Yumi Mas Holimpas Gutpela Bilip Bilong Yumi!
“Mi raitim dispela tok long yupela ol manmeri i bin kisim bilip i gutpela tru . . . wankain olsem bilip bilong mipela.”—2 PITA 1:1.
1. Jisas i tok ol aposel bilong em bai mekim wanem? Tasol Pita i mekim wanem tok hambak?
LONG nait paslain long taim Jisas i dai, em i tok olgeta aposel bilong em bai lusim em. Wanpela bilong ol, em Pita, i tok hambak olsem: “Maski sapos ol arapela i lukim samting i kamap long yu na bilip bilong olgeta i pundaun na ol i lusim yu, mi bai i no inap lusim yu.” (Matyu 26:33) Tasol Jisas i save, Pita bai lusim em. Olsem na em i tokim Pita: “Mi beten pinis bilong helpim yu, bai bilip bilong yu i no ken pundaun. Na taim yu tanim na yu kam bek, orait yu mas strongim ol brata bilong yu.”—Luk 22:32.
2. Pita i ting em i gat strongpela bilip, tasol em i mekim wanem na dispela i kamapim klia olsem bilip bilong em i no strong?
2 Pita i ting em i gat strongpela bilip, tasol long dispela nait stret, em i lusim Jisas. Tripela taim em i tokaut olsem em i no save long Krais! (Matyu 26:69-75) Taim em i ‘tanim na kam bek,’ yumi ken ting olsem em i tingim dispela tok bilong Bikpela bilong em, “yu mas strongim ol brata bilong yu.” I go inap long taim Pita i dai, dispela tok i save mekim bikpela wok insait long bel bilong em, na tupela pas em i raitim na i stap long Baibel i kamapim klia dispela samting.
Bilong Wanem Pita i Raitim Ol Pas?
3. I gat wanem as na Pita i raitim namba wan pas bilong em?
3 Inap 30 yia samting bihain long taim Jisas i dai, Pita i raitim namba wan pas bilong em na salim i go long ol brata bilong em long Pontus, Galesia, Kapadosia, Esia, na Bitinia—ol dispela ples i stap long hap not na hap wes bilong kantri nau ol i kolim Turki. (1 Pita 1:1) Ol Juda, ating sampela i bin kamap Kristen long Pentikos long yia 33 C.E., yumi ken ting olsem ol tu ol i insait long dispela lain em Pita i raitim pas long ol. (Aposel 2:1, 7-9) Planti ol i man bilong ol narapela lain em kain kain traim i save painim ol long han bilong ol birua. (1 Pita 1:6, 7; 2:12, 19, 20; 3:13-17; 4:12-14) Olsem na Pita i raitim pas long ol dispela brata bilong strongim bel bilong ol. Ol “i bilip long Krais” na Pita i laik helpim ol—em i laik bai God i “kisim bek [ol].” Olsem na long pinis bilong dispela pas, em i tok: “Yupela i mas i stap strong long bilip na sakim [Satan].”—1 Pita 1:9; 5:8-10.
4. I gat wanem as na Pita i raitim namba tu pas bilong em?
4 Bihain, Pita i raitim namba tu pas long ol dispela Kristen. (2 Pita 3:1) Bilong wanem em i mekim olsem? Long wanem, i gat narapela hevi i kamap, i bikpela moa. Ol man bilong mekim pasin pamuk samting ol bai wok long kamapim pasin nogut bilong ol namel long ol bilipman na giamanim sampela! (2 Pita 2:1-3) Na tu, Pita i tok bai i gat ol man bilong tok bilas. Long namba wan pas em i bin tok olsem “taim bilong olgeta samting i laik pinis em i klostu nau,” na nau i luk olsem sampela man i kirap pinis na tok bilas long dispela tok. (1 Pita 4:7; 2 Pita 3:3, 4) Orait nau yumi ken skelim namba tu pas bilong Pita na save olsem wanem dispela pas i bin strongim ol brata long stap strong long bilip. Long dispela namba wan stori, bai yumi stori long 2 Pita sapta wan.
As Bilong Raitim Sapta Wan
5. Pita i mekim wanem bilong redim tingting bilong ol man i kaunim pas bilong em na bai ol inap kisim ol tok i stori long ol hevi?
