“Yupela i Mas i Go Klostu Tru Long God”

“Yupela i mas i go klostu tru long God, na em bai i kam klostu tru long yupela.”​—⁠JEMS 4:⁠8.

1, 2. (a) Planti manmeri i save tok wanem? (b) Jems i bin tokim ol Kristen long mekim wanem? I gat wanem as na em i mas givim dispela tok long ol?

“GOD i stap wantaim yumi.” Dispela tok i bin stap long ol plak samting bilong kantri na long ol yunifom bilong ol ami tu. Dispela tok, “Mipela bilip strong long God,” ol man i bin putim long planti toea na pepa mani bilong nau. Planti manmeri i save tok ol i pas gut wantaim God. Tasol bilong pas gut long God tru tru, i gat planti samting moa man i mas mekim​—⁠em i no ken toktok tasol long dispela samting o kamapim tasol wanpela rait bilong ol man i ken lukim.

² Baibel i soim olsem i gat rot long pas gut wantaim God. Tasol man i mas mekim sampela wok. Long taim bilong ol aposel, sampela Kristen God i bin makim ol tu i mas wok strong long pas gut wantaim God Jehova. Wasman Kristen, Jems, em i mas givim tok lukaut long sampela long ol laik nogut bilong skin bilong ol, na long ol i no stap klin long samting bilong spirit. Taim em i givim dispela tok lukaut, em i strong olsem: “Yupela i mas i go klostu tru long God, na em bai i kam klostu tru long yupela.” (Jems 4:​1-12) Jems i gat wanem tingting taim em i tok “go klostu”?

3, 4. (a) Ating tok bilong Jems long “go klostu tru long God” i bin kirapim ol man long taim bilong ol aposel long pilim tru wanem samting? (b) I gat wanem as na yumi ken save gut olsem i gat rot bilong i go klostu long God?

³ Jems i kamapim wanpela tok ol man i ritim pas bilong em bai i save gut long en. Lo Bilong Moses i stori long ol samting ol pris i mas mekim bilong “kam klostu” long Jehova na bai ol i ken helpim ol lain bilong em. (Kisim Bek 19:22) Ating dispela i helpim ol man i ritim ol tok bilong Jems long pilim tru olsem ol i no ken tingim pasin bilong go klostu long Jehova i olsem samting nating. Jehova em i gat nambawan biknem long heven na graun.

⁴ Tasol wanpela saveman bilong Baibel i tok, “dispela tok [long Jems 4:8] i kamapim klia wanpela gutpela samting.” Jems i save olsem em pasin bilong Jehova long singautim ol man i gat sin long kam klostu long em. (2 Stori 15:⁠2) Ofa bilong Jisas i bin opim rot na bai ol man i ken go klostu moa long Jehova. (Efesus 3:​11, 12) Long nau rot i op bilong planti milion i ken go klostu long Jehova! Tasol olsem wanem bai yumi mekim dispela gutpela samting? Bai yumi skelim tripela rot bilong yumi ken i go klostu long God Jehova.

Wok Yet Long “Kisim Save” Long God

5, 6. Olsem wanem stori bilong liklik Samuel i kamapim klia ol samting man i mas mekim bilong “wok long kisim save” long God?

⁵ Long Jon 17:3 (NW ), Jisas i tok: “Bilong kisim laip i stap oltaim oltaim, ol i mas wok long kisim save long yu, yu wanpela tasol yu God tru, na long man yu bin salim i kam, em Jisas Krais.” Long planti narapela Baibel ol i tanim tok bilong dispela ves i narapela kain liklik long tok ol i tanim long Baibel New World Translation. Ol i no tok “wok long kisim save” long God, ol i tanim olsem man i mas “save” long God. Tasol planti saveman i tok dispela tok Grik i gat bikpela insait moa bilong en​—⁠em i stori long samting man i mas mekim i go i go, na dispela inap helpim em long pas gut tru long narapela.

⁶ Wok bilong save gut tru long God i no wanpela nupela tingting i kamap long taim bilong Jisas. Olsem: Insait long Ol Skripsa Hibru yumi lain olsem taim Samuel em i wanpela liklik pikinini, em “i no save gut long Bikpela.” (1 Samuel 3:⁠7) Yu ting dispela i makim olsem Samuel i bin i gat liklik save tasol long God? Nogat. Yumi save, papamama bilong em na ol pris ol i bin skulim em long planti samting. Tasol, olsem wanpela saveman i kamapim, tok Hibru ol i yusim long dispela ves em “inap makim tu pasin bilong pas gut tru long narapela.” Long dispela taim Samuel i no bin save gut tru long Jehova olsem em bai save long em long bihain taim em i stap olsem mausman bilong Jehova. Taim Samuel i wok long go bikpela, em i bin save moa long Jehova, na pas gut wantaim em olsem tupela pren i pas gut wantaim.​—⁠1 Samuel 3:​19, 20.

7, 8. (a) Bilong wanem yumi no ken pret long ol strongpela tok bilong Baibel? (b) Wanem sampela strongpela tok tru i gutpela long yumi ken stadi long en?

⁷ Olsem wanem? Yu wok long kisim save long Jehova na bai yu inap pas gut tru wantaim em? Bilong mekim olsem, yu mas “laikim tumas” ol kaikai bilong spirit God i givim long yumi. (1 Pita 2:⁠2) No ken amamas long kisim ol bikpela tok tasol bilong Baibel. Wok long kisim save long sampela strongpela tok bilong Baibel. (Hibru 5:​12-14) Olsem wanem? Yu pret long ol strongpela tok olsem, na yu ting ol i hatwok tumas long save long en? Sapos olsem, yu mas tingim Jehova olsem Man bilong skulim yumi. (Aisaia 30:20) Na em i save long ol samting em i mas mekim bilong helpim ol man i no gutpela olgeta long kisim ol strongpela tok tru. Na em i ken blesim hatwok bilong yu long kisim save long ol samting em i skulim yu long en.​—⁠Song 25:⁠4.

