Ol Juda

Stori: Dispela tok “ol Juda” long nau i makim ol manmeri i kamap long lain Hibru, na ol manmeri i kirap bihainim lotu Juda. Na Baibel i tok, sampela Kristen i Juda bilong spirit, olsem “lain Israel tru bilong God.”

Yu ting ol Juda bilong skin long nau ol i lain bilong God?

Planti Juda i ting olsem. Wanpela buk i tok: “LAIN GOD I MAKIM BILONG EM YET, dispela tok i makim ol manmeri bilong Israel, em i kamapim tingting olsem God bilong heven na graun i bin kisim ol i stap lain manmeri bilong em stret. Dispela tingting em i bikpela tingting bilong ol Juda long bipo yet na i kam inap long nau.”​—⁠Encyclopaedia Judaica, Vol. 5, blok 498; lukim Lo 7:​6-8; Kisim Bek 19:⁠5.

Planti long ol misin i gat wankain tingting. Wanpela nius i stori long “Lotu” na i tok: “Inap planti handet yia ol misin i bin lainim ol man olsem God i bin ‘rausim lain bilong em Israel’ na kisim ‘nupela Israel.’ Tasol [Paul M. Van Buren, em wanpela tisa bilong lotu long Yunivesiti Tempel, long Filadelfia] em i tok, nau ol misin i tokaut olsem ‘kontrak i stap namel long God na ol Juda em bilong oltaim. Ol Talatala na Katolik . . . i senisim tru tingting.’ ” (Journal and Constitution bilong Atlanta, Janueri 22, 1983, p. 5-B) Narapela nius i tok: “Timothy Smith, em profesa bilong lotu long Yunivesiti Jon Hopkins, em i tok, ‘Sampela lain bilong autim gutnius ol i gat bikpela tingting long Israel; ol i ting yumi mas sambai long Israel long olgeta wok ol i mekim, long wanem, God i helpim ol.’ ” (The New York Times, Februeri 6, 1983, p. 42) Sampela long ol misin i ting bihain olgeta Israel bilong skin bai tanim bel na bai God i kisim bek ol. Sampela i ting, oltaim ol Israel i stap lain bilong God, olsem na ol narapela lain tasol i gat wok long kamap wanbel wantaim God long rot bilong Krais.

Tingim dispela: Taim ol Israel i lusim Babilon na i go bek long ples, ol i gat wok long kirapim gen lotu i tru long dispela graun God i bin givim long ol. Pastaim ol i wokim gen haus lotu bilong Jehova long Jerusalem. Tasol long yia 70, ol Rom i bagarapim Jerusalem na bihain ol Israel i no bin wokim gen haus lotu bilong Jehova. Nau wanpela haus lotu bilong ol Muslim i stap long ples bilong en. Ol Juda i tok ol i aninit long Lo Bilong Moses, sapos nau ol i stap long Jerusalem olsem lain God i makim bilong em stret, ol i mas wokim gen haus bilong lotuim em, a?

Mt 21:​42, 43: “Jisas i askim ol [bikpris na hetman bilong ol Juda long Jerusalem] olsem, ‘Ating yupela i no bin ritim dispela hap tok . . . olsem, “Dispela ston ol kamda i ting em i nogut na ol i rausim, nau em i kamap nambawan ston bilong strongim banis bilong haus. Bikpela yet i mekim dispela samting i kamap . . . ” Olsem na mi tokim yupela, God bai i rausim kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.’ ”

Mt 23:​37, 38: “Jerusalem, Jerusalem, yu save kilim ol profet i dai, na yu save kisim ol man God i salim i kam long yu na tromoi ston long ol bilong kilim ol i dai. Planti taim moa mi laik bungim ol pikinini bilong yu . . . Tasol yupela i no laik. Harim. Nau ples bilong yupela bai i bagarap na i stap nating.”

Kontrak God i mekim wantaim Abraham, ating dispela i makim olsem ol Juda bai stap lain bilong God oltaim?

Ga 3:​27-29: “Long lain bilong Krais, i no gat ol Juda na ol Grik. I no gat ol wokboi nating na ol man i stap fri. I no gat ol man na ol meri. Nau long Krais Jisas yupela olgeta i stap wanpela tru. Na sapos yupela i stap lain bilong Krais, orait yupela i stap pikinini bilong Abraham tu. Em yupela tasol ol lain bilong kisim ol dispela samting bipo God i bin promis long givim long ol lain bilong Abraham.” (Olsem na long ai bilong God i no ol man i kamap long blut bilong Abraham i lain tru bilong Abraham.)

