Bihainim Lotu i Tru na Abrusim Bagarap
“Lotu i stap stret na tru olgeta long ai bilong God Papa bai kamap klia long kain pasin olsem: . . . yumi mas was gut long wokabaut bilong yumi, bai pasin bilong dispela graun i no ken mekim yumi i kamap doti long ai bilong God.”—JEMS 1:27, Baibel Phillips.
WANPELA buk i tok, pasin bilong mekim lotu em i olsem “pasin man i mekim bilong kamapim klia olsem em i bilip na daun long wanpela bikpela man antap em i man bilong wokim na bosim olgeta samting long heven na long graun.” Orait, i stret husat i ken makim wanem lotu i tru na wanem lotu i giaman? Em dispela Man i bin wokim olgeta samting, em ol man i save bilip long em na lotu long em, a? Long Baibel God Jehova i kamapim tingting bilong em na makim klia wanem lotu i tru na wanem lotu i giaman long ai bilong em.
Dispela Tok “Lotu” Long Baibel
2. Ol buk i stori olsem wanem long insait bilong hap tok Grik ol i tanim olsem “lotu”? Dispela tok inap makim wanem kain lotu?
2 I gat wanpela hap tok Grik (thre·skeiʹa) ol i tanim olsem “lotu.” Wanpela buk i tok, dispela tok i makim “ol wok o pasin man i mekim bilong lotuim God.” (Buk A Greek-English Lexicon of the New Testament) Na narapela buk i stori moa olsem: “Sampela saveman bilong nau i ting dispela tok i poromanim tok therap- (‘mekim wok bilong wanpela man’). . . . Dispela tok inap makim kain kain samting. Taim em i makim gutpela samting, insait bilong en i olsem ‘givim bel long lotu’ . . . , ‘lotuim God,’ ‘lotu.’ . . . Tasol em inap makim tu samting i no gutpela, olsem: ‘strong tumas long lotu,’ ‘lotu i kranki.’ ” Olsem na yumi ken tanim dispela tok (thre·skeiʹa) olsem “lotu” o “pasin bilong mekim lotu” na em inap makim gutpela lotu o lotu nogut.
3. Pol i kolim dispela tok bilong makim wanem samting? Planti Baibel i tanim dispela tok olsem wanem long Kolosi 2:18?
3 Dispela tok i kamap 4-pela taim tasol long hap bilong Nupela Testamen. Aposel Pol i kolim tupela taim bilong makim lotu giaman. Long Aposel 26:5 em i tok, taim em i no kamap Kristen yet, em i bihainim lotu bilong ol Farisi. Na em i tokim ol Kolosi: “Sapos wanpela man . . . i tok long yupela i mas daunim yupela yet na lotu long ol ensel, orait yupela i no ken larim em i daunim yupela.” (Kolosi 2:18) Dispela pasin bilong lotuim ol ensel i kamap strong long distrik Frigia long dispela taim bipo, tasol em lotu giaman.a Sampela Baibel i save tanim dispela tok Grik (thre·skeiʹa) olsem “lotu,” tasol long Kolosi 2:18, planti Baibel i tanim olsem “lotuim” o “lotu long.” Long olgeta taim Baibel New World Translation i save tanim olsem “pasin bilong mekim lotu.”
‘I Stap Stret Long Ai Bilong God’
4, 5. (a) Olsem Jems i tok, yumi mas bihainim lotu i stret long ai bilong husat? (b) Wanem samting inap mekim na bai pasin man i mekim bilong lotuim God i kamap samting nating tasol?
4 Dispela tok Grik (thre·skeiʹa) i kamap tupela taim moa long Nupela Testamen, long pas bilong disaipel Jems, em bilong lain bilong bosim ol Kristen bilong pastaim. Jems i tok: “Sapos wanpela man i ting olsem, ‘Mi gutpela Kristen na mi save lotu tru long God,’ tasol em i no bosim gut maus bilong en, orait em i save giamanim em yet. Olsem na bilip bilong en na lotu bilong en em i samting nating tasol. Pasin bilong Kristen i stap stret olgeta na i no gat asua long ai bilong God Papa bilong yumi, em i olsem: Yumi mas tingting long ol pikinini, papamama bilong ol i dai pinis, na long ol meri, man bilong ol i dai pinis, na yumi mas helpim ol long karim ol hevi bilong ol. Narapela samting tu, yumi mas lukautim gut wokabaut bilong yumi yet, bai pasin bilong dispela graun i no ken mekim yumi i kamap doti long ai bilong God.”—Jems 1:26, 27.
