“Ol Gutpela Samting” i Wok Long Pulap Long Haus Bilong Jehova
“Bai mi [Jehova] seksekim olgeta lain man, na ol gutpela samting bilong olgeta lain ol i mas i kam insait; na haus bilong mi bai kisim biknem.”—HAGAI 2:7, NW.
1. Taim wanpela bagarap i kamap, bilong wanem yumi save tingim famili bilong yumi pastaim?
I GAT wanem ol gutpela samting i stap long haus bilong yu? Yu gat ol gutpela sia bilong sindaun na malolo gut long en na ol gutpela tebol kabot samting, na wanpela nupela kain kompyuta, na nupela ka? Maski sapos yu gat ol dispela samting, bai yu wanbel long tok olsem ol gutpela samting tru i stap long haus bilong yu em ol manmeri—olsem ol wanfamili bilong yu, a? Orait, long tingting bilong yu, tingim olsem long wanpela nait yu slip i stap na smel bilong smok i kirapim yu. Haus bilong yu i paia na yu gat sampela minit tasol bilong lusim haus! Orait wanem namba wan tingting bilong yu? Bai yu tingim ol sia tebol samting bilong yu? O kompyuta bilong yu? O ka bilong yu? Nogat, a? Bai yu tingim famili bilong yu, long wanem, ol manmeri i winim tru ol kago samting.
2. Jehova i bin wokim wanem ol samting? Jisas i amamas moa yet long wanem samting Jehova i bin wokim?
2 Orait nau tingim God Jehova na Pikinini bilong em, Jisas Krais. Jehova em Man i “bin wokim skai na graun na solwara na olgeta samting i stap long en.” (Aposel 4:24) Long rot bilong Pikinini bilong em, em “saveman i bosim wok,” Jehova i bin wokim olgeta narapela samting. (Sindaun 8:30, 31; Jon 1:3; Kolosi 1:15-17) Olsem na yumi ken save, Jehova na Jisas i save tingim tru olgeta samting ol i bin wokim. (Skelim wantaim Stat 1:31.) Tasol yu ting wanem ol samting tupela i bin wokim i bikpela samting tru long tupela—ol diwai maunten samting, o ol man? Jisas i makim em yet olsem gutpela tingting na save, na em i tok, ‘Mi bin amamas long lukim ol manmeri i stap long graun,’ o olsem Baibel bilong William F. Beck i kolim, Jisas i “amamas tru long ol manmeri bilong graun.”
3. Jehova i mekim wanem tok profet long maus bilong Hagai?
3 Jehova i save tingim tru ol manmeri, winim ol narapela samting. Wanpela tok profet em i bin mekim long maus bilong profet Hagai long yia 520 B.C.E. i soim yumi long dispela samting. Jehova i tokaut olsem: “Bai mi seksekim olgeta lain man, na ol gutpela samting bilong olgeta lain ol i mas i kam insait; na haus bilong mi bai kisim biknem. . . . Dispela nupela haus bai kisim biknem moa, winim olpela haus.”—Hagai 2:7, 9, NW.
4, 5. (a) Bilong wanem i no stret long ting olsem dispela “ol gutpela samting” em ol gutpela kago na bilas samting? (b) Long tingting bilong yu, “ol gutpela samting” em wanem ol samting? I gat wanem as na yu ting olsem?
4 Wanem “ol gutpela samting” bai pulap long haus bilong Jehova na givim biknem long en, winim bilong bipo? Ol gutpela samting insait long haus, olsem ol tebol samting na ol bilas bilong en? O gol na silva na ol gutpela gutpela ston? Nogat, a? Tingim dispela samting: Dispela tempel bilong pastaim, em ol i bin wokim olsem 500 yia samting paslain long taim bilong Hagai, ol i bin tromoi planti milion milion kina long wokim!a Olsem na yumi save, Jehova i no ting olsem dispela tempel em liklik lain Juda i kam bek pinis long ples ol i wokim em bai i gat planti gutpela bilas moa, winim tempel bilong Solomon, nogat!
