Jehova i Mekim Samting Bilong Strongim Tok Promis Bilong Em Long Paradais

 1. Profet Aisaia i mekim wanem tok long lain Israel?

PROFET AISAIA i tok Jehova em i “God bilong tok tru.” Dispela tok ol i tanim olsem “tok tru” i makim “amen.” (Ais. 65:​16, ftn.) Mining bilong dispela tok “amen” i olsem, “dispela samting i ken kamap,” o “i tru.” Long Baibel, taim ol i yusim dispela tok “amen” bilong stori long ol tok na pasin em Jehova na Jisas i mekim, em bilong kamapim klia olsem tok bilong ol i tru. Olsem na tok Aisaia i mekim long lain Israel em i klia: Taim Jehova i tok profet long wanpela samting, oltaim em bai kamap tru na yumi ken trastim. Jehova i kamapim klia dispela samting long rot bilong truim olgeta tok promis bilong em.

 2. (a) Wai na yumi ken trastim ol tok promis bilong Jehova long ol samting bai painim yumi long bihain? (b) Yumi bai skelim wanem ol askim?

² Yu ting yumi inap trastim ol tok promis bilong Jehova long ol samting bai painim yumi long bihain? Klostu 800 yia bihain long taim bilong Aisaia, aposel Pol i stori long risen na oltaim yumi ken trastim ol tok promis bilong God. Pol i tok: “God i no inap giaman.” (Hib. 6:18) Wankain olsem wanpela mango diwai i no inap kamapim ol muli, olsem tasol Jehova i no inap tru long mekim ol tok giaman, long wanem, em i As bilong tok tru. Olsem na yumi ken trastim tru olgeta tok Jehova i mekim, dispela i makim tu olgeta tok promis bilong em long ol samting bai painim yumi long bihain. Long dispela atikol, yumi bai skelim ol dispela askim: Jehova i promis long mekim wanem long yumi long bihain? Na Jehova i mekim wanem ol tok bilong strongim yumi olsem tok promis bilong em bai kamap tru?

 3. (a) Ol wokman bilong God i laikim tru wanem tok promis? (Revelesen 21:​3, 4) (b) Sampela man i save mekim wanem taim yumi tokim ol long dispela tok promis?

³ Dispela tok promis em yumi bai skelim em tok promis ol wokman bilong God long olgeta hap bilong graun i laikim tru. (Ritim Revelesen 21:​3, 4.) Jehova i tok promis olsem taim bai kamap na “bai i no gat dai moa, na ol bai i no bel hevi moa na krai moa, na ol bai i no inap pilim pen gen.” Planti bilong yumi i ritim dispela naispela tok bilong Baibel long laip long Paradais bai olsem wanem taim yumi autim tok long ol manmeri. Sampela man i save mekim wanem taim yumi tokim ol long dispela tok promis? Ating ol bai tok, “Em naispela tok, tasol em i no inap kamap tru.”

 4. (a) Jehova i save long wanem samting bai kamap long taim bilong yumi? (b) Jehova i mekim wanpela tok promis na em i mekim wanem samting moa?

⁴ Taim Jehova i kirapim aposel Jon long raitim dispela tok promis i stori long laip long Paradais, Em i save olsem long nau yumi bai autim gutnius bilong Kingdom long ol manmeri na tokim ol long dispela tok promis. Na tu, Jehova i save pinis olsem planti man bai hatwok long bilipim dispela tok promis bilong “ol nupela samting.” (Ais. 42:9; 60:2; 2 Kor. 4:​3, 4) So hau yumi ken strongim ol narapela na yumi yet tu olsem ol blesing em Revelesen 21:​3, 4 i stori long en bai kamap tru? Jehova i kamapim dispela gutpela tok promis na em i kamapim tu ol risen na yumi ken trastim tru dispela tok promis. Em i kamapim wanem ol risen?

