Jehova i Save Tingim Tru Ol Lapun Wokboi Bilong Em

“God em i no man nogut, na bai em i lusim tingting long ol gutpela wok yupela i bin mekim. Nogat.”​—HI. 6:10.

1, 2. (a) Taim yu lukim wanpela husat i gat waitpela gras, dispela inap kirapim yu long tingim wanem samting? (b) Jehova i gat wanem tingting long ol lapun Kristen?

OLSEM WANEM? Taim yu lukim ol lapun i gat waitpela gras insait long kongrigesen, yu save tingim wanpela stori bilong Baibel long Buk Daniel? Long driman God Jehova i givim long Daniel, Jehova i gat waitpela gras. Daniel i tok: “Long driman mi lukim ol i kisim ol sia king i kam na putim i stap. Na wanpela Man bilong bipo bipo yet i kam sindaun long wanpela sia king. Ol klos bilong en i waitpela tru olsem ais, na gras bilong het bilong en i wait moa yet olsem gras bilong sipsip.”​—Dan. 7:9.

² Gras bilong planti sipsip em i waitpela. Olsem na waitpela gras bilong het na dispela biknem “Man bilong bipo bipo yet” i makim olsem God i bin stap longpela taim tru na em i gat savetingting, em samting yumi mas rispek tru long en. Dispela Man bilong bipo bipo yet, em Jehova, em i gat wanem tingting long ol lapun man na meri i stap gut long em? Baibel i tok, “waitpela gras bilong man i gutpela samting tru taim em i bihainim stretpela pasin.” (Snd. 16:​31, NW) Em nau, sapos gras bilong wanpela gutpela Kristen i bin kamap waitpela, dispela em i gutpela samting tru long ai bilong God. Olsem wanem? Yu gat wankain tingting olsem Jehova i gat long ol lapun brata na sista bilong yumi?

Bilong Wanem Ol i Gutpela Samting Tru?

 3. Bilong wanem yumi ting ol lapun wanbilip bilong yumi i gutpela samting tru?

³ Sampela bilong ol gutpela lapun wokboi bilong God em ol brata insait long lain Gavening Bodi Bilong Ol Witnes Bilong Jehova, ol wasman raun long nau na long bipo, ol painia, na ol strongpela pablisa​—em ol brata na sista i stap gut long wok bilong God insait long ol kongrigesen. Ating yu save long sampela husat i bin givim bel long autim gutnius inap planti yia na gutpela pasin bilong ol i bin kirapim ol yangpela na stiaim wokabaut bilong ol. Bilong helpim wok bilong autim gutnius, sampela lapun wanbilip i bin mekim ol bikpela wok tru na ol i bin sanap strong taim ol man i mekim nogut long ol. Jehova na “wokboi i gat gutpela tingting” i tingim tru ol wok ol i mekim long bipo na long nau bilong helpim wok bilong Kingdom.​—Mt. 24:45.

 4. Bilong wanem yumi mas rispektim ol lapun Kristen na beten askim God long helpim ol?

⁴ Ol narapela wokboi bilong God Jehova i mas tingim na rispektim tru ol dispela lapun i stap gut long God. Lo God i givim long rot bilong Moses i tok pasin bilong tingim na rispektim ol lapun i poroman wantaim pasin bilong aninit long Jehova. (Wkp. 19:32) Oltaim yumi mas beten askim God long helpim ol dispela gutpela lapun na tok tenkyu long God long gutpela wok ol i bin mekim. Aposel Pol i beten askim God long helpim ol wanwok bilong em, ol yangpela na lapun.​—Ritim 1 Tesalonaika 1:​2, 3.

 5. Olsem wanem pasin bilong bung wantaim ol lapun wokboi bilong Jehova i ken helpim yumi?

⁵ Olgeta insait long kongrigesen i ken kisim helpim long pasin bilong bung wantaim ol lapun Kristen. Long rot bilong stadi, na ol samting ol i lukim, na ol samting i bin painim ol, ol gutpela lapun wokboi bilong Jehova i gat planti gutpela save. Ol i bin lain long pasin bilong pilim hevi bilong narapela na no ken les kwik, na taim ol i tokim ol yangpela long ol samting ol i bin lainim, dispela i givim bikpela amamas long ol. (Sng. 71:18) Ol yangpela, bihainim gutpela tingting na toktok wantaim ol lapun bilong kisim helpim long gutpela save bilong ol, olsem man i kisim wara long wanpela hul wara i daun moa.​—Snd. 20:5.