5 Orait dispela “ol gutpela samting” ol bai pulap long haus bilong Jehova ol i wanem samting? Em ol manmeri yet. Yumi save pinis, samting i save mekim na bel bilong Jehova i amamas tru, i no silva na gol, nogat; em ol manmeri i save laikim em tru na long dispela as ol i mekim wok bilong em. (Sindaun 27:11; 1 Korin 10:26) Tru tumas, Jehova i save laikim tumas olgeta man, meri, pikinini ol i save lotuim em long pasin em i laikim. (Jon 4:23, 24) Ol dispela lain em “ol gutpela samting,” na long ai bilong Jehova ol i gutpela tru, winim olgeta bilas i bin stap long tempel bilong Solomon.
6. Olpela tempel bilong God i gat wanem wok bilong en?
6 Maski ol lain i mekim pasin birua long ol Juda na i laik pasim wok bilong ol, ol Juda i pinisim wok bilong sanapim tempel long yia 515 B.C.E. I kam inap long taim Jisas i bin givim skin bilong em olsem ofa, dispela tempel long Jerusalem i stap olsem ples bilong planti “gutpela samting” i mekim lotu i tru, em ol Juda tru bilong skin na ol manmeri bilong ol narapela lain i bihainim lotu Juda. Tasol dispela tempel i makim sampela samting i bikpela moa yet, na nau bai yumi stori long dispela.
Wanpela Truim Long Taim Bilong Ol Aposel
7. (a) Olpela tempel bilong God long Jerusalem i olsem piksa na i makim wanem samting? (b) Stori long ol samting hetpris i bin mekim long Bikpela De Bilong God i Tekewe Sin Bilong Ol Manmeri.
7 Dispela tempel long Jerusalem i olsem piksa na i makim wanpela pasin God i bin putim bilong lotuim em na i gutpela moa. Em i tempel spirit bilong God, em Jehova i bin kamapim long yia 29 C.E. na em i putim Jisas olsem Hetpris bilong en. (Hibru 5:4-10; 9:11, 12) Yumi ken tingim wok bilong hetpris bilong Israel na ol samting Jisas i mekim. Long olgeta yia long Bikpela De Bilong God i Tekewe Sin Bilong Ol Manmeri, hetpris i go long alta i stap long ples bung bilong tempel na ofaim wanpela bulmakau man bilong tekewe sin bilong ol pris. Bihain em i karim blut bilong dispela bulmakau i go insait long tempel—em i go insait long ol dua i stap namel long ples bung bilong tempel na Rum Tambu, na bihain em i go insait long dua i gat laplap i hangamap i stap namel long Rum Tambu na Rum Tambu Tru. Orait taim hetpris i go insait pinis long Rum Tambu Tru, em i putim pinga long dispela blut na em i tromoi hap blut long pes bilong bokis kontrak. Bihain em i mekim wankain pasin taim em i ofaim wanpela meme bilong tekewe sin bilong 12-pela lain bilong Israel i no bilong lain pris. (Wok Pris 16:5-15) Olsem wanem dispela pasin em i mekim em i samting bilong tempel spirit bilong God?
8. (a) Olsem wanem yumi ken tok, Jisas i kamap olsem ofa kirap long yia 29 C.E.? (b) Jisas i stap olsem wanem wantaim Jehova insait long ol yia em i bin mekim wok bilong em long graun?
8 Taim Jisas i kisim baptais long yia 29 C.E. na God i makim em long spirit holi, i olsem em i kamap wanpela ofa long alta bilong laik bilong God. (Luk 3:21, 22) Kirap long dispela taim, i stap bilong Jisas i olsem ofa em i givim long God na em i bihainim dispela rot inap 3 na hap yia. (Hibru 10:5-10) Insait long dispela taim, Jisas i stap olsem pikinini bilong God long rot bilong spirit holi. Ol narapela man bilong graun i no inap pilim dispela pasin i stap namel long Jisas na Papa bilong em long heven. I olsem wanpela bikpela laplap i pasim ai, o tingting, bilong ol man, olsem laplap i bin haitim Rum Tambu na ol manmeri i stap insait long ples bung bilong haus lotu sel ol i no inap lukim.—Kisim Bek 40:28.
9. Bilong wanem Jisas i no inap i go insait long heven olsem wanpela man bilong graun? Wanem samting i kamap bilong stretim dispela samting?
