Givim Bel Long God na Sanap Strong na Karim Hevi
“Wokabaut long pasin bilong God na mekim dispela pasin i kamap strong olsem pasin bilong sanap strong na karim hevi.”—2 PITA 1:5, 6.
1, 2. (a) Pikinini i mas kamap bikpela long wanem ol samting? (b) Olsem wanem pasin bilong kamap strong long ol samting bilong spirit em i bikpela samting?
PASIN bilong kamap bikpela em i bikpela samting long pikinini, tasol i no long skin tasol em i mas kamap bikpela. Pikinini i mas kamap bikpela tu long tingting na bel. Em i mas lusim ol pasin bilong pikinini na kamap man o meri i bikpela pinis. Aposel Pol i tingim dispela samting taim em i tok: “Taim mi stap pikinini yet, save bilong mi i olsem save bilong ol pikinini, na mi save tingting na toktok long pasin bilong pikinini. Tasol taim mi kamap bikpela pinis, mi lusim ol pasin bilong pikinini.”—1 Korin 13:11.
2 Tok bilong Pol i kamapim wanpela bikpela samting long pasin bilong kamap strong long ol samting bilong spirit. Ol Kristen i mas lusim pasin bilong stap olsem pikinini long ol samting bilong spirit—tingting bilong ol i mas kamap “olsem tingting bilong ol bikpela man.” (1 Korin 14:20) Ol i mas taitim bun na wok long “kisim ol wankain gutpela pasin olsem Krais.” Sapos ol i mekim olsem, bai ol i no stap olsem “ol liklik pikinini,” em ol “tok bilong ol grisman” i save “sakim [ol] nabaut olsem win na si i save sakim kanu long solwara, na kanu i trip nabaut.”—Efesus 4:13, 14.
3, 4. (a) Bilong kamap man i bikpela pinis long ol samting bilong spirit, yumi mas mekim wanem? (b) Yumi mas kamapim wanem ol pasin God i laikim? Ol dispela pasin i bikpela samting olsem wanem?
3 Olsem wanem yumi inap kamap olsem man i bikpela pinis long ol samting bilong spirit? Wok bilong skin yet i mekim skin i go bikpela, tasol bilong kamap bikpela long ol samting bilong spirit, yumi mas mekim sampela wok. Pastaim yumi mas kisim stretpela save long Tok Bilong God na bihainim ol tok yumi lainim. (Hibru 5:14; 2 Pita 1:3) Na dispela bai helpim yumi long kamapim ol pasin God i laikim. Wankain olsem olgeta wan wan hap bilong skin i wok long kamap bikpela long wankain taim, ol wan wan pasin God i laikim ol tu i wok long kamap strong long wankain taim. Aposel Pita i tok: “Wok strong tru long mekim gutpela pasin, na . . . kisim save long God, na . . . bosim gut laik bilong bodi, . . . [na] sanap strong na karim hevi, na . . . wokabaut long pasin bilong [“givim bel long,” NW ] God, na . . . stap pren tru bilong ol arapela manmeri bilong God, na . . . givim bel bilong yupela long ol arapela.”—2 Pita 1:5-7.
4 Olgeta wan wan pasin Pita i kolim em i bikpela samting, na yumi no ken lusim wanpela. Em i tok moa: “Sapos yupela i kisim ol dispela kain pasin na ol i kamap strong tru long yupela, orait dispela save bilong yupela [long Jisas Krais, Bikpela bilong yumi] bai i no inap i stap nating. Nogat. Em bai i karim planti kaikai.” (2 Pita 1:8) Orait nau yumi ken stori long wok bilong bungim pasin bilong givim bel long God wantaim pasin bilong sanap strong na karim hevi.
Sanap Strong na Karim Hevi
5. Bilong wanem yumi mas kisim pasin bilong sanap strong na karim hevi?
5 Pita na Pol i bungim pasin bilong givim bel long God wantaim pasin bilong sanap strong na karim hevi. (1 Timoti 6:11, NW ) Man i sanap strong em i save karim hevi na em i no les, tasol i no dispela samting tasol. Long taim hevi o traim i painim em o man i mekim nogut long em, em i save stap isi na stap strong—em i no pret na surik, na em i no lusim tingting long ol gutpela samting em i wetim i kamap bihain. Yumi “pas wantaim Krais Jisas na i bihainim pasin bilong [“givim bel long,” NW ] God,” olsem na yumi save ol man bai mekim nogut long yumi. (2 Timoti 3:12) Bilong kamapim klia olsem yumi laikim tumas Jehova, na kisim ol pasin yumi mas kisim na bai yumi no ken lus, yumi mas sanap strong na karim hevi. (Rom 5:3-5; 2 Timoti 4:7, 8; Jems 1:3, 4, 12) Yumi no inap kisim laip oltaim sapos yumi no gat dispela pasin bilong sanap strong na karim hevi.—Rom 2:6, 7; Hibru 10:36.
