Ol Narapela Sipsip na Nupela Kontrak
“Ol manmeri bilong ol arapela kantri . . . ol i bihainim ol lo bilong de Sabat na ol i bihainim olgeta tok bilong kontrak mi bin mekim wantaim ol manmeri bilong mi, . . . bai mi bringim ol i go long Saion, dispela maunten holi bilong mi.”—AISAIA 56:6, 7.
1. (a) Olsem Jon i lukim long piksa, taim ol ensel i wok long holimpas strongpela win bilong kot bilong Jehova, wanem wok i kamap? (b) Jon i lukim wanem lain?
LONG namba 4 piksa olsem driman i stap long Buk Kamapim Tok Hait, aposel Jon i lukim ol ensel i holimpas strongpela win bilong kot bilong Jehova bambai em i ken pinisim wok bilong putim mak long pes bilong olgeta wan wan bilong “lain Israel tru bilong God.” Dispela em i namba wan lain bilong kisim blesing long rot bilong Jisas, em i nambawan bilong lain pikinini bilong Abraham. (Galesia 6:16; Stat 22:18, NW; KTH 7:1-4) Long dispela driman yet, Jon i lukim “planti manmeri tru ol i bung i stap, na i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples. . . . Ol i singaut strong olsem, ‘God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi na mekim yumi i stap gut.’ ” (KTH 7:9, 10) Taim ol dispela planti manmeri tru i tok, “Pikinini Sipsip . . . i save kisim bek yumi na mekim yumi i stap gut,” ol i kamapim klia olsem ol tu i kisim blesing long rot bilong Pikinini bilong Abraham.
2. Bikpela lain i kamap ples klia long wanem taim? Olsem wanem yumi inap luksave long dispela lain?
2 Long 1935 ol i bin luksave long dispela bikpela lain, na long nau dispela lain i winim 5 milion. God i makim ol bilong abrusim bagarap long taim bilong bikpela hevi tru, na taim Jisas i tilim “ol sipsip” i go narapela na “ol meme” i go narapela, em bai putim olgeta wan wan bilong dispela bikpela lain i stap narapela bilong kisim laip i stap oltaim. Ol Kristen bilong dispela bikpela lain ol i stap namel long “ol arapela sipsip” em Jisas i bin toktok long ol long tok piksa bilong ol banis sipsip. Ol i gat laik long i stap oltaim oltaim long Paradais long graun.—Matyu 25:31-46; Jon 10:16; KTH 21:3, 4.
3. Olsem wanem ol Kristen God i bin makim na ol arapela sipsip ol i narapela narapela kain long ol samting bilong nupela kontrak?
3 Bilong lain 144,000, blesing bilong kontrak God i bin mekim wantaim Abraham em bai kam long rot bilong nupela kontrak. Ol i insait long nupela kontrak, olsem na ol i stap “aninit long marimari bilong God” na aninit long “lo bilong Krais.” (Rom 6:15; 1 Korin 9:21) Olsem na ol dispela 144,000 bilong lain Israel bilong God ol i bin mekim pasin i stret taim ol i kisim bret na wain long bung bilong tingim indai bilong Jisas, na Jisas i bin mekim kontrak bilong Kingdom wantaim dispela lain tasol. (Luk 22:19, 20, 29) Ol manmeri bilong bikpela lain ol i no insait long nupela kontrak. Tasol ol i save bung wantaim lain Israel bilong God na sindaun wantaim ol long “kantri” bilong ol. (Aisaia 66:8) Olsem na yumi inap tok, ol tu i stap aninit long marimari bilong Jehova na aninit long lo bilong Krais. Tru, ol i no insait long nupela kontrak, tasol ol i kisim ol gutpela samting bilong en.
“Ol Manmeri Bilong Ol Arapela Kantri” na “Israel Tru Bilong God”
4, 5. (a) Olsem Aisaia i tok, wanem lain bai mekim wok bilong Jehova? (b) Olsem wanem tok bilong Aisaia 56:6, 7 i kamap tru long bikpela lain?
