pasin bilong stadi gut na mekim gut wok autim tok, orait yu wok long redi long mekim wok painia. Olsem wanem? Yu bin tingting long ol samting yu mas mekim na bai yu inap lukautim yu yet long ol samting bilong skin taim yu mekim wok painia? Sapos bihain yu laik marit na kamapim pikinini, bai yu inap long mekim gut dispela wok tu? Bilong skelim gut ol samting yu laik mekim, yu mas wokim gut tingting bilong yu.

12. (a) Sampela famili i bin mekim wanem long taim i gat hevi long mani? (b) Sapos yu kisim sampela skul moa, dispela bai pait wantaim laik bilong mekim wok painia o nogat? Stori long dispela.

¹² Long sampela hap i gat rot long go long wanpela kampani inap sampela de long wik na lain long mekim wanpela wok. Sampela yangpela i gat papamama o sampela pren i gat wok bisnis na ol i lainim ol dispela yangpela long mekim dispela wok. Na sampela i mekim ol kos long skul na bai ol inap painim sampela wok long bihain bilong lukautim ol long ol samting bilong skin. Taim i no gat rot long mekim dispela kain samting, sampela papamama i bin tingting gut na stretim rot long pikinini i ken kisim sampela skul moa taim em i winim haiskul. Sapos yu laik mekim kain samting olsem bambai yu inap lukautim yu yet long bihain na mekim wok painia tu, dispela i no kalapim wok bilong putim Kingdom bilong God i go pas. (Matyu 6:​33) Na sapos yu kisim sampela skul moa, i no olsem yu no inap mekim wok painia. Olsem: Inap longtaim pinis wanpela yangpela Witnes i laik mekim wok painia. Taim em i pinis long haiskul, papamama bilong em​—⁠ol yet i painia​—⁠ol i stretim rot na bai em inap kisim sampela skul moa. Taim em i wok long kisim dispela skul, em i mekim wok painia tu, na nau em i gat save long mekim wanpela wok bilong lukautim em yet na em i stap yet long wok painia.

13. Famili i mas tingim wanem ol samting taim ol i skelim olsem pikinini bai kisim sampela skul moa o nogat?

¹³ Pikinini bai kisim sampela skul moa o nogat, em samting bilong olgeta wan wan famili yet long skelim. Taim famili i skelim gut wanem kain skul pikinini bai kisim, ating dispela inap helpim pikinini. Tasol sapos em i no was gut, kain skul olsem inap pulim em. Olsem na sapos yu tingting long kisim sampela skul moa, orait tingim ol dispela askim: I gat wanem as na yu laik mekim? Em i bilong helpim yu na taim yu bikpela pinis yu inap lukautim gut ol wok yu mas mekim? O yu “laik bai ol gutpela samting tasol i ken kamap long yu”? (Jeremaia 45:⁠5; 2 Tesalonaika 3:​10; 1 Timoti 5:8; 6:⁠9) Na olsem wanem long pasin bilong lusim famili na go long wanpela hap na kisim sampela skul moa? Taim yu tingim toksave bilong Pol, yu ting i gutpela long mekim? Pol i tok: “Sapos yumi poroman wantaim ol man nogut, bai ol i bagarapim gutpela pasin bilong yumi.” (1 Korin 15:33; 2 Timoti 2:​22) Tingim tu olsem “taim i sotpela nau.” (1 Korin 7:​29) Bai yu lusim hamas yia long mekim kain skul olsem? Ol yia bilong yu olsem yangpela man o meri, ol bai pinis long dispela skul? Sapos olsem, orait olsem wanem bai yu inap bihainim tok bilong Baibel i tok “taim yupela i yangpela yet, yupela i mas tingim [God]”? (Saveman 12:⁠1) Na tu, taim yu mekim ol kos, bai yu gat hap taim long mekim ol bikpela wok Kristen olsem go long ol miting, autim tok, na stadi? (Matyu 24:14; Hibru 10:​24, 25) Sapos yu bin skulim gut tingting bilong yu, orait dispela bai helpim yu na taim yu toktok wantaim papamama long i stap bilong yu long bihain, bai yu no lusim tingting long ol samting bilong spirit yu laik mekim.

Tingting Long Marit

14. (a) Taim yangpela man na meri i tingting long marit na ol i laik mekim sampela pasin i makim olsem narapela i laikim tru narapela, wanem sampela lo inap stiaim tingting bilong ol? (b) Sampela i bin mekim wanem na ol i no tingting na skelim gut dispela samting?

¹⁴ Taim yu tingting long marit, long dispela samting tu yu mas wokim gut tingting bilong yu. Olsem: Taim yu laikim tru narapela, ating yu laik holim em. Yangpela man na meri em Buk Solomon i stori long ol, taim ol i no marit yet, ol i mekim sampela pasin bilong makim olsem narapela i laikim narapela. (Solomon 1:2; 2:6; 8:⁠5) Sampela long nau, taim ol i tingting long marit, na moa yet taim ol i pasim tok long marit, ol i ting olsem pasin bilong holim han, na kis, na narapela i holimpas narapela, em i no gat rong long en. Tasol tingim: “Sapos man i ting, save bilong em yet inap helpim em long mekim olgeta samting, orait em i no gat gutpela tingting.” (Sindaun 28:26) Sori tru, sampela man na meri i no bin tingting gut na ol i no bin klia long ol samting em inap putim traim long ol. Ol i no bin bosim gut skin bilong ol na ol i kirap mekim pasin doti, na pasin pamuk tu.