6. Bilong stap strong inap long las de, yumi mas mekim wanem?
6 Maski yumi wok strong taim yumi kirap mekim wok Kristen, nambawan bikpela samting em yumi mas stap strong i go inap long pinis. Jisas i tok: “Ol manmeri i stap strong inap long las de, God bai i kisim bek ol.” (Matyu 24:13) Yes, yumi mas stap strong i go inap long pinis, maski em pinis bilong laip bilong yumi long nau o pinis bilong dispela pasin nogut bilong graun. Tasol maski las de em wanem samting, yumi mas holimpas pasin bilong i stap gut long God. Tasol sapos yumi no bungim pasin bilong givim bel long God wantaim pasin bilong sanap strong na karim hevi, bai yumi no inap mekim ol samting Jehova i laikim na yumi no inap kisim laip oltaim. Tasol pasin bilong givim bel long God em i wanem samting?
Pasin Bilong Givim Bel Long God
7. Pasin bilong givim bel long God em i wanem samting? Dispela pasin i save kirapim yumi long mekim wanem?
7 Pasin bilong givim bel long God i olsem yumi daun long God Jehova, na lotuim em, na mekim wok bilong em, long wanem, yumi laik stap gut long em olsem King bilong heven na graun. Bilong givim bel long God, yumi mas kisim stretpela save long Jehova na long ol pasin bilong em. Yumi mas i gat laik long save gut long em. Dispela bai kirapim yumi long pas gut wantaim em, na kamapim dispela samting long rot bilong ol pasin na wok bilong yumi. Yumi mas i gat laik long bihainim ol pasin na tingting bilong Jehova. (Efesus 5:1) Pasin bilong givim bel long God i save kirapim yumi long mekim olgeta samting God i laikim.—1 Korin 10:31.
8. Pasin bilong givim bel long God na pasin bilong lotuim em wanpela tasol, olsem wanem dispela tupela pasin i poroman wantaim?
8 Bilong givim bel tru long God, yumi mas lotuim Jehova wanpela tasol; yumi no ken larim narapela samting i kisim ples bilong em long bel bilong yumi. Em i Man bilong wokim yumi, olsem na i stret yumi lotuim em wanpela tasol. (Lo 4:24; Aisaia 42:8) Tasol Jehova i no save subim yumi long lotuim em, nogat. Em i laik bai yumi amamas long givim bel long em. Yumi laikim tru God—em stretpela save bilong God i as bilong en—na dispela i kirapim yumi long lusim ol pasin nogut na dediket long em na bihainim dispela dediket.
Pas Gut Wantaim God
9, 10. Bilong kisim pasin bilong pas gut wantaim God na holimpas dispela pasin, yumi mas mekim wanem?
9 Taim yumi kisim baptais pinis bilong makim olsem yumi dediket pinis long God, yumi mas wok yet long pas gut wantaim em. Yumi gat laik long mekim olsem, na long stap gut long mekim wok bilong Jehova, na dispela i kirapim yumi long wok yet long stadi long Tok bilong em na tingim tingim dispela tok long bel. Taim yumi larim spirit bilong God i stiaim tingting na bel bilong yumi, pasin bilong yumi long laikim tru Jehova i save kamap strong moa. Yumi pas gut wantaim em na dispela i save stap olsem nambawan bikpela samting long laip bilong yumi. Yumi tingim Jehova olsem nambawan gutpela Pren bilong yumi na oltaim yumi laik mekim ol samting em i laikim. (1 Jon 5:3) Yumi amamas moa yet long pas gut wantaim God, na yumi tenkyu olsem long pasin isi em i save skulim yumi na em i stretim yumi long taim i gat wok long mekim olsem.—Lo 8:5.
