Skulim Ol Pikinini Bilong Yupela Long Laikim Tru Jehova

“Ol pikinini man bilong yangpela man i olsem ol spia i stap long han bilong wanpela soldia.”​​—SONG 127:4.

1, 2. Olsem wanem ol pikinini i olsem “ol spia i stap long han bilong wanpela soldia”?

WANPELA man i redi long sutim spia. Em i taitim banara. Em i lukluk stret long mak em i laik sutim spia long en. Nau em i sutim i go! Olsem wanem? Spia bai go stret long mak? I gat kain kain samting inap mekim na spia bai go kamap stret long mak o nogat. Sampela samting em olsem: save bilong man bilong sutim spia, win i ron olsem wanem, na spia i gutpela o nogat.

² King Solomon i tok ol pikinini i olsem “ol spia i stap long han bilong wanpela soldia.” (Song 127:​4) Tingim olsem wanem dispela tok piksa i stret. Man bilong sut long banara em i holim spia long banara inap sotpela taim tasol. Bilong spia i ken painim mak, em i mas sutim spia hariap. Na olsem tasol, ol papamama i gat sotpela taim tasol bilong helpim ol pikinini bilong ol long kisim pasin bilong laikim tru Jehova. Insait long sotpela taim tasol, ol pikinini bai kamap bikpela na lusim papamama. (Matyu 19:5) Olsem wanem? Ol pikinini bai kamap stret long mak​​—olsem, wok yet long laikim tru God na mekim wok bilong em taim ol i lusim pinis papamama? I gat kain kain samting inap mekim na ol pikinini bai wok yet long laikim God o nogat. Tripela samting i olsem: save bilong papamama long skulim pikinini, sindaun bilong famili, na samting em “spia,” olsem pikinini yet, i mekim long ol skul em i kisim. Orait nau yumi ken skelim dispela 3-pela samting. Pastaim yumi bai skelim sampela pasin bilong gutpela papamama.

Ol Gutpela Papamama i Stap Gutpela Piksa

 3. Bilong wanem papamama yet i mas bihainim ol tok ol i mekim?

³ Jisas i stap gutpela piksa ol papamama i ken bihainim. Em yet i save bihainim ol tok em i skulim ol man long en. (Jon 13:15) Tasol ol Farisi i no olsem; ol i save “mekim planti tok” tasol ol yet “i no save bihainim,” na Jisas i krosim ol long dispela. (Matyu 23:3) Bilong kirapim ol pikinini long laikim tru Jehova, pasin bilong ol papamama i mas stret wantaim tok ol i mekim. Sapos papamama i mekim wanpela tok, tasol ol yet i no bihainim, orait dispela tok i no inap mekim wanpela wok, wankain olsem banara i no gat rop i no inap mekim wanpela wok.​​—1 Jon 3:​18.

 4. I gutpela sapos ol papamama i givim wanem ol askim long ol yet? Bilong wanem?

⁴ Bilong wanem em i bikpela samting long papamama i stap gutpela piksa? Ol man i bikpela pinis ol inap lain long laikim tru God long rot bilong lukim pasin bilong Jisas, na olsem tasol, ol pikinini inap lain long laikim tru Jehova long rot bilong bihainim gutpela pasin bilong papamama bilong ol. Ol poroman bilong pikinini inap strongim pikinini, o ol inap “bagarapim gutpela pasin” bilong em. (1 Korin 15:33) Taim pikinini i liklik, nambawan poroman long stiaim tingting na pasin bilong pikinini, em papamama bilong em. Olsem na ol papamama i mas askim ol yet: ‘Mi wanem kain poroman? Pasin bilong mi i save kirapim pikinini long kisim ol gutpela pasin? Mi stap wanem kain piksa long ol bikpela samting olsem beten na Baibel stadi?’

