Mekim Ol Ofa Jehova i Save Laikim
“Long nem bilong Jisas, . . . yumi mas givim maus bilong yumi long [God], na telimautim nem bilong em.”—HIBRU 13:15.
1. Ol Isrel i bin mekim rong na Jehova i kirapim ol long mekim wanem?
JEHOVA em i Man bilong helpim ol manmeri i mekim ol ofa em i laikim. Olsem na bipo em i amamas long ol Isrel, em ol i bin givim ol animal long em olsem ofa. Tasol bihain ol Isrel i mekim rong planti taim, olsem na Jehova i mekim wanem? Long maus bilong profet Hosea, Jehova i tokim ol: “O Isrel, yupela i mas kam bek long Jehova, em God bilong yupela, long wanem yupela i bin pundaun na mekim rong. Kisim ol tok i kam wantaim na kam bek long Jehova. Yupela olgeta, yupela i mas tokim em, ‘Plis, lusim tingting long ol rong [bilong mipela]; na kisim samting i gutpela, na bai mipela i givim maus bilong mipela, olsem ol yangpela bulmakau, long yu.’ ”—Hosea 14:1, 2, NW.
2. Wanem insait bilong dispela tok olsem ‘yumi mas givim maus bilong yumi olsem ol yangpela bulmakau’? Pol i mekim wanem tok i wankain olsem bilong profet Hosea?
2 Em nau, God i tokim lain bilong em long bipo ol i mas givim ‘maus bilong ol long em, olsem ol yangpela bulmakau.’ Ol i mas mekim wanem bilong givim kain ofa olsem long em? Ol i mas litimapim nem bilong em na telimautim nem bilong em! Taim Pol i raitim pas long ol Hibru em i mekim sampela tok i wankain olsem dispela. Em i no kolim stret tok bilong profet Hosea, tasol em i tokim ol Kristen bilong lain Hibru, ol i mas ‘givim maus bilong ol long God, olsem ofa, na telimautim nem bilong em.’ (Hibru 13:15) Wanem samting inap helpim ol Witnes Bilong Jehova long nau na bai ol inap mekim kain ofa olsem?
“Bihainim Pasin Bilong Bilip Bilong Ol”
3. Wanem bikpela tok i stap insait long tok bilong Pol long Hibru 13:7? Olsem na i gat wanem askim?
3 God em i Man bilong helpim yumi, na sapos yumi bihainim gutpela tok Pol i bin givim long ol Hibru, bai yumi inap mekim ofa God i laikim. Olsem: Pol i tok, “Yupela i mas tingting long ol hetman bilong yupela, bipo ol i autim tok bilong God long yupela. Yupela i mas tingting long wokabaut bilong ol, na bihainim pasin bilong bilip bilong ol.” (Hibru 13:7) Wanpela Baibel Inglis i tanim dispela tok “ol hetman bilong yupela” olsem “ol man bilong bosim yupela.” (New World Translation Reference Bible, tok i stap daunbilo.) Orait, husat ol dispela “hetman” o “man bilong bosim” yumi, em Pol i tok yumi mas tingting long ol?
4. (a) Sapos yumi skelim tok Grik, yumi ken save ol dispela “hetman” i gat wanem wok? (b) Husat ol dispela “hetman” long lain Witnes Bilong Jehova?
4 Pol i tok, ol dispela “hetman” i save “was” long ol Kristen na “lukautim” ol na ‘bosim’ ol. (Hibru 13:7, 17, 24) Dispela tok “bosim” ol i kisim long wanpela tok Grik (ky·ber·naʹo) insait bilong en i olsem: “stiaim sip, soim rot, bosim.” Ol elda Kristen i gat ‘save bilong stiaim samting’ (tok Grik, ky·ber·neʹseis) na ol i mekim wok long dispela save na bosim wok bilong ol brata long kongrigesen bilong ol na soim rot long ol. (1 Korin 12:28) Tasol ol aposel na elda long Jerusalem i mekim wok olsem lain bilong bosim olgeta kongrigesen—ol i salim tok i go long olgeta kongrigesen bilong stiaim tingting bilong ol na soim rot long ol. (Aposel 15:1, 2, 27-29) Olsem na long nau tu i gat wanpela lain elda bilong bosim wok bilong ol Witnes Bilong Jehova long olgeta hap bilong graun.
5. Bilong wanem yumi mas beten askim God long helpim ol elda bilong kongrigesen na ol elda bilong Lain Bilong Bosim Ol Witnes? Yumi ken mekim olsem wanem?
