No Ken Opim Dua Long Seten
“Nogut yupela i belhat yet i stap na san i go daun. Nogut yupela i opim dua long Seten.”—EFESAS 4:26, 27.
1. Pita i stori olsem wanem long Seten? Tasol Pita i tok husat bai lukautim yumi na helpim yumi long sanap strong?
WANPELA animal nogut i raun. Em i laik tru long kaikai ol Kristen. Pita i toksave olsem: “Yupela i mas tingting stret na was gut. Seten, birua bilong yupela, em i olsem wanpela laion i krai strong. Em i save wokabaut i go, na i laik painim sampela man bilong kaikai. Yupela i mas i stap strong long bilip na sakim em. ․․․ God em i as bilong olgeta marimari. ․․․ bai yupela i karim pen sotpela taim tasol, na bihain bai em yet i mekim yupela i orait gen, na sanapim yupela, na pasim yupela i stap strong.”—1 Pita 5:8-10.
2. (a) I gat wanem ol samting i mekim na i olsem yumi opim dua long Seten? (b) Man i pundaun na bihainim tingting kranki bilong ol man i lusim lotu i tru, olsem wanem na dispela samting i asua bilong em yet tasol? (c) Judas i gat wanem pasin kranki na Seten inap putim tingting long bel bilong em bilong kamapim Jisas long ol birua?
2 Seten wantaim ol spirit nogut na ol lain bilong em long graun, ol i wok long pundaunim yumi. Olsem na sapos yumi gat tupela tingting long yumi i kranki liklik, o yumi les long mekim ol samting bilong helpim yumi long i stap strong long bilip, orait yumi opim dua long Seten na ol lain bilong em. Tasol Baibel i tok promis olsem: Sapos yumi sanap strong na sakim Seten, em i no ken kaikai yumi. (Jems 4:7) Olsem: Yumi no pundaun nating na bihainim tok giaman na tingting kranki bilong ol man i lusim lotu i tru. Nogat. Na God i no makim yumi pinis bilong pundaun. Nogat. Ol tingting i stap long bel, dispela i kirapim yumi long mekim ol samting. Tru, Jon i tok, sampela “ol i lusim yumi pinis. Tasol bipo tu ol i no bilong yumi stret.” (1 Jon 2:19) Tasol dispela samting i kamap, long wanem ol yet i laik lusim lotu i tru o taim ol i kam insait long oganaisesen bilong Jehova long pastaim, ol i gat tingting nogut na ol i kam insait. Taim Jisas i singautim Judas Iskariot bilong kamap wanpela bilong ol 12-pela aposel bilong em, Judas i gat gutpela bel. Tasol em i gat wanpela pasin kranki—em i save mangal long mani—na Seten i mekim wok long dispela samting bilong pundaunim em. Paslain long taim Judas i kamapim Jisas long ol birua, Seten “i putim tingting pinis long bel bilong Judas, pikinini bilong Saimon Iskariot, bilong putim Jisas long han bilong ol birua.”—Jon 13:2.
3. Wanem samting inap mekim na bai man pundaun na givim baksait long tok i tru?
3 Man i go nogut, em i larim tingting bilong em yet, na laik bilong em long kisim biknem, na ol laik bilong skin, na ol man em i laik poroman wantaim ol, na ol manmeri em i stap namel long ol, ol i stiaim tingting na laik bilong em. Pol i stori long sampela man ‘ol i kisim pinis lait bilong God na spirit holi, tasol bihain ol i pundaun.’ (Hibru 6:4-6) Sapos yumi no was gut, ol tok gris bilong Seten inap giamanim bel bilong yumi na bai yumi pundaun na bihainim tingting kranki bilong ol man i givim baksait long tok i tru. Orait, i gat wanem kain tingting i save stap long bel bilong man na Seten inap mekim wok long en bilong pundaunim man na bai em i givim baksait long tok i tru?