10 Oltaim yumi mas wok long strongim dispela gutpela pasin pren wantaim Jehova. Sapos nogat, dispela inap mekim na yumi no pas gut moa wantaim em. Sapos dispela samting i kamap, orait em i no asua bilong God, long wanem, “em i no i stap longwe long yumi olgeta wan wan.” (Aposel 17:27) Yumi amamas olsem rot Jehova i makim bilong go klostu long em i no hatwok tumas! (1 Jon 5:14, 15) Tru, yumi mas wok strong long holimpas dispela pasin bilong stap pren wantaim Jehova. Tasol Jehova i save helpim yumi long go klostu long em long rot bilong givim yumi olgeta samting yumi mas kisim bambai yumi inap kisim pasin bilong givim bel long em na holimpas dispela pasin. (Jems 4:8) Olsem wanem yumi inap mekim wok long olgeta dispela gutpela samting em i givim long yumi?
Stap Strong Long Ol Samting Bilong Spirit
11. Wanem sampela samting i soim olsem yumi givim bel long God?
11 Pasin bilong laikim tru God bai kirapim yumi long givim bel tru long em, olsem Pol i tok: “Yu mas wok strong long kamap wokman tru, na bai God i laikim wok bilong yu. Olsem na bai yu autim stret tok tru bilong God, na bai yu no gat sem long ai bilong en.” (2 Timoti 2:15) Bilong mekim olsem, oltaim yumi mas stadi long Baibel, na go long ol miting, na insait long wok autim tok. Na long rot bilong “beten oltaim,” yumi inap stap klostu long Jehova. (1 Tesalonaika 5:17) Em ol samting pasin bilong givim bel long God i save kamapim. Sapos yumi lusim wanpela bilong ol dispela samting, dispela inap mekim na yumi kisim sik long spirit na i no hatwok long ol trik bilong Satan i pundaunim yumi.—1 Pita 5:8.
12. Olsem wanem yumi inap karim ol hevi?
12 Na sapos yumi stap strong long ol samting bilong spirit na mekim wok, dispela bai helpim yumi long winim ol traim i save painim yumi. Sampela kain hevi inap traim tru yumi. I hatwok taim man i no laik harim tok bilong yumi o ol i birua long yumi o mekim nogut long yumi, tasol i hatwok moa taim sampela long famili, lain wantok, o lain i stap klostu, i mekim olsem long yumi. Ating long ples wok o skul sampela samting inap kamap bilong subim yumi long kalapim ol lo Kristen. Sik na bel hevi inap mekim na yumi no stap strong moa long skin na nau yumi hatwok moa long karim ol hevi i traim bilip bilong yumi. Tasol yumi inap karim olgeta hevi sapos yumi “wokabaut long pasin holi na bihainim olgeta pasin bilong God . . . [na] wetim De bilong God i kamap.” (2 Pita 3:11, 12) Na taim yumi mekim olsem, yumi ken stap amamas na bilip olsem God bai mekim gut long yumi.—Sindaun 10:22.
13. Yumi mas mekim wanem na bai yumi ken bihainim yet pasin bilong givim bel long God?
13 Tru, Satan i birua long ol man i givim bel long God, tasol yumi no ken pret. Bilong wanem? Long wanem, “sapos traim i kamap long ol man i bihainim [“pasin bilong givim bel long,” NW ] God, orait Bikpela i save long rot bilong kisim bek ol long dispela traim.” (2 Pita 2:9) Bilong yumi ken sanap strong long karim hevi na God i kisim bek yumi, yumi mas “lusim olgeta laik nogut bilong dispela graun, na . . . tingting gut na wokabaut stret . . . [na] bihainim pasin bilong [“givim bel long,” NW ] God.” (Taitus 2:12) Yumi ol Kristen i mas was gut na bai ol laik nogut bilong skin na ol pasin bilong graun i no ken bagarapim pasin bilong yumi long givim bel long God. Orait nau yumi ken skelim sampela bilong ol dispela samting.
