“Bai Mi Stap Wantaim Yupela”

“Hagai i givim tok bilong Bikpela long ol manmeri olsem, . . . ‘Mi Bikpela, bai mi stap wantaim yupela.’ ”​—⁠HAGAI 1:⁠13.

 1. Olsem Jisas i tok, taim bilong husat i wankain olsem taim bilong yumi?

NAU yumi stap long wanpela bikpela taim tru. Truim bilong ol tok profet bilong Baibel i kamapim klia olsem kirap long 1914 na i kam, yumi bin stap long “de bilong Bikpela.” (KTH 1:10) Ating yu bin stadi long dispela tok profet na yu save pinis olsem Jisas i tok “taim bilong Noa” na “taim bilong Lot” i wankain olsem “taim Pikinini Bilong Man” i kam long bosim Kingdom. (Luk 17:​26, 28) Em nau, taim bilong Noa na taim bilong Lot i makim taim bilong yumi. Tasol i gat narapela tok profet i makim taim bilong yumi em yumi mas tingim gut.

 2. Jehova i givim wanem wok long Hagai na Sekaraia?

² Nau bai yumi skelim samting i bin kamap long taim bilong tupela profet Hibru, Hagai na Sekaraia. Tupela gutpela profet hia i autim wanem tok em i stret long lain bilong Jehova long taim bilong yumi? Hagai na Sekaraia ol i man bilong “givim tok bilong Bikpela” long ol Juda taim ol i lusim kalabus long Babilon na go bek long ples. Jehova i givim wok long tupela long tokim ol Israel olsem em bai helpim ol long wokim gen tempel. (Hagai 1:13; Sekaraia 4:​8, 9) Maski tupela buk em Hagai na Sekaraia i raitim ol i liklik buk, ol i insait long “olgeta tok i stap long buk bilong God . . . em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God.”​—⁠2 Timoti 3:⁠16.

Tingim Ol Tok Profet Bilong Ol

3, 4. Bilong wanem yumi mas tingim ol tok profet bilong Hagai na bilong Sekaraia?

³ Tru tumas, ol tok bilong Hagai na Sekaraia i bin helpim gut ol Juda i stap long taim bilong tupela, na ol tok profet bilong ol i gat truim bilong en long dispela taim bipo. Tasol olsem wanem yumi inap bilip tru olsem dispela tupela buk i bilong helpim yumi long nau? Hibru 12:​26-29 i helpim yumi long kisim bekim bilong dispela askim. Long dispela skripsa, aposel Pol i kamapim tok bilong Hagai 2:6 i toktok long God i ‘mekim ol samting i stap long skai na long graun i guria moa yet.’ Bihain dispela guria bai “bagarapim strong bilong ol king na bai ol i no gat strong moa.”​​—⁠Hagai 2:⁠22.

⁴ Taim Pol i kamapim tok bilong Hagai, em i tokaut long samting bai painim “ol king” bilong graun na em i kamapim klia olsem dispela Kingdom ol Kristen God i bin makim ol bai kisim, em i no inap guria, olsem bagarap. (Hibru 12:28) Em nau, yu ken save olsem ol tok profet bilong Hagai na Sekaraia i makim wanpela taim bihain long taim Pol i bin raitim Buk Hibru. Ol dispela Kristen God i bin makim na ol bai mekim wok king wantaim Jisas long Kingdom Bilong Mesaia, i gat liklik hap lain bilong ol i stap yet long graun. Olsem na ol tok profet bilong Hagai na Sekaraia i gat truim bilong en long nau.

5, 6. Wanem ol samting i bin kamap na Hagai na Sekaraia i mas autim tok profet?

⁵ Buk Esra i stori long ol samting i bin kamap paslain long taim Hagai na Sekaraia i raitim buk bilong ol. Taim ol Juda i lusim kalabus long Babilon na go bek long ples long yia 537 B.C.E., Gavena Serubabel na Hetpris Josua (o Jesua) i bosim wok bilong putim ol as ston bilong nupela tempel long 536 B.C.E. (Esra 3:​8-13; 5:⁠1) Dispela i kamapim bikpela amamas, tasol i no longtaim na bikpela pret i kisim ol Juda. Esra 4:4 i tok, ol birua, em “ol man i bin i stap longtaim long dispela graun,” oltaim “ol i traim long mekim ol Juda i pret na mekim bel bilong ol i kamap nogut [na] bai ol i lusim dispela wok.” Ol dispela birua, em planti ol i bilong Samaria, ol i sutim olkain tok giaman long ol Juda. Ol i kirapim king bilong Persia long putim tambu long wokim tempel.​​—⁠Esra 4:​10-21.