5 Tru tumas, yumi mas lotuim God Jehova long pasin i stret long ai bilong em bambai em i ken amamas long yumi na yumi inap abrusim bagarap na i stap long nupela taim em i tok promis long kamapim. (2 Pita 3:13) Tok bilong Jems i kamapim klia olsem man inap ting em i lotu tru long God, tasol long ai bilong God, pasin bilong em long lotuim God i samting nating tasol. Sapos man i tok em i wanpela Kristen, tasol em i no bosim gut maus bilong em, o em i no mekim wok long maus bilong em bilong litimapim nem bilong God na bilong strongim ol brata, orait pasin bilong em long lotuim God inap kamap samting nating tasol. Kain man olsem i “giamanim em yet” na em i no mekim “lotu i stap stret na tru olgeta long ai bilong God.” (Baibel Phillips) Tingting bilong Jehova em bikpela samting—yumi mas lotuim em long pasin i stret long ai bilong em.
6. (a) Wanem as tok bilong pas bilong Jems? (b) Jems i kolim wanem samting yumi mas mekim bambai yumi ken lotu tru long God? Na Lain Bilong Bosim Ol Witnes long nau i tok wanem long dispela samting?
6 Jems i no kolim olgeta samting Jehova i laik bai yumi mekim bambai yumi ken lotu tru long Em. Jems i tingim as tok bilong pas bilong em, olsem yumi mas mekim ol wok bilong kamapim bilip bilong yumi na yumi no ken pren wantaim pasin bilong dispela graun bilong Satan, na Jems i kolim tupela samting yumi mas mekim bilong lotu tru long God. Wanpela em olsem: ‘Yumi mas helpim ol pikinini, papamama bilong ol i dai pinis, na ol meri, man bilong ol i dai pinis.’ Bilong mekim olsem, yumi mas bihainim pasin sori tru bilong Kristen. Oltaim Jehova i save sori long ol dispela kain meri pikinini. (Lo 10:17, 18; Malakai 3:5) Lain bilong bosim ol Kristen bilong pastaim i bin helpim ol meri Kristen, em man bilong ol i dai pinis. (Aposel 6:1-6) Aposel Pol i kolim planti tok ol i mas bihainim bilong lukautim gut ol lapun sista i bin i stap gut long wok bilong God inap planti yia na bihain ol i kamap rabis na ol i no gat sampela famili bilong helpim ol. (1 Timoti 5:3-16) Long nau tu Lain Bilong Bosim Ol Witnes Bilong Jehova i tok, yumi mas helpim ol dispela kain brata sista. (Lukim buk Lo Bilong Yumi Bilong Mekim Wok Autim Tok, pes 122, 123.) Ol lain elda na ol wan wan Kristen, sapos ol i slek long mekim dispela wok, ol i abrusim wanpela bikpela hap wok bilong lotu i stap stret olgeta na i no gat asua long ai bilong God.
“Bai Pasin Bilong Dispela Graun i No Ken Mekim Yumi i Kamap Doti”
7, 8. (a) Jems i kolim wanem narapela samting yumi mas mekim bilong lotu tru long God? (b) Ol bikman bilong lotu na ol pris ol inapim dispela mak o nogat? (c) Olsem wanem long ol Witnes Bilong Jehova?