Ol Samting Bilong Pasim Yumi Long Givim Bel Long God
14. Yumi mas tingim wanem samting sapos pasin bilong laikim tumas mani kago samting i laik pulim yumi?
14 Pasin bilong laikim tumas mani kago samting i pulim planti man. Nogut yumi giamanim yumi yet na “ting pasin bilong [“givim bel long,” NW ] God em i rot bilong kisim kago.” Nogut dispela tingting i mekim na yumi stiaim ol wanbilip, em ol i trastim yumi, long mekim ol samting bilong helpim yumi yet. (1 Timoti 6:5) Na nogut yumi kisim tingting kranki olsem i orait long subim wanpela Kristen i gat planti mani long givim dinau long yumi, tasol yumi no inap bekim. (Song 37:21) Pasin bilong givim bel long God “inap long helpim yumi long dispela laip nau yumi stap long en, na long laip yumi bai kisim bihain tu.” Tasol pasin bilong kisim mani kago samting i no inap helpim yumi long dispela samting. (1 Timoti 4:8) Taim ‘yumi kamap long graun, yumi no bin karim wanpela samting i kam na taim yumi lusim graun yumi bai i no inap karim wanpela samting i go,’ olsem na yumi mas tingting strong long bihainim pasin bilong givim bel long God na “amamas long ol samting God i save givim yumi,” na “sapos yumi gat kaikai na laplap samting, orait yumi ken tok, ‘Em inap long mi.’ ”—1 Timoti 6:6-11.
15. Yumi ken mekim wanem sapos pasin bilong painim amamas i laik kisim ples bilong pasin bilong yumi long givim bel long God?
15 Pasin bilong painim amamas inap daunim pasin bilong givim bel long God. Sapos olsem, orait kwiktaim yumi mas mekim sampela samting bilong stretim, a? Tru, pasin bilong eksasais na painim amamas em inap helpim yumi liklik. Tasol samting dispela i helpim yumi long en em i liklik, taim yumi skelim wantaim laip i stap oltaim oltaim. (1 Jon 2:25) Long nau, planti man i save ‘laikim tumas ol kain kain pasin bilong amamas bilong dispela graun, na ol i no laikim God. Ol i bihainim pasin bilong [“givim bel long,” NW ] God long skin tasol.’ Yumi mas stap longwe long ol dispela kain man. (2 Timoti 3:4, 5) Ol man i save givim bel long God ol i “bungim planti samting bilong helpim ol bihain, na ol bai i kisim dispela laip em i laip tru.”—1 Timoti 6:19.
16. Wanem ol laik nogut bilong skin i save pasim sampela long bihainim ol stretpela lo bilong God? Yumi ken mekim wanem bilong daunim ol dispela laik nogut?
16 Pasin bilong dring na kisim drak na pasin pamuk, na ol laik nogut bilong bel, ol inap bagarapim pasin bilong yumi long givim bel long God. Sapos yumi kirap mekim ol dispela samting, dispela inap mekim na yumi no bihainim ol stretpela lo bilong God. (1 Korin 6:9, 10; 2 Korin 7:1) Pol tu i bin wok long sakim ol laik nogut bilong skin. (Rom 7:21-25) Bilong rausim ol laik nogut bilong skin, yumi mas wok strong. Yumi mas tingting strong long bihainim stretpela pasin tasol. Pol i tokim yumi: “Yupela i mas kilim i dai olgeta pasin bilong dispela graun i stap long bel bilong yupela. Mi tok long olkain pasin olsem, pasin pamuk na pasin doti, na pasin bilong bel i kirap long mekim ol pasin nogut, na pasin bilong mangal long ol samting bilong narapela man.” (Kolosi 3:5) Bilong kilim i dai ol laik nogut bilong bel, yumi mas tingting strong long rausim ol dispela laik. Pasin bilong beten strong na askim God long helpim yumi, dispela bai helpim yumi long sakim ol laik nogut bilong skin na bihainim stretpela pasin na pasin bilong givim bel long God namel long ol man nogut bilong dispela graun.
17. Yumi mas i gat wanem tingting long ol tok bilong stretim yumi?
17 Bel hevi inap mekim na yumi no strong moa long sanap strong na karim hevi na givim bel long God. Planti wokboi bilong Jehova i bin bel hevi. (Namba 11:11-15; Esra 4:4; Jona 4:3) Na bel hevi inap nogutim yumi moa yet sapos yumi bel nogut long samting narapela i bin mekim long yumi o yumi bin kisim strongpela tok bilong stretim yumi. Tasol taim narapela i stretim yumi, dispela i soim olsem God i laikim yumi na i laik helpim yumi. (Hibru 12:5-7, 10, 11) Taim yumi kisim ol tok bilong stretim yumi, yumi no ken tingim dispela i olsem wanpela strafe tasol, nogat; yumi mas tingim i olsem wanpela samting bilong skulim yumi long wokabaut long stretpela pasin. Sapos yumi gat pasin daun, bai yumi amamas long kisim ol tok bilong stretim yumi—bai yumi save olsem ‘taim ol man i stretim yumi, ol i soim yumi gutpela pasin yumi mas bihainim long laip bilong yumi.’ (Sindaun 6:23) Dispela samting inap helpim yumi long kamap strong moa long bihainim pasin bilong givim bel long God.
