Lukaut—Nogut Bilip Bilong Yu i No Strong
“Ol brata, yupela i mas was gut. Nogut wanpela brata namel long yupela em i gat tingting nogut long bel bilong en na em i lusim bilip na i givim baksait long God i gat laip.”—HIBRU 3:12.
1. Tok Pol i mekim long ol Kristen Hibru i helpim yumi long save long wanem samting i nogut tru?
MAN! Em wanpela tok bilong mekim man i tingting planti, a? Olsem sampela man, bipo ol i pas gut wantaim Jehova ol inap kisim “tingting nogut long bel” na “lusim bilip na i givim baksait long God i gat laip.” Em wanpela bikpela tok lukaut, a? Aposel Pol i no mekim dispela tok long sampela man i no bilip, nogat; em i mekim dispela tok long ol man em long rot bilong bilip long ofa bilong Krais Jisas ol i dediketim pinis laip bilong ol long Jehova.
2. Yumi mas skelim wanem ol askim?
2 Olsem wanem wanpela man i pas gut wantaim Jehova em inap kisim “tingting nogut long bel bilong en na em i lusim bilip”? Olsem wanem wanpela man em i pilim pinis pasin sori na marimari bilong God na bihain long laik bilong em yet em i givim baksait long em? Yu ting dispela inap painim yumi tu? Em ol tok yumi mas tingim gut, na i stret yumi kisim save long as bilong dispela tok lukaut.—1 Korin 10:11.
Bilong Wanem Em i Givim Strongpela Tok Olsem?
3. Stori long ol samting i painim ol Kristen i stap long Jerusalem na long ol hap klostu long en long taim bilong ol aposel.
3 Yumi ken ting olsem Pol i bin raitim pas bilong em i go long ol Kristen Hibru long Judia long yia 61 C.E. Wanpela man bilong raitim ol stori bilong ol samting i bin kamap bipo em i tok, long dispela taim “i no gat bel isi o ples hait bilong wanpela stretpela man long taun Jerusalem o long ol narapela hap bilong provins.” Long dispela taim ol man i sakim ol lo na ol i pait na bagarapim man, na sampela samting i kirapim ol long mekim dispela kain pasin i olsem: Ami bilong Rom i bosim ol i mekim hatpela pasin, na lain Selot, em ol Juda i birua long ol Rom, ol i hambak long strong bilong ol, na ol stilman i mekim ol wok nogut bilong ol long dispela taim nogut bilong ol samting i paul nabaut. Ol dispela samting i mekim na i stap bilong ol Kristen i hatwok tru, em ol i bin wok strong long ol i no ken insait long ol dispela pasin. (1 Timoti 2:1, 2) Tru tumas, ol i no insait long pasin bilong graun, olsem na sampela man i ting ol i no laik stap gut wantaim ol narapela man, na ol i laik daunim gavman tu. Planti taim ol man i mekim nogut long ol Kristen, na ol samting bilong ol i lus.—Hibru 10:32-34.
4. Ol Kristen Hibru i kisim wanem hevi long ol samting bilong lotu?
4 Na tu, ol Kristen Hibru i kisim bikpela hevi tru long ol samting bilong lotu. Ol gutpela disaipel bilong Jisas i givim bel tru long autim tok na kwiktaim kongrigesen Kristen i kamap bikpela na dispela i kirapim ol Juda long bel nogut na kros long ol—na ol bikman bilong lotu i kros moa yet long ol. Maski ol i mas mekim wanem bilong mekim nogut na birua long ol disaipel bilong Krais Jisas, ol i mekim.a (Aposel 6:8-14; 21:27-30; 23:12, 13; 24:1-9) Maski sampela Kristen i no kisim nogut long han bilong ol birua, tasol ol Juda i mekim pasin long ol olsem ol i pipia lain tasol na ol i tok bilas long ol. Ol i nolaik tru long lotu Kristen, long wanem, ol i wanpela nupela lain tasol na ol i no gat ol gutpela samting olsem lotu Juda, olsem tempel, na ol pris, na ol bikpela de, na ol ofa samting. Na man i go pas long ol, em Jisas, ol i bin kilim em i dai olsem wanpela man nogut. Bilong bihainim lotu bilong ol, ol Kristen i mas i gat bilip, na strongpela bel, na pasin bilong sanap strong.