 6. Olsem wanem yu ken soim ol lapun olsem yu tingim ol tru?

⁶ Olsem wanem? Yu save tokim ol lapun olsem yu ting ol i gutpela samting tru olsem Jehova i save tingim ol? Yu ken tokim ol olsem pasin bilong ol long stap gut long God i mekim na yu laikim ol tru, na yu amamas long harim tingting bilong ol. Na tu, taim yu bihainim tok bilong ol, yu soim olsem pasin bilong yu long rispektim ol em i samting tru. Planti lapun Kristen i ken tingim gutpela tok ol i bin kisim long ol lapun i stap gut long God na olsem wanem dispela i bin helpim ol long laip olgeta bilong ol.a

Sampela Rot Bilong Tingim Gut Ol

 7. Jehova i laik bai husat i go pas long lukautim ol lapun?

⁷ God i givim wok long ol famili bilong ol lapun long i go pas long lukautim ol. (Ritim 1 Timoti 5:​4, 8.) Jehova i amamas taim ol famili i mekim wok bilong ol long helpim ol lapun wanblut, na long dispela rot ol i soim olsem ol i tingim tru ol lapun olsem God i save tingim ol. God i save helpim ol dispela famili na i blesim ol long hatwok ol i mekim na long ol i lusim sampela samting bilong ol yet bilong lukautim ol lapun.b

 8. Bilong wanem ol bratasista long kongrigesen i mas tingim tru ol lapun Kristen?

⁸ Na tu, Jehova i save amamas taim ol bratasista bilong kongrigesen i helpim ol gutpela lapun husat i mas kisim helpim, tasol ol i no gat famili bilong lukautim ol​—em famili bilong ol i no wanbilip o famili i les long lukautim ol. (1 Ti. 5:​3, 5, 9, 10) Long dispela rot kongrigesen i soim olsem ol i ‘sori na laikim tru na marimari’ long ol lapun. (1 Pi. 3:8) Pasin bilong ol long tingim ol lapun insait long kongrigesen i kamap klia long tok piksa Pol i mekim taim em i tok sapos wanpela hap bilong bodi i pilim pen, “olgeta hap i save pilim pen wantaim.” (1 Ko. 12:26) Taim yumi sori na mekim samting bilong helpim ol lapun, dispela i kamapim klia stiatok i stap long tok Pol i mekim: “Yupela i mas helpim ol arapela long karim hevi bilong ol. Long dispela pasin bai yupela inapim tru lo bilong Krais.”​—Ga. 6:2.

 9. Ol lapun i save karim wanem kain ol hevi?

⁹ Ol lapun i save karim wanem kain ol hevi? Planti i save taiet hariap. Ating ol i pilim olsem ol i no inap mekim ol wok bilong wan wan de, olsem go lukim dokta, raitim ol pas samting, klinim haus, o kukim kaikai. Planti lapun i no save pilim hangre na nek bilong ol i no save drai, olsem na ol inap ting ol i no gat wok long kaikai o dring wara olsem ol i mas mekim. Wankain samting inap painim ol long ol samting bilong spirit. Ai na yau bilong ol lapun inap mekim na ol i hatwok long ritim na harim ol tok long ol miting, na ating wok bilong redi long go long miting i pinisim strong bilong ol. Ol narapela i ken mekim wanem bilong helpim ol kain lapun olsem?

Rot Bilong Helpim Ol

10. Ol elda i ken mekim wanem bambai ol lapun i ken kisim helpim?

¹⁰ Planti kongrigesen i save lukautim gut tru ol lapun. Ol gutpela brata na sista i save helpim ol long baim kaikai samting, kukim kaikai, na klinim haus. Ol i helpim ol lapun long stadi, go long ol miting, na autim tok long olgeta mun. Ol yangpela Witnes i save go wantaim ol na helpim ol long trenspot. Sapos ol lapun i no inap lusim haus, ol inap harim ol miting long rot bilong telefon o kongrigesen i ken rekodim ol miting bilong ol i ken harim. Sapos inap, ol elda i stretim ol samting na bai ol lapun insait long kongrigesen i ken kisim helpim.c

