Laikim Bilong God i Save Stap Oltaim

1, 2. Wai na yu laikim Jehova God?

YU SAVE laikim God? Ating yu laikim em tru na yu dediketim yu yet long em. Na yu pilim olsem em i bes Pren bilong yu. Tasol paslain long yu laikim Jehova, em i bin laikim yu. Baibel i tok: “Yumi mekim pasin laikim, long wanem, em i bin laikim yumi pastaim.”—1 Jon 4:19.

² Tingim olgeta rot we Jehova i soim pasin laikim bilong em long yumi. Em i givim yumi naispela graun bilong stap long en na olgeta samting yumi nidim bilong stap amamas. (Matyu 5:43-48; Revelesen 4:11) Em i laik bai yumi pas gut wantaim em, na em i opim rot long yumi kisim save long em. Taim yumi ritim Baibel, i olsem yumi putim yau long Jehova. Na taim yumi beten, em i putim yau long yumi. (Buk Song 65:2) Em i stiaim na strongim yumi long rot bilong holi spirit bilong em i gat bikpela strong. (Luk 11:13) Em i salim tu Pikinini bilong em i dia tumas i kam long graun bilong mekim yumi kamap fri long sin na dai.—Ritim Jon 3:16; Rom 5:8.

 3. Hau bai yumi strongim yet pasin pren bilong yumi wantaim Jehova?

³ Inap liklik taim tingim wanpela bes pren bilong yu, em pren i bin stap wantaim yu long taim bilong amamas na taim bilong sore. Yu mas taitim bun bilong strongim dispela pasin pren. Em wankain long pasin pren bilong yumi wantaim Jehova, em bes Pren tru yumi inap i gat. Pasin pren bilong yumi wantaim em inap stap oltaim oltaim. Olsem na Baibel i tokim yumi: “Stap insait yet long pasin laikim bilong God.” (Jut 21) Hau bai yumi ken mekim olsem? Baibel i tok: “Pasin bilong laikim God i olsem, yumi bihainim ol lo bilong em; na ol lo bilong em i no givim hevi long yumi.”—1 Jon 5:3.

4, 5. (a) Wanem mining bilong dispela tok “pasin laikim bilong God”? (b) Olsem wanem pasin bilong yu long laikim Jehova i wok long go bikpela?

⁴ Wanem mining bilong dispela tok “pasin bilong laikim God” long Baibel? Dispela i no makim pasin bilong God long laikim yumi, nogat, em i makim pasin bilong yumi long laikim em. Yu inap tingim fes taim yu kirap long laikim Jehova?

⁵ Tingim bek hau yu pilim long fes taim yu kisim save olsem Jehova i laik bai yu stap oltaim oltaim long nupela taim. Yu bin kisim save long olgeta samting em i mekim bilong kamapim dispela, na yu luksave olsem Jehova i givim yumi presen i dia tumas taim em i bin salim Pikinini bilong em yet i kam long graun. (Matyu 20:28; Jon 8:29; Rom 5:12, 18) Taim yu kisim save olsem Jehova i laikim tru yu, dispela i kirapim bel bilong yu, na yu kirap long laikim em tu.—Ritim 1 Jon 4:9, 10.

 6. Wanem samting i insait long pasin bilong laikim wanpela? Pasin laikim bilong yu long God i kirapim yu long mekim wanem?

⁶ Tasol dispela filings bilong laikim God em kirap tasol bilong dispela pasin. Olsem, taim yumi laikim wanpela, yumi no tok tasol olsem “Mi laikim yu,” nogat. Pasin laikim i kirapim yumi na yumi laik mekim ol samting i amamasim em. Olsem tasol, pasin bilong yu long laikim Jehova i mekim na yu laik bihainim ol pasin i amamasim em. Taim pasin laikim bilong yu i go bikpela, yu dediket long em na kisim baptais. Taim yu mekim olsem, yu tok promis long mekim wok bilong Jehova inap oltaim oltaim. (Ritim Rom 14:7, 8.) Hau bai yu inapim dispela tok promis?

