Jehova i Save Long Rot Bilong Kisim Bek Lain Bilong Em

“Jehova i save long rot bilong kisim bek ol man i save givim bel tru long Em taim traim i painim ol.”—2 PITA 2:9.

BILONG WANEM YUMI KEN BILIP TRU OLSEM JEHOVA:

I save makim taim bilong ol samting long kamap, na bai ol samting em i tingting pinis long mekim i ken kamap tru?

I redi long yusim bikpela strong bilong en bilong kisim bek lain bilong en?

I save wanem samting stret bai kamap long taim bilong traipela hevi tru?

 1. Dispela graun bai stap olsem wanem long taim bilong “traipela hevi tru”?

BAGARAP bilong dispela graun Satan i bosim bai kamap wantu tasol, long taim ol man i no ting em bai kamap. (1 Tes. 5:2, 3) Long “de bilong Bikpela,” ol manmeri bai paul nabaut. (Sef. 1:14-17) Long dispela taim ol man bai karim bikpela pen na hevi tru, olsem na Baibel i kolim dispela haptaim olsem taim bilong “traipela hevi tru. Kirap long taim God i wokim graun na i kam inap long nau, kain hevi olsem i no bin kamap, nogat.”—Ritim Matyu 24:21, 22.

2, 3. (a) Satan bai traim long mekim wanem long lain bilong God long taim bilong “traipela hevi tru”? (b) Wanem samting inap strongim bilip bilong yumi long strong bilong Jehova long kisim bek lain bilong em?

² Esekiel i bin tok profet long laspela pait Satan bai mekim long lain bilong God klostu long pinis bilong taim bilong traipela hevi tru. “Gok, bilong graun Magok” bai kirap mekim pait. “Bikpela lain ami” bai stap olsem ‘bikpela klaut i karamapim graun,’ na i kam pait long lain bilong God. (Ese. 38:2, 14-16) I no gat wanpela oganaisesen bilong ol man bai helpim lain bilong Jehova. Ol i mas bilip olsem God bai kisim bek ol. Lain bilong Jehova bai mekim wanem taim ol birua bilong ol i kam bilong bagarapim ol?

³ Sapos yu wanpela wokboi bilong Jehova, orait olsem wanem? Yu bilip olsem Jehova inap kisim bek lain bilong em long taim bilong traipela hevi tru, na tru tru em bai mekim olsem? Aposel Pita i tok: “Jehova i save long rot bilong kisim bek ol man i save givim bel tru long Em taim traim i painim ol. Tasol em i makim ol man nogut bilong kisim bagarap long de bilong kot.” (2 Pita 2:9) Bilip bilong yumi long strong bilong Jehova long kisim bek lain bilong em bai kamap strong moa sapos yumi skelim long bel olsem wanem Jehova i bin kisim bek ol wokboi bilong em long bipo. Olsem na yumi ken skelim 3-pela stori we Jehova i bin kisim bek ol wokboi bilong em.

EM I ABRUSIM BAGARAP LONG BIKPELA TAIT

 4. Wanem samting i mas kamap paslain long Bikpela Tait i ken kamap?

⁴ Tingim stori bilong Bikpela Tait long taim bilong Noa. Sampela samting i mas kamap paslain long Bikpela Tait i ken kamap. Wanpela i mas wokim traipela sip, na em i mas kisim ol animal i go insait long sip. Buk Stat i no stori olsem Jehova i bin wet inap Noa i wokim sip pinis na nau em i makim taim bilong Bikpela Tait, nogat. Jehova i no gat wok long wari olsem sip bai pinis o nogat. Tru tru, planti yia paslain long God i tokim Noa long wokim sip, Em i makim pinis taim Bikpela Tait bai kamap. Olsem wanem yumi save long dispela?