4. Sapos yumi stap bel nogut o yumi kros kros o i gat tok long pasin bilong ol brata, wanem samting inap kamap?
4 Seten i wok long painim ol man ol i stap bel nogut, na ol i kros kros long ol samting, na ol i gat tok long pasin bilong ol narapela man. Dispela kain tingting inap pulap long bel bilong man na bai em i no pilim moa gutpela wok ol narapela man i mekim na em i no sori liklik long ol. Ating wanpela hevi i bin kamap na ol i no bin stretim, na man hia i bel nogut long dispela samting na em i no i go moa long ol miting Kristen. Em i kros i stap na long dispela rot em i “opim dua long Seten.” (Efesas 4:27) Dispela man i gat kros em i lukim tasol ol liklik pasin kranki bilong brata bilong em na em i no laik lusim rong bilong em “inap 70 taims 7-pela taim.” Taim hevi i kamap em i no mekim wok long dispela bilong strongim ol gutpela pasin Kristen bilong em. (Matyu 18:22) Taim man i stap bel nogut olsem, sapos wanpela man i kam tokim em oganaisesen bilong Jehova i gat strongpela lo tumas, o tingting bilong oganaisesen bilong Jehova long wanpela bikpela samting em i no stret, orait ating bel bilong dispela Kristen i redi long harim kain tok olsem na bai em i bilipim dispela tok i no gat as bilong en. Olsem na yu mas was gut. Yu no ken bel nogut na kros kros! Yu no ken belhat yet na san i go daun. Yu mas stretim kwik ol kros. Yu mas bihainim tru pasin bilong sori.
5. (a) Sapos yumi gat pasin antap o yumi bel nogut taim wanpela brata i laik stretim yumi, olsem wanem dispela inap pundaunim yumi? (b) Pasin daun i gat wanem wok bilong helpim yumi long sanap strong long bilip?
5 Orait, i gat wanem narapela kain tingting inap kamap long bel bilong brata na Seten inap mekim wok long dispela bilong pundaunim dispela brata? Sapos brata i hambak na em i ting em yet i namba wan tru, na em i kros, long wanem em i no kisim bikpela namba o bikpela wok insait long lain bilong Jehova olsem em i ting em i mas kisim, em nau, Seten inap mekim wok long dispela kain tingting bilong pundaunim em. (Rom 12:3) Sapos ol brata i givim strongpela tok long yu bilong stretim wanpela pasin o tingting kranki bilong yu, long kain taim olsem ating bai Seten i kirapim yu long ting olsem: ‘Ating dispela oganaisesen i no stret; em i no oganaisesen bilong God.’ Olsem na yu mas was gut na bihainim pasin daun. Oltaim yu mas wok long i stap olsem man i “liklik tru” namel long ol brata. Olsem bai yu no ken hambak na wok long litimapim nem bilong yu yet, na bai yu no pundaun na lusim bilip.—Luk 9:48; 1 Pita 5:9.
6, 7. (a) I gat wanem sampela pasin bilong les kwik, em kwiktaim Seten i mekim wok long en? (b) Sapos man i sot long gutpela tingting, em i mas mekim wanem?
6 Sapos yumi les kwik, Seten inap mekim wok long dispela samting tu bilong pundaunim yumi. Olsem wanem? Sampela taim yu ting oganaisesen o ol brata i mas stretim sampela samting na sapos ol i no mekim kwik, yu les? Yu save tok: ‘Ol i mas stretim dispela samting nau tasol o bai mi lusim oganaisesen. Longtaim pinis ol i tok Amagedon na Nupela Taim i klostu, tasol i no kamap yet. Mi les.’ Seten i redi long bagarapim bilip bilong ol man i les kwik. Yumi no ken les; yumi mas sanap strong long bilip.—Hibru 10:36, 39.
