Samting Bilong Mekim Gut Bel Bilong Yu Taim Yu Gat Hevi
TAIM yumi stap bel hevi, yumi mas ting olsem wanem long dispela? Sapos yumi dediket pinis long Jehova, yu ting i gat rong sapos yumi bel hevi long sampela taim? Yu ting bel hevi bilong yumi i makim olsem yumi no inap mekim wok bilong God?
Jems i tok: “Elaija em i man wankain olsem yumi.” (Jems 5:17) Elaija i mekim wok bilong God, tasol sampela taim em i bel hevi. Em i tok: “Bikpela, mi inap pinis long ol dispela hevi i kamap long mi. Nau mi laik bai yu larim mi i dai, long wanem, mi no gutpela man. Nogat. Mi wankain olsem ol tumbuna bilong mi.” (1 King 19:4) Gutpela man Jop, na gutpela meri Hana, na sampela wokboi moa bilong Jehova, long sampela taim ol i bel hevi. Devit i beten olsem: “Yu tekewe olgeta bel hevi bilong mi, na bel bilong mi i ken stap isi. Yu helpim mi na ol hevi i no ken daunim mi.”—Buk Song 25:17.
Jehova i kirapim sampela man long mekim wok bilong em, tasol dispela samting i no makim olsem hevi i no inap painim ol. Nogat. Wankain hevi i save painim ol olsem ol narapela man, na taim traim i painim ol, ol inap bel hevi. (Aposel 14:15) Tasol ol wokboi bilong God i gat gutpela samting bilong helpim ol long karim hevi bilong ol. Nau yumi ken skelim sampela man Baibel i stori long ol, na kisim save long ol samting i bin helpim ol long daunim bel hevi bilong ol.
Aposel i Gat Hevi, Tasol Wanpela Samting i Mekim Gut Bel Bilong Em
Aposel Pol i bin bel hevi long sampela taim. Em i tok: “Taim mipela i go i stap long Masedonia, mipela i no inap malolo liklik. . . . Ol man i bin tok pait wantaim mipela, na mipela i kirap nogut na bel bilong mipela i pret. Tasol God i save mekim isi bel bilong ol manmeri i stap bel hevi. Na em i salim Taitus i kam long mipela, na long dispela pasin em i mekim isi bel bilong mipela.” (2 Korin 7:5, 6) “Ol man i bin tok pait” wantaim em—na ol i mekim nogut long Pol, na long dispela rot i dai inap painim em tu. (Lukim 2 Korin 1:8.) Na Pol i tingting planti long ol hevi i kamap insait long ol kongrigesen, olsem i kamap long Korin, na em i bel hevi long dispela.
Pol i raitim namba wan pas i go long ol Kristen long Korin, na em i tokaut strong long sampela pasin nogut i wok long kamap long dispela kongrigesen, na em tingting planti long ol Korin bai ting olsem wanem long tok bilong em. Tasol taim Taitus i lusim Korin na i kam lukim Pol, em i tokim Pol ol Korin i amamas long tok bilong em, na dispela samting i mekim gut bel bilong Pol. Long nau tu, Jehova inap kirapim wanpela wokboi bilong em long i kam givim sampela gutpela tok long yumi na daunim bel hevi bilong yumi.
Tingting Bilong Yumi Long Wok God i Givim Yumi
Sampela Kristen, taim ol i mekim wok autim tok, sampela taim ol i save bel hevi. Sampela wokboi bilong Jehova i pilim olsem wok God i givim long ol em i bikpela wok tumas, na ol i no inap mekim. Moses i pilim olsem em i no inap kamap maus bilong God na helpim lain Israel i stap long Isip. Em i tok em i no inap toktok gut. (Kisim Bek 3:11; 4:10) Tasol em i wetim God i helpim em, na Aron i stap olsem maus bilong em, na nau Moses i mekim wok bilong God.
Bihain Moses i no gat wok moa long askim Aron long helpim em—em yet inap mekim ol wok bilong em. Na sampela Kristen, taim ol i kirap autim tok ol i pilim olsem i hatwok tumas, tasol sampela i save gut long autim tok ol i helpim na lainim ol long autim gut tok. Olsem: Planti yangpela Witnes Bilong Jehova, taim ol i kamap bikpela pinis, ol i kamap painia o misineri, na ol i save autim tok long olgeta de. Yumi ken amamas, long wanem Jehova i stap bilong helpim na strongim ol wokboi bilong em bambai ol inap mekim gut dispela wok em i bin givim long ol.—Sekaraia 4:6; 2 Korin 2:14-17; Filipai 4:13.
