“Tingim Gen Dispela Taim Bipo”—Bilong Wanem?

“TINGIM gen dispela taim bipo.” Dispela tok em aposel Pol i bin raitim long yia 61 C.E. samting, na em i bin raitim i go long ol Kristen Hibru long Judia. (Hibru 10:32) Wanem samting i bin kirapim Pol long raitim dispela tok? Bilong wanem ol man bilong lotuim Jehova long dispela taim bilong ol aposel, ol i gat wok long tingim ol samting i bin kamap bipo? Sapos yumi tingim dispela wankain tok long nau, dispela bai helpim yumi o nogat?

Inap planti handet yia, ol man i bin raitim Baibel ol i bin toksave planti taim long pasin bilong sakim o lusim tingting long ol samting i bin kamap bipo. Ol samting i bin kamap bipo, ol i no samting bilong lusim tingting long en, ol i samting bilong tingim. Na Jehova i tok olsem: “Yupela i mas tingim ol samting mi bin mekim bipo, long wanem, mi wanpela tasol mi God, na i no gat narapela god moa i stap. Mi tasol mi God, na i no gat narapela god olsem mi i stap.” (Aisaia 46:⁠9) Yumi ken skelim 3-pela bikpela as na yumi mas tingim gut dispela tok.

Kirapim Yumi na Strongim Yumi

Namba wan as em olsem: Dispela i bikpela samting bilong kirapim yumi na strongim yumi. Taim Pol i raitim pas i go long kongrigesen Hibru, em i bin raitim long ol wanlain Kristen em long olgeta de ol samting i traim bilip bilong ol, long wanem, ol Juda i birua long ol. Pol i save, ol i mas strongim pasin bilong ol long sanap strong na karim hevi, olsem na em i tok: “Yupela i mas tingim gen dispela taim bipo, taim yupela i kisim lait bilong God. Long dispela taim ol i bin givim ol bikpela hevi long yupela, na yupela i karim planti pen. Tasol yupela i sanap strong na sakim ol dispela hevi.” (Hibru 10:32) Taim ol i tingim ol samting ol i bin mekim bipo bilong i stap gut long God na mekim pait bilong spirit, dispela inap strongim ol long winim resis bilong ol. Profet Aisaia tu i bin tok: “Yupela i mas tingim gut dispela tok mi bin autim. Olsem na bai yupela inap sanap strong.” (Aisaia 46:⁠8) Jisas i tingim wankain gutpela as na em i bin mekim dispela tok long kongrigesen long Efesus: “Olsem na yu mas tingim gen dispela pasin yu bin mekim bipo [yu bin laikim mi tru], na yu mas tanim bel na mekim kain pasin olsem pastaim yu save mekim.”​—⁠KTH 2:​4, 5.

Dispela tok long “tingim ol samting i bin kamap bipo bipo tru,” em i wanpela gutpela tok Moses i bin mekim planti taim long ol Israel bilong kirapim ol long stap gut long Jehova na no ken pret. (Lo 32:⁠7) Tingim tok bilong em long Lo 7:18: “Yupela i no ken pret long ol [ol Kenan]. Yupela i mas tingim dispela ol samting God, Bikpela bilong yumi, i bin mekim long king bilong Isip wantaim ol lain manmeri bilong em.” Taim ol i tingim ol samting Jehova i bin mekim bilong lukautim lain bilong em, dispela bai helpim ol long bihainim yet ol lo bilong God.​—⁠Lo 5:​15; 15:⁠15.

Tasol sori tumas, planti taim ol Israel i bin lusim tingting​—⁠em wanpela sin ol i bin mekim. Wanem samting i bin kamap? “Ol i no lusim pasin bilong traim God bilong Israel, em God bilong mekim gutpela na stretpela pasin olgeta. Ol i traim em na mekim em i kros tru long ol. Ol i no tingim bikpela strong bilong em, na ol i no ting long dispela taim em i bin kisim bek ol long han bilong ol birua.” (Song 78:​41, 42) Bihain pasin bilong ol long lusim tingting long ol lo bilong Jehova i mekim na em i bin lusim ol.​—⁠Matyu 21:​42, 43.

Man bilong raitim Song i bin makim gutpela pasin yumi ken bihainim, em i tok: “God, bai mi tingting gen long ol bikpela wok bilong yu. Yes, bai mi tingting bek long ol kain kain bikpela samting bipo yu bin mekim. Bai mi tingting long olgeta samting yu bin mekim. Yu bin mekim ol strongpela wok, na bai mi tingim dispela tu.” (Song 77:​11, 12) Kain pasin bilong tingim tingim ol gutpela wok ol man i bin mekim long bipo na ol gutpela pasin bilong Jehova, dispela bai kirapim yumi, na strongim yumi, na helpim yumi long pilim tru ol samting. Na tu, sapos yumi tingim ol “samting i bin kamap bipo,” dispela bai helpim yumi long i no ken les na em inap kirapim yumi long mekim ol samting bilong sanap strong yet na karim ol hevi.

