Kisim Skul Long Tok Bilong God
Wanem Samting Bai Kamap Long De Bilong Kot?
Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.
1. De Bilong Kot em i wanem samting?
Olsem piksa long han sut i soim, planti manmeri i ting olsem long De Bilong Kot, planti bilion manmeri bai sanap long ai bilong sia king bilong God na bai God i kotim ol long ol pasin ol i bin mekim bipo—sampela bai kisim laip long heven na sampela narapela bai kisim pen oltaim long hel. Tasol Baibel i soim olsem wok bilong dispela De Bilong Kot em i bilong kisim bek ol manmeri long pasin i no stret. (Song 96:12, 13) God i makim Jisas long stap olsem Jas na kamapim bek stretpela pasin bilong helpim sindaun bilong olgeta man.—Ritim Aisaia 11:1-5; Aposel 17:31.
2. Olsem wanem De Bilong Kot bai kamapim bek stretpela pasin?
Taim namba 1 man Adam i bikhet long God, dispela i mekim na olgeta tumbuna pikinini bilong em i kisim sin, karim pen na hevi, na ol i dai. (Rom 5:12) Jisas bai stretim dispela hevi long rot bilong kirapim bek planti bilion manmeri em ol i dai pinis. Buk Revelesen i tok dispela samting bai kamap insait long 1,000 yia taim Krais Jisas i mekim wok king.—Ritim Revelesen 20:4, 11, 12.
Taim ol dispela manmeri i kirap bek pinis, God bai kotim ol, tasol i no long pasin ol i bin mekim paslain long ol i dai, nogat. Em bai kotim ol long pasin ol i bihainim taim ol i kisim save long ol tok i stap long “ol skrol.” (Rom 6:7) Aposel Pol i tok olsem “ol stretpela man na ol man nogut wantaim” bai kirap bek na ol bai i gat rot bilong kisim save long God.—Ritim Aposel 24:15.
3. De Bilong Kot bai kamapim wanem samting?
Ol manmeri husat i bin dai paslain long ol i kisim save long God Jehova na mekim wok bilong em, ol bai i gat rot long senisim pasin na bihainim stretpela pasin. Sapos ol i mekim olsem, orait “kirap bek bilong ol em bilong kisim laip.” Tasol sampela bilong ol manmeri husat i kirap bek ol bai i no gat laik long kisim save long ol pasin Jehova i laikim. Ol dispela manmeri, “kirap bek bilong ol em bilong kisim kot.”—Ritim Jon 5:28, 29; Aisaia 26:10; 65:20.
De Bilong Kot bai stap inap 1,000 yia na long pinis bilong en, Jehova bai helpim olgeta manmeri husat i bihainim tok na ol bai kamap gutpela olgeta olsem bilong pastaim tru. (1 Korin 15:24-28) Dispela em i wanpela gutpela samting tru bai painim olgeta manmeri husat i bihainim tok! Insait long dispela 1,000 yia, God bai pinisim strong bilong Satan, tasol long pinis bilong dispela haptaim, God bai larim Satan long kamapim laspela traim. Satan bai traim gen long pulim ol manmeri long lusim Jehova, tasol ol manmeri husat i sakim Satan, ol bai kisim laip long graun inap oltaim oltaim bihain.—Ritim Aisaia 25:8; Revelesen 20:7-9.
4. Wanem narapela de bilong kot bai helpim ol man?
Baibel i yusim dispela tok “de bilong bikpela kot” bilong makim samting bai kamap na pinisim ol pasin nogut bilong nau. Dispela de bilong kot bai kamap wantu tasol olsem Bikpela Tait long taim bilong Noa we i bin bagarapim olgeta manmeri nogut bilong dispela taim bipo. Yumi ken amamas olsem klostu nau bai God i bagarapim “ol man i sakim tok bilong God,” na dispela bai opim rot long ol stretpela man i ken stap long graun na “stretpela pasin tasol bai i stap.”—Ritim 2 Pita 3:6, 7, 13.
Bilong kisim sampela save moa, lukim pes 213-215 bilong dispela buk, em ol Witnes Bilong Jehova i wokim. Tru Tru Baibel i Tok Wanem?
[Piksa long pes 16]
“Laspela de bilong Kot,” bilong Gustave Doré, 1832-1883
[Kredit Lain]
Engravings by Doré