Taim Yu Bel Hevi Long Sampela Samting
Ating bai yumi bel hevi, long wanem yumi no bin mekim bikpela wok moa bilong God. Wanpela brata i no bin autim tok inap planti yia, na nau em i kirap autim tok gen. Bihain bikpela sik i painim em na em i mas slip tasol long bet. Dispela brata i bel hevi, na em i tok: “Pastaim mi inap mekim bikpela wok bilong God, tasol mi no mekim. Na nau mi laik mekim bikpela wok moa, tasol sik i pasim mi.”
Gutpela sapos nau yumi tingting long mekim bikpela wok, na yumi no ken tingim ol samting i bin kamap long bipo. Jisas i dai na kirap bek pinis, na nau tupela brata bilong em, em Jems na Jut, ol i kamap bilipman. Tru ating ol i bel hevi long wanem ol i no bin hariap na kamap bilipman, tasol dispela bel hevi i no pasim ol long mekim wok bilong God o raitim sampela tok bilong Baibel.
No Ken Lusim Tingting Long Beten
Taim hevi i painim lain bilong God, ol i mas beten strong. Long Baibel i gat planti beten ol wokboi bilong God i bin mekim taim ol i bel hevi. (1 Samuel 1:4-20; Buk Song 42:8) Ating sampela bai tingting olsem: ‘Mi bel hevi tru, olsem na mi no inap beten.’ Orait tingim Jona. Taim em i stap long bel bilong pis em i tok: “Bikpela, mi pilim olsem mi laik i dai, olsem na mi tingting long yu. Na [beten] bilong mi i kamap long yu . . . Mi laik mekim song bilong litimapim nem bilong yu, na mi laik givim ofa long yu.” (Jona 2:4-9) Jona i beten, na God i mekim gut bel bilong em.
Wanpela sista long Swiden i bin mekim wok painia inap planti yia, na maski wok bilong em i karim kaikai, em i bel hevi. Em i beten na tokim Jehova olsem em i stap bel hevi. Sampela de bihain, telefon i ring. Wanpela brata long ofis bilong Sosaiti Was Taua i laik toktok wantaim em. Em i askim dispela sista, ‘Yu laik i kam wok long brens inap wanpela de long olgeta wik na helpim mipela long skruim brens i go bikpela?’ Bihain dispela sista i tok: “Taim mi mekim dispela wok long Betel, dispela samting i mekim gut bel bilong mi na mi inap mekim wok bilong mi.”
Yumi no ken lusim tingting olsem beten em i gutpela rot bilong pinisim bel hevi bilong yumi. (Kolosi 4:2) Bilong helpim yumi, ating Jehova bai opim rot bambai yumi inap mekim bikpela wok moa, o em bai helpim yumi long painim planti man moa i laik harim tok. (1 Korin 16:8, 9) “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.” (Sindaun 10:22) Dispela tok inap mekim gut bel bilong yumi.
Yu Kisim Tupela Tingting na Nau Yu Bel Hevi
Long sampela taim, wanpela wokboi bilong Jehova inap kisim tupela tingting long sampela samting. Sapos dispela samting i painim yumi, yumi no ken ting olsem Jehova i no amamas moa long yumi. Tomas i gat tupela tingting, na em i no bilip olsem Jisas i kirap bek pinis, tasol Jisas i no bin sakim Tomas. Jisas i bin helpim em long kisim stretpela tingting. Na Tomas i amamas tru taim em i save olsem Jisas i kirap bek pinis!—Jon 20:24-29.
Long kongrigesen Kristen bilong pastaim, sampela man i kamapim sampela bilip giaman na tok baksait nabaut, na dispela samting i mekim na sampela Kristen i gat tupela tingting. Olsem na Jut i tok: “Yupela i mas sori long ol man bilip bilong ol i no strong. Sampela bilong ol i olsem ol i stap pinis long paia, olsem na kwiktaim tumas yupela i mas kisim bek ol.” (Jut 3, 4, 16, 22, 23) Sapos ol i laik bai God i sori yet long ol, ol wanlotu bilong Jut—na ol elda bilong kongrigesen tu—ol i mas sori long ol man i gat tupela tingting. (Jems 2:13) Samting ol i mekim inap helpim ol long kisim laip oltaim o em inap bagarapim ol na ol i lus olgeta. (Lukim Matyu 18:8, 9; 25:31-33, 41-46.) Taim yumi helpim wanpela wanbilip na nau em i kisim stretpela tingting, yumi amamas!
