Ating Enok i bin pilim olsem em i stap wanpis namel long ol man i no gat bilip. Tasol yu ting God bilong em Jehova i tingim em? Yes, Em i tingim em. Wanpela taim, Jehova i toktok wantaim gutpela wokboi bilong em. God i givim strongpela toksave long Enok long autim long ol manmeri long taim bilong em. Olsem na em i makim Enok olsem wanpela profet, em i namba wan profet em Baibel i stori long em. Yumi save long dispela, long wanem, holi spirit i bin kirapim Jut, hap brata bilong Jisas, long raitim ol tok profet bilong Enok inap planti handret yia bihain.a

Enok i autim wanem tok profet? Em i tok: “Harim! Jehova i kam wantaim bikpela lain ensel holi bilong en bilong skelim olgeta man. Na long kotim olgeta man i sakim tok bilong em, em bai kotim ol long olgeta pasin nogut ol i bin mekim. Na em bai kotim olgeta sinman i sakim tok bilong em, long wanem, ol i mekim ol tok nogut tru long em.” (Jut 14, 15) Namba wan samting yu inap luksave long en i olsem, Enok i kolim ol tok long pasin i soim olsem em i bilip tru olsem ol dispela samting bai kamap. Bihain, planti narapela profet i bihainim wankain pasin long kolim ol tok. Dispela i makim olsem: Tok ol profet i autim bai kamap tru long bihain, maski ol i no kamap yet long taim bilong ol.—Aisaia 46:10.

Yu ting Enok i bin pilim olsem wanem taim em i tokaut long ol manmeri long bikpela hevi bai painim ol? Em i autim strongpela tok tru—em i kolim ol kain tok olsem “man i sakim tok,” “pasin nogut ol i bin mekim,” na “mekim ol tok nogut tru.” Dispela i kamapim klia ol pasin nogut bilong dispela lain. Olsem na dispela tok profet i tokaut long pasin bilong ol man long sakim tok kirap long taim bilong Adam na Iv long gaden Iden na i kam inap long taim bilong yumi. Bikpela hevi tru bai painim ol manmeri long taim Jehova i kam wantaim “bikpela lain ensel holi” bilong em—lain strongpela ensel bilong pait—bilong skelim olgeta manmeri na bagarapim ol man nogut. Enok i strongim bel na i givim tok lukaut long ol, na em wanpela i mekim dispela wok! Ating yangpela Lamek i kirap nogut long lukim pasin bilong bubu man bilong em long sanap strong. Sapos olsem, orait yumi save long as na em i mekim olsem.

Bilip bilong Enok i kirapim yumi long askim yumi yet olsem, yumi holim wankain tingting olsem bilong God long ol pasin bilong dispela graun o nogat. Dispela tok lukaut Enok i mekim long bipo i stret long taim bilong yumi tu. Olsem Enok i tok, Jehova i kamapim Bikpela Tait long taim bilong Noa na bagarapim olgeta man i sakim tok bilong Em. Tasol dispela bagarap i piksa bilong traipela hevi tru bai kamap long bihain. (Matyu 24:38, 39; 2 Pita 2:4-6) Long nau, wankain olsem long bipo, God wantaim bikpela lain ensel holi bilong en i redi long mekim stretpela kot long ol man bilong sakim tok. Yumi olgeta wan wan i mas tingim tok lukaut em Enok i bin mekim na tokaut long ol narapela long dispela samting. Ating ol famili na pren bilong yumi bai i no sapotim yumi. Na sampela taim yumi inap pilim wanpis. Tasol tingim, Jehova i no bin lusim Enok. Olsem tasol, em bai no inap tru long lusim ol gutpela wokman bilong em long nau!