Ol Pris i Mekim Wok King Bilong Helpim Olgeta Manmeri
“Yupela i ‘wanpela lain God i makim, yupela ol pris i mekim wok king, yupela wanpela lain holi, yupela ol manmeri bilong God stret.’”—1 PITA 2:9.
1. Bilong wanem ol i kolim “kaikai bilong Bikpela,” olsem Memorial? Wanem as bilong dispela bung?
LONG apinun bilong Nisan 14, 33 C.E., Jisas Krais na 12-pela aposel bilong em i bung laspela taim bilong tingim Pasova bilong ol Juda. Bihain, Jisas i tokim Judas Iskariot, man husat bai putim Jisas long han bilong ol birua, long i go. Na nau em i kirapim wanpela nupela bung. Bihain ol i kolim dispela bung olsem “kaikai bilong Bikpela.” (1 Kor. 11:20) Inap 2-pela taim Jisas i tok: “Yupela i mas mekim olsem yet bilong tingim mi.” Narapela nem bilong dispela bung em Memorial. Dispela em wanpela spesel bung taim yumi tingim samting Krais i bin mekim, moa yet olsem em i dai bilong helpim yumi. (1 Kor. 11:24, 25) Ol Witnes Bilong Jehova long olgeta hap bilong graun i bihainim dispela tok na ol i save mekim Memorial long olgeta yia. Long kalenda bilong Baibel, Nisan 14 bai kamap long Fonde, Epril 5, 2012, long taim san i go daun.
2. Jisas i tok wanem long bret na wain?
2 Disaipel Luk i stori long ol samting Jisas i bin mekim na tok long en long dispela bung, olsem: “Em i kisim wanpela bret na tok tenkyu long God, na em i brukim na givim long ol na tok: ‘Dispela i makim bodi bilong mi em mi bai givim bilong helpim yupela. Yupela i mas mekim olsem yet bilong tingim mi.’ Taim ol i kisim pinis kaikai bilong apinun, em i mekim wankain samting long kap na tok: ‘Dispela kap i makim nupela kontrak mi mekim long rot bilong blut bilong mi. Dispela blut bai kapsait bilong helpim yupela.’” (Luk 22:19, 20) Ol aposel i gat wanem tingting long dispela tok?
3. Ol aposel i gat wanem tingting long tok bilong Jisas long bret na wain?
3 Ol aposel i save pinis long wok bilong ol pris long ofaim ol animal olsem sakrifais long God long tempel long Jerusalem. Ol i mekim ol dispela sakrifais bambai Jehova i ken orait long ol, na planti ol dispela sakrifais i bilong tekewe sin. (Wkp. 1:4; 22:17-29) Olsem na taim Jisas i tok olsem em bai givim bodi na kapsaitim blut bilong em bilong helpim ol, ol aposel i kliagut olsem em bai givim laip bilong em i gutpela olgeta olsem sakrifais. Dispela sakrifais bai winim tru sakrifais bilong ol animal.
4. Jisas i tingting long wanem samting taim em i tok: “Dispela kap i makim nupela kontrak mi mekim long rot bilong blut bilong mi”?
4 Jisas i tingting long wanem samting taim em i tok: “Dispela kap i makim nupela kontrak mi mekim long rot bilong blut bilong mi”? Ol aposel i save pinis long tok profet Jeremaia i mekim long dispela nupela kontrak. (Ritim Jeremaia 31:31-33.) Tok bilong Jisas i soim olsem em i laik kamapim dispela nupela kontrak. Dispela nupela kontrak bai kisim ples bilong kontrak bilong Lo em Jehova i bin mekim wantaim lain Israel long rot bilong Moses. Olsem wanem? Yu ting dispela tupela kontrak i mekim wankain samting?
