Wokabaut Olsem Jisas Krais i Bin Wokabaut
“Sapos wanpela man i tok, ‘Mi pas wantaim God,’ orait dispela man i mas wokabaut olsem Krais i bin wokabaut.”—1 JON 2:6.
1, 2. Wanem ol samting i insait long pasin bilong lukluk i go long Jisas?
APOSEL Pol i tok: “Yumi mas strongim bel na ran strong long dispela resis God i bin makim bilong yumi ran long en. Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi.” (Hibru 12:1, 2) Bilong yumi ken i stap gut long God, yumi mas lukluk i go long Jisas.
2 Long Ol Skripsa Grik, hap tok ol i tanim olsem “lukluk i go” i makim pasin bilong “lukluk na i no larim wanpela samting i pulim ai,” “rausim ai long wanpela samting na lukluk i go long narapela samting,” “lukluk i go stret long wanpela samting tasol.” Wanpela buk i tok: ‘Sapos wanpela man Grik i ran long resis na em i no lukluk long rot em i ran long en na mak em bai kamap long en, dispela bai daunim spit bilong em. Wankain samting olsem i save painim ol Kristen.’ Ol samting bilong pulim tingting inap pasim yumi long kamap strong moa long ol samting bilong spirit. Yumi mas lukluk i go long Jisas Krais. Na yumi laik lukim wanem samting taim yumi lukluk i go long Jisas? Long tok Grik, dispela tok ol i bin tanim olsem “as bilong bilip” i makim “nambawan lida, man i go pas long mekim wanpela samting na i makim pasin ol narapela i ken bihainim.” Bilong lukluk i go long Jisas, dispela i makim olsem yumi mas bihainim pasin bilong em.
3, 4. (a) Bilong wokabaut olsem Jisas Krais i bin wokabaut, yumi mas mekim wanem? (b) Yumi mas tingim gut wanem ol askim?
3 Baibel i tok: “Sapos wanpela man i tok, ‘Mi pas wantaim God,’ orait dispela man i mas wokabaut olsem Krais i bin wokabaut.” (1 Jon 2:6) Yumi mas pas wantaim God long rot bilong bihainim ol tok bilong Jisas, wankain olsem Jisas i bin bihainim tok bilong Papa bilong em.—Jon 15:10.
4 Olsem na bilong wokabaut olsem Jisas i bin wokabaut, yumi mas lukluk i go long em olsem Nambawan Lida na yumi mas bihainim gut ol pasin bilong em. Ol bikpela askim yumi mas tingim i olsem: Long nau Krais i stiaim yumi long wanem ol rot? Taim yumi wokabaut olsem Jisas i bin wokabaut, dispela i mas mekim wanem long yumi? Taim yumi bihainim pasin bilong Jisas Krais, dispela bai helpim yumi long wanem ol rot?
Krais i Stiaim Lain Bilong Em
5. Paslain long Jisas i go bek long heven, em i bin mekim wanem tok promis long ol disaipel bilong em?
5 Paslain long Jisas Krais i go bek long heven, em i kamap long ol disaipel na em i givim wanpela bikpela wok long ol. Em i tok: “Yupela i mas i go mekim olgeta lain manmeri i kamap disaipel bilong mi.” Long dispela taim, dispela Nambawan Lida i tok promis tu long em bai stap wantaim ol disaipel taim ol i mekim dispela wok. Em i tok: “Harim. Mi save stap wantaim yupela olgeta de, i go inap long dispela taim i pinis.” (Matyu 28:19, 20) Olsem wanem Jisas Krais i stap wantaim ol disaipel bilong em nau long dispela taim bilong pinis?
6, 7. Olsem wanem Jisas i yusim holi spirit bilong stiaim yumi long nau?
6 Jisas i tok: “Helpim tru bilong strongim yupela em i Holi Spirit. Na long nem bilong mi, Papa bai i salim em i kam. Em bai i skulim yupela long olgeta samting. Na bai em i kirapim tingting bilong yupela na bai yupela i tingim gen olgeta tok mi bin givim long yupela.” (Jon 14:26) Dispela holi spirit, em God i salim i kam long nem bilong Jisas, em i save stiaim na strongim yumi long nau. Em i helpim yumi long save long ol samting bilong spirit na kliagut long ol “tingting hait bilong God.” (1 Korin 2:10) Na tu, ‘Holi Spirit i save kirapim yumi long mekim ol gutpela pasin olsem, laikim tru ol arapela, amamas, stap bel isi, i no belhat kwik, helpim ol man, mekim gutpela pasin long ol, wokabaut stret oltaim, stap isi, na daunim laik bilong olpela bel.’ (Galesia 5:22, 23) Holi spirit inap helpim yumi long kamapim ol dispela pasin.