7 Jems i tok: “Orait, oltaim yupela i mas sanap strong na karim hevi, bai dispela pasin i ken kamap gutpela tru long yupela. Olsem na bai yupela i stap gut, na i no sot long wanpela pasin bilong God. Nogat. Bai yupela inap tru. Sapos wanpela man namel long yupela em i sot long gutpela tingting, orait em i mas beten long God i givim tingting long em, na bai God i givim em. God i save givim planti samting long olgeta man, na em i no save tok kros long man i sot long samting. Tasol dispela man i mas bilip tru na i beten long God. Em i no ken lusim bilip liklik na i ting olsem: ‘Ating bai God i givim dispela long mi, o nogat?’ Long wanem man i gat tupela tingting, em i olsem solwara win i sakim na i kirap nabaut. Kain man olsem i no ken ting bai Bikpela i givim em wanpela samting. Nogat. Tingting bilong dispela man em i bruk nabaut, na long olgeta pasin em i mekim, em i no save bihainim wanpela rot tasol.” (Jems 1:4-8) Nogut yu strong strong na yu les kwik na yu gat tupela tingting long ol tok promis bilong God. Olsem bai yu opim dua long Seten na bai ol tok na tingting kranki bilong ol man i lusim bilip inap pundaunim yu. Yu mas i stap isi, na tenkyu long God, na wetim Em i truim ol tok promis bilong em.—Sam 42:5.
8. Dispela pasin bilong bikhet long ol brata i gat wok long bosim yumi, olsem wanem em i opim dua long Seten na kirapim man long sakim lo bilong Baibel?
8 Seten i wok long pundaunim yumi long wanem narapela rot tu? Em i save kirapim ol wokboi bilong Jehova long bikhet long ol brata i gat wok long bosim ol. Ating sampela brata i gat tok long ol elda. Ating ol i tok, ‘Ol elda i no pilim hevi bilong yumi; ol i putim strongpela lo tumas.’ Ating sampela i tok, ‘Lain Bilong Bosim Ol Witnes o ol brata i holim bikpela wok insait long lain bilong Jehova ol i no larim yumi bihainim tok bilong maus bilong bel bilong yumi yet. Yumi yet yumi inap kaunim Baibel na kisim save long as bilong ol tok bilong en, tasol ol i laik pasim yumi long mekim olsem.’ Tasol yumi mas tingim gutpela pasin daun bilong Josep em i tok, ‘God tasol i save soim yumi as bilong tok.’ (Jenesis 40:8) Na Jisas i tok pinis olsem long las taim bai i gat wanpela lain o oganaisesen bilong ol man spirit holi bin makim ol, ol i olsem ‘gutpela wokboi,’ na ol i gat wok long givim kaikai bilong spirit long ol man long taim bilong en. (Matyu 24:45-47) Olsem na yu mas was gut long ol man i kamapim tingting bilong ol yet na i narapela kain. Was gut long ol man i tok, yu inap i stap fri na ol i tok ol Witnes Bilong Jehova i olsem i stap kalabus! Pita i tok, ol dispela kain man i tok “‘i no gat wanpela samting inap long daunim laik bilong yupela.’ Tasol ol yet ol i stap wokboi bilong pasin bilong bagarap. I olsem: Sapos wanpela samting i winim man pinis, dispela man em i stap wokboi bilong samting i bin winim em.”—2 Pita 2:1, 19.
9. Ol man i sutim tok long Sosaiti o long ol elda, planti taim wanem samting i kirapim ol long mekim olsem?
9 Man i sutim tok long Sosaiti o long ol elda, planti taim wanem samting i kirapim em long mekim olsem? Ating Sosaiti o ol elda i bin kamapim sampela tok bilong Baibel i sutim stret wanpela pasin bilong dispela man na em i no laik senisim dispela pasin bilong em. Em i no laik bihainim dispela gutpela tok bilong soim rot long em; em i laik bai oganaisesen i mas senis. Orait, nau yumi ken stori long dispela samting.
10. Sapos yumi strong long pasim narapela kain klos samting, olsem wanem dispela inap “opim dua long Seten”?
10 Olsem: Sapos wanpela brata i strong long pasim ol narapela kain klos samting. Ating ol elda i pilim olsem dispela brata i no makim gutpela pasin ol narapela i ken bihainim, olsem na ol i no givim sampela wok long em, olsem long pletfom bilong lainim ol brata. Em i bel nogut long dispela samting. Em i tok ol Kristen i ken putim wanem wanem kain klos ol yet i laikim; em laik bilong wan wan; na ol dispela brata i laik pasim em. Wanem as bilong dispela kain tingting? Pasin bikhet i as bilong en. Dispela brata i no laik bai narapela man i bosim em; em i mekim pasin olsem bilong pikinini na em i laik bihainim laik bilong em yet tasol. Ating yu ting dispela samting em i liklik samting tasol. Tasol man i gat kain tingting olsem, em inap “opim dua long Seten.” Sapos yumi gat pasin sori na pasin daun bai yumi pasim ol klos ol inap long yumi na ol narapela man i no gat tok long en. Yumi no ken bihainim laik bilong yumi yet; yumi mas laik long mekim olgeta samting bilong helpim wok bilong autim gutpela tok bilong Kingdom.—Rom 15:1, 2; 1 Korin 10:23, 24.