5. Kontrak bilong Lo i opim wanem ol rot long lain Israel?
5 Yes, wok bilong dispela tupela kontrak i klostu wankain. Taim Jehova i tokaut long kontrak bilong Lo long ol Israel, em i tok: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. Olgeta graun na olgeta manmeri i bilong mi, tasol mi bai makim yupela i stap lain manmeri bilong mi stret. Na bai yupela i stap lain manmeri i save mekim wok bilong mi olsem [“ol king na ol pris,” NW]. Na bai yupela i stap ol manmeri tru bilong mi.” (Kis. 19:5, 6) Lain Israel i gat wanem tingting long dispela tok?
PROMIS BILONG KAMAPIM “OL PRIS I MEKIM WOK KING”
6. Long rot bilong kontrak, Jehova inap truim wanem promis?
6 Ol Israel i kliagut long “kontrak” i makim wanem samting, long wanem, bipo Jehova i bin mekim ol kontrak wantaim Noa na Abraham. (Stt. 6:18; 9:8-17; 15:18; 17:1-9) Long kontrak Jehova i bin mekim wantaim Abraham, em i bin tok promis olsem: “Olgeta lain pipel long graun bai ol i askim mi long givim blesing long ol na mekim gut long ol olsem mi mekim gut long ol lain tumbuna pikinini bilong yu.” (Stt. 22:18) Jehova i kamapim kontrak bilong Lo, na long dispela rot em inap truim dispela promis. Long rot bilong dispela kontrak, ol Israel inap kamap ‘lain manmeri stret’ bilong Jehova. I gat wanem as na ol Israel i kamap lain manmeri bilong Jehova? Long wanem, ol bai stap olsem ‘lain manmeri i mekim wok bilong God olsem [“ol king na ol pris,” NW].’
7. Taim Baibel i tok ol bai mekim wok olsem ol king na ol pris, dispela i makim wanem samting?
7 Ol Israel i kliagut long wok bilong ol king na ol pris. Tasol i gat wanpela man tasol long bipo husat i bin holim wok king na pris long wankain taim, na Jehova i orait long en. Em Melkisedek. (Stt. 14:18) Long rot bilong kontrak bilong Lo, Jehova i opim rot bilong lain Israel long kamapim ol man em God inap makim ol bilong ‘mekim wok bilong em olsem [“ol king na ol pris,” NW].’ Bihain, Baibel i tok ol dispela lain God i bin makim, ol bai kamap “ol pris i mekim wok king.”—1 Pita 2:9.
8. Ol pris God i makim i save mekim wanem?
8 King i save mekim wok bilong bosim ol man. Orait wanem wok bilong pris? Hibru 5:1 i tok: “Olgeta hetpris God i kisim namel long ol man, em i makim ol long mekim wok bilong em long helpim ol man. Wok bilong hetpris em bilong givim ol presen na ol sakrifais bilong karamapim ol sin.” Pris em Jehova i makim i save stap olsem mausman bilong ol manmeri long ai bilong God. Em i save beten askim Jehova long lusim sin bilong ol manmeri long rot bilong mekim ol sakrifais long Jehova. Na tu, pris i save stap olsem mausman bilong Jehova long ai bilong ol manmeri taim em i skulim ol long ol lo bilong God. (Wkp. 10:8-11; Mal. 2:7) Long ol dispela rot, pris i helpim ol manmeri i gat sin long kamap wanbel gen wantaim God.
9. (a) Ol Israel i mas mekim wanem na bai ol inap mekim wok olsem ol king na ol pris? (b) Bilong wanem Jehova i makim sampela pris namel long ol lain Israel? (c) Bilong wanem ol Israel i no inap mekim wok olsem ol king na ol pris aninit long kontrak bilong Lo?
