LESEN 11

Rot Bilong Kisim Helpim Long Ritim Baibel

Prin Edisen

Sampela taim yu laik mekim wanpela bikpela projek tasol yu pilim olsem em i hatwok? Ating yu brukim i go long liklik liklik hap na nau yu inap pinisim dispela projek, a? Na em wankain long taim yu ritim Baibel. Ating yu tingting, ‘Hau bai mi kirapim?’ Long dispela lesen, bai yumi skelim sampela samting yu ken mekim bilong helpim yu long amamas long ritim na stadi long Baibel.

1. Wai na yumi mas ritim Baibel long olgeta taim?

Man i save ritim Baibel o “lo bilong Jehova” long olgeta taim, em bai stap amamas na ol samting em i mekim bai kamap gut. (Ritim Buk Song 1:1-3.) Bilong mekim olsem, yu ken traim long ritim Baibel insait long sampela minit. Taim yu save gut moa long Tok Bilong God, yu bai amamas moa long ritim Baibel.

2. Yu ken mekim wanem na bai Baibel ritim i ken helpim yu?

Bilong Baibel ritim i ken helpim yumi, yumi mas malolo na tingim ol samting yumi ritim. Yumi mas ritim na “tingim tingim long bel.” (Josua 1:8, futnot) Taim yu rit, askim yu yet olsem: ‘Dispela ves i givim wanem skul long mi long Jehova God? Hau bai mi bihainim dispela tok long sindaun bilong mi? Hau bai mi yusim ol dispela ves bilong helpim ol narapela?’

3. Hau yu ken makim taim bilong ritim Baibel?

Yu save pilim hatwok long makim taim bilong ritim Baibel? Yumi olgeta i save pilim olsem. Traim long “yusim gut taim” bilong yu. (Efesus 5:16) Bilong mekim olsem, yu ken makim taim stret bilong ritim Baibel long olgeta de. Sampela i save makim taim long ritim Baibel long olgeta moning. Sampela i save makim taim bilong ritim Baibel long lans taim bilong ol. Na ol narapela i save ritim Baibel long nait paslain long ol i slip. Yu ting wanem taim bai stret long yu?

KISIM SAMPELA SAVE MOA

Lain long hau yu ken mekim Baibel ritim bilong yu interesting. Lukim sampela samting yu ken mekim na bai Baibel ritim i ken helpim yu tru.

Ol piksa: Inap sampela haptaim, wanpela mangi lain long laikim wanpela kain kaikai. 1. Em i pilai long kaikai. 2. Taim em i go bikpela liklik, em i kaikai dispela kaikai. 3. Taim em bikpela, em i amamas long kaikai dispela kaikai. — Wankain olsem yumi lain long laikim ol kain kain kaikai, yumi inap lain tu long amamas long ritim Baibel

4. Lain long kisim amamas long ritim Baibel

Ating pastaim em bai i no isi long ritim Baibel. Tasol yumi inap “laikim tumas” long mekim olsem, wankain olsem man inap lain long kisim amamas long kaikai wanpela nupela kaikai. Ritim 1 Pita 2:2, na stori long dispela askim:

Yu ting sapos yu ritim Baibel long olgeta de, em bai kamap olsem samting yu bai amamas long en na yu bai laik ritim moa yet?

Pilaim VIDIO na lukim hau sampela i stat long kisim amamas long ritim Baibel. Na stori long ol dispela askim.

VIDIO: Ol Yangpela i Laikim Tok Bilong God (5:33)

Long vidio, ol yangpela i winim wanem ol salens?
Wanem samting i helpim ol long wok yet long ritim Baibel?
Ol i mekim wanem na bai ol i amamas moa long ritim Baibel?

Sampela rot bilong helpim yu long stat long ritim Baibel:

Makim wanpela Baibel we ol i tanim stret ol tok bilong en long tokples bilong nau. Traim long ritim Nupela Taim Trenslesen sapos i stap long tokples bilong yu.
Pastaim ritim ol hap bilong Baibel we yu laikim. Bilong kisim sampela aidia, lukim sat “Stat Long Ritim Baibel.”
Makim ol sapta yu ritim pinis. Yusim sat “Makim Sapta Yu Ritim Pinis” i stap long dispela buk.
Yusim JW Library^® aplikesen. Long rot bilong en, yu ken yusim fon o teblet samting long ritim na harim tok bilong Baibel long wanem wanem hap yu stap long en long kain kain tokples.
Yusim apendiks long Nupela Taim Trenslesen. Em i gat ol mep, sat na dikseneri we bai mekim yu amamas long ritim Baibel.

5. Redim stadi bilong yu

Ritim Buk Song 119:34, na stori long dispela askim:

Wai na i gutpela long beten paslain long yu ritim Baibel o redim stadi bilong yu?

Yu ken mekim wanem na bai stadi i helpim yu tru. Taim yu redim stadi bilong yu, traim long bihainim ol dispela rot:

Ritim fes paragraf bilong lesen.
Ritim ol skripsa na traim long kliagut long hau ol dispela skripsa i stret long lesen yu stadi long en.
Makim ol bikpela tok we i bekim ol askim; dispela bai helpim yu long stori long dispela lesen wantaim tisa bilong yu.

Ol piksa: Wanpela meri i redim stadi bilong em. A. Em i ritim namba 1 pes bilong lesen. B. Em i ritim ol skripsa long Baibel. C. Em i makim buk bilong em.

Yu save long dispela?

Ol Witnes Bilong Jehova i bin yusim ol narapela narapela Baibel. Tasol mipela i laikim moa Nupela Taim Trenslesen Bilong Ol Skripsa Holi bikos tok bilong en i stret, i klia, na em i gat nem bilong God.—Lukim atikol long websait “Ol Witnes Bilong Jehova i Gat Baibel Bilong Ol Yet?”

SAMPELA MAN I TOK: “Em hatwok long stadi long Baibel. Mi no gat taim o strong long mekim.”