Ol Gutpela Papamama i Save Beten Wantaim Pikinini

 5. Ol beten bilong papamama inap lainim pikinini long wanem samting?

⁵ Ol pikinini inap kisim planti save long Jehova taim ol i harim ol beten bilong yu. Sapos ol i harim olsem yu beten na tok tenkyu long God long taim bilong kaikai na beten long taim bilong mekim Baibel stadi, dispela bai givim wanem tingting long ol? Ol bai kisim save olsem Jehova i save givim yumi ol samting bilong skin​​—em ol samting i stret yumi mas tok tenkyu long em​​—na em i save lainim yumi long ol tok i tru bilong Baibel. Em sampela gutpela samting tru ol pikinini inap kisim save long en.​​—Jems 1:​17.

 6. Ol papamama i ken mekim wanem bilong helpim ol pikinini long pilim olsem Jehova i save tingim ol wan wan?

⁶ Tasol sapos yu beten wantaim famili bilong yu long ol narapela taim tu, na i no long taim bilong kaikai na Baibel stadi tasol, na yu kolim stret ol samting em yu na ol pikinini i mas tingim, yu bai mekim bikpela wok moa yet. Yu bai helpim ol pikinini long pilim olsem Jehova i wanpela bilong famili bilong yupela, na em i save tingim yupela olgeta wan wan. (Efesus 6:​18; 1 Pita 5:​6, 7) Wanpela papa i tok: “Kirap long taim pikinini meri bilong mipela i bon, mipela i save beten wantaim em. Taim em i wok long kamap bikpela, mipela i save beten long pasin bilong makim ol gutpela poroman na ol narapela bikpela samting em i mas tingim. Olgeta de mipela i save beten wantaim em i go inap long taim em i marit.” Olsem wanem? Yu ting yu tu inap beten wantaim ol pikinini bilong yu long olgeta de? Yu inap helpim ol long tingim Jehova olsem wanpela Pren, em i save lukautim ol long ol samting bilong skin na spirit na i no dispela tasol, nogat, em i save tingim tu ol tingting na laik bilong ol?​​—Filipai 4:​6, 7.

 7. Bilong papamama i ken kolim stret ol samting long beten bilong ol, ol i mas save long wanem samting?

⁷ Tasol bilong yu ken kolim stret ol samting taim yu beten, yu mas save long ol samting i bin painim pikinini. Tingim tok em papa bilong tupela pikinini i mekim: “Long pinis bilong olgeta wik, mi save givim tupela askim long mi yet: ‘Long dispela wik ol pikinini i bin tingting planti long wanem ol samting? Wanem ol gutpela samting i bin painim ol?’ ” Olsem wanem? Yupela ol papamama inap givim ol kain askim olsem long yupela yet na stori long bekim bilong ol dispela askim taim yu mekim beten wantaim ol pikinini? Sapos yu mekim olsem, orait yu bai lainim ol long beten long Jehova​​—em Man Bilong Harim beten​​—na laikim em tu.​​—Song 65:2.

Ol Gutpela Papamama i Save Kirapim Pikinini Long Kisim Pasin Bilong Stadi Gut

 8. Bilong wanem ol papamama i mas helpim ol pikinini long kisim pasin bilong stadi long Tok Bilong God?

⁸ Olsem wanem tingting bilong papamama long pasin bilong stadi long Baibel inap helpim pikinini long pas gut wantaim God? Bilong narapela i ken pas gut wantaim narapela, tupela i mas toktok wantaim, na tu, narapela i mas harim tok bilong narapela. Wanpela samting yumi save mekim bilong harim tok bilong Jehova em olsem: Yumi save stadi long Baibel long rot bilong ol buk em “wokboi i gat gutpela tingting” i kamapim. (Matyu 24:​45-​47; Sindaun 4:​1, 2) Olsem na bilong helpim ol pikinini long laikim tru Jehova na pas gut wantaim em i go inap oltaim oltaim, ol papamama i mas strongim ol long kisim pasin bilong stadi long Tok Bilong God.