5 Tasol Pita i no kirap wantu tasol na stori long ol dispela bikpela hevi. Pastaim em i laik redim tingting bilong ol man i kaunim pas bilong em na bai ol inap kisim ol tok i stori long ol dispela hevi, olsem na em i kamapim sampela tok bilong helpim ol long pilim moa yet ol gutpela samting ol i bin kisim taim ol i kamap Kristen. Em i kirapim ol long tingim gen ol gutpela tok promis bilong God na long ol inap bilip olsem ol tok profet bilong Baibel bai kamap tru. Bilong kirapim ol long tingim ol dispela samting, em i tokim ol long driman samting em i bin lukim long bodi bilong Jisas i kamap narapela kain—long dispela samting olsem driman em i lukim Krais i holim strong bilong bosim Kingdom.—Matyu 17:1-8; 2 Pita 1:3, 4, 11, 16-21.
6, 7. (a) Ol tok Pita i mekim bilong kirapim pas bilong em inap givim wanem save long yumi? (b) Sapos yumi givim tok long narapela bilong stretim em, ating sampela taim i gutpela long yumi tokaut long wanem samting?
6 Ol tok Pita i mekim bilong kirapim pas bilong em, yu ting dispela inap givim save long yumi? Yes, em inap. Sapos yumi laik givim tok long man bilong stretim em, ating em bai amamas moa long kisim dispela tok sapos pastaim yumi stori wantaim em long ol gutpela samting bilong Kingdom em yumi olgeta i tingting na wet long en. Na ating yumi ken stori long wanpela samting i bin painim yumi yet. Taim Jisas i dai pinis, ating planti taim Pita i bin stori long dispela driman samting em i bin lukim—em i lukim Krais i stap long bikpela lait bilong Kingdom.—Matyu 17:9.
7 Yumi mas save tu olsem, taim Pita i raitim namba tu pas bilong em, ating planti man i holim pinis Gutnius em Matyu i raitim, na pas aposel Pol i bin raitim long ol Galesia. Olsem na long taim bilong Pita, ating ol man i save pinis long ol pasin kranki bilong em na pasin bilong em long i stap gut long God. (Matyu 16:21-23; Galesia 2:11-14) Tasol dispela i no mekim na Pita i pret long tokaut long ol samting, nogat. Ating dispela i mekim na ol man i tingim ol liklik pasin kranki bilong ol yet, ol i laikim moa yet dispela pas. Olsem na taim yumi helpim ol man i gat hevi, gutpela sapos yumi tokaut olsem yumi tu inap mekim popaia.—Rom 3:23; Galesia 6:1.
Gude Bilong Strongim Ol
8. Yumi ken ting olsem Pita i mekim wok long dispela tok “bilip” bilong makim wanem samting?
8 Orait nau yumi ken tingim dispela gude bilong Pita. Kwiktaim em i stori long ol samting bilong bilip; em i tok ol man em i raitim pas long ol, ol i man “i bin kisim bilip i gutpela tru . . . wankain olsem bilip bilong mipela.” (2 Pita 1:1) Long dispela ves, insait bilong dispela tok “bilip” i makim olgeta tok ol Kristen i save bilip long en, em sampela taim Baibel i kolim olsem “tok i tru.” (Galesia 5:7; 2 Pita 2:2; 2 Jon 1) Planti taim dispela tok “bilip” i makim dispela samting, na i no makim pasin bilong bilip o pasin bilong givim bel long wanpela man o wanpela samting.—Aposel 6:7, NW; 2 Korin 13:5, NW; Galesia 6:10, NW; Efesus 4:5, NW; Jut 3.
9. Bilong wanem yumi ken ting olsem ol man bilong ol narapela lain i laikim dispela gude bilong Pita?
9 Ating ol man i no bilong lain Juda ol i laikim dispela gude bilong Pita. Ol Juda i no save poromanim ol man bilong ol narapela lain, na ol i save bel nogut long ol tu. Na sampela Juda i kamap Kristen pinis, ol tu ol i gat tingting nogut long ol man i no Juda. (Luk 10:29-37; Jon 4:9; Aposel 10:28) Tasol Pita, em mama i karim em olsem wanpela Juda na em i wanpela aposel bilong Krais Jisas, em i tok, ol man i kaunim pas bilong em—em ol Juda na ol man bilong ol narapela lain—ol i holim wankain bilip olsem em.
