Askim
Yu ting insait long bokis kontrak i gat tupela ston tasol o i gat ol narapela samting tu?
Long taim bilong dediketim tempel bilong Solomon long 1026 B.C.E., “i no gat planti samting i stap insait long Bokis Kontrak. Tupela ston i gat tok bilong Lo bilong God, ol tasol i stap. Bipo ol Israel i bin lusim Isip na i kam i stap long maunten Sainai, na Bikpela i bin mekim kontrak wantaim ol. Tok bilong dispela kontrak i stap long dispela tupela ston na Moses i bin putim tupela insait long Bokis Kontrak.” (2 Stori 5:10) Tasol pastaim i no olsem.
Long “namba 3 mun bihain long taim ol i bin lusim Isip,” ol Israel i go kamap long ples drai bilong Sainai. (Kisim Bek 19:1, 2) Bihain, Moses i go antap long maunten Sainai na em i kisim tupela ston i gat Lo long en. Em i tok: “Mi tanim na mi wokabaut i kam daun long maunten. Orait mi putim tupela ston long dispela Bokis mi bin wokim olsem Bikpela i bin tokim mi pinis. Na dispela tupela ston i stap yet long Bokis.” (Lo 10:5) Dispela bokis em bilong yusim inap liklik haptaim tasol, em Jehova i bin tokim Moses long wokim bilong tupela hap ston i gat Lo i ken i stap insait long en. (Lo 10:1) Ol i bin wokim bokis kontrak long pinis bilong yia 1513 B.C.E.
Bihain liklik long taim ol Israel i lusim Isip, ol i kirap toktok planti long kaikai. Olsem na Jehova i salim mana long ol. (Kisim Bek 12:17, 18; 16:1-5) Long dispela taim, Moses i tokim Aron olsem: “Kisim wanpela sospen graun na pulapim mana long en na putim sospen i stap long ai bilong Bikpela, bai ol lain pikinini i kamap bihain ol i ken save long en.” Baibel i tok: “Orait Aron i putim dispela sospen mana klostu long Bokis Kontrak [ples i gat ol pepa bilong ol bikpela samting] long hap i kam, olsem Bikpela i bin tokim Moses.” (Kisim Bek 16:33, 34) Yumi save olsem Aron i bin putim mana i go insait long sospen, tasol em i mas wet inap long taim Moses i wokim pinis Bokis Kontrak na putim tupela ston insait long en na nau em inap putim mana tu i go insait.
Olsem yumi stori pinis, ol i bin wokim bokis kontrak long pinis bilong yia 1513 B.C.E. samting. Ol i bin putim stik wokabaut bilong Aron i go insait long dispela Bokis Kontrak planti yia bihain long taim Kora wantaim ol narapela i bikhet long Jehova. Aposel Pol i tok insait long ‘Bokis Kontrak i gat sospen gol i gat mana i stap long en, na stik wokabaut bilong Aron, bipo kru i bin kamap long en, na tupela ston God i bin raitim kontrak long en.’—Hibru 9:4.
Dispela mana em kaikai God i bin givim ol Israel taim ol i wokabaut long ples drai nating inap 40 yia. Em i no moa givim mana long ol taim “ol Israel i kisim rais bali na wit bilong Kenan” na ol i kaikai. (Josua 5:11, 12) I gat as na ol i bin putim stik wokabaut bilong Aron i go insait long bokis kontrak—em i stap olsem mak i kamapim bikhetpasin bilong ol Israel. Dispela i soim olsem dispela stik i bin stap yet insait long bokis kontrak taim ol Israel i bin wokabaut long ples drai nating. Olsem na yumi ken tok olsem inap sampela taim bihain long ol Israel i kamap long Graun Bilong Promis, na paslain long ol i dediketim tempel bilong Solomon, ol i bin rausim long bokis kontrak stik bilong Aron na sospen gol i gat mana long en.