“Bai Mi Seksekim Olgeta Kantri”

1-2. Profet Hagai i tok wanem samting i olsem guria bai kamap long taim bilong yumi?

“INSAIT long sampela minit, ol stua na ol bilding i pundaun nabaut nabaut.” “Planti manmeri i pret nogut tru . . . Planti man i tok, dispela guria i bin stap inap tupela minit, tasol mi pilim olsem em i stap longpela taim tru.” Dispela em tok sampela i bin mekim long dispela bikpela graun guria i bin kamap long Nepal long 2015. Ating sapos yu yet i bin stap long kain taim olsem, yu no inap lusim tingting hariap long kain samting.

² Long nau, yumi wok long pilim wanpela kain guria olsem, na dispela guria i no seksekim wanpela taun o kantri tasol, nogat. Em i seksekim olgeta kantri, na em i bin stap inap planti yia pinis. Profet Hagai i bin tok profet long dispela guria. Em i tok: “Jehova, bosman bilong bikpela lain ami i tok olsem, ‘Klostu nau, na wanpela taim moa bai mi mekim skai na graun na solwara na ples drai i guria.’”​—Hag. 2:6.

 3. Olsem wanem guria em Hagai i tok long en i no wankain olsem ol narapela graun guria?

³ Guria em Hagai i tok long en, em i no wankain olsem ol narapela guria i save kamapim bikpela bagarap. Dispela guria i kamapim ol gutpela samting. Jehova yet i tok: “Bai mi seksekim olgeta kantri na ol samting i dia tumas bilong ol kantri bai i kam insait long dispela haus; na bai mi pulapim em long glori.” (Hag. 2:7) Wanem mining bilong dispela tok profet long ol man i stap long taim bilong Hagai? Na wanem mining bilong dispela tok profet long nau? Yumi bai stori long bekim bilong ol dispela askim, na tu, yumi bai kisim save long olsem wanem yumi tu i insait long dispela wok bilong seksekim ol kantri.

 4. Wai na Jehova i salim profet Hagai i go long ol manmeri bilong Em?

⁴ Jehova i givim wanpela bikpela wok long profet Hagai. Skelim ol samting i kamap paslain long dispela. Hagai em wanpela bilong ol manmeri husat i bin lusim kalabus long Babilon long 537 B.C.E. na kam bek long Jerusalem. Bihain tasol long ol i kam kamap pinis, ol dispela gutpela wokman bilong Jehova i wokim faundesen bilong haus bilong Jehova, o tempel. (Esr. 3:8, 10) Tasol sotpela taim bihain, hevi i kamap. Pasin birua i mekim na ol i bel hevi na ol i stopim wok bilong ol. (Esr. 4:4; Hag. 1:1, 2) Olsem na long 520 B.C.E., Jehova i salim Hagai i kam bilong helpim ol na strongim ol long pinisim dispela wok ol i bin kirapim bilong wokim tempel.b​—Esr. 6:14, 15.

 5. Olsem wanem tok bilong Hagai i strongim bel bilong ol manmeri bilong God?

⁵ As na Jehova i salim Hagai i go em bilong helpim ol manmeri long bilip long Jehova. Hagai i mekim dispela tok long ol Juda husat i bel hevi olsem: “Jehova i tok, ‘Yupela ol manmeri, yupela i mas strongim bel na mekim wok.’ ‘Long wanem, mi stap wantaim yupela.’ Jehova, bosman bilong bikpela lain ami i mekim dispela tok.” (Hag. 2:4) Dispela tok “Jehova, bosman bilong bikpela lain ami” i strongim tru bel bilong ol. Jehova i gat bikpela lain ami em ol ensel i stap aninit long em, olsem na lain Juda i mas bilip long Jehova na wetim em i helpim ol long mekim gut dispela wok.

 6. Wanem samting bai kamap long dispela wok bilong seksekim ol kantri em Hagai i tok profet long en?

⁶ Jehova i kirapim Hagai long mekim tok profet long wok bilong seksekim ol kantri. Dispela tok i strongim bel bilong ol manmeri husat i wokim tempel olsem Jehova bai seksekim Persia, em kantri i gat bikpela strong long dispela taim na i bin bosim planti narapela kantri. Na wanem samting bai kamap long dispela wok bilong seksekim ol kantri? Nambawan samting, lain bilong God bai pinisim wok bilong wokim tempel. Na narapela samting, ol manmeri em ol i no bilong lain Juda ol bai joinim lain Juda long lotuim Jehova long dispela tempel ol i wokim. Dispela em tok bilong strongim tru bel bilong ol manmeri bilong God long dispela taim, a?​—Sek. 8:9.