5 Ol elda long kongrigesen na ol elda long Lain Bilong Bosim Ol Witnes ol i save go pas long yumi; olsem na yumi save bihainim tok bilong ol na yumi save beten askim God long givim gutpela save na tingting long ol bambai ol inap bosim gut kongrigesen. (Lukim Efesas 1:15-17.) I stret yumi mas tingim gut ol man i bin ‘autim tok bilong God long yumi’! Mama bilong Timoti na tumbuna mama bilong em i bin lainim em long tok bilong God, tasol i no tupela tasol i bin mekim; bihain Pol na sampela man moa i bin lainim em. (2 Timoti 1:5, 6; 3:14) Olsem na Timoti inap tingting long wokabaut bilong ol dispela man i gat wok long soim rot long ol narapela Kristen, na em inap bihainim pasin bilong bilip bilong ol.
6. Yumi mas bihainim pasin bilong bilip bilong husat? Tasol yumi bihainim husat?
6 Ol manmeri kain olsem Ebel, na Noa, na Ebraham, na Sera, na Rahap, na Moses, ol i bin bilip. (Hibru 11:1-40) Olsem na yumi ken bihainim pasin bilong bilip bilong ol. Yumi no gat tupela tingting long mekim, long wanem yumi save, ol i bin i stap gut long God i go inap long taim ol i dai. Tasol yumi ken “bihainim pasin bilong bilip” bilong ol gutpela man long nau tu, em ol i go pas long yumi na soim rot long yumi. Tru yumi no save bihainim ol man bilong graun, em ol i gat sin; yumi save bihainim Krais na yumi lukluk i go long em. Olsem wanpela man bilong tanim tok bilong Baibel i tok: “Ol bilipman bilong bipo ol i no save bihainim ol man i bin mekim bikpela wok bilong helpim ol; nogat. Krais i makim gutpela pasin ol i mas bihainim na ol i bihainim em . . . Kristen i mas lukluk i go long Jisas na ran long resis.” (Edgar J. Goodspeed i tok olsem.) Tru tumas, yumi mas bihainim lek bilong Krais, long wanem ‘em i bin karim pen bilong helpim yumi na em i soim yumi dispela pasin bilong em, bai yumi ken bihainim.’—1 Pita 2:21; Hibru 12:1-3.
7. Tok bilong Hibru 13:8 i mas kirapim yumi long ting olsem wanem long pen Krais i bin karim?
7 Nau Pol i kirapim yumi long tingim Pikinini bilong God, na em i tok moa olsem: “Pasin bilong Jisas Krais em i wankain tasol, long asde, na long tude tu, na long oltaim oltaim.” (Hibru 13:8) Ol gutpela witnes bilong bipo, olsem Stiven na Jems, ol i no bin surik liklik long holimpas lo bilong God. Ol i bihainim tru pasin bilong Jisas long i stap gut long God. (Aposel 7:1-60; 12:1, 2) Ol i redi long i dai tu bilong bihainim Krais, olsem na pasin bilong bilip bilong ol i gutpela na i stret yumi ken bihainim. Long bipo, na long nau, na long bihain tu, ol manmeri i givim bel long God ol i no surik sapos ol man i laik kilim ol i dai long wanem ol i disaipel bilong Krais; ol i holimpas bilip.
Klia long Ol Tok Giaman
8. Bai yu stori olsem wanem long tok bilong Pol long Hibru 13:9?
8 Pasin bilong Jisas na ol tok em i lainim ol man long en i no save senis, na dispela i mas kirapim yumi long holimpas ol tok em yet na ol aposel bilong em i bin lainim ol man long en. Pol i tokim ol Hibru: “Nogut ol narakain narakain tok i kam pulim bel bilong yupela, na yupela i lusim rot bilong God. Sapos bel bilong yumi i kisim strong long marimari bilong God, em i gutpela. Bel bilong yumi i no inap kisim strong long kain kain lo bilong kaikai. Dispela pasin i no bin helpim ol manmeri i save wokabaut long en.”—Hibru 13:9.