7 Taim yumi stadi long Baibel na wok strong long bihainim ol tok yumi lainim, spirit bilong Jehova bai helpim yumi long kisim gutpela tingting, gutpela save, stretpela pasin, na pasin bilong tingting gut. (Sindaun 2:1-11) Holi spirit i helpim yumi long winim ol traim na karim hevi. (1 Korin 10:13; 2 Korin 4:7; Filipai 4:13) Baibel i kirapim ol Kristen long ‘rausim olgeta pasin doti bilong bodi na bilong spirit, na ol i mas kamap klin olgeta long ai bilong God.’ (2 Korin 7:1) Sapos holi spirit i no helpim yumi, yumi no inap kamap klin olgeta long ai bilong God, nogat. Wanpela samting Jisas i yusim bilong stiaim yumi long nau, em long rot bilong holi spirit, em samting Jehova i orait long Pikinini bilong em i ken mekim wok long en.—Matyu 28:18.
8, 9. Olsem wanem Krais i mekim wok long “wokboi i gat gutpela tingting” bilong stiaim lain bilong em?
8 I gat narapela samting tu Krais i yusim bilong stiaim kongrigesen long nau. Taim Jisas i stori long em bai i kam i stap na pasin bilong nau bai i pinis, em i tok: “Wanem wokboi i gat gutpela tingting, na i save mekim gutpela wok oltaim? Bikman i save makim dispela kain wokboi bilong bosim ol arapela wokboi bilong en, na bilong skelim kaikai long ol long taim bikman i makim. Dispela kain wokboi i ken amamas tru taim bikman bilong en i kam bek na i lukim em i stap mekim wok bilong en. Mi tok tru long yupela, bikman bai i makim dispela wokboi bilong bosim olgeta samting bilong en.”—Matyu 24:3, 45-47.
9 Dispela “bikman” em Jisas Krais. “Wokboi” i makim lain Kristen em God i bin makim na ol i stap long graun. Lain wokboi i kisim wok bilong lukautim ol samting bilong Jisas long graun na givim kaikai bilong spirit long taim stret. Sampela bilong lain “wokboi i gat gutpela tingting” ol i insait long Gavening Bodi, na ol i olsem mausman bilong lain wokboi. Ol i save stiaim wok bilong autim tok bilong Kingdom long olgeta hap na givim ol gutpela kaikai bilong spirit long taim stret. Olsem na Krais i stiaim kongrigesen long rot bilong “wokboi i gat gutpela tingting” na Gavening Bodi bilong en.
10. Yumi mas i gat wanem tingting long ol elda? Bilong wanem?
10 Narapela samting i kamapim klia wok bos bilong Krais em long rot bilong ol man i stap olsem “ol presen”—ol wasman Kristen. Ol i gat wok long “helpim yumi manmeri bilong God bai yumi inap long mekim gutpela wok bilong em . . . na bai bodi bilong Krais i ken kamap strong na i stap gut.” (Efesus 4:8, 11, 12) Hibru 13:7 i tok long ol olsem: “Yupela i mas tingting long ol lida bilong sios bilong yupela, bipo ol i autim tok bilong God long yupela. Yupela i mas tingting long pasin ol i bin wokabaut long en, na yupela i mas bihainim pasin bilong bilip bilong ol.” Ol elda i go pas long stiaim yumi insait long kongrigesen. Ol i bihainim pasin bilong Krais Jisas, olsem na bilip bilong ol i stap olsem gutpela piksa yumi ken bihainim. (1 Korin 11:1) Yumi inap soim olsem yumi tenkyu tru long lain elda long rot bilong bihainim tok na daun long ol dispela man em ol i olsem presen.—Hibru 13:17.
11. Krais i yusim wanem ol rot bilong stiaim lain bilong em long nau? Yumi mas mekim wanem bilong wokabaut olsem Krais i bin wokabaut?
