Abrusim Ol Poroman Nogut Long Haptaim Bilong Las De

 1. Yumi stap long wanem kain haptaim?

YUMI stap long haptaim i pulap tru long ol hevi. Baibel i kolim haptaim i kirap long 1914 olsem “taim bilong las de” na “taim nogut.” Planti hevi bai kamap na “givim hatwok long ol man,” na ol dispela hevi bai i nogut moa winim ol hevi i bin kamap long bipo. (2 Tim. 3:1-5) Baibel i tok profet olsem “ol man nogut na ol man bilong giaman bai i go nogut moa.”—2 Tim. 3:13.

 2. Long nau, ol man i save kisim amamas long wanem ol rot? (Lukim piksa long kirap bilong stadi.)

² Ol manmeri i traim kain kain rot bilong kisim amamas, na planti bilong ol i lukim ol piksa bilong ol pasin em Baibel i tambuim, o ol yet i mekim ol dispela pasin. Ol i laikim ol kain pasin olsem pasin bilong pait, pasin pamuk, mekim wok bilong spirit nogut, na ol narapela pasin we i no stret. Ol program i stap long Intenet, televisen, muvi, na ol stori i kamap long ol buk na magasin i kirapim ol man long kisim tingting olsem i no gat rong long mekim pasin pamuk na pait na bagarapim man. Long sampela ples, lo bilong gavman i tok orait long sampela pasin we bipo i no stret long mekim. Tasol God i no laikim ol dispela pasin.—Ritim Rom 1:28-32.

 3. Ol manmeri bilong graun i holim wanem tingting long ol manmeri i bihainim ol lo bilong Baibel?

³ Long taim bilong ol aposel, ol disaipel bilong Jisas i sakim ol amamas nogut. Na tu, ol i bihainim pasin bilong God, olsem na ol manmeri i tok bilas long ol na mekim nogut long ol. Aposel Pita i tok: “Yupela i no poroman moa wantaim ol long ol dispela pasin nogut, olsem na ol i kirap nogut na ol i wok long tok bilas long yupela.” (1 Pita 4:4) Long nau, ol manmeri bilong graun i holim tingting kranki long ol manmeri i bihainim ol lo bilong God. Na tu, “olgeta man husat i laik bihainim pasin bilong givim bel tru long God olsem ol disaipel bilong Krais Jisas, ol man bai mekim nogut long ol tu.”—2 Tim. 3:12.

 4. Baibel i givim wanem skultok long yumi?

⁴ Baibel i givim skultok long ol manmeri i laik mekim laik bilong God. Baibel i tok, ol i no ken laikim pasin bilong dispela graun. (Ritim 1 Jon 2:15, 16.) Satan em “god bilong dispela graun,” na em i stiaim ol lotu, lain politik, na wok bisnis bilong dispela graun—wok bisnis i makim tu ol program i kamap long redio na televisen. (2 Kor. 4:4; 1 Jon 5:19) Olsem na yumi ol Kristen i mas abrusim ol poroman nogut. Baibel i tokaut stret olsem: “Yupela i no ken larim ol arapela i giamanim yupela. Ol poroman nogut i save bagarapim ol gutpela pasin bilong man.”—1 Kor. 15:33.

5, 6. Yumi no ken poromanim wanem kain lain? Bilong wanem?

⁵ Sapos yumi laik bihainim yet stretpela pasin, orait yumi no ken kamap pren bilong ol manmeri i mekim ol pasin nogut. Dispela tok lukaut i makim olsem yumi no ken poromanim ol manmeri husat i no stap insait long tok i tru na ol i save bihainim ol pasin i no stret. Na tu, yumi no ken poromanim ol manmeri i tok olsem ol i lotuim Jehova, tasol long laik bilong ol yet ol i brukim ol lo bilong em. Sapos ol dispela kain Kristen i mekim bikpela rong na ol i no tanim bel, orait yumi no ken poromanim ol.—Rom 16:17, 18.