4 Profet Aisaia i kamapim tok bilong Jehova, olsem: “Ol manmeri bilong ol arapela kantri i stap wantaim ol manmeri bilong mi, na ol i save aninit long mi na laikim mi tru na mekim wok bilong mi, na ol i bihainim ol lo bilong de Sabat na ol i bihainim olgeta tok bilong kontrak mi bin mekim wantaim ol manmeri bilong mi, ol i ken amamas. Bai mi bringim ol i go long Saion, dispela maunten bilong mi, na bai ol i amamas long i stap long haus bilong mi. Na bai ol i mekim ol ofa bilong paia i kukim olgeta na ol arapela kain ofa long alta bilong mi. Na bai mi laikim ol ofa bilong ol.” (Aisaia 56:6, 7) Long Israel, dispela i makim olsem “ol manmeri bilong ol arapela kantri,” em ol manmeri i no bilong lain Israel, ol bai lotuim Jehova—ol bai laikim tru nem bilong em, na bihainim tok bilong kontrak bilong Lo, na bihainim lo bilong Sabat, na mekim ol ofa long haus bilong God, em “haus bilong beten.”—Matyu 21:13.
5 Long taim bilong yumi, “ol manmeri bilong ol arapela kantri i stap wantaim ol manmeri bilong [Jehova],” em dispela bikpela lain tasol. Ol i wok wantaim lain Israel bilong God long mekim wok bilong Jehova. (Sekaraia 8:23) Ol i save mekim ol wankain ofa olsem lain Israel bilong God i mekim na God i orait long en. (Hibru 13:15, 16) Ol i save lotuim God long haus lotu spirit bilong em, em “haus bilong beten.” (Skelim wantaim Kamapim Tok Hait 7:15.) Olsem wanem? Ol i save mekim Sabat bilong olgeta wik? God i no bin tokim ol Kristen em i bin makim o ol arapela sipsip long mekim olsem. (Kolosi 2:16, 17) Tasol Pol i tokim ol Kristen Hibru: “Ol manmeri bilong God bai i gat malolo i stap yet, em i olsem malolo bilong de Sabat. Na yumi save, man i go insait long ples malolo bilong God, em i pinisim wok bilong en na i malolo, olsem bipo God i pinisim wok bilong em yet na i malolo.” (Hibru 4:9, 10) Ol dispela lain Hibru ol i bin go insait long dispela “malolo bilong de Sabat” taim ol i putim ol yet i go aninit long stretpela pasin bilong God na ol i malolo long wok bipo ol i bin mekim, em ol i laik kamap stretpela man long ol wok bilong Lo Bilong Moses. (Rom 10:3, 4) Ol Kristen God i bin makim, em ol i bilong ol narapela lain, ol i putim ol yet i go aninit long stretpela pasin bilong Jehova, na long dispela rot ol i stap insait long dispela malolo. Bikpela lain tu i bung wantaim ol long dispela malolo.