9 Tasol maski God i bin makim Jisas long spirit holi na em i kamap Pikinini bilong God, dispela man Jisas i no inap kisim laip long heven. Bilong wanem? Long wanem, man bilong graun i no inap i go insait long kingdom bilong God long heven. (1 Korin 15:44, 50) Skin bilong Jisas i olsem wanpela banis i pasim em long mekim olsem. Olsem na dispela laplap i hangamap namel long Rum Tambu na Rum Tambu Tru long olpela haus bilong God, em i gutpela piksa tru bilong makim skin bilong Jisas. (Hibru 10:20) Tasol 3-pela de bihain long taim Jisas i dai, God i kirapim em bek olsem wanpela spirit. (1 Pita 3:18) Orait nau em inap i go insait long Rum Tambu Tru long tempel spirit bilong God—em heven yet. Na tru tumas em i mekim olsem. Pol i tok: “Krais i no bin i go insait long haus lotu [ating em i toktok long Rum Tambu Tru] ol man i wokim long han na em i piksa tasol bilong haus lotu tru bilong God. Nogat. Em i go insait long heven stret. Na nau em i stap klostu tru long God, na em i wok long helpim yumi.”—Hibru 9:24.
10. Taim Jisas i go bek long heven, em i mekim wanem?
10 Long heven, i olsem Jisas i “tromoi blut” bilong ofa bilong em taim em i givim pe bilong blut bilong em long Jehova, em pe bilong baim bek ol man. Tasol i gat sampela samting moa Jisas i mekim. Klostu long taim em i dai, em i bin tokim lain bilong em: “Mi go bilong redim ples bilong yupela. . . . Na sapos mi go redim ples bilong yupela, bai mi kam bek na kisim yupela i go i stap wantaim mi. Na ples mi stap long en, yupela tu bai i stap long en wantaim mi.” (Jon 14:2, 3) Olsem na taim Jisas i go insait long Rum Tambu Tru, olsem heven, em i opim rot bilong ol narapela i ken i go. (Hibru 6:19, 20) Dispela lain, em ol bai inap olsem 144,000, ol bai mekim wok olsem nambatu pris long tempel spirit bilong God. (KTH 7:4; 14:1; 20:6) Olsem hetpris bilong Israel i bin mekim pastaim—em i kisim blut bilong bulmakau i go insait long Rum Tambu Tru bilong tekewe sin bilong ol pris—olsem tasol, pastaim Jisas i mekim wok long pe bilong blut bilong em bilong helpim ol dispela 144,000 nambatu pris.b
“Ol Gutpela Samting” Bilong Nau
11. Hetpris bilong Israel i ofaim wanpela meme bilong helpim husat? Dispela i olsem piksa na i makim wanem samting?
11 I kam inap long yia 1935, i olsem wok bilong bungim ol manmeri God i bin makim long spirit holi, em inap pinis.c Tasol Jehova i no pinis yet long givim biknem long haus bilong em, nogat. I gat sampela “gutpela samting” moa bai kam insait long en. Yumi ken tingim samting em hetpris long Israel i bin mekim. Em i bin ofaim tupela animal—wanpela bulmakau bilong tekewe sin bilong ol pris, na wanpela meme bilong tekewe sin bilong ol lain bilong Israel i no bilong lain pris. Ol pris i olsem piksa bilong dispela lain God i bin makim long spirit holi na ol bai stap wantaim Jisas long Kingdom bilong heven, olsem na dispela ol lain i no bilong lain pris ol i makim husat? Yumi inap painim bekim bilong dispela askim long tok bilong Jisas i stap long Jon 10:16: “Mi gat ol arapela sipsip tu, na ol i no bilong dispela banis. Mi mas bringim ol dispela sipsip tu i kam. Na bai ol i harim maus bilong mi. Na bai i gat wanpela lain sipsip tasol na wanpela wasman tasol bilong ol sipsip.” Olsem na blut bilong Jisas i helpim tupela lain—namba wan, em ol Kristen i gat tingting long mekim wok king wantaim Jisas long heven, na namba tu, em ol manmeri i wet long kisim laip i stap oltaim long Paradais long graun. Yumi ken ting olsem “ol gutpela samting” long tok profet bilong Hagai i makim dispela namba tu lain.—Maika 4:1, 2; 1 Jon 2:1, 2.
