Amamas Yet Taim Yu Sanap Strong na Karim Ol Hevi

1-2. Olsem Matyu 5:11 i kamapim, yumi mas i gat wanem tingting long ol traim i painim yumi?

JISAS i promisim ol disaipel bilong em olsem ol bai stap amamas tru. Tasol em i givim tok lukaut tu long ol lain i laikim em olsem ol bai bungim ol hevi. (Mat. 10:22, 23; Luk 6:20-23) Yumi amamas long stap olsem ol disaipel bilong Krais. Tasol yumi inap pilim olsem wanem taim famili i birua long yumi, gavman i mekim nogut long yumi, na ol wanwok na ol wanskul i subim yumi long mekim rong? Yumi ken save olsem ol kain samting olsem inap mekim yumi tingting planti.

² Taim ol man i birua na mekim nogut long yumi, dispela em i no samting bilong amamas long en. Tasol Baibel i tokim yumi long amamas long dispela samting. Olsem, disaipel Jems i tok taim ol traim i painim yumi, yumi no ken bel hevi long dispela; yumi mas amamas taim ol traim i kamap. (Jems 1:2, 12) Jisas i tok yumi mas amamas taim ol man i mekim nogut long yumi. (Ritim Matyu 5:11.) Olsem wanem yumi ken stap amamas yet taim ol traim i kamap? Yumi ken lainim planti samting taim yumi skelim ol tok i stap long pas em Jems i bin raitim i go long ol Kristen long taim bilong ol aposel. Pastaim, yumi ken stori long ol hevi em ol dispela Kristen i bin bungim.

 3. Wanem samting i kamap bihain tasol long Jems i kamap wanpela disaipel?

³ Bihain tasol long Jems em hap brata bilong Jisas i kamap wanpela disaipel, ol man i kirap long mekim nogut long ol Kristen long Jerusalem. (Apo. 1:14; 5:17, 18) Na taim ol man i bin kilim i dai disaipel Stiven, planti Kristen i lusim Jerusalem na ol i ranawe “i go nabaut long ol hap bilong Judia na Samaria,” na bihain ol i go sindaun long ol longwe ples olsem Saiprus, na Antiok. (Apo. 7:58–8:1; 11:19) Ol disaipel i bin karim ol bikpela hevi tru. Maski i olsem, ol i givim bel yet long autim gutnius long ol hap ol i go long en, na ol kongrigesen i wok long kamap long ol hap em Gavman Rom i bosim. (1 Pita 1:1) Tasol bihain long dispela, ol Kristen bilong pastaim i bin karim planti bikpela hevi moa.

 4. Wanem ol narapela hevi em ol Kristen bilong pastaim i bin karim?

⁴ Ol Kristen bilong pastaim i bin karim planti hevi tru. Olsem, long yia 50 C.E., Empera Klodias bilong Rom i bin rausim olgeta Juda long Rom. Olsem na ol Juda em ol i kamap ol Kristen, ol i mas lusim ol haus na ples bilong ol na i go sindaun long ol narapela hap. (Apo. 18:1-3) Long yia 61 C.E., aposel Pol i tok ol man i bin sanapim ol wanbilip Kristen ples klia long ai bilong ol narapela na tok bilas long ol, na putim ol long kalabus, na ol man i bin stilim ol samting bilong ol. (Hib. 10:32-34) Na wankain olsem ol narapela manmeri, ol Kristen i bin karim hevi bilong stap rabis na sik.—Rom 15:26; Fili. 2:25-27.

 5. Bai yumi kisim bekim bilong wanem ol askim?

⁵ Taim Jems i raitim pas bilong em paslain long yia 62 C.E., em i save gut tru long ol hevi i bin painim ol bratasista bilong em. Jehova i stiaim Jems long raitim pas i go long ol dispela Kristen na givim ol sampela gutpela edvais bilong helpim ol long holimpas yet amamas bilong ol maski ol i karim ol hevi. Yumi ken skelim tok i stap long pas bilong Jems na bekim ol dispela askim: Wanem dispela amamas em Jems i toktok long en? Wanem samting inap pinisim dispela amamas bilong wanpela Kristen? Na olsem wanem savetingting, bilip, na strongpela bel i ken helpim yumi long holimpas amamas bilong yumi maski wanem traim i painim yumi?

