‘Kisim Olgeta Bikpela Strong Bilong Bikpela’
“Yupela i mas tingting long olgeta bikpela strong bilong en, na yupela i mas sanap strong.”—EFESUS 6:10.
1. (a) Wanem bikpela pait i bin kamap inap 3,000 yia i go pinis? (b) Bilong wanem Devit i winim dispela pait?
INAP 3,000 yia i go pinis, i gat tupela man i laik pait na ol i stap namel long tupela ami. Man i yangpela em Devit, mangi i save lukautim ol sipsip. Goliat i sanap long ai bilong em, na Goliat em i wanpela traipela man i gat bikpela strong. Hevi bilong klos pait em i werim em 57 kilogram samting na em i karim wanpela traipela spia na bainat. Devit i no werim wanpela klos pait, na em i holim wanpela katapel tasol. Goliat, dispela traipela man Filistia, i lukim Devit olsem wanpela yangpela mangi na em i ting em i samting nating tasol. (1 Samuel 17:42-44) Ating olgeta man long tupela sait wantaim ol i lukluk i stap na ol i pilim olsem Goliat bai win. Tasol ol strongpela man i no save winim pait long olgeta taim. (Saveman 9:11) Devit i winim pait, long wanem, Jehova i bin givim strong long em. Em i tok: “Bikpela yet bai i winim dispela pait.” Baibel i tok: “Devit i win na i kilim Goliat long katapel wantaim ston tasol.”—1 Samuel 17:47, 50.
2. Ol Kristen i save insait long wanem kain pait?
2 Ol Kristen i no save insait long ol pait tru tru. I tru ol i save stap wanbel na stap isi wantaim olgeta man, tasol ol i insait long wanpela pait bilong spirit wantaim ol birua i gat bikpela strong tru. (Rom 12:18) Long laspela sapta bilong pas em i bin raitim long ol Efesus, Pol i stori long wanpela pait olgeta Kristen i insait long en. Em i tok: “Yumi no save pait long ol manmeri. Nogat. Yumi pait long ol strongpela spirit na ol gavman na ol kain kain samting i gat strong, ol i save bosim graun long dispela taim bilong tudak. Yumi pait long olgeta spirit nogut i stap antap.”—Efesus 6:12.
3. Olsem Efesus 6:10 i tok, yumi mas kisim wanem samting na bai yumi win?
3 Ol dispela “spirit nogut” em Satan na ol spirit nogut bilong em, ol i laik bagarapim pasin bilong yumi long pas gut wantaim God Jehova. Strong bilong ol i winim tru strong bilong yumi, olsem na i stap bilong yumi i kain olsem Devit, yumi mas kisim strong God i givim yumi bilong winim pait. Tru tumas, Pol i strongim yumi long kisim ‘olgeta bikpela strong bilong Bikpela, na sanap strong.’ (Efesus 6:10) Aposel Pol i mekim dispela tok pinis, na bihain em i stori long ol samting bilong helpim yumi long ol samting bilong spirit na ol pasin Kristen em inap helpim yumi long win tru.—Efesus 6:11-17.
4. Wanem tupela bikpela poin bai yumi skelim long dispela stadi?
4 Nau bai yumi skelim tok Baibel i mekim long ol pasin em birua bilong yumi i strong long mekim. Na bihain bai yumi stori long ol samting yumi mas mekim bilong sakim em na lukautim yumi yet. Sapos yumi bihainim ol tok bilong Jehova, yumi ken bilip tru olsem ol birua i no inap winim yumi.
Yumi Pait Long Olgeta Spirit Nogut
5. Olsem wanem dispela tok “pait,” olsem resling, i stap long Efesus 6:12 i helpim yumi long luksave long astingting bilong Satan?
5 Pol i tok yumi “pait long olgeta spirit nogut i stap antap.” Nambawan spirit nogut, em Satan, “em hetman bilong ol spirit nogut.” (Matyu 12:24-26) Long tok ples ol i bin raitim Baibel long en long pastaim ol i kolim wanpela tok i makim dispela pait i kain olsem spot resling olsem ol i pait long han wantaim narapela man. Long resling ol i bin mekim long Grik long bipo, narapela i wok long sakim narapela na mekim em i no sanap gut na tromoi em i go long graun. Na olsem tasol, Satan i laik bai yumi i no sanap gut long samting bilong spirit. Olsem wanem em i ken mekim olsem?
6. Kamapim sampela tok bilong Baibel bilong soim olsem wanem Satan inap yusim kain kain pasin o trik bilong bagarapim bilip bilong yumi.