 5. Jehova i bin tokaut long wanem samting olsem Stat 6:3 i tok? Em i bin mekim dispela tokaut long wanem taim?

⁵ Baibel i tok Jehova i wokim wanpela disisen na em i tokaut long dispela samting long heven. Stat 6:3 i tok: “Mi bin putim spirit bilong mi long ol manmeri bilong givim laip long ol. Tasol ol i samting bilong graun tasol, olsem na mi no ken larim spirit bilong mi i stap long ol oltaim. Nau bai mi larim ol i stap laip inap 120 krismas tasol, na bai ol i dai.” Jehova i no tok long hamas krismas man bai winim na nau em bai i dai, nogat. Jehova i tokaut long taim we em bai pinisim ol pasin nogut bilong dispela graun.a Bikpela Tait i bin kirap long 2370 B.C.E. So God i bin mekim dispela tokaut long 2490 B.C.E. Long dispela taim Noa i gat 480 krismas. (Stt. 7:6) Twenti yia bihain long God i bin mekim dispela tokaut, em long 2470 B.C.E., namba 1 pikinini man bilong Noa i bon. (Stt. 5:32) Orait, bihain long 3-pela pikinini bilong Noa i bon, i gat klostu 100 yia i stap yet paslain long Bikpela Tait i kamap. Tasol Jehova i no tokaut yet long Noa long bikpela wok Em bai givim em, na olsem wanem dispela wok bai kisim bek ol man. God bai wet inap long wanem taim bilong tokaut long Noa?

 6. I luk olsem Jehova i tokim Noa long wokim sip long wanem taim?

⁶ I luk olsem Jehova i wet inap planti yia bihain long ol pikinini bilong Noa i bon bilong tokaut long Noa long samting Em bai mekim. Wai na yumi ting olsem? Bikos Baibel i tok ol pikinini man bilong Noa i bikpela pinis na ol i marit taim God i tokim Noa long wokim sip. Jehova i tokim Noa: “Bai mi mekim kontrak wantaim yu. Yu mas i go insait long dispela sip wantaim meri bilong yu na ol pikinini bilong yu wantaim ol meri bilong ol.” (Stt. 6:9-18) So i luk olsem Jehova i tokim Noa long wokim sip 40 o 50 yia tasol paslain long Bikpela Tait i bin kamap.

 7. (a) Olsem wanem Noa na famili bilong em i bin kamapim bilip bilong ol? (b) Wanem taim stret God i bin tokim Noa olsem Bikpela Tait bai kirap?

⁷ Taim Noa na famili bilong em i wok long wokim sip, ating ol i tingting long olsem wanem God bai kamapim Bikpela Tait na em bai kamapim long wanem taim. Tasol maski ol i no save long ol dispela samting, ol i kamapim bilip bilong ol taim ol i wok yet long wokim sip. Baibel i tok: “Noa i mekim olgeta samting olsem God i tokim em.” (Stt. 6:22) Bihain, Jehova i tokim Noa olsem taim 7-pela de i go pinis, orait Bikpela Tait bai kirap. Dispela i givim taim long Noa wantaim famili bilong em long kisim ol animal i go insait long sip. Olsem na “long yia Noa i gat 600 krismas, na long de namba 17 bilong namba 2 mun bilong dispela yia,” ren i kirap na olgeta samting i redi i stap.—Stt. 7:1-5, 11.

 8. Olsem wanem stori bilong Bikpela Tait i helpim yumi long kliagut olsem Jehova i save long wanem taim i gutpela long kisim bek lain bilong em long taim bilong pinis?

⁸ Stori bilong Bikpela Tait i kamapim klia olsem Jehova i save long wanem taim na wanem rot i nambawan tru long kisim bek lain bilong en. Pinis bilong dispela taim yumi stap long en i wok long kam klostu, olsem na yumi save olsem olgeta samting Jehova i tingting pinis long mekim bai kamap tru long ‘de na aua’ em yet i bin makim.—Mat. 24:36; ritim Habakuk 2:3.

GOD I KISIM BEK OL LONG RETSI

9, 10. Olsem wanem Jehova i yusim lain bilong en long trapim ami bilong Isip?

⁹ Stori bilong Bikpela Tait i skulim yumi olsem Jehova i save makim taim bilong ol samting long kamap, na em i mekim olsem bai samting em i tingting pinis long mekim i ken kamap tru. Namba 2 stori yumi laik skelim bai soim olsem yumi ken trastim Jehova long yusim bikpela strong bilong en bilong kisim bek lain bilong en na bilong kamapim laik bilong en. I tru olsem Jehova inap kisim bek lain bilong en long olgeta taim. Tasol sampela taim em i larim samting i painim ol we i luk olsem ol bai bagarap, tasol dispela em bilong trapim ol birua bilong em. Dispela samting i bin kamap taim Jehova i kisim bek ol Israel long kalabus long Isip.