6 Na tu, ol arapela sipsip i putim ol yet i go aninit long nupela kontrak, olsem ol manmeri bilong ol narapela kantri long bipo ol i bin putim ol yet i go aninit long kontrak bilong Lo. Ol i mekim olsem wanem? Ol i no insait long nupela kontrak, nogat; ol i bihainim ol lo bilong nupela kontrak na ol i kisim ol gutpela samting long en. (Skelim wantaim Jeremaia 31:33, 34.) Na ol arapela sipsip i wankain olsem ol poroman bilong ol em God i bin makim—ol tu i gat lo bilong Jehova ‘i stap long bel bilong ol.’ Ol i laikim tumas Jehova na ol i bihainim ol lo bilong em. (Song 37:31; 119:97) Na wankain olsem ol Kristen God i bin makim, ol tu i save long Jehova. (Jon 17:3) Na olsem wanem long pasin bilong katim skin? Inap olsem 1,500 yia paslain long taim nupela kontrak i kamap, Moses i bin tokim ol Israel, pasin bilong katim skin i mas kamap insait long bel bilong ol. (Lo 10:16, NW; Jeremaia 4:4) Lo bilong katim skin tru tru, em i pinis wantaim Lo Bilong Moses, tasol ol Kristen God i bin makim, na ol arapela sipsip tu, ol i mas mekim dispela pasin bilong “katim skin” long bel bilong ol. (Kolosi 2:11) Na laspela samting, em Jehova i tingim “blut bilong [Jisas] bilong mekim kontrak,” na em i lusim rong bilong ol arapela sipsip. (Matyu 26:28; 1 Jon 1:9; 2:2) God i no save kisim ol olsem ol pikinini bilong em long spirit, olsem em i save mekim long lain 144,000. Tasol em i save kolim ol arapela sipsip olsem stretpela man, olsem em i bin mekim long Abraham—em i kolim Abraham olsem stretpela man na em i kamap pren bilong God.—Matyu 25:46; Rom 4:2, 3; Jems 2:23.
7. Wanem gutpela rot i op bilong ol arapela sipsip bilong nau, em God i kolim ol stretpela man olsem em i bin mekim long Abraham?
7 Taim God i kolim lain 144,000 olsem stretpela man, dispela i opim rot bilong ol na ol inap tingting long i stap king wantaim Jisas long Kingdom bilong heven. (Rom 8:16, 17; Galesia 2:16) Na taim God i kolim ol arapela sipsip olsem stretpela man, dispela i opim rot bilong ol na ol inap tingting long i stap oltaim oltaim long Paradais long graun—long rot bilong abrusim bagarap long Armagedon olsem ol manmeri bilong bikpela lain o long rot bilong kirap bek long matmat, taim ‘God i kirapim bek ol stretpela man.’ (Aposel 24:15) Em gutpela samting tru yumi inap wet long en na yumi inap i stap pren bilong King bilong heven na graun, na yumi inap “i stap long haus bilong [em]”! (Song 15:1, 2) Em nau, ol Kristen God i bin makim na ol arapela sipsip ol i kisim gutpela blesing tru long rot bilong Jisas, em Pikinini bilong Abraham.
Wanpela Bikpela De Bilong God i Tekewe Sin Bilong Ol Manmeri
8. Ol ofa ol i bin mekim aninit long Lo long Bikpela De Bilong God i Tekewe Sin Bilong Ol Manmeri, ol i olsem piksa na i makim wanem samting?
8 Taim Pol i toktok long nupela kontrak, em i kirapim ol man i kaunim pas bilong em long tingim Bikpela De Bilong God i Tekewe Sin Bilong Ol Manmeri, em i bin kamap wanpela taim long olgeta yia aninit long kontrak bilong Lo. Long dispela de ol i bin mekim narapela narapela ofa—wanpela bilong ol pris bilong lain Livai, na wanpela bilong 12-pela lain i no bilong lain pris. Longtaim yumi bin kisim save olsem dispela em i piksa bilong makim bikpela ofa bilong Jisas, em bai helpim lain 144,000 ol i wet long kisim laip long heven na ol planti milion manmeri ol i wet long kisim laip oltaim long graun.a Pol i kamapim klia olsem, long truim bilong en ol i kisim ol gutpela samting bilong ofa bilong Jisas long rot bilong wanpela Bikpela De Bilong God i Tekewe Sin Bilong Ol Manmeri, em i aninit long nupela kontrak na i winim dispela bikpela de ol i bin mekim bipo. Jisas em i Hetpris bilong dispela bikpela de, olsem na em i givim laip bilong em i gutpela olgeta olsem wanpela ofa bilong tekewe sin bilong ol manmeri bambai em inap “baim bek [ol man] bilong oltaim oltaim.”—Hibru 9:11-24.
