Bilip i Mekim Yumi i Stap Isi na Tingting Oltaim Long Beten
“Strongim bel na stap isi na karim ol hevi i kamap long yupela. Taim bilong Bikpela i kam bek [“kam i stap,” “NW”] em i klostu tru. Olsem na bel bilong yupela i mas i stap strong.”—JEMS 5:8.
1. Bilong wanem yumi mas tingim gut tok bilong Jems 5:7, 8?
INAP longtaim pinis ol man i wetim Krais Jisas i “kam i stap,” na nau em i kam i stap pinis. (Matyu 24:3-14, NW) Long nau i gat as tru na ol man i tok ol i bilip long God na Krais ol i mas tingim gut tok bilong disaipel Jems: “Ol brata, yupela i mas strongim bel bilong yupela na karim ol hevi, na wetim Bikpela i kam bek. Yupela i save, man i gat gaden em i save wetim gutpela kaikai i kamap long gaden bilong en. Em i save strongim bel bilong en na stap isi na wetim ren wantaim san i mekim wok bilong tupela pastaim, na bihain em i save kisim kaikai. Orait yupela tu i mas strongim bel na stap isi na karim ol hevi i kamap long yupela. Taim bilong Bikpela i [kam i stap] em i klostu tru. Olsem na bel bilong yupela i mas i stap strong.”—Jems 5:7, 8.
2. Wanem sampela hevi i bin painim ol Kristen Jems i raitim pas long ol?
2 Ol man Jems i bin raitim dispela pas long ol, ol i mas i stap isi na stretim sampela hevi. Planti ol i mekim pasin i narapela kain long pasin ol man i tok ol i bilip long God ol i mas mekim. Olsem: Sampela kain laik i bin kamap long bel bilong sampela na Jems i mas stretim dispela samting. Em i mas kamapim bek pasin bilong i stap bel isi namel long ol dispela Kristen bilong pastaim. Na em i mas givim tok long ol long i stap isi na karim hevi, na tingting oltaim long beten. Orait taim yumi skelim ol tok Jems i bin givim long ol, yumi ken tingting long olsem wanem yumi inap bihainim ol dispela tok bilong em.
Ol Laik Nogut Inap Bagarapim Yumi
3. Wanem ol samting i as bilong kros pait insait long kongrigesen? Dispela inap skulim yumi long wanem samting?
3 Bel isi i no stap namel long sampela man i tok ol i Kristen, na ol laik nogut bilong bel i as bilong dispela samting. (Jems 4:1-3) Ol i save kros na tok pait wantaim na dispela i mekim na ol i no stap wanbel, na sampela i wok long skelim pasin bilong ol brata bilong ol. Ol dispela pasin i kamap, long wanem, bel bilong ol i strong long painim ol amamas nogut bilong skin na dispela i pait namel long ol hap bodi bilong ol. Ating yumi yet i mas beten askim God long helpim yumi long sakim ol laik nogut long kisim biknem, na strong bilong bosim ol man, na mani kago samting, bambai yumi no ken mekim wanpela samting i bagarapim bel isi bilong kongrigesen. (Rom 7:21-25; 1 Pita 2:11) Namel long sampela Kristen long taim bilong ol aposel, pasin mangal i kamap strong moa na i kamapim pasin bilong bel nogut tru long narapela narapela. Taim ol i beten askim God long inapim ol laik nogut bilong ol, em i no harim beten bilong ol, olsem na ol i wok strong bambai ol i ken inapim ol dispela laik. Sapos yumi gat ol dispela kain laik nogut long bel, orait maski yumi askim God long givim long yumi, bai yumi no inap kisim, long wanem, God holi bilong yumi i no save harim ol dispela kain beten.—Krai 3:44; 3 Jon 9, 10.