9. Long pas Pol i raitim long ol Kristen bilong lain Hibru em i stori long wanem ol samting i bikpela samting moa?
9 Ol Juda i save tingim ol bikpela samting i bin kamap taim God i givim lo long lain bilong ol long Maunten Sainai, na ol i tingim wok king bilong Devit i bilong i stap oltaim. Tru, taim God i bin mekim Kontrak bilong Lo wantaim ol Isrel, planti bikpela samting i bin kamap na i mekim ol i pret. Tasol Pol i tok, taim God i wokim nupela kontrak em i strongim dispela long kain kain mirakel, na kain kain strongpela wok, na em i tilim presen bilong spirit holi long ol manmeri. (Aposel 2:1-4; Hibru 2:2-4) No gat wanpela man inap sakim o bagarapim Kingdom bilong Krais long heven olsem ol i bin mekim long wok king bilong lain bilong Devit long yia 607 paslain long Krais. (Hibru 1:8, 9; 12:28) Na ol Kristen Jehova i bin makim ol long spirit holi, em i bringim ol i kam long samting i bikpela moa, winim ol strongpela samting i bin kamap long Maunten Sainai—em i bringim ol i kam klostu long Maunten Saion long heven.—Hibru 12:18-27.
10. Bel bilong yumi i kisim strong long wanem samting, olsem Hibru 13:9 i tok?
10 Olsem na ol Hibru i mas was gut, nogut “ol narakain narakain tok” i pulim bel bilong ol, em ol tok bilong ol man i strong long bihainim pasin bilong ol Juda. (Galesia 5:1-6) Bel bilong ol i no inap kisim strong long ol dispela kain tok; ol i mas kisim strong “long marimari bilong God” bambai ol inap holimpas ol tok i tru na sanap strong. Ating sampela ol i bin tok pait long lo bilong ol kaikai na ol ofa, long wanem Pol i tok, bel i no kisim strong long “kain kain lo bilong kaikai.” Em i tok, “Dispela pasin i no bin helpim ol manmeri i save wokabaut long en.” Sapos ol man i tingting tumas long ol lo i tambuim sampela kaikai na i makim sampela de i bikpela na i winim ol narapela de, dispela i no inap helpim ol long i stap strong long spirit. Ol i mas givim bel long God na pilim tru ofa Jisas i bin mekim bilong baim bek yumi bambai ol i ken i stap strong long spirit. (Rom 14:5-9) Na ofa bilong Krais i mekim na i no gat wok moa long ol ofa bilong pris bilong lain Livai.—Hibru 9:9-14; 10:5-10.
Kain Ofa God i Laikim
11. (a) Wanem bikpela tok i stap insait long tok bilong Pol long Hibru 13:10, 11? (b) Ol Kristen i gat wanem samting olsem alta?
11 Ol pris bilong lain Livai ol i save kaikai abus ol man i givim olsem ofa, tasol Pol i tok “Yumi gat alta i stap. Na ol pris i save mekim wok long haus lotu sel, ol i no inap kisim kaikai long dispela alta. Hetpris i save kisim blut bilong ol sipsip na bulmakau samting, na em save bringim dispela blut i go insait long rum holi bilong mekim ofa bilong tekewe sin. Tasol bodi bilong ol dispela abus, em ol i save kukim long paia ausait long kem” long De Bilong Tekewe Sin. (Hibru 13:10, 11; Levitikas 16:27; 1 Korin 9:13) Kristen i gat wanpela samting olsem alta—ol i gat rot bilong i go klostu long God, long wanem ofa bilong Jisas i save tekewe sin na nau Jehova i lusim tingting long rong bilong ol man na ol inap kisim laip i stap oltaim.
12. Ol Kristen God i makim ol long spirit holi, long Hibru 13:12-14 Pol i kirapim ol long mekim wanem?
12 Pol i no tok piksa moa long De Bilong Tekewe Sin, tasol em i tok: “Olsem na Jisas tu i bin karim pen ausait long dua bilong banis [bilong Jerusalem], bilong mekim ol manmeri i kamap holi long blut bilong en.” Krais i dai na ofa bilong em inap tru long tekewe sin olgeta. (Hibru 13:12; Jon 19:17; 1 Jon 2:1, 2) Aposel Pol i tokim ol narapela Kristen em God i bin makim ol long spirit holi: “Olsem na yumi tu yumi mas i go long em ausait long kem, na yumi mas karim sem olsem em i bin karim. Yumi save, long dispela graun yumi no gat wanpela taun i save stap oltaim. Tasol yumi laik painim dispela taun i laik kamap bihain.” (Hibru 13:13, 14; Levitikas 16:10) Yumi karim sem olsem Jisas i bin karim, tasol yumi stap strong long wok bilong autim tok bilong Jehova, olsem ol Witnes bilong em. Yumi “lusim pasin bilong givim baksait long God, na lusim olgeta laik nogut bilong pasin bilong graun, na yumi tingting gut na wokabaut stret na bihainim pasin bilong God nau long dispela taim,” na yumi wetim nupela taim i kamap. (Taitas 2:11-14; 2 Pita 3:13; 1 Jon 2:15-17) Na ol manmeri long lain bilong yumi, em God i bin makim ol long spirit holi, ol i wok strong long painim dispela “biktaun,” em Kingdom bilong heven.—Hibru 12:22.