 7. Sapos yumi laikim Jehova, bai yumi mekim wanem? Wanem sampela lo bilong em?

⁷ Yumi laikim Jehova, olsem na “yumi bihainim ol lo bilong em.” Long Baibel, yumi kisim save long ol pasin Jehova i laik yumi mas bihainim. Olsem, em i tokim yumi olsem i no stret long dring spak, stil o giaman, slip wantaim wanpela yumi no marit long en, o lotuim wanpela man o wanpela samting, yumi mas lotuim em wanpela tasol.—1 Korin 5:11; 6:18; 10:14; Efesus 4:28; Kolosi 3:9.

8, 9. Hau bai yumi save long samting Jehova i laik yumi mekim taim i no gat lo stret i stap long Baibel? Givim eksampel.

⁸ Tasol bilong amamasim Jehova, yumi no bihainim tasol ol lo bilong em, nogat. Em i no givim yumi longpela lista i gat ol lo i karamapim olgeta samting long laip. So sampela taim bai i no gat wanpela lo stret long Baibel i tokim yumi long samting yumi mas mekim. Hau bai yumi mekim ol gutpela disisen? (Efesus 5:17) Long Baibel, yumi inap painim ol stiatok, em ol bikpela tok i tru i skulim yumi long tingting bilong Jehova long ol samting. Na taim yumi ritim Baibel, yumi kisim save long Jehova i wanem kain Man tru. Yumi kisim save long tingting bilong em, ol samting em i laikim na ol samting em i heitim.—Ritim Buk Song 97:10; Provep 6:16-19; lukim Futnot 1.

⁹ Olsem, hau bai yumi makim wanem muvi yumi ken watsim long TV o wanem samting long lukim long Intenet? Jehova i no tokim yumi long samting stret yumi mas mekim. Tasol ol stiatok em i givim inap helpim yumi long mekim ol gutpela disisen. Planti muvi na musik long nau i pulap long pasin bilong pait na bagarapim man na pasin pamuk. Long Baibel, Jehova i tokim yumi olsem “em i save heitim tru ol man i laikim pasin bilong pait na bagarapim man” na em bai “kotim ol manmeri i mekim pasin pamuk.” (Buk Song 11:5; Hibru 13:4) Olsem wanem ol dispela stiatok inap helpim yumi long mekim ol gutpela disisen? Taim yumi save olsem Jehova i heitim wanpela samting o i tingim dispela samting olsem samting i no stret, orait yumi mas sakim.

10, 11. Bilong wanem yumi bihainim tok bilong Jehova?

¹⁰ Bilong wanem yumi bihainim tok bilong Jehova? I no olsem yumi laik abrusim panismen o ol hevi i save kamap taim yumi mekim ol rong disisen. (Galesia 6:7) Nogat, yumi bihainim tok bilong Jehova bikos yumi laikim em. Olsem ol pikinini i laik amamasim papa bilong ol, yumi tu i laik amamasim Papa bilong yumi long heven. Taim yumi save Jehova i amamas long yumi, dispela i winim olgeta narapela samting!—Buk Song 5:12; Provep 12:2; lukim Futnot 2.

¹¹ Yumi no bihainim tasol tok bilong Jehova taim em i isi long mekim o taim i no gat narapela rot. Na yumi no makim wanem ol lo na tok bilong em yumi inap bihainim na wanem ol lo na tok yumi no inap bihainim. (Lo 12:32) Yumi bihainim olgeta lo bilong em, olsem man bilong raitim song i tok: “Mi laikim tumas ol lo bilong yu, yes, mi laikim ol tru.” (Buk Song 119:47; Rom 6:17) Yumi laik bihainim pasin bilong Noa, em i soim olsem em i laikim tru Jehova long rot bilong mekim olgeta samting Jehova i tokim em long mekim. Baibel i tok, Noa “i bihainim olgeta tok bilong God.” (Stat 6:22) Yu laik bai Jehova i mekim wankain tok long yu?

12. Olsem wanem yumi ken mekim Jehova i amamas?

¹² Jehova i pilim olsem wanem taim yumi bihainim tok bilong em? Yumi mekim ‘bel bilong em i amamas.’ (Provep 11:20; 27:11) Tingim! Yumi mekim Krieta bilong yunives i amamas taim yumi bihainim tok bilong em. Tasol em i no fosim yumi long mekim olsem. Em i givim yumi fridom. Dispela i min olsem yumi stap fri long makim yumi bai mekim samting i stret o samting i no stret. Jehova i laik bai pasin bilong yumi long laikim em i kirapim yumi long mekim ol gutpela disisen bambai yumi gat gutpela laip.—Lo 30:15, 16, 19, 20; lukim Futnot 3.