4 Sampela Kristen bilong pastaim ol i bihainim pasin bilong dispela graun, na bel kaskas long man i holim planti samting, na pasin antap. (Jems 4:4-6) Jems i kolim sampela olsem “meri i lusim man bilong en na i go pamuk nabaut,” long wanem, ol i save pren wantaim ol pasin bilong graun, na dispela i mekim na ol i kamap olsem pamukmeri long ai bilong God. (Esekiel 16:15-19, 25-45) Yumi no laik kamap wankain olsem ol manmeri bilong dispela graun long tingting na toktok na pasin bilong yumi, a? Long wanem, sapos yumi mekim olsem, bai yumi kamap birua bilong God. Baibel i soim yumi olsem yumi ol sinman bilong graun i save tingting long mekim pasin nogut, na wanpela pasin olsem, em bel kaskas, olsem aigris samting. (Stat 8:21; Namba 16:1-3; Song 106:16, 17; Saveman 4:4) Olsem na sapos yumi save olsem yumi mas wok strong long daunim bel kaskas, o pasin antap, o sampela pasin nogut moa i stap long bel bilong yumi, orait yumi mas beten askim God long helpim yumi long rot bilong spirit holi. Dispela spirit holi em God i save marimari na givim long yumi, em i gat bikpela strong moa, winim pasin bilong bel kaskas samting. Jehova i save sakim ol man i gat pasin antap, tasol em bai marimari na mekim gut long yumi sapos yumi wok strong long daunim ol pasin bilong sin i stap long bel bilong yumi.
5 Olsem wanem yumi inap kisim dispela marimari bilong God? (Jems 4:7-10) Bilong Jehova i ken marimari na mekim gut long yumi, yumi mas bihainim tok bilong em, na bilip long ol samting em i putim bilong helpim yumi, na daun long olgeta laik bilong em. (Rom 8:28) Na tu, yumi mas “sakim” Satan. Em bai ‘lusim yumi na ranawe’ sapos yumi stap strong na stap aninit long Jehova, em Nambawan Bos bilong heven na graun. Yumi gat helpim i stap, em Jisas, em i save pasim ol lain nogut bilong dispela graun na bai ol i no ken bagarapim yumi inap long olgeta taim bihain. Na yu no ken lusim tingting: Taim yumi beten, na bihainim tok bilong God, na bilip, yumi save go klostu long God, na em i stap klostu long yumi.—2 Stori 15:2.
6. Bilong wanem Jems i kolim sampela Kristen olsem “man bilong sin”?
6 Bilong wanem Jems i kolim dispela tok “man bilong sin” long sampela man i tok ol i bilip long God? Long wanem, ol i gat asua long “pait” na birua nogut tru long narapela—em ol pasin i no stret tru long ol Kristen i mekim. (Taitus 3:3) “Han” bilong ol i bin mekim planti pasin nogut, na ol i mas wasim na bai i kamap klin. Na ol i mas mekim “bel” bilong ol i kamap klin, long wanem, bel i save kirapim man long mekim ol samting. (Matyu 15:18, 19) Ol dispela “man i gat tupela tingting,” sampela taim ol i tingting long i stap pren bilong God na sampela taim ol i tingting long i stap pren bilong dispela graun. Ol i stap olsem piksa nogut yumi no ken bihainim, olsem na yumi mas was gut oltaim, nogut ol kain pasin olsem i bagarapim bilip bilong yumi.—Rom 7:18-20.
7 Jems i tokim ol man i kaunim pas bilong em olsem ol i mas “bel hevi na krai planti.” Sapos ol i bel hevi long rong ol i bin mekim, dispela bai makim olsem ol i tanim bel. (2 Korin 7:10, 11) Long nau, sampela i tok ol i gat bilip tasol ol i wok long kamap pren bilong dispela graun. Sapos yumi sampela i wok long bihainim kain rot olsem, orait yumi mas bel hevi na krai, long wanem, yumi stap nogut long ol samting bilong spirit, na yumi mas kirap kwik na mekim sampela samting bilong stretim. Taim yumi stretim pasin bilong yumi na God i lusim tingting long rong bilong yumi, orait nau bai yumi amamas na belgut, long wanem, bel bilong yumi i no kotim yumi moa, na yumi ken tingting long kisim laip i stap oltaim long bihain.—Song 51:10-17; 1 Jon 2:15-17.
No Ken Skelim Pasin Bilong Narapela
8, 9. Bilong wanem yumi no ken tok nogut long narapela o skelim pasin bilong em?