5. Bilong wanem em i bikpela samting long ol Kristen long Judia long was i stap long ol samting bilong spirit?
5 Na bikpela samting tru, ol Kristen Hibru long Judia ol i stap long wanpela bikpela taim bilong dispela lain. Planti samting Bikpela bilong ol, Krais Jisas, i bin tokaut long en olsem mak bilong pinis bilong ol pasin na lo bilong lain Juda i kamap pinis. Olsem na liklik taim na pinis bai kamap. Bilong abrusim bagarap, ol Kristen i mas was i stap long ol samting bilong spirit na ol i mas redi long “ranawe i go long ples maunten.” (Matyu 24:6, 15, 16) Olsem wanem? Bai ol i gat bilip na strong long ol samting bilong spirit bambai ol i ken mekim kwik ol samting Jisas i bin tokim ol long mekim? Ating Pol i gat tupela tingting long dispela.
6. Ol Kristen long Judia i mas kisim hariap wanem samting?
6 Insait long 10-pela yia paslain long taim ol pasin na lo bilong lain Juda i pinis, ol man insait na ausait long kongrigesen i givim bikpela hevi tru long ol Kristen Hibru. Ol i mas i gat wanpela bilong strongim bel bilong ol. Na tu, ol i mas kisim sampela tok bilong stretim ol na soim rot long ol bilong helpim ol long save olsem, rot ol i bin makim long bihainim i stret na pasin bilong ol long sanap strong na karim hevi i no lus nating. Gutpela tru, Pol i bin wok strong long helpim ol.
7. Bilong wanem yumi mas laik long kisim save long ol samting Pol i bin raitim long ol Kristen Hibru?
7 Ol samting Pol i bin raitim long ol Kristen Hibru i mas i stap olsem bikpela samting tru long yumi. Bilong wanem? Long wanem, ol samting i kamap long nau i wankain olsem ol samting i bin kamap long dispela taim bipo. Long olgeta de ol samting bilong dispela graun Satan i bosim i givim hevi long yumi. (1 Jon 5:19) Ol tok profet bilong Jisas na ol aposel long ol samting i kamap long las de na long taim pasin bilong “dispela graun i laik pinis” i kamap long ai bilong yumi stret. (Matyu 24:3-14; 2 Timoti 3:1-5; 2 Pita 3:3, 4; KTH 6:1-8) Na bikpela samting tru, yumi mas was i stap long ol samting bilong spirit bambai yumi ken “abrusim olgeta dispela samting i laik kamap.”—Luk 21:36.
Wanpela Man i Winim Tru Moses
8. Long tok Pol i mekim long Hibru 3:1 em i laik kirapim ol wanwok Kristen long mekim wanem?
8 Pol i kamapim wanpela bikpela tok, olsem: “Yupela i mas tingting gut long Jisas, dispela Aposel na Hetpris yumi save bilip long em na tokaut long nem bilong em.” (Hibru 3:1) Insait bilong dispela tok “tingting gut” i olsem “pilim gut . . . , save gut, o tingim gut.” (Buk Vine’s Expository Dictionary of Old and New Testament Words) Olsem na Pol i bin kirapim ol wanbilip bilong em long wok strong long pilim tru wok Jisas i bin mekim bilong kisim bek ol na ol samting em i bin mekim long bilip bilong ol. Taim ol i mekim olsem, dispela bai strongim laik bilong ol long sanap strong long bilip. Orait wanem dispela wok Jisas i bin mekim? Na bilong wanem yumi mas “tingting gut” long em?