11. Ol man i gat askim long lo bilong Jehova long blut, ating i gat wanem as na ol i askim olsem?
11 O tingim dispela samting: Ating sampela taim yu bin harim sampela man i tok, Tru Baibel i tambuim yumi long kaikai blut, tasol sapos yumi kisim blut long haus sik, olsem trensfiusen, i no olsem yumi kaikai blut. Orait, bilong wanem ol i tok olsem? Wanem as bilong dispela tingting bilong ol? Ating ol pret, nogut ol yet o wanpela famili bilong ol i dai long wanem ol i no kisim blut. O ating ol i lusim bilip liklik na ol i no bilip strong moa olsem ol man i dai pinis bai ol i kirap bek. Tasol ol Kristen i givim bel tru long God ol i no save lusim lo bilong God liklik o painim rot bilong abrusim. Baibel i tok klia olsem: Yumi mas ‘abrusim blut.’ Dispela i bikpela samting wankain olsem abrusim pasin pamuk na pasin bilong lotuim ol god giaman. Long wanem spirit holi i kirapim ol aposel na hetman long Jerusalem long putim lo na tambuim olgeta dispela pasin.—Aposel 15:19, 20, 28, 29.
12. Bilong wanem yumi no ken tingting long i stap gut long wanpela famili o gutpela pren bilong yumi na yumi sakim lo bilong Baibel i tok yumi no ken poroman wantaim ol rauspela man?
12 Sampela i tok, oganaisesen bilong Jehova i putim strongpela lo tumas na i tok ol brata i no ken poroman liklik wantaim ol man kongrigesen i bin rausim ol. (2 Jon 10, 11) Tasol bilong wanem ol i gat tok long dispela samting? Ating kongrigesen i bin rausim wanpela famili bilong ol o wanpela gutpela pren bilong ol, na ol i laikim moa dispela famili o pren bilong ol, winim Jehova na ol stretpela lo bilong em? Yumi no ken lusim tingting olsem sapos yumi poroman wantaim rauspela man, ating em i famili bilong yumi o nogat, dispela inap kirapim em long ting olsem rong em i bin mekim i no bikpela rong tumas, na dispela bai nogutim em moa yet. Tasol sapos yumi klia long em na yumi no laik poroman liklik wantaim em, dispela inap kirapim bel bilong em na bai em i tanim bel na em i laik tru long kam bek na kisim gen ol samting em i bin lusim. Tru tumas rot Jehova i makim em i gutpela; sapos yumi bihainim dispela rot, dispela bai helpim na lukautim yumi.—Provep 3:5.
13. Yumi mas i gat wanem tingting long wok bilong i go long ol haus na autim tok?
13 Na ating sampela i tok, ‘Baibel i no tok yumi mas i go long ol haus na autim tok.’ Tasol bilong wanem ol i tok olsem? Ating ol yet i no laik mekim dispela bikpela wok na ol i painim rot bilong abrusim? Tasol sapos yumi laikim tumas God na ol narapela man, dispela bai kirapim yumi long wok strong long mekim dispela wok em inap helpim ol man long kisim laip. Yumi mas i stap strong long wok bilong autim tok. Pol i no surik long mekim dispela wok. Em i tok: “Mi no surik long telimautim olgeta tok i save helpim yupela.” Em i go long bung na long olgeta haus na “autim tok strong long ol Juda na long ol Grik.” (Aposel 20:18-21) Olsem na yumi no ken toktok planti na les long mekim dispela wok. Yumi mas bihainim gutpela pasin bilong Pol na wok strong long autim tok. Planti tausen manmeri i bin kam insait long dispela “wanpela lain sipsip,” long wanem Jehova i blesim wok bilong i go long ol haus na autim tok! (Jon 10:16) Na taim yumi go long haus bilong ol man bilong autim dispela gutpela tok long ol, dispela i save lainim na skulim yumi na strongim bilip bilong yumi. Yumi no ken lusim tingting long dispela samting.—Skelim Aposel 5:42; 1 Timoti 4:16.