Yu ting bai olgeta Juda i tanim bel na bilip long Krais na kisim laip oltaim?

Ro 11:​25, 26: “Ol brata, mi laik bai yupela i mas save . . . bel na tingting bilong hap lain bilong ol Israel i pas pinis, na ol bai i stap olsem i go inap long dispela taim ol manmeri bilong ol arapela lain ol inapim dispela namba God i bin makim pinis long hamas bilong ol bai i stap insait long lain manmeri bilong en. Na long dispela rot God bai i kisim bek olgeta Israel.” (Em nau, Baibel i tok, ol manmeri bilong ol arapela lain bai inapim dispela namba, na long dispela rot bai God i “kisim bek olgeta Israel”; i no olsem olgeta Juda bai tanim bel. Nogat.)

Bilong kisim stretpela save long tok bilong Rom 11:​25, 26, yumi mas tingim sampela tok i kamap paslain, olsem: “Sapos man i stap Juda long nem tasol, em i no Juda tru. Na pasin bilong katim skin, em i no samting bilong bodi tasol. Nogat. Man i stap Juda long bel na tingting bilong en, em i Juda tru. Na pasin tru bilong katim skin, em tu i mas kamap insait long bel na tingting bilong man. Em i no save kamap long pasin bilong bihainim ol tok ol i bin raitim long lo. Nogat. Em i samting Spirit bilong God i save kamapim.” (Ro 2:​28, 29) “Planti bilong ol man i bin kamap long lain bilong Israel, ol i no lain tru bilong Israel.”​—⁠Ro 9:⁠6.

Ol Juda i mas bilip long Krais Jisas bambai God i ken kisim bek ol o olsem wanem?

Aisaia 53:​1-12 i tok profet olsem Krais i mas ‘karim sin bilong planti manmeri na beten bilong helpim ol.’ Na Daniel 9:​24-27 i tok, taim dispela Bikman i kam na em i dai, ‘God bai lusim sin bilong ol manmeri.’ Olsem na ol Juda i mas i gat man bilong helpim ol na tekewe sin bilong ol. Sapos ol i sakim dispela man God i salim bilong kisim bek ol, yu ting God i ken orait long ol?

Ap 4:​11, 12: “[Spirit holi i kirapim Pita long tokim ol bikman na hetman bilong ol Juda long Jerusalem, olsem:] Jisas em i ‘dispela ston yupela ol kamda i bin ting em i nogut na yupela i bin rausim. Tasol nau em i kamap nambawan ston bilong strongim banis bilong haus.’ . . . Em wanpela tasol God i bin makim bilong kisim bek yumi.” (Tru, long nau ol Israel bilong skin i no i stap lain bilong God moa, tasol ol wan wan Juda, wankain olsem ol manmeri bilong ol narapela lain, ol inap kisim laip long rot bilong Jisas, em dispela man God i makim bilong kisim bek ol.)

Yu ting ol samting i kamap long kantri Israel long nau i truim tok profet bilong Baibel?

Ese 37:​21, 22: “Mi God, Bikpela, mi tok bai mi kisim olgeta Israel long olgeta kantri ol i stap long en na bungim ol na bringim ol i go bek long graun bilong ol yet. Orait na bai mi mekim ol i kamap wanpela kantri tasol . . . Na bai ol i gat wanpela king tasol i bosim ol.” (Kantri Israel long nau i no stap aninit long wanpela king long lain bilong Devit; ol i no gat king; ol i gat gavman ol yet i vot long en.)

Ais 2:​2-4: “Wanpela taim bai i kamap bihain na . . . olgeta lain manmeri bai i . . . tok olsem, ‘Kam, yumi go long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.’ . . . Na bai ol i paitim ol bainat bilong ol i kamap olsem ol ain bilong brukim graun . . . Na olgeta lain manmeri bai i no ken pait moa, na bai ol i no skul moa long pait.” (Nau long Jerusalem, long ples bipo tempel i stap long en, i no gat wanpela “haus bilong God bilong Israel,” i gat wanpela haus lotu bilong ol Muslim i stap. Na long nau ol Israel na ol lain klostu, ol i no wok long “paitim ol bainat bilong ol i kamap olsem ol ain bilong brukim graun.” Oltaim ol ami bilong ol i redi long pait bambai ol i no ken bagarap.)

