Pilim Tru Bikpela Pasin Helpim Bilong God

1, 2. (a) Stori long ol samting em papa bilong gaden wain i mekim. (b) Olsem wanem dispela tok piksa i kamapim klia pasin bilong givim samting na bikpela pasin helpim?

PAPA bilong gaden wain i go long maket long moningtaim long haiarim ol man long i go wok long gaden wain bilong em. Em i painim sampela wokman na ol i wanbel long pe em bai givim long ol, na ol i go wok long gaden wain. Tasol papa bilong gaden i laikim planti moa wokman, olsem na em i go bek long maket long haiarim sampela moa. Em i tok ol lain i kam wok long apinun bai kisim wankain pe olsem ol lain i kam wok long moningtaim. Long apinun, em i bungim olgeta wokman na em i givim wankain pe long olgeta wan wan bilong ol, maski ol i wok planti aua o wanpela aua tasol. Taim ol wokman husat i kirap wok long moningtaim i luksave long dispela, ol i komplein. Tasol papa bilong gaden i tokim ol: ‘Yumi bin pasim tok long pe mi bai givim, a? O ating i no stret long mi yet i makim hamas pe mi laik givim long olgeta wokman bilong mi, a? O ating yupela i bel nogut, long wanem, mi gat pasin bilong givim samting, a?’—Mat. 20:1-15.

² Tok piksa bilong Jisas i kirapim yumi long tingim wanpela pasin bilong Jehova em Baibel i stori planti taim long en—“bikpela pasin helpim.”^[1] (Ritim 2 Korin 6:1.) Ol wokman husat i wok 1 aua tasol long gaden wain, ol i no winim mak bilong kisim pe bilong de olgeta. Tasol papa bilong gaden wain i soim bikpela pasin helpim long ol. Planti Baibel i yusim dispela tok, “marimari,” taim ol i trensletim tok i gat mining olsem, “bikpela pasin helpim.” Wanpela saveman i tok: “Bikpela poin bilong dispela tok i makim olsem man i kisim nating wanpela presen na em yet i no bin mekim wanpela samting i stret long em inap kisim dispela presen.”

3, 4. (a) Bilong wanem Jehova i mekim bikpela pasin helpim long ol manmeri? (b) Olsem wanem Jehova i soim bikpela pasin helpim long yumi?

³ Baibel i stori long “bikpela pasin helpim bilong God.” (Efe. 3:7) Bilong wanem Jehova i soim “bikpela pasin helpim” long yumi? Em i mekim long wanem rot? Sapos yumi bin mekim olgeta samting Jehova i laik bai yumi mekim, yumi inap tok olsem i stret em i soim bikpela pasin helpim long yumi. Tasol yumi no mekim wanpela samting. Olsem na King Solomon i tok: “I no gat wanpela stretpela man i save mekim gutpela pasin oltaim. Nogat. Sampela taim em tu i mekim sin.” (Sav. 7:20) Aposel Pol tu i tok: “Olgeta man i bin mekim sin na ol i sot long kamapim ol gutpela pasin bilong God,” na “pe bilong sin em dai.” (Rom 3:23; 6:23a) I stret yumi kisim dispela pe.

⁴ Jehova i soim bikpela pasin helpim tru long ol sinman, na dispela i kamapim klia olsem em i laikim tru yumi. Em i givim nambawan gutpela presen, em “Pikinini tru bilong en,” husat i kam daun long graun na em i dai bilong helpim yumi. (Jon 3:16) Olsem na Pol i stori long Jisas olsem: “Em i kisim glori na ona. Inap sotpela taim namba bilong em i no winim namba bilong ol ensel, bai em i ken kisim ples bilong olgeta manmeri na i dai. Dispela i kamap long rot bilong bikpela pasin helpim bilong God.” (Hib. 2:9) Yes, “presen God i givim em laip oltaim long rot bilong Krais Jisas, Bikpela bilong yumi.”—Rom 6:23b.

5, 6. Wanem ol samting i kamap taim (a) sin i bosim yumi? (b) bikpela pasin helpim i bosim yumi?