9 Planti Kristen Hibru long taim bilong ol aposel ol i “strong moa long bihainim lo bilong Moses.” (Aposel 21:20) Olsem na i stret Pol i tokim ol: “Blut bilong Jisas i mekim yumi i kamap klin tru long ai bilong God, olsem na Jisas i stap namelman bilong strongim nupela kontrak. Em i dai pinis bilong baim bek ol manmeri na lusim ol sin ol i bin mekim long taim namba wan kontrak i stap yet. Olsem na olgeta manmeri i harim singaut bilong God na i bihainim, ol i ken kisim dispela laip bipo God i tok long givim long ol pikinini bilong en. Na bai ol i stap gut oltaim oltaim.” (Hibru 9:15) Nupela kontrak i mekim na ol Kristen Hibru i no kalabus moa long olpela kontrak, em i bin kamapim long ples klia olsem ol i sinman. Nupela kontrak i helpim ol na nau ol inap tingting long “kisim dispela laip [long heven] bipo God i tok long givim long ol pikinini bilong en. Na bai ol i stap gut oltaim oltaim.”
10. Ol manmeri God i bin makim na ol arapela sipsip ol i tenkyu long God long wanem samting?
10 “Olgeta manmeri” i “bilip long Pikinini” ol bai kisim gutpela samting long ofa bilong em bilong baim bek ol man. (Jon 3:16, 36) Pol i tok: “Wanpela taim tasol Krais i givim em yet long God olsem ofa, bilong karim hevi bilong ol sin bilong planti manmeri. Na bihain em bai i kamap namba 2 taim, tasol dispela taim em i no kam bilong tekewe sin. Nogat. Em bai i kam bilong kisim bek tru ol man i wetim em.” (Hibru 9:28) Long nau, ol man i wok long wetim Jisas, sampela em ol Kristen bilong lain Israel bilong God em ol i stap yet long graun, na planti milion manmeri bilong bikpela lain, em ol tu i wet long kisim laip i stap oltaim. Tupela lain wantaim ol i tenkyu long God long dispela nupela kontrak na long ol gutpela blesing bilong laip oltaim i kam long rot bilong em, na sampela bilong ol dispela blesing em dispela Bikpela De Bilong God i Tekewe Sin Bilong Ol Manmeri, na wok em Hetpris Jisas i mekim insait long Rum Tambu Tru long heven.
Wok Strong Long Mekim Wok Bilong God
11 Long pas Pol i bin raitim long ol Hibru, em i tokaut strong olsem ofa bilong Jisas insait long nupela kontrak i winim tru ol ofa bilong tekewe sin insait long olpela kontrak. (Hibru 9:13-15) Dispela ofa bilong Jisas i gutpela moa, em inap “pinisim asua bilong yumi na yumi save olsem yumi stap klin tru long ai bilong God. Olsem na yumi no mas bihainim moa ol dispela lo i no gat laip, na yumi ken mekim wok bilong God bilong i stap oltaim.” Long ol Kristen Hibru, sampela bilong ol dispela wok “i no gat laip” long en em “ol sin ol i bin mekim long taim namba wan kontrak i stap yet.” Long ol Kristen bilong nau, sampela bilong ol dispela wok “i no gat laip” long en em ol sin ol i bin mekim bipo na ol i tanim bel tru na God i lusim ol dispela sin bilong ol. (1 Korin 6:9-11) Ol Kristen God i bin makim, bel bilong ol i klin pinis, olsem na ol i “mekim wok bilong God bilong i stap oltaim.” Na ol manmeri bilong bikpela lain, ol tu i mekim olsem. Bel bilong ol i kamap klin pinis long “blut bilong Pikinini Sipsip,” olsem na ol i stap insait long bikpela haus spirit bilong God, na ‘long san na long nait ol i save mekim wok bilong en.’—KTH 7:14, 15.