12. Olsem wanem planti “gutpela samting” i wok long kam insait long haus bilong God long nau?
12 Dispela “ol gutpela samting” ol i wok yet long kam insait long haus bilong Jehova. Nau long dispela taim ol i bin tekewe sampela tambu long hap bilong Isten Yurop, na long sampela hap bilong Afrika, na long sampela kantri moa, olsem na wok bilong autim gutnius bilong Kingdom bilong God em i go bikpela tru long sampela hap bipo ol i no bin autim tok long en. Taim ol gutpela manmeri i kam insait long samting God i bin putim na i olsem tempel bilong em, ol tu i wok strong long kamapim sampela disaipel, olsem Jisas i bin tokim lain bilong em long mekim. (Matyu 28:19, 20) Taim ol i mekim olsem, ol i save bungim planti manmeri, em ol yangpela na lapun wantaim, em ol inap kamap olsem “ol gutpela samting” i givim biknem long haus bilong Jehova. Yumi ken tingim sampela stori long olsem wanem dispela samting i wok long kamap.
13. Olsem wanem wanpela liklik pikinini meri long Bolivia i kamapim pasin bilong em long givim bel long autim tok bilong Kingdom?
13 Long Bolivia, wanpela pikinini meri i gat 5-pela krismas, em papamama bilong em i Witnes, em i askim tisa long em i ken lusim skul long wik em wasman sekit bai kam lukim kongrigesen. Bilong wanem pikinini i laik mekim olsem? Long wanem, em i laik insait long wok bilong autim tok bilong Baibel long dispela bikpela wik bilong mekim dispela wok. Papamama i kirap nogut long dispela samting em i laik mekim, tasol tupela i amamas long em i gat gutpela tingting olsem. Long nau dispela liklik pikinini meri i save mekim 5-pela Baibel-stadi, na sampela sumatin bilong em i save go long ol miting Kristen. Na tu, em i bin bringim tisa bilong em i kam long Haus Kingdom. Ating bihain, sampela em i save stadi wantaim ol long Baibel bai ol i kamap olsem “ol gutpela samting” em ol bai givim biknem long haus bilong Jehova.
14. Long Korea, wanpela sista i no les long helpim wanpela man i olsem em i no gat laik long harim tok, olsem na wanem gutpela samting i kamap?
14 Long Korea, wanpela meri Kristen i wet long ples bilong kisim tren na em i go toktok wantaim wanpela sumatin em i wok long harim musik long rot bilong liklik spika em i putim long yau. Meri i askim em, “Yu gat wanpela lotu?” Sumatin i tok: “Mi no gat laik long wanpela lotu.” Orait meri i strong yet na em i tok, “Sampela man i gat dispela tingting, tasol bihain ating ol i laik makim wanpela lotu ol i ken insait long en. Tasol sapos man i no gat save long ol lotu, nogut em i popaia na makim kranki wanpela lotu.” Em nau, pes bilong sumatin i senis, na em i kirap na putim yau long tok bilong sista bilong yumi. Meri i soim buk long sumatin, Is There a Creator Who Cares About You? na meri i tok dispela buk bai helpim em gut sapos bihain em i laik makim wanpela lotu em i ken insait long en. Sumatin i amamas long kisim buk. Long wik antap em i kirap stadi long Baibel wantaim ol Witnes Bilong Jehova, na nau em i save go long olgeta miting Kristen.
15. Wanpela yangpela meri long Japan i save mekim wanem bilong kirapim ol Baibel-stadi? Wanem gutpela samting i kamap long dispela wok bilong em?
15 Long Japan, wanpela pikinini meri i gat 12-pela krismas, nem bilong em Megumi, em i tingim ples skul bilong em i gutpela ples bilong autim tok na skulim ol man. Na em i bin kirapim planti Baibel-stadi. Megumi i save mekim olsem wanem? Em i save kaunim Baibel na redim ol tok bilong miting long taim bilong malolo long belo kaikai, olsem na planti taim ol wanskul i save askim em long samting em i mekim. Sampela i save askim Megumi, bilong wanem em i no insait long sampela wok bilong skul. Megumi i save bekim ol dispela askim bilong ol na em i tokim ol olsem God i gat wanpela nem. Dispela i save kirapim tingting bilong ol na ol i gat laik long harim. Orait nau em i save tokim ol olsem em i laik stadi wantaim ol long Baibel. Nau Megumi i save mekim 20 stadi—18 stadi, em i mekim long ol wanklas bilong em.