⁸ I gutpela long skelim yu yet, olsem yu save long sampela ol “tingting hait bilong God” o nogat. (1 Korin 2:10) Dispela i no makim ol tok em ol saveman o hetman bilong lotu tasol bai i gat laik long stori long en. Em ol tok i gutpela long helpim yumi, na ol i helpim yumi long save gut moa long bel na tingting bilong Papa bilong yumi. Olsem: Pe bilong baim bek man, na “tok hait bilong God,” na ol kontrak Jehova i bin mekim wok long en long blesim ol manmeri bilong em na kamapim ol samting em i tingting pinis long mekim​—⁠ol dispela tok wantaim planti narapela tok olsem, ol i gutpela samting tru bilong stadi long en.​—⁠1 Korin 2:⁠7.

9, 10. (a) Bilong wanem pasin antap inap bagarapim man? Wanem samting bai helpim yumi long abrusim dispela pasin? (b) Bilong wanem save bilong Jehova i mas kirapim yumi long mekim pasin daun?

⁹ Taim save bilong yu long ol strongpela tok bilong spirit i go bikpela moa, was gut long hevi em bikpela save inap kamapim​—⁠em pasin antap. (1 Korin 8:⁠1) Pasin antap inap bagarapim man, long wanem, God i stap longwe long man i gat pasin antap. (Sindaun 16:5; Jems 4:⁠6) I no gat as na man i hambak long save bilong em. Tingim tok bilong wanpela buk bilong skelim ol samting i no longtaim ol man i kamapim long rot bilong saiens, em buk i tok: “Save mipela i kisim i kamapim klia olsem i gat planti samting moa yet mipela i no save long en. . . . Olgeta samting mipela i lainim pinis i olsem samting nating taim yumi skelim wantaim ol samting yumi gat wok yet long kisim save long en.” Pasin daun olsem tok hia i kamapim em i gutpela na i narapela kain. Orait, taim yumi tingim nambawan gutpela save man inap kisim​—⁠em save long God Jehova​—⁠i gat as tru na yumi mas bihainim pasin daun. Bilong wanem i olsem?

¹⁰ Tingim sampela tok bilong Baibel i stori long Jehova. “Tingting bilong yu i bikpela tru.” (Song 92:⁠5) “Yumi no inap makim save bilong en.” (Song 147:⁠5) “I no gat man inap long save long olgeta tingting bilong em.” (Aisaia 40:28) “Olaman! Ol gutpela pasin bilong God na tingting na save bilong en i pulap tru.” (Rom 11:33) Ol dispela tok i kamapim klia olsem, bai i no gat wanpela taim bihain na yumi bai save long olgeta samting bilong Jehova. (Saveman 3:11) Em i bin skulim yumi long planti gutpela samting, tasol inap oltaim oltaim bai i gat sampela save moa yumi mas kisim. Dispela i mekim yumi i amamas, na tu, em i kirapim yumi long mekim pasin daun. Olsem na yumi mas mekim wok long save yumi kisim bilong go klostu moa long Jehova na bilong helpim ol narapela tu long mekim olsem​—⁠save bilong yumi i no ken stap olsem rot bilong litimapim yumi yet na daunim ol narapela, nogat tru.​—⁠Matyu 23:12; Luk 9:⁠48.

Kamapim Olsem Yu Laikim Tru Jehova

11, 12. (a) Save yumi kisim long Jehova i mas mekim wanem long yumi? (b) Wanem samting i soim olsem pasin bilong man long laikim tru Jehova em i samting tru na i no giaman?

¹¹ Aposel Pol i soim olsem save na pasin bilong laikim tru narapela, tupela i wok wantaim. Em i tok: “Oltaim mi save prea olsem, pasin bilong laikim tru ol arapela em i ken kamap strong moa long laip bilong yupela, na bai yupela i gat planti save, na tingting bilong yupela i ken kamap klia tru.” (Filipai 1:⁠9) Olgeta tok tru yumi lainim long samting bilong Jehova na long ol samting em i tingting pinis long mekim, dispela i no ken mekim yumi i hambak, nogat, em i mas mekim pasin bilong yumi long laikim tru Jehova i go bikpela moa.

¹² Planti man i tok olsem ol i laikim tru God, tasol tru tru i no olsem. Ating ol i bilip tru long samting ol i pilim long bel. Na samting ol i pilim long bel i gutpela sapos stretpela save i as bilong en. Tasol samting man i pilim long bel i no makim olsem em i laikim tru God. I gat wanem as na mipela i tok olsem? Tingim insait bilong dispela tok “laikim tru,” olsem Baibel i kamapim: “Sapos yumi laikim tru God, orait yumi save bihainim ol lo bilong en.” (1 Jon 5:⁠3) Olsem na pasin bilong laikim tru God em i samting tru taim man i kamapim long rot bilong bihainim tok.