⁶ Sapos yumi poromanim ol manmeri husat i no bihainim ol lo bilong God, yumi bai tingting long bihainim pasin bilong ol bambai ol i ken orait long yumi. Kain olsem, sapos yumi poromanim ol manmeri husat i save mekim pasin pamuk, yumi tu inap kisim laik nogut bilong mekim pasin pamuk. Dispela hevi i bin painim sampela Kristen em ol i dediket pinis long God, na sampela bilong ol i raus long kongrigesen, long wanem, ol i no tanim bel. (1 Kor. 5:11-13) Sapos ol i no tanim bel, ol inap mekim pasin em Pita i stori long en.—Ritim 2 Pita 2:20-22.

 7. Yumi mas poromanim wanem kain ol manmeri?

⁷ Yumi laik soim gutpela pasin long ol manmeri husat i no bihainim ol stretpela lo bilong God, tasol yumi no ken kamap pren bilong ol. Sapos wanpela Witnes Bilong Jehova i stap singel, orait i no stret long em i kamap boipren o gelpren bilong man o meri husat i no dediket long God na i no rispektim ol stretpela lo bilong Em. Em i bikpela samting tru long yumi mas i stap gut long God, na yumi no ken tingting long kisim biknem long ai bilong ol manmeri i no bihainim ol lo bilong Jehova. Yumi mas poromanim ol manmeri husat i mekim laik bilong God. Jisas i tok: “Man o meri husat i bihainim laik bilong God, dispela man o meri em i brata na susa na mama bilong mi.”—Mak 3:35.

 8. Wanem hevi i painim lain Israel bilong bipo taim ol i poromanim ol lain i no bihainim ol lo bilong God?

⁸ Bikpela hevi i painim lain Israel taim ol i poromanim ol manmeri husat i no bihainim ol lo bilong God. Taim Jehova i kisim bek lain Israel long kalabus long Isip na bringim ol i go long Graun Bilong Promis, em i tokim ol olsem ol i no ken poromanim ol manmeri bilong ol narapela lain. Em i tok: “Yupela i no ken brukim skru na lotuim ol giaman god bilong ol dispela lain. Na yupela i no ken kisim pasin bilong lotu bilong ol. Yupela i mas bagarapim ol giaman god bilong ol na brukim ol ston bilong lotu. Yupela i mas lotuim mi tasol. Mi God, Bikpela bilong yupela.” (Kis. 23:24, 25) Sori tru olsem planti manmeri bilong lain Israel i no bihainim lo bilong God. (Sng. 106:35-39) Ol i no stap gut long God, olsem na Jisas i tokim ol: “Harim! Nau dispela haus i stap long han bilong yupela.” (Mat. 23:38) Jehova i givim baksait long lain Israel, na em i orait long wanpela nupela lain i kamap kongrigesen Kristen.—Apo. 2:1-4.

 9. Bilong wanem ol samting yumi ritim long ol buk na lukim long televisen inap pundaunim ol Kristen?

⁹ Planti samting yumi ritim long ol buk na lukim long televisen inap pundaunim ol Kristen long sait bilong bilip. Ol dispela samting i no inap helpim ol Kristen long bilip strong long Jehova na ol tok promis bilong em. Ol dispela singsing na muvi i makim stret ol tingting na pasin bilong ol manmeri bilong dispela graun em Satan i bosim. Olsem na yumi mas was gut bambai yumi inap sakim ol samting we inap kirapim “olgeta laik nogut bilong dispela graun.”—Tai. 2:12.

10. Wanem samting bai kamap long ol muvi na musik bilong dispela graun?

¹⁰ Klostu nau, ol buk nogut na ol piksa nogut bai pinis olgeta. Olgeta dispela samting bai pinis taim God i bagarapim ol man nogut. Baibel i tok: “Ol manmeri i stap longwe long God, ol bai pinis na laik bilong ol tu bai pinis, tasol man i bihainim laik bilong God em bai stap oltaim oltaim.” (1 Jon 2:17) Olsem tasol, man bilong raitim song i tok: “Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” Orait, ol bai i stap amamas inap hamas yia? “Ol stretpela man bai i kisim graun God i givim ol, na bai ol i stap oltaim long en.”—Sng. 37:9, 11, 29.