 5. Wanem ol ves bilong Baibel i stori long ol risen na yumi ken trastim tok promis bilong God long Paradais bai kamap?

⁵ Ol ves i kamap bihain i stori long ol risen na yumi ken trastim tok promis bilong Jehova long Paradais bai kamap. Ol dispela ves i tok: “Man i sindaun long sia king i tok: ‘Harim! Mi mekim olgeta samting i kamap nupela.’ Na em i tok moa: ‘Yu mas raitim ol dispela tok, long wanem, ol man inap bilip tru long ol dispela tok na ol dispela tok i tru olgeta.’ Na em i tokim mi: ‘Ol i kamap tru pinis! Mi Alfa na mi Omega, mi kirap bilong ol samting na mi pinis bilong ol samting.’”—Rev. 21:​5, 6a.

 6. Wai na ol tok i stap long Revelesen 21:​5, 6 i strongim yumi long trastim tru tok promis bilong God?

⁶ Wai na ol dispela tok bilong Baibel i strongim yumi long trastim tru tok promis bilong God? Buk Kamapim Tok Hait i tok long ol dispela ves olsem: “I olsem Jehova yet i raitim nem bilong em long dispela tok promis bilong em long Baibel bilong makim olsem em bai truim ol dispela gutpela tok promis na bai ol man i stap gut long em ol i ken bilip long en.”b Tok promis bilong God i stap long Revelesen 21:​3, 4. Tasol long ves 5 na 6, i olsem Jehova yet i sainim nem bilong em long dispela tok promis bilong makim olsem dispela tok promis bai kamap tru. Yumi ken skelim gut ol dispela tok Jehova i mekim bilong strongim yumi long trastim em tru.

 7. Husat i kirap long toktok long ves 5, na bilong wanem dispela em i bikpela samting?

⁷ Long ves 5, God i tok: “Man i sindaun long sia king i tok.” (Rev. 21:5a) Ol dispela tok em fes wan bilong tripela taim long Buk Revelesen we Jehova yet i kirap long toktok. Tingim dispela, Jehova yet i mekim dispela tok na i no wanpela ensel na i no Jisas husat i bin kirap bek pinis i mekim dispela tok, nogat! Ol dispela tok i ken strongim yumi long trastim tru ol tok em i mekim bihain long dispela tok. Bilong wanem yumi tok olsem? Long wanem, Jehova “i no inap giaman.” (Tai. 1:2) Dispela tok em i as na yumi ken bilip tru olsem ol tok yumi ritim long Revelesen 21:​5, 6, em bai kamap tru.

 8. Jehova i mekim wanem tok bilong kamapim klia olsem em bai truim tok promis bilong em? (Aisaia 46:10)

⁸ Nau yumi ken skelim dispela tok “Harim!” (Rev. 21:5) Tok Grik ol i tanim olsem “harim!” em ol i yusim planti taim long Buk Revelesen. Wanpela buk i tok taim ol i yusim dispela tok “em bilong kirapim rida long putim tingting long wanem tok bai kamap bihain.” God i mekim wanem tok bihain long dispela? God i tok: “Mi mekim olgeta samting i kamap nupela.” Em tru olsem Jehova i stori long ol senis bai kamap bihain, tasol long tingting bilong em dispela promis bai kamap tru, olsem na em i tok long ol dispela senis olsem ol i kamap tru pinis.—Ritim Aisaia 46:10.

 9. (a) Dispela tok “mekim olgeta samting i kamap nupela” i makim wanem tupela wok Jehova bai mekim? (b) Wanem samting bai kamap long “skai” na “graun” i stap long nau?