10. Dispela gude bilong Pita inap lainim yumi long wanem ol samting?
10 Dispela gude bilong Pita i lainim yumi long planti gutpela samting long nau. God i save mekim wankain pasin long olgeta manmeri; em i no laikim ol man bilong sampela lain na skin na sampela nogat. (Aposel 10:34, 35; 11:1, 17; 15:3-9) Jisas yet i bin lainim ol man olsem, olgeta Kristen ol i brata brata, na i no gat wanpela bilong yumi i ken pilim olsem em i antap long narapela. Na tu, dispela gude bilong Pita i kamapim klia olsem yumi insait long wanpela bikpela lain brata i stap long olgeta hap bilong graun, em ol i holim wankain bilip olsem bilong Pita na ol wanlain aposel bilong em, em bilip i “gutpela tru.”—Matyu 23:8; 1 Pita 5:9.
Save na Ol Tok Promis Bilong God
11. Bihain long dispela gude, Pita i tokaut long wanem ol bikpela samting?
11 Bihain long dispela gude, Pita i tok: “Pasin marimari na bel isi i ken kamap bikpela moa long laip bilong yupela.” Pasin marimari na bel isi inap kamap bikpela moa long yumi olsem wanem? Pita i bekim dispela askim olsem: “Kisim gutpela save long God na long Jisas, Bikpela bilong yumi.” Na em i tok moa: “Long strong bilong [God], em i bin givim yumi olgeta samting bilong strongim laip bilong yumi na bilong helpim yumi long wokabaut long pasin bilong God.” Tasol yumi inap kisim ol dispela bikpela samting olsem wanem? Olsem: God “i bin larim yumi i save gut long em yet. Long bikpela namba na strong bilong en na long gutpela pasin tru bilong en, em i bin singautim yumi.” Olsem na tupela taim Pita i tokaut olsem yumi mas kisim save, em stretpela save bilong God na bilong Pikinini bilong em.—2 Pita 1:2, 3; Jon 17:3.
12. (a) Bilong wanem Pita i tokaut strong olsem i bikpela samting long yumi mas kisim stretpela save? (b) Bilong kisim ol promis bilong God, pastaim yumi mas mekim wanem?
12 Long sapta 2, Pita i stori long “sampela giaman profet” em ol i mekim “planti tok giaman” bilong giamanim ol Kristen. Long dispela rot ol i wok long pulim ol Kristen i go bek long mekim pasin pamuk samting em ol i lusim pinis. Stretpela save bilong “Jisas Krais, em i Bikpela bilong yumi na Man bilong kisim bek yumi,” i bin helpim ol long lusim ol dispela pasin i doti, tasol sapos bihain ol i pas gen long dispela kain pasin, ol bai stap nogut moa yet. (2 Pita 2:1-3, 20) Pita i save olsem bihain em bai toktok long dispela hevi, olsem na long kirap bilong pas bilong em, em i tokaut strong olsem ol i mas kisim stretpela save sapos ol i laik stap klin long ai bilong God. Pita i tok, God i bin “givim yumi olgeta samting i nambawan tru na i bikpela moa yet, em ol samting bipo em i bin promis long givim long yumi . . . na bai yupela i kisim laip na pasin bilong God yet.” Tasol Pita i tok, bilong kisim ol dispela promis, em ol i insait long bilip bilong yumi, pastaim yumi mas “abrusim ol dispela pasin bilong bagarap,” em “pasin bilong bel i kirap em i save stap long yumi manmeri bilong graun na i save bagarapim yumi tru.”—2 Pita 1:4.
13. Ol Kristen God i bin makim ol, na “ol arapela sipsip,” ol i strong long holimpas wanem samting?
13 Wanem tingting bilong yu long ol tok promis bilong God? I wankain olsem tingting bilong liklik hap lain Kristen em God i bin makim ol? Long 1991, Frederick Franz, em presiden bilong Sosaiti Was Taua long dispela taim, na inap olsem 75 yia em i bin mekim wok bilong God long olgeta de, em i kamapim tingting bilong ol man i gat tingting long mekim wok king wantaim Krais, olsem: “Mipela bin stap strong i kam inap long dispela aua stret, na mipela bai stap strong yet i go inap long taim God i truim ‘olgeta samting i nambawan tru na i bikpela moa yet, em ol samting bipo em i bin promis long givim long mipela.’” Brata Franz i bilip tru long dispela tok promis bilong God olsem em bai kirap bek na kisim laip long heven, na em i holimpas bilip i go inap long taim em i gat 99 krismas na em i dai. (1 Korin 15:42-44; Filipai 3:13, 14; 2 Timoti 2:10-12) Planti milion manmeri moa, ol tu ol i holimpas bilip, na ol i tingim tok promis bilong God long kamapim wanpela paradais long graun na ol man inap stap amamas oltaim long en. Olsem wanem? Yu wanpela bilong ol?—Luk 23:43, NW; 2 Pita 3:13; KTH 21:3, 4.