8 Pasin bilong tok nogut long wanpela wanbilip, em i wanpela rong. (Jems 4:11, 12) Tasol sampela i save skelim pasin bilong ol wanlotu Kristen—ating ol i ting olsem ol yet i stretpela man, o ol i laik litimapim nem bilong ol yet, na bilong mekim olsem ol i save daunim ol narapela. (Song 50:20; Sindaun 3:29) Tok Grik long dispela tok “tok nogut long,” em i makim pasin bilong bel nogut long man, na insait bilong en i olsem yumi sutim tok giaman long man. Dispela i olsem yumi skelim brata long kot na makim em olsem man nogut. Olsem wanem dispela i olsem yumi ‘tok nogut long lo yet na sutim tok long lo bilong God’? Ol saveman bilong lo na ol Farisi ol i “save tumas long sakim lo bilong God” na ol i skelim ol man long tingting bilong ol yet long wanem pasin i stret na wanem pasin i no stret. (Mak 7:1-13) Na i olsem tu long yumi. Sapos yumi tok wanpela brata em i man nogut, tasol Jehova yet i no tok olsem long em, orait yumi ‘sutim tok long lo bilong God’ na yumi mekim pasin i no stret na makim olsem lo bilong God i sot. Na taim yumi sutim tok long pasin bilong brata bilong yumi, yumi no bihainim lo bilong laikim tru ol narapela.—Rom 13:8-10.
9 Yumi no ken lusim tingting: I gat “wanpela tasol i kamapim lo, na em tasol i stap jas”—em Jehova. “Lo bilong Bikpela em i stret olgeta”—em i no sot liklik long wanpela samting. (Song 19:7; Aisaia 33:22) God wanpela tasol inap putim ol lo yumi mas bihainim bambai em i ken kisim bek yumi. (Luk 12:5) Olsem na Jems i askim olsem: “Yu husat na yu sutim tok long ol arapela manmeri?” Em i no wok bilong yumi long skelim pasin bilong ol narapela na tok ol i man nogut. (Matyu 7:1-5; Rom 14:4, 10) Sapos yumi tingim God i stap King na em i save mekim wankain pasin long olgeta man, na yumi tingim ol sin bilong yumi yet, ating dispela bai helpim yumi na yumi no mekim olsem yumi stretpela man na yumi wok long skelim pasin bilong ol narapela.
No Ken Tok Hambak Long Samting Yu Laik Mekim
10. Bilong wanem yumi mas tingim Jehova long olgeta samting yumi mekim long olgeta de?
10 Long olgeta samting yumi laik mekim, yumi mas tingim Jehova na lo bilong em. (Jems 4:13-17) Ol man i hambak, ol i sakim God na ol i tok: “Ating nau o tumora mi bai go long wanpela taun na mi bai mekim wok bisnis inap long wanpela yia. Na long dispela pasin mi bai kisim planti mani.” Sapos yumi wok long ‘hipim hipim planti samting bilong yumi yet, tasol yumi stap rabis long ai bilong God,’ tumora yumi inap i dai na yumi no gat rot long mekim wok bilong Jehova. (Luk 12:16-21) Olsem Jems i tok, yumi olsem smok “i save kamap na i stap liklik taim tasol na i pinis olgeta.” (1 Stori 29:15) Yumi mas bilip long Jehova, na long dispela rot tasol bai yumi inap tingting long i stap amamas na kisim laip i stap oltaim.
11 Yumi no ken tok hambak na givim baksait long God. Yumi mas tingting olsem: “Sapos [Jehova] i laik, orait mi bai stap laip na mi mekim dispela samting mi ting long mekim.” Taim yumi tok, “Sapos [Jehova] i laik,” dispela i makim olsem yumi wok strong long mekim ol pasin i stret wantaim laik bilong em. Ating yumi mas mekim wok bisnis bilong lukautim famili bilong yumi, o go long wanpela hap bilong mekim wok bilong Kingdom, o mekim ol narapela samting. Tasol yumi no ken tok hambak long ol samting yumi laik mekim. “Kain hambak pasin olsem, em i pasin nogut tru,” long wanem, i olsem yumi no tingim God na wetim em i helpim yumi.—Song 37:5; Sindaun 21:4; Jeremaia 9:23, 24.
12 Bilong pinisim tok bilong em long pasin bilong tok hambak long ol samting yumi laik mekim, Jems i tok: “Sapos yu save pinis long wanpela gutpela pasin yu mas mekim, tasol yu no mekim, orait yu mekim sin.” Olgeta Kristen i mas mekim pasin daun na tokaut olsem em i mas wetim God i helpim em. Sapos em i no mekim olsem, ‘em i mekim sin.’ Na i wankain tu sapos yumi no mekim ol samting ol man i bilip long God ol i mas mekim.—Luk 12:47, 48.