 7. Yumi insait long wanem wok bilong seksekim graun long nau? Stori long dispela.

⁷ Wanem mining bilong tok profet bilong Hagai long nau? Wanpela taim moa Jehova i seksekim olgeta kantri, tasol long nau yumi tu i insait long en. Tingim dispela samting: Long 1914, Jehova i putim Jisas Krais i stap King bilong Kingdom bilong Em long heven. (Sng. 2:6) Taim Jehova i bin kamapim dispela Kingdom bilong em, dispela em i nius nogut long ol lida bilong dispela graun. Em i makim olsem “haptaim bilong ol manmeri bilong ol arapela lain i pinis”—em dispela haptaim we i no gat man em Jehova i makim i bin bosim ol manmeri. (Luk 21:24) Em as na kirap long 1919 na i kam, lain bilong Jehova i bin tokim ol manmeri olsem Kingdom Bilong God tasol em i rot bilong stretim hevi bilong ol manmeri. Long nau, wok bilong autim “dispela gutnius bilong Kingdom” i seksekim ol manmeri long graun olgeta.​—Mat. 24:14.

 8. Olsem Buk Song 2:1-3 i kamapim, planti manmeri long ol kantri i mekim wanem long tok yumi autim?

⁸ Ol manmeri i mekim wanem samting long tok yumi autim? Planti manmeri i no laik putim yau long tok yumi autim. (Ritim Buk Song 2:1-3.) Ol kantri i belhat tru. Ol i no laik sapotim dispela King em Jehova i makim. Ol i no tingim tok bilong Kingdom yumi autim olsem “gutnius.” Sampela kantri i putim tambu long wok bilong yumi long autim tok! Maski planti bikman bilong ol dispela kantri i tok olsem ol i lotuim God, ol yet i no laik lusim strong na namba ol i holim. Wankain olsem ol bikman long taim bilong Jisas i bin mekim, ol bikman long nau i sakim dispela Man em Jehova i makim long rot bilong mekim nogut long ol disaipel bilong em.​—Apo. 4:25-28.

 9. Jehova i mekim wanem long ol kantri we ol i no laik putim yau long tok bilong em?

⁹ Jehova i mekim wanem long ol kantri we ol i no laik putim yau long tok bilong em? Buk Song 2:10-12 i bekim dispela askim olsem: “Olsem na yupela ol king yupela i mas wokim gut tingting; Na kisim tok bilong stretim yupela, em yupela ol jas bilong graun. Yupela i mas pret long Jehova na lotu long em, na yupela i mas guria long em na amamas wantaim. Yupela i mas givim ona long pikinini man. Nogut God i kros long yupela na yupela bai pinis olgeta, long wanem belhat bilong Em bai kamap wantu tasol. Ol man i save go long Em, bai em i ken i stap ples hait bilong ol, ol i ken amamas.” Jehova i larim haptaim i stap yet na bai ol man husat i sakim tok bilong em, ol i ken wokim disisen long lotuim em. Ol i ken senisim tingting bilong ol na orait long Kingdom Bilong Jehova. Tasol taim i wok long sot. Yumi stap long “taim bilong las de” bilong dispela haptaim bilong yumi. (2 Tim. 3:1; Ais. 61:2) So em i bikpela samting tru long ol manmeri long nau long kisim save long tok i tru na mekim ol rait disisen.

10. Wanem gutpela samting i kamap long wok bilong seksekim ol kantri em Hagai 2:7-9 i stori long en?

¹⁰ Dispela tok piksa bilong seksekim ol kantri em Hagai i bin tok profet long en i kamapim gutpela samting long sampela manmeri. Hagai i tok long samting bai kamap long wok bilong seksekim ol kantri olsem, “ol samting i dia tumas [em ol man i gat gutpela bel] bilong ol kantri bai i kam” lotuim Jehova.c (Ritim Hagai 2:7-9.) Aisaia na Maika tu i bin mekim ol wankain tok profet olsem long ol samting bai kamap long “taim bilong las de.”​—Ais. 2:2-4; Mai. 4:1, 2.

11. Wanpela brata i mekim wanem taim em i harim gutnius bilong Kingdom?

¹¹ Skelim samting em gutnius bilong Kingdom i mekim long wanpela brata nem bilong em Ken—em i mekim wok long wol hetkota. Em i tingim yet festaim em i harim gutnius bilong Kingdom inap 40 yia i go pinis. Ken i tok: “Taim mi kisim save long tok i tru long Baibel, mi amamas tru long kisim save olsem yumi stap long taim bilong las de. Na mi luksave olsem mi mas lusim ol samting bilong dispela graun na sanap strong long sait bilong Jehova bambai Em i ken orait long mi na mi ken kisim laip oltaim. Mi beten na mekim olsem wantu tasol. Mi lusim ol pasin bilong dispela graun na mi stap long sait bilong Kingdom Bilong God we i no inap seksek.”