6 Satan inap bihainim pasin bilong snek, wanpela laion i singaut strong, o wanpela ensel bilong lait. (2 Korin 11:3, 14; 1 Pita 5:8) Em inap yusim ol man bilong graun bilong mekim nogut long yumi o mekim yumi bel hevi. (KTH 2:10) Satan i bosim dispela graun olgeta, olsem na em inap yusim ol laik bilong graun na ol gutpela samting bilong en long kalabusim yumi. (2 Timoti 2:26; 1 Jon 2:16; 5:19) Em inap yusim ol tingting bilong dispela graun o bilong ol apostet bilong giamanim yumi, olsem em i bin giamanim Iv.—1 Timoti 2:14.
7. Wanem sampela samting ol spirit nogut i no inap mekim? Wanem sampela samting i save helpim yumi?
7 Tru i luk olsem yumi no inap winim strong na ol samting bilong pait bilong Satan na ol spirit nogut, tasol i gat sampela samting ol i no inap mekim. Ol dispela spirit nogut i no inap fosim yumi long mekim ol pasin nogut em Papa bilong yumi long heven i no orait long en. Yumi inap makim wanem samting yumi laik mekim, yumi inap bosim tingting na pasin bilong yumi. Na tu yumi no wanpis na mekim dispela pait. Tok Elisa i mekim long taim bilong em i stret tu long taim bilong yumi: “I tru ol i gat planti soldia, tasol yumi gat bikpela lain moa bilong helpim yumi.” (2 King 6:16) Baibel i strongim yumi olsem, sapos yumi stap aninit long God na sakim Satan, em bai ranawe long yumi.—Jems 4:7.
Save Pinis Long Tingting Bilong Satan
8, 9. Satan i kamapim wanem ol hevi long Jop bilong bagarapim pasin bilong em long stap gut long God? Wanem ol samting bilong bagarapim yumi long samting bilong spirit i save painim yumi long nau?
8 I no olsem yumi no save long tingting bilong Satan, nogat. Baibel i kamapim tingting na pasin bilong em. (2 Korin 2:11) Em i mekim kain kain samting long stretpela man Jop olsem, bikpela hevi tru long mani samting, indai bilong ol pikinini bilong em, sik na pen, na ol pren giaman i sutim tok nating long em. Jop i bel hevi na em i pilim olsem God i bin lusim em. (Jop 10:1, 2) Long nau ating Satan i no as na ol kain hevi olsem i painim ol man, tasol ol kain hevi i save painim planti Kristen, na Satan inap yusim ol dispela hevi bilong mekim wok bilong em.
9 Ol samting bilong bagarapim yumi long samting bilong spirit i kamap planti long dispela taim bilong pinis. Yumi stap namel long ol man we ol i putim ol samting bilong skin i go pas long ol samting bilong spirit. Ol buk, TV na vidio samting i kamapim olsem pasin pamuk em samting bilong amamas, i no bilong kamapim bel hevi. Na klostu olgeta man i bin kisim pasin bilong “laikim tumas ol kain kain pasin bilong amamas bilong dispela graun, na ol . . . i no laikim God.” (2 Timoti 3:1-5) Dispela kain tingting inap bagarapim yumi long ol samting bilong spirit sapos yumi no “wok strong long lukautim bilip bilong [yumi].”—Jut 3.
10-12. (a) Wanem wanpela tok lukaut Jisas i bin mekim long tok piksa bilong em long man i tromoi pikinini kaikai? (b) Stori long olsem wanem sampela samting inap karamapim ol samting bilong spirit.
10 Wanpela trik bilong Satan i save wok gut em bilong kirapim yumi long insait tru long ol pasin bilong dispela graun na pasin bilong kisim mani kago samting. Long tok piksa bilong Jisas long man i tromoi pikinini kaikai, Jisas i tok lukaut long pasin bilong ‘tingting planti long ol samting bilong graun, na wari long bungim planti mani. Ol dispela samting i karamapim tok bilong Kingdom.’ (Matyu 13:18, 22) Mining bilong tok Grik ol i tanim olsem “karamapim,” em “pasim olgeta.”
11 Long bikbus bilong ol ples i hat, i gat wanpela kain rop fik. Em i save go bikpela isi isi na i raunim wanpela diwai. Isi isi dispela rop i raunim tru diwai na ol rop bilong en long graun i kamap strong moa. Dispela fik i gat planti rop insait long graun na em i wok long kisim klostu olgeta gris i stap long graun long as bilong dispela diwai em i raunim, na ol lip bilong en i karamapim ol lip bilong diwai na diwai i no inap kisim lait. Bihain nau diwai i dai.