13. Ol ofa God i laikim i no wanem kain wok tasol?
13 Bihain Pol i stori long kain ofa God i laikim, em i tok: “Olsem na yumi mas amamas long God long nem bilong Jisas, na yumi mas givim dispela amamas long em oltaim oltaim, olsem ofa. Yes, yumi mas givim maus bilong yumi long em, na telimautim nem bilong em. Na yupela i no ken lusim tingting long mekim gutpela pasin long ol manmeri. Na samting i stap long yupela, em yupela i mas skelim hap long man i sot, bilong helpim em. God i laikim tumas dispela kain ofa.” (Hibru 13:15, 16) Wok bilong helpim ol man long samting bilong skin, i no dispela kain ofa tasol ol Kristen i mas mekim. Planti man i save mekim ol kain wok olsem. Taim bikpela guria i bin bagarapim ol man long hap bilong Aminia, long Rasia, long pinis bilong yia 1988, ol manmeri bilong planti kantri i bin helpim ol.
14. Wanem bikpela wok yumi mas mekim, olsem ofa God i laikim?
14 Tasol yumi ol Kristen i mas mekim narapela ofa tu—yumi mas mekim wok bilong Jehova na “litimapim nem bilong em, na pret long em,” na samting i kirapim yumi long mekim olsem em dispela kain pasin bilong sori Jisas i bin mekim, olsem yumi redi long karim hevi bilong helpim narapela man. (Hibru 12:28; Jon 13:34, 35; 15:13) Bikpela wok yumi mas mekim bilong lotu long God, em wok bilong autim tok, long wanem long rot bilong Hetpris Krais ‘yumi givim maus bilong yumi long God, olsem ofa, na yumi telimautim nem bilong God.’ (Hosea 14:2; Rom 10:10-15; Hibru 7:26) Na yumi ‘no lusim tingting long mekim gutpela pasin long ol manmeri, na samting i stap long yumi, em yumi save skelim hap long man i sot.’ Yumi save mekim gutpela pasin olsem long “ol brata i bilip long Bikpela” na long ol narapela man tu. (Galesia 6:10) Taim bagarap i painim sampela brata o ol i sot long samting o ol i gat hevi, long kain taim olsem yumi save strong tru long mekim gutpela pasin bilong helpim ol, na yumi save helpim ol long ol samting bilong skin na spirit. Bilong wanem yumi mekim olsem? Long wanem yumi save laikim tru ol brata. Na tu, yumi laik bai ol i no ken surik long wok bilong tokaut long bilip bilong ol na long gutpela samting ol i wetim i stap, long wanem “God i laikim tumas dispela kain ofa.”—Hibru 10:23-25; Jems 1:27.
Stap Aninit long Ol
15. (a) Bai yu stori olsem wanem long tok bilong Hibru 13:17? (b) Bilong wanem yumi mas harim gut tok bilong ol elda i go pas long mekim wok?
15 Bilong mekim ol ofa God i laikim, yumi mas wok gut wantaim oganaisesen bilong God. Pol i no mekim bikpela toktok tumas long yumi mas daun long ol man i gat wok long bosim yumi, tasol em i tok: “Ol hetman bilong yupela ol i laik helpim yupela, na ol i save was long yupela oltaim. Na bihain bai ol i mas autim tok long God long olgeta wok ol i bin mekim. Olsem na yupela i mas bihainim tok bilong ol na i stap aninit long ol. Sapos yupela i mekim olsem, orait bai ol i ken amamas na holim wok bilong ol, na ol i no ken bel hevi. Sapos ol i bel hevi long lukautim yupela, bai dispela i no helpim yupela.” (Hibru 13:17) Yumi mas harim gut tok bilong ol elda em oganaisesen i bin makim ol na ol i go pas long mekim ol wok long kongrigesen. Sapos yumi no wok gut wantaim ol, dispela bai givim hatwok long ol na bai ol i bel hevi. Sapos yumi no bihainim tok bilong ol elda na aninit long ol, dispela bai putim hevi long ol dispela wasman na bagarapim yumi long ol samting bilong spirit. Sapos yumi wok gut wantaim ol elda, bai i no hatwok long ol i lukautim yumi, na bai kongrigesen i stap wanbel, na dispela bai helpim wok bilong autim tok bilong Kingdom.—Sam 133:1-3.