12. Olsem wanem yumi kamapim klia olsem yumi “bilip tru long God”?
12 Na tu, Pol i tok: “Em i bin tromoi blut bilong en long bel bilong yumi, bilong pinisim asua bilong ol pasin nogut yumi bin mekim na bilong mekim yumi i save olsem yumi stap klin tru long ai bilong God. Na em i bin wasim bodi bilong yumi long wara i klin tru. Olsem na yumi mas rausim olgeta pasin giaman i stap long bel bilong yumi, na yumi mas bilip tru long God na yumi mas i go klostu long em.” (Hibru 10:22) Orait, olsem wanem yumi inap kamapim klia olsem yumi “bilip tru long God”? Pol i tokim ol Kristen Hibru: “Yumi save tokaut long bilip bilong yumi na long ol gutpela samting yumi wetim i stap [long heven]. Orait yumi mas holim strong bilip bilong yumi, na yumi no ken pret na surik. Yumi save, olgeta samting God i tok pinis long mekim, tru tumas bai em i mekim. Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, olsem sampela man i save mekim. Nogat. Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.” (Hibru 10:23-25) Sapos bilip bilong yumi i strong, bai yumi tu i no “lusim pasin bilong bung wantaim.” Bai yumi amamas long kirapim ol brata bilong yumi long laikim ol narapela na mekim gutpela pasin long ol na larim ol yet i mekim olsem long yumi, bambai yumi ken kisim strong bilong mekim dispela bikpela wok bilong tokaut long gutpela samting yumi wetim i stap, em laip oltaim long graun o laip oltaim long heven.—Jon 13:35.
“Kontrak Bilong i Stap Oltaim”
13, 14. Olsem wanem nupela kontrak i bilong i stap oltaim?
13 Orait wanem samting bai kamap taim ol laspela manmeri bilong lain 144,000 ol i go antap pinis long heven? Ating nupela kontrak bai i no gat wok moa bilong en o olsem wanem? Long dispela taim bai i no gat wanpela bilong lain Israel bilong God i stap long graun. Olgeta manmeri insait long nupela kontrak bai ol i stap pinis wantaim Jisas long “kingdom bilong Papa bilong [em].” (Matyu 26:29) Tasol yumi tingim tok bilong Pol long pas em i bin raitim long ol Hibru: “Bikpela bilong yumi Jisas, em strongpela Wasman bilong ol sipsip, em i bin givim blut bilong em yet bilong strongim dispela kontrak bilong i stap oltaim, olsem na God i bin kirapim em bek long matmat.” (Hibru 13:20; Aisaia 55:3) Olsem wanem yumi ken tok, nupela kontrak i bilong i stap oltaim?
14 Namba wan samting i olsem: Nupela kontrak i no olsem kontrak bilong Lo—i no gat narapela kontrak bai senisim. Namba 2 samting i olsem: Ol samting i kamap long wok bilong nupela kontrak ol bai stap oltaim, wankain olsem wok king bilong Jisas. (Skelim Luk 1:33 wantaim 1 Korin 15:27, 28.) Kingdom bilong heven i gat wok inap oltaim oltaim insait long ol samting Jehova i mekim bilong kamapim laik bilong em. (KTH 22:5) Na namba 3 samting i olsem: Ol arapela sipsip bai wok yet long kisim ol gutpela samting long wok bilong nupela kontrak. Long Taim Bilong Wan Tausen Yia Bilong Krais i Stap King, ol manmeri i stap gut long God ol bai wok yet long ‘mekim wok bilong God long san na long nait long haus bilong en,’ olsem nau ol i save mekim. Jehova i tingim “blut bilong [Jisas] bilong mekim kontrak” na em i lusim pinis ol rong ol i bin mekim bipo, olsem na em i no ken kamapim gen long tingting bilong em. Ol bai stap yet olsem stretpela man long ai bilong Jehova olsem pren bilong em, na lo bilong em bai i stap yet long bel bilong ol.
