Sapta 40

Krungutim Het Bilong Snek

Driman 14​​—⁠Kamapim Tok Hait 20⁠:​1-​10

Stori: Satan i kalabus long hul, na taim bilong 1,000 yia, na laspela traim i painim ol man, na Satan i bagarap olgeta

Taim bilong truim: Taim bikpela hevi tru i pinis na i go inap long Satan i bagarap olgeta

 1. Wanem samting i bin kamap bilong truim namba wan tok profet long Baibel?

YU TINGIM namba wan tok profet long Baibel? God Jehova i bin mekim, taim em i tokim Snek: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri. Bai [em] i krungutim het bilong yu, na bai yu kaikaim lek bilong [em].” (Stat 3⁠:15) Nau truim bilong dispela tok profet i kamap! Yumi stori pinis long Snek, olsem Satan, i bin biruaim oganaisesen bilong Jehova long heven, olsem meri bilong Jehova. (KTH 12⁠:​1, 9) Lain bilong Satan long graun, em ol lotu na lain politik na ol bikpela wok bisnis bilong em, ol i bin mekim nogut tru long lain bilong meri, em Krais Jisas na 144,000 manmeri bilong em hia long graun. (Jon 8⁠:​37, 44; Galesia 3⁠:​16, 29) Satan i kirapim ol man long givim bikpela pen long Jisas na kilim em i dai. Tasol dispela samting i olsem i bagarapim lek tasol bilong Jisas, long wanem, 3-pela de bihain God i kirapim bek dispela gutpela Pikinini bilong em.​—⁠Aposel 10⁠:​38-​40.

 2. Wanem samting bai painim Snek taim ol i “krungutim” em? Wanem samting bai painim lain bilong Snek long graun?

² Na olsem wanem long Snek na lain bilong em? Long yia 56 samting aposel Pol i raitim pas long ol Kristen long Rom, na long laspela tok bilong pas em i laik strongim bel bilong ol na i tok: “Liklik taim, God bilong givim gutpela sindaun na bel isi long yumi, em bai . . . krungutim Satan aninit long lek bilong yupela.” (Rom 16⁠:20) I olsem Satan bai kisim bikpela bagarap tru! Taim Pol i tok “krungutim Satan” em i mekim long tok Grik (olsem syn·triʹbo) na i olsem krungutim i go inap long em i meme olgeta, olsem bagarap olgeta. Na lain bilong Satan long graun, ol tu bai kisim nogut long de bilong Bikpela. Long taim bilong “bikpela hevi tru” Bikpela Babilon na olgeta lain politik na ol bikpela man bilong wok bisnis na ol bikman bilong ami bilong ol, ol bai kisim bagarap. (Kamapim Tok Hait, sapta 18 na 19) Jehova bai mekim olsem bilong pinisim birua i stap namel long tupela lain​—⁠Pikinini bilong meri bilong God bai win na daunim lain bilong Snek long graun na pinisim olgeta!

Satan i Kalabus

 3. Wanem samting bai painim Satan, olsem Jon i tok?

³ Na olsem wanem long Satan yet wantaim ol spirit nogut bilong em? Jon i tok: “Orait mi lukim wanpela ensel i lusim heven na i kam daun. Long han bilong en em i holim ki bilong hul i no gat as. Na em i holim bikpela sen tu. Em i holimpas dispela bikpela snek, em snek bilong bipo tru, em Satan, dispela ‘Man I Save Kotim Olgeta Man.’ Na ensel i pasim em long sen na em bai i stap olsem inap long 1,000 yia. Na ensel i tromoi em i go daun long hul i no gat as, na i pasim dua bilong dispela hul na i lokim strong. Olsem na Satan bai i no inap giamanim moa ol manmeri bilong olgeta lain. Em i mas wetim 1,000 yia i pinis pastaim, na bihain ol i mas lusim em, na long sotpela taim tasol em i ken i go nabaut.”​—⁠KTH 20⁠:​1-3.

 4. Husat dispela ensel i holim ki bilong bikpela hul i no gat as? Olsem wanem yumi save long em?

⁴ Husat dispela ensel? Em i mas i gat bikpela strong na bai em inap daunim nambawan birua bilong Jehova. “Em i holim ki bilong hul i no gat as. Na em i holim bikpela sen tu.” Dispela i kirapim yumi long tingim narapela driman bilong pastaim, a? Long dispela driman bilong Jon, ol i kolim king bilong ol grasopa olsem “ensel bilong dispela hul i go daun moa na i no gat as bilong en”! (KTH 9⁠:11) Em bikpela Krais Jisas tasol, em i Nambawan Man bilong daunim ol birua bilong Jehova, na em i kirap mekim wok. I no gat narapela ensel i gat bikpela strong na namba olsem bilong Jisas. Em yet i bin rausim Satan long heven, na em i mekim kot long Bikpela Babilon, na em i daunim “ol king bilong graun, wantaim ol ami bilong ol” long Armagedon, olsem na yumi save em i no ken larim narapela ensel i mekim wok bilong kalabusim Satan​—⁠em yet bai mekim!​—⁠KTH 12:​7-9; 18:​1, 2; 19:​11-​21.