Tok Lukaut i Go Long Ol Maniman
13. Jems i tok wanem long ol man i mekim wok nogut long mani kago bilong ol?
13 Sampela Kristen bilong pastaim ol i bin kamap man bilong laikim mani kago samting, o ol i givim biknem long ol man i gat planti samting. Olsem na Jems i mekim strongpela tok long sampela man i gat planti samting. (Jems 5:1-6) Ol man i bihainim pasin bilong dispela graun na ol i mekim wok nogut long mani kago bilong ol, bai ol i tingting long ol bikpela hevi i laik kamap long ol, na ol bai i “krai na singaut nogut” taim God i bekim pasin nogut bilong ol. Long dispela taim bipo, planti man olsem maniman ol i gat ol samting olsem planti bilas, na rais wit samting, na wain—i no mani stret. (Joel 2:19; Matyu 11:8) Sampela samting olsem, ol inap sting o “ol binatang i kaikai,” tasol Jems i no toktok long pasin bilong ol dispela samting long bagarap—em i laik tok olsem planti mani kago i samting nating na i no inap helpim tru yumi. Tru, gol na silva i no save ros, tasol sapos yumi wok long bungim bungim i stap, bai ol i samting nating, wankain olsem ol samting em ros i kaikai pinis. “Ros” i makim olsem yumi no bin mekim gutpela wok long ol mani kago bilong yumi. Olsem na yumi olgeta i mas save, ol man i bilip long strong bilong mani kago bilong ol, ol i wok long bungim samting “olsem paia” long taim bilong “las de,” taim belhat bilong God i painim ol. Nau yumi stap long “taim bilong las de,” olsem na yumi mas tingim moa yet ol dispela tok.—Daniel 12:4; Rom 2:5.
14 Planti maniman ol i save giamanim ol wokboi i kamautim kaikai long gaden bilong ol na ol i pasim hap pe bilong ol, na dispela hap pe ol i bin pasim, “em i singaut” long God i mas bekim pasin nogut bilong ol. (Skelim wantaim Stat 4:9, 10.) Ol maniman bilong dispela graun ‘ol i bin kisim ol gutpela gutpela samting.’ Ol i strong long painim ol amamas bilong skin olsem kaikai planti tumas na ol kain samting olsem, na dispela pasin i pasim pinis bel bilong ol olsem bikpela gris i pulap long bel na ol i no inap pilim ol samting, na ol bai i mekim yet dispela pasin long “de” God i makim bilong kilim ol i dai. Ol i save ‘kotim ol stretpela man na kilim ol i dai.’ Jems i tok, “ol [stretpela man] i no bin sakim strong bilong [ol] na bekim pait” long ol. Em nau, yumi no ken mekim gut long ol man i gat planti samting na givim baksait long ol narapela man. Yumi mas putim ol samting bilong spirit i stap olsem namba wan samting bilong yumi.—Matyu 6:25-33.
Bilip i Helpim Yumi Long i Stap Isi
15, 16. Bilong wanem em i bikpela samting long i stap isi na karim hevi?
15 Orait Jems i stori pinis long ol maniman bilong dispela graun i save putim hevi long ol man, na nau em i tingim ol Kristen em ol bikman i putim hevi long ol, na em i laik kirapim ol long i stap isi na karim hevi. (Jems 5:7, 8) Sapos ol bilipman i stap isi na karim hevi, orait ol bai i kisim gutpela pe long taim Krais i kam i stap, taim kot bilong God i painim ol man i bin putim hevi long ol. (Matyu 24:37-41) Ol dispela Kristen bilong pastaim ol i mas mekim pasin olsem man bilong wokim gaden, em i save stap isi na wetim taim bilong ren na nau em i planim kaikai, na em i wetim ren i kam daun gen long sampela mun bihain na i save mekim ol samting bilong gaden i karim kaikai. (Joel 2:23) Orait yumi tu i mas i stap isi na strongim bel, na yumi mas mekim moa yet, long wanem, taim bilong Bikpela Krais Jisas i “kam i stap,” em i kamap pinis!
