Ol i Lain Long Mekim Wok Autim Tok
“Yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.”—APOSEL 1:8.
1, 2. Pita i gat wanem wok long mekim? Husat i givim dispela wok long em?
“JISAS bilong Nasaret . . . i tokim mipela long autim tok long ol manmeri na tokaut klia olsem, ‘God i bin makim dispela man tasol bai em i stap man bilong harim kot bilong ol man i stap laip na bilong ol man i dai pinis.’ ” (Aposel 10:38, 42) Pita i mekim dispela tok taim em i stori long Kornilius na famili bilong em long wok em i kisim bilong autim gutnius.
2 Jisas i tokaut long dispela wok long wanem taim? Pita i tingim tok Jisas i bin mekim paslain stret long em i go long heven. Long dispela taim, Jisas i tokim ol gutpela disaipel bilong em: “Yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.” (Aposel 1:8) Tasol paslain long dispela, Pita i save em i wanpela disaipel bilong Jisas, olsem na em i mas toktok wantaim ol arapela long bilip bilong em long Jisas.
Tripela Yia Bilong Kisim Skul
3. Jisas i bin wokim wanem mirakel? Em i bin tok olsem Pita na Andru bai mekim wanem?
3 Sampela mun bihain long Jisas i baptais long 29 C.E., em i autim tok long hap we Pita na brata bilong em Andru i mekim wok bilong kisim pis long raunwara Galili. Ol i bin wok long nait olgeta, tasol ol i no kisim pis. Tasol Jisas i tokim ol: “Pul i go namel long wara, na tromoi ol umben i go daun bilong kisim pis.” Taim ol i bihainim tok bilong Jisas, “ol i kisim bikpela lain pis moa, na ol umben i laik bruk.” Taim Pita i lukim dispela mirakel em i pret nogut tru, tasol Jisas i mekim gut bel bilong em na i tok: “Yu no ken pret. Nau yu wok long kisim pis, tasol bihain bai yu wok long kisim ol manmeri i kam long mi.”—Luk 5:4-10.
4. (a) Jisas i mekim wanem bilong redim ol disaipel bilong em long autim tok? (b) Olsem wanem wok autim tok bilong ol disaipel bilong Jisas bai i narapela kain long wok Jisas yet i bin mekim?
4 Wantu, Pita na Andru—wantaim Jems na Jon, tupela pikinini man bilong Sebedi—ol i lusim bot bilong ol na bihainim Jisas. Klostu long tripela yia ol i poromanim Jisas long raun bilong em long autim tok na ol i lain long autim gutnius. (Matyu 10:7; Mak 1:16, 18, 20, 38; Luk 4:43; 10:9) Long pinis bilong dispela taim, long Nisan 14, 33 C.E., Jisas i tokim ol: “Man i bilip long mi, bai em tu i mekim olkain wok mi save mekim. Na bai em i mekim ol bikpela wok i winim wok mi bin mekim.” (Jon 14:12) Ol disaipel bai mekim wok autim tok olsem Jisas i bin mekim, tasol wok ol i mekim bai i bikpela moa yet. Ol i kisim save olsem ol yet wantaim ol disaipel i kamap bihain, ol bai autim tok long “olgeta lain manmeri,” i go inap “dispela taim i pinis.”—Matyu 28:19, 20.
5. Olsem wanem wok bilong Jisas long skulim ol disaipel inap helpim yumi?
5 Yumi stap long taim pasin bilong “dispela graun i laik pinis.” (Matyu 24:3) Yumi no inap raun wantaim Jisas na lukim em i autim tok long ol man olsem ol disaipel i bin mekim. Tasol, yumi inap ritim hap bilong Baibel i stori long pasin bilong em long autim tok na long ol tok em i bin givim ol disaipel bilong em, na dispela inap helpim yumi. (Luk 10:1-11) Na tu, dispela stadi bai stori long narapela bikpela samting tru Jisas i bin lainim ol disaipel long en—stretpela tingting long wok autim tok.
Tingim Tru Ol Manmeri
6, 7. Wanem pasin bilong Jisas i helpim wok autim tok bilong em long karim kaikai? Olsem wanem yumi inap bihainim dispela pasin bilong em?