 5. Ensel bilong hul i no gat as bai mekim wanem long Satan? Bilong wanem em bai mekim olsem?

⁵ Taim ol i rausim “traipela retpela snek” long heven, Baibel i kolim em olsem “dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun.” (KTH 12⁠:​3, 9) Na taim dispela strongpela ensel i laik holim em na kalabusim em, Jon i kolim Satan gen olsem “dispela bikpela snek, em snek bilong bipo tru, em Satan, dispela ‘Man I Save Kotim Olgeta Man.’ ” Em i man nogut bilong pundaunim man, na giamanim man, na bagarapim nem bilong man, na mekim pasin bikhet. Ensel bai pasim Satan long sen na tromoi em i go insait long “hul i no gat as,” na “lokim strong” na bai em “i no inap giamanim moa ol manmeri bilong olgeta lain.” Em bai stap kalabus inap 1,000 yia, na long dispela taim em i no inap mekim wanpela samting bilong paulim ol man. “Ensel bilong dispela hul i go daun moa” em bai pasim Satan olgeta na bai em i no ken mekim wanpela samting long dispela Kingdom bilong stretpela pasin, olsem na em i no inap putim hevi long ol man!

 6. (a) Olsem wanem yumi save ol spirit nogut tu bai kalabus wantaim Satan long dispela bikpela hul? (b) Taim ol i kalabus pinis, nau wanem samting bai kirap? Olsem wanem na nau dispela samting inap long kirap?

⁶ Na olsem wanem long ol spirit nogut? Ol bai “kalabus i stap na wetim De bilong bikpela kot bilong God.” (2 Pita 2⁠:⁠4) Ol i kolim Satan olsem “Belsebul, em hetman bilong ol spirit nogut.” (Luk 11⁠:​15, 18; Matyu 10⁠:25) Ol spirit nogut i bin wok wantaim Satan inap longtaim, olsem na i stret ol i kisim wankain strafe olsem em, a? Inap longtaim ol i bin pret long dispela bikpela hul i no gat as, olsem kalabus. Wanpela taim Jisas i bin bungim ol na ol i tok: “Yu no ken rausim mipela i go long dispela hul i no gat as.” (Luk 8⁠:31) Taim Jisas i kalabusim Satan long dispela hul em bai tromoi ol ensel bilong Satan tu i go daun wantaim Satan. (Lukim Aisaia 24⁠:​21, 22.) Taim Satan wantaim ol spirit nogut bilong em i kalabus pinis, nau Krais Jisas bai kirap mekim wok king bilong em inap 1,000 yia.

 7. (a) Taim Satan wantaim ol spirit nogut bilong em i stap kalabus long hul, ol bai stap olsem wanem? Olsem wanem yumi save long dispela samting? (b) Dispela hul i no gat as em matmat tasol, o olsem wanem? (Lukim sta i gat liklik rait.)

⁷ Taim Satan wantaim ol spirit nogut bilong em i kalabus i stap long hul i no gat as, ol bai mekim sampela wok, o nogat? Orait, yumi ken tingim dispela retpela wel animal i gat 7-pela het, “bipo em i stap, tasol nau em i no i stap moa. Tasol em bai i lusim dispela hul i no gat as, na em bai i kam antap.” (KTH 17⁠:⁠8) Taim em i stap long hul, i olsem “em i no i stap moa.” Em i no inap mekim wanpela samting, na i olsem em i dai pinis. Wanpela taim aposel Pol i stori long Jisas na i tok: “Nogut yupela i tok olsem, ‘Husat bai i go daun long ples bilong ol man i dai pinis?’ Em i olsem yupela i laik bringim Krais i kam bek long matmat.” (Rom 10⁠:⁠7) Taim Jisas i stap long matmat, o hul, em i dai pinis.a Olsem na yumi ken save, taim Satan wantaim ol spirit nogut bilong em i stap kalabus long hul inap 1,000 yia ol bai stap olsem man i dai pinis. Ol man i laikim stretpela pasin ol i amamas long harim olsem!

Ol i Mekim Wok Jas Inap 1,000 Yia

8, 9. Jon i stori olsem wanem long ol dispela man i sindaun long ol sia king? Ol dispela man i husat?

⁸ Taim 1,000 yia i pinis, Satan bai lusim bikpela hul na i kam antap na i stap inap liklik taim. Bilong wanem? Orait, pastaim yumi ken harim tok bilong Jon, em i stori long taim 1,000 yia i kirap, na em i tok: “Na mi lukim ol sia olsem sia king i stap, na ol man i sindaun i stap long ol dispela sia. God i givim wok long ol bilong skelim pasin bilong ol manmeri long kot.” (KTH 20⁠:4a) Husat ol dispela man i sindaun long ol dispela sia king long heven na mekim wok king wantaim bikpela Jisas?

