Wara i Wok Long Kamap Bilong Givim Laip Oltaim
“Sapos wanpela man i dring long dispela wara mi laik givim em, i no gat wanpela taim nek bilong en bai i drai gen. Nogat. Dispela wara mi laik givim em, em bai i kamap olsem hul wara insait long em. Na dispela wara bai i kamap kamap oltaim na givim em laip i stap gut oltaim oltaim.”—JON 4:14.
‘WANTU tasol, long baksait bilong mun, wanpela naispela blupela na waitpela samting i lait i kam antap, na em i olsem naispela bis i lait moa na i sindaun long blakpela samting.’—Edgar Mitchell, man bilong raun long roket, i stori olsem long graun taim em i stap long ples antap na lukim graun.
Wanem samting i givim graun bilong yumi dispela naispela kala na i kirapim dispela man bilong raun long roket long mekim dispela gutpela tok i stap antap? Em wara i save karamapim klostu 75 pesen bilong graun bilong yumi. Wara i mekim graun bilong yumi i luk naispela tru, na tu, wara i helpim ol samting bilong graun long i stap laip. Inap 65 pesen bilong bodi bilong man em wara tasol. Olsem na buk Encyclopædia Britannica i tok long wara olsem: “Em i bikpela samting long laip, na i insait long olgeta wok i kamap insait long ol diwai, plaua samting na ol animal.”
Long olgeta taim wara i save klinim em yet, olsem na i no gat wok long nupela wara i mas kamap. Buk The World Book Encyclopedia i tok: “Klostu olgeta wara yumi save yusim i save go long solwara. San i save hatim solwara na pulim wara i go antap. Na bihain wara i kam daun gen long rot bilong ren. Long olgeta taim yumi save yusim gen wankain wara. Em i no save pinis.” Inap 3,000 yia i go pinis, Baibel i stori long dispela narapela kain wok bilong wara olsem: “Olgeta wara i save ran i go daun long solwara, tasol solwara i no pulap yet. Bihain, wara i save go bek long het bilong ol wara, na i ran i go daun gen.” Man! Wara i gutpela samting tru God i bin wokim, a?—Saveman 1:7.
Wara i bikpela samting long laip na i kamap long gutpela rot tru, olsem na yumi no ken kirap nogut olsem Baibel i stori long wara winim 700 taim. Planti taim Baibel i stori long gutpela wok bilong wara—olsem strong bilong wara long klinim ol samting na helpim ol samting long i stap laip—bilong stori olsem wanem Baibel i ken helpim yumi long kamap klin long ol samting bilong lotu na long pas gut wantaim Jehova.—Aisaia 58:11; Jon 4:14.
Strong Bilong Baibel Long Mekim Man i Kamap Klin
Ol Israel i save waswas long wara long olgeta taim, olsem na ol i klin tru long skin. Em kastam bilong ol long wasim lek taim ol i go insait long haus bilong kaikai. (Luk 7:44) Ol i mekim ol samting bambai skin na ol samting bilong ol i klin, na tu, ol Israel i mekim wok long wara bilong i stap klin long ol samting bilong lotu. Long olgeta taim ol pris long haus lotu sel i mas wasim ol yet na klos bilong ol. (Kisim Bek 30:18-21) Bihain, long tempel long Jerusalem, Solomon i wokim wanpela “bikpela tang wara” long bras. Ol i save putim 40,000 lita wara long en, em wara inap bilong mekim ol samting i kamap klin olsem Lo Bilong God i tok. (2 Stori 4:2, 6) Dispela pasin bilong mekim wok long wara i makim wanem samting long ol Kristen long nau?
Aposel Pol i tok Jisas i bin mekim kongrigesen Kristen i kamap klin “long wara na long tok bilong en.” Olsem wara inap klinim skin, tok tru bilong Baibel i gat strong long mekim man i kamap klin long ol pasin na ol samting bilong lotu. Dispela wok bilong mekim ol samting i kamap klin i mekim na ol disaipel bilong Krais “i stap holi na i no gat asua.” (Efesus 5:25-27) Olsem na olgeta man i laik God i orait long ol, ol i mas mekim ol samting na pasin na wok bilong lotu bilong ol “i stap klin long ai bilong God na [ol] i no gat asua long wanpela samting.” (2 Pita 3:11, 14) Olsem wanem Tok Bilong God i helpim ol long mekim olsem?
Ol man i laik bai God Jehova i amamas long ol, ol i wok long kisim wara bilong spirit, olsem ol i kisim save long rot bilong stadi oltaim long Baibel. Taim save ol i kisim i strongim tingting na bel bilong ol, dispela i save givim strongpela laik long ol long mekim ol samting em Baibel i tokim ol long mekim: “Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.”—Rom 12:2.
Stretpela save ol dispela man i kisim long laik bilong God i helpim ol long save long ol samting i doti long pasin na tingting bilong ol. Taim ol i bihainim ol stiatok bilong Baibel long i stap bilong ol inap sampela hap taim, Tok Bilong God, olsem wara, bai helpim ol long “wasim” na rausim ol bikpela rong tu.—1 Korin 6:9-11.
Dispela samting i kamap long wanpela yangpela man long Spen. Nem bilong em Alfonso, na em i tok: “Taim mi gat 18 krismas, mi no amamas long laip bilong mi.” Em i kalabus long drak na i strong long mekim pasin raskol. Em i tok: “Mi pilim olsem mi doti, long wanem, mi mekim nogut long bodi bilong mi yet na long ol narapela man.