⁹ Yumi ken skelim narapela tok i stap long Revelesen 21:​5, olsem: “Mekim olgeta samting i kamap nupela.” Long dispela sapta bilong Baibel, dispela tok i makim tupela wok Jehova bai mekim—em bai senisim, na em bai stretim bek gen. Pastaim Jehova bai senisim wanem samting? Revelesen 21:1 i tok: “Skai bilong pastaim na graun bilong pastaim tupela i go pinis.” “Skai bilong pastaim” i makim olgeta gavman long graun em Satan na ol spirit nogut bilong em i bosim. (Mat. 4:​8, 9; 1 Jon 5:19) Long Baibel, dispela tok “graun” inap makim ol manmeri i stap long graun. (Stt. 11:1; Sng. 96:1) Olsem na dispela tok “graun bilong pastaim” i makim ol man nogut i stap long nau. Jehova bai i no inap stretim tasol dispela “skai” na “graun” i stap long nau, nogat, em bai senisim ol olgeta. Em bai senisim skai na graun i stap long nau wantaim “nupela skai na nupela graun,” em nupela gavman na ol stretpela manmeri.

10. Jehova bai mekim wanem ol samting i kamap nupela?

¹⁰ Long Revelesen 21:​5, yumi ritim tok Jehova i mekim olsem em bai mekim olgeta samting i kamap nupela. Tingim, Jehova i no tok: “Mi mekim olgeta nupela samting.” Em i tok: “Mi mekim olgeta samting i kamap nupela.” I olsem Jehova bai mekim graun na ol manmeri i kamap nupela long rot bilong mekim ol i kamap gutpela olgeta. Olsem Aisaia i bin tok profet long en, God bai mekim graun olgeta i kamap wanpela naispela ples Paradais wankain olsem gaden Iden bilong bipo. Na tu, em bai mekim yumi i kamap nupela, olsem stretim bek ol hap bilong bodi bilong yumi i bagarap na oraitim yumi olgeta. Em bai oraitim ol lek nogut, ol aipas, na ol yaupas, na em bai givim bek laip long ol manmeri i dai pinis.—Ais. 25:8; 35:​1-7.

11. Jehova i tokim Jon long mekim wanem na bilong wanem?

¹¹ God i mekim wanem tok moa bilong strongim yumi long trastim em? Jehova i tokim Jon olsem: “Yu mas raitim ol dispela tok, long wanem, ol man inap bilip tru long ol dispela tok na ol dispela tok i tru olgeta.” (Rev. 21:5) Jehova i tokim Jon long “raitim” ol dispela tok. Na em i givim tu wanpela risen. Em i tok: “Ol man inap bilip tru long ol dispela tok na ol dispela tok i tru olgeta,” dispela i makim olsem yumi ken trastim tru ol tok bilong God na ol tok bilong em i stret. Yumi amamas olsem Jon i bihainim tok bilong God long “raitim” ol dispela tok. Olsem na long nau, yumi ken ritim tok promis bilong God long Paradais bai kamap na tingim tingim long bel ol gutpela blesing yumi bai kisim long bihain.

12. Wai na i stret long Jehova i tok: “Ol i kamap tru pinis!”

¹² God i mekim wanem tok bihain? Em i tok: “Ol i kamap tru pinis!” (Rev. 21:6) Long hia, Jehova i mekim tok long pasin i soim olsem olgeta tok promis em i mekim long Paradais, ol i kamap tru pinis. Na i stret long em i tok olsem bikos i no gat wanpela samting inap pasim em long mekim ol samting em i tingting pinis long mekim. Jehova i mekim narapela tok bilong strongim yumi olsem tok promis bilong em bai kamap tru. Em i mekim wanem tok?

13. Wai na Jehova i mekim dispela tok: “Mi Alfa na mi Omega”?

¹³ Olsem yumi stori pinis, inap 3-pela taim Jehova i toktok long Jon long rot bilong ol visen. (Rev. 1:8; 21:​5, 6; 22:13) Long olgeta dispela taim, Jehova i mekim wankain tok olsem: “Mi Alfa na mi Omega.” Alfa em fes leta na omega em laspela leta long alfabet bilong ol Grik. Taim Jehova i tok “mi Alfa na mi Omega,” em i helpim yumi long save tru olsem taim em i kirapim wanpela wok, em bai mekim inap long em i pinisim gut dispela wok.