⁹ Em “ol manmeri bilong God,” na Daniel i tok, ol bai stap king long Kingdom wantaim dispela Man em “i wankain olsem yumi man bilong graun.” (Daniel 7⁠:​13, 14, 18) Ol i dispela 24 hetman i sindaun long sia king klostu long Jehova. (KTH 4⁠:⁠4) Ol 12-pela aposel i bilong dispela lain; Jisas i bin tokim ol dispela aposel: “Long taim olgeta samting i kamap nupela, na Pikinini Bilong Man bai i gat biknem na i sindaun long sia king bilong en, long dispela taim yupela ol man i bin bihainim mi yupela tu bai i sindaun long 12-pela gutpela sia na yupela bai i bosim ol 12-pela lain bilong Israel.” (Matyu 19⁠:28) Na Pol wantaim ol Kristen bilong kongrigesen Korin i bin i stap strong, ol tu bai sindaun long ol dispela sia king. (1 Korin 4⁠:8; 6⁠:​2, 3) Na ol manmeri bilong kongrigesen Laodisia i bin stap strong, ol tu i insait long dispela lain i mekim wok king.​—⁠KTH 3⁠:⁠21.

10. (a) Jon i stori olsem wanem long ol dispela 144,000 king? (b) Yumi tingim tok bipo Jon i bin mekim, na nau yumi save, husat ol i insait long dispela lain 144,000 king?

¹⁰ Inap 144,000 sia king i redi i stap bilong ol dispela man i bin winim ol traim na hevi, em “God i bin baim bek ol dispela lain namel long olgeta manmeri bilong graun, na ol i stap olsem namba wan lain God i kisim bek, bai ol i stap ol lain bilong em yet na bilong Pikinini Sipsip.” (KTH 14⁠:​1, 4) Jon i tok: “Na mi lukim . . . planti manmeri i bin bilip long Jisas na autim nem bilong en na ol i bin holim strong tok bilong God, na long dispela as tasol ol birua i bin katim nek bilong ol na kilim ol i dai. Na mi lukim . . . planti manmeri i no bin lotu long wel animal na long piksa bilong en, na ol i no bin kisim mak bilong en long pes na long han bilong ol.” (KTH 20⁠:4b) Sampela ol Kristen em spirit holi i bin makim ol, ol man i bin kilim ol i dai, olsem yumi stori pinis long ol taim Jisas i rausim namba 5 gris kandel. Ol tu i bilong dispela lain king. Ol i bin askim Jehova, wanem taim em bai bekim long ol man i bin kilim ol i dai. Long dispela taim Jehova i bin givim “longpela waitpela klos” long ol na em i tokim ol long wet liklik moa. Orait, taim “King bilong olgeta king, na Bikpela bilong olgeta bikman” i bagarapim Bikpela Babilon na ol lain man nogut na em i kalabusim Satan, em nau, em i bekim pinis rong long ol dispela lain i bin kilim i dai ol dispela Kristen.​—⁠KTH 6⁠:​9-​11; 17⁠:16; 19⁠:​15, 16.

11. (a) Olsem wanem long dispela tok “ol birua i bin katim nek bilong ol na kilim ol i dai”? (b) Olsem wanem dai bilong olgeta bilong lain 144,000 i kain olsem ofa?

¹¹ Tasol olsem wanem? “Ol birua i bin katim nek” bilong 144,000 olgeta “na kilim ol i dai”? Nogat. Ating i no planti ol i bin kisim bagarap olsem. Tasol dispela tok i bilong makim ol manmeri bilong dispela lain Kristen em ol birua i bin kilim ol i dai.b (Matyu 10⁠:​22, 28) Satan i laik bai ol man i katim nek bilong olgeta, tasol ol man i no bin mekim olsem long olgeta brata bilong Jisas. Sik i bin kisim planti na ol i dai, na planti ol i lapun na ol i dai, tasol ol dispela tu i bilong dispela lain Jon i bin lukim. Dai bilong olgeta i kain olsem ofa. (Rom 6⁠:​3-5) Ol i no bin insait long ol pasin na wok bilong ol man bilong dispela graun, olsem na ol man i bin bel nogut long ol, na long ai bilong ol man bilong graun i olsem dispela lain i dai pinis. (Jon 15⁠:19; 1 Korin 4⁠:13) Na ol i no bin lotuim wel animal o piksa bilong en, na taim ol i dai, mak bilong wel animal i no stap long ol. Olgeta ol i winim pinis pait na ol i dai.​—⁠1 Jon 5⁠:4; KTH 2⁠:7; 3⁠:12; 12⁠:⁠11.