15 Orait yumi laik save, long dispela taim bihain Jehova inap tok long ol dispela wokboi bilong em long graun olsem, ‘Mi stap God bilong ol na ol i stap ol lain manmeri bilong mi’? Yes, em inap tok olsem. “Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol.” (KTH 21:3) Ol bai kamap olsem “kem bilong ol manmeri bilong God,” em ol lain bilong graun i stap olsem maus bilong “dispela taun God i laikim tumas,” em nupela meri bilong Krais Jisas long heven. (KTH 14:1; 20:9; 21:2) Dispela samting inap kamap, long wanem, ol i bilip long “blut bilong [Jisas] bilong mekim kontrak” na ol i daun long ol king na pris long heven, em taim ol i bin stap long graun ol i lain Israel bilong God.—KTH 5:10.
16 Orait olsem wanem long ol man i dai pinis na ol i kirap bek long matmat na i stap long graun? (Jon 5:28, 29) Ol tu inap “kisim blesing” long rot bilong Jisas, em Pikinini bilong Abraham. (Stat 22:18, NW) Na ol tu i mas laikim tru nem bilong Jehova, na mekim wok bilong em, na mekim ol ofa em God i orait long en, na mekim wok bilong em long haus bilong em, em haus bilong mekim beten. Ol man i mekim olsem, ol bai go insait long malolo bilong God. (Aisaia 56:6, 7) Long pinis bilong wan tausen yia, olgeta manmeri i stap gut long God, ol i kamap gutpela olgeta long rot bilong ol wok em Krais Jisas i mekim wantaim ol 144,000 wanwok pris bilong em. I no olsem God bai kolim ol stretpela man olsem pren bilong em, nogat. Bai ol i stap stretpela man. Bai ol i “kisim laip”—olsem sin na dai ol i bin kisim long Adam em i pinis olgeta long ol. (KTH 20:5; 22:2) Em gutpela samting tru ol i kisim! Long tingting bilong yumi long nau, yumi ken ting olsem wok pris bilong Jisas na lain 144,000 em inap pinis long dispela taim. Ol blesing bilong dispela Bikpela De Bilong God i Tekewe Sin Bilong Ol Manmeri olgeta bai kamap tru insait long dispela taim. Na tu, Jisas bai “putim kingdom long han bilong God Papa.” (1 Korin 15:24) Bai i gat wanpela laspela traim bilong olgeta manmeri, na bihain long en Satan wantaim ol spirit bilong em bai ol i bagarap olgeta inap oltaim oltaim.—KTH 20:7, 10.
17. Yumi tingim dispela amamas i wetim yumi, olsem na yumi olgeta wan wan i mas tingting strong long mekim wanem?
17 Orait, sapos i gat wanpela wok dispela “kontrak bilong i stap oltaim” em bai mekim long gutpela taim bai kirap long dispela taim bihain, em bai mekim wanem wok? Em i no samting bilong yumi long kolim wok bilong en. Ol samting Jehova i kamapim klia pinis long yumi, em inap long yumi long dispela taim nau. Yumi kirap nogut tru long tingim dispela taim bihain. Tingim—laip i stap oltaim oltaim olsem lain bilong “nupela skai na nupela graun”! (2 Pita 3:13) Yumi no ken larim wanpela samting i daunim laik bilong yumi long kisim ol gutpela samting bilong dispela tok promis. Tru, sampela taim i hatwok long sanap strong. Pol i tok: “Yupela i mas sanap strong, olsem bai yupela i ken bihainim laik bilong God. Na yupela i ken kisim ol gutpela samting, bipo God i promis long givim yupela.” (Hibru 10:36) Tasol tingim: Maski i gat wanpela bikpela hevi yumi mas winim, o ol man i biruaim yumi na yumi mas karim dispela hevi, dispela i olsem liklik samting tru taim yumi tingim gutpela amamas tru i wetim yumi. (2 Korin 4:17) Olsem na yumi no ken i stap olsem “man bilong surik na lus.” Yumi mas i stap olsem “ol manmeri bilong bilip na kisim laip.” (Hibru 10:39) Yumi olgeta i mas bilip tru long Jehova, em God bilong mekim ol kontrak, bambai yumi olgeta wan wan inap kisim blesing bilong i stap oltaim oltaim.