9 Kontrak bilong Lo i opim rot long ol Israel long kamap ol king na pris bilong helpim “olgeta manmeri.” Tasol i gat wanpela samting ol Israel i mas mekim bilong kisim dispela gutpela wok. God i tok: “Yupela i [mas] holim strong kontrak bilong mi na bihainim tok bilong mi.” Yu ting ol inap “bihainim tok” bilong Jehova? Yes, ol inap mekim, tasol ol i no inap bihainim stret olgeta lo. (Rom 3:19, 20) Em long dispela as tasol na Jehova i makim sampela man namel long ol Israel long mekim wok olsem ol pris. Ol dispela pris i no mekim wok olsem ol king, nogat. Ol i kilim ol animal olsem sakrifais bilong tekewe sin bilong ol manmeri. (Wkp. 4:1–6:7) Na sin bilong ol pris tu i insait long dispela. (Hib. 5:1-3; 8:3) Jehova i orait long ol dispela sakrifais, tasol ol dispela sakrifais i no inap long pinisim tru sin bilong ol Israel. Ol pris aninit long kontrak bilong Lo i no inap mekim ol Israel i kamap wanbel tru wantaim God, maski ol i gat gutpela bel. Olsem aposel Pol i tok: “Blut bilong ol bulmakau na meme i no inap tekewe ol sin.” (Hib. 10:1-4) Ol Israel i no bin bihainim olgeta tok bilong Lo, olsem na ol i stap long mak bilong bagarap. (Gal. 3:10) Long dispela as, ol i no inap kamap ol pris i mekim wok king bilong helpim olgeta manmeri.
10. Wanem wok bilong kontrak bilong Lo?
10 Tasol dispela i no makim olsem ol Israel bai i no insait moa long lain i ‘mekim wok olsem [“ol king na ol pris,” NW]’ olsem Jehova i bin promis, nogat. Sapos ol i givim bel tru long bihainim tok bilong Jehova, orait ol inap insait long dispela wok, tasol i no long taim ol i stap aninit yet long Lo. Bilong wanem? (Ritim Galesia 3:19-25.) Bilong kliagut long dispela samting, yumi mas save long wok bilong kontrak bilong Lo. Lo i lukautim ol gutpela Israel na bai lotu giaman i no ken paulim ol. Na tu, Lo i helpim ol long save olsem ol i sinman na i mas i gat wanpela sakrifais bilong helpim ol we i winim sakrifais em hetpris i mekim. Lo i olsem “waspapa” i redim ol long bilip long Krais, o Mesaia. Mining bilong dispela tupela nem em “Man God i Makim.” Tasol taim Mesaia i kam, em bai kamapim wanpela nupela kontrak em Jeremaia i bin tok profet long en. Ol lain husat i bilip long Krais, ol bai kam insait long nupela kontrak na ‘mekim wok olsem [“ol king na ol pris,” NW].’ Orait nau yumi ken skelim olsem wanem dispela i kamap.
OL LAIN INSAIT LONG NUPELA KONTRAK I KAMAP OL PRIS I MEKIM WOK KING
11. Olsem wanem Jisas i kamap namba wan man bilong dispela lain pris i mekim wok king?
11 Long 29 C.E., Jisas bilong Nasaret i kamap Mesaia. Em i gat olsem 30 krismas taim em i kisim baptais. Baptais bilong em i makim olsem em i redi long mekim samting Jehova i laik bai em i mas mekim. Long dispela taim, Jehova i bin tok long em olsem: “Dispela em i Pikinini bilong mi, mi laikim em tumas.” Na Jehova i no kapsaitim wel bilong makim em, nogat, Jehova i makim em long holi spirit. (Mat. 3:13-17; Apo. 10:38) God i makim Jisas bambai em inap kamap Hetpris na em bai stap King long bihain bilong helpim olgeta manmeri husat i bilip long em. (Hib. 1:8, 9; 5:5, 6) Na Jisas bai opim rot long ol narapela long insait long dispela lain pris i mekim wok king.