13. Olsem wanem pasin bilong pret long Jehova bai helpim yumi long kamapim olsem yumi laikim em tru?

¹³ Pasin bilong pret long Jehova bai helpim yumi long bihainim tok bilong em. Dispela pasin bilong pret o rispek na pilim tru biknem bilong Jehova i kam long rot bilong kisim save long em, na save olsem em i holi tru, na em i gat biknem tru, na bikpela strong, na stretpela pasin, na gutpela tingting na save, na pasin sori. Man i mas pret long God bilong go klostu long em. Tingim tok bilong Song 25:14: “God em i pren tru bilong ol manmeri i save stap aninit [“pret,” NW ] long em.” Olsem na sapos yumi pret long mekim samting i bagarapim bel bilong Papa long heven, orait yumi inap i go klostu long em. Pasin bilong pret long God bai helpim yumi long bihainim tok i stap long Sindaun 3:6: “Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” Wanem mining bilong dispela tok?

14, 15. (a) Wanem sampela samting yumi gat wok long skelim long olgeta de? (b) Olsem wanem ol samting yumi mekim inap kamapim olsem yumi pret long God?

¹⁴ Long olgeta de yu gat wok long makim ol bikpela samting na ol liklik samting yu bai mekim. Olsem: Bai yu toktok wantaim ol wanwok, wanskul, na ol man i sindaun klostu long yu long wanem ol samting? (Luk 6:45) Bai yu givim bel long mekim ol wok bilong yu, o bai yu givim hap bel tasol long mekim? (Kolosi 3:23) Bai yu mekim ol samting bilong pas gut moa wantaim ol man i no laikim tru Jehova, o bai yu wok long strongim pasin bilong pas gut wantaim ol manmeri i tingim ol samting bilong spirit? (Sindaun 13:20) Long ol liklik samting tu, bai yu mekim wanem bilong helpim ol wok bilong Kingdom? (Matyu 6:33) Sapos ol stiatok bilong Baibel olsem paragraf i kamapim i stiaim tingting bilong yu long ol samting yu mas skelim long olgeta de, orait i olsem yu tingim laik bilong Jehova “long olgeta samting yu mekim.”

¹⁵ Olsem na long olgeta samting yumi mekim, dispela tingting i mas stiaim yumi: ‘Jehova i laik bai mi mekim wanem? Mi ken mekim wanem bilong givim bikpela amamas moa long em?’ (Sindaun 27:11) Taim yumi kamapim pasin bilong pret long God olsem, dispela em i nambawan rot bilong soim olsem yumi laikim tru Jehova. Na tu, pasin bilong pret long God bai helpim yumi long i stap klin​—⁠long samting bilong spirit, long wokabaut bilong yumi, na long skin. Tingim, long wankain ves Jems i bin tok long “go klostu long God,” em i tok tu olsem: “Yupela man bilong sin, bel bilong yupela i mas kamap klin, olsem man i wasim han bilong en na i kamap klin.”​—⁠Jems 4:⁠8.

16. Wok bilong givim samting long Jehova i no save mekim wanem? Tasol em i kamapim wanem samting?

¹⁶ Tasol bilong kamapim olsem yumi laikim tru Jehova, i gat sampela samting moa yumi mas mekim​—⁠i no bilong abrusim tasol ol pasin nogut. Pasin bilong laikim tru God i save kirapim yumi long mekim ol samting i stret. Olsem: Pasin bilong Jehova long givim yumi olgeta gutpela samting i save kirapim yumi long mekim wanem? Jems i tok: ‘Olgeta gutpela samting yumi save kisim na olgeta presen i gutpela tru, em olgeta i save kam long Papa long heven i bin mekim i kamap olgeta lait bilong skai.’ (Jems 1:17) Tru, taim yumi givim ol samting bilong yumi i go long Jehova, i no olsem yumi helpim em long kisim planti samting moa. Graun wantaim olgeta gutpela samting i stap long en i bilong em tasol. (Song 50:12) Na taim yumi lusim hap taim na strong bilong yumi i go long Jehova, i no olsem yumi inapim sampela wok em yet i no inap mekim. Sapos yumi tok nogat long autim gutnius bilong Kingdom, em inap mekim ol ston i tokaut! Olsem na bilong wanem yumi givim ol mani samting, taim, na strong bilong yumi i go long Jehova? Namba wan samting, em yumi kamapim olsem yumi laikim tru Jehova long bel, long tingting, na strong bilong yumi.​—⁠Mak 12:​29, 30.

17. Wanem samting inap kirapim yumi long amamas long givim ol samting long Jehova?

¹⁷ Taim yumi givim samting long Jehova, yumi mas amamas na mekim, long wanem, “God i save laikim man i amamas na i givim samting long laik bilong em yet.” (2 Korin 9:⁠7) Stiatok em Lo 16:17 i kamapim inap helpim yumi long amamas long givim ol samting, em i tok: “Yupela i mas tingim God i bin givim planti gutpela samting long yupela. Olsem na yupela i mas skelim sampela na givim long em.” Taim yumi tingim ol gutpela samting Jehova i bin givim long yumi, dispela i kirapim laik bilong yumi long givim ol samting long em. Kain pasin olsem bilong givim ol samting i save mekim em i amamas, wankain olsem wanpela liklik presen pikinini i givim long papa o mama na i mekim ol i amamas. Dispela kain pasin bilong kamapim olsem yumi laikim tru Jehova, em bai helpim yumi long go klostu long em.

Go Klostu Moa Long Rot Bilong Beten

18. Bilong wanem i gutpela long lusim hap taim long skelim olsem wanem yumi ken mekim beten bilong yumi i kamap gutpela moa?