12. Jon i tok wanem long dispela lain 144,000 king? Ol i kirap bek na i kisim laip gen long wanem taim?

¹² Tasol dispela lain i winim pinis pait ol i kirap bek gen! Jon i tok: “Ol dispela manmeri ol i kisim laip, na ol i stap king wantaim Krais inap long 1,000 yia.” (KTH 20⁠:4c) Olsem wanem? Ol dispela jas i mas wet inap long ol lain bilong dispela graun i kisim bagarap pastaim na Satan wantaim lain spirit nogut bilong em ol i kalabus pinis long bikpela hul na nau ol i kirap bek? Nogat. Planti bilong ol i stap laip pinis, na ol i raun long ol hos wantaim Jisas na daunim ol lain long Armagedon. (KTH 2⁠:​26, 27; 19⁠:⁠14) Pol i tok, ol i wok long kirap bek bihain liklik long taim Jisas i kamap King long 1914, tasol olgeta i no kirap bek long wanpela taim tasol. (1 Korin 15⁠:​51-​54; 1 Tesalonaika 4⁠:​15-​17) Sampela bai kirap bek pastaim na bihain sampela moa bai kirap bek, na ol bai go long heven na i stap laip oltaim.​—⁠2 Tesalonaika 1⁠:7; 2 Pita 3⁠:​11-​14.

13. (a) Dispela 1,000 yia em 144,000 king i bosim graun, em i hamas yia stret? Yumi save olsem wanem? (b) Papias bilong Hierapolis i ting olsem wanem long dispela 1,000 yia? (Lukim sta i gat liklik rait i stap antap.)

¹³ Ol bai mekim wok king na jas inap 1,000 yia. Em 1,000 yia stret, o em i olsem longpela hap taim tasol? Dispela tok “planti tausen” i makim olsem planti tasol, na i no kolim hamas stret, olsem long 1 Samuel 21⁠:11. Tasol dispela “1,000 yia” long Kamapim Tok Hait em 1,000 yia stret, long wanem, Kamapim Tok Hait 20⁠:​5-7 em i kolim olsem inap 3-pela taim. Pol i tok, dispela 1,000 yia em i “de bilong . . . kotim ol manmeri.” Em i tok: “Em [God] i makim pinis wanpela de bilong em bai i kotim ol manmeri. Na long stretpela pasin bilong en, em bai i skelim pasin bilong olgeta manmeri bilong graun.” (Aposel 17⁠:31) Pita i tok, long ai bilong Jehova, 1,000 yia i olsem wanpela de tasol, olsem na dispela ‘De bilong kotim ol manmeri’ em 1,000 yia stret.c​—⁠2 Pita 3⁠:⁠8.

Ol Arapela i Bin Dai

14. (a) Jon i tok wanem long “ol arapela manmeri i dai pinis”? (b) Aposel Pol i tok wanem na dispela i helpim yumi long save long insait bilong dispela tok “kisim laip”?

¹⁴ Ol dispela king bai bosim husat? Yumi laik save, long wanem, aposel Jon i tok: “Ol arapela manmeri i dai pinis, ol i no kisim laip long dispela taim. Ol i mas wetim dispela 1,000 yia i pinis pastaim.” (KTH 20⁠:5a) Dispela tok “kisim laip,” em i gat narapela narapela insait bilong en. Pol i bin toktok long ol wanlain Kristen na i tok: “Bipo . . . yupela i bihainim pasin bilong olpela bel, na dispela i kilim yupela i dai. Tasol God i mekim yupela i kisim laip.” (Kolosi 2⁠:13) Ol dispela Kristen long taim bilong ol aposel ol i bin “kisim laip,” olsem God i kolim ol olsem stretpela manmeri, long wanem, ol i bilip long ofa bilong Jisas.​—⁠Rom 3⁠:​23, 24.

15. (a) Ol Witnes Bilong Jehova long bipo ol i stap olsem wanem long ai bilong Jehova? (b) “Ol arapela sipsip” bai “kisim laip” olsem wanem? Wanem taim tru ol bai “kisim graun”?

¹⁵ Jehova i bin makim ol Witnes bilong em bilong bipo ol i olsem stretpela man long ai bilong em na ol i pren bilong em; Abraham na Aisak na Jekop, maski ol i dai pinis, long ai bilong Jehova ol “i stap laip.” (Matyu 22⁠:​31, 32; Jems 2⁠:​21, 23) Tasol dispela lain na ol narapela man i kirap bek, na “ol arapela sipsip” em ol i winim Armagedon, na ol pikinini em dispela ‘bikpela lain’ bai kamapim long nupela taim bihain, olgeta dispela lain i mas kamap gutpela olgeta. Krais wantaim lain king na pris bilong em bai helpim ol long mekim olsem insait long ‘de bilong kot,’ em 1,000 yia. Ofa em Jisas i bin mekim bai helpim ol long mekim dispela samting. Taim dispela 1,000 yia i pinis, ol dispela “arapela manmeri i dai pinis” ol bai kamap gutpela olgeta​—⁠i olsem ol i “kisim laip.” Orait, nau ol i mas winim laspela traim, tasol long dispela taim skin bilong ol i nambawan olgeta. Na sapos ol i winim dispela traim, God bai tok ol inap i stap oltaim, long wanem, ol i stretpela manmeri tru. Truim bilong wanpela tok promis bai painim ol, olsem: “Ol stretpela man bai i kisim graun God i givim ol, na bai ol i stap oltaim long en.” (Song 37⁠:29) Ol man i save bihainim tok ol bai kisim gutpela samting tru long bihain!