16. Bilong wanem i stret yumi mas aninit long ol man i go pas long yumi?
16 I stret tru yumi mas aninit long ol dispela man i go pas long mekim wok! Ol i save lainim yumi long ol miting na ol i helpim yumi long mekim wok bilong autim tok. Ol i mekim wok olsem bilong wasman bilong sipsip na ol i lukautim gut yumi. (1 Pita 5:2, 3) Ol i helpim yumi long i stap wanbel wantaim God na kongrigesen. (Aposel 20:28-30) Taim yumi daun long ol dispela wasman i gat gutpela tingting na i bosim ol wok bilong yumi long pasin sori, i olsem yumi daun long Nambawan Wasman, em God Jehova, na Nambatu bilong em, em Krais Jisas.—1 Pita 2:25; Revelesen 1:1; 2:1–3:22.
Beten Oltaim
17. Pol i laik bai ol brata i mekim wanem kain beten? Olsem wanem na i stret em i ken askim ol brata long mekim kain beten olsem?
17 Ating ol man i bin mekim nogut long ol Kristen, olsem na Pol wantaim ol poroman bilong em i stap longwe long ol Hibru na Pol i tokim ol: “Yupela i mas [beten] long God i ken helpim mipela. Mipela i pilim olsem bel bilong mipela i stret long ai Bilong God. Na mipela i laik wokabaut stret long olgeta taim. Na mi laikim tumas yupela i [beten] long God i helpim mi, na bai mi ken i kam bek long yupela kwiktaim.” (Hibru 13:18, 19) Sapos Pol em i man bilong giaman na em i pasim bel pinis na bel bilong em i no pilim sin moa, orait bai i no stret em i tokim ol Hibru long beten bambai God i ken helpim em long kam bek na bung gen wantaim ol, a? (Provep 3:32; 1 Timoti 4:1, 2) Tasol em i gutpela wokman bilong God, na em i bin sakim ol man i strong long bihainim pasin bilong ol Juda, olsem na bel bilong em i stret long ai bilong God. (Aposel 20:17-27) Na tu, Pol i bilip olsem sapos ol Hibru i beten bambai God i helpim em long kam bek long ol, orait bai God i harim beten bilong ol na bai em inap kam bek long ol kwiktaim.
18. Sapos yumi laik bai ol brata i beten askim God long helpim yumi, orait yumi mas tingim wanem ol askim?
18 Pol i tokim ol Hibru long beten askim God long helpim em, olsem na yumi save i stret ol Kristen i ken beten olsem. Yumi ken kolim nem bilong brata o sista tu na beten askim God long helpim em. (Lukim Efesas 6:17-20.) Tasol sapos yumi laik bai ol brata i beten askim God long helpim yumi, orait yumi mas mekim olsem Pol i bin mekim—yumi mas was gut bambai ‘bel bilong yumi i stret long ai bilong God,’ na yumi mas “wokabaut stret long olgeta taim.” Olsem wanem long yu? Long olgeta taim yu mekim pasin i stret? Na yu bilip tru long pasin bilong beten olsem Pol i bin mekim?—1 Jon 5:14, 15.
Ol Laspela Tok na Tok Bilong Strongim Ol
19. (a) Pol i tok em i laik bai God i mekim wanem Bilong helpim ol Hibru? (b) Olsem wanem nupela kontrak em i kontrak bilong i stap oltaim?
19 Pol i askim ol brata long beten bambai God i ken helpim em, na bihain Pol i mekim sampela tok i kamapim laik bilong em na i olsem em i mekim beten, em i tok: “God em i as bilong bel isi. Long blut bilong dispela kontrak i stap oltaim oltaim, em i bin kirapim bek Bikpela bilong yumi Jisas. Na Jisas em i Namba Wan Wasman bilong ol sipsip. Orait God i ken givim olgeta gutpela pasin long yupela, inap long yupela i ken bihainim laik bilong em. Na insait long yumi olgeta em i ken kamapim olgeta pasin em yet i laikim, long nem bilong Jisas Krais. [God] i gat biknem oltaim oltaim. Tru.” (Hibru 13:20, 21) God, “em i as bilong bel isi,” em i tingting long kamapim bel isi long graun, olsem na em i kirapim bek Krais na givim laip oltaim long em long heven, em ples Jisas i bin i go long en bilong givim pe bilong blut bilong em long God. Blut bilong em i kapsait pinis na em i rot bilong kamapim nupela kontrak. (Aisaia 9:6, 7; Luk 22:20) Dispela kontrak em i bilong i stap oltaim, long wanem ol 144,000 pikinini spirit bilong God ol i insait long nupela kontrak na ol bai mekim wok king wantaim Jisas long heven, na wok bilong ol bai helpim ol manmeri long graun inap oltaim oltaim. (Revelesen 14:1-4; 20:4-6) Dispela God yumi givim biknem long em, em ‘i givim olgeta gutpela samting long yumi bambai yumi inap bihainim laik bilong em na kamapim olgeta pasin em yet i laikim,’ na em i mekim olsem long rot bilong Krais Jisas.