12. Sakrifais bilong Jisas i opim rot long wanem samting?
12 Olsem Hetpris, Jisas inap givim wanem sakrifais we inap tekewe tru sin bilong ol man husat i bilip long em? Tok Jisas i mekim long taim em i kirapim Memorial bilong tingim indai bilong em i helpim yumi long kliagut olsem em bai givim laip bilong em i gutpela olgeta olsem sakrifais. (Ritim Hibru 9:11, 12.) Bihain long God i makim Jisas long kamap Hetpris, Jisas i larim ol hevi i kamap long em bilong skulim em i go inap long em i dai. (Hib. 4:15; 5:7-10) Bihain long Jisas i kirap bek, em i go long heven na i givim pe bilong sakrifais bilong em long Jehova. (Hib. 9:24) Kirap long dispela taim na i kam, Jisas inap “beten” askim Jehova long helpim ol man husat i bilip long sakrifais bilong em. Em inap helpim ol long mekim wok bilong God na ol inap bilip na wet long kisim laip oltaim. (Hib. 7:25) Na tu, sakrifais bilong em i strongim nupela kontrak.—Hib. 8:6; 9:15.
13. Wanem samting bai painim ol man husat i insait long nupela kontrak?
13 Ol lain insait long nupela kontrak, God bai makim ol tu long holi spirit. (2 Kor. 1:21) Ol Juda i stap gut long God na ol man bilong ol arapela lain, ol tu bai insait long nupela kontrak. (Efe. 3:5, 6) Wanem samting bai painim ol man husat i insait long nupela kontrak? God bai lusim sin bilong ol. Jehova i bin tok promis olsem: “Bai mi lusim sin bilong ol na mi no ken tingim moa.” (Jer. 31:34) Taim Jehova i lusim pinis sin bilong ol, orait nau ol inap ‘mekim wok olsem [“ol king na ol pris,” NW].’ Pita i tokim ol Kristen God i bin makim: “Yupela i ‘wanpela lain God i makim, yupela ol pris i mekim wok king, yupela wanpela lain holi, yupela ol manmeri bilong God stret. Na yupela i ken tokaut long olgeta hap long ol gutpela pasin’ bilong dispela man i bin singautim yupela long lusim tudak na kam insait long gutpela lait bilong em.” (1 Pita 2:9) Aposel Pita i kolim tok em Jehova i bin mekim taim Em i givim Lo long lain Israel. Pita i kolim gen ol dispela tok we i stret long ol Kristen husat i insait long nupela kontrak.—Kis. 19:5, 6.
OL PRIS I MEKIM WOK KING BILONG HELPIM OL MANMERI
14. Ol dispela lain pris bai mekim wok king we?
14 Ol lain insait long nupela kontrak bai mekim wok we? Ol bai mekim wok hia long graun. Ol i wok olsem wanpela lain pris. Ol i stap olsem mausman bilong Jehova long rot bilong autim tok long “ol gutpela pasin” bilong em na givim tok bilong em long ol manmeri. (Mat. 24:45; 1 Pita 2:4, 5) Na bihain long taim ol i dai na kirap bek, ol inap tru long mekim wok bilong king na pris wantaim Krais long heven. (Luk 22:29; 1 Pita 1:3-5; Rev. 1:6) Long wanpela visen, aposel Jon i lukim planti ensel i stap klostu long sia king bilong Jehova long heven. Ol i wok long singim wanpela “nupela song” long “Pikinini Sipsip.” Ol i singsing olsem: “Long blut bilong yu, yu bin baim bek ol manmeri bilong givim long God. Yu bin baim bek ol manmeri long olgeta lain na olgeta tokples na olgeta lain pipol na olgeta kantri. Na yu bin mekim ol i kamap king na ol pris bilong God bilong mipela. Na ol bai stap king na bosim graun.” (Rev. 5:8-10) Long narapela visen, Jon i tok long ol dispela king olsem: “Ol bai stap pris bilong God na bilong Krais, na ol bai mekim wok king wantaim em inap 1,000 yia.” (Rev. 20:6) Ol dispela king, wantaim Krais, olgeta i insait long dispela lain pris i mekim wok king bilong helpim ol manmeri.
15, 16. Ol pris i mekim wok king bai helpim ol manmeri long wanem ol rot?