Namba Wan Kirap Bek

16. Jon i tok wanem long kirap bek bilong dispela lain bai wok king wantaim Krais? Bilong wanem em i tok olsem?

¹⁶ Orait, yumi stori moa long “ol dispela manmeri ol i kisim laip, na ol i stap king wantaim Krais.” Jon i tok, taim ol i kirap bek, “dispela em i namba wan taim ol manmeri i kirap bek long matmat.” (KTH 20⁠:5b) “Em i namba wan taim” olsem wanem? Em olsem: I no gat sampela i bin kirap bek paslain long ol; ol i paslain long ol narapela long mekim olsem. “God i bin baim bek ol . . . na ol i stap olsem namba wan lain God i kisim bek, bai ol i stap ol lain bilong em yet na bilong Pikinini Sipsip.” (KTH 14⁠:⁠4) Na taim dispela lain i kirap bek ol bai wok king wantaim Jisas long Kingdom long heven na bosim ol man long graun, olsem na dispela kirap bek bilong ol i winim kirap bek bilong ol man bai stap long graun. Na i gat narapela as tu na kirap bek bilong ol i “namba wan” na i winim ol narapela. Em olsem: Baibel i stori long dispela lain na Jisas tasol, taim ol i kirap bek long matmat ol “i no save dai” moa.​—⁠1 Korin 15⁠:53; 1 Timoti 6⁠:⁠16.

17. (a) Jon i tok olsem wanem long gutpela samting lain 144,000 i ken tingim? (b) “Namba 2 dai” em i wanem samting? Olsem wanem namba 2 dai “i no gat strong bilong daunim” ol dispela lain 144,000 manmeri i winim pait?

¹⁷ Em gutpela samting lain 144,000 i ken tingim! Jon i tok: “Ol manmeri i kirap bek long dispela namba wan taim, God i makim ol bilong em yet na ol i ken amamas. Namba 2 dai em i no gat strong bilong daunim ol dispela lain. Nogat.” (KTH 20⁠:6a) Jisas i bin tok promis long ol Kristen long Smerna, em i tok, sapos dispela lain i winim pait na ol i insait long “namba wan” kirap bek, orait “namba 2 dai” i no inap kisim ol; i olsem ol i no inap dai gen na lus olgeta na i no inap kirap bek. (KTH 2⁠:11; 20⁠:14) Namba 2 dai “i no gat strong bilong daunim ol dispela lain” i bin winim pait, long wanem, ‘ol i senis na skin bilong ol i no inap bagarap moa, na bai ol i stap laip oltaim.’​—⁠1 Korin 15⁠:⁠53.

18. Jon i tok wanem long ol nupela king bilong bosim graun? Ol bai mekim wanem?

¹⁸ Pasin bilong ol i no olsem pasin bilong ol king bilong graun em Satan i bosim ol. Sampela i save stap inap 50 o 60 yia samting na bosim ol man, tasol planti i stap sotpela taim tasol long bosim ol man. Planti ol i bin putim hevi long ol man. Ol dispela bikman i wok long senis senis, na narapela i gat narapela tingting na pasin, olsem na ol i no inap helpim gut ol man long kamap strong na kisim gutpela sindaun inap long olgeta taim bihain, nogat. Tasol ol nupela king bilong bosim graun bai narapela kain, olsem Jon i tok: “Ol bai i stap pris bilong God na bilong Krais. Na ol bai i stap king wantaim Krais long dispela 1,000 yia.” (KTH 20⁠:6b) Ol wantaim Jisas bai holim wok gavman inap 1,000 yia, na bai i no gat narapela gavman. Na bai ol i stap pris tu na mekim wok long ofa bilong Jisas bilong helpim ol man i save bihainim tok na bai ol i kamap gutpela olgeta long spirit na long pasin bilong ol na long skin. Wok king bilong ol bai mekim na olgeta man long graun bai kamap gut na bihainim stretpela pasin na pasin holi olsem bilong Jehova. Na ol bai mekim wok jas wantaim Jisas inap 1,000 yia, na long pasin sori ol bai helpim ol man i save harim tok na bai ol i kisim laip oltaim.​—⁠Jon 3⁠:⁠16.

Laspela Traim

19. Graun wantaim ol man bai stap olsem wanem long pinis bilong 1,000 yia? Long dispela taim Jisas bai mekim wanem?

¹⁹ Taim 1,000 yia i pinis, olgeta hap bilong graun bai kamap Paradais olsem bilong bipo long Iden. Paradais tru bai kamap long olgeta hap. Skin na pasin bilong ol man bai gutpela olgeta, olsem na i no gat wok moa bilong hetpris i mas mekim wok bilong helpim ol man, olsem namelman bilong ol, long wanem, ol sin em Adam i putim long ol man em i tekewe pinis; dai em i laspela birua, na nau em i pinis olgeta. Kingdom bilong Krais bai mekim ol man i kamap olsem wanpela lain tasol, na wanpela gavman tasol bai bosim ol, olsem God yet i bin laikim. Mekim olsem pinis, na nau Jisas bai “putim kingdom long han bilong God Papa.”​—⁠1 Korin 15⁠:​22-​26; Rom 15⁠:⁠12.