11 Yes, Jisas Krais i stiaim lain bilong em long nau long rot bilong holi spirit, “wokboi i gat gutpela tingting,” na ol elda long kongrigesen. Bilong wokabaut olsem Krais i bin wokabaut, yumi mas kliagut na daun long ol rot em i yusim bilong stiaim yumi. Dispela i makim tu olsem yumi mas bihainim pasin bilong em. Aposel Pita i tok: “God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.” (1 Pita 2:21) Taim yumi bihainim pasin bilong Jisas, dispela i mas mekim wanem long yumi?
Mekim Pasin Isi
12. Ol elda long kongrigesen i mas tingim gut wanem pasin bilong Krais?
12 Jisas i bin kisim bikpela namba long Papa bilong em, tasol em i bin mekim pasin isi taim em i mekim wok long dispela namba. Olgeta insait long kongrigesen—moa yet em ol wasman—ol i mas ‘isi isi long olgeta man na larim ol i lukim dispela gutpela pasin bilong ol.’ (Filipai 4:5; 1 Timoti 3:2, 3) Ol elda i holim namba insait long kongrigesen, olsem na em i bikpela samting long ol i mas bihainim pasin bilong Krais long mekim wok long dispela namba.
13, 14. Olsem wanem ol elda i ken bihainim pasin bilong Krais taim ol i kirapim ol arapela long mekim wok bilong God?
13 Jisas i bin tingim gut ol samting ol disaipel bilong em i sot long en. Em i no strong long ol i mas mekim ol samting ol i no inap long mekim. (Jon 16:12) Jisas i kirapim ol disaipel bilong em long “taitim bun tru” long mekim laik bilong God, tasol em i mekim olsem long pasin i no givim hevi long ol. (Luk 13:24) Bilong mekim olsem, em yet i go pas long mekim wok na dispela i kirapim bel bilong ol disaipel. Olsem tasol, bilong kirapim ol arapela long mekim wok bilong God, ol elda Kristen long nau i no save pretim ol long rot bilong semim ol, nogat. Ol i strongim ol long larim pasin bilong ol long laikim tru Jehova na Jisas na ol arapela, i kirapim ol long mekim wok bilong Jehova.—Matyu 22:37-39.
14 Jisas i no mekim nabaut long namba em i holim na bosim i stap bilong ol man, nogat. Em i no putim planti lo tumas o putim ol lo i antap tumas na ol man i no inap winim. Em i laik kirapim ol man long rot bilong helpim ol long pilim tru ol stiatok long lo bilong Moses. (Matyu 5:27, 28) Ol elda i bihainim pasin bilong Jisas Krais na ol i no kamapim nating ol lo o strong long ol man i mas bihainim tingting bilong ol yet. Long pasin bilong bilas na mekim gut skin o malolo na kisim amamas samting, ol elda i kirapim ol man long pilim ol tok long rot bilong yusim ol stiatok bilong Baibel olsem i stap long Maika 6:8; 1 Korin 10:31-33; na 1 Timoti 2:9, 10.
Pilim Tru Hevi na Lusim Rong
15. Jisas i mekim wanem pasin taim ol disaipel i mekim rong?
15 Pasin em Krais i bin mekim taim ol disaipel bilong em i mekim rong, dispela i stap olsem gutpela piksa yumi ken bihainim. Skelim tupela samting i bin kamap long nait paslain long em i dai. Taim ol i kamap pinis long Getsemani, Jisas i “kisim Pita na Jems na Jon, na ol i go wantaim em” na em i tokim ol long “was gut.” Orait “em i go liklik, na em i pundaun long graun, na em i prea.” Taim em i kam bek, “em i lukim ol i slip i stap.” Jisas i mekim wanem? Em i tok: “Bel em i gat laik bilong mekim samting, tasol bodi em i no gat strong.” (Mak 14:32-38) Em i no krosim Pita, Jems, na Jon, nogat, em i mekim gutpela tok i kamapim olsem em i pilim hevi bilong ol! Long dispela nait yet, inap 3-pela taim Pita i tokaut olsem em i no save long Jisas. (Mak 14:66-72) Orait bihain long dispela, Jisas i mekim wanem pasin long Pita? “Bikpela i kirap bek! Saimon [Pita] i lukim em pinis!” (Luk 24:34) Baibel i tok “em i kamap long Pita, na bihain gen long ol 12-pela aposel.” (1 Korin 15:5) Jisas i no kros long Pita, nogat. Pita i tanim bel na Jisas i lusim rong bilong em na strongim em. Bihain Jisas i givim ol bikpela wok long Pita.—Aposel 2:14; 8:14-17; 10:44, 45.