¹⁰ Klostu 3 milion Israel i bin lusim Isip. Rot Jehova i tokim Moses long stiaim ol Israel i go long en i kirapim Fero long ting olsem ol Israel i no save ol i go we na ol i paul. (Ritim Kisim Bek 14:1-4.) Olsem na Fero wantaim ol ami bilong en i bihainim ol i go na trapim ol long Retsi. I luk olsem ol Israel i no gat rot long ranawe. (Kis. 14:5-10) Tasol tru tru hevi i no inap painim ol. Bilong wanem? Long wanem, Jehova i redi long kisim bek ol.

11, 12. (a) Olsem wanem Jehova i bin helpim ol Israel? Wanem samting i kamap? (b) Dispela i skulim yumi olsem wanem long Jehova?

¹¹ Dispela “klaut i save sanap paslain long ol Israel,” i muv i go baksait long ol na pasim rot bilong ol Isip. Klaut i mekim na hap ol Isip i stap long en i tudak tru, tasol klaut i givim lait long ol Israel, na long nait tu klaut i mekim olsem. (Ritim Kisim Bek 14:19, 20.) Jehova i mekim strongpela win i kamap long hap is na i sakim solwara i go bek na solwara i bruk long 2-pela hap. Na namel graun i drai olgeta. Ating dispela i bin kisim bikpela haptaim liklik bikos Baibel i tok: “Win i winim solwara i stap inap tulait” na bihain long dispela “namel graun i drai olgeta na ol Israel i wokabaut long en i go long hap.” Taim ol Israel i wokabaut i go ol i no spit olsem ol karis bilong ami bilong Isip. Tasol maski i olsem, ol Isip i no inap kam klostu long ol Israel bikos Jehova i pait bilong helpim lain bilong en. “Em i paulim tingting bilong ol na ol i kirap nogut tru. Bikpela i mekim ol wil bilong karis i pas long graun, olsem na ol karis i no inap ran strong.”—Kis. 14:21-25.

¹² Taim olgeta Israel i kam kamap long hapsait, Jehova i tokim Moses: “Stretim han bilong yu na makim solwara na bai wara i kam bek na karamapim ol soldia bilong Isip wantaim ol karis na hos bilong ol.” Taim ol soldia i traim long ranawe, “Bikpela i subim olgeta i go long solwara.” Ol i no inap abrusim bagarap. “I no gat wanpela i stap. Olgeta i dai pinis.” (Kis. 14:26-28) Jehova i soim olsem em i gat strong long kisim bek lain bilong en, maski wanem samting i kamap.

SAMPELA I ABRUSIM BAGARAP BILONG JERUSALEM

13. Jisas i givim wanem tok long ol disaipel? Ating ol disaipel i laik save long wanem samting?

¹³ Namba 3 stori bai yumi skelim em samting i bin kamap long Jerusalem taim ami bilong Rom i pait long ol long taim bilong ol aposel. Dispela stori i soim olsem Jehova i save wanem samting stret bai kamap bilong truim samting em i tingting pinis long mekim. Jehova i bin yusim Jisas long givim tok long ol Kristen i stap long Jerusalem na Judia paslain long Jerusalem i bagarap long 70 C.E. Jisas i tok taim ol i lukim “dispela stingpela samting bilong kamapim bagarap” i sanap long “ples i holi,” ol i mas “ranawe i go long ol maunten.” (Mat. 24:15, 16) Tasol olsem wanem ol disaipel bilong Jisas bai save olsem truim bilong dispela tok profet i kirap kamap?

14. Wanem ol samting i bin kamap na mining bilong ol tok bilong Jisas i kamap klia?

¹⁴ Planti yia bihain, mining bilong ol tok bilong Jisas i kamap klia. Long 66 C.E., ami bilong Rom, em Sestius Galus i bosim, i kam long Jerusalem bilong daunim ol Juda i bikhet long Rom. Taim ol bikhet Juda, em ol i kolim ol lain Selot, ol i hait insait long tempel, ol soldia Rom i kirap brukim wol bilong tempel. Ol Kristen husat i tingim tok bilong Jisas i save dispela i makim wanem samting. Ol i kliagut olsem taim ami haiden bilong Rom i karim ol fleg bilong lotu bilong ol i go kamap long wol bilong tempel, dispela em “stingpela samting” i sanap long “ples holi.” Em taim bilong ol disaipel bilong Jisas long “ranawe i go long ol maunten.” Tasol olsem wanem ol bai lusim taun em ol birua i raunim? Samting ol i no tingim i laik kamap.

15, 16. (a) Jisas i tokaut klia long wanem samting? Bilong wanem em i bikpela samting long ol disaipel i mas bihainim dispela tok? (b) Yumi mas mekim wanem na bai yumi abrusim bagarap?