20. Wanem samting bai kamap long taim bilong laspela traim, olsem Jon i tok?

²⁰ Orait, nau em taim bilong laspela traim i mas painim ol man. Olsem wanem? Ol bai sanap strong, o sampela bai pundaun olsem Adam tupela Iv i bin mekim? Orait, Jon i ken tokim yumi long samting bai kamap: “Taim dispela 1,000 yia i pinis, orait ol bai i opim dua bilong hul i no gat as, na Satan bai i lusim kalabus bilong en. Na em bai i kam ausait bilong giamanim ol lain manmeri i stap long olgeta hap bilong graun, em ol lain bilong Gok wantaim Magok. Satan bai i bungim ol bilong kirapim pait. Namba bilong ol ami bilong ol em i olsem namba bilong wesan bilong nambis. Ol bai i kam long olgeta hap bilong graun, na raunim kem bilong ol manmeri bilong God wantaim dispela taun God i laikim tumas.”​—⁠KTH 20⁠:​7-9a.

21. Satan bai mekim wanem long dispela taim? Olsem wanem na yumi no ken kirap nogut long sampela man i bihainim Satan, maski ol i bin i stap taim Kingdom i bosim graun inap 1,000 yia pinis?

²¹ Satan bai mekim wanem long dispela taim? Em bai “giamanim ol lain manmeri i stap long olgeta hap bilong graun, em ol lain bilong Gok wantaim Magok,” na em “bai i bungim ol bilong kirapim pait.” Yumi ting Satan i no inap pulim sampela man long dispela taim, long wanem, ol i bin stap amamas aninit long gutpela gavman bilong God inap 1,000 yia na ol i stap gutpela tru. Tasol Satan i bin pulim Adam tupela Iv taim skin bilong ol i gutpela olgeta na ol i stap amamas long Paradais long Iden. Na Satan i bin pulim sampela ensel long heven, em ol i lukim pinis ol rong na hevi i bin kamap long taim Adam tupela Iv i bin bikhet. (2 Pita 2⁠:4; Jut 6) Olsem na yumi no ken kirap nogut taim yumi harim olsem sampela man bai ol i bihainim Satan, maski ol i bin stap inap 1,000 yia aninit long gutpela lo bilong Kingdom bilong God na skin bilong ol i nambawan olgeta.

22. (a) Olsem wanem long dispela “ol lain manmeri i stap long olgeta hap bilong graun”? (b) Bilong wanem Jon i kolim ol olsem “ol lain bilong Gok wantaim Magok”?

²² Baibel i kolim ol dispela bikhetman olsem “ol lain manmeri i stap long olgeta hap bilong graun.” Tasol i no olsem ol bai stap olsem narapela narapela lain na tok ples, nogat; tasol ol bai bruk long stretpela lain bilong Jehova, em ol i stap gut long em, na ol dispela bikhetman bai i gat tingting na pasin nogut, kain olsem ol lain bilong graun long nau. Ol bai tingting long mekim nogut long gavman bilong God long graun, olsem Gok bilong Magok i bin mekim long tok profet bilong Esekiel. (Esekiel 38⁠:​3, 10-​12) Olsem na Jon i kolim ol olsem “ol lain bilong Gok wantaim Magok.”

23. Jon i tok, lain bikhetman “i olsem namba bilong wesan bilong nambis,” na dispela i makim wanem samting?

²³ Jon i tok, ol dispela lain bikhetman i bihainim Satan ol i planti “olsem namba bilong wesan bilong nambis.” Tasol hamas stret i stap, em Baibel i no kolim, olsem na yumi no inap save. (Lukim Josua 11:4; Hetman 7:12.) Tasol Satan bai traim grisim olgeta man long dispela taim, na sampela bai pundaun na bihainim em. Ating ol i mas planti, long wanem, ol bai ting ol i gat strong inap long daunim “kem bilong ol manmeri bilong God wantaim dispela taun God i laikim tumas.”

24. (a) “Dispela taun God i laikim tumas” em i wanem taun? Olsem wanem ol i “raunim” dispela taun? (b) “Kem bilong ol manmeri bilong God” i makim husat?

²⁴ “Dispela taun God i laikim tumas” em i dispela taun yet em bikpela Krais Jisas i tokim lain bilong em long en, olsem yumi lukim long Kamapim Tok Hait 3⁠:​12. Jisas i kolim dispela taun olsem “taun bilong God bilong mi, em dispela nupela Jerusalem i kam long God bilong mi, na i lusim heven na i kam daun.” Dispela taun em i wanpela oganaisesen long heven, orait, olsem wanem ol man bilong graun i ken “raunim” dispela taun? Ol i mekim olsem long taim ol i “raunim kem bilong ol manmeri bilong God.” Kem i stap ausait long taun, olsem na “kem bilong ol manmeri bilong God” i makim lain bilong God long graun em ol i stap ausait long Nupela Jerusalem bilong heven na ol i givim bel long gavman bilong Jehova. Taim ol dispela lain bikhetman bilong Satan i laik pait wantaim dispela gutpela lain i stap long graun, Bikpela Jisas i tingim olsem ol i pait long em yet. (Matyu 25⁠:​40, 45) Dispela “ol lain manmeri” bai traim bagarapim olgeta wok em Nupela Jerusalem bilong heven i bin mekim bilong kamapim Paradais long graun. Olsem na taim ol i “raunim kem bilong ol manmeri bilong God” na ol i laik pait long ol, i olsem ol i laik pait tu long “dispela taun God i laikim tumas.”