11. Stori long olsem wanem wanpela famili i helpim wanpela lapun brata.

¹¹ Ol wan wan Kristen tu i ken singautim ol lapun i kam long haus bilong ol na mekim gut long ol. Taim meri bilong wanpela lapun brata i dai, em i no inap baim moa rent bilong haus, long wanem, em i no kisim moa pensen mani bilong meri. Em na meri bilong em i bin stadi long Baibel wantaim wanpela famili​—papa, mama, na tupela yangpela pikinini meri​—em ol i gat bikpela haus. Ol i givim tupela rum long lapun brata hia. Inap 15 yia, ol i kaikai wantaim, lap wantaim, na soim pasin laikim. Ol yangpela i kisim bikpela helpim long bilip na save bilong em, na lapun i kisim helpim taim em i amamas wantaim dispela famili. Dispela lapun brata i stap wantaim ol i go inap long em i dai long taim em i gat 89 krismas. Dispela famili i save tenkyu yet long God long planti gutpela blesing ol i bin kisim taim dispela brata i bin stap wantaim ol. ‘Pe bilong ol’ long helpim dispela disaipel bilong Jisas Krais i no bin lus.​—Mt. 10:42.d

12. Yu ken mekim wanem bilong soim olsem yu tingim tru ol lapun brata na sista?

¹² Ating yu no inap helpim wanpela brata o sista olsem dispela famili i bin mekim, tasol ating yu inap helpim ol lapun long go long ol miting na wok autim tok. Yu ken singautim ol tu long kam long haus bilong yu na kisim ol i go wantaim yu taim yu go raun liklik long sampela hap. Yu ken go lukim ol, na moa yet sapos ol i sik o ol i no inap lusim haus. Na tu, oltaim yu mas mekim pasin long ol olsem ol i man i bikpela pinis. Sapos tingting bilong ol i wok gut yet, ol narapela i mas kisim tingting bilong ol lapun Kristen taim ol i wokim ol disisen long ol samting ol lapun tu i insait long en. Ol lapun em tingting bilong ol i no wok gut moa, ol inap save ol narapela i mekim pasin rispek long ol o nogat.

Jehova Bai No Lusim Tingting Long Wok Yu Bin Mekim

13. Bilong wanem em i bikpela samting long pilim tingting i stap long bel bilong ol lapun Kristen?

¹³ Em i bikpela samting long pilim tingting i stap long bel bilong ol lapun. Planti lapun i save bel hevi tru long ol i no inap mekim ol samting ol i bin mekim taim ol i yangpela na i gat gutpela helt. Olsem, wanpela sista i bin mekim wok bilong Jehova inap 50 yia samting na em i bin mekim wok painia oltaim, em i kisim wanpela sik i bagarapim skin bilong em na i hatwok tru long em i go long ol miting. Taim em i skelim wok autim tok em i bin mekim long bipo wantaim wok em i mekim long nau, em i krai. Em i daunim het na i tok: “Mi no save mekim moa wanpela gutpela samting.”

14. Olsem wanem tok bilong ol song inap strongim ol lapun wokboi bilong Jehova?

¹⁴ Sapos yu wanpela lapun, yu save bel hevi olsem? O sampela taim yu pilim olsem Jehova i lusim yu? Ating man bilong raitim song i gat dispela kain tingting taim em i lapun, long wanem, em i askim Jehova olsem: “Nau mi lapun pinis na mi no gat strong moa, orait nogut yu lusim mi na givim baksait long mi. . . . Gras bilong mi i waitpela olgeta, tasol God, yu no ken lusim mi.” (Sng. 71:​9, 18) Jehova i no bin lusim dispela man bilong raitim song, na olsem tasol, Em i no inap lusim yu. Long narapela song, Devit i kamapim olsem em i bilip olsem God bai helpim em. (Ritim Song 68:19.) Yu ken bilip tru olsem sapos yu wanpela lapun Kristen, Jehova i stap wantaim yu na em bai wok yet long helpim yu long olgeta wan wan de.

15. Wanem samting inap helpim ol lapun long holim gutpela tingting?

¹⁵ Yupela ol lapun Witnes Bilong Jehova, God i no inap lusim tingting long olgeta samting yupela i bin mekim na i wok long mekim long nau bilong litimapim nem bilong em. Baibel i tok: “God em i no man nogut, na bai em i lusim tingting long ol gutpela wok yupela i bin mekim. Nogat.” (Hi. 6:10) Olsem na no ken ting yu no inap mekim moa wok bilong Jehova long wanem yu lapun, nogat. Wok strong long rausim ol tingting i daunim yu na tingting long ol gutpela samting. Amamas long ol blesing yu gat na long ol gutpela samting yu wetim i kamap bihain! Yumi inap wetim nambawan gutpela samting bai kamap, em Man Bilong Wokim yumi i promis long en. (Jer. 29:​11, 12; Ap. 17:31; 1 Ti. 6:19) Tingting long dispela samting, na wok strong long stap olsem yangpela man long bel na tingting, na no ken ting yu no inap mekim gutpela samting insait long kongrigesen!e

16. Bilong wanem wanpela lapun brata i ting em i mas lusim wok elda? Olsem wanem ol narapela elda i strongim bel bilong em?