“Long skul, mi lukim wanpela yangpela meri i gat wankain krismas olsem mi na em i luk klin long skin na i olsem em i no save liklik long pasin nogut, na dispela i mekim em i narapela kain long ol narapela sumatin. Pasin bilong em i kirapim laik bilong mi long bihainim klinpela pasin olsem em. Em i tokim mi long go long ol miting bilong ol Witnes Bilong Jehova. I no longtaim na mi kirap stadi long Baibel na wok long pas gut wantaim God. Insait long wanpela yia, mi stretim laip bilong mi na kamap wanpela Witnes i baptais pinis. Dispela bikpela senis i mekim na planti papamama long hap bilong mi ol i kam askim mi long helpim ol pikinini bilong ol em ol i kalabus long drak.”
Wara i Givim Laip Oltaim
Wanpela taim Jisas i bin toktok long “wara i gat laip” long wanpela meri Samaria husat i kisim wara long hul wara bilong Jekop. Em i tok: “Sapos wanpela man i dring long dispela wara mi laik givim em, i no gat wanpela taim nek bilong en bai i drai gen. Nogat. Dispela wara mi laik givim em, em bai i kamap olsem hul wara insait long em. Na dispela wara bai i kamap kamap oltaim na givim em laip i stap gut oltaim oltaim.” (Jon 4:10, 14) Tok bilong Jisas long “wara i gat laip” i makim ol samting God i bin givim long ol man bilong ol i ken kisim laip, olsem Baibel i kamapim. Ol dispela samting inap mekim na ol man i ken kisim laip oltaim. Wanpela bikpela samting bilong dispela “wara” em ofa bilong Krais Jisas bilong baim bek ol man. Jisas i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”—Jon 3:16.
Alfonso, em pastaim yumi stori long em, em i pilim tru dispela “wara i gat laip” i kam long God. Em i stori long ol man i bin wok yet long mekim pasin raskol na kisim drak, olsem: “Brata bilong mi i dai pinis, na olgeta narapela poroman bilong mi long bipo ol tu i dai. Save mi kisim long Tok Bilong God i bin helpim mi long abrusim dai. Jehova i givim mi planti samting bilong helpim mi long stap strong long bilip na long dispela as tasol mi stap laip.” Na bikpela samting moa, long ol samting Alfonso i bin lain long Tok Bilong God, em inap wetim gutpela laip i no gat pinis bilong en long nupela taim God i bin tok promis long en.—2 Pita 3:13.
Singaut i Go Long Olgeta Man
Long laspela buk bilong Baibel, yumi inap ritim tok long “wanpela bikpela wara, em wara bilong givim laip, na em i lait tumas olsem glas. Dispela wara i kamap long sia king bilong God wantaim Pikinini Sipsip, na i ran i go.” (KTH 22:1) Dispela wara i makim ol samting God i bin givim bilong helpim ol man long kisim bek nambawan gutpela laip em Adam na Iv i gat long taim God i wokim ol long bipo yet.
Taim Baibel i stori pinis long dispela wara, em i kamapim singaut olsem: “Wanem man nek bilong en i drai, em i mas kam. Man i laik dring, em i mas kam na kisim wara bilong givim laip, em i olsem presen bilong God.” (KTH 22:17) Long nau, dispela singaut i go long olgeta hap bilong graun. Long olgeta yia, long 235 kantri ol Witnes Bilong Jehova i lusim olsem wan bilion aua bilong helpim ol man long kisim save bilong Baibel i givim laip long man.
Olsem wanem? Yu laik kisim dispela wara i gat laip? Taim yu kisim dispela klinpela wara, olsem taim yu lain na mekim wok long ol samting Man Bilong Wokim yumi i bin givim long yumi, yu tu inap i stap namel long ol man “i bungim planti samting bilong helpim ol bihain, na ol bai i kisim dispela laip em i laip tru.”—1 Timoti 6:19.
[Rait long pes 14]
Olsem wara i save klinim skin, tok i tru bilong Baibel i gat strong long mekim man i kamap klin long pasin na lotu
[Box/Pictures on page 15]
WARA LONG BIPO TRU
Long taim bilong raitim Baibel, ol man i bin mekim bikpela wok tru bilong painim wara. Abraham na Aisak i bin wokim ol hul wara klostu long Berseba bambai ol i gat wara long famili na ol animal bilong ol.—Stat 21:30, 31; 26:18.
Ol hul wara i no go daun tumas, ol i save drai long taim bilong bikpela san. Bilong hul wara i gat wara long olgeta taim, ol i mas digim hul i go daun tru. (Sindaun 20:5) Wanpela hul wara long Lakis i go daun inap 44 mita. Narapela hul wara i stap long Gibeon, i go daun winim 25 mita na braitpela bilong en inap 11 mita. Bilong wokim dispela hul wara ol i mas rausim olsem 3,000 ton ston. Meri Samaria i kam kisim wara long hul wara bilong Jekop i tokim Jisas: “Hul wara em i daun moa.” Ating wara long dispela hul i stap insait long graun inap 23 mita.—Jon 4:11.
Ol tenk i narapela rot bilong kisim wara long Midel Is bilong bipo. Ol dispela tenk i stap insait long graun i bungim wara bilong ren i bin kam daun long Oktoba i go long Epril. Ol i digim ol baret long sait bilong maunten bilong stiaim wara i go insait long ol tenk. Ol Israel i bin katim ol bikpela tenk bilong bungim wara.—2 Stori 26:10.
Pasin bilong kisim wara long ol hul wara na ol tenk i bikpela hatwok long bipo, na long nau tu. Ol meri olsem Rebeka na ol pikinini meri bilong Jetro, ol i bin mekim bikpela wok taim ol i kisim wara bilong famili na ol animal bilong ol long olgeta de.—Stat 24:15-20; Kisim Bek 2:16.
[Piksa long pes 15]
Alfonso long nau, em i autim Tok Bilong God