Hul i Gat Paia na Salfa

25. Jon i stori olsem wanem long taim ol bikhetman i pait long “ol manmeri bilong God”? Wanem samting bai painim Satan?

²⁵ Yu ting Satan bai win long dispela taim? Nogat tru. Taim Gok bilong Magok i laik pait long lain Israel bilong spirit long taim bilong yumi, em bai lus, na em bai lus gen long dispela narapela pait long bihain! (Esekiel 38⁠:​18-​23) Jon i stori gut long ol samting i kamap, olsem: “Tasol paia bai i kam daun long heven na kukim tru ol dispela ami. Satan i bin giamanim ol, olsem na God bai i tromoi em i go daun long bikpela hul i gat hatpela paia bilong ol ston salfa. Wel animal wantaim giaman profet tupela i stap pinis long dispela hul.” (KTH 20⁠:9b-​10a) Long dispela taim Satan, em dispela snek bilong pastaim, em i no ken kalabus tasol, nogat; em bai kisim bagarap tru na pinis olgeta, olsem paia i save kukim samting na i paia olgeta.

26. Olsem wanem na dispela “bikpela hul i gat hatpela paia bilong ol ston salfa” em i no makim wanpela ples tru bilong kisim pen?

²⁶ Yumi stori pinis long dispela “bikpela hul i gat hatpela paia bilong ol ston salfa,” em i no wanpela ples tru bilong givim pen long man, nogat. (KTH 19⁠:20) Sapos Satan i go long kain ples olsem na kisim bikpela pen inap long olgeta taim bihain, orait, Jehova i mas larim em i stap laip oltaim. Tasol laip oltaim em i wanpela gutpela pe​—⁠em i no wanpela strafe. Dai em i pe, o strafe, bilong man i mekim pasin nogut​—⁠laip oltaim nogat. Na Baibel i tok, sapos man i dai em i no inap pilim pen. (Rom 6⁠:23; Saveman 9⁠:​5, 10) Na Baibel i tok, Jisas bai tromoi dai wantaim matmat i go long dispela hul i gat paia, tasol dai na matmat i no inap pilim pen!​—⁠KTH 20⁠:⁠14.

27. Samting i bin painim Sodom na Gomora, olsem wanem dispela i helpim yumi long save long dispela tok, “bikpela hul i gat hatpela paia bilong ol ston salfa”?

²⁷ Nau yumi save, dispela hul i gat paia na ston salfa em tok piksa tasol. Na dispela paia na ston salfa i kirapim yumi long tingim tu samting i bin painim taun Sodom na Gomora bilong bipo, em God i bin bagarapim, long wanem, ol lain bilong en i bin mekim pasin nogut tru na “Bikpela i salim ol hatpela ston wantaim paia i pundaun antap long taun Sodom na Gomora.” (Stat 19⁠:24) Baibel i kolim strafe em dispela tupela taun i kisim, olsem: “God i mekim save long ol long paia i stap oltaim.” (Jut 7) Tasol dispela tupela taun i no kisim pen inap oltaim, nogat. Ol i kisim bagarap tasol, na ol wantaim pasin nogut bilong ol i pinis olgeta. Long nau dispela tupela taun i no stap, na ol man i no save, dispela tupela taun i bin stap we tru.

28. Dispela hul i gat paia na salfa em i makim wanem samting? Olsem wanem na em i narapela kain long dai na matmat na hul i no gat as?

²⁸ Baibel yet i kolim insait bilong dispela tok, “bikpela hul i gat hatpela paia bilong ol ston salfa.” Baibel i tok, “Dispela bikpela hul i gat paia em i namba 2 dai.” (KTH 20⁠:14) Em i makim samting i pinis olgeta na i no inap tru long kirap bek. Baibel i tok, i gat “ki bilong Dai na bilong Ples bilong ol man i dai pinis” (em matmat) na bilong “hul i no gat as,” tasol Baibel i no tok i gat ki bilong dispela “bikpela hul i gat hatpela paia bilong ol ston salfa,” nogat. (KTH 1⁠:18; 20⁠:⁠1) Olsem na samting i go long en em i no ken kirap bek gen.​—⁠Lukim Mak 9⁠:​43-​47.

Karim Pen Inap Oltaim Oltaim

29, 30. Jon i tok wanem long Satan na wel animal na profet giaman? Yumi mas save olsem wanem long ol dispela tok?