Tingim Ol Tok Promis Bilong God na Mekim Wok
14. I gat wanem as na Pita i tok gutpela pasin em i namba wan pasin yumi mas putim wantaim bilip?
14 Olsem wanem? Yumi save tenkyu long God long ol samting em i bin tok promis long givim long yumi? Sapos olsem, orait yumi mas kamapim klia dispela samting, olsem Pita i tok. “Yupela i mas tingting long dispela” (em ol gutpela tok promis God i bin givim long yumi), na yumi mas taitim bun na mekim wok. Yumi no ken amamas long holim trupela bilip na kisim save long ol tok i tru bilong Baibel na em tasol, nogat. Em i no inap! Ating long taim bilong Pita, sampela insait long ol kongrigesen i save mekim planti tok long ol samting bilong bilip, tasol ol i insait long pasin pamuk samting. Pasin bilong ol i mas gutpela, olsem na Pita i kolim wanpela samting ol i mas putim wantaim bilip bilong ol. Em i tok: “Mekim gutpela pasin.”—2 Pita 1:5; Jems 2:14-17.
15. (a) Bihain long Pita i kolim gutpela pasin, i gat wanem as na Pita i tok yumi mas kisim save na bungim wantaim bilip? (b) Wanem ol narapela pasin bai helpim yumi long holimpas bilip?
15 Bihain long Pita i toktok long gutpela pasin, em i kolim 6-pela pasin moa yumi mas putim, o bungim, wantaim bilip bilong yumi. Yumi mas kisim ol dispela wan wan pasin sapos yumi laik “sanap strong long bilip.” (1 Korin 16:13) Sampela man i bikhet na lusim bilip, ol i save ‘paulim tok i stap long buk bilong God’ na ol i kamapim ol tok bilong paulim tingting bilong ol Kristen, olsem na Pita i tok yumi mas kisim save. Em i tok: “Kisim save long God.” Na em i tok moa: “Bosim gut laik bilong bodi . . . , [na] sanap strong na karim hevi, na . . . wokabaut long pasin bilong God, na . . . stap pren tru bilong ol arapela manmeri bilong God, na . . . givim bel bilong yupela long ol arapela.”—2 Pita 1:5-7; 2:12, 13; 3:16.
16. Sapos yumi bungim ol dispela pasin Pita i kolim na putim i go wantaim bilip, wanem samting bai kamap? Tasol sapos yumi no putim, wanem samting bai kamap?
16 Wanem samting bai kamap sapos yumi bungim ol dispela 7-pela samting wantaim bilip bilong yumi? Pita i tok: “Sapos yupela i kisim ol dispela kain pasin na ol i kamap strong tru long yupela, orait dispela save bilong yupela [long Jisas Krais, Bikpela bilong yumi] bai i no inap i stap nating. Nogat. Em bai i karim planti kaikai.” (2 Pita 1:8) Tasol Pita i tok: “Man i no gat ol dispela pasin, em i no inap lukim ol samting i stap longwe, na em i olsem aipas. Tru, God i lusim pinis ol sin em i bin mekim bipo na God i mekim em i kamap klin. Tasol dispela man i lusim tingting pinis long ol dispela samting God i bin mekim long em.” (2 Pita 1:9) Long dispela ves, Pita i raitim tok olsem “em” na “man,” bilong makim ol narapela man; em i no raitim tok olsem “yupela” o “yumi” olsem em i bin mekim long ves 8. Tru, sampela man i aipas na ol i lusim tingting long ol samting na ol i no klin, tasol Pita i no laik raitim tok i makim olsem man i kaunim dispela pas em i wanpela bilong ol, nogat.—2 Pita 2:2.