9. Bilong wanem Pol i kolim Jisas olsem “Aposel” na “Hetpris”?
9 Pol i kolim Jisas olsem “Aposel” na “Hetpris.” Wanpela “Aposel” em wanpela man ol i salim em i go, na long dispela skripsa dispela tok i makim olsem Jisas em i rot bilong God long toktok wantaim ol man. Wanpela “Hetpris” em wanpela man em long rot bilong em ol man i ken go klostu long God. Dispela tupela samting i bikpela samting long lotu tru, na Jisas i makim dispela tupela samting. Em i bin stap long heven na God i salim em i kam bilong skulim ol man long tok i tru bilong God. (Jon 1:18; 3:16; 14:6) Na Jehova i bin makim Jisas olsem Hetpris long haus spirit bilong em bambai em i ken lusim sin bilong ol man. (Hibru 4:14, 15; 1 Jon 2:1, 2) Sapos yumi pilim tru ol gutpela samting yumi inap kisim long rot bilong Jisas, bai yumi gat strongpela bel na tingting strong long sanap strong yet long bilip.
10 Bilong kamapim long ples klia ol gutpela samting bilong bilip Kristen, Pol i skelim Jisas wantaim Moses, em ol Juda i bilip em i nambawan bikpela profet long ol tumbuna bilong ol. Sapos ol Kristen Hibru inap bilip tru olsem Jisas i winim Moses, bai i no gat as na ol i gat tupela tingting olsem lotu Kristen i winim lotu Juda o nogat. Pol i tok, God i bin makim Moses bilong lukautim “haus” bilong God—em lain, o kongrigesen, bilong Israel—tasol em i stap olsem wanpela gutpela wokman tasol. (Namba 12:7) Tasol Jisas em i Pikinini bilong God, em man bilong bosim dispela haus. (1 Korin 11:3; Hibru 3:2, 3, 5) Bilong strongim dispela tok, Pol i kamapim wanpela bikpela tok i tru olsem: “Olgeta wan wan haus i gat man i bin wokim em. Tasol God i bin wokim olgeta samting.” (Hibru 3:4) I no gat wanpela man bai tok God i no winim ol narapela, long wanem, em i Man bilong wokim olgeta samting. Na Jisas i bin wok wantaim God long kamapim olgeta samting, olsem na em i winim olgeta narapela samting God i wokim, Moses tu.—Sindaun 8:30; Kolosi 1:15-17.
11 God i mekim gut tru long ol Kristen Hibru. Pol i tokim ol olsem God “i bin singautim [ol]” bilong i go long heven, na dispela em i wanpela gutpela samting tru, winim olgeta samting lotu Juda inap givim long ol. (Hibru 3:1) Ating tok bilong Pol i helpim ol dispela Kristen God i bin makim long amamas tru long nupela samting ol bai kisim, na ol i no ken bel hevi long ol i bin lusim ol pasin na lotu bilong ol long bipo. (Filipai 3:8) Pol i kirapim ol long bilip strong long dispela gutpela samting ol i wetim na ol i no ken ting em samting nating. Em i tok: “Krais em i Pikinini Bilong God, na em i gat wok bilong bosim ol manmeri i stap olsem haus bilong God. Na em i bihainim tru tok bilong God na i mekim dispela wok. Na sapos oltaim yumi bilip strong na yumi amamas na wetim Bikpela i mekim gut long yumi, orait yumi tu i stap olsem haus bilong God.”—Hibru 3:6.
11, 12. Pol i kirapim ol Kristen Hibru long “bilip strong” long wanem samting? Olsem wanem yumi ken bihainim tok bilong em?
12 Yes, sapos ol Kristen Hibru i laik abrusim bagarap long las de bilong lain Juda klostu i laik kamap, ol i mas “bilip strong” na amamas long wetim God i mekim gut long ol. Yumi mas mekim wankain samting long nau sapos yumi laik abrusim bagarap long las de bilong dispela taim nau. (Matyu 24:13) Yumi no ken larim ol hevi, na pasin bilong ol man long les long harim tok bilong yumi, na ol laik nogut bilong skin bilong yumi yet i mekim na bilip bilong yumi long ol tok promis bilong God i no strong moa. (Luk 21:16-19) Bilong save long olsem wanem yumi ken strongim bilip bilong yumi, yumi ken tingim sampela tok moa Pol i bin mekim.