18. Wanem wok bilong yumi taim hevi i kamap namel long yumi na ol narapela?
18 Sapos ol liklik liklik kros na hevi i kamap namel long yumi na ol narapela, dispela inap mekim na i hatwok long bihainim pasin bilong givim bel long God. Ol dispela kros na hevi inap kirapim sampela long tingting planti o stap longwe long ol brata sista bilong spirit. (Sindaun 18:1) Tasol yumi mas save, pasin bilong bel nogut long narapela inap longtaim, dispela inap mekim na yumi no pas gut wantaim Jehova. (Wok Pris 19:18) “Man i no save laikim ol arapela, em ol manmeri em i lukim pinis, em i no inap laikim God em i no bin lukim.” (1 Jon 4:20) Long bikpela tok Jisas i mekim antap long maunten, em i kamapim klia olsem kwiktaim yumi mas mekim sampela samting bilong stretim ol hevi i stap namel long yumi wantaim ol narapela. Em i tokim ol man i harim tok bilong em: “Sapos yu bringim ofa bilong yu i kam long alta, na yu tingim brata bilong yu em i gat tok long yu, orait yu mas lusim ofa bilong yu i stap klostu long alta. Na yu go pastaim na stretim tok wantaim brata bilong yu. Stretim pinis, orait nau yu ken i go na givim ofa bilong yu long God.” (Matyu 5:23, 24) Sapos tok bilong yumi i bin givim hevi long narapela, orait sapos yumi tok sori, ating dispela inap stretim dispela hevi. Sapos yumi kamapim popaia bilong yumi, na yumi askim man long lusim rong bilong yumi, bai yumi inap kamap wanbel gen. Na Jisas i givim sampela tok moa long pasin bilong stretim hevi. (Matyu 18:15-17) Yumi amamas taim ol wok yumi mekim bilong stretim ol hevi i kamapim gutpela samting, a?—Rom 12:18; Efesus 4:26, 27.
Bihainim Pasin Bilong Jisas
19. Bilong wanem i bikpela samting long yumi bihainim pasin bilong Jisas?
19 Tru tumas, ol hevi bai painim yumi, tasol i no olsem ol dispela hevi i mas mekim na yumi no insait moa long resis bilong kisim laip oltaim oltaim, nogat. No ken lusim tingting, Jehova inap kisim bek yumi long ol hevi. Taim yumi “lusim olgeta kain samting i mekim yumi i no inap ran strong,” na yumi “ran strong long dispela resis God i bin makim bilong yumi ran long en,” yumi mas “lukluk i go long Jisas, em i as bilong bilip bilong yumi.” (Hibru 12:1-3) Sapos yumi skelim gut pasin bilong Jisas na wok long bihainim em long ol tok na ol wok yumi mekim, dispela bai helpim yumi long kisim pasin bilong givim bel long God na kamapim moa yet dispela pasin.
20. Sapos yumi bihainim pasin bilong sanap strong na karim hevi na pasin bilong givim bel long God, dispela bai helpim yumi olsem wanem?
20 Pasin bilong sanap strong na karim hevi, na pasin bilong givim bel long God, dispela tupela pasin i save wok wantaim long helpim yumi kisim laip oltaim. Sapos yumi kamapim ol dispela gutpela pasin, bai yumi inap stap gut long mekim wok bilong God. Maski hevi i painim yumi, bai yumi stap amamas, long wanem, Jehova bai sori moa yet long yumi, long wanem, yumi bin sanap strong na karim hevi na bihainim pasin bilong givim bel long God. (Jems 5:11) Na tu, Jisas yet i tok: “Yupela i mas i stap strong, na bai yupela i kisim laip na i stap gut.” —Luk 21:19.
Bai Yu Bekim Olsem Wanem?
• Olsem wanem pasin bilong sanap strong na karim hevi em i bikpela samting?
• Pasin bilong givim bel long God i olsem wanem? Yumi kamapim olsem wanem?
• Olsem wanem yumi inap pas gut wantaim God na holimpas dispela pasin?
• Wanem sampela samting inap bagarapim pasin bilong yumi long givim bel long God? Olsem wanem yumi inap abrusim ol dispela samting?
[Ol Piksa long pes 12, 13]
Pasin bilong givim bel long God i kamap klia long kain kain rot
[Ol Piksa long pes 14]
Lukaut gut long ol samting inap bagarapim pasin bilong yu long givim bel long God