6 Bilong wanem wok autim tok bilong Jisas i karim kaikai? Wanpela samting em pasin bilong em long tingim tru ol manmeri. Man bilong raitim song i tok profet olsem Jisas bai “sori long ol manmeri i no gat strong na i stap rabis.” (Song 72:13) Em i bin inapim tru dispela tok profet. Baibel i stori long wanpela samting i bin kamap olsem: “Em i lukim ol bikpela lain manmeri, na em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.” (Matyu 9:36) Ol man bilong bikhet na mekim sin, ol tu i pilim pasin bilong Jisas long tingim ol na ol i laik go klostu long em.—Matyu 9:9-13; Luk 7:36-38; 19:1-10.
7 Long nau wok bilong yumi bai i karim kaikai sapos yumi kamapim wankain pasin bilong tingim man. Paslain long autim tok, lusim liklik haptaim na tingim olsem wanem ol manmeri i sot tru long tok yu laik mekim long ol. Tingim ol hevi ating ol i karim na Kingdom tasol bai stretim. Pasim tok long bel olsem yu bai mekim gutpela tok long olgeta man, long wanem, yu no save husat bai laikim tok yu autim. Ating wanpela yu bungim i wok long beten askim God long salim wanpela olsem yu long kam helpim em!
Pasin Laikim i Kirapim Ol
8. Olsem Jisas, wanem samting i kirapim ol disaipel bilong em long autim gutnius?
8 Gutnius Jisas i autim i stori long laik bilong Jehova bai i kamap, nem bilong Jehova i mas stap holi, na i stret Jehova i stap nambawan bos—em ol nambawan bikpela tok ol manmeri long graun i mas tingim. (Matyu 6:9, 10) Jisas i laikim tru Papa bilong em, dispela i kirapim em long stap gut long God i go inap long pinis na long autim tok bilong Kingdom, na Kingdom bai inapim ol dispela bikpela tok. (Jon 14:31) Wankain samting i kirapim lain bilong Jisas long nau, olsem na ol i givim bel long mekim wok autim tok. Aposel Jon i tok: “Sapos yumi laikim tru God, orait yumi save bihainim ol lo bilong en,” dispela i makim tu lo bilong autim gutnius na kamapim ol disaipel.—1 Jon 5:3; Matyu 28:19, 20.
9, 10. Yumi laikim tru God, na wanem arapela pasin laikim i kirapim yumi long autim tok?
9 Jisas i tokim ol disaipel: “Sapos yupela i laikim mi tru, orait yupela bai i bihainim gut ol tok bilong mi. Man i kisim lo bilong mi na i bihainim gut, dispela man em i laikim mi tru.” (Jon 14:15, 21) Olsem na pasin bilong laikim tru Jisas i mas kirapim yumi long autim tok i tru na bihainim ol arapela lo Jisas i bin givim. Taim Jisas i kamap long ol disaipel bihain long em i kirap bek, em i tokim Pita: “Lukautim ol pikinini sipsip bilong mi long kaikai samting. . . . Was long ol sipsip bilong mi. . . . Lukautim ol sipsip bilong mi long kaikai samting.” Wanem samting i mas kirapim Pita long mekim olsem? Jisas i bekim dispela askim taim em i askim Pita planti taim: “Yu laikim mi? . . . Yu laikim mi, o nogat? . . . Ating yu laikim mi?” Em nau, pasin bilong Pita long laikim Jisas, dispela bai kirapim em long autim tok long ol man, painim “ol sipsip” bilong Jisas, na stap olsem wasman i lukautim ol long ol samting bilong spirit.—Jon 21:15-17.
10 Long nau, yumi no save gut tru long Jisas olsem Pita i bin save long em. Tasol yumi kliagut long samting Jisas i bin mekim bilong helpim yumi. Yumi pilim tru dispela bikpela pasin laikim i bin kirapim em long “karim bikpela pen na i dai” bilong helpim olgeta manmeri. (Hibru 2:9; Jon 15:13) Yumi gat wankain tingting olsem Pol, em i tok: “Krais i bin givim bel bilong en long mipela, na dispela i save kirapim mipela . . . Yumi no ken tingting moa long yumi yet na wokabaut. Nogat. Yumi ken tingting long dispela man i kisim ples bilong yumi na i dai pinis.” (2 Korin 5:14, 15) Yumi kamapim olsem yumi laikim tru Jisas na pilim tru pasin laikim bilong em taim yumi givim bel long wok bilong autim gutnius. (1 Jon 2:3-5) Yumi no laik tru long mekim olsem wok autim tok em i samting nating, dispela bai i soim olsem yumi tingim ofa bilong Jisas olsem samting nating.—Hibru 10:29.