12 Long wankain pasin, isi isi pasin bilong tingting planti long ol samting bilong dispela graun na pasin bilong kisim planti mani na gutpela sindaun inap kisim planti taim na strong bilong yumi. Taim yumi tingting long ol samting bilong graun, em i isi long lusim stadi bilong yumi yet na yumi kisim pasin bilong lusim ol miting Kristen, na yumi no kisim ol kaikai bilong spirit. Pasin bilong painim ol samting bilong skin i kisim ples bilong pasin bilong mekim ol samting bilong spirit, na bihain em i isi long Satan i bagarapim yumi.
Yumi Mas Sanap Strong
13, 14. Yumi mas mekim wanem taim Satan i birua long yumi?
13 Pol i strongim ol wanbilip long “sanap strong na sakim olgeta kain pasin bilong trik na giaman Satan i save hait na mekim.” (Efesus 6:11) Tru, yumi no inap bagarapim Satan na ol spirit nogut. God i makim Jisas Krais long mekim dispela wok. (KTH 20:1, 2) Tasol inap long taim Jisas i rausim Satan, yumi mas “sanap strong” na bai em i no inap winim yumi.
14 Aposel Pita tu i kirapim yumi long sanap strong na sakim Satan. Em i tok: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai. Tasol yupela i mas i stap strong long bilip na sakim em. Yupela i save, ol arapela manmeri bilong God, ol i stap long olgeta hap bilong graun, ol tu i save karim wankain pen olsem yupela.” (1 Pita 5:8, 9) Tru tumas, helpim yumi kisim long ol bratasista spirit em i bikpela samting bilong helpim yumi sanap strong taim Satan i mekim nogut long yumi olsem wanpela laion.
15, 16. Kamapim wanpela stori long Baibel i soim olsem wanem helpim yumi kisim long ol wanbilip inap helpim yumi long sanap strong.
15 Taim wanpela laion i singaut strong long bikpela ples kunai long Afrika, ol antelop i ran siksti stret inap ol i stap longwe long laion. Tasol pasin ol elefan i bihainim i soim pasin bilong narapela i helpim narapela. Wanpela buk (Elephants—Gentle Giants of Africa and Asia) i tok: “Bilong sakim ol birua, ol elefan i save sanap raun long wanpela sekel, ol elefan i bikpela pinis i lukluk long ol birua na ol yangpela elefan i stap insait long sekel.” Ol laion i lukim strongpela lain we narapela i sapotim narapela, na ol i no save traim long bagarapim ol elefan, na ol yangpela elefan tu.
16 Taim Satan na ol spirit nogut i laik mekim nogut long yumi, yumi tu i mas i stap wantaim, klostu long ol brata bilong yumi i sanap strong long bilip. Pol i tokaut olsem sampela wanbilip Kristen i bin ‘helpim em gut tru’ taim em i kalabus long Rom. (Kolosi 4:10, 11) Tok Grik ol i tanim olsem ‘helpim gut tru’ i stap wanpela taim tasol long Ol Skripsa Grik. Wanpela buk (Vine’s Expository Dictionary of New Testament Words) i tok, “dispela tok inap makim ol marasin bilong daunim pen.” Olsem marasin i daunim pen, helpim yumi kisim long ol man i strong long lotuim Jehova inap daunim pen yumi pilim taim yumi bel hevi o kisim pen bilong skin.
17. Wanem samting inap helpim yumi long stap gut long God?
17 Tok ol wanbilip Kristen i mekim bilong strongim yumi inap strongim laik bilong yumi long stap gut long mekim wok bilong God. Ol elda Kristen i laik tru long helpim yumi long samting bilong spirit. (Jems 5:13-15) Sampela samting bilong helpim yumi long stap gut long God em pasin bilong stadi oltaim long Baibel na stap long olgeta miting Kristen, kibung sekit na kibung distrik. Pasin bilong yumi yet long pas gut tru wantaim God i save helpim yumi long stap gut long em. Tru tumas, maski yumi kaikai, dring, o mekim ol narapela samting, yumi mas i gat laik long mekim olgeta samting i save givim glori long God. (1 Korin 10:31) Na tu, bilong wokabaut long pasin Jehova i laikim yumi mas prea na bilip long em.—Song 37:5.
18. Bilong wanem yumi no ken givap maski ol hevi i wok long pinisim strong bilong yumi?
18 Sampela taim Satan i birua long yumi taim yumi pilim yumi no strong tumas long samting bilong spirit. Wanpela laion i save kisim kwik wanpela animal i no gat strong. Hevi bilong famili o mani o sik inap pinisim strong bilong yumi long samting bilong spirit. Tasol yumi no ken givap long mekim wok i save amamasim God, long wanem, Pol i tok: “Taim mi no gat strong, long dispela taim tasol mi gat strong tru.” (2 Korin 12:10; Galesia 6:9; 2 Tesalonaika 3:13) Wanem mining bilong tok bilong em? Olsem: Maski yumi no gat strong, pawa bilong God ken inapim yumi sapos yumi askim Jehova long givim strong long yumi. Devit i winim Goliat na dispela i soim olsem God inap strongim ol pipel bilong em. Ol Witnes Bilong Jehova long nau inap tokaut olsem long taim bilong hevi, ol i bin pilim God i strongim ol.—Daniel 10:19.