20. Bai yu stori olsem wanem long ol laspela tok Pol i mekim long pas bilong strongim ol Kristen Hibru?
20 Pol i no save bai ol Hibru i amamas long ol tok em i raitim o nogat, olsem na em i tok: “Ol brata, mi tok strong long yupela, yupela i mas putim [yau] long dispela tok mi mekim bilong strongim bel bilong yupela [ol i mas putim yau long tok bilong Pikinini bilong God, i no long tok bilong ol man i strong long bihainim pasin bilong ol Juda]. Dispela pas mi raitim long yupela, em i olsem sotpela tasol [tasol i gat ol strongpela tok long en]. Yupela i ken save, ol i bin lusim brata bilong yumi Timoti, na em i no moa i stap long kalabus. Sapos em i kamap long mi kwiktaim, orait mitupela wantaim bai i go lukim yupela.” Ating Pol i stap long Rom na em i raitim dispela pas, na em i laik bai em wantaim Timoti inap i go lukim ol brata Hibru long Jerusalem. Bihain Pol i tok: “Yupela givim gude bilong mipela long olgeta hetman [em ol elda i wok strong] bilong yupela, wantaim olgeta manmeri bilong God [em ol i bilong kisim laip long heven]. Ol Kristen bilong Itali ol i salim gude long yupela. Marimari [bilong God] i ken i stap wantaim yupela olgeta.”—Hibru 13:22-25.
Pas Em Inap Helpim Yumi Oltaim
21. Pas bilong ol Hibru i helpim yumi long save long wanem ol bikpela samting?
21 Pas Pol i raitim long ol Hibru i helpim yumi long save gut long ol samting ol ofa bilong Lo bilong Moses i makim, na ating i no gat narapela hap bilong Baibel i stori gut long dispela samting olsem dispela pas i mekim. Dispela pas i kamapim long ples klia olsem ofa bilong Krais Jisas tasol em inap baim bek ol man i gat sin. Na wanpela bikpela tok bilong dispela pas, em olsem: Yumi mas putim gut yau long ol tok bilong Pikinini bilong God.
22. I gat wanem sampela as na yumi laik tenkyu long God long em i kirapim Pol long raitim pas bilong ol Hibru?
22 Olsem tupela stori paslain long dispela i bin kamapim, i gat sampela as moa na yumi ken tenkyu long God long dispela pas em spirit bilong em i kirapim Pol long raitim. Ol tok bilong dispela pas i helpim yumi bambai yumi no les long mekim wok bilong God, na ol dispela tok i strongim tru bel bilong yumi, long wanem yumi save, Jehova em i Man bilong helpim yumi. Na ol dispela tok i kirapim yumi long mekim wok long maus bilong yumi na long olgeta narapela hap bilong skin na tingting bilong yumi bilong mekim wok bilong God na lotu long em long san na long nait. Yes, yumi mas mekim ol ofa God bilong yumi, Jehova, em i laikim, long wanem em i God bilong pasin sori na i stret yumi mas litimapim nem bilong em.
Bai Yu Bekim Wanem Tok?
◻ Pas Pol i raitim long ol Hibru i helpim ol olsem wanem long klia long ol tok giaman?
◻ Ol man i laik mekim ofa God i laikim ol i mas mekim wanem bikpela wok?
◻ Husat i olsem “ol hetman”? Bilong wanem yumi mas aninit long ol?
◻ Pas bilong ol Hibru i kamapim wanem bikpela tok long beten?
◻ Olsem wanem yumi ken tok, pas bilong ol Hibru inap helpim yumi oltaim?
[Ol Piksa long pes 23]
Sampela ofa God i laikim em olsem: Autim tok long ol man, na givim gutpela tok long ol brata bilong helpim ol