Sakim Ol Samting Bilong Pulim Tingting
11, 12. Jisas i bin kam long graun bilong mekim wanem? Olsem wanem em i kamapim klia em i tingim dispela wok olsem nambawan bikpela samting?
11 Taim Jisas i sanap long ai bilong Pontius Pailat, em i tok: “Mama i karim mi na mi kam long dispela graun bilong mekim wanpela wok tasol, em bilong autim tok i tru, bai olgeta manmeri i ken harim.” (Jon 18:37) Jisas i no bin larim wanpela samting i pulim tingting bilong em na bai em i lusim wok bilong autim tok i tru. Em laik bilong God long em i mas autim tok i tru.
12 Satan i bin traim Jisas long dispela samting. Bihain liklik long Jisas i baptais, Satan i tok long mekim em i kamap bikman long graun, em i laik givim em “olgeta strongpela kantri bilong dispela graun wantaim ol gutpela samting bilong ol.” (Matyu 4:8, 9) Bihain, ol Juda i laik mekim em i kamap king. (Jon 6:15) Ating sampela i tingting long ol gutpela samting inap kamap sapos Jisas i bin kisim ol dispela samting, ol inap ting sapos Jisas em i wanpela king long graun, em inap mekim planti gutpela samting bilong helpim ol man. Tasol Jisas i bin sakim ol dispela kain tingting. Em i putim tingting bilong em i go long wok bilong autim tok i tru.
13, 14. (a) Wanem samting i no bin pulim Jisas na kirapim em long lusim wok bilong em? (b) Maski Jisas i stap rabis long samting bilong skin, em i bin mekim wanem?
13 Na wok bilong kisim planti mani i no bin pulim Jisas. Olsem na em i no bin stap olsem maniman. Em i no bin i gat haus bilong em yet. Wanpela taim em i tok: “Ol weldok i gat hul long graun, na ol pisin i gat haus bilong ol. Tasol Pikinini Bilong Man em i no gat ples bilong slip.” (Matyu 8:20) Taim em i dai, Baibel i tok em i holim wanpela gutpela samting tasol, em wanpela klos ol Rom i bin pilai satu bilong kisim. (Jon 19:23, 24) Yu ting haptaim bilong Jisas long i stap long graun i lus nating? Nogat tru!
14 Wok Jisas i bin mekim i winim tru wok wanpela maniman inap mekim bilong helpim ol man. Pol i tok: “Yupela i save pinis long marimari bilong Bikpela bilong yumi Jisas Krais. Em i gat planti samting, tasol em i kamap olsem rabisman tru, bai em i ken helpim yupela. Em i bin kamap rabisman bai em i ken helpim yupela long kisim planti samting.” (2 Korin 8:9; Filipai 2:5-8) Maski Jisas i stap rabis long ol samting bilong skin, em i bin opim rot na bai ol man i gat pasin daun inap kisim laip oltaim na stap gutpela olgeta. Yumi tenkyu tru long dispela samting! Na yumi amamas tru long gutpela pe em i kisim long rot bilong putim tingting bilong em i go bilong mekim laik bilong God tasol!—Song 40:8; Aposel 2:32, 33, 36.
15. Wanem samting i winim tru planti mani?
15 Ol Kristen long nau husat i wok strong long bihainim pasin bilong Jisas, ol tu i no larim pasin bilong kamap maniman i pulim ol. (1 Timoti 6:9, 10) Ol i save olsem bikpela mani inap mekim sindaun bilong man i gutpela, tasol bai dispela samting i no helpim ol liklik long kisim laip i stap gut oltaim oltaim. Taim wanpela Kristen i dai, mani bilong em i no inap helpim em moa wankain olsem laplap bilong Jisas i no helpim em bihain long em i dai pinis. (Saveman 2:10, 11, 17-19; 7:12) Taim wanpela Kristen i dai, wanpela gutpela samting tasol em i holim yet em pasin bilong em long i stap pren bilong Jehova na Jisas Krais.—Matyu 6:19-21; Luk 16:9.