14. Taim ol man i sutim tok long ol Witnes Bilong Jehova na tok yumi profet giaman, yumi mas ting olsem wanem long dispela samting?
14 Na tu yumi ken tingim ol tok Sosaiti i bin raitim bipo, em ol i bin makim sampela yia. Sampela birua i tok ol Witnes Bilong Jehova ol i profet giaman. Ol i tok yumi bin makim sampela de na yia, tasol ol samting i no bin kamap olsem yumi tok long en. Tasol ol dispela man i laik mekim wanem? Yu ting ol i laik strongim lain bilong God bambai ol i was i stap, o ol i laik haitim rong bilong ol yet, em ol i slip na ol i no mekim wok? (1 Tesalonaika 5:4-9) Na bikpela samting moa em olsem: Sapos yu harim wanpela man i sutim kain tok olsem long lain bilong yumi, yu bai mekim wanem? Sapos wanpela man i gat askim long “las taim” na em i no bilip tru olsem nau yumi stap long “las taim,” o em i kirap long ting olsem God bai mekim pasin marimari na em i no ken kilim i dai planti milion manmeri long taim bilong “bikpela hevi tru,” orait dispela man i opim bel bilong em pinis na em i redi long harim ol kain tok olsem ol birua i sutim long lain bilong yumi.—2 Timoti 3:1; Matyu 24:21.
15. Wanem samting i makim olsem ol Witnes Bilong Jehova i no profet giaman, ol i bilip tru long Baibel na long ol tok promis bilong God i stap long en?
15 Tru, sampela taim yumi bin stretim tingting long sampela samting yumi wetim i kamap. Yumi laik bai Nupela Taim i kamap kwiktaim, tasol yumi mas wetim taim Jehova i bin makim. Yumi laik hariapim dispela taim i kamap kwiktaim, tasol dispela samting i no makim olsem yumi profet giaman o yumi no stap long las taim, a? Yumi save tru, yumi stap long “las taim” na i no longtaim na bai taim bilong “bikpela Nevi tru” i kirap na bihain long en bai Paradais i kamap long graun. Olsem na yumi bin stretim tingting long sampela samting, tasol i no olsem ol dispela samting i no ken kamap tru, a? Olgeta samting i makim olsem Jehova i givim wok long wanpela oganaisesen tasol long graun na lain ‘gutpela wokboi’ ol i go pas long mekim dispela wok. Olsem na yumi gat tingting wankain olsem bilong Pita, em i tok: “Bikpela, bai mipela i go long husat? Tok bilong yu i givim laip i stap gut oltaim oltaim.”—Jon 6:68.
16, 17. (a) Olsem wanem tok bilong Matyu 7:15-20 i helpim yumi long save long dispela oganaisesen i gat blesing bilong Jehova? (b) Ol wokboi tru bilong Jehova i bihainim wanem ol gutpela pasin, olsem ol i karim gutpela kaikai?
16 Long paradais bilong spirit Jehova i bin kamapim, namel long ol Witnes Bilong Jehova, i gat dispela gutpela pasin bilong sori Jisas i tok em i olsem mak bilong ol disaipel tru bilong em. (Jon 13:34, 35) Ol profet giaman i olsem rop i gat nil—yumi ken save long ol long kaikai ol i karim—ol i karim kaikai nogut. Tasol Jisas i tok ol gutpela diwai i save karim gutpela kaikai. (Matyu 7:14-20) Na insait long paradais bilong spirit yumi lukim gutpela kaikai tru i kamap! Long olgeta kantri, lain bilong Jehova i kamap bikpela. Long nau winim 3 milion manmeri ol i aninit long Kingdom bilong God na ol i stap amamas. Tru tumas, Jehova i gat lain bilong em long graun.