11. God i yusim wanem rot long redim ol samting bilong strongim bilip bilong ol manmeri bilong em?

¹¹ Long dispela haptaim bilong las de, oganaisesen bilong Jehova i wokim ol buk na ol vidio bilong kirapim yumi long bihainim ol pasin we bai helpim yumi long kisim laip oltaim. Jisas i beten long Jehova na em i tok: “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.” (Jon 17:3) Papa bilong yumi long heven i yusim oganaisesen bilong em long redim planti samting bilong strongim bilip bilong yumi. Yumi amamas olsem yumi gat ol magasin, ol buklet, ol buk, ol vidio, na Web-sait bilong yumi long sapotim lotu i tru! Na tu, oganaisesen bilong God i stretim rot na winim 110 tausen kongrigesen long olgeta hap i mekim ol miting long olgeta wik. Long taim bilong ol miting na ol kibung, yumi save skelim ol tok bilong Baibel bilong strongim bilip bilong yumi long God na ol tok promis bilong em.—Hib. 10:24, 25.

12. Olsem wanem yumi inap bihainim skultok bilong Baibel long “maritim man i bihainim Bikpela”?

¹² Sapos singel Kristen i laik marit, orait em i mas abrusim ol poroman nogut. Baibel i tokaut klia olsem: “Yupela i no ken pas wantaim ol man i no bilip. Olsem wanem? Stretpela pasin na pasin bilong sakim lo, tupela i ken poroman wantaim? O olsem wanem, lait i ken bung wantaim tudak?” (2 Kor. 6:14) Baibel i kamapim tok bilong helpim ol Kristen husat i laik marit. Baibel i tok, ol “i mas maritim man i bihainim Bikpela,” na dispela i makim olsem ol i mas maritim man o meri husat i dediket long Jehova na kisim baptais, na em i save bihainim ol stretpela lo bilong Baibel. (1 Kor. 7:39) Sapos ol Kristen i maritim wanbilip, i olsem ol i kisim wanpela pren husat i dediket pinis long Jehova, na dispela pren bai helpim ol long i stap gut long God.

13. God i givim wanem tok long lain Israel long sait bilong marit?

¹³ Jehova i save long rot bilong helpim ol wokman bilong em, olsem na oltaim em i kamapim klia lo bilong em long sait bilong marit. Tingim tok em i bin givim long lain Israel long rot bilong Moses. Jehova i tokim lain Israel olsem ol i no ken poromanim ol manmeri bilong ol narapela kantri, na em i tok: “Yupela i no ken senisim meri wantaim ol, long wanem, ol bai i pulim ol pikinini bilong yupela i go longwe long Bikpela na bai ol i lotu long ol giaman god. Sapos ol pikinini i mekim olsem, orait Bikpela bai i belhat long yupela na wantu bai em i bagarapim yupela.”—Lo 7:3, 4.

14, 15. Wanem hevi i painim Solomon taim em i sakim lo bilong Jehova?

¹⁴ Solomon em pikinini bilong Devit, na em i kirap long mekim wok king taim em i yangpela yet. Olsem na Solomon i beten askim God long givim em savetingting, na God i givim samting em i askim long en. King Solomon i kisim biknem olsem man i pulap tru long savetingting. Taim kwin bilong Seba i go visitim Solomon, kwin i tok: “Pastaim mi no bin bilipim dispela tok. Tasol nau mi kam na mi lukim pinis long ai bilong mi yet. Na tru tumas, ol samting mi lukim nau i winim tru ol samting mi bin harim tok long en. Gutpela tingting na save bilong yu i moa yet na ol mani samting bilong yu i planti tumas.” (1 Kin. 10:7) Stori bilong Solomon i olsem tok lukaut bilong hevi inap kamap sapos Kristen i sakim lo bilong God long maritim wanbilip.—Sav. 4:13, 14.

¹⁵ God i mekim planti samting bilong helpim Solomon, tasol Solomon i sakim lo bilong God na em i maritim ol meri bilong ol narapela lain, em ol i no lotuim Jehova. Solomon i “laikim planti meri bilong ol arapela kantri,” olsem na em i gat 700 meri na 300 namba 2 lain meri. Wanem hevi i kamap? Taim Solomon i kamap lapun, “ol dispela meri bilong en i pulim tingting bilong en i go long ol giaman god, . . . [na] long dispela pasin Solomon i mekim pasin nogut long ai bilong Bikpela.” (1 Kin. 11:1-6) Ol poroman nogut bilong Solomon i paulim tingting bilong em na kirapim em long lusim lotu i tru. Dispela stori i stap olsem tok lukaut long ol Kristen husat i tingting long maritim man o meri husat i no lotuim Jehova!