Ol Birua i No Pasim Em
16. Jisas i mekim wanem taim ol man i birua long em?
16 Pasin birua i no mekim na Jisas i lusim wok bilong em long autim tok i tru. Maski em i save olsem em i mas dai long taim wok bilong em long graun i pinis, dispela i no daunim em. Pol i tok long Jisas olsem: “Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai . . . Tasol Jisas i no wari long sem em bai i kisim, na em i dai. Na nau em i sindaun long han sut bilong sia king bilong God.” (Hibru 12:2) Tingim, Jisas i “no wari long sem em bai i kisim.” Em i no wari long ol birua bilong em bai ting olsem wanem long em. Em i putim tingting bilong em i go long mekim wok bilong God.
17. Pasin bilong Jisas long sanap strong na karim hevi i lainim yumi long wanem samting?
17 Pol i tingim pasin bilong Jisas long sanap strong na karim hevi na em i strongim ol Kristen: “Yupela tingim gut. Ol man bilong sin bipo ol i birua nogut long Jisas. Tasol em i sanap strong moa. Yupela tingim dispela, olsem na yupela i no ken les long sanap strong, na bel bilong yupela i no ken guria.” (Hibru 12:3) Tru, yumi inap les long ol man i birua long yumi long olgeta de. Yumi inap les long yumi mas wok oltaim long sakim ol samting bilong graun i save pulim man, na ating dispela i bagarapim bel bilong ol wanlain bilong yumi husat i laik bai yumi mekim samting bilong kisim biknem. Tasol olsem Jisas, yumi lukluk long Jehova bilong helpim yumi na yumi strong long mekim Kingdom i stap nambawan bikpela samting long laip bilong yumi.—Matyu 6:33; Rom 15:13; 1 Korin 2:4.
18. Tok Jisas i mekim long Pita i lainim yumi long wanem samting?
18 Jisas i no larim ol samting i pulim em, dispela i kamap klia taim em i kirap tokim ol disaipel bilong em olsem klostu bai em i dai. Pita i bin tokim Jisas olsem: ‘Bikpela, dispela samting i no inap kamap long yu.’ Jisas i no laik harim wanpela samting em inap long daunim strong bilong em long mekim laik bilong Jehova. Em i givim baksait long Pita na tok: “Satan, yu go baksait long mi. Yu laik pasim rot bilong mi. Yu no bihainim tingting bilong God. Nogat. Yu bihainim tingting bilong ol man tasol.” (Matyu 16:21-23) Olsem Jisas, oltaim yumi mas strong long sakim tingting bilong ol man. Na strong moa yet long larim tingting bilong God i stiaim wokabaut bilong yumi.
Gutpela Helpim Tru
19. Jisas i bin wokim planti mirakel, tasol wanem nambawan bikpela wok bilong em?
19 Jisas i bin wokim planti mirakel bilong soim olsem em i Mesaia. Em i bin kirapim bek ol man i dai pinis tu. Ol dispela samting i bin kirapim ol man long kam long em, tasol Jisas i no kam long graun bilong mekim ol dispela kain wok tasol. Em i kam bilong autim tok i tru. Em i save ol samting bilong skin em i mekim bilong helpim man i bilong sotpela taim tasol. Ol man i kirap bek, ol tu bai i dai gen. Long rot bilong autim tok i tru tasol bai Jisas inap helpim sampela long kisim laip oltaim.—Luk 18:28-30.
20, 21. Ol Kristen i save mekim sampela ol wok bilong helpim ol man, tasol ol i no lusim tingting long wanem samting?
20 Long nau sampela i traim long mekim ol gutpela wok olsem Jisas i bin mekim, olsem na ol i wokim ol haus sik o mekim sampela arapela wok bilong helpim ol rabisman. Sampela taim ol i mekim maski ol i mas lusim planti samting bilong ol yet, dispela pasin bilong ol long givim bel long wok em i gutpela samting; tasol helpim bilong ol i bilong sotpela taim tasol. Kingdom tasol bai pinisim ol hevi inap oltaim oltaim. Olsem na ol Witnes Bilong Jehova i bihainim Jisas na putim bikpela tingting bilong ol i go long wok bilong autim tok i tru bilong Kingdom.