13, 14. Hau na yumi save ol lo bilong God i no hatwok long bihainim? Stori long dispela.

¹³ Olsem wanem sapos yumi ting ol lo bilong Jehova i hatwok long bihainim o i tekewe fridom bilong yumi? Baibel i tok: “Ol lo bilong em i no givim hevi long yumi.” (1 Jon 5:3) Baibel New English Translation i tanim dispela ves olsem: “Ol lo bilong em i no save daunim yumi.” Ol lo bilong Jehova i no “hevi,” dispela i min olsem i no hatwok long bihainim. Oltaim em i bihainim gutpela tingting taim em i tokim yumi long ol samting yumi mas mekim.

¹⁴ Yumi ken tok piksa olsem, yu helpim wanpela pren long muv i go long nupela haus. Em i pekim olgeta samting long ol boks. Sampela i no hevi na isi long karim, na sampela i hevi tru na tupela man i mas apim. Yu ting em bai tokim yu long apim boks i hevi nogut tru? Ating nogat! Wai? Bikos em i no laik bai yu kisim bagarap. Olsem dispela pren, Jehova i no inap tokim yumi long mekim samting i hatwok tru. (Lo 30:11-14) Jehova i save gut long yumi. Em “i save gut tru long olsem wanem em i bin wokim yumi, na em i tingim yumi i olsem das tasol.”—Buk Song 103:14.

15. Hau na yumi save olsem ol lo bilong Jehova i gutpela bilong helpim yumi?

¹⁵ Moses i tokim lain Israel olsem ol lo bilong Jehova i bilong ‘lukautim ol inap oltaim’ na pasin bilong bihainim tok bai helpim ol na ol “i ken stap laip.” (Lo 5:28-33; 6:24) Na i wankain long nau tu. Ol samting Jehova i askim yumi long mekim bai helpim yumi na yumi gat gutpela laip. (Ritim Aisaia 48:17.) Papa bilong yumi, Jehova, i save long ol samting i gutpela long yumi. (Rom 11:33) Baibel i tokim yumi: “God em i pasin laikim.” (1 Jon 4:8) Dispela i min olsem pasin laikim i as bilong olgeta tok na samting Jehova i mekim.

16. Hau na yumi save yumi inap bihainim tok maski yumi gat sin na yumi stap long graun nogut?

¹⁶ Em i no isi long yumi bihainim tok bilong God. Yumi stap long graun nogut em Devil i bosim. Em i strong long stiaim ol man long mekim ol pasin nogut. (1 Jon 5:19) Na yumi gat pait tu long daunim ol tingting kranki na filings bilong yumi, bikos ol inap stiaim yumi long sakim tok bilong God. (Rom 7:21-25) Tasol pasin bilong laikim Jehova i strongim yumi long mekim samting i stret. Em i lukim hatwok yumi mekim long bihainim tok bilong em, na em i helpim yumi na givim holi spirit bilong em i gat bikpela strong. (1 Samuel 15:22, 23; Aposel 5:32) Holi spirit i helpim yumi long kisim ol pasin we i mekim na i isi long yumi bihainim tok bilong God.—Galesia 5:22, 23.

17, 18. (a) Bai yumi kisim wanem save long dispela buk? (b) Bai yumi stori long wanem samting long neks sapta?

¹⁷ Long dispela buk, bai yumi kisim save long ol pasin yumi inap bihainim na mekim Jehova i amamas. Bai yumi kisim save long hau yumi ken bihainim ol stiatok na ol stretpela lo bilong em long laip bilong yumi yet. Tingim, Jehova i no fosim yumi long bihainim tok bilong em. Taim yumi makim olsem yumi bai bihainim tok, laip bilong yumi bai kamap gutpela moa na yumi bai kisim gutpela sindaun long bihain. Bikpela samting tru, pasin bilong yumi long bihainim tok bai soim God olsem yumi laikim em tru.—Lukim Futnot 4.

¹⁸ Bilong helpim yumi long save wanem samting i stret na i no stret, Jehova i givim yumi maus bilong bel. Sapos yumi skulim gut maus bilong bel, dispela inap helpim yumi long “bihainim ol lo bilong em.” Maus bilong bel em wanem samting? Na hau bai yumi skulim gut maus bilong bel? Yumi ken skelim.