 6. Olsem Luk 6:22, 23 i kamapim, bilong wanem wanpela Kristen i ken amamas yet maski ol traim i painim em?

⁶ Ol man inap ting olsem ol bai stap amamas sapos ol i gat gutpela helt, planti mani, na famili i pas gut wantaim. Tasol dispela kain amamas em Jems i stori long en em wanpela pasin bilong holi spirit bilong God, olsem na yumi ken amamas yet maski wanem samting i painim yumi. (Gal. 5:22) Wanpela Kristen i amamas o pilim amamas tru taim em i save olsem em i amamasim Jehova na bihainim pasin bilong Jisas. (Ritim Luk 6:22, 23; Kol. 1:10, 11) Kain olsem fleim i lait i stap insait long glas bilong lam, kain amamas i save lait i stap insait long bel bilong wanpela Kristen. Dispela lait i no save dai taim Kristen i sik o em i sot long mani. Taim famili o ol narapela i tok bilas o birua long yumi, dispela i no save kilim i dai dispela amamas yumi pilim long bel. Taim ol birua i mekim nogut long yumi i olsem ol i laik kilim i dai dispela lait, tasol dispela i save mekim amamas bilong yumi i go bikpela moa olsem lait i brait moa. Ol traim i painim yumi bikos long bilip bilong yumi, na dispela i soim klia olsem yumi ol disaipel tru bilong Krais. (Mat. 10:22; 24:9; Jon 15:20) Em as na Jems i tok: “Ol brata bilong mi, taim kain kain traim i kamap long yupela, yupela i mas tingim olsem em samting bilong amamas tru long en.”—Jems 1:2.

7-8. Olsem wanem bilip bilong yumi i kamap strong taim ol traim i painim yumi?

⁷ Jems i kamapim narapela risen na ol Kristen i redi long karim ol bikpela traim. Em i tok: “Bilip bilong yupela, em ol traim i mekim i kamap strong pinis, bai kamapim pasin bilong sanap strong.” (Jems 1:3) Ol traim i kain olsem paia ol i save kukim ain bleid long en bilong strongim bleid. Taim ol i kukim ain bleid na bihain mekim i kamap kol, dispela i save mekim ain bleid i strong tru. Olsem tasol, taim yumi sanap strong na winim ol traim, dispela i save mekim bilip bilong yumi i kamap strong tru. Em as na Jems i tok: “Yupela i mas larim pasin bilong sanap strong i inapim wok bilong en, olsem bai yupela inap stap gutpela olgeta na inap tru long olgeta samting.” (Jems 1:4) Taim yumi lukim olsem ol traim i mekim bilip bilong yumi i kamap strong tru, dispela bai mekim yumi amamas long karim ol hevi.

⁸ Long pas bilong Jems, em i stori long sampela hevi we inap mekim na yumi lusim amamas bilong yumi. Wanem ol dispela hevi, na olsem wanem yumi ken winim ol dispela hevi?

 9. Wai na yumi nidim savetingting?

⁹ Hevi: Yumi no save long wanem samting yumi bai mekim. Taim yumi karim wanpela hevi, yumi mas askim Jehova long helpim yumi long mekim ol disisen i amamasim em, na i helpim ol bratasista bilong yumi, na tu, i helpim yumi long stap gut long Jehova. (Jer. 10:23) Yumi nidim savetingting bilong save long wanem rot yumi mas bihainim na wanem tok yumi ken mekim long ol lain i birua long yumi. Sapos yumi no save long wanem tok yumi bai mekim, orait yumi inap pilim bel hevi olsem yumi no gat rot bilong stretim hevi na kwiktaim dispela inap pinisim amamas bilong yumi.

10. Bilong kisim savetingting, Jems 1:5 i tok yumi mas mekim wanem?

¹⁰ Rot bilong stretim: Askim Jehova long givim yu savetingting. Sapos yumi laik karim hevi na stap amamas yet, pastaim yumi mas beten askim Jehova long givim yumi savetingting yumi nidim bilong mekim ol gutpela disisen. (Ritim Jems 1:5.) Yumi ken mekim wanem sapos yumi pilim olsem Jehova i no bekim hariap beten bilong yumi? Jems i tok yumi mas “wok yet long askim” God. Jehova i no inap kros sapos yumi wok yet long askim em long givim yumi savetingting. Em i no inap belhat long yumi. Papa bilong yumi long heven i save “amamas long givim” yumi savetingting taim yumi beten na askim em long givim yumi savetingting bilong karim ol hevi. (Sng. 25:12, 13) Em i lukim ol hevi yumi karim, em i pilim tru bel hevi bilong yumi, na em i redi long helpim yumi. Tru trumas, dispela i ken mekim yumi amamas! Tasol long wanem rot Jehova i save givim yumi savetingting?