21 Tasol ol Kristen i save mekim tu sampela ol wok bilong helpim man. Pol i tok: “Wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.” (Galesia 6:10) Long taim bilong bikpela hevi o long taim man i sot long samting, yumi redi long “mekim gutpela pasin” long ol lain i stap klostu long yumi na long ol brata Kristen. Tasol bikpela tingting bilong yumi i stap yet long nambawan bikpela samting—autim tok i tru.
Lain Long Gutpela Piksa Bilong Jisas
22. I gat wanem as na ol Kristen i autim tok long ol man?
22 Pol i tok: “Sapos mi no autim gutnius, bai mi stap nogut tru.” (1 Korin 9:16) Pol i save wok autim tok i opim rot long em yet na ol man i harim tok bilong em long kisim laip oltaim, olsem na em i strong long mekim. (1 Timoti 4:16) Yumi gat wankain tingting long wok bilong yumi yet long autim tok. Yumi laik helpim ol man. Yumi laik kamapim olsem yumi laikim tru Jehova. Yumi laik kamapim klia yumi laikim tru Jisas na yumi tingim tru pasin bilong em long laikim tru yumi. Olsem na yumi autim gutnius na yumi ‘no bihainim moa ol laik bilong olpela bel. Nogat. Yumi bihainim laik bilong God tasol.’—1 Pita 4:1, 2.
23, 24. (a) Mirakel bilong kisim planti pis i givim wanem save long yumi? (b) Husat long nau i wok long autim gutnius?
23 Olsem Jisas, yumi no lusim wok taim ol man i tok bilas long yumi o kros na sakim tok bilong yumi. Mirakel Jisas i wokim taim em i singautim Pita na Andru long bihainim em i lainim yumi. Yumi luksave olsem sapos yumi bihainim tok bilong Jisas na putim umben bilong yumi long hap we i luk olsem i no gat gutpela samting bai kamap, wok bilong yumi long painim pis inap kamapim gutpela samting. Planti Kristen i bin lukim wok bilong ol long painim pis i kamap gutpela tru, maski inap planti yia pinis ol i mekim wok long hap we i luk olsem i no gat pis. Rot i op long sampela long go sindaun long hap we ol inap kisim planti pis moa na ol i bin lukim ol gutpela samting i kamap. Maski yumi mekim wanem, bai yumi no lusim wok bilong kisim pis. Yumi save i no gat wanpela hap bilong graun we Jisas i tok i no gat wok moa long autim tok long en.—Matyu 24:14.
24 Winim siks milion Witnes Bilong Jehova ol i givim bel long autim tok long 230 kantri samting. Wastaua bilong Februeri 1, 2005, bai i gat ripot bilong wok autim tok long olgeta hap ol i bin mekim long sevis yia bilong 2004. Dispela ripot i soim olsem Jehova i blesim tru wok autim tok. Klostu nau pasin bilong dispela graun bai pinis, long haptaim i stap yet, yumi bihainim yet tok bilong Pol: “Strong long autim tok.” (2 Timoti 4:2) Yumi mas wok strong yet long autim gutnius i go inap long Jehova i tok wok i pinis.
Kirap long dispela yia, Ripot Bilong Sevis Yia Bilong Ol Witnes Bilong Jehova bai i no stap long Wastaua bilong Janueri 1. Em bai i stap long Wastaua bilong Februeri 1.
Yu Inap Bekim?
• Olsem wanem ol samting Jisas i lainim ol disaipel long en i helpim yumi?
• Jisas i gat wanem tingting long ol man em i autim tok long ol?
• Wanem samting i kirapim yumi long autim tok?
• Long wanem ol rot yumi inap bihainim Jisas na sakim ol samting i laik pulim yumi long lusim wok God i laik bai yumi mekim?
[Piksa long pes 15]
Wok autim tok bilong yumi bai i karim kaikai sapos yumi tingim tru ol man olsem Jisas i bin mekim
[Piksa long pes 16, 17]
Wanpela as tru na Jisas i kam long graun em bilong autim tok i tru
[Ol Piksa long pes 17]
Ol Witnes Bilong Jehova i putim bikpela tingting bilong ol i go long wok bilong autim gutnius