²⁹ Jon i kolim samting bai painim Satan na wel animal na profet giaman. Jon i tok: “Na tripela bai i karim pen long san na long nait inap oltaim oltaim.” (KTH 20⁠:10b) Wanem insait bilong dispela tok? Yumi save, wel animal, na profet giaman, na dai, na matmat, ol dispela samting i tok piksa tasol na ol i no inap pilim pen. Olsem na yumi no ken ting Satan bai kisim pen inap olgeta taim bihain. Dispela tok tu em i tok piksa tasol. Satan bai pinis olgeta.

³⁰ Dispela tok “karim pen,” long tok Grik ol i kolim ba·sa·niʹzo, na insait bilong en i olsem “traim strong bilong ain samting.” Na narapela insait bilong en i olsem “givim pen long man bilong skelim em long kot.” Olsem na dispela tok i makim olsem dispela “pen” Satan bai kisim em bai stap olsem mak, na inap long olgeta taim bihain i no inap sampela man o ensel i gat tok long Jehova i stap bos o long wok bos bilong em. Bipo Satan i gat tok long dispela samting, tasol taim Satan i pinis, dispela tok tu bai pinis. Na bihain bai i no gat wanpela man inap sutim tok long Jehova long wok king bilong em na mekim inap longpela taim olsem Satan i bin mekim.​—⁠Lukim Song 92⁠:​1, 15.

31. Wanem insait bilong tupela tok Grik na dispela i helpim yumi na bai yumi ken save long strafe bai painim Satan?

³¹ Na i gat narapela tok Grik i wankain liklik, em ba·sa·ni·stesʹ, na insait bilong en i olsem “man bilong givim pen” o “man bilong kalabusim ol man.” (Matyu 18⁠:34) Olsem na Satan bai kalabus long ‘hul i gat paia,’ na em bai stap olsem inap oltaim oltaim na i no inap lusim dispela kalabus. Na Jon i save long narapela tok long Baibel Grik, em baʹsa·nos, na i makim man i kisim bikpela strafe na em i sem nogut tru na bihain em i dai. (Esekiel 32⁠:​24, 30) Nau yumi ken save, taim Satan i kisim strafe, dispela bai semim em nogut tru, na bihain em bai dai i stap inap oltaim oltaim long ‘hul i gat paia,’ olsem na nem bilong em i gat sem inap long olgeta taim bihain. Ol wok bilong em bai dai wantaim em.​—⁠1 Jon 3⁠:⁠8.

32. Wanem strafe bai painim ol spirit nogut? Yumi save olsem wanem long dispela samting?

³² Dispela ves 10 i no toktok long ol spirit nogut. Orait, olsem wanem? Taim 1,000 yia i pinis ol tu bai lusim hul i no gat as na kam antap wantaim Satan? Na olsem wanem? Bihain ol bai kisim wankain strafe olsem bilong Satan na ol bai bagarap inap long oltaim oltaim? Yes, dispela samting bai painim ol. Taim Jisas i stori long ol man i olsem sipsip na meme em i tok, ol meme bai “go long paia i no save dai, em dispela paia ol i redim pinis bilong Satan wantaim ol ensel bilong en.” (Matyu 25⁠:⁠41) Dispela tok, “paia i no save dai,” em i wankain olsem dispela “hul i gat hatpela paia bilong ol ston salfa” em Jisas bai tromoi Satan i go long en. Taim Jisas i bin rausim Satan long heven na tromoi em i kam daun long graun, Jisas i rausim ol spirit nogut tu. Na yumi ken save ol i kalabus wantaim Satan long hul i no gat as, taim Jisas i kirap long mekim wok king inap 1,000 yia. Orait, olsem tasol, taim 1,000 yia i pinis, ol spirit nogut bai bagarap olgeta wantaim Satan long dispela hul i gat paia.​—⁠Matyu 8⁠:⁠29.

33. Wanem laspela hap tok bilong Stat 3⁠:15 bai kamap tru? Nau spirit bilong Jehova i kirapim Jon long stori long wanem samting?

³³ Dispela bai truim laspela hap bilong tok profet i stap long Stat 3⁠:15. Taim Jisas i tromoi Satan i go long dispela hul i gat paia em bai i olsem snek ol i bin krungutim strong het bilong en na i dai pinis. Em wantaim ol spirit nogut bilong em i no stap moa. Kamapim Tok Hait i no toktok moa long ol. Orait, nau spirit bilong Jehova i kirapim Jon long kolim sampela samting ol man i gat bikpela tingting long i stap long graun ol i laik save long en, olsem: Taim “King bilong olgeta king” na “lain em i bin singautim ol,” ol i bosim graun, dispela bai helpim ol man olsem wanem? (KTH 17⁠:14) Orait, bilong yumi ken save long dispela samting, nau Jon i stori gen long taim dispela 1,000 yia i kirap.

[Ol Futnot]

[Piksa long pes 293]

Raunwara Detsi. Ating Sodom na Gomora i bin stap long dispela hap

[Ol Piksa long pes 294]

“Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri. Bai [em] i krungutim het bilong yu, na bai yu kaikaim lek bilong [em]”