⁵ Wai na yumi gat sin na yumi save dai? Baibel i tok: “Rong bilong wanpela man [Adam] i mekim na dai i stap olsem king” bilong ol lain tumbuna pikinini bilong Adam. (Rom 5:12, 14, 17) Yumi amamas tru olsem yumi gat rot long daunim sin bambai sin i no ken i stap moa olsem king. Taim yumi bilip long ofa bilong Krais long baim bek man, i olsem yumi larim bikpela pasin helpim bilong Jehova i stap olsem king bilong yumi. Bilong wanem yumi tok olsem? Baibel i tok: “Taim ol man i mekim planti sin moa, God i kamapim moa yet bikpela pasin helpim long ol. Wanem as bilong dispela samting? Em olsem: Sin na dai i stap olsem king, olsem tasol bikpela pasin helpim bai stap olsem king long rot bilong stretpela pasin na em bai kamapim laip oltaim long rot bilong Jisas Krais.”—Rom 5:20, 21.

⁶ Maski yumi gat sin, yumi no ken larim sin i bosim yumi. Taim yumi mekim sin, yumi mas askim Jehova long fogivim yumi. Pol i givim dispela tok lukaut long ol Kristen: “Sin i no ken stap olsem bos bilong yupela, long wanem, yupela i no stap aninit long lo, yupela i stap aninit long bikpela pasin helpim bilong God.” (Rom 6:14) Olsem na yumi larim bikpela pasin helpim bilong God i stap olsem bos bilong yumi. Dispela i helpim yumi olsem wanem? Pol i tok: “Bikpela pasin helpim bilong God . . . i skulim yumi long givim baksait long olgeta samting i no stret wantaim laik bilong God na long givim baksait long olgeta laik nogut bilong dispela graun. Na tu, dispela pasin i skulim yumi long bihainim gutpela tingting na stretpela pasin na pasin bilong givim bel tru long God nau long dispela taim.”—Tai. 2:11, 12.

7, 8. Olsem wanem yumi save kisim “kain kain presen” taim Jehova i soim bikpela pasin helpim long yumi? (Lukim ol piksa long kirap bilong stadi.)

⁷ Aposel Pita i tok: “Yupela ol gutpela bosboi bilong ol kain kain presen em bikpela pasin helpim bilong God i as bilong en. Yupela olgeta wan wan i bin kisim presen, olsem na yupela i mas yusim ol dispela presen bilong helpim ol arapela.” (1 Pita 4:10) Dispela skripsa i givim wanem save long yumi? Maski wanem ol samting i putim hevi long yumi, Jehova inap helpim yumi long karim hevi. (1 Pita 1:6) Oltaim God bai soim bikpela pasin helpim na em bai strongim yumi long winim hevi.

⁸ Tru tumas, Jehova i save soim bikpela pasin helpim long kain kain rot. Aposel Jon i tok: “Yumi olgeta i bin kisim moa yet bikpela pasin helpim long em, long wanem, bikpela pasin helpim i pulap long em.” (Jon 1:16) Olsem na yumi save kisim planti blesing. Wanem sampela bilong ol dispela blesing?

 9. (a) Bikpela pasin helpim bilong Jehova i helpim yumi olsem wanem? (b) Olsem wanem yumi inap soim tenkyu bilong yumi long God?

⁹ Fogivim sin bilong yumi. Jehova i soim bikpela pasin helpim, olsem na em i save fogivim sin bilong yumi—em bai mekim olsem sapos yumi tanim bel na wok strong long sakim ol laik nogut em sin i save kamapim. (Ritim 1 Jon 1:8, 9.) Pasin marimari bilong God i mas kirapim yumi long tok tenkyu long em na litimapim nem bilong em. Pol i tokim ol Kristen God i makim: “Yumi bin stap aninit long strong bilong tudak, na [Jehova] i bin kisim bek yumi na putim yumi i go insait long kingdom bilong dispela Pikinini em i laikim tumas. Long rot bilong pe bilong baim bek man, Pikinini bilong en i mekim yumi i kamap fri, dispela i makim olsem ol sin bilong yumi i tekewe.” (Kol. 1:13, 14) Taim God i fogivim sin bilong yumi, dispela i opim rot bilong yumi long kisim planti gutpela blesing.