¹⁵ I luk olsem Sestius Galus i kirap nating na kisim ami bilong em na lusim Jerusalem na go bek long ples. Na ol Selot i ranim ol i go. Nau ol Rom na ol Selot i no stap moa long taun, olsem na rot i op bilong ol disaipel bilong Jisas i ken ranawe. Jisas i bin tokim ol olsem ol i mas lusim taun wantu na no ken kisim ol kago bilong ol i go wantaim ol. (Ritim Matyu 24:17, 18.) Em bikpela samting long ol i bihainim tok bilong Jisas na lusim taun wantu. Long wanem, insait long sampela de tasol, ol Selot i kam bek long taun na ol i kirap fosim ol manmeri bilong Jerusalem na Judia long joinim pait bilong ol. Narapela narapela lain Juda i kirap pait long stap bos bilong ol manmeri, na hevi i go bikpela moa. Dispela i mekim na i hatwok moa long lusim Jerusalem. Taim ol Rom i kam bek long 70 C.E., ol man i no gat rot long lusim Jerusalem. (Luk 19:43) Ol man i no bin lusim taun ol i kalabus i stap! Tasol ol Kristen husat i bihainim tok bilong Jisas na ranawe i go long ol maunten i bin abrusim bagarap. Ol yet i luksave olsem Jehova i save long rot bilong kisim bek lain bilong em. Dispela stori inap skulim yumi long wanem samting?

¹⁶ Long taim bilong traipela hevi tru, ol Kristen i mas bihainim ol tok bilong God na bilong oganaisesen bilong em. Olsem, Jisas i tokim ol disaipel long “ranawe i go long ol maunten.” Yumi tu bai kisim tok long “ranawe” long taim bilong traipela hevi tru. Bai yumi ranawe olsem wanem? Nau yet yumi no klia olgeta long dispela samting.b Tasol yumi ken bilip tru olsem long taim stret Jehova bai tokaut klia long yumi long mining bilong dispela tok. Bilong abrusim bagarap, yumi mas bihainim tok yumi kisim long dispela taim. Olsem na yumi mas askim yumi yet: ‘Mi save bihainim ol tok Jehova i save givim long lain bilong em long nau? Mi save hariap long bihainim tok, o mi wok isi isi long bihainim tok?’—Jems 3:17.

YUMI KISIM STRONG BILONG HELPIM YUMI LONG BIHAIN

17. Long rot bilong tok profet bilong Habakuk, yumi kisim wanem save long dispela pait Gok bai mekim long lain bilong God?

¹⁷ Nau yumi laik stori moa long pait bilong Gok, em yumi bin toktok long en long kirap bilong dispela stadi. Olsem Esekiel, profet Habakuk tu i bin stori long dispela pait. Em i tok: “Mi harim dispela olgeta samting na mi guria. Mi pret na maus bilong mi tu i guria. Hanlek bilong mi i dai na mi no gat strong moa. Mi save, God bai i kam na mekim save long ol man i save bagarapim mipela, olsem na mi stap isi na wetim dispela taim.” (Hab. 3:16) Taim Habakuk i harim olsem ol birua bai kam pait long lain bilong God, em i guria, na hanlek i no gat strong. Tasol em i orait long “stap isi na wetim” de bilong Jehova. Taim Gok wantaim ol lain bilong em i kam pait long yumi, ating yumi tu bai pret. Tasol bai yumi gat wankain bilip olsem Habakuk, bai yumi bilip olsem Jehova bai kisim bek lain bilong en.—Hab. 3:18, 19.

18. (a) Bilong wanem yumi no ken pret taim ol birua i kam bilong pait long yumi? (b) Bai yumi skelim wanem samting long stadi i kamap bihain long dispela?

¹⁸ Dispela 3-pela stori yumi bin skelim i kamapim klia olsem Jehova i save long rot bilong kisim bek lain bilong en. Ol samting em i tingting pinis long mekim bai kamap, na em bai bagarapim ol birua bilong em. Sapos yumi laik stap na amamas long dispela taim we Jehova i daunim pinis ol birua, orait yumi mas stap gut long Jehova inap long pinis. Long nau, Jehova i save mekim wanem bilong helpim yumi long i stap gut long em? Bai yumi skelim dispela samting long stadi i kamap bihain.

[Ol Futnot]

[Piksa long pes 24]

Yu ting i gat as tru na ol Israel i pret long ami bilong Fero?