⁶ Pastaim bel bilong ol Juda i kirap tru long wokim tempel, tasol bihain ol i no givim bel moa long mekim. Ol i kirap mekim ol wok bilong ol yet. Tasol long 520 B.C.E., inap 16 yia bihain long taim ol i putim pinis ol as ston bilong tempel, Jehova i makim Hagai na Sekaraia long kirapim ol manmeri long kirap gen long wokim tempel. (Hagai 1:1; Sekaraia 1:⁠1) Dispela tupela man bilong autim tok bilong God ol i kirapim tru ol Juda na kamapim klia long ol olsem Jehova bai helpim ol. Olsem na ol Juda i kirap gen long wokim tempel na ol i pinisim dispela wok long 515 B.C.E.​​—⁠Esra 6:​14, 15.

 7. Samting i bin kamap long taim bilong profet Hagai na Sekaraia i makim wanem samting long taim bilong yumi?

⁷ Yu save olsem wanem ol dispela samting i bikpela samting long yumi? Yumi gat wok bilong autim “gutnius bilong kingdom.” (Matyu 24:14) Dispela wok i kamap strong moa bihain long Wol Woa 1. Olsem ol Juda bilong bipo i lusim kalabus long Babilon, lain bilong Jehova bilong nau i bin lusim kalabus long Bikpela Babilon, em olgeta lotu giaman. Ol lain God i bin makim ol i wok strong long autim tok, skulim ol man, na stiaim ol manmeri i go long lotu i tru. Dispela wok i stap yet na i kamap bikpela moa, na ating yu tu i insait long en. Nau em taim bilong mekim dispela wok, long wanem, pinis bilong dispela taim nogut bilong nau i klostu! Dispela wok God i givim long yumi i mas i go yet inap long taim Jehova i kirap na pasim wok bilong ol man nogut long taim bilong “bikpela hevi tru.” (Matyu 24:21) Dispela bai pinisim olgeta pasin nogut na larim lotu i tru i kamap strong long olgeta hap bilong graun.

 8. Olsem wanem na yumi ken bilip tru olsem God bai helpim wok bilong yumi?

⁸ Olsem ol tok profet bilong Hagai na Sekaraia i kamapim, yumi ken bilip tru olsem Jehova bai helpim yumi na mekim gut long yumi taim yumi givim bel long mekim dispela wok. Maski sampela i bin wok strong long daunim ol wokboi bilong God o putim tambu long dispela wok God i bin givim long ol, i no gat wanpela gavman em inap pasim wok bilong autim tok. Jehova i bin mekim gut tru long dispela wok bilong Kingdom na i wok long kamap bikpela moa long ol yia bihain long Wol Woa 1 i kam inap long taim bilong yumi. Tasol i gat planti wok yet bilong mekim.

 9. Wanem samting i bin kamap bipo na yumi mas tingim? Bilong wanem yumi mas tingim?

⁹ Save yumi kisim long Hagai na Sekaraia, olsem wanem dispela inap kirapim yumi moa yet long bihainim tok bilong God long autim tok na skulim ol man? Orait yumi ken tingim sampela samting dispela tupela buk bilong Baibel inap skulim yumi long en. Pastaim yumi ken skelim sampela samting long wok bilong sanapim tempel em ol Juda i kam bek pinis ol i mas mekim. Olsem yumi stori pinis, ol Juda i bin lusim Babilon na go bek long Jerusalem ol i no wok strong moa long wokim tempel. Taim ol i putim pinis ol as ston bilong tempel, ol i lusim dispela wok. Wanem tingting kranki i bin kamap namel long ol? Na dispela i ken lainim yumi long wanem samting?