¹⁸ Beten bilong yumi yet i gutpela rot tru bilong yumi ken kamapim long Papa bilong yumi long heven ol tok yumi no laik bai ol narapela i save long en. (Filipai 4:⁠6) Beten em i bikpela samting tru bilong helpim yumi long go klostu long Jehova, olsem na i stret yumi lusim hap taim long skelim ol beten bilong yumi, i gutpela o olsem wanem. I no olsem beten i mas i stap nambawan gutpela piksa long pasin bilong toktok o long pasin bilong kamapim ol tok long hap stret bilong en. Tasol ol tok yumi mekim long beten i mas kamapim tru ol samting i stap long bel bilong yumi. Yumi ken mekim wanem na bai beten bilong yumi i ken kamap gutpela moa?

19, 20. Bilong wanem em i gutpela long tingim tingim long bel ol samting paslain long yumi beten? Wanem sampela tok i stret yumi ken tingim tingim olsem?

¹⁹ I gutpela long tingim tingim long bel ol samting paslain long yumi beten. Sapos yumi mekim dispela samting pastaim, yumi inap beten na kamapim stret ol samting na yumi inap kamapim ol samting i gat as tru bilong en. Dispela bai helpim yumi long abrusim pasin bilong kolim ol wankain tok oltaim, em yumi ting yumi inap kolim gut na ol i kamap wantu tasol long tingting bilong yumi. (Sindaun 15:​28, 29) Sapos yumi tingim gut ol bikpela tok Jisas i bin kamapim long bikpela beten bilong em na tingim olsem wanem dispela tok i stret long sindaun bilong yumi, ating dispela bai helpim yumi. (Matyu 6:​9-13) Olsem: Yumi inap askim yumi yet long wanem liklik wok samting yumi laik insait long en bilong mekim laik bilong Jehova hia long graun. I gutpela long kamapim laik bilong yumi long Jehova olsem yumi laik mekim ol wok bilong em yumi yet inap long mekim, na askim em long helpim yumi long inapim ol wok em i givim long yumi. Olsem wanem? Yumi tingting planti long ol samting bilong skin yumi mas i gat? Yumi bin mekim wanem ol sin na God i mas lusim tingting long en, na wanem man em yumi yet i mas strong moa long lusim tingting long ol rong bilong em? Wanem ol traim i givim hevi long yumi? Yumi save olsem em i bikpela samting tru long Jehova i mas lukautim yumi na bai dispela traim i no ken pundaunim yumi?

²⁰ Na tu, ating yumi inap tingim sampela manmeri yumi save long ol na Jehova i mas helpim ol. (2 Korin 1:11) Tasol yumi no ken lusim tingting long pasin bilong tok tenkyu. Sapos yumi wokim tingting bilong yumi, yumi inap tingim ol samting i olsem as na yumi ken tok tenkyu long Jehova na litimapim nem bilong em long ol gutpela samting em i save mekim long olgeta de. (Lo 8:10; Luk 10:21) Pasin bilong mekim olsem i kamapim narapela gutpela samting​—⁠em i ken helpim yumi long kisim pasin bilong stap amamas na tingim ol gutpela samting i laik kamap.

21. Pasin bilong skelim gut wanem ol stori bilong Baibel inap helpim yumi long taim yumi beten long Jehova?

²¹ Stadi tu i ken helpim ol beten bilong yumi long kamap gutpela moa. Long Baibel i gat ol gutpela beten tru bilong ol man na meri i gat strongpela bilip. Ating wanpela samting i laik givim hevi long yumi, na dispela samting i mekim na yumi tingting planti o pret, nogut yumi yet o sampela long famili bilong yumi bai bagarap. Sapos olsem, yumi ken ritim beten bilong Jekop long taim em i laik bungim brata bilong em i gat pasin bilong bekim rong, em Iso. (Stat 32:​9-12) O yumi ken skelim beten bilong King Asa taim wan milion soldia bilong Itiopia i kam pait long ol manmeri bilong God. (2 Stori 14:​11, 12) Sapos yumi tingting planti long wanpela hevi i laik bagarapim gutnem bilong Jehova, orait i gutpela long tingim beten Elaija i kamapim long ai bilong ol man i lotu long god Bal long maunten Karmel, na beten bilong Nehemia long taun Jerusalem i bagarap i stap. (1 King 18:​36, 37; Nehemia 1:​4-11) Taim yumi ritim na tingim tingim long bel ol beten olsem, dispela i ken strongim bilip bilong yumi na givim sampela tingting long yumi long olsem wanem yumi ken toktok wantaim Jehova long ol samting i givim hevi long yumi.

22. Wanem yia-teks bilong yumi bilong 2003? Sampela sampela taim namel long dispela yia i gutpela yumi givim wanem askim long yumi yet?

²² I no gat wanpela gutpela wok long mekim o gutpela mak bilong winim i bikpela moa long wok bilong bihainim tok bilong Jems na “go klostu long God.” (Jems 4:⁠8) Yumi ken mekim olsem long rot bilong kisim bikpela save moa long God, na kamapim moa yet olsem yumi laikim em tru, na go klostu moa long em long taim yumi beten. Long yia 2003, taim yumi tingim tok bilong Jems 4:8 olsem yia-teks bilong yumi, yumi laik skelim yumi yet olsem tru tru yumi wok long go klostu moa long Jehova o nogat. Tasol olsem wanem long namba tu hap bilong dispela ves? Jehova bai mekim wanem bilong “kam klostu tru long yupela,” na dispela bai kamapim wanem ol gutpela samting? Stori i kamap bihain long dispela bai kamapim dispela samting.

“Em Bai i Kam Klostu Tru Long Yupela”

“[God] i no i stap longwe long yumi olgeta wan wan.”​—⁠APOSEL 17:⁠27.