 9. Olsem wanem papamama inap helpim ol pikinini long kisim pasin bilong stadi gut?

⁹ Olsem wanem papamama i ken helpim ol pikinini long kisim pasin bilong stadi gut? Nambawan gutpela rot em papamama yet i mas i stap gutpela piksa long dispela samting. Olsem wanem? Planti taim ol pikinini i lukim olsem yu amamas long ritim Baibel na stadi long en? Tru, ating yu bisi long lukautim ol pikinini bilong yu, na ating yu tingting planti olsem yu inap kisim we taim bilong rit na stadi. Tasol askim yu yet: ‘Planti taim ol pikinini i lukim mi i lukluk long TV?’ Sapos olsem, yu ting yu inap yusim sampela hap bilong dispela taim long mekim stadi bilong yu yet na long dispela rot yu stap gutpela piksa ol pikinini i ken bihainim?

10, 11. Bilong wanem papamama i mas mekim famili Baibel stadi wantaim ol pikinini long olgeta taim?

¹⁰ Narapela samting papamama i ken mekim bilong helpim ol pikinini long harim tok bilong Jehova, em long rot bilong famili i toktok wantaim long Baibel. (Aisaia 30:21) Tasol ating sampela i laik save, ‘Sapos papamama i kisim ol pikinini i go long ol miting bilong kongrigesen long olgeta taim, bilong wanem ol i mas mekim famili stadi wantaim ol?’ Sampela as em olsem: Jehova i givim wok long papamama long ol i mas i go pas long skulim ol pikinini bilong ol. (Sindaun 1:8; Efesus 6:4) Famili Baibel stadi i lainim ol pikinini olsem lotu i no samting bilong mekim long taim bilong ol miting tasol, nogat, em samting bilong mekim insait long famili tu.​​—Lo 6:​6-9.

¹¹ Na tu, famili stadi inap helpim papamama long save long tingting bilong pikinini long ol samting bilong lotu na stretpela pasin. Olsem: Taim pikinini i yangpela, papamama i ken mekim wok long ol buk olsem Kisim Skul Long Bikpela Tisa.a Long klostu olgeta paragraf bilong dispela buk bilong Baibel, i gat ol askim bilong kirapim pikinini long kamapim tingting bilong em. Taim papamama i toktok wantaim pikinini long ol skripsa em buk i kamapim, ating papamama inap helpim pikinini long kisim pasin bilong “skelim wanem ol pasin i gutpela na wanem ol pasin i nogut.”​​—Hibru 5:​14.

12. Olsem wanem papamama inap senisim ol samting bilong famili stadi bilong helpim pikinini? Yu yet i bin mekim wanem na dispela samting i bin wok gut?

¹² Taim ol pikinini bilong yu i wok long kamap bikpela, senisim ol samting yu stadi long en na bai i stret long ol. Tingim samting tupela marit i bin mekim bilong helpim tupela yangpela pikinini bilong ol long skelim askim bilong ol long i go long wanpela danis long skul. Papa i tok: “Mipela i tokim tupela pikinini meri olsem long taim bilong narapela famili stadi, mipela bai mekim liklik drama we mitupela Mama bai kamap olsem ol pikinini, na tupela pikinini bai kamap olsem papamama. Tupela pikinini yet inap makim husat bai kamap olsem Papa na husat bai kamap olsem Mama, tasol tupela i mas wok wantaim long mekim sampela wok painimaut na redi long stiaim tingting bilong mipela olsem i gutpela long go long ol danis long skul o nogat.” Wanem samting i kamap? Papa i tok: “Mitupela i kirap nogut tru olsem tupela pikinini (ol i stap olsem papamama) inap kamapim long mipela (mipela i stap olsem ol pikinini) ol tok em Baibel i as bilong en na soim olsem i no gutpela long i go long dispela danis.” Em i tok moa: “Na mipela i kirap nogut long ol i kamapim sampela gutpela samting mipela inap mekim olsem senis bilong i go long dispela danis. Dispela i helpim mipela long kisim sampela save moa long ol tingting na laik bilong ol.” Tru, bilong mekim famili stadi i stret long ol pikinini na mekim long olgeta taim, papamama i mas wokim gut tingting na no ken les, tasol taim ol i mekim olsem, dispela i kamapim gutpela samting.​​—Sindaun 23:15.