10. Bikpela pasin helpim bilong God i opim rot na yumi kisim wanem blesing?

¹⁰ Kamap gutpela pren bilong God. Yumi gat sin taim yumi bon, olsem na yumi stap olsem ol birua bilong God. Pol i tok: “Taim yumi bin stap birua bilong God, yumi bin kamap wanbel wantaim em long rot bilong dai bilong Pikinini bilong en.” (Rom 5:10) Yumi kamap wanbel wantaim Jehova, olsem na yumi inap kamap gutpela pren bilong em. Pol i kamapim klia olsem bikpela pasin helpim bilong Jehova i opim rot long yumi inap kamap wanbel na pas gut wantaim Em. Pol i tok: “Yumi bilip na God i kolim yumi stretpela manmeri. Olsem na yumi mas stap wanbel yet wantaim God long rot bilong Bikpela bilong yumi, Jisas Krais. Yumi bilip long em na rot i op long yumi kisim bikpela pasin helpim, em dispela pasin nau yumi wok long kisim.” (Rom 5:1, 2) Dispela em gutpela blesing tru!

11. Olsem wanem ol Kristen God i makim i stiaim “ol arapela sipsip” long bihainim stretpela pasin?

¹¹ Helpim yumi long bihainim stretpela pasin. Yumi olgeta i gat sin, olsem na yumi no save bihainim stretpela pasin. Tasol Daniel i tok profet olsem long taim bilong pinis, “ol man i gat gutpela save na tingting,” em hap lain bilong ol Kristen God i anointim na ol i stap yet long graun, ol bai “stiaim planti manmeri long bihainim stretpela pasin.” (Ritim Daniel 12:3.) Ol i mekim wok bilong autim tok na skulim ol man, na long dispela rot ol i stiaim planti milion manmeri bilong lain “arapela sipsip” long bihainim pasin i stret long ai bilong Jehova. (Jon 10:16) Bikpela pasin helpim bilong Jehova i opim rot na dispela samting inap kamap. Pol i tok: “God i kamapim bikpela pasin helpim long ol, na long wok bilong Krais Jisas long givim pe bilong baim bek man, God i kolim ol stretpela manmeri, na dispela i wanpela presen God i givim ol.”—Rom 3:23, 24.

12. Olsem wanem beten i kamapim klia bikpela pasin helpim bilong God?

¹² Go klostu long God long rot bilong beten. Jehova i soim bikpela pasin helpim na em i opim rot long yumi inap beten long em, na i olsem yumi go klostu long sia king bilong em long heven na toktok wantaim em. Pol i kolim sia king bilong Jehova olsem “sia king bilong bikpela pasin helpim,” na em i kirapim yumi long i go klostu long dispela sia king na “yumi no ken surik long kamapim tingting bilong yumi.” (Hib. 4:16, futnot) Pikinini Bilong Jehova i opim rot, olsem na “long rot bilong em, yumi stap fri long toktok na yumi ken i go klostu long God na i no pret. Yumi bilip long Jisas na yumi mekim olsem.” (Efe. 3:12) Yumi inap toktok wantaim Jehova long rot bilong beten, na dispela tu em wanpela gutpela blesing yumi kisim long bikpela pasin helpim bilong em.

13. Olsem wanem God inap “mekim bikpela pasin helpim long yumi long taim stret”?

¹³ Kisim helpim long taim stret. Pol i tok yumi no ken surik long beten na toktok wantaim Jehova. “Yumi mekim olsem bai em i ken marimari long yumi na mekim bikpela pasin helpim long yumi long taim stret.” (Hib. 4:16b) Taim hevi i painim yumi o yumi tingting planti long sampela samting, yumi ken beten askim Jehova long marimari na helpim yumi. Em inap helpim yumi long rot bilong ol bratasista bambai “yumi gat strongpela bel na tok: ‘Jehova em i helpim bilong mi. Mi no inap pret. Ol man bai mekim wanem long mi?’”—Hib. 13:6.

14. Olsem wanem bikpela pasin helpim bilong Jehova i helpim yumi taim yumi bel hevi?

¹⁴ Mekim isi bel bilong yumi. Bikpela pasin helpim bilong Jehova i save mekim isi bel bilong yumi taim yumi bel hevi, na dispela tu em wanpela gutpela blesing. (Sng. 51:17) Ol birua i mekim nogut long ol Kristen long Tesalonaika, olsem na Pol i tokim ol: “God, Papa bilong yumi, em man i bin laikim yumi. Na long rot bilong bikpela pasin helpim em i bin givim yumi bel isi i save stap oltaim oltaim, na gutpela samting long bilip na wet long en. Em wantaim Bikpela bilong yumi Jisas Krais, ol i ken mekim isi bel bilong yupela na mekim yupela i stap strong.” (2 Tes. 2:16, 17) Bikpela pasin helpim bilong Jehova i kirapim em long lukautim yumi, na dispela i mekim isi bel bilong yumi!