16. Wanem stiatok bilong Baibel i stret long ol Kristen husat i kisim tok i tru, tasol poroman marit i no kamap wanbilip?

¹⁶ Sapos tupela marit i no stap insait long Tok i Tru, na bihain meri tasol i kamap Witnes, orait em bai mekim wanem? Baibel i tok: “Yupela maritmeri, yupela i mas daun long ol man bilong yupela. Na sapos sampela bilong ol i no save bihainim tok bilong God, orait ol i ken lukim pasin bilong yupela. Na maski yupela i no mekim wanpela tok, ol inap kamap bilipman.” (1 Pita 3:1) Dispela tok i go long ol meri Kristen, tasol em i stret tu long ol man husat i kirap long lotuim Jehova tasol poroman marit i no kamap wanbilip. Baibel i kamapim klia dispela stiatok: Yu mas i stap gutpela poroman marit, na bihainim ol stretpela lo bilong God long sait bilong marit. Planti poroman marit i kam insait long Tok i Tru, long wanem, ol i lukim olsem poroman marit i bihainim ol lo bilong God na senisim pasin.

17, 18. Bilong wanem Noa na ol Kristen long taim bilong ol aposel i bin abrusim bagarap?

¹⁷ Maski poroman nogut i save bagarapim ol gutpela pasin bilong yumi, ol gutpela poroman i save helpim yumi. Noa i bin i stap namel long ol manmeri husat i save mekim pasin nogut, tasol em i no tingting long kamap pren bilong ol dispela manmeri. Long taim bilong Noa, Jehova “i lukim pasin bilong ol manmeri long olgeta hap i nogut tru. Ol manmeri i tingting tasol long ol samting nogut.” (Stt. 6:5) Olsem na God i tingting strong long kamapim tait wara long olgeta hap bilong graun na pinisim ol manmeri nogut. Tasol “Noa em i gutpela man, na wokabaut bilong en i stret long ai bilong God. Em i pren tru bilong God.”—Stt. 6:7-10.

¹⁸ Noa i sakim ol manmeri husat i no bihainim ol pasin bilong God. Em wantaim 7-pela long famili bilong em i bisi long mekim wok em God i givim long ol—ol i wokim sip. Na tu, “Noa em man bilong tokaut long stretpela pasin.” (2 Pita 2:5) Noa i bisi long autim tok, wokim sip, na pas gut wantaim famili bilong em, na long dispela rot em i mekim ol gutpela wok em God i amamas long en. Olsem na Noa na famili bilong em i abrusim bagarap long Bikpela Tait. Yumi mas tenkyu tru long ol, long wanem, yumi olgeta husat i stap laip long nau, yumi ol tumbuna pikinini bilong ol manmeri husat i lotuim Jehova—em Noa, meri bilong em, ol pikinini man bilong em wantaim ol meri bilong ol. Long taim bilong ol aposel, ol Kristen i stap longwe long ol manmeri husat i no bihainim ol lo bilong God. Olsem na long 70 C.E., ol i abrusim bagarap taim ol birua i bagarapim Jerusalem na pinisim pasin na lo ol Juda i stap aninit long en.—Luk 21:20-22.

19. Yumi mas mekim wanem bambai God i ken orait long yumi?

¹⁹ Yumi lotuim Jehova, olsem na yumi mas bihainim ol gutpela pasin bilong Noa na famili bilong em, na ol Kristen long taim bilong ol aposel. Yumi stap namel long planti milion bratasista em ol i holimpas bilip, olsem na yumi mas i stap longwe long ol pasin nogut bilong dispela graun na pas gut wantaim ol bratasista bilong yumi. Sapos yumi pas gut wantaim ol manmeri husat i larim savetingting bilong God i stiaim ol, dispela bai helpim yumi long “sanap strong long bilip” long dispela taim nogut i pulap tru long ol hevi. (1 Kor. 16:13; Snd. 13:20) Tingim ol gutpela blesing yumi bai kisim long bihain! Sapos yumi olgeta wan wan i skelim gut ol lain yumi poromanim long dispela haptaim bilong las de, yumi inap abrusim bagarap na kisim laip long nupela taim em klostu nau Jehova bai kamapim, na stretpela pasin tasol bai i stap long en!