Kamapim Sindaun i Gat Bel Isi Long En

13, 14. (a) Ol papamama i ken mekim wanem bilong kamapim sindaun i gat bel isi long en? (b) Wanem gutpela samting inap kamap taim papa o mama i tokaut olsem ol i bin mekim popaia?

¹³ Ating spia bai i go stret long mak sapos man bilong sutim spia i lukluk long mak na sutim spia taim i no gat win o ren samting bilong sakim spia. Na olsem tasol, sapos papamama i kamapim sindaun i gat bel isi long en, ating ol pikinini bai lain long laikim Jehova. Jems i tok: “Sapos yumi stap wanbel, dispela em i olsem yumi planim ol pikinini kaikai. Na long dispela pasin bilong wanbel, ol stretpela pasin i kamap long laip bilong yumi olsem gutpela kaikai i kamap long gaden.” (Jems 3:​18) Olsem wanem ol papamama inap kamapim sindaun i gat bel isi na pasin wanbel long en? Tupela marit i mas pas gut wantaim. Sapos man na meri i laikim na rispektim narapela narapela, ol pikinini tu bai laikim na rispektim ol narapela, na Jehova tu. (Galesia 6:7; Efesus 5:​33) Pasin laikim na pasin rispek i save kamapim bel isi. Na sapos tupela marit i stap bel isi na stap wanbel wantaim, ating bai ol inap long stretim ol hevi i kamap insait long famili.

¹⁴ I no gat wanpela marit i gutpela olgeta, na olsem tasol, long nau i no gat wanpela famili long graun em i gutpela olgeta. Taim papamama i mekim sampela samting long ol pikinini, ating sampela taim ol i no kamapim ol pasin em holi spirit i as bilong en. (Galesia 5:​22, 23) Taim dispela samting i kamap, papamama i mas mekim wanem? Sapos ol i tokaut long popaia bilong ol, yu ting dispela bai mekim na ol pikinini i no rispek moa long ol? Tingim aposel Pol. Em i olsem wanpela papa bilong planti manmeri. (1 Korin 4:​15) Tasol Pol i bin tokaut olsem em i save mekim popaia. (Rom 7:​21-​25) Taim yumi save long dispela pasin daun na pasin bilong em long tokaut stret, dispela i kirapim yumi long laikim em moa yet; dispela i no daunim pasin bilong yumi long rispek long em, nogat. Tru, Pol i save em i gat sampela pasin kranki, tasol em inap tokim kongrigesen long Korin: “Yupela i mas bihainim pasin bilong mi na wokabaut, olsem mi tu mi save bihainim pasin bilong Krais na wokabaut.” (1 Korin 11:1) Sapos yu tu i tokaut long ol pasin kranki bilong yu, ating ol pikinini bilong yu i no ken tingim moa.

15, 16. Bilong wanem ol papamama i mas skulim ol pikinini long laikim ol bratasista Kristen bilong ol? Ol inap mekim olsem wanem?