16 Bilong wanem yumi mas i stap isi na karim hevi? (Jems 5:9-12) Sapos yumi gat pasin bilong i stap isi, orait taim pasin bilong ol wanbilip i skrapim bel bilong yumi, bai yumi no kros long ol. Sapos yumi bel nogut na “kros long ol arapela manmeri bilong God,” orait Krais Jisas, em man i stap Jas, em bai skelim yumi long kot na makim yumi olsem man nogut. (Jon 5:22) Nau Krais Jisas i “kam i stap” pinis na em i “sanap i stap ausait long dua.” Olsem na yumi mas wok strong long kamapim bel isi namel long ol brata—olsem yumi mas i stap isi na no ken les long ol brata bilong yumi, em planti hevi i save kamap long ol bilong traim bilip bilong ol. Na taim yumi tingim Jop i bin stap isi na karim ol hevi bilong em na God i givim gutpela pe long em, dispela i save strongim bilip bilong yumi yet. (Jop 42:10-17) Sapos yumi bilip na stap isi na karim hevi, bai yumi lukim olsem Jehova “em i save sori moa yet long yumi, na oltaim em i save marimari long yumi.”—Maika 7:18, 19.
17 Sapos yumi no stap isi, orait taim wanpela hevi i kamap ating bai yumi mekim sampela tok kranki. Olsem: Bai yumi no tingting gut na yumi mekim nating wanpela tok tru antap. Jems i tok: ‘Yupela i no ken mekim tok tru antap.’ Em i laik toksave olsem yumi no ken kolim nating wanpela tok tru antap. Na sapos long olgeta taim yumi tok tru antap bilong strongim wanpela tok yumi bin mekim, dispela i olsem pasin bilong man i gat tupela maus. Olsem na yumi mas mekim tok tru tasol, olsem taim yumi tok “Yes,” orait em inap, na taim yumi tok “Nogat,” em inap. (Matyu 5:33-37) Tasol Jems i no tok yumi no ken mekim tok tru antap taim yumi sanap long kot.
Bilip na Beten Bilong Yumi
18 Beten i mas i stap olsem bikpela samting tru long i stap bilong yumi bambai yumi inap bosim maus bilong yumi na stap isi na karim hevi, na bilip strong long God. (Jems 5:13-20) Na taim ol hevi i kamap bilong traim yumi, yumi mas strong moa long mekim beten. Sapos bel bilong yumi i amamas, orait yumi mas “singim song bilong litimapim nem bilong God,” olsem Jisas wantaim ol aposel i bin mekim taim em i kamapim bung bilong tingim dai bilong em, olsem Memorial. (Mak 14:26) Sampela taim bel bilong yumi i pilim tru ol gutpela pasin God i bin mekim long yumi, olsem na long bel tu yumi save mekim ol singsing bilong litimapim nem bilong em. (1 Korin 14:15; Efesus 5:19) Na yumi amamas tru long mekim singsing bilong givim biknem long Jehova long ol miting Kristen!
19 Ating bel bilong yumi i no laik mekim singsing sapos yumi gat sik bilong spirit, olsem yumi bin mekim sampela pasin i no stret o yumi no bin kisim kaikai oltaim long tebol bilong Jehova. Sapos yumi stap olsem, orait long pasin daun yumi mas singaut long ol elda bambai ol i ken “prea long God i ken mekim [yumi] i kamap orait gen.” (Sindaun 15:29) Na long nem bilong Jehova bai ol i ‘putim wel long bodi bilong yumi.’ Taim yumi putim wel long sua, em i save daunim hap pen bilong sua, na olsem tasol ol gutpela tok bilong ol elda bilong mekim gut bel bilong yumi, na ol tok bilong Baibel ol i givim long yumi, em bai helpim yumi long daunim bel hevi, na pasin bilong tupela tingting, na pret. ‘Sapos yumi prea, orait Bikpela bai i mekim orait yumi’ sapos yumi yet i bilip. Sapos ol elda i kisim save olsem wanpela bikpela rong i as na yumi gat sik bilong spirit, orait long gutpela pasin bai ol i kamapim rong bilong yumi na wok strong long helpim yumi. (Song 141:5) Na sapos yumi tanim bel, yumi ken bilip olsem God bai harim beten bilong ol elda na lusim tingting long rong bilong yumi.
20 Taim yumi ‘autim sin bilong yumi long ol arapela,’ dispela inap pasim yumi na bai yumi no mekim sampela rong moa. Em inap kirapim yumi na bai narapela i mekim pasin sori long narapela, na dispela pasin sori bai kirapim yumi long “prea long God i helpim ol arapela.” Yumi inap bilip olsem dispela bai helpim yumi na ol narapela, long wanem, taim “stretpela man” i beten—em man i bilip na God i tingim em i olsem stretpela man—dispela beten i gat strong long ai bilong Jehova. (1 Pita 3:12) Profet Elaija i gat sampela pasin kranki kain olsem yumi, tasol beten bilong em i kamapim samting em i bin askim Jehova long en. Em i beten na ren i no kam daun inap 3-pela yia hap. Orait bihain em i beten gen na ren i kam daun.—1 King 17:1; 18:1, 42-45; Luk 4:25.