11. Wanem narapela samting yumi mas mekim bilong kisim savetingting?

¹¹ Jehova i save givim yumi savetingting long rot bilong Baibel. (Prov. 2:6) Bilong kisim dispela savetingting, yumi mas stadi long Baibel na ol buk na nius em tok bilong ol i kam long Baibel. Yumi mas kisim save, na i no dispela tasol, yumi mas mekim sampela samting moa. Yumi mas larim savetingting bilong God i stiaim yumi taim yumi bihainim ol tok yumi stadi long en. Jems i tok: “Yupela i mas kamap ol man bilong bihainim tok, na no ken kamap man bilong harim nating tasol.” (Jems 1:22) Taim yumi bihainim ol tok bilong God, yumi bai kisim moa yet pasin bilong stap bel isi, wokim gut tingting, na pasin marimari. (Jems 3:17) Ol dispela pasin i helpim yumi long karim wanem wanem ol hevi i painim yumi na yumi holimpas yet amamas bilong yumi.

12. Wai na em i bikpela samting long yumi mas save gut long Baibel?

¹² Tok Bilong God i olsem wanpela mira, na em i save helpim yumi long luksave long ol pasin bilong yumi em yumi mas stretim. (Jems 1:23-25) Olsem, taim yumi stadi long Tok Bilong God, ating yumi luksave olsem yumi mas kisim pasin bilong bosim bel. Yumi ken larim Jehova i helpim yumi na yumi ken lain long mekim pasin isi taim ol manmeri o ol hevi i mekim yumi belhat. Taim yumi gat pasin isi, em bai isi moa long yumi karim ol hevi i painim yumi. Na tu, yumi inap tingting klia moa na yumi inap mekim ol gutpela disisen. (Jems 3:13) Olsem na em i bikpela samting long yumi mas save gut long Baibel!

13. Wai na yumi mas stadi long eksampel bilong ol manmeri em Baibel i stori long ol?

¹³ Sampela taim yumi lain long abrusim wanpela samting bihain long yumi mekim popaia. Tasol dispela em i no gutpela rot bilong lainim samting. Gutpela rot bilong kisim savetingting em long lain long samting ol narapela i bin mekim na gutpela samting i kamap na lain long ol popaia bilong ol. Em as na Jems i kirapim yumi long skelim eksampel bilong ol manmeri em Baibel i stori long ol, olsem Abraham, Rahap, Jop, na Elaija. (Jems 2:21-26; 5:10, 11, 17, 18) Ol dispela gutpela wokman na wokmeri bilong Jehova i bin sanap strong na karim ol hevi we inap pinisim amamas bilong ol. Pasin bilong ol long sanap strong i soim olsem yumi tu i ken mekim wankain samting taim yumi kisim helpim i kam long Jehova.

14-15. Sapos yumi holim tupela tingting na yumi no stretim, dispela inap mekim wanem long yumi?

¹⁴ Hevi: Pasin bilong holim tupela tingting. Sampela taim, ating yumi inap pilim hatwok long kliagut long sampela tok bilong Baibel. O ating Jehova i no bekim ol beten bilong yumi long rot yumi ting long en. Dispela inap mekim na yumi holim tupela tingting. Sapos yumi holim yet tupela tingting na yumi no stretim, dispela inap mekim bilip bilong yumi i kamap slek na bagarapim pasin pren bilong yumi wantaim Jehova. (Jems 1:7, 8) Na tu, dispela inap mekim na yumi lusim pasin bilong bilip na wet long ol gutpela samting i kamap bihain.

¹⁵ Aposel Pol i tok pasin bilong yumi long bilip na wetim ol gutpela samting i kamap bihain, dispela i olsem wanpela anka. (Hib. 6:19) Anka i save holim sip i stap gut long ples bilong en long taim bilong bikpela win na ren na i pasim sip long trip i go antap long ol bikpela ston. Tasol anka i no inap mekim gut wok bilong en sapos sen bilong en i save pas long sip i bruk. Ros i save daunim strong bilong sen bilong anka, olsem tasol, pasin bilong holim tupela tingting inap daunim bilip bilong yumi. Taim pasin birua i kamap, man bilong holim tupela tingting inap lusim bilip olsem Jehova bai inapim ol tok promis bilong em. Sapos yumi lusim bilip, orait yumi no gat gutpela samting bilong wetim i kamap bihain. Olsem Jems i tok, man i gat tupela tingting “em i olsem weiv bilong solwara em win i sakim i go i kam.” (Jems 1:6) Man i gat tupela tingting, em i no inap tru long stap amamas!