Ol Rong Bilong Bipo Inap Skulim Yumi

Namba tu as na yumi no ken lusim tingting, em olsem: Taim yumi tingim ol rong ol man i bin mekim bipo na ol samting i bin painim ol long en, dispela inap skulim yumi na yumi no ken mekim wankain samting. Moses i gat dispela tingting taim em i tokim ol Israel: “Yupela i no ken lusim tingting long dispela taim yupela i bin i stap long ples wesan nating na yupela i mekim Bikpela i belhat. Long taim yupela i bin lusim Isip i kam inap nau, yupela i wok long sakim tok bilong Bikpela.” (Lo 9:⁠7) Moses i tok, ol Israel i bin sakim tok, olsem na ‘Jehova i bin mekim ol i raun long ples wesan nating inap 40 yia.’ Bilong wanem em i bin kirapim ol long tingim dispela samting? Em i bin mekim olsem bambai ol i ken daunim ol yet na dispela bai helpim ol long stretim pasin bikhet bilong ol na ol i ken ‘mekim ol samting Bikpela i bin tokim ol. Na ol i mas bihainim ol lo bilong em na ol i mas aninit long em.’ (Lo 8:​2-6) Dispela bai skulim ol na ol i no ken mekim gen ol dispela pasin nogut.

Wanpela saveman i tok: ‘Man i gat gutpela tingting em i save lain long ol samting i bin painim em yet, tasol man i gat gutpela save, em i save lain long ol samting i bin painim ol narapela man.’ Moses i bin tokim ol manmeri bilong Israel long tingim ol rong ol yet i bin mekim bipo na dispela i ken helpim ol, tasol aposel Pol i tokim ol narapela​—⁠em kongrigesen Korin long taim bilong ol aposel, na yumi​—⁠long larim ol dispela samting i bin painim ol Israel i skulim yumi. Em i tok: “Dispela ol samting i bin kamap long ol, em i olsem piksa bilong ol arapela man i ken lukim. Ol man i bin raitim ol dispela stori long buk bilong God, bilong givim tingting long yumi ol man i stap long dispela taim nau, em taim dispela graun klostu i laik pinis.” (1 Korin 10:11) Krais Jisas i bin tingim narapela samting moa bilong bipo na yumi mas kisim tingting long en taim em i tok: “Yupela i mas tingim samting i bin kamap long meri bilong Lot.” (Luk 17:32; Stat 19:​1-​26) Wanpela saveman bilong Inglan, em Samuel Taylor Coleridge, em i tok: ‘Sapos ol man inap kisim tingting long ol samting i bin kamap bipo, dispela inap skulim yumi long planti samting!’

Pasin Daun na Pasin Bilong Tenkyu

Namba tri as em olsem: Pasin bilong tingim ol dispela samting bilong bipo inap kamapim long yumi ol gutpela pasin bilong God, olsem pasin daun na pasin bilong tenkyu. Yumi amamas long planti samting bilong paradais bilong spirit i stap long olgeta hap, tasol yumi no ken lusim tingting olsem i gat sampela gutpela pasin i as bilong dispela amamas, olsem pasin bilong stap gut long God, laikim ol narapela, daunim laik bilong yumi yet, wok strong long taim bilong hevi, sanap strong na karim hevi, no ken les kwik, na bilip​—⁠em ol dispela pasin ol brata na sista Kristen bilong yumi i bin kamapim inap planti yia i go pinis, taim ol i kirapim wok long ol nupela hap. Long pinis bilong ripot long wok bilong lain bilong God bilong Meksiko long nau, yiabuk bilong ol Witnes Bilong Jehova bilong 1995 i tok: “Long ol manmeri em nau tasol ol i kam bung wantaim ol Witnes Bilong Jehova, ol bai kirap nogut long save long ol traim i bin painim ol manmeri i go pas na kirapim wok long Meksiko. Ol dispela nupela manmeri i save tasol long paradais bilong spirit em planti kaikai bilong spirit i stap long en, na ol inap bung wantaim planti tausen manmeri i pret long God, na i gat planti samting bilong helpim ol long mekim gut wok bilong lotuim God.”

Ol dispela lain i bin i go pas bilong kirapim wok, planti taim ol i bin wok wanpela tasol, o long ol liklik grup i stap longwe. Ol i bin i stap wanpis, na sot long ol samting, na ol narapela samting i traim bilip bilong ol taim ol i wok yet long autim tok bilong Kingdom. Maski planti bilong ol dispela wokman bilong bipo ol i dai pinis, em i gutpela tru long save olsem Jehova i save tingim ol gutpela wok ol i bin mekim! Aposel Pol i strongim dispela samting taim em i tok: “God em i no man nogut, na bai em i lusim tingting long ol gutpela wok yupela i bin mekim.” (Hibru 6:10) Sapos Jehova i save amamas long tingim wok bilong ol, yumi tu inap mekim olsem bilong tenkyu long ol.

Ol nupela man long tok i tru, ol inap save long ol samting i bin kamap long bipo taim ol i kaunim buk Jehovah’s Witnesses​—⁠Proclaimers of God’s Kingdom.a Na tu, sapos yumi bilong wanpela famili o wanpela kongrigesen em wanpela lapun brata o sista i insait long en na em i bin mekim wok bilong God inap longtaim, Lo 32:7 i kirapim yumi long “tingim ol samting i bin kamap bipo bipo tru. Askim ol papa bilong yupela long tokim yupela long wanem samting i bin kamap. Na askim ol lapun long stori long yupela long ol samting bilong bipo.”

Tru tumas, taim yumi tingim ol gutpela pasin bilong ol Kristen bilong bipo, dispela bai kirapim yumi long amamas na mekim yet ol wok Kristen bilong yumi. Na tu, ol samting i bin kamap bipo i gat ol gutpela samting yumi mas save long en. Na taim yumi tingim long bel paradais bilong spirit em God i as bilong en, dispela inap kamapim ol gutpela pasin olsem pasin bilong daunim yumi yet na pasin bilong tenkyu. Tru tumas, “tingim gen dispela taim bipo.”

[Futnot]