1, 2. (a) Taim yumi lukluk i go antap long ol sta, yumi tingim wanem askim long Man bilong wokim yumi? (b) Olsem wanem Baibel i helpim yumi long save olsem Jehova i no tingim ol manmeri i olsem samting nating?

YU BIN lukluk i go antap long ol sta long nait na amamas tru long ol samting yu lukim? Namba bilong ol sta na hap ol sta i stap long en i traipela tru, na dispela i kirapim tru tingting bilong yumi. Insait long traipela hap ol sta samting i stap long en, graun yet i stap olsem wanpela liklik hap das tasol. Yu ting dispela i makim olsem Man bilong wokim yumi, em “God Antap Tru,” em i stap antap tumas na em i no ken tingim ol manmeri bilong graun o em i stap longwe tumas na i no gat rot bilong ol man i ken save long em?​—⁠Song 83:⁠18.

² Baibel i helpim yumi long save olsem Jehova i no tingim ol manmeri i olsem samting nating. Baibel i kirapim yumi long kam long em, na i tok: “Em i no i stap longwe long yumi olgeta wan wan.” (Aposel 17:27; 1 Stori 28:⁠9) Sapos yumi mekim ol samting bilong go klostu long God, orait em bai tingim hatwok bilong yumi. Em bai mekim wanem? Tok bilong yia-teks bilong 2003 i bekim dispela askim olsem: “Em bai i kam klostu tru long yupela.” (Jems 4:⁠8) Orait nau yumi ken stori long sampela gutpela blesing Jehova i amamas long givim long ol man i stap klostu long em.

Wanpela Presen Jehova i Givim

 3. Jehova i save givim wanem presen long ol man i go klostu long em?

³ Namba wan samting i olsem, ol wokboi bilong Jehova i holim wanpela gutpela presen Jehova i givim long ol manmeri bilong em tasol. Bikpela namba, planti mani, na bikpela skul man inap kisim long dispela graun i no inap helpim em long kisim dispela presen. Em wanpela presen i go long man yet, na Jehova i givim long ol man i stap klostu long em, na ol narapela nogat. Presen hia em i wanem samting? Baibel i bekim dispela askim olsem: ‘Yu mas askim gutpela tingting na save long kam long yu. Na yu mas wok hat long painim gutpela tingting, olsem man i wok long painim silva ol i bin haitim insait long graun na olsem man i wok long painim mani samting ol i bin haitim. Sapos yu mekim ol dispela samting, orait bai yu save tru long pasin bilong stap aninit long Bikpela, na bai yu save gut long God. Long wanem, Bikpela yet i save givim gutpela tingting na save long yumi.’ (Sindaun 2:​3-6) Man! Tingim dispela: Ol manmeri em sin i stap long skin bilong ol, ol inap “save gut long God”! Dispela presen​—⁠em ol save i stap long Baibel⁠—em i olsem samting i dia tumas “ol i bin haitim.” I gat wanem as na Baibel i tok olsem?

4, 5. I gat wanem as na yumi ken tok pasin bilong “save gut long God” i olsem samting i dia tumas “ol man i bin haitim”? Stori long dispela samting.

⁴ Wanpela as i olsem: Pasin bilong save gut long God em i samting i dia tumas. Nambawan gutpela samting tru yumi kisim long dispela save, em yumi gat rot long kisim laip oltaim. (Jon 17:⁠3) Tasol dispela save i helpim sindaun bilong yumi long nau tu. Olsem: Yumi bin stadi gut long Baibel na long dispela rot yumi bin kisim save long bekim bilong ol bikpela askim olsem: Wanem nem bilong God? (Song 83:​18, NW ) Ol man i dai ol i stap olsem wanem? (Saveman 9:​5, 10) God i tingting pinis long mekim wanem samting long dispela graun na long ol manmeri? (Aisaia 45:18) Na tu, yumi kisim save long nambawan gutpela rot long bihainim​—⁠em long bihainim ol gutpela tok i stap long Baibel. (Aisaia 30:​20, 21; 48:​17, 18) Olsem na yumi gat ol gutpela tok bilong helpim yumi long karim ol hevi na long wokabaut long rot i helpim yumi long stap amamas tru na stap bel gut. Tasol nambawan bikpela samting i olsem, pasin bilong stadi long Baibel i opim rot long yumi ken kisim save long ol gutpela pasin bilong Jehova na go klostu long em. I no gat narapela samting i winim pasin bilong pas gut long Jehova, long wanem, yumi “save gut long God.”

⁵ I gat narapela as na pasin bilong save gut long God i olsem samting i dia tumas “ol i bin haitim.” Olsem ol narapela samting i dia tumas, i no gat planti man i holim dispela pasin. I gat 6 bilion man i stap long dispela graun, na 6 milion samting bilong ol i lotuim Jehova, o yumi ken tok sapos i gat 1,000 man i stap, orait wanpela tasol bilong ol i “save gut long God.” Bilong soim olsem pasin bilong save long tok tru bilong Baibel em i olsem samting i dia tumas, tingim wanpela askim tasol bilong Baibel: Wanem samting i save painim ol man long taim ol i dai? Tok bilong Baibel i helpim yumi long save olsem man i dai pinis em i tanim i kamap graun gen na em i no inap mekim wanpela samting. (Song 146:⁠4) Tasol bilip giaman olsem i gat samting i stap insait long skin bilong man na dispela samting i stap yet bihain long man i dai, em wanpela bilip bilong planti lotu bilong dispela graun. Em bikpela bilip bilong ol lotu bilong Kristendom. Na dispela bilip i stap tu insait long lotu Buda, Hindu, Islam, Jain, Juda, Sik, Sinto, na Tau. Tingim​—⁠dispela wanpela tok giaman tasol i giamanim planti bilion manmeri!