Ais 35:​1, 2: “Ples wesan nating wantaim ples drai bai ol i amamas tru, long wanem, ol naispela plaua bai i kamap na . . . ples bai i luk nais moa yet olsem bikbus bilong Lebanon na olsem ples daun bilong Saron. Na ol manmeri bai i lukim strong na biknem . . . bilong God, Bikpela bilong yumi.” (Kantri Israel i bin mekim bikpela wok long planim ol diwai na wokim ol baret wara na ples i kamap gutpela. Tasol ol hetman bilong Israel i no givim biknem long God long dispela. Premia bilong Israel long bipo [David Ben-Gurion] i tok: “Israel i tingting strong . . . long mekim ples drai i kamap gutpela ples​—⁠long strong bilong saiens na long strong bilong ol yet, dispela kantri bai kamap wanpela strongpela kantri i gat gavman ol man yet i bin vot long en.”)

Sek 8:23: “Long dispela taim 10-pela man bilong ol longwe ples bai i kam holim wanpela Juda man na bai ol i tok olsem, ‘Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.’ ” (Profet i tok long wanem God? Long tok Hibru nem bilong God [יהוה, em planti man i tanim olsem Jehova] em i kamap planti taim long Buk Sekaraia, winim 130. Tasol long nau, sapos wanpela man i kolim dispela nem, yu ting ol man bai ting em i wanpela Juda? Nogat, a? Long wanem, inap planti handet yia ol Juda i bin bihainim wanpela bilip kranki bilong ol na ol i no save kolim nem bilong God. Long nau planti man bilong lotu i gat bikpela tingting long ol Israel bilong skin, tasol dispela i no truim dispela tok profet.)

Orait, yumi mas ting olsem wanem long ol samting i kamap long Israel long nau? Em hap tasol bilong ol samting Baibel i tok bai kamap long olgeta hap bilong graun long dispela taim, olsem ol bikpela pait, na pasin bilong sakim lo, na ol man i no givim bel moa long God, na ol i laikim tumas mani.​—⁠Mt 24:​7, 12; 2 Ti 3:​1-5.

Ol tok profet olsem Israel bai kamap strong gen, truim bilong en i painim wanem lain long nau?

Ga 6:​15, 16: “Nau pasin bilong katim skin em i samting nating, na pasin bilong man i no katim skin, em tu i samting nating. God i mekim yumi i kamap ol nupela manmeri, na dispela tasol em i samting tru. . . . Ol dispela manmeri ol i lain Israel tru bilong God.” (Long nau, i no ol man i bihainim lo God i givim long Abraham na ol i katim skin em ol i kamap “lain Israel tru bilong God.” Nogat. Olsem Galesia 3:​26-29 i tok, ol manmeri i stap lain bilong Krais na ol i kamap pikinini bilong God long rot bilong spirit holi, ol i “pikinini bilong Abraham.”)

Jer 31:​31-34: “Harim. Mi makim pinis wanpela taim na bai mi mekim nupela kontrak wantaim ol lain bilong Israel na ol lain bilong Juda. . . . Long dispela taim ol man bai i no ken skulim ol wantok na brata bilong ol na tok olsem, ‘Yupela i mas save long Bikpela.’ Nogat. Olgeta bai i save pinis long mi, maski ol i man nating o ol i gat biknem. Long wanem, bai mi lusim sin bilong ol na mi no ken tingim moa.” (God i no mekim dispela nupela kontrak wantaim ol Israel bilong skin. Nogat. Em i mekim wantaim ol manmeri i pas wantaim Krais Jisas na Em i bin singautim ol bilong kisim laip long heven. Taim Jisas i kirapim bung bilong tingim i dai bilong em, em i givim kap wain long ol na em i tok: “Dispela kap wain em i nupela kontrak mi mekim long blut bilong mi yet.” [1 Ko 11:25])

KTH 7:4: “Na mi harim ol i kolim namba bilong ol manmeri i kisim mak. Ol i putim mak long 144,000 manmeri namel long olgeta lain bilong Israel.” (Tasol ol ves bihain long dispela i kolim “lain Livai” na “lain Josep,” na long ol lista bilong ol 12-pela lain bilong Israel bilong skin, i no gat dispela tupela lain. Na dispela hap i tok ol bai putim mak long ol manmeri bilong “olgeta lain bilong Israel,” tasol em i no kolim lain bilong Dan na Efraim. [Skelim wantaim Namba 1:​4-16.] Olsem na ol dispela ves i tok long Israel bilong spirit, olsem lain Israel tru bilong God, em Kamapim Tok Hait 14:​1-3 i tok ol bai mekim wok king wantaim Krais long Kingdom bilong heven.)

Hi 12:22: “Yupela i kamap pinis long maunten Saion, na long biktaun bilong God . . . em taun Jerusalem i stap long heven.” (Olsem na ol Kristen tru i wetim ‘Jerusalem long heven’ i truim ol tok promis bilong God; i no Jerusalem long graun.)