¹⁶ Tingim Johan, em i gat 80 krismas na em i save lukautim gutpela meri bilong em, Sannie,f em skin bilong em i bagarap nau. Ol sista i save senis senis long stap wantaim Sannie na bai Johan i ken go long ol miting na wok autim tok. Tasol i no longtaim i go pinis, na Johan i pilim olsem em i no inap mekim moa ol samting, na em i kirap tingting olsem mobeta em i lusim wok elda insait long kongrigesen. Aiwara i pulap long ai bilong em na em i tok: “I no gat as na bai mi stap yet olsem wanpela elda. Mi no save mekim moa wanpela wok i helpim kongrigesen.” Ol narapela elda i tokim em olsem save na gutpela tingting bilong em i bikpela samting. Ol i strongim em long stap yet olsem wanpela elda, maski em i no inap mekim planti samting. Dispela i strongim tru bel bilong Johan, na em i mekim yet wok elda na dispela i helpim kongrigesen.

Jehova i Save Tingim Tru Ol

17. Baibel i mekim wanem tok bilong strongim ol lapun Kristen?

¹⁷ Baibel i kamapim klia olsem ol lapun inap mekim yet gutpela wok bilong Jehova maski ol i karim ol hevi bilong lapun. Man bilong raitim song i tok: “Ol i olsem ol diwai ol i planim pinis long haus bilong Bikpela. . . . Taim ol i olpela pinis, ol i save karim kaikai yet. Ol i stap strong, na ol i no save drai. Lip bilong ol i stap grin oltaim.” (Sng. 92:​13, 14) Ating aposel Pol i karim hevi bilong wanpela sik, tasol em i ‘no save slek long mekim wok bilong God,’ maski ‘bodi bilong em i laik bagarap.’​—Ritim 2 Korin 4:​16-​18.

18. Bilong wanem ol narapela i mas helpim ol lapun wanbilip na ol man i save lukautim ol?

¹⁸ Planti lapun bratasista long nau i kamapim klia olsem ol lapun inap “karim kaikai yet.” Tasol ol hevi bilong sik na lapun inap daunim ol, ol dispela lapun tu i gat gutpela famili i givim bel long lukautim ol. Ol man i lukautim ol lapun, strong bilong ol tu inap pinis. Kongrigesen i gat gutpela wok bilong mekim, ol i ken helpim ol lapun na ol man i lukautim ol na long dispela rot ol i soim olsem ol i laikim ol. (Ga. 6:10) Kain pasin i soim olsem yumi no tokim ol dispela lain long go na ‘putim laplap bilong hatim skin, na go kisim kaikai na pulapim bel.’ Nogat. Yumi mekim ol samting bilong helpim ol.​—Jem. 2:​15-​17.

19. Bilong wanem ol gutpela lapun Kristen i ken ting ol bai stap gut?

¹⁹ Taim Kristen i go lapun, dispela inap senisim ol samting em inap mekim, tasol dispela i no daunim pasin bilong Jehova long laikim tru ol lapun wokboi bilong em i stap gut long em. Nogat. Olgeta dispela gutpela Kristen i gutpela samting tru long ai bilong em, na em i no inap tru long lusim ol. (Sng. 37:28; Ais. 46:4) Jehova bai i strongim na stiaim ol taim ol i lapun.​—Sng. 48:14.

[Ol Futnot]

Bai Yu Bekim Olsem Wanem?

• Bilong wanem yu ting ol lapun Kristen i stap gut long God ol i gutpela samting tru?

• Yumi ken mekim wanem bilong soim olsem yumi save tingim tru ol lapun wanbilip?

• Wanem samting i ken helpim ol lapun wokboi bilong Jehova long holim gutpela tingting?

[Ol Piksa long pes 18]

Ol bratasista insait long kongrigesen i save tingim tru ol lapun