¹⁵ Ol papamama i ken mekim wanem samting moa bilong kamapim sindaun i gat bel isi long en we ol pikinini i ken lain long laikim Jehova? Aposel Jon i tok: “Sapos wanpela man i tok, ‘Mi laikim tru God,’ tasol em i no laikim wanpela bilong ol arapela manmeri bilong God, orait dispela man em i man bilong giaman. I no gat wanpela man i bin lukim God. Olsem na man i no save laikim ol arapela, em ol manmeri em i lukim pinis, em i no inap laikim God em i no bin lukim.” (1 Jon 4:​20, 21) Olsem na taim yu skulim ol pikinini long laikim ol bratasista Kristen bilong ol, yu wok long skulim ol long laikim God. I gutpela sapos ol papamama i askim ol yet: ‘Ol tok mi save mekim bilong stori long kongrigesen, em i gutpela tok o i sutim tok long en?’ Olsem wanem yu inap save? Putim gut yau long ol tok ol pikinini i mekim bilong stori long ol miting na ol bratasista long kongrigesen. Ating ol tok ol i mekim bai kamapim ol tingting bilong yu yet.

¹⁶ Ol papamama i ken mekim wanem bilong helpim ol pikinini long laikim ol brata Kristen bilong ol? Pita, papa bilong tupela yangpela, em i tok: “Kirap long taim tupela pikinini man bilong mipela ol i liklik, mipela i save singautim ol strongpela brata na sista long kam long haus na kaikai wantaim mipela, na mipela i bin kisim bikpela amamas long dispela. Taim tupela pikinini i wok long kamap bikpela, ol i save bung wantaim ol man i laikim Jehova, na nau ol i lukim olsem pasin bilong mekim wok bilong God em samting ol inap kisim amamas long en.” Dennis, papa bilong 5-pela pikinini meri, em i tok: “Mipela i bin strongim ol pikinini long poromanim ol painia long kongrigesen em ol i gat bikpela krismas liklik, na long olgeta taim mipela inap, mipela i bin singautim ol wasman raun na meri bilong ol long kam kaikai wantaim mipela.” Olsem wanem? Yu tu inap go pas long helpim ol pikinini bilong yu long tingim kongrigesen olsem hap famili bilong yupela?​​—Mak 10:​29, 30.

Wok Bilong Pikinini

17. Bihain ol pikinini yet i mas makim wanem samting?

¹⁷ Orait nau tingim gen tok piksa bilong man bilong sutim spia. Maski man i gat save long sutim spia, spia i no inap kamap long mak sapos em i bin kamap krungut. Tru, papamama bai wok strong long stretim spia i krungut, olsem stretim tingting kranki bilong pikinini. Tasol bihain ol pikinini yet i mas skelim olsem ol bai larim ol man bilong dispela graun i stiaim ol, o ol bai larim Jehova i soim ol long “stretpela rot” bilong bihainim.​​—Sindaun 3:​5, 6; Rom 12:2.

18. Rot em pikinini i makim long bihainim inap mekim wanem long ol arapela?

¹⁸ Ol papamama i gat bikpela wok long “stretim gut ol pikinini bilong [ol] na skulim ol long tok bilong Bikpela,” tasol pikinini bai kamap wanem kain man o meri long bihain, dispela em samting bilong pikinini yet long makim. (Efesus 6:4) Olsem na yupela ol pikinini, askim yupela yet olsem, ‘Bai mi bihainim gutpela skul em papamama i givim long mi?’ Sapos yu mekim olsem, bai yu bihainim nambawan gutpela rot bilong helpim yu tru. Yu bai mekim papamama bilong yu i belgut tru. Na bikpela samting moa yet, yu bai mekim Jehova i belgut tru.​​—Sindaun 27:11.

[Futnot]

Yu Inap Tingim?

• Olsem wanem papamama i ken stap gutpela piksa long pasin bilong beten na stadi long Baibel?

• Olsem wanem papamama inap kamapim sindaun i gat bel isi long en?

• Ol pikinini i mas skelim wanem samting? Samting ol i makim bai mekim wanem long ol arapela?

[Piksa long pes 28]

Yu stap gutpela piksa em pikinini bilong yu i ken bihainim long pasin bilong mekim stadi?

[Piksa long pes 29]

Sindaun i gat bel isi long en inap helpim famili long stap amamas