15. Bikpela pasin helpim bilong God i opim rot na yumi gat wanem hop?

¹⁵ Yumi inap kisim laip oltaim. Yumi sinman, olsem na i no gat wanpela samting yumi yet inap mekim bilong kisim laip oltaim. (Ritim Song 49:7, 8.) Maski i olsem, Jehova yet i stretim rot long yumi inap kisim dispela laip. Jisas i promisim ol disaipel: “Laik bilong Papa bilong mi i olsem, man i luksave long Pikinini na bilip long em, dispela man i mas kisim laip oltaim.” (Jon 6:40) Tru tumas, hop bilong kisim laip oltaim em wanpela presen God i givim, na dispela i kamapim klia bikpela pasin laikim bilong em. Pol i tenkyu tru long dispela hop na i tok: “Bikpela pasin helpim bilong God i kamap ples klia pinis, na long dispela rot God i kisim bek olgeta kain man.”—Tai. 2:11.

16. Olsem wanem sampela Kristen bilong pastaim i nogutim bikpela pasin helpim bilong God?

¹⁶ Bikpela pasin helpim bilong Jehova i opim rot na yumi kisim planti blesing. Tasol dispela i no makim olsem God bai orait long olgeta kain pasin yumi mekim. Namel long ol Kristen bilong pastaim, sampela man “i ting bikpela pasin helpim bilong God i givim rot long ol long mekim pasin bikhet na ol i no sem.” (Jut 4) Ol dispela lain i ting olsem ol inap mekim sin na bihain ol i ken askim Jehova long fogivim ol. Ol i laik pulim ol arapela Kristen long joinim ol long mekim pasin bikhet. Long nau tu, sapos wanpela Kristen i mekim olsem, “em i nogutim holi spirit em as bilong bikpela pasin helpim.”—Hib. 10:29.

17. Pita i givim wanem strongpela tok kaunsel?

¹⁷ Long tude, Satan i giamanim sampela Kristen na ol i holim tingting olsem ol i ken bihainim pasin bilong mekim sin bikos God bai marimari long ol. Em tru olsem Jehova i redi long lusim rong bilong ol man i tanim bel, tasol em i laik bai yumi pait strong long daunim ol laik nogut bilong sin. God i kirapim Pita long tok: “Ol pren tru, yupela i save pinis long ol dispela samting, olsem na yupela i mas lukaut. Nogut tingting kranki bilong ol dispela man bilong sakim lo i pulim yupela na yupela i pundaun long pasin bilong sanap strong. Bikpela pasin helpim na save bilong Jisas Krais, Bikpela na Seivia bilong yumi, i ken kamap bikpela moa yet long yupela.”—2 Pita 3:17, 18.

18. Jehova i mekim bikpela pasin helpim long yumi, olsem na yumi mas mekim wanem ol samting?

¹⁸ Jehova i soim pasin helpim long yumi, olsem na yumi mas mekim wok bilong givim biknem long em na helpim ol narapela manmeri. Yumi mas mekim wanem? Pol i tok: “Long bikpela pasin helpim yumi kisim long God, yumi gat ol narapela narapela presen. . . . Sapos man i kisim wok bilong helpim ol arapela, orait em i mas wok yet long helpim ol arapela; na man i kisim wok tisa, em i mas wok yet long mekim wok tisa; na man i save givim tok long ol arapela, em i mas wok yet long givim tok long ol arapela; . . . na man i save marimari long ol arapela, em i mas mekim wantaim amamas.” (Rom 12:6-8) Jehova i mekim bikpela pasin helpim long yumi, olsem na yumi gat wok long autim tok, skulim ol man long Baibel, mekim ol tok bilong strongim ol wanbilip, na fogivim man i rongim yumi.

19. Long neks stadi, yumi bai stori gut moa long wanem samting?

¹⁹ God i laikim tru yumi, olsem na yumi mas givim bel long “autim gut tru dispela gutnius bilong bikpela pasin helpim bilong God.” (Apo. 20:24) Yumi bai stori gut moa long dispela wok long neks stadi.