¹⁵ Sapos yu prenim narapela na raun wantaim em, nogut yutupela tasol i stap. Mobeta yutupela i bung wantaim ol narapela o stap long ai bilong ol man. Sampela i stretim rot na bai i gat was bilong ol. Na tu, tingim tok bilong Hosea 4:​11: “Kain kain strongpela dring i save paulim tingting bilong ol manmeri bilong mi.” Wain o bia samting inap paulim gutpela tingting na kirapim tupela long mekim sampela pasin em bihain ol bai bel hevi long en.

15, 16. Wanem sampela samting yangpela man na meri i ken mekim na tupela i ken bihainim stretpela pasin taim ol i poroman wantaim?

¹⁶ Sindaun 13:10 i tok: “Bikhetpasin i save kamapim kros na pait. Tasol sapos man i larim ol arapela man i givim tingting long em, orait dispela man i gat gutpela tingting na save.” Em nau, ‘larim arapela i givim tingting long yu,’ olsem toktok gut wantaim long pasin yutupela i mas bihainim. Was gut long ol samting yupela i mekim bilong soim olsem narapela i laikim tru narapela​—⁠narapela i mas pilim tingting bilong narapela, nogut bel bilong em i gat tok. (1 Korin 13:5; 1 Tesalonaika 4:​3-7; 1 Pita 3:​16) Ating pastaim bai i hatwok liklik long toktok long dispela samting, tasol dispela inap helpim yupela na bai ol bikpela hevi i no ken painim yupela long bihain.

Skul ‘Taim Yu Liklik Yet’

17. Devit i mekim wanem na em i kamapim klia olsem em i ‘bilip long God kirap long taim em i liklik yet’? Dispela inap givim wanem tingting long ol yangpela long nau?

¹⁷ Bilong abrusim ol samting bilong Satan i laik holimpas yumi, oltaim yu mas was gut​—⁠na sampela taim yu mas strongim bel tu. Ating sampela taim ol wanlain bilong yu, na ol man bilong dispela graun tu, ol i birua long yu. Devit, man bilong raitim Song, em i beten: “Bikpela, mi save bilip long yu tasol. Mi yangpela yet na mi bilip long yu, na mi bilip yet inap long nau. God, yu bin skulim mi long taim mi liklik yet na i kam inap long nau, na mi save tokaut yet long ol gutpela gutpela samting yu bin mekim.” (Song 71:​5, 17)c Devit i gat nem olsem man i gat strongpela bel. Tasol wanem taim em i bin wok long kisim dispela pasin? Taim em i stap yangpela yet! Taim em i no pait yet wantaim Goliat, em i kamapim olsem em i gat strongpela bel​—⁠em i kilim wanpela laion na wanpela bea i laik bagarapim lain sipsip bilong papa bilong em. (1 Samuel 17:​34-​37) Tasol Devit i save em i no mekim dispela samting long strong bilong em yet​—⁠Jehova yet i bin strongim em long mekim, na em i tok: “Mi yangpela yet na mi bilip long yu, na mi bilip yet inap long nau.” Devit i bilip na wetim Jehova i helpim em na dispela i strongim em long karim olgeta hevi i painim em. Sapos yu tu yu wetim Jehova i helpim yu, em bai strongim yu long “winim strong bilong dispela graun.”​—⁠1 Jon 5:⁠4.

18. Mipela laik kirapim ol yangpela Kristen long nau long bihainim wanem ol tok?

¹⁸ Planti tausen yangpela olsem yu ol i bin sanap strong na nau ol i baptais pinis na mekim wok olsem pablisa bilong gutnius. Mipela i tenkyu long God long strongpela bilip na strongpela bel bilong yupela ol yangpela! Stap strong na tingting long abrusim ol pasin nogut bilong dispela graun. (2 Pita 1:⁠4) Wok yet long mekim wok long tingting bilong yu em Baibel i skulim pinis. Sapos yu mekim olsem, dispela bai lukautim yu long nau na helpim yu long abrusim bagarap na i stap laip long bihain. Tru tumas, olsem laspela stori i kamapim, yu bai mekim i stap bilong yu i kamap gutpela.

[Ol Futnot]

Ol Askim Bilong Tingim Gen

◻ Olsem wanem ol yangpela inap skulim tingting bilong ol?

◻ Olsem wanem ol yangpela inap wokim gut tingting bilong ol long taim ol i tingting long go long ol bung Kristen?

◻ Wanem sampela samting yu mas skelim taim yu tingim skul yu laik kisim?

◻ Taim yangpela man na meri i tingting long marit, olsem wanem ol inap abrusim pasin bilong pamuk?

[Piksa long pes 15]

Sapos yu lain long painim ol tok bilong kisim save, dispela bai helpim yu long skulim tingting bilong yu

[Piksa long pes 16]

Ol liklik bung i no hatwok tumas long bosim na ating ol i no inap kamap pati nogut

[Piksa long pes 16]

Papamama i mas helpim ol pikinini bilong ol long tingim skul ol i laik kisim

[Piksa long pes 17]

Sapos yangpela man na meri i stap wantaim ol narapela, dispela bai lukautim tupela