“No Ken Pasim Strong Bel Bilong Yupela”
13. Pol i givim wanem tok lukaut? Na em i tok olsem wanem long Song 95?
13 Pol i stori pinis olsem God i mekim gut long ol Kristen Hibru, na nau em i givim dispela tok lukaut: “Yumi mas harim tok bilong Holi Spirit. Em i tok olsem, ‘Nau sapos yupela i harim maus bilong mi God, orait yupela i no ken pasim strong bel bilong yupela, olsem bipo ol tumbuna bilong yupela i mekim long taim ol i bikhet na sakim tok bilong mi. Ol i stap long ples drai na ol i traim mi.’ ” (Hibru 3:7, 8) Pol i bin kamapim tok bilong Song 95, olsem na em i ken tok “Holi Spirit . . . i tok olsem.”b (Song 95:7, 8; Kisim Bek 17:1-7) Spirit bilong God yet i bin kamapim olgeta tok bilong Baibel.—2 Timoti 3:16.
14. Ol Israel i ting olsem wanem long ol samting Jehova i bin mekim bilong helpim ol? Bilong wanem ol i kamapim kain pasin olsem?
14 Bihain long taim Jehova i kisim bek ol Israel long wok kalabus long Isip, ol Israel i go insait long wanpela kontrak wantaim Jehova, em wanpela gutpela samting tru. (Kisim Bek 19:4, 5; 24:7, 8) Tasol ol i no pilim tru ol gutpela samting God i bin mekim bilong helpim ol, nogat; i no longtaim na ol i bikhet. (Namba 13:25–14:10) Olsem wanem dispela samting inap kamap? Pol i kamapim as bilong dispela samting olsem: Ol i pasim strong bel bilong ol. Tasol olsem wanem wanpela man em pastaim bel bilong em i save tingim tru Tok Bilong God, bihain bel bilong em i go strong? Na yumi mas mekim wanem bambai yumi no ken pasim strong bel bilong yumi?
15. (a) Long bipo na long nau ol man i harim ‘maus bilong God’ olsem wanem? (b) Yumi ken givim wanem ol askim long skin bilong yumi yet long ‘maus bilong God’?
15 Taim Pol i givim tok lukaut long ol em i kirapim tok bilong em olsem, “sapos yupela i harim maus bilong mi God.” God i bin toktok long lain bilong em long rot bilong Moses na ol narapela profet. Bihain, Jehova i toktok long ol long rot bilong Pikinini bilong em, Krais Jisas. (Hibru 1:1, 2) Long nau, yumi gat Tok Bilong God olgeta, em Baibel Holi. Na tu, yumi gat “wokboi i gat gutpela tingting,” em Jisas i makim bilong givim kaikai bilong spirit “long taim bikman i makim.” (Matyu 24:45-47) Olsem na God i save givim yet ol tok. Tasol olsem wanem? Yumi save putim gut yau? Olsem: Yumi save mekim wanem taim yumi harim sampela tok long pasin bilong bilasim skin o wanem kain amamas na musik yumi save laikim? Olsem wanem? Yumi save “harim” dispela tok, olsem putim gut yau na bihainim? Sapos yumi kisim pasin bilong ting olsem yumi no gat rong o yumi sakim dispela tok, yumi opim rot na isi isi bel bilong yumi i kamap strong.