6, 7. (a) Husat tasol inap kisim pasin bilong “save gut long God”? (b) Wanem samting i kamapim klia olsem Jehova i givim sampela save long yumi em “ol man i gat gutpela tingting na save” i no inap kisim?

⁶ Bilong wanem planti man moa i no bin kisim pasin bilong “save gut long God”? Long wanem, man i no inap kisim gut insait bilong tok bilong Baibel sapos God i no helpim em. Tingim, dispela save em i wanpela presen. Na Jehova i givim long ol man i amamas long skelim gut Baibel na bihainim pasin daun na pasin bilong bilipim tok tru bilong en. Ating ol dispela man ol i no stap “olsem saveman long ai bilong ol man bilong dispela graun.” (1 Korin 1:26) Long tingting bilong ol man bilong dispela graun, ating planti bilong ol i stap olsem lain ‘i no bin skul, na ol i man nating tasol.’ (Aposel 4:13) Tasol dispela i no bikpela samting. Jehova i givim yumi dispela pasin bilong “save gut long God,” long wanem, em i lukim ol gutpela pasin i stap long bel bilong yumi.

⁷ Tingim ol saveman bilong ol lotu bilong Kristendom. Planti bilong ol i bin wokim ol buk samting i kamapim insait bilong ol tok i stap long Baibel. Ol kain buk olsem inap stori long ol samting bilong bipo i stap olsem wanem, na mining bilong sampela tok Hibru na tok Grik, na sampela samting moa. Ol dispela saveman i bin lainim planti samting, tasol yu ting ol i bin kisim dispela pasin bilong “save gut long God”? Olsem wanem? Ol i save gut long as tok bilong Baibel, olsem Kingdom long heven bai kamapim klia olsem i stret God Jehova i stap nambawan Bos? Ol i save olsem God Jehova i no wanpela God Triwan? Yumi yet i stap narapela kain long ol, long wanem, yumi gat stretpela save long ol dispela samting. I gat wanem as na i olsem? Jehova i bin mekim gut long yumi na yumi save long ol tok i tru bilong Baibel, em ol tok planti “ol man i gat gutpela tingting na save” i no inap save long en. (Matyu 11:25) Tru tumas, Jehova i save givim ol gutpela samting tru long ol lain i stap klostu long em!

Jehova i Save Was Gut Long Ol Man i Laikim Em Tru

8, 9. (a) Devit i stori olsem wanem long narapela gutpela samting ol man i stap klostu long God ol i kisim? (b) I gat wanem as na God i mas lukautim ol Kristen tru?

⁸ Ol man i stap klostu long Jehova ol i kisim narapela gutpela samting​—⁠God i save lukautim ol. Devit i bin karim planti hevi, na long Buk Song em i tok: “Wanem ol manmeri i save bel tru na i singaut long em, em i save stap klostu long ol. Wanem ol manmeri i save pret long em, em i save givim ol samting long ol. Na em i save harim krai bilong ol na kisim bek ol. Em i save was gut long ol manmeri i save laikim em tru.” (Song 145:​18-20) Yes, Jehova i stap klostu long ol man i laikim em tru, olsem na kwiktaim em inap mekim sampela samting long taim ol i krai long em.

⁹ I gat wanem as na God i mas lukautim yumi? Wanpela samting em yumi karim hevi long i stap “long taim bilong las de,” na tu, nambawan birua bilong Jehova, em Satan, em i tingting strong long daunim ol Kristen tru. (2 Timoti 3:⁠1) Dispela birua em i strong long bagarapim yumi. (1 Pita 5:⁠8) Satan i mekim nogut long yumi, putim hevi long yumi, na traim yumi. Na em i save lukluk long ol pasin i kamapim klia tingting na bel bilong man na bai em i ken mekim wok long en. Bikpela laik bilong em i olsem: Em i laik daunim strong bilong bilip bilong yumi na bagarapim yumi long samting bilong spirit. (KTH 12:​12, 17) Em nau, yumi gat wanpela strongpela birua tru i laik daunim yumi, olsem na yumi amamas long save olsem Jehova em “i save was gut long ol man i laikim em tru.”

10. (a) Jehova i mekim wanem bilong lukautim lain bilong em? (b) Bikpela samting tru, em God i mas lukautim yumi long wanem samting? Na bilong wanem i olsem?

¹⁰ Tasol Jehova i mekim wanem bilong lukautim lain bilong em? Tok promis bilong em long lukautim yumi i no makim olsem yumi bai i no gat hevi long nau; na i no makim olsem em i mas wokim ol mirakel bilong helpim yumi. Tasol Jehova i save lukautim lain manmeri bilong em na bai dispela lain i no ken bagarap. Em i no ken larim Satan i pinisim lain manmeri bilong dispela graun i lotu tru long God! (2 Pita 2:⁠9) Bikpela samting moa em Jehova i save lukautim yumi long samting bilong spirit. Em i save givim yumi ol samting bilong helpim yumi long sanap strong na karim hevi na long stap gut wantaim em. Dispela em i bikpela samting moa long pasin bilong lukautim yumi long skin. Bilong wanem i olsem? Sapos yumi stap gut wantaim Jehova, i no gat wanpela samting​—⁠dai tu nogat​—⁠em inap bagarapim yumi inap oltaim oltaim.​—⁠Matyu 10:⁠28.