21 Orait olsem wanem sapos wanpela brata o sista long kongrigesen “i lusim tok tru bilong God,” olsem em i lusim ol stretpela tok bilong Baibel em i skul pinis long en na em i lusim stretpela pasin? Sapos yumi givim ol tok bilong Baibel long em, na beten, na mekim ol narapela samting bilong helpim em, ating yumi inap bringim em i kam bek gen na em i lusim rong bilong em. Sapos yumi mekim olsem, bai em i ken stap aninit long ofa bilong Krais na em i no ken dai long ol samting bilong spirit, na God i no ken makim em olsem man nogut bilong bagarap olgeta. Taim yumi helpim man i bin mekim rong, yumi karamapim planti sin bilong em. Taim dispela sinman i kisim pinis ol strongpela tok bilong stretim em na em i lusim pinis rot nogut, na em i tanim bel na askim God long lusim tingting long rong bilong em, bai yumi amamas long yumi bin mekim ol samting bilong karamapim ol sin bilong em.—Song 32:1, 2; Jut 22, 23.
Ol Tok Bilong Helpim Yumi Olgeta
22, 23. Tok bilong Jems i mas mekim wanem long yumi?
22 Em nau, pas bilong Jems i gat ol tok bilong helpim yumi olgeta wan wan. Em i soim yumi long olsem wanem yumi inap karim ol hevi i save painim yumi, na em i tok yumi no ken mekim gut long sampela tasol na sampela nogat, na em i laik kirapim yumi long mekim ol stretpela wok. Jems i tok strong long yumi mas bosim maus, na sakim ol pasin bilong dispela graun, na wok strong long kamapim bel isi namel long ol brata. Na tok bilong em i mas kirapim yumi long i stap isi na karim hevi na tingting oltaim long beten.
23 Tru, Jems i bin salim dispela pas i go long ol Kristen bilong pastaim em God i bin makim long spirit holi. Tasol yumi olgeta i mas larim ol tok bilong dispela pas i helpim yumi long holimpas bilip bilong yumi. Ol tok bilong Jems inap strongim bilip bilong yumi, em dispela bilip i save kirapim yumi long wok strong long mekim wok bilong God. Na dispela pas em spirit holi i stiaim Jems long raitim, em i save kamapim kain bilip i save stap strong oltaim na i helpim yumi ol Witnes Bilong Jehova long i stap isi na karim hevi na tingting oltaim long beten, nau long dispela taim Bikpela bilong yumi, em Krais Jisas, i “kam i stap.”
Bai Yu Bekim Olsem Wanem?
◻ Bilong wanem sampela Kristen bilong pastaim i mas senisim tingting na pasin bilong ol?
◻ Jems i givim wanem tok lukaut long ol man i gat planti samting?
◻ Bilong wanem yumi mas i stap isi na karim hevi?
◻ Bilong wanem yumi mas beten long olgeta taim?
4. Bilong wanem Jems i kolim sampela olsem “meri i lusim man bilong en na i go pamuk nabaut”? Dispela tok i mas mekim wanem long yumi?
5. Bilong God i ken marimari na mekim gut long yumi, yumi mas mekim wanem?
7. Bilong wanem Jems i tokim sampela long ol i mas “bel hevi na krai planti”?
11. Wanem insait bilong dispela tok, “Sapos Bikpela i laik”?
12. Wanem insait bilong tok bilong Jems 4:17?
14. Planti maniman ol i save mekim wanem? Yumi mas mekim wanem long dispela samting?
17. Bilong wanem Jems i tok, ‘Yupela i no ken mekim tok tru antap’?
18. Wanem taim yumi mas strong long beten na “singim song bilong litimapim nem bilong God”?
19. Sapos sik bilong spirit i kamap long yumi, yumi mas mekim wanem? Bilong wanem yumi mas mekim olsem?
20. Bilong wanem yumi mas autim ol sin bilong yumi na beten long God i ken helpim ol narapela?
21. Sapos wanpela Kristen “i lusim tok tru bilong God,” ating yumi inap mekim wanem?
[Piksa long pes 24]
Ol Kristen i mas stap isi na karim hevi, na mekim gut long man, na tingting oltaim long beten