16. Wanem wanpela samting inap mekim na yumi pasim strong bel bilong yumi?
16 Na tu, yumi inap pasim strong bel bilong yumi sapos yumi no mekim ol samting yumi inap mekim na yumi mas mekim. (Jems 4:17) Maski Jehova i mekim planti samting bilong helpim ol Israel, ol i no bilip, na ol i bikhet long Moses, na ol i bilip long ripot nogut long Kenan, na ol i no laik go insait long Graun Bilong Promis. (Namba 14:1-4) Olsem na Jehova i tok ol i mas raun inap 40 yia long ples drai nating—ol i mas raun inap planti yia olsem bambai olgeta man long dispela lain i no bilip ol i dai. God i belhat tru long ol, na em i tok: “ ‘Bel bilong ol i no save bihainim mi. Olgeta taim ol i save lusim rot mi makim bilong ol.’ Olsem na mi belhat na mi tokim ol olsem, ‘Tru antap, yupela i no inap i go insait long . . . malolo bilong mi.’ ” (Hibru 3:9-11) Dispela i skulim yumi long wanpela samting?
Samting Bilong Skulim Yumi
17. Ol Israel i lukim ol bikpela wok bilong Jehova na harim ol tok bilong em, olsem na bilong wanem ol i no bilip?
17 Ol lain Israel i bin lusim Isip, long ai bilong ol yet ol i lukim ol bikpela wok bilong Jehova na long yau bilong ol yet ol i harim ol tok bilong em. Tasol ol i no bilip olsem God inap helpim ol long kamap gut long Graun Bilong Promis. Bilong wanem i olsem? Jehova i tok: “Olgeta taim ol i save lusim rot mi makim bilong ol.” Ol i save long ol tok bilong Jehova na ol samting em i bin mekim, tasol ol i no bilip long save bilong Jehova long lukautim ol. Ol i tingting tasol long ol samting ol yet i mas kisim na ol i laik kisim, na ol i no tingim pasin na laik bilong God. Tru tumas, ol i no bilip long tok promis bilong em.
18 Ol dispela narapela tok Pol i givim long ol Hibru i stret tru long yumi tu, em i tok: “Ol brata, yupela i mas was gut. Nogut wanpela brata namel long yupela em i gat tingting nogut long bel bilong en na em i lusim bilip na i givim baksait long God i gat laip.” (Hibru 3:12) Pol i kamapim as bilong dispela samting. Em i tok, taim man i “lusim bilip na i givim baksait long God i gat laip” orait nau em bai kisim “tingting nogut long bel bilong en.” Long dispela pas, pastaim em i toktok long pasin bilong ‘slek long bihainim tok na lusim God,’ long wanem, man i no tingting gut. (Hibru 2:1) Tasol insait bilong dispela tok Grik ol i tanim olsem “lusim bilip na i givim baksait long God” i olsem pasin bilong “sanap longwe” na i wankain liklik olsem dispela tok “lusim bilip na bikhet long God.” I olsem long laik bilong em yet wanpela man i sakim tok bilong God na em i save em i mekim olsem; em i surik na lusim, na em i ting dispela samting em i mekim i samting nating tasol.
19 Dispela samting i skulim yumi olsem, sapos planti taim yumi sakim pasin bilong ‘harim maus bilong God,’ olsem yumi sakim tok bilong Jehova i kam long rot bilong Tok bilong em na lain gutpela wokboi, i no longtaim na bel bilong yumi bai kamap strong. Olsem: Wanpela man na meri i no marit inap mekim sampela pasin i no stret olsem narapela i holim skin bilong narapela. Olsem wanem sapos ol i no tingim dispela samting? Yu ting dispela bai helpim ol na ol i no ken mekim gen dispela pasin, o dispela bai kirapim ol na bai i no hatwok long mekim gen? Na i wankain tu taim lain gutpela wokboi i save kamapim sampela tok bilong helpim yumi long was gut long ol samting bilong amamas yumi laik kisim, o musik yumi laik harim, na kain samting olsem. Olsem wanem? Yumi save amamas long kisim dispela tok na yumi redi long stretim ol pasin bilong yumi i no stret tumas. Pol i tok, yumi “no ken lusim pasin bilong bung wantaim.” (Hibru 10:24, 25) Tasol maski Pol i givim dispela tok, sampela i no tingting strong long go long olgeta miting. Ol inap ting sapos ol i no go long olgeta miting o ol i lusim wanpela miting long olgeta wik olsem Buk-Stadi samting, dispela i no bikpela samting.