11. Jehova i bin kamapim wanem ol samting bilong lukautim lain bilong em long samting bilong spirit?

¹¹ Jehova i bin kamapim planti samting tru bilong lukautim ol man i stap klostu long em na bai ol i stap gut long samting bilong spirit. Long rot bilong Tok bilong em long Baibel em i save givim gutpela tingting na save long yumi bilong helpim yumi long winim ol kain kain traim. (Jems 1:​2-5) Pasin bilong bihainim ol gutpela tok i stap long Baibel i bikpela samting bilong helpim man long stap gut. Na tu, Jehova i save “givim Holi Spirit long ol man i askim em.” (Luk 11:13) Strong bilong Spirit Holi i winim olgeta narapela strong i stap long heven na long graun, olsem na em inap tru long helpim yumi long winim wanem wanem traim i save painim yumi. Long rot bilong Krais, Jehova i save givim ol man olsem “presen.” (Efesus 4:⁠8) Ol dispela man i winim ol mak bilong spirit, ol i wok strong long kamapim pasin sori bilong Jehova yet taim ol i helpim ol wanbilip bilong ol.​—⁠Jems 5:​14, 15.

12, 13. (a) Long wanem rot Jehova i save givim ol kaikai bilong spirit long yumi long taim stret? (b) Yu gat wanem tingting long ol samting Jehova i givim bilong helpim yumi long stap gut long spirit?

¹² Jehova i givim narapela samting tu bilong lukautim yumi: em ol kaikai bilong spirit long taim stret. (Matyu 24:45) Long rot bilong ol buk na nius​—⁠Wastaua na Kirap! tu​—⁠na ol miting, na kibung, Jehova i save givim yumi ol samting yumi mas i gat long taim stret. Olsem wanem? Yu inap tingim wanpela taim yu bin harim sampela tok long miting Kristen, o long wanpela kibung, na yu bin pilim tru dispela tok na em i bin strongim yu o mekim gut bel bilong yu? Yu bin ritim stori i stap long wanpela nius em yumi kolim pinis antap na yu pilim olsem ol i raitim dispela bilong helpim yu stret?

¹³ Wanpela samting Satan i yusim bilong daunim man na i save wok gut tru, em pasin bilong stap bel hevi, na i no gat wanpela man i no save bel hevi sampela taim. Satan i save olsem pasin bilong stap bel hevi longpela taim inap daunim strong bilong yumi, na i isi moa long yumi pundaun. (Sindaun 24:10) Satan i laik mekim wok long dispela pasin bilong stap bel hevi, olsem na yumi mas i gat helpim. Sampela taim nius Wastaua na Kirap! i kamapim ol stori i helpim yumi long daunim bel hevi. Wanpela stori olsem i bin kirapim wanpela sista Kristen long tok: “Mi save ritim dispela stori klostu long olgeta de, na aiwara i kamap yet taim mi ritim. Mi putim dispela nius klostu long bet bilong mi na bai mi ken kisim long taim mi bel hevi. Ol kain stori olsem i mekim na i olsem mi pilim Jehova i holimpas mi na lukautim mi.”a Yumi amamas tru long Jehova i save givim ol kaikai bilong spirit long yumi long taim stret, a? No ken lusim tingting long dispela samting: Ol samting Jehova i givim bilong helpim yumi long stap gut long spirit i kamapim klia olsem em i stap klostu long yumi na yumi stap aninit long lukaut bilong em.

Bilong Go Long Man Bilong “Harim Beten”

14, 15. (a) Wanem gutpela samting Jehova i givim long ol man wan wan i stap klostu long em? (b) Oltaim rot i op bilong man i ken beten long Jehova, na bilong wanem dispela em i wanpela gutpela presen tru?

¹⁴ Ating yu bin luksave olsem taim ol man i kisim namba na biknem, ol wokman bilong ol i gat hatwok moa long toktok wantaim ol. Tasol olsem wanem long God Jehova? Yu ting em i stap longwe tumas long yumi na dispela i mekim na em i les long putim yau long ol tok ol man bilong graun tasol i mekim long em? Nogat tru! Beten em i wanpela presen na em i narapela gutpela samting Jehova i givim long ol man i stap klostu long em. Oltaim rot i op bilong yumi ken i go long Man bilong harim beten, na dispela em i wanpela gutpela presen tru. (Song 65:⁠2) Bilong wanem i olsem?

¹⁵ Tingim: Nambawan bos bilong wanpela bikpela kampani i gat planti wok long mekim. Em bai makim wok em yet bai mekim na wok em bai givim i go long ol narapela. Olsem tasol King bilong heven na graun bai makim wanem ol wok samting em yet bai mekim na wanem ol wok em bai givim long ol narapela. Tingim ol wok Jehova i givim long pikinini bilong em, Jisas. Jehova i givim “namba long em bilong kotim ol manmeri na skelim pasin bilong ol.” (Jon 5:27) Jehova i putim ol ensel “i stap aninit long em.” (1 Pita 3:22) Jisas i ken yusim strongpela spirit holi bilong Jehova long helpim em long stiaim ol disaipel bilong em long graun. (Jon 15:26; 16:⁠7) Olsem na Jisas inap tok: “God i givim mi bikpela namba na strong bilong bosim olgeta samting long heven na long graun.” (Matyu 28:18) Tasol bilong harim beten bilong yumi, Jehova i makim em yet long insait long dispela wok. Dispela i as na Baibel i tokim yumi long beten long Jehova tasol, na mekim long nem bilong Jisas.​—⁠Song 69:13; Jon 14:​6, 13.