7 Namba 2 samting Jems i kolim bilong yumi ken lotu tru long God, em olsem: “Yumi mas lukautim gut wokabaut bilong yumi yet, na bai pasin bilong dispela graun i no ken mekim yumi i kamap doti long ai bilong God.” Jisas i tok: “Kingdom bilong mi em i no bilong dispela graun,” olsem na ol disaipel tru bilong em “i no man bilong dispela graun.” (Jon 15:19; 18:36) Tasol olsem wanem long ol bikman na pris bilong ol kain kain lotu bilong dispela graun? Yu ting ol i no man bilong dispela graun? Ol i orait long Yunaitet Nesen. Long Oktoba 1986, planti bikman bilong ol i harim tok bilong pop na ol i go bung long Asisi, long Itali, bambai ol i ken beten wantaim na askim God long helpim wanpela wok bilong Yunaitet Nesen, em Yunaitet Nesen i bin makim yia 1986 i olsem “Intenesenel Yia Bilong Gutaim.” Tasol wok bilong ol i lus nating. No gat gutaim. Long dispela yia na long ol yia bihain, planti milion man i bin bagarap long ol pait. Ol pris pasto i save pren wantaim ol lain politik bambai ol i ken helpim ol.—Jems 4:4.
8 Tasol Ol Witnes Bilong Jehova i kisim nem olsem wanpela lain Kristen i no save insait long ol wok politik na ol pait bilong dispela graun. Ol i strong long bihainim dispela pasin, maski ol i stap long wanem kantri o ol i bilong wanem lain. Ol Witnes i was gut tru long wokabaut bilong ol bambai “pasin bilong dispela graun i no ken mekim [ol] i kamap doti long ai bilong God.” Lotu bilong ol em dispela “lotu i stap stret na tru olgeta long ai bilong God.”—Jems 1:27, Baibel Phillips.
Ol Narapela Mak Bilong Lotu i Tru
9. Wanem namba 3 samting yumi mas mekim bilong lotu tru long God? Bilong wanem yumi mas mekim olsem?
9 Sapos pasin bilong mekim lotu i olsem pasin bilong “daun long wanpela bikpela man antap em i man bilong wokim na bosim olgeta samting long heven na long graun,” orait lotu i tru i mas kirapim man long lotuim God Jehova, em wanpela tasol i God tru. Lotu i tru i no save lainim ol man long tok hait bilong ol haiden, olsem God em i God Triwan. Lotu i tru i no save paulim tingting bilong ol man olsem; lotu i tru i helpim ol man long save long God tru. (Lo 6:4; 1 Korin 8:6) Ol man i lotu tru long God ol i mas kamapim nem bilong God long ol man, em Jehova, na ol i mas litimapim dispela nem, na nem bilong God i mas i stap long lain bilong ol. (Buk Song 83:18; Aposel 15:14) Krais Jisas i bin mekim olsem na ol i mas bihainim pasin bilong em. (Jon 17:6) Long nau ol Witnes Kristen Bilong Jehova tasol ol inapim dispela mak bilong lotu i tru.
10. Wanpela lotu i mas mekim wanem na bai em inap helpim ol man long i stap long nupela taim? Bilong wanem i olsem?
10 Aposel Pita i tok: “Long nem bilong Jisas wanpela tasol yumi olgeta manmeri bilong graun inap i stap gut. Em wanpela tasol God i bin makim bilong kisim bek yumi.” (Aposel 4:8-12) Olsem na lotu i tru i mas kirapim ol man long bilip long Krais na long ofa bilong em, na bai dispela lotu inap helpim ol man long abrusim bagarap na i stap long nupela taim God bai kamapim. (Jon 3:16, 36; 17:3; Efesus 1:7) Na em i mas helpim ol man i lotu tru long God long daun long Krais, em God i putim em i stap King na makim em i stap Hetpris.—Buk Song 2:6-8; Filipai 2:9-11; Hibru 4:14, 15.
11. Lotu i tru i mas i gat wanem as? Ol Witnes Bilong Jehova i kirapim ol man long mekim wanem long dispela samting?
11 Ol lo na tingting bilong ol man i no as bilong lotu i tru. As bilong en em ol tok dispela wanpela God tru i bin kamapim long ol man bambai ol i ken save long laik bilong em. Ol dispela tok i stap long Baibel. Sapos yumi no gat Baibel, bai yumi no inap save long God Jehova na long ol gutpela samting em i laik mekim, na yumi no inap save long Jisas na long ofa bilong em i olsem pe bilong baim bek yumi. Ol Witnes Bilong Jehova i save kirapim ol man long bilip tru long Baibel. Na wokabaut bilong ol yet long olgeta de i kamapim klia olsem ol i bilip tru olsem “spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi . . . na bilong stretim wokabaut bilong yumi.”—2 Timoti 3:16, 17.