Em i Strongim Ol Brata Bilong Em
17. Ating wanem samting i kirapim Pita na long pasin isi em i kirapim ol brata long mekim “ol dispela samting”?
17 Ating Pita i save i no hatwok tumas long giamanim ol nupela, olsem na long pasin isi em i strongim ol olsem: “Ol brata, God i singautim yupela pinis, na em i bin makim yupela bilong i stap ol lain bilong em yet. Olsem na yupela i mas wok strong long i stap ol lain tru bilong en. Sapos yupela i mekim olsem [“ol dispela samting,” NW], orait yupela bai i no inap pundaun na lusim em.” (2 Pita 1:10; 2:18) Ol Kristen God i bin makim ol, sapos ol i bungim ol dispela 7-pela samting wantaim bilip bilong ol, ol bai kisim gutpela pe tru olsem Pita i tok: “Em bai i opim rot olgeta bilong yupela i ken i go insait long kingdom i stap oltaim oltaim, dispela kingdom bilong Jisas Krais, em Bikpela bilong yumi, na em i Man bilong kisim bek yumi.” (2 Pita 1:11) “Ol arapela sipsip” bai kisim laip oltaim long graun aninit long Kingdom bilong God.—Jon 10:16; Matyu 25:33, 34.
18. Bilong wanem ‘olgeta taim Pita i laik tokim gen’ ol brata bilong em?
18 Pita i laik tru bai ol brata bilong em i ken kisim dispela gutpela pe. Em i tok: “Yupela i save pinis long ol dispela samting, na yupela i kisim pinis dispela tok tru, na yupela i sanap strong long en. Tasol mi no laik bai yupela i lusim tingting, olsem na olgeta taim mi laik tokim yupela gen.” (2 Pita 1:12) Pita i mekim wok long wanpela tok Grik olsem ste·riʹzo, em long dispela ves ol i tanim olsem “sanap strong,” tasol long tok Jisas i bin givim long Pita, ol i tanim dispela tok ste·riʹzo olsem “strongim,” olsem: “Yu mas strongim ol brata bilong yu.” (Luk 22:32) Pita i mekim wok long dispela hap tok Grik na ating dispela i makim olsem em i tingim dispela strongpela tok Bikpela bilong em i bin givim long em. Orait nau Pita i tok: “Long taim mi stap yet long dispela bodi, mi ting em i gutpela long mi mas tokim yupela gen, bilong kirapim yupela long tingim gen ol dispela samting. Mi save, liklik taim tasol na bai mi lusim bodi bilong mi.”—2 Pita 1:13, 14.
19. Wanem ol samting inap helpim yumi long nau?
19 Maski Pita i mekim gutpela tok olsem ol man i kaunim pas bilong em ol i “sanap strong long [tok tru],” em i save olsem bilip bilong ol inap bagarap, olsem sip i bruk long rip. (1 Timoti 1:19) Em i save liklik taim em bai i dai, olsem na bilong strongim ol brata bilong em, em i kamapim sampela tok ol inap tingim gen long bihain bilong helpim ol long i stap strong long ol samting bilong spirit. (2 Pita 1:15; 3:12, 13) Planti taim yumi tu mas kisim ol tok bilong helpim yumi long stap strong long bilip. Maski yumi husat o hamas yia yumi bin stap insait long tok i tru, yumi no ken les long kaunim Baibel long olgeta taim, na mekim stadi bilong yumi yet, na go long ol miting bilong kongrigesen. Sampela i no kam long ol miting, na ol i tok ol i no gat asua long dispela, ol i tok skin bilong ol i les o ol miting i kamapim ol tok ol i bin harim bipo o ol miting i no kirapim gut tingting bilong ol, tasol Pita i save sapos yumi hambak na ting yumi sanap strong, kwiktaim yumi inap lusim bilip.—Mak 14:66-72; 1 Korin 10:12; Hibru 10:25.
I Gat As Tru na Yumi Bilip
20, 21. Taim skin bilong Jisas i kamap narapela kain, olsem wanem dispela i strongim bilip bilong Pita na ol man i kaunim tupela pas bilong em na yumi tu long nau?