16. I gat wanem as na yumi ken bilip tru olsem Jehova i save harim ol beten bilong yumi?

¹⁶ Yu ting Jehova i save putim yau tru long beten bilong yumi? Sapos em i les tasol long harim, em bai i no inap kirapim yumi long “beten long olgeta taim” o tokim yumi long putim ol hevi na wari bilong yumi i go long em. (Rom 12:12; Song 55:22; 1 Pita 5:⁠7) Ol gutpela bilipman em Baibel i stori long ol, ol i bin bilip tru olsem Jehova i save harim ol beten. (1 Jon 5:14) Olsem na man bilong raitim song, em Devit, em i tok: ‘[Bikpela] i harim prea bilong mi.’ (Song 55:17) I gat as tru na yumi tu i ken bilip olsem Jehova i stap klostu long yumi na em i redi long harim olgeta tingting na wari bilong yumi.

Jehova i Mekim Gut Long Ol Wokboi Bilong Em

17, 18. (a) Jehova i gat wanem tingting long pasin bilong ol man long i stap gut long wok bilong em? (b) Stori long olsem wanem Sindaun 19:17 i soim olsem Jehova i save tingim pasin marimari yumi mekim.

¹⁷ Jehova em i King bilong heven na graun, olsem na ol samting ol man i mekim o ol samting ol i tok nogat long mekim, dispela i no mekim wanpela samting long em yet. Tasol Jehova em i God bilong pilim tru ol samting ol man i mekim bilong tingim em. Em i save laikim tru​—⁠olsem samting i dia tumas​—⁠pasin bilong ol man long i stap gut long wok bilong em. (Song 147:11) Olsem na i gat narapela gutpela samting ol man i go klostu long Jehova i save kisim: Em i save mekim gut long ol wokboi bilong em.​—⁠Hibru 11:⁠6.

¹⁸ Baibel i kamapim klia olsem Jehova i tingim ol wok ol lain bilong em i mekim i bikpela samting tru. Yumi ritim tok olsem: “Sapos yu marimari long rabisman na yu givim samting long em, i olsem yu larim Bikpela i dinau long yu, na bihain Bikpela bai i bekim dispela dinau.” (Sindaun 19:17) Lo Bilong Moses i kamapim klia pasin bilong Jehova long tingim ol rabisman. (Wok Pris 14:21; 19:15) Jehova i pilim olsem wanem taim yumi bihainim pasin marimari bilong em long ol samting yumi mekim long ol rabisman? Taim yumi givim ol samting long rabisman, na yumi no gat tingting olsem em i mas bekim sampela samting long yumi, Jehova i save tingim dispela i olsem dinau Em yet i kisim long yumi. Jehova i tok promis long bekim dispela dinau long rot bilong ol blesing na long pasin bilong tingim yumi. (Sindaun 10:22; Matyu 6:​3, 4; Luk 14:​12-14) Yes, taim yumi mekim pasin sori long wanbilip i sot long ol samting o i gat hevi, Jehova i pilim tru dispela samting. Yumi amamas tru long save olsem Papa bilong yumi long heven i save tingim ol gutpela pasin marimari yumi mekim long ol narapela!​—⁠Matyu 5:⁠7.

19. (a) I gat wanem as na yumi ken save gut olsem Jehova i amamas long ol wok yumi mekim long autim tok na kamapim disaipel? (b) Olsem wanem Jehova i save mekim gut long man i mekim ol wok bilong helpim kingdom bilong em?

¹⁹ Jehova i amamas moa yet long ol wok bilong Kingdom yumi mekim. Taim yumi go klostu long Jehova, i stret yumi laik mekim wok long taim, strong, na mani samting bilong yumi na bai yumi inap insait tru long wok bilong autim tok bilong Kingdom na kamapim ol disaipel. (Matyu 28:​19, 20) Ating sampela taim yumi pilim olsem yumi mekim liklik wok tasol. Bel bilong yumi i gat sin na em inap kirapim yumi long tingting planti olsem Jehova i amamas long wok bilong yumi o nogat. (1 Jon 3:​19, 20) Tasol maski sapos em i liklik tru, Jehova i save amamas tru long olgeta samting pasin sori i kirapim yumi long mekim. (Mak 12:​41-44) Baibel i tok: “God em i no man nogut, na bai em i lusim tingting long ol gutpela wok yupela i bin mekim. Nogat.” (Hibru 6:10) Yes, Jehova bai i no lusim tingting long wok yumi mekim bilong helpim Kingdom bilong em, maski em i liklik wok tru, na em bai mekim gut long yumi. Long nau yumi kisim ol gutpela blesing bilong spirit, na yumi inap wetim ol gutpela samting bilong nupela taim em bai kamap bihain, long dispela taim Jehova bai givim planti gutpela samting bilong inapim ol stretpela laik bilong olgeta man i stap klostu long em.​—⁠Song 145:16; 2 Pita 3:13.

20. Insait long yia 2003, yumi ken mekim wanem bilong tingim yia-teks bilong yumi? Sapos yumi mekim olsem, wanem gutpela samting bai kamap?

²⁰ Insait long yia 2003, yumi ken givim askim long yumi yet olsem yumi wok oltaim long i go klostu long Papa bilong yumi long heven o nogat. Sapos yumi wok long go klostu long em, orait yumi ken bilip tru olsem em bai mekim ol samting olsem em i tok promis long en. Long wanem, ‘God i no save giaman.’ (Taitus 1:⁠2) Sapos yu go klostu long em, em bai i go klostu long yu. (Jems 4:⁠8) Na dispela bai kamapim wanem gutpela samting? Ol gutpela blesing bilong nau na gutpela samting bilong bihain​—⁠em long go klostu moa long Jehova inap oltaim oltaim!

[Futnot]