Lotu i Tru i Mas Bosim Wokabaut Bilong Yumi
12. Yumi mas bilip na mekim wanem samting moa bambai yumi inap lotu tru long God? Lotu i tru i mas bosim wanem ol samting yumi mekim?
12 Jisas i tok: “God em i Spirit. Na ol man i lotu long em, ol i mas lotu long [spirit] na long pasin i tru.” (Jon 4:24) Lotu i tru, o pasin bilong lotu tru long God, i no olsem man i mas bihainim sampela pasin bilong mekim lotu, na long skin tasol i olsem em i givim bel long God. Nogat. Lotu i tru i samting bilong spirit o bilong bel, na bilip i as bilong en. (Hibru 11:6) Na dispela bilip i no ken i stap nating—em i mas kamapim ol gutpela wok. (Jems 2:17) Lotu i tru i sakim ol nupela tingting na pasin planti man i save laikim, na i holimpas ol lo bilong Baibel i makim stretpela pasin na klinpela tok ol man i mas mekim. (1 Korin 6:9, 10; Efesus 5:3-5) Ol man i lotu tru long God ol i save bihainim ol gutpela pasin em spirit bilong God i kirapim ol man long mekim. Ol i wok strong long bihainim ol dispela gutpela pasin insait long famili, na long ples wok, na long skul, na taim ol i malolo na painim gutpela amamas. (Galesia 5:22, 23) Ol Witnes Bilong Jehova i save wok strong bambai ol i no ken lusim tingting long tok bilong aposel Pol, em i tok: “Sapos yupela i kaikai na dring o yupela i mekim narapela samting, yupela i mas mekim dispela olgeta samting bilong givim biknem long God.” (1 Korin 10:31) Lotu bilong ol i no olsem sampela bilaspasin bilong lotu ol i save mekim. Nogat. Lotu bilong ol i bosim olgeta samting ol i mekim, olsem wokabaut bilong ol na sindaun bilong ol.
13. Man i laik lotu tru long God, i gat wanem ol wok em i mas mekim? Olsem wanem yumi inap save, ol Witnes Bilong Jehova i man bilong givim bel tru long lotu?
13 Ol man i lotu tru long God, i gat ol wok bilong God ol i mas mekim. Ol yet i mas beten, na ol i mas beten wantaim famili, na oltaim ol i mas stadi long Baibel na long ol buk bilong helpim ol long kisim save long ol tok bilong Baibel, na ol i mas i go long ol miting bilong lain Kristen tru. Bilong kirapim na pinisim miting, ol i save mekim singsing bilong litimapim nem bilong Jehova na ol i mekim beten. (Matyu 26:30; Efesus 5:19) Long ol dispela miting ol i kisim save long ol samting bilong God long rot bilong ol tok ol i harim, na long rot bilong ol askim na bekim long tok bilong sampela buk o nius em olgeta i save holim. Ol i save mekim ol dispela miting long ol gutpela Haus Kingdom i no gat ol bilas long en, na ol i save mekim ol miting bilong lotu tasol, olsem ol miting bilong kongrigesen, o bung bilong wokim marit, o bilong tingim man i dai pinis long taim bilong planim em. Ol Witnes Bilong Jehova i save tingim gut ol Haus Kingdom na ol bikpela Haus Kibung bilong ol, long wanem, ol i bin givim ol dispela haus long Jehova bilong mekim lotu na lotuim em. Haus Kingdom i no olsem haus klap bilong bung nating long en na painim amamas, olsem planti haus lotu bilong ol misin i gat nem Kristen.
14. Ol manmeri i save mekim tok Hibru ol i ting olsem wanem long pasin bilong lotuim God? Ol Witnes Bilong Jehova long nau ol i mekim wanem wok na dispela i makim ol i narapela kain tru long ol narapela lotu?