Sapos traim i painim yumi, na yumi pilim olsem God i no stap wantaim yumi, yumi mas tokim em long dispela samting taim yumi beten long em. Taim kain samting olsem i painim yumi, yumi mas wok strong long askim Jehova long givim gutpela tingting long yumi. God i save givim planti samting long olgeta man, na em i no save tok kros long man i no gat save na em i wok long askim God long givim save long em. Sapos yumi gat tupela tingting, oltaim yumi mas “beten long God i givim tingting” long yumi. Long wanem, man i gat tupela tingting em i olsem “solwara win i sakim na i kirap nabaut.” (Jems 1:5-8) Yumi mas bilip tru olsem Jehova bai helpim yumi long kisim stretpela tingting long hevi bilong yumi na helpim yumi long karim dispela hevi. Ating God bai mekim ol samting na bai yumi kisim stretpela tingting long ol samting yumi mas mekim. Ol ensel tu i gat wok long soim rot long yumi, o ating spirit holi bai soim rot long yumi. (Hibru 1:14) Bikpela samting em olsem, yumi mas beten askim God long givim save long yumi na yumi mas bilip tru long God bai givim long yumi.—Sindaun 3:5, 6.
Jehova Bai Mekim Gut Bel Bilong Yumi
Pol i beten na wetim Jehova, na Pol i save Jehova bai mekim gut bel bilong em. Aposel i tok: “Yumi litimapim nem bilong God, . . . em i as bilong olgeta pasin marimari na pasin sori. Em i God bilong mekim isi bel bilong olgeta man i gat hevi. . . . na mipela inap long mekim isi bel bilong ol man i gat kain kain hevi, olsem God i save mekim isi bel bilong mipela.”—2 Korin 1:3, 4.
God bilong mekim isi bel bilong olgeta man, em i save long ol hevi i save painim ol wokboi bilong em na em i laik helpim ol. Taim Pol i hevi long ol samting i kamap long Korin, tok bilong Taitus i mekim gut bel bilong em. Ating tok bilong wanpela wanbilip inap mekim isi bel bilong yumi tu. Olsem na taim yumi bel hevi long wanpela samting, yumi no ken i stap wanpis. (Sindaun 18:1) Sapos yumi poromanim ol narapela Kristen, em wanpela rot bilong God i ken mekim gut bel bilong yumi. Ating yumi tingting olsem: ‘Mi bel hevi stret, olsem na mi no inap poromanim ol pren Kristen bilong mi.’ Tasol yumi mas daunim dispela kain tingting, na yumi mas givim rot long ol wanbilip bambai ol inap helpim yumi na mekim gut bel bilong yumi.
No Ken Les!
Ating i no gat wanpela bikpela hevi i bin painim yumi na i mekim yumi i bel hevi tru. Tasol sapos yumi gat bikpela sik o poroman marit i dai o narapela samting i givim hevi long yumi, dispela inap mekim na bai yumi bel hevi tru. Sapos dispela kain samting i kamap, yumi no ken ting yumi sot long samting bilong spirit. Ating man i stap bel hevi em inap mekim yet wok bilong God, na helpim narapela man long samting bilong spirit. Pol i tokim ol brata bilong em long ol i mas “strongim bel bilong ol man i save [bel hevi],” na ol i no ken ting olsem dispela man i bin mekim rong o em i sot long samting bilong spirit. (1 Tesalonaika 5:14) Tru, sampela taim man i bel hevi long wanem em i bin mekim rong, tasol dispela kain bel hevi i no ken painim ol man em bel bilong ol i stret na ol i mekim wok bilong God. Ol i lotuim Jehova, na maski hatwok i painim ol, Jehova i laikim ol na em i helpim ol taim traim o hevi i painim ol.—Buk Song 121:1-3.
Taim traim na hevi i painim lain remnan long yia 1918, ol i bel hevi tru. (Lukim Galesia 6:16.) Sampela bilong ol i kalabus, maski ol i no gat rong, na sampela poroman bilong ol i lusim Jehova na kamap birua bilong ol. Tasol ol narapela i stap gut long God, ol i no save bilong wanem God i larim dispela samting i painim ol. Inap liklik hap taim ol i “wok long krai na planim kaikai,” tasol ol i no les. Ol i mekim yet wok bilong Jehova, na ol i skelim pasin bilong ol yet. Wanem samting i kamap long dispela? “Ol i singim song bilong amamas, na kisim ol kaikai i mau na i kam.” (Buk Song 126:5, 6) Nau ol i save, God i larim ol dispela traim i painim ol bilong stretim pasin bilong ol na bai ol i redi long mekim bikpela wok bilong kisim kaikai long olgeta hap.
Sapos sampela hevi na traim i painim yumi na yumi bel hevi, gutpela sapos yumi bihainim pasin bilong lain remnan. Yumi no ken les—yumi mas wok strong long bihainim stretpela pasin, maski yumi krai wantaim. Bihain bai rot i op na yumi inap winim dispela hevi na traim bilong yumi, na bai yumi “amamas.” Dispela amamas em wanpela pasin spirit holi bilong God i save kamapim, long wanem yumi bin sanap strong na winim ol traim i bin painim yumi. Tru tumas, Jehova bai stap olsem “God bilong mekim isi bel bilong olgeta man i gat hevi.”