12. Olsem wanem Jehova i pulimapim tempel spirit bilong em wantaim glori long dispela taim bilong las de?

¹² I klia tru olsem Jehova i blesim lain bilong em. Long dispela taim bilong las de, yumi lukim planti manmeri tru i lotuim Jehova. Long 1914, sampela manmeri tasol i lotuim Jehova. Tasol long nau, winim 8 milion manmeri i wok long lotuim God na planti milion moa i save joinim yumi long mekim Memorial long olgeta yia. Long dispela rot, lotu bilong Jehova long nau o dispela tempel spirit bilong em i pulap long “ol samting i dia tumas bilong ol kantri.” Na tu, ol senis em ol dispela manmeri i mekim long bihainim nupela pasin, dispela i givim glori long nem bilong Jehova.​—Efe. 4:22-24.

13. Planti manmeri tru i lotuim Jehova long nau na dispela i truim wanem ol tok profet? (Lukim fran pes piksa.)

¹³ Planti manmeri tru i lotuim Jehova long nau, na dispela i truim ol narapela tok profet tu, kain olsem Aisaia sapta 60. Ves 22 bilong dispela sapta i tok: “Lain i liklik tru bai kamap planti tausen, na liklik lain i no gat nem bai kamap wanpela strongpela kantri. Mi Jehova, mi yet bai hariapim dispela samting i kamap long taim stret bilong en.” Planti manmeri tru i kirap long lotuim Jehova, na dispela i kamapim tu ol narapela gutpela samting. Ol dispela manmeri i “dia tumas,” ol i bringim ol save bilong ol long mekim wok i kam wantaim ol. Na tu, ol i redi long insait long wok bilong autim “gutnius bilong Kingdom.” Long dispela rot, olsem Aisaia i tok, lain bilong Jehova inap yusim “olgeta samting” bilong ol, em save bilong ol long mekim wok. (Ais. 60:5, 16) Ol dispela naispela man na meri i dia tumas long God, ol i helpim wok bilong autim tok long winim 240 kantri na ol i tanim ol buk na nius long winim 1,000 tokples.

14. Ol man i mas mekim wanem disisen long nau?

¹⁴ Long dispela taim bilong las de, wok bilong seksekim ol kantri i kirapim ol man long mekim disisen. Ol bai sapotim Kingdom Bilong God, o ol bai bilip long ol gavman bilong dispela graun. Dispela em wanpela disisen olgeta i mas mekim. Ol manmeri bilong Jehova i bihainim lo em gavman i putim long kantri ol i stap long en, tasol ol i no save insait long ol wok politik bilong dispela graun. (Rom 13:1-7) Ol i save olsem Kingdom Bilong God tasol em rot bilong stretim hevi bilong ol man. Na dispela Kingdom em i no bilong dispela graun.​—Jon 18:36, 37.

15. Olsem Buk Revelesen i kamapim, wanem samting bai traim pasin bilong ol wokman bilong God long stap gut long em?

¹⁵ Buk Revelesen i kamapim olsem, long taim bilong las de i gat ol samting bai kamap na i traim pasin bilong ol wokman bilong God long stap gut long em. Long dispela taim, planti man bai birua long yumi na mekim nogut long yumi. Na ol gavman bilong dispela graun bai strong long yumi mas lusim lotu bilong yumi na ol bai kalabusim yumi taim yumi no laik sapotim ol. (Rev. 13:12, 15) Ol bai “strong tru long olgeta man—em ol man nating na man i gat nem, na ol maniman na ol rabisman, na ol friman na ol wokboi—i mas kisim mak long rait han bilong ol o long poret bilong ol.” (Rev. 13:16) Ol wokboi nating long bipo i save gat mak bilong bosman bilong ol long han bilong ol o long poret bilong ol bilong soim olsem ol i bilong dispela bosman. Olsem tasol, ol gavman bilong nau bai ekspektim yumi long soim klia olsem yumi sapotim husat, na dispela bai stap olsem mak long han o poret bilong yumi. Ol i laik bai olgeta manmeri i soim klia long tingting na pasin bilong ol olsem ol i bilong ol gavman bilong dispela graun, na ol i sapotim ol dispela gavman.