20 Olsem wanem? Ol stori nating i as bilong bilip bilong yumi? Pita i tok nogat. Em i tok: “Taim mipela i tokim yupela long dispela tok bilong Krais, mipela i no bihainim ol stori nating i bin kamap long tingting bilong ol man. Nogat. Long ai bilong mipela yet, mipela i bin lukim lait na strong bilong God i kamap long em, olsem na mipela i tok.” Pita, Jems, na Jon i bin stap wantaim Jisas taim ol i lukim samting olsem driman—ol i lukim em i holim strong bilong bosim Kingdom. Pita i tok: “God Papa i bin givim biknem long em, na i mekim dispela gutpela lait i kamap long em. Na God yet i stap long dispela nambawan lait bilong heven na em i mekim tok long Jisas olsem, ‘Dispela em i Pikinini bilong mi, mi laikim em tumas, na mi amamas long em.’ Mipela i bin i stap wantaim em long dispela maunten God i bin i stap long en, na mipela i harim dispela tok i kam long heven.”—2 Pita 1:16-18.
21 Taim Pita, Jems, na Jon i lukim dispela samting, ol i bilip strong moa olsem Kingdom em i wanpela samting tru! Olsem na Pita i tok: “Mipela i save bilip strong moa long tok bilong ol profet, na sapos yupela tu i holim strong tok bilong ol, em i gutpela.” Em nau, i gat as tru na ol man i kaunim pas bilong Pita, na yumi tu long nau, i mas holim strong ol tok profet bilong Kingdom bilong God. Yumi mas holim strong ol dispela tok profet na i mas i stap olsem wanem samting? Pita i bekim dispela askim olsem: “Olsem lam i lait i stap long ples tudak, i go inap long tulait i kamap na sta bilong moningtaim em i kirap insait long bel bilong yupela.”—2 Pita 1:19; Daniel 7:13, 14; Aisaia 9:6, 7.
22. (a) Oltaim bel bilong yumi i mas was gut na tingim wanem samting? (b) Wanem samting bai helpim yumi long holim strong ol tok bilong ol profet?
22 Sapos i no gat dispela lait, em ol tok profet, bel bilong yumi bai stap olsem tudak. Tasol ol Kristen i save holim strong ol dispela tok, olsem na oltaim bel bilong ol i bin was gut na tingim dispela tulait i kamap na “sta bilong moningtaim,” em Krais Jisas, i kamap long bikpela lait bilong Kingdom. (KTH 22:16) Wanem samting bai helpim yumi long nau long tingim gut ol dispela tok profet? Yumi mas stadi long Baibel, na redim ol tok em bai kamap long ol miting na bekim sampela tok, na tingim tingim ol dispela tok. (1 Timoti 4:15) Bilong ol dispela tok profet i ken i stap olsem lam i lait long “ples tudak” (bel bilong yumi), yumi mas larim ol dispela tok i bosim bel bilong yumi—ol laik bilong bel, ol samting yumi pilim insait long bel, ol tingting bilong bel i save kirapim yumi long mekim ol samting, na ol samting yumi putim olsem mak bilong winim. Yumi mas stadi long Baibel, long wanem, ol tok bilong Pita bilong pinisim sapta wan i tok olsem: “Yumi no ken bihainim tingting bilong yumi yet na autim as bilong wanpela tok profet i stap long buk bilong God. Long wanem, i no gat wanpela tok profet i bin kamap long laik bilong man i autim. Nogat. Holi Spirit yet i kirapim ol man na ol i autim tok God i givim long ol.”—2 Pita 1:20, 21.
23. Namba wan sapta bilong 2 Pita i bin redim tingting bilong ol man i kaunim dispela pas long tingim wanem samting?
23 Ol tok bilong Pita i stap long sapta 1 bilong namba tu pas bilong em, i gat strong bilong kirapim yumi long holimpas gutpela bilip bilong yumi. Orait nau tingting bilong yumi i redi pinis long tingim ol bikpela samting em Pita i laik toktok long en. Stori i kamap bihain long dispela bai toktok long sapta 2 bilong 2 Pita. Long dispela sapta, Pita i stori long pasin pamuk samting i bin kam insait long ol kongrigesen na i laik pulim ol man long mekim pasin i no stret.
Yu Tingim Yet?
◻ Bilong wanem Pita i tok stretpela save em i bikpela samting?
◻ Ating i gat wanem as na gutpela pasin em i namba wan pasin Pita i kolim na yumi mas bungim wantaim bilip?
◻ I gat wanem as na olgeta taim Pita i laik tokim gen ol brata bilong em?
◻ Pita i kamapim wanem as tru na yumi ken bilip?
[Piksa long pes 9]
Pita i no bin larim ol popaia bilong em i mekim na em i lusim bilip