15 Olsem wanem wok bilong lain 144,000 bai helpim ol manmeri hia long graun? Revelesen sapta 21 i tok ol dispela pris i olsem taun bilong heven, em Nupela Jerusalem, na ol i gat nem olsem “meri bilong Pikinini Sipsip.” (Rev. 21:9) Ves 2 i go 4 i tok: “Na mi lukim taun holi, em Nupela Jerusalem. Em i stap wantaim God na i lusim heven na i kam daun. Em i bilas olsem meri i laik marit na em i redi long bungim man em bai maritim. Na mi harim wanpela nek i kamap long sia king na i singaut strong olsem: ‘Harim! Haus sel bilong God i stap wantaim ol manmeri, na God bai i stap wantaim ol, na ol bai i stap ol lain manmeri bilong em. Na God yet bai i stap wantaim ol. Na em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.’” Em ol gutpela blesing stret! Bai i no gat moa aiwara, bel hevi, pen, o krai sore, long wanem, dai i pinis olgeta. Long dispela taim ol manmeri bai kamap gutpela olgeta na ol bai stap wanbel tru wantaim God.
16 Revelesen 22:1, 2, i stori moa long ol blesing we bai kam long rot bilong dispela lain pris i mekim wok king. Em i tok: “Ensel i soim mi wanpela wara, em wara bilong laip, em i lait na i klia tru. Dispela wara i lusim sia king bilong God na bilong Pikinini Sipsip na i ron i go namel long bikrot bilong taun. Na long sait sait bilong dispela wara ol diwai bilong laip i stap. Ol i save karim kaikai 12-pela taim long olgeta yia, na ol i karim long olgeta wan wan mun. Na ol lip bilong ol diwai em bilong oraitim sik bilong olgeta lain pipol.” Dispela visen i soim long yumi olsem wanem “olgeta lain pipol” bai i no gat moa sin em ol i bin kisim long Adam. Tru tumas, ol samting bilong bipo bai pinis olgeta.
OL PRIS I MEKIM WOK KING I INAPIM GUT WOK BILONG OL
17. Long pinis bilong 1,000 yia, ol pris i mekim wok king bai inapim gut wanem wok?
17 Ol pris i mekim wok king bai wok long helpim ol manmeri, na long pinis bilong 1,000 yia, bai olgeta manmeri i kamap gutpela olgeta. Jisas Krais, em Hetpris na King, bai givim long Jehova ol manmeri i gutpela olgeta. (Ritim 1 Korin 15:22-26.) Orait long dispela taim, ol pris i mekim wok king, ol i inapim gut wok bilong ol.
18. Bihain long lain pris i inapim gut wok bilong ol, Jehova bai yusim ol long mekim wanem wok?
18 Bihain long dispela, Jehova bai yusim dispela lain long mekim wanem wok? Revelesen 22:5 i tok: “Ol bai mekim wok king inap oltaim oltaim.” Ol bai bosim husat? Baibel i no tokim yumi, tasol ol bai stap yet olsem samting i dia tumas long ai bilong Jehova. Ol i kisim laip we ol i no inap i dai na ol i no inap bagarap, na tu, ol i gat gutpela save pinis long pasin bilong helpim ol manmeri i gat sin. Olsem na ol bai mekim wok king yet na Jehova bai mekim wok yet long ol inap oltaim oltaim bilong inapim ol samting em i tingting pinis long mekim.
19. Olgeta husat i bung long Memorial bai tingim gen wanem samting?
19 Taim yumi bung long Memorial bilong tingim indai bilong Jisas long Fonde, Epril 5, 2012, dispela bung bai kirapim yumi long tingim gen ol dispela tok bilong Baibel. Sampela Kristen God i bin makim, em ol i stap yet long graun, ol bai kamapim olsem ol i insait long nupela kontrak taim ol i kisim bret i no gat yis na retpela wain. Dispela bai kirapim ol long tingim gutpela wok ol i gat insait long samting em God i tingting pinis long mekim. Yumi olgeta husat i go long dispela bung i laik soim bikpela tenkyu bilong yumi long ol dispela pris i mekim wok king em God Jehova i makim bilong helpim olgeta manmeri.
[Piksa long pes 29]
Lain pris i mekim wok king bai helpim ol manmeri inap oltaim oltaim