Kisim Stretpela Tingting

10. Wanem tingting kranki i bin kamap namel long ol Juda? Dispela i kamapim wanem samting?

¹⁰ Ol Juda i kam bek pinis ol i tok: “Taim bilong wokim gen haus bilong God, em i no kamap yet.” (Hagai 1:⁠2) Taim ol i bin kirap long wokim tempel na ol i putim ol as ston bilong en long 536 B.C.E., ol i no tok ‘taim i no kamap yet.’ Tasol i no longtaim na ol i larim tok bilong ol birua i sindaun klostu, na tok bilong gavman long pasim dispela wok, i pretim ol na nau ol i les. Ol Juda i kirap long tingim ol haus bilong ol yet na gutpela sindaun bilong ol. Ol i gat ol gutpela haus bilong ol yet, tasol wok bilong tempel i no pinis yet, olsem na Jehova i askim ol: “Bilong wanem yupela i stap long ol gutpela gutpela haus, na haus bilong mi i bagarap i stap?”​​—⁠Hagai 1:⁠4.

11. Bilong wanem Jehova i mas givim tok long ol Juda i stap long taim bilong Hagai?

¹¹ Tru tumas, samting ol Juda i bin putim i stap nambawan long tingting bilong ol, nau em i senis. Nau lain bilong God i no tingim laik bilong Jehova long wokim tempel i nambawan bikpela samting. Ol i tingting tasol long ol yet na ol haus bilong ol. Ol i lusim wok bilong wokim haus bilong lotuim God. Tok bilong Jehova long Hagai 1:5 i kirapim ol Juda long ol “i mas tingting planti long ol samting nogut i kamap long [ol].” Jehova i tokim ol long tingim pasin bilong ol​—⁠olsem ol i no moa putim wok bilong wokim tempel i stap namba wan​—⁠dispela i mekim wanem long ol.

12, 13. Olsem wanem Hagai 1:6 i stret long ol Juda? Wanem insait bilong dispela ves?

¹² Pasin bilong ol Juda long putim ol samting bilong ol yet i stap nambawan, dispela i nogutim ol. Hagai 1:6 i kamapim tingting bilong God, olsem: “Yupela i bin planim planti kaikai, na liklik kaikai tasol i kamap. Yupela i gat sampela kaikai, tasol em i no inap long yupela. Yupela i gat wain bilong dring, tasol em i no inapim laik bilong yupela. Yupela i gat sampela klos, tasol ol i no inap hatim skin bilong yupela long taim bilong kol. Na ol man bilong wok mani i save kisim mani, tasol mani i save pinis kwiktaim olsem ol i putim long paus mani i gat hul.”

¹³ Ol Juda i stap long graun God i bin givim long ol, tasol graun i no kamapim planti kaikai olsem ol i laikim. Jehova i no mekim gut long ol, olsem em i bin tok lukaut long en. (Lo 28:​38-​48) Em i no helpim ol moa, olsem na maski ol Juda i planim kaikai, liklik kaikai tasol i kamap, kaikai i no inap long ol. Em i no mekim gut long ol, olsem na ol i no gat klos bilong putim long taim bilong kol. Na mani ol i kisim long wok bilong ol, i olsem ol i pulimapim long paus i gat ol hul i pulap long en na i no inap helpim ol wokman i bin kisim dispela pe. Na dispela tok, “yupela i gat wain bilong dring, tasol em i no inapim laik bilong yupela,” em tu i makim olsem God i no mekim gut long ol. Wain ol i wokim i liklik tasol, em i no planti inap long mekim ol i spak.

14, 15. Hagai 1:6 i givim wanem save long yumi?

¹⁴ Stori bilong ol Juda i gat ol gutpela haus, i no bilong skulim yumi long ol haus bilong yumi i mas luk olsem wanem, nogat. Paslain tru long ol Juda i go kalabus long Babilon, profet Amos i bin krosim ol maniman long Israel long “ol haus ol i bin bilasim long tit bilong elefan” na ol i “i save slip long ol naispela bet tru.” (Amos 3:​15; 6:⁠4) Ol dispela gutpela haus na ol naispela bet i no stap longpela taim. Ol birua i bin kam na kisim. Tasol planti yia bihain, taim ol i lusim kalabus bilong 70 yia, planti manmeri bilong God i no bin larim dispela i skulim ol. Olsem wanem? Bai yumi larim ol dispela samting i skulim yumi? I gutpela sapos yumi olgeta wan wan i askim: ‘Mi gat wanem tingting long haus bilong mi yet na ol bilas bilong en? Bilong mi ken kisim sampela namba moa long wok mani bilong mi, mi wok long kisim sampela skul moa we mi mas lusim planti yia na nau bai mi no inap mekim ol bikpela samting bilong lotu?’​​—⁠Luk 12:​20, 21; 1 Timoti 6:​17-​19.