16. Yumi mas mekim wanem sapos yumi gat tupela tingting?

¹⁶ Rot bilong stretim: Stretim tingting bilong yu; strongim bilip bilong yu. Hariap na mekim samting. Long taim bilong profet Elaija, lain bilong Jehova i holim tupela tingting long bilip bilong ol. Olsem na Elaija i tokim ol: “Yupela ol manmeri bilong tupela tingting, wanem taim bai yupela i gat wanpela tingting tasol? Sapos Jehova em i God tru, orait yupela i mas lotuim em. Tasol sapos Bal em i God tru, orait yupela i mas lotuim em!” (1 Kin. 18:21) Dispela tok i stret long yumi tu long nau. Yumi mas mekim sampela wok painimaut bilong pruvim long yumi yet olsem Jehova em i God, na Baibel em Tok bilong Em, na ol Witnes Bilong Jehova ol i lain bilong Em. (1 Tes. 5:21) Taim yumi mekim olgeta dispela samting, dispela bai tekewe tupela tingting bilong yumi na strongim bilip bilong yumi. Sapos yumi nidim helpim long stretim tupela tingting yumi holim, orait yumi ken askim ol elda. Yumi mas hariap long stretim tupela tingting yumi holim sapos yumi laik amamas yet long mekim wok bilong Jehova!

17. Wanem samting inap kamap sapos yumi lusim pasin bilong yumi long strongim bel?

¹⁷ Hevi: Yumi bel hevi. Baibel i tok: “Sapos yu bel hevi long taim pen na hevi i painim yu, strong bilong yu bai pinis.” (Prov. 24:10) Tok Hibru ol i tanim olsem “bel hevi” inap makim tu “lusim pasin bilong strongim bel.” Olsem na sapos yu lusim pasin bilong yu long strongim bel, em isi long yu inap lusim pasin bilong yu long stap amamas.

18. Pasin bilong sanap strong i makim wanem samting?

¹⁸ Rot bilong stretim: Wetim Jehova long givim yu pasin bilong strongim bel long karim hevi. Yumi mas i gat strongpela bel bambai yumi ken sanap strong na karim ol hevi. (Jems 5:11) Tok em Jems i yusim long hia olsem “sanap strong” i makim pasin bilong wanpela long sanap strong i stap long wanpela hap. Yumi inap tingim soldia i strongim bel na sanap strong agensim birua na em i no surik liklik, maski birua i pait strong long em.

19. Yumi inap kisim wanem skul long eksampel bilong aposel Pol?

¹⁹ Aposel Pol i stap olsem gutpela eksampel long pasin bilong strongim bel na pasin bilong sanap strong na karim ol hevi. Sampela taim em i pilim olsem em i no gat strong. Tasol em i sanap strong bikos em i wetim Jehova long givim em strong em i nidim. (2 Kor. 12:8-10; Fili. 4:13) Yumi ken gat wankain strong na pasin bilong strongim bel sapos yumi mekim pasin daun na luksave olsem yumi nidim helpim bilong Jehova.—Jems 4:10.

20-21. Yumi ken save tru long wanem samting?

²⁰ Yumi ken save tru olsem ol hevi i painim yumi ol i no strafe i kam long God. Jems i tokim yumi olsem: “Taim traim i painim wanpela man, em i no ken tok: ‘God i traim mi.’ Ol samting nogut i no inap traim God, na tu, God i no save traim man.” (Jems 1:13) Taim yumi bilip tru long dispela tok tru, yumi bai go klostu moa long gutpela Papa bilong yumi long heven.—Jems 4:8.

²¹ Jehova “i no save senis.” (Jems 1:17) Em i bin sapotim ol Kristen long taim bilong ol aposel taim ol i karim ol hevi, na em bai helpim yumi olgeta wan wan long nau tu. Wok yet long askim Jehova long givim yu savetingting, bilip, na pasin bilong strongim bel. Em bai bekim ol beten bilong yu. Na bai yu ken save tru olsem em bai helpim yu long stap amamas yet taim yu sanap strong na karim ol hevi!