16. Olsem wanem yumi inap bihainim pasin bilong Jisas taim ol wanbilip i mekim yumi bel hevi o ol i rongim yumi?
16 Yumi ol man i gat sin, olsem na sapos sampela taim ol wanbilip i mekim yumi bel hevi o ol i rongim yumi, i gutpela yumi bihainim pasin bilong Jisas long pilim hevi bilong ol narapela na lusim rong bilong ol. Pita i tokim ol wanbilip olsem: “Yupela olgeta i mas i stap wanbel na sori long olgeta man. Yupela i mas laikim tru ol arapela manmeri bilong God na marimari long ol, na lusim pasin bilong bikhet. Sapos ol man i mekim nogut long yupela, orait yupela i no ken bekim. Sapos ol i tok nogut long yupela, orait yupela i no ken bekim tok nogut bilong ol. Nogat. Yupela i mas bekim long dispela pasin. Yupela i mas beten long God i ken mekim gut long ol.” (1 Pita 3:8, 9) Olsem wanem sapos narapela i no mekim pasin olsem Jisas inap mekim, olsem em i no laik pilim hevi bilong yumi o lusim rong bilong yumi? Maski em i mekim olsem, yumi gat wok long bihainim pasin bilong Jisas na mekim pasin em Jisas yet inap mekim.—1 Jon 3:16.
Putim Kingdom i Stap Namba Wan
17. Wanem samting i soim olsem pasin bilong mekim laik bilong God i stap namba wan samting long laip bilong Jisas?
17 Yumi mas bihainim pasin bilong Jisas Krais long narapela samting tu. Wok bilong autim gutnius bilong Kingdom Bilong God i stap nambawan bikpela samting long laip bilong Jisas. Taim Jisas i autim tok pinis long meri Samaria klostu long taun Sikar long Samaria, em i tokim ol disaipel: “God i bin salim mi na mi kam, na kaikai bilong mi, em long bihainim laik bilong em na long pinisim wok em i bin givim mi.” (Jon 4:34) Taim Jisas i mekim laik bilong Papa bilong em, dispela i lukautim em; dispela wok i olsem kaikai i mekim gut skin, mekim em i belgut, na i givim nupela strong long em. Taim yumi bihainim pasin bilong Jisas na tingting tasol long mekim laik bilong God, dispela bai mekim i stap bilong yumi i gat as tru bilong en na yumi bai belgut long i stap bilong yumi.
18. Wanem ol gutpela samting i save kamap taim papamama i kirapim ol pikinini long insait long fultaim sevis?
18 Taim ol papamama i kirapim ol pikinini long insait long fultaim sevis, ol yet na ol pikinini tu ol i save kisim planti blesing. Wanpela papa husat i gat tupela pikinini man em ol i twins, em i tok olsem kirap long taim tupela i liklik yet, em i putim wok painia i stap olsem mak tupela i mas winim. Taim dispela tupela pikinini i pinisim skul, ol i kirap mekim wok painia. Dispela papa i bin kisim bikpela amamas na em i tok: “Ol pikinini bilong mipela i no bin mekim mipela i bel hevi. Mipela i amamas tru long mipela inap tok, ‘God i mekim gut long yumi na givim yumi ol pikinini olsem presen.’ ” (Song 127:3) Taim ol pikinini i insait long fultaim sevis, dispela i helpim ol olsem wanem? Wanpela mama i gat 5-pela pikinini, em i tok: “Wok painia i bin helpim olgeta pikinini bilong mi long kamapim pasin bilong pas gut moa wantaim Jehova, i helpim pasin bilong ol long mekim stadi bilong ol yet i kamap gutpela moa, i helpim ol long lain long skelim gut taim bilong ol, na i helpim ol long putim ol samting bilong spirit i stap namba wan long laip bilong ol. Olgeta i bin mekim planti senis, tasol i no gat wanpela bilong ol i bel hevi long dispela rot ol i bin makim bilong bihainim.”