¹⁵ Ol tok yumi ritim long Hagai 1:6 i mas givim save long yumi olsem i bikpela samting long God i mas mekim gut long yumi. God i no bin mekim gut long ol dispela Juda long bipo, olsem na ol samting ol i mekim i no kamap gutpela. Maski yumi gat planti samting bilong skin o liklik samting tasol, sapos yumi no kisim blesing bilong Jehova, yumi no inap pas gut wantaim em. (Matyu 25:​34-​40; 2 Korin 9:​8-​12) Olsem wanem yumi inap kisim dispela blesing?

Jehova i Helpim Yumi Long Rot Bilong Spirit Bilong Em

16-18. Sekaraia 4:6 i gat wanem mining bilong en long ol Juda i stap long taim bilong Hagai na Sekaraia?

¹⁶ Wanpela wanwok profet bilong Hagai, em Sekaraia, em i tokaut long rot Jehova i bin mekim wok long en bilong kirapim na mekim gut long ol man i givim bel long em long dispela taim bipo. Na dispela i helpim yumi long save long olsem wanem Jehova bai mekim gut long yumi tu. Baibel i tok: “Bikpela i tok olsem, ‘Yu no inap mekim wok long strong bilong ami o long strong bilong yu yet. Nogat. Strong bilong spirit bilong mi bai i stap wantaim yu, na long dispela strong tasol bai yu mekim wok.’ ” (Sekaraia 4:⁠6) Ating planti taim yu bin harim tok bilong dispela ves, tasol em i gat wanem mining bilong en long ol Juda i bin stap long taim bilong Hagai na Sekaraia, na i gat wanem mining long yu?

¹⁷ Orait tingim dispela samting: Ol tok em spirit bilong God i bin kirapim Hagai na Sekaraia long autim, dispela i bin kamapim wanpela gutpela samting tru. Ol tok bilong dispela tupela profet i bin givim nupela strong long ol Juda i stap gut long God. Hagai i bin kirap autim tok profet long namba 6 mun bilong 520 B.C.E. Sekaraia i bin kirap autim tok profet long namba 8 mun bilong dispela yia yet. (Sekaraia 1:⁠1) Olsem yumi lukim long Hagai 2:​18, wok bilong putim ol as ston bilong tempel i kirap gen long namba 9 mun. Olsem na tok bilong tupela profet i kirapim tru ol Juda long mekim wok, na ol i bihainim tok bilong Jehova na bilip strong long em bai helpim ol. Dispela tok long Sekaraia 4:6 i toktok long God i sambai long helpim ol.

¹⁸ Taim ol Juda i kam bek long ples bilong ol long 537 B.C.E., ol i no gat wanpela lain ami. Tasol Jehova i lukautim ol na soim rot long ol kirap long taim ol i lusim Babilon na i kam. Na bihain liklik long dispela, spirit bilong em i stiaim ol samting taim ol i kirap wokim tempel. Taim ol i kirap na wok strong gen long mekim dispela wok, em bai sambai long helpim ol long rot bilong holi spirit bilong em.

19. Spirit bilong God i daunim wanem bikpela strong?

¹⁹ Long rot bilong 8-pela samting olsem driman, Jehova i tokim Sekaraia olsem em bai stap wantaim lain bilong em, na ol bai sanapim tempel na pinisim dispela wok. Namba 4 samting olsem driman, i stap long sapta 3, i soim olsem Satan i wok strong long pasim rot bilong ol Juda long pinisim wok bilong wokim tempel. (Sekaraia 3:⁠1) Yumi save, Satan i no inap amamas long lukim Hetpris Josua i mekim ol wok bilong em long nupela tempel bilong helpim ol Juda. Tru, Satan i wok strong long pasim ol Juda na bai ol i no ken wokim tempel, tasol spirit bilong Jehova bai mekim bikpela wok long rausim ol samting i laik pasim ol na em bai strongim ol long wok strong i go inap long taim ol i wokim pinis tempel.