16. Wai na em i bikpela samting long yumi mas strongim pasin bilong yumi long stap gut long God long nau?

¹⁶ Olsem wanem? Yumi bai kisim dispela mak na sapotim ol gavman bilong graun? Ol manmeri husat i sakim dispela mak ol bai kisim bikpela hevi tru na ol bai bungim taim nogut. Buk Revelesen i tok olsem: “Sapos man i no gat mak, . . . orait em i no inap baim o salim ol samting.” (Rev. 13:17) Tasol ol lain bilong God ol i save long samting God bai mekim long ol manmeri i kisim dispela mak olsem i stap long Revelesen 14:9, 10. So ol bai sakim dispela mak, na long han bilong ol, ol bai raitim dispela tok olsem, “Mi bilong Jehova.” (Ais. 44:5) Em as na nau em i taim bilong strongim pasin bilong yumi long stap gut long Jehova. Sapos yumi mekim olsem, Jehova bai amamas long kisim yumi olsem ol manmeri bilong em yet!

17. Yumi ken tingim wanem samting long pasin bilong Jehova long no ken les kwik?

¹⁷ Long dispela taim bilong las de, Jehova i gat pasin bilong i no les kwik. Em i no laik bai wanpela man i kisim bagarap. (2 Pita 3:9) Em i opim rot long olgeta manmeri long tanim bel na mekim rait disisen. Tasol pasin bilong em long i no les kwik i gat mak bilong en. Ol manmeri em ol i no laik mekim disisen long lotuim Jehova long dispela haptaim em i givim long ol, ol bai pilim wankain samting olsem Fero i bin pilim long taim bilong Moses. Jehova i tokim Fero olsem: “Sapos mi bin mekim save long yupela na givim bikpela sik long yu na ol manmeri bilong yu, yupela bai pinis olgeta long dispela graun. Tasol mi larim yu i stap bilong mi ken kamapim klia strong bilong mi long yu na bai ol manmeri i ken autim nem bilong mi long olgeta hap bilong graun.” (Kis. 9:15, 16) Ol manmeri long olgeta hap bilong graun bai save tru olsem Jehova em i God tru. (Ese. 38:23) Dispela samting bai kamap olsem wanem?

18. (a) Wanem narapela kain guria em Hagai 2:6, 20-22 i stori long en? (b) Hau yumi ken save olsem tok bilong Hagai bai i gat narapela truim long bihain?

¹⁸ Planti handret yia bihain long taim bilong Hagai, holi spirit i kirapim aposel Pol long raitim ol tok bilong soim olsem tok bilong Hagai 2:6, 20-22 bai i gat narapela truim long bihain. (Ritim.) Pol i tok: “Nau em i tok promis olsem: ‘Wanpela taim moa bai mi mekim graun i guria, na i no graun tasol, nogat. Bai mi mekim skai tu i guria.’ Dispela tok ‘wanpela taim moa’ i makim olsem God bai rausim ol samting i guria, em ol samting God i no bin wokim. Na bai ol samting i no guria i ken i stap yet.” (Hib. 12:26, 27) Dispela guria em i no wankain long guria em Hagai 2:7 i stori long en. Long dispela guria, Jehova bai bagarapim na pinisim olgeta lain i wankain olsem Fero em ol i sakim wok bos bilong Em.

19. Wanem samting i no inap guria na hau yumi save long dispela?

¹⁹ Wanem samting i no inap guria o pinis? Pol i tok: “Yumi bai kisim wanpela Kingdom i no inap guria, olsem na yumi mas kisim yet bikpela pasin helpim, na long dispela rot yumi inap mekim wok bilong God long pasin em i orait long en, na mekim wantaim pret na pasin bilong daun tru long em.” (Hib. 12:28) Tru tumas, taim dispela laspela guria i kamap na i pinis, Kingdom Bilong God tasol bai stap na em i no inap seksek. Em bai stap strong yet inap oltaim oltaim!​—Sng. 110:5, 6; Dan. 2:44.

20. (a) Ol manmeri i mas mekim wanem disisen? (b) Olsem wanem yumi ken helpim ol?

²⁰ Taim i sot pinis! Ol manmeri i mas makim: Ol bai wok yet long bihainim ol pasin bilong dispela graun we bai bringim ol i go long bagarap, o ol bai stretim ol samting long sindaun bilong ol na bihainim laik bilong God na kisim laip oltaim? (Hib. 12:25) Long rot bilong wok autim tok, yumi ken helpim ol manmeri na bai ol i ken mekim dispela bikpela disisen long laip bilong ol. Yumi ken helpim planti manmeri moa i gat gutpela bel long sapotim Kingdom Bilong God. Na i gutpela yumi tingim tok em Bikpela Jisas i bin mekim olsem: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.”​—Mat. 24:14.