14. (a) Wanem taim i olsem Jehova i bin tok “Alfa” na bihain em bai tok “Omega”? (b) Olsem wanem tok i stap long Stat 2:​1-3 i ken strongim yumi?

¹⁴ Bihain long Jehova i wokim Adam na Iv, em i tokaut long samting em i tingting pinis long mekim long ol manmeri na long graun. Baibel i tok: “God i blesim ol, na God i tokim ol: ‘Kamapim ol pikinini na kamap planti na go sindaun long olgeta hap bilong graun na bosim olgeta samting i stap long en.’” (Stt. 1:28) Long dispela taim Jehova i tokaut long samting em i tingting pinis long mekim long graun na long ol manmeri, na dispela em i kirap bilong en, i olsem em i tok “Alfa.” Taim em i inapim ol samting em i tingting pinis long mekim na ol tumbuna pikinini bilong Adam na Iv em ol i daun long God ol i go sindaun long olgeta hap bilong graun na mekim i kamap Paradais, dispela em pinis bilong en, na i olsem em bai tok “Omega.” Bihain long em i pinis long wokim “ples antap na graun na olgeta samting i stap long ol,” Jehova i mekim wanpela tok bilong soim klia olsem em bai mekim samting em i tingting pinis long mekim. Dispela tok i stap long Stat 2:​1-3. (Ritim.) Jehova i makim de namba 7 olsem de holi bilong em yet. Dispela i makim wanem samting? Dispela i makim olsem Jehova bai mekim samting em i tingting pinis long mekim long ol manmeri na long graun. Em bai pinisim olgeta dispela wok long de namba 7.

15. Wai na Satan inap ting olsem em inap pasim Jehova long mekim samting Em i tingting pinis long mekim long ol manmeri?

¹⁵ Bihain long Adam na Iv i bikhet, ol i kamap sinman na long dispela rot ol tumbuna pikinini bilong ol i kisim sin na dai. (Rom 5:12) Dispela inap mekim na Satan i ting olsem em i bagarapim samting God i tingting pinis long mekim, em long pulapim graun long ol man i gutpela olgeta em ol i daun long God. Satan i ting olsem long dispela rot em i pasim Jehova long mekim dispela tok “Omega.” Em inap ting olsem i no gat planti rot moa i stap bilong Jehova i ken truim dispela tok promis bilong em. Ating em i ting wanpela rot tasol i stap em long God i kilim i dai Adam na Iv na wokim tupela nupela man na meri marit na bai em i ken inapim samting em i tingting pinis long mekim long ol manmeri. Tasol sapos God i bin mekim olsem, orait Satan bai sutim tok long em olsem em i Man bilong giaman. Bilong wanem? Long wanem, long Stat 1:​28, Jehova i bin tokim Adam na Iv olsem ol pikinini bilong ol bai i go sindaun long olgeta hap bilong graun.

16. Wai na Satan inap ting olsem Jehova i no inap mekim samting em i tok promis long mekim?

¹⁶ Satan inap ting olsem i gat wanem narapela rot i stap em God i ken yusim? Ating em i ting olsem Jehova bai larim Adam na Iv i kamapim ol pikinini i gat sin em ol bai no gat rot long kamap gutpela olgeta. (Ekl. 7:20; Rom 3:23) Sapos ol samting i kamap olsem, orait Satan bai sutim tok long Jehova olsem em i no truim samting em i bin tok promis long mekim. Bilong wanem? Long wanem, sapos God i bihainim dispela rot, orait em i no inap mekim samting em i tingting pinis long mekim, em long pulapim Paradais long graun wantaim ol tumbuna pikinini bilong Adam na Iv em ol i gutpela olgeta na ol i daun long God.