20 Sapos yumi no bihainim gut tok bilong “maus” bilong Jehova i kamap long Baibel na ol buk bilong Baibel, bai i no longtaim na yumi ‘lusim bilip na givim baksait long God i gat laip.’ Sapos yumi no tingim tok bilong stretim yumi, dispela inap kirapim yumi long daunim dispela tok na sutim tok long en, na sakim. Sapos yumi no stretim dispela pasin, bai yumi kisim “tingting nogut long bel bilong [yumi],” na i hatwok tru long lusim kain pasin olsem. (Skelim wantaim Efesus 4:19.) Jeremaia i tok stret tru olsem: “Bel bilong olgeta man i save tingting oltaim long mekim pasin giaman. Tingting bilong man em i nogut tru. Na husat inap save long as tru bilong en?” (Jeremaia 17:9) Long dispela as, Pol i tokim ol wanbilip Hibru olsem: “Long olgeta de yupela wan wan i mas givim gutpela tok long ol arapela manmeri bilong God, na kirapim tingting bilong ol, nogut pasin bilong sin i giamanim wanpela bilong yupela na em i pasim strong bel bilong en.”—Hibru 3:13.
21. Yumi olgeta i mas mekim wanem samting? Yumi ken wet long wanem samting?
21 Yumi amamas tru long Jehova i save toktok yet long yumi long nau long rot bilong Baibel na oganaisesen bilong em! Yumi amamas tru olsem “wokboi i gat gutpela tingting” i wok yet long helpim yumi long “mekim bilip bilong yumi i stap strong tru i go inap long taim . . . yumi dai.” (Hibru 3:14) Nau em taim bilong yumi long pilim tru gutpela pasin sori bilong God na long bihainim ol tok bilong em long stiaim yumi. Taim yumi mekim olsem, yumi ken amamas long narapela gutpela tok promis bilong Jehova—yumi ken “i go insait” long malolo bilong em. (Hibru 4:3, 10) Bihain Pol i stori long dispela samting long ol Kristen Hibru, na yumi tu bai toktok long en long stori i kamap bihain long dispela.
[Ol Futnot]
a Josifas i stori olsem bihain liklik long taim Festus i dai, Ananus (Ananaias) bilong lain Sadyusi i kamap hetpris. Em i mekim na Jems, em brata bilong Jisas, na sampela narapela disaipel ol i mas sanap long Nambawan Kaunsil na em i makim ol bilong i dai na ol i tromoi ston long ol.
b Ating Pol i bin kolim tok bilong Baibel Grik Septuagint. Dispela Baibel i tanim tok Hibru “Meriba” olsem “toktok planti,” na tok Hibru “Masa” olsem “traim.” Lukim pes 350 na 379 long Volyum 2 bilong buk Insight on the Scriptures, Sosaiti Wastaua Bilong Nu Yok i wokim.
Yu Inap Stori Long Dispela?
◻ Bilong wanem Pol i raitim kain strongpela tok olsem long ol Kristen Hibru?
◻ Olsem wanem Pol i helpim ol Kristen Hibru long pilim tru olsem ol i gat gutpela samting, winim i stap bilong ol aninit long lotu Juda?
◻ Wanem samting inap mekim na yumi pasim strong bel bilong yumi?
◻ Yumi mas mekim wanem bambai yumi no kisim “tingting nogut long bel bilong [yumi]”?
10. (a) Olsem wanem Pol i helpim ol Kristen Hibru long save olsem lotu Kristen i winim lotu Juda? (b) Pol i kamapim wanem bikpela tok i tru bilong strongim tok bilong em?
18. Olsem Pol i tok, wanem kain pasin bai kamapim “tingting nogut long bel bilong [man]”?
19. Sapos yumi no harim ol tok bilong stretim yumi, olsem wanem dispela inap kamapim bikpela hevi? Stori long dispela samting.
20. Bilong wanem em i bikpela samting long yumi bihainim gut tok bilong Baibel?
[Piksa long pes 10]
Yu bilip long Jisas, em Man i winim Moses?