16. Olsem wanem wanpela brata long Kamarun em inap kirapim Baibel-stadi long sampela bilong wanpela lain i tok bilas long em?
16 Long Kamarun, 8-pela man i stap long ples wok na ol i singautim wanpela brata i wok long tilim ol nius samting bilong Baibel long ol man i go i kam long rot. Ol dispela man i laik tok bilas long brata, olsem na ol i askim em, bilong wanem em i no bilip long God Triwan, bikpaia, na ol man i gat wanpela tewel i no save dai. Brata bilong yumi i mekim wok long Baibel na em i bekim ol askim bilong ol. Olsem na 3-pela bilong ol dispela man i orait long stadi long Baibel. Wanpela, em Daniel, em i kirap na go long ol miting, na em i rausim olgeta samting em i holim bilong mekim ol wok bilong ol spirit nogut. (KTH 21:8) Em i no winim yet wanpela yia na em i kisim baptais.
17. Sampela brata long El Salvado i bin mekim wanem narapela kain pasin bilong autim tok long wanpela man pastaim em i no laik harim tok bilong Kingdom?
17 Long El Salvado, wanpela man i save pasim dok nogut bilong em klostu long dua taim em i lukim ol Witnes Bilong Jehova i wok klostu long haus bilong em. Em i save wetim ol Witnes i go pinis na nau em kisim dok i go bek insait long haus. No gat wanpela taim ol brata inap toktok wantaim dispela man. Olsem na wanpela taim ol i tingting long traim narapela rot bilong autim tok long em. Ol i save dispela man inap harim ol tok ol i mekim, olsem na ol i tingting long autim tok long dok bilong em. Orait ol i go long dispela haus na tok gude long dok, na ol i tok ol i amamas long ol inap toktok wantaim em. Ol i stori long taim Paradais bai kamap long graun, na i no gat wanpela man i belhat o kros—na ol animal tu bai stap isi. Em nau, long gutpela pasin ol i tok gutbai long dok na ol i wokabaut i go. Ol i kirap nogut taim man i kam ausait na em i tok sori long em i no bin larim ol Witnes i toktok wantaim em. Em i kisim sampela nius, na ol i kirapim Baibel-stadi wantaim em. Nau dispela man em i wanpela brata bilong yumi—em wanpela bilong ol dispela “gutpela samting”!
“Yupela i No Ken Pret”
18. Wanem sampela hevi i save painim planti Kristen? Tasol Jehova i ting olsem wanem long ol manmeri i save lotuim em?
18 Olsem wanem long yu? Yu insait long dispela bikpela wok bilong autim tok bilong Kingdom na kamapim ol disaipel? Sapos olsem, orait em i wanpela gutpela wok tru yu holim. Long rot bilong dispela wok yet, Jehova i wok long pulim “ol gutpela samting” i kam insait long haus bilong em. (Jon 6:44) Tru, sampela taim ating skin bilong yu bai les o yu bel hevi. Sampela taim, sampela i save ting ol i nogut tasol na ol i no inap mekim wanpela gutpela wok—na sampela gutpela wokman bilong Jehova tu i save kisim dispela kain tingting. Tasol yu ken strongim bel! Olgeta wan wan man na meri i save lotuim Jehova, em i tingim ol olsem gutpela samting tru, na em i gat bikpela laik long em i ken kisim bek yu na bai yu stap laip.—2 Pita 3:9.
19. Long maus bilong profet Hagai, Jehova i givim wanem gutpela tok long ol Juda bilong strongim bel bilong ol? Olsem wanem ol dispela tok inap strongim yumi?