[Futnot]
a Lukim buk Rot Bilong Abrusim Bagarap na i Stap Long Nupela Graun, sapta 13, em Sosaiti Wastaua bilong Nu Yok i wokim.
Yu Bin Kisim Gut?
◻ Husat moa wantaim ol Kristen God i bin makim ol i kisim ol blesing long rot bilong Pikinini bilong Abraham?
◻ Olsem wanem ol arapela sipsip i kisim blesing long rot bilong nupela kontrak ol i kain olsem ol manmeri bilong ol narapela lain i bin bihainim Lo Bilong Moses na ol i stap aninit long olpela kontrak?
◻ Olsem wanem ol arapela sipsip i kisim blesing long rot bilong dispela narapela Bikpela De Bilong God i Tekewe Sin Bilong Ol Manmeri?
◻ I gat wanem as na Pol i kolim nupela kontrak olsem “kontrak bilong i stap oltaim”?
6. Olsem wanem ol arapela sipsip long nau ol i putim ol yet i go aninit long nupela kontrak?
9. Ol Kristen Hibru em God i bin makim, ol i stap insait long nupela kontrak, olsem na ol inap kisim wanem samting?
11. Ol manmeri God i bin makim na ol arapela sipsip tu, bel bilong ol i kamap klin pinis long rot bilong ofa bilong Jisas, olsem na ol i amamas long mekim wanem?
15. Long nupela taim, Jehova bai stap olsem wanem wantaim lain bilong em long graun ol i lotuim em?
16. (a) Wanem ol samting i wetim ol man i kirap bek long matmat na ol i bilong i stap long graun? (b) Ol manmeri bai kisim wanem ol blesing long pinis bilong wan tausen yia?
[Blok long pes 21]
Ol i Mekim Wok Bilong God Insait Long Haus Bilong Em
Bikpela lain wantaim ol Kristen God i bin makim, ol i lotuim Jehova insait long banis bilong bikpela haus lotu spirit bilong em hia long graun. (KTH 7:14, 15; 11:2) I no gat as na yumi ken ting ol i stap long ples bung bilong ol manmeri bilong ol narapela lain. Taim Jisas i stap long graun, i gat wanpela ples bung bilong ol manmeri bilong ol narapela lain long banis bilong haus lotu. Tasol long piksa bilong haus lotu em God i bin givim long Solomon na Esekiel, i no gat wanpela hap em i makim ples bung bilong ol manmeri bilong ol narapela lain, nogat. Long haus lotu em Solomon i wokim, i gat wanpela ples bung i stap ausait liklik, na long dispela hap ol Israel na ol narapela lain i bihainim Lo Bilong Moses—ol man na meri—ol i lotu wantaim. Dispela ples bung i olsem piksa na i makim banis bilong haus lotu spirit hia long graun, em Jon i bin lukim bikpela lain i stap long en na ol i mekim wok bilong God.
Tasol ol pris na Livai tasol inap i go insait long banis i stap insait liklik, em bikpela alta i stap long en; ol pris tasol inap i go insait long Rum Tambu; na hetpris tasol inap i go insait long Rum Tambu Tru. Dispela banis i stap insait liklik, na Rum Tambu, ol i olsem piksa na i makim i stap bilong ol Kristen bilong liklik lain long ol samting bilong spirit taim ol i stap yet long graun. Na Rum Tambu Tru i makim heven yet, em ples ol Kristen God i bin makim ol i kisim laip i stap oltaim na ol i no inap i dai moa, wankain olsem Hetpris bilong ol long heven.—Hibru 10:19, 20.
[Piksa long pes 23]
Yumi tingim amamas i wetim yumi, olsem na yumi mas i stap olsem “ol manmeri bilong bilip na kisim laip”