17. Taim Satan na Adam na Iv i bikhet long Jehova, Em i mekim wanem bilong stretim dispela hevi, na wanem samting bai kamap bihain? (Lukim tu piksa.)

¹⁷ Taim Satan na Adam na Iv i bikhet long Jehova, Em i stretim dispela hevi long rot em Satan i no ting long en. (Sng. 92:5) Jehova i larim Adam na Iv i kamapim ol pikinini, na long dispela rot em i truim tok bilong em olsem em i God bilong mekim tok tru na em i no save giaman. Na tu, Jehova i kamapim klia olsem taim em i tok long mekim wanpela samting, i no gat wanpela man o wanpela samting inap pasim em long mekim olsem. Em i kamapim klia olsem em i wok long inapim samting em i tingting pinis long mekim long rot bilong givim wanpela “pikinini” husat bai kisim bek ol tumbuna pikinini bilong Adam na Iv em ol i daun long God. (Stt. 3:15; 22:18) Ating Satan i kirap nogut olsem Jehova i givim Pikinini bilong em yet olsem pe bilong baim bek ol manmeri! Bilong wanem? Bikos God i laikim yumi na em i stretim rot bilong mekim olsem. (Mat. 20:28; Jon 3:16) Satan i no gat dispela pasin laikim, em i save tingim em yet tasol. So pe bilong baim bek man bai kamapim wanem samting? Long pinis bilong Wan Tausen Yia, ol tumbuna pikinini bilong Adam na Iv em ol i gutpela olgeta na ol i daun long Jehova, ol bai stap long Paradais long graun, em samting Jehova i bin tingting pinis long mekim long bipo yet. Long dispela taim, i olsem Jehova bai tok, “Omega.”

18. God i mekim wanem 3-pela tok bilong strongim yumi? (Lukim blok “Tripela Risen Bilong Trastim Tok Promis Bilong Jehova.”)

¹⁸ Long ol tok yumi skelim pinis, yumi ken mekim wanem tok long ol man i gat tupela tingting long tok promis bilong God long Paradais bai kamap tru o nogat? Namba 1, Jehova yet i mekim dispela tok promis. Buk Revelesen i tok: “Man i sindaun long sia king i tok: ‘Harim! Mi mekim olgeta samting i kamap nupela.’” Em i gat savetingting na bikpela strong na em i laik truim dispela tok promis bilong em. Namba 2, Jehova bai truim dispela tok promis bilong em, olsem na long tingting bilong em i olsem dispela samting i kamap pinis. So i stret long em i tok: “Ol man inap bilip tru long ol dispela tok na ol dispela tok i tru olgeta. . . . Ol i kamap tru pinis!” Namba 3, taim Jehova i kirapim wanpela wok, em bai mekim inap long em i pinisim gut dispela wok, olsem na em i tok: “Mi Alfa na mi Omega.” Jehova bai kamapim klia olsem Satan em i man bilong giaman na em i no save mekim gut ol samting.

19. Taim ol manmeri i gat tupela tingting long tok promis bilong God long Paradais bai kamap tru o nogat, yu ken mekim wanem?

¹⁹ Tingim dispela, long olgeta taim yu autim tok na yu tokim ol manmeri long tok promis bilong God, yu wok long strongim pasin bilong yu yet long trastim ol tok promis bilong Jehova. Olsem na taim yu ritim dispela gutpela tok promis long Paradais bai kamap olsem Revelesen 21:4 i stori long en, na sapos wanpela i tok, “Em naispela tok, tasol em i no inap kamap tru,” orait yu ken mekim wanem? Yu ken ritim ves 5 na 6 long ol na stori long mining bilong ol tok i stap long ol dispela ves. Yu ken helpim ol long luksave olsem Jehova bai truim dispela tok promis bilong em, long wanem, i olsem em yet i bin sainim nem bilong em long dispela tok promis.—Ais. 65:16.