19. Ol yangpela i mas tingting long mekim wanem ol wok long bihain?
19 Ol yangpela, yupela i tingting long mekim wanem ol wok long bihain? Yupela i laik mekim sampela wok mani i gat biknem? O yupela i wok long winim ol mak bilong insait long fultaim sevis? Aposel Pol i tok: “Yupela i mas lukaut gut long wokabaut bilong yupela. Yupela i no ken wokabaut olsem man i no gat save. Nogat. Yupela i mas wokabaut olsem man i gat save. Nau yupela i gat taim bilong mekim pasin bilong God. Tasol dispela taim nau yumi stap long en, em i taim nogut, olsem na yupela i mas lukaut, nogut dispela taim i lus nating.” Em i tok moa olsem: “Yupela i no ken mekim ol kranki pasin. Nogat. Yupela i mas save gut long laik bilong Bikpela.”—Efesus 5:15-17.
Stap Gut Long God na Long Ol Man
20, 21. Olsem wanem Jisas i bin stap gut long God na long ol man? Olsem wanem yumi inap bihainim dispela pasin bilong em?
20 Bilong wokabaut olsem Jisas i bin wokabaut, yumi mas bihainim pasin bilong em long i stap gut long God. Baibel i tok long dispela pasin bilong Jisas olsem: “Em i stap kain olsem God, tasol em i no tingting long kamap bikpela olsem God yet,” nogat. “Em i kamap olsem man na ol man i lukim em i stap man tru. Na em i daunim em yet na i bihainim tok bilong God, i go inap long em i dai, yes, inap long em i dai long diwai.” Jisas i stap gut long wok bos bilong Jehova long rot bilong mekim ol samting Jehova i laik em i mas mekim. Em i bihainim tok i go inap long taim em i dai. Yumi mas “holim wankain tingting” na stap gut long mekim laik bilong God.—Filipai 2:5-8; NW.
21 Jisas i bin i stap gut tu long ol gutpela aposel bilong em. Maski ol i mekim ol pasin kranki, Jisas i laikim tru ol “i go inap long taim em i dai.” (Jon 13:1) Olsem tasol, yumi no ken larim pasin kranki bilong ol brata bilong yumi i kirapim yumi long sutim tok long ol.
Bihainim Pasin Jisas i Makim
22, 23. Wanem ol gutpela samting inap kamap taim yumi bihainim pasin bilong Jisas?
22 I hatwok long yumi ol sinman i bihainim stret olgeta pasin bilong Jisas, long wanem, em i Man i gutpela olgeta. Tasol yumi inap wok strong long bihainim gut pasin bilong em. Bilong mekim olsem, yumi mas kliagut na daun long ol rot em Krais i yusim bilong stiaim yumi, na bihainim pasin em i bin makim bilong yumi ken bihainim.
23 Taim yumi bihainim pasin bilong Krais, yumi bai kisim planti blesing. I stap bilong yumi bai i gat as tru bilong en na bai yumi belgut, long wanem, yumi tingting long mekim laik bilong God na i no long mekim laik bilong yumi yet. (Jon 5:30; 6:38) Maus bilong bel i no kotim yumi. Yumi bai makim gutpela pasin em ol narapela i ken bihainim. Jisas i bin tokim olgeta man em ol i gat hevi long ol i mas i go long em, na kisim malolo, olsem nupela strong. (Matyu 11:28-30) Taim yumi bihainim pasin bilong Jisas, yumi tu inap givim nupela strong long ol narapela taim yumi bung wantaim ol. Olsem na i gutpela yumi wok yet long wokabaut olsem Jisas i bin wokabaut.
Yu Inap Tingim?
• Krais i yusim wanem ol rot bilong stiaim lain bilong em long nau?
• Olsem wanem ol elda inap bihainim wok bos bilong Krais taim ol i mekim wok long namba God i bin givim long ol?
• Olsem wanem yumi inap bihainim pasin bilong Jisas taim ol narapela i rongim yumi?
• Olsem wanem ol yangpela inap putim ol samting bilong Kingdom i stap namba wan?
[Piksa long pes 23]
Ol elda Kristen i helpim yumi long daun long wok bos bilong Krais
[Ol Piksa long pes 24, 25]
Ol yangpela, yupela i tingting long mekim wanem ol wok Kristen?