14 Ol saveman i ting, hap tok Grik ol i tanim olsem “lotu” em i poromanim wanpela tok ol i tanim olsem “mekim wok bilong wanpela man.” Na hap tok Hibru (’avo·dhahʹ) ol i tanim olsem “lotu,” dispela tu i makim pasin bilong “mekim wok bilong wanpela man.” (Kisim Bek 3:12; 10:26) Long tingting bilong ol Hibru, pasin bilong lotu long God em pasin bilong mekim wok bilong God. Na ol man i lotu tru long God long nau, ol i gat wankain tingting. Wanpela bikpela mak bilong ol man i lotu tru long God, em olsem: Ol i save insait long wok bilong autim tok. Ol i save “autim dispela gutnius bilong kingdom . . . long olgeta hap bilong graun.” (Matyu 24:14; Aposel 1:8; 5:42) Long olgeta hap bilong graun, yu ting ol manmeri bilong wanem lotu ol i kisim nem olsem ol man bilong autim tok bilong Kingdom bilong God na tokaut olsem dispela Kingdom tasol inap helpim ol man?
Em i Helpim Ol Long Stap Wanbel
15. Wanem samting i wanpela bikpela mak bilong ol man i lotu tru long God?
15 Lotu giaman i save brukim ol man i stap narapela narapela lain. Em i bin kirapim ol man long mekim pasin birua na kilim i dai ol narapela man. Na lotu giaman i mekim yet dispela pasin. Tasol lotu i tru i helpim ol man long pas gut wantaim na i stap wanbel. Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Ol Witnes Bilong Jehova i save laikim tru ol wanlotu bilong ol, olsem na ol i pas gut wantaim, maski ol i bilong kain kain lain na sindaun na skin, em ol dispela samting i save mekim na ol narapela manmeri i bruk bruk. Ol Witnes “i sanap strong na i stap wanbel, na long wanpela tingting tasol [ol] i wok wantaim bilong kirapim ol manmeri long bilip long gutnius.”—Filipai 1:27.
16. (a) Ol Witnes Bilong Jehova i autim wanem “gutnius”? (b) Truim bilong wanem ol tok profet i kamap long lain bilong Jehova? Olsem na ol i bin kisim wanem ol blesing?
16 Dispela “gutnius” ol i autim em olsem: Liklik taim tasol na bai God i kamapim laik bilong em. Bai ol man “long graun” i bihainim laik bilong em, olsem ol lain “long heven” i save mekim. (Matyu 6:10) Bikpela nem bilong God Jehova bai kamap holi, na graun bai kamap olsem gutpela ples paradais, na ol man i lotu tru long God bai ol inap i stap oltaim long en. (Buk Song 37:29) Long nau planti milion manmeri bilong olgeta hap ol i kam bung wantaim ol Witnes Bilong Jehova na i tok: “Mipela i harim olsem God i stap wantaim yupela . . . Olsem na mipela i laik kamap wanlain wantaim yupela.” (Sekaraia 8:23) Jehova i mekim gut long lain bilong em—“lain i liklik tru” ol i kamap “planti moa.” Ol i kamap wanpela bikpela lain i stap long olgeta hap bilong graun na ol i stap wanbel tru long tingting, na long wok, na long lotu. (Aisaia 60:22) No gat wanpela lotu giaman i bin helpim ol man long i stap wanbel olsem; ol i no inap mekim.
Lotu i Tru i Win
17. Wanem samting bai painim Bikpela Babilon? Dispela samting bai kamap olsem wanem?
17 Baibel i tok profet olsem olgeta lotu giaman bai bagarap. Long tok piksa Baibel i kolim nem long ol olsem “Bikpela taun Babilon.” Na Baibel i stori long ol kom bilong wanpela wel animal bilong makim ol “king” o hetman politik bilong graun. Baibel i tok, God bai putim wanpela tingting long bel bilong ol dispela bos bilong graun bilong kirapim ol long birua long dispela olgeta lotu giaman Satan i bin kamapim, em ol i olsem wanpela pamukmeri, na bai ol i bagarapim ol olgeta.—Lukim Kamapim Tok Hait 17:1, 2, 5, 6, 12, 13, 15-18.b
18. Baibel i kolim wanem bikpela samting i olsem as na Bikpela Babilon i mas bagarap? Wanem taim lotu giaman i bin kirap bihainim dispela pasin nogut tru i gat bikpela asua long en?