17 Jehova i skulim ol dispela manmeri, olsem na ol i karim gutpela kaikai—ol i bihainim tru ol gutpela pasin Kristen. (Aisaia 54:13) Lain bilong Jehova gtasol ol i bin lusim tru ol bilip giaman bilong Babilon. Oganaisesen bilong ol tasol i bihainim tru tok bilong Baibel i tambuim pasin pamuk, na pasin bilong rausim bel, na dring spak, na stil, na lotuim god giaman, na birua long man bilong narapela lain o skin, na ol narapela pasin nogut bilong dispela graun. Ol tasol i bihainim tok na autim gutpela tok bilong Kingdom bilong Jehova. (Matyu 24:14) Baibel, em tok bilong God yet, em i makim olsem ol Witnes Bilong Jehova, dispela wanpela lain o oganaisesen tasol, ol i kisim blesing bilong Jehova!
18. Ol wokboi bilong Jehova i mas tingting strong long mekim wanem long tok bilong ol man i givim baksait long tok i tru?
18 Tru tumas, yumi save olgeta brata i stap gut long God na ol i stap strong long mekim ol wok Kristen, nau ol i laikim moa yet ol tok i tru bilong Jehova, winim long taim ol i bilip nupela. Olsem na long bel bilong yu, yu mas pasim strong tok olsem: Mi no ken bihainim liklik ol tok giaman bilong ol man i lusim bilip na givim baksait long tok i tru na ol i birua long Jehova. Yu mas bihainim toksave bilong Jehova na klia olgeta long ol man i laik giamanim yu na pulim yu i go long rot bilong lus. Yumi mas givim bel olgeta na tingting olgeta na laip olgeta na strong olgeta bilong yumi long God Jehova, em tasol em i God bilong yumi. Olsem bai tingting kranki bilong ol man i lusim bilip i no ken i go insait long tingting o long bel bilong yumi. (Matyu 22:37-39) Bai yumi no “opim dua long Seten.” Bai yumi no tingting long lusim tok i tru. Bai yumi no “kirap nogut kwiktaim” long ol dispela tok giaman na “pilim hevi long tingting.” Nogat. —2 Tesalonaika 2:1, 2.
19. Yumi mas mekim wanem na bai yumi no ken larim wanpela man i pundaunim yumi na bai yumi lus long kisim prais bilong laip oltaim?
19 Yumi stap long paradais bilong spirit Jehova i bin kamapim na oltaim yumi mas tingim gut dispela samting na tenkyu long em. Insait long dispela paradais yumi kisim planti blesing. Yumi save long ol man i holimpas tok i givim laip i stap oltaim oltaim. Olsem na oltaim yumi mas bung wantaim ol dispela brata bilong yumi, olsem ol wanbilip bilong yumi. Na bai yumi stap belgut na amamas olsem long taim yumi bilip nupela. Na bai yumi inap kisim laip i stap oltaim long Nupela Taim Jehova bai kamapim. Olsem Pol i tok, yumi no ken larim wanpela man i pundaunim yumi na bai yumi lus long kisim dispela prais!—Kolosi 2:18.
Yu Inap Bekim?
◻ Olsem wanem na i stret yumi ken tok, i no gat wanpela man God i bin makim em bilong lusim bilip?
◻ Sapos yumi bel nogut o hambak o les kwik, olsem wanem dispela inap opim dua long Seten?
◻ Man i sutim tok long Sosaiti o ol elda long tok ol i givim long em, ating wanem samting i kirapim em long mekim olsem?
◻ Lain Witnes Bilong Jehova i karim wanem gutpela kaikai na dispela i makim ol i dispela wanpela oganaisesen tasol Jehova i givim wok long ol?
[Piksa long pes 19]
Sapos yumi sakim tok bilong stretim yumi, yumi inap “opim dua long Seten”
[Piksa long pes 20]
Pasin hambak inap pundaunim yu na bai yu lus
[Piksa long pes 22]
Ol wokboi bilong Jehova i wok strong na ol i stap amamas, ol i no “opim dua long Seten” o bihainim tingting bilong ol man i givim baksait long tok i tru