19 Taim yumi bel hevi long ol man i biruaim yumi, o i gat ol narapela samting i mekim na yumi bel hevi, ol tok Jehova i bin givim long ol Juda i lusim kalabus na i kam bek long ples em inap strongim yumi. Long Hagai 2:4-6, Jehova i tok olsem: “Maski, bel bilong yupela olgeta i no ken hevi. Yupela i mas kirap na mekim wok, long wanem, mi stap wantaim yupela. Bipo tru yupela i lusim Isip na i kam, na mi bin promis olsem mi bai i stap wantaim yupela oltaim. Nau tu spirit bilong mi i stap yet wantaim yupela, olsem na yupela i no ken pret. Mi Bikpela, mi gat olgeta strong, mi tok olsem, i no longtaim na bai mi mekim ol samting i stap long skai na long graun na long solwara i guria moa yet.” Em nau, Jehova i tokim yumi long i stap strong, tasol em i mekim narapela samting tu—em i wokim rot bambai yumi ken kisim strong. Em i mekim olsem wanem? Tingim dispela gutpela tok em i bin mekim: “Mi stap wantaim yupela.” Olsem na maski wanem ol hevi i kamap bilong pasim yumi, yumi save Jehova i stap wantaim yumi, na dispela save i strongim tru bilip bilong yumi!—Rom 8:31.
20. Olsem wanem haus bilong Jehova i kisim biknem moa yet long nau?
20 Tru tumas, Jehova i kamapim long ples klia pinis olsem em i stap wantaim lain bilong em. I olsem em i bin tok long maus bilong profet Hagai: “Dispela nupela haus bai kisim biknem moa, winim olpela haus. . . . Na long dispela ples mi bai givim bel isi long ol man.” (Hagai 2:9, NW ) Long nau, biknem moa yet i stap long tempel spirit bilong Jehova. Long olgeta yia i gat planti handet tausen manmeri ol i kam insait long lotu i tru. Ol i save kisim planti gutpela kaikai bilong spirit, na maski planti hevi i pulap long graun, ol i gat kain bel isi i no stap long narapela lain—bel isi bilong nupela taim God bai kamapim, em tasol bai winim dispela bel isi.—Aisaia 9:6, 7; Luk 12:42.
21. Yumi mas strong long mekim wanem?
21 Klostu nau na Jehova bai seksekim ol lain bilong graun long Armagedon. (KTH 16:14, 16) Olsem na long dispela hap taim i stap yet, yumi mas mekim wok bilong helpim sampela manmeri moa long abrusim bagarap. Yumi mas i stap strong na bilip tru long Jehova na wetim em. Yumi mas strong long bihainim yet pasin bilong lotuim Jehova long bikpela tempel spirit bilong em, na wok long bringim sampela “gutpela samting” moa i kam insait long en i go inap long taim Jehova i tok wok bilong yumi i pinis.
[Ol Futnot]
a Mani na gol samting ol i bin givim bilong wokim tempel bilong Solomon, em inap olsem 40 bilion dola (U.S.) long nau. Ol gol, mani, na ol narapela samting ol i no bin mekim wok long en bilong wokim dispela tempel, ol i putim insait long bakstua bilong tempel.—1 King 7:51.
b Jisas i no olsem hetpris long Israel—em i no gat wok long mekim ofa bilong tekewe sin bilong em yet, long wanem, em i no gat sin. Tasol ol nambatu pris bilong em ol i gat sin, long wanem, em i bin baim bek ol namel long ol manmeri bilong graun em ol i gat sin long skin bilong ol.—KTH 5:9, 10.
Yu Inap Tingim?
• Long ai bilong Jehova, wanem samting i gutpela tru, winim ol kago samting?
• Blut bilong Jisas i kapsait pinis, em i helpim wanem tupela lain manmeri?
• “Ol gutpela samting” em haus bilong Jehova bai kisim biknem long en, ol i husat?
• Wanem samting i makim olsem truim bilong tok profet bilong Hagai i wok long kamap long nau?
[Sat long pes 16]
(Bilong save ol dispela rait i stap we long pes, lukim buk o magasin)
Yu save long samting olpela tempel bilong Jehova i makim?
Rum Tambu Tru
Laplap
Rum Tambu
Rum i stap long pes bilong tempel
Alta
Ples bung bilong tempel
[Piksa long pes 17]
Hetpris i ofaim wanpela bulmakau man bilong tekewe sin bilong lain pris na wanpela meme bilong tekewe sin bilong ol lain bilong Israel i no bilong lain pris
[Piksa long pes 18]
Wok bilong autim tok bilong Kingdom long olgeta hap bilong graun i wok long pulim planti planti manmeri i kam insait long haus bilong Jehova