18 Bilong wanem i stret “Bikpela taun Babilon” i mas bagarap? Baibel i bekim dispela askim olsem: “God i lukim dispela taun i gat asua bilong kilim i dai ol profet na ol manmeri bilong [God]. Na olgeta man bilong graun ol birua i bin kilim ol i dai, asua bilong dispela tu em i stap long Babilon tasol.” (Kamapim Tok Hait 18:24) Dispela asua bilong ol lotu giaman long blut bilong ol man em bilong bipo yet, taim taun Babilon i no kamap yet. Jisas i makim olsem taim em i krosim ol bikman bilong lotu Juda, em dispela lotu i pas pinis long Bikpela Babilon. Jisas i tok: “Yupela snek nogut. God bai i kotim yupela na bai yupela i go long [Gehena]. . . . [long wanem] asua bilong olgeta man i bin kilim i dai ol stretpela man i bin i stap long dispela graun, dispela asua em bai i stap long yupela tasol. Ol i bin kilim i dai ol stretpela man, stat long Abel.” (Matyu 23:33-35) Tru tumas, lotu giaman i bin kamap long graun taim pasin bikhet i kamap long Iden, na lotu giaman i bin mekim pasin nogut tru—em i gat bikpela asua moa yet long blut bilong ol man.
19, 20. (a) Taim God i bekim pinis pe nogut long Bikpela Babilon, ol man i lotu tru long God bai mekim wanem? (b) Wanem samting bai kamap bihain long dispela? Na bai olgeta man i lotu tru long God ol inap mekim wanem?
19 Taim Bikpela Babilon i bagarap pinis, ol lain long heven bai mekim singsing, na ol man i lotu tru long God long graun ol bai singsing wantaim ol. Bai ol i tok: “Yumi litimapim nem bilong God! . . . God i bekim pe nogut long [dispela pamukmeri].”—Kamapim Tok Hait 19:1-3.
20 Bihain olgeta narapela hap bilong lain bilong Satan long dispela graun bai ol i bagarap. (Kamapim Tok Hait 19:17-21) Na bihain long dispela, man bilong kamapim olgeta lotu giaman, em Satan, wantaim ol spirit nogut i bihainim em, ol bai kalabus long hul i no gat as. Bai ol i no inap mekim nogut moa long ol man i lotu tru long Jehova. (Kamapim Tok Hait 20:1-3) Lotu i tru bai i win. Ol manmeri i stap gut long God na ol i bihainim tok lukaut bilong em na ranawe lusim Bikpela Babilon nau, bai ol inap abrusim bagarap na i stap long nupela taim God bai kamapim. Long dispela nupela taim bai ol inap mekim lotu i tru oltaim oltaim—bai ol inap lotu long Jehova na mekim wok bilong em long olgeta taim bihain.
[Ol Futnot]
a Wastaua (tok Inglis) bilong Julai 15, 1985, pes 12, 13.
b Lukim sapta 33-36 long buk (tok Inglis) Revelation—Its Grand Climax At Hand!
Yu Inap Tingim?
◻ Tingting bilong husat long lotu em i bikpela samting? Bilong wanem i olsem?
◻ Jems i kolim wanem tupela samting ol man i mas mekim bilong lotu tru long God?
◻ I gat wanem ol narapela samting ol man i mas mekim bilong lotu tru long God?
◻ Ol Witnes Bilong Jehova i autim wanem “gutnius”?
◻ Olsem wanem lotu i tru bai i win?
1. Wanpela buk i tok wanem long pasin bilong mekim lotu? I stret husat i ken makim wanem lotu i tru na wanem lotu i giaman?
[Piksa long pes 17]
Ol bikman bilong lotu i bung long Itali, long Oktoba 1986
[Piksa long pes 19]
Ol man i laik lotu tru long God ol i mas bung wantaim bilong lotuim em