20. Olsem wanem holi spirit i helpim ol Juda long bihainim tok bilong God long wokim gen tempel?

²⁰ Ol ofisa bilong gavman i mekim na gavman i putim tambu long wokim gen tempel. Dispela pasin birua i olsem wanpela bikpela maunten i pasim rot bilong ol Juda na ol i no inap winim. Tasol Jehova i tok promis olsem em bai rausim dispela “maunten” na mekim i kamap olsem stretpela graun. (Sekaraia 4:⁠7) Na dispela samting i kamap tru! King Darius Namba 1 i painim wanpela pepa bilong Sairus, na dispela pepa i tok orait long ol Juda i ken wokim gen tempel. Olsem na Darius i rausim dispela tambu na em i putim tok olsem ol i mas kisim mani long haus mani bilong king na givim long ol Juda bilong helpim ol long baim ol samting bilong mekim dispela wok. Man! Bikpela senis tru i kamap! Yu ting holi spirit bilong Jehova i bin stiaim dispela samting? Yumi ken bilip olsem em i bin mekim. Tempel i redi pinis long 515 B.C.E., long namba 6 yia bilong Darius Namba 1 i stap king.​​—⁠Esra 6:​1, 15.

21. (a) Long bipo, olsem wanem God i “seksekim olgeta lain man”? Olsem wanem “ol gutpela samting” i kam ausait? (b) Olsem wanem truim bilong en i bin kamap long nau?

²¹ Long Hagai 2:​5, profet i kirapim ol Juda long tingim kontrak Jehova i bin mekim wantaim ol long maunten Sainai taim “bikpela guria i kamap long maunten.” (Kisim Bek 19:18) Olsem ves 6 na 7 (NW ) i stori long en long tok piksa, long taim bilong Hagai na Sekaraia Jehova bai kamapim narapela bikpela guria. Ol bikpela senis bai kamap long Gavman Persia, tasol ol bai mekim wok yet long tempel i go inap long taim dispela wok i pinis. Sampela bilong ol lain i no Juda, em “ol gutpela samting bilong olgeta lain,” ol bai bung wantaim ol Juda na givim biknem long God long dispela ples bilong lotu. Long bikpela truim bilong en long taim bilong yumi, God i bin “seksekim olgeta lain man” long rot bilong wok autim tok, na “ol gutpela samting bilong olgeta lain” i bin kam bung wantaim lain remnan na lotu long God. Tru tumas, long nau lain God i bin makim na ol arapela sipsip, olgeta wantaim ol i wok long givim biknem long Jehova long haus bilong em. Ol dispela man i lotu tru long God ol i bilip na wetim wanpela taim i kamap bihain na Jehova bai “seksekim olgeta lain man” bilong mekim narapela kain wok. Em bai mekim olsem bilong bagarapim strong bilong ol king bilong graun.​​—⁠Hagai 2:​22.

22. Wanem samting i save “seksekim” ol lain man? Wanem samting i kamap long dispela? Wanem samting bai kamap bihain?

²² Yumi ken tingim ol bikpela senis i bin kamap long ol samting Baibel i tok piksa long en olsem ‘skai na graun na solwara.’ Wanpela samting i olsem: Ol i bin rausim Satan wantaim ol ensel nogut i kam daun long graun. (KTH 12:​7-​12) Na tu, wok bilong autim tok em lain God i bin makim ol i go pas long mekim, em i olsem bikpela guria i bin seksekim tru ol samting bilong dispela graun. (KTH 11:18) “Planti manmeri tru,” em “ol gutpela samting bilong olgeta lain,” ol i bin bung wantaim lain Israel bilong spirit long mekim wok bilong Jehova. (KTH 7:​9, 10) Dispela lain olsem “planti manmeri tru” ol i wok wantaim ol Kristen God i bin makim, long autim gutnius olsem klostu nau God bai seksekim olgeta lain man long taim bilong Armagedon. Dispela samting bai opim rot bilong lotu i tru i ken kamap gutpela olgeta long olgeta hap bilong graun.

Yu Inap Tingim?

• Hagai na Sekaraia i mekim wok bilong ol long wanem taim? Wanem samting i bin kamap na ol i mekim dispela wok?

• Yu ken mekim wanem bilong bihainim ol tok bilong Hagai na Sekaraia?

• Olsem wanem tok bilong Sekaraia 4:6 i strongim bel bilong yu?

[Ol Piksa long pes 20]

Ol tok bilong Hagai na Sekaraia i helpim yumi long bilip tru olsem God bai sambai long yumi

[Piksa long pes 23]

“Bilong wanem yupela i stap long ol gutpela gutpela haus, na haus bilong mi i bagarap i stap?”

[Piksa long pes 24]

Lain bilong Jehova i save autim tok long “ol gutpela samting bilong olgeta lain”