19. Kamapim wanpela stori i soim olsem wanem Jehova inap strongim ol wokboi bilong em.
19 Tupela marit i stori long helpim God i bin givim ol: “Inap planti yia mipela i bin wok wantaim na mekim wok bilong Jehova na mipela i bin kisim planti blesing na mipela i kisim save long planti gutpela manmeri. Na tu Jehova i bin skulim na strongim mipela long sanap strong na winim ol hevi. Olsem Jop, i no olgeta taim mipela i save long as na ol samting i kamap long mipela, tasol mipela i save olsem olgeta taim Jehova i bin i stap bilong helpim mipela.”
20. Wanem ol skripsa i soim olsem olgeta taim Jehova i save sapotim ol manmeri bilong em?
20 Yumi no ken ting Jehova i no inap sapotim na strongim ol manmeri i stap gut long em. (Aisaia 59:1) Devit i singim song olsem: “Em i save helpim olgeta manmeri i gat hevi na em i save litimapim olgeta manmeri ol arapela man i daunim ol.” (Song 145:14) Tru tumas, “olgeta de” Papa bilong yumi long heven “i save karim ol hevi bilong yumi” na em i save givim yumi olgeta samting yumi mas kisim.—Song 68:19.
Yumi Mas i Gat “Olgeta Klos Pait God i Save Givim”
21. Olsem wanem Pol i bin strongim ol Kristen long pasim olgeta klos pait bilong spirit?
21 Yumi skelim pinis sampela pasin bilong Satan na yumi luksave pinis olsem yumi mas sanap strong taim em i mekim nogut long yumi. Nau yumi laik skelim narapela bikpela samting inap helpim yumi long sanap strong long bilip. Tupela taim long pas em i raitim long ol Efesus, aposel Pol i kolim wanpela samting yumi mas kisim bilong sanap strong na sakim ol trik na giaman bilong Satan na bilong winim pait yumi mekim wantaim ol spirit nogut. Pol i tok: “Yupela i mas pasim olgeta klos pait God i save givim long yumi, na bai yupela inap long sanap strong na sakim olgeta kain pasin bilong trik na giaman Satan i save hait na mekim. . . . Kisim olgeta klos pait God i save givim yupela, na long taim nogut yupela bai inap sanap strong long pait. Na long taim pait i pinis, yupela bai i sanap strong i stap yet.”—Efesus 6:11, 13.
22, 23. (a) Wanem ol samting i insait long klos pait bilong yumi bilong spirit? (b) Bai yumi skelim wanem samting long stadi i kamap bihain long dispela?
22 Yes, yumi mas werim “olgeta klos pait God i save givim.” Taim Pol i raitim dispela pas long ol Efesus, i gat wanpela soldia Rom i was long em, na ating sampela taim soldia hia i bin werim olgeta klos pait. Tasol em spirit bilong God i kirapim aposel long stori long ol klos pait bilong spirit olgeta wokboi bilong Jehova i mas pasim.
23 Ol dispela klos pait God i save givim em ol pasin ol Kristen i mas i gat na ol samting bilong spirit Jehova i givim. Long stadi i kamap bihain, bai yumi stori long olgeta wan wan hap bilong ol dispela klos pait bilong spirit. Dispela bai helpim yumi long skelim gut, yumi redi gut long mekim pait bilong spirit o nogat. Na tu bai yumi kisim save long olsem wanem gutpela piksa Jisas i makim inap helpim yumi long sakim na winim Satan.
Bai Yu Bekim Olsem Wanem?
• Olgeta Kristen i gat wanem pait ol i mas mekim?
• Stori long sampela pasin trik na giaman bilong Satan.
• Olsem wanem ol wanbilip inap strongim yumi?
• Yumi mas bilip long strong bilong husat? Bilong wanem i olsem?
[Ol Piksa long pes 11]
Ol Kristen i “pait long olgeta spirit nogut”
[Piksa long pes 12]
Pasin bilong tingting planti long ol samting bilong dispela graun inap karamapim tok bilong Kingdom
[Piksa long pes 13]
Ol wanbilip Kristen inap ‘helpim gut tru’ wanbilip bilong ol
[Piksa long pes 14]
Yu save prea askim God long givim strong long yu?