Sapta 43

Dispela Taun i Lait Moa Yet

Driman 16​​—⁠Kamapim Tok Hait 21⁠:​9–22:5

Stori: Ol samting bilong Nupela Jerusalem

Taim bilong truim: Bihain long bikpela hevi tru na long taim Satan i kalabus pinis

1, 2. (a) Ensel i kisim Jon i go we na bai Jon i ken lukim Nupela Jerusalem? Wanem tupela samting i narapela narapela kain? (b) Olsem wanem na dispela nambawan bikpela samting bilong Kamapim Tok Hait em i wanpela gutpela samting tru?

WANPELA ensel i bin kisim Jon i go long ples nating na bai Jon i ken lukim Bikpela taun Babilon. Nau narapela ensel i kisim em i go antap long wanpela bikpela maunten. Em i lukim samting i narapela kain tru long Bikpela Babilon! Em i lukim taun Nupela Jerusalem. Bikpela taun Babilon em ples pamuk, olsem meri pamuk, na ol doti i pulap long en, tasol Nupela Jerusalem em i klin na holi long ol samting bilong spirit, na em i lusim heven na i kam daun.​—⁠KTH 17⁠:​1, 5.

² Jerusalem bilong bipo long graun i no gutpela olsem dispela Nupela Jerusalem. Jon i tok: “Orait wanpela ensel i kam long mi. Em i wanpela bilong ol 7-pela ensel i holim ol dis i gat dispela 7-pela samting nogut bilong bagarapim ol manmeri na bilong pinisim belhat bilong God. Na ensel i tokim mi olsem, ‘Yu kam. Bai mi soim yu meri bilong Pikinini Sipsip, nau em i laik marit long em.’ Na Holi Spirit i kamap strong long mi, na ensel i karim mi i go long wanpela bikpela maunten i antap moa. Na em i soim mi Jerusalem, dispela taun bilong God, em i stap wantaim God, na em i lusim heven na i kam daun. Bikpela lait bilong God em i lait long dispela taun.” (KTH 21⁠:​9-​11a) Jon i stap antap long maunten, olsem na em inap lukim gut dispela gutpela taun i lait moa yet. Kirap long taim Adam i mekim rong na putim dai i go long ol man, na i kam inap long nau, ol bilipman i bin wetim dispela taun i mas kamap. Nau em i kamap pinis! (Rom 8:19; 1 Korin 15:​22, 23; Hibru 11:​39, 40) Em i gutpela taun tru, olsem taun spirit. Em i dispela lain 144,000 ol i bin stap gut long God na holimpas bilip. Dispela taun i lait moa yet, long wanem, bikpela lait bilong Jehova i stap long en. Dispela i nambawan bikpela samting bilong Kamapim Tok Hait!

 3. Jon i tok wanem long gutpela samting bilong Nupela Jerusalem?

³ Nupela Jerusalem i gutpela taun tru. “Lait bilong en i narakain tru, olsem gutpela ston i gat bikpela pe moa. Em i lait olsem ston jaspa, na em i klia tru olsem glas. Dispela taun i gat bikpela banis i antap moa. Em i gat 12-pela dua i stap long banis, na 12-pela ensel ol i sanap i stap klostu long ol dua. Na nem bilong ol 12-pela lain bilong Israel i stap long ol dua. Dispela hap bilong banis i stap long hap sankamap em i gat tripela dua. Na hap bilong banis i stap long hap not em i gat tripela dua. Na hap bilong banis i stap long hap saut em i gat tripela dua. Na hap bilong banis i stap long hap san i go daun em i gat tripela dua. Dispela banis bilong taun em i gat 12-pela ston bilong strongim as bilong en, na nem bilong ol 12-pela aposel bilong Pikinini Sipsip i stap long ol dispela ston.” (KTH 21⁠:11b-14) Jon i lukim dispela taun i lait moa! Nupela Jerusalem i olsem meri i marit nupela na pes bilong em i lait moa; em i gutpela poroman stret bilong Krais. Na i stret dispela taun i mas lait olsem, long wanem, Jehova yet i bin kamapim, na Jehova i “Papa i bin mekim kamap olgeta lait bilong skai.”​—⁠Jems 1⁠:⁠17.

 4. Olsem wanem yumi save dispela Nupela Jerusalem i no Israel bilong graun?

⁴ Taun hia i gat 12-pela dua, na nem bilong 12-pela lain Israel i stap long en. Olsem na dispela taun spirit i olsem 144,000 manmeri em “ol i putim mak long [ol] namel long olgeta lain bilong Israel.” (KTH 7⁠:​4-8) Na dispela taun i gat 12-pela as ston, o pos, na nem bilong 12-pela aposel bilong Pikinini Sipsip i stap long en. Nupela Jerusalem i no makim lain Israel bilong graun, em 12-pela pikinini man bilong Jekop i tumbuna bilong ol, nogat. Nupela Jerusalem em Israel bilong spirit, na as bilong en em ol “aposel wantaim ol profet,” ol i olsem pos bilong dispela taun.​—⁠Efesus 2⁠:⁠20.

 5. Nupela Jerusalem i gat “bikpela banis i antap moa,” na dispela i makim wanem samting? Ol ensel i was long ol dua, na dispela i makim wanem samting?

⁵ Dispela taun i gat bikpela banis i antap moa. Long bipo ol man i bin banisim ol taun na bai birua i no ken kam insait. Dispela “bikpela banis i antap moa” bilong Nupela Jerusalem, em i makim olsem dispela taun i stap strong long ol samting bilong spirit. Ol birua bilong stretpela pasin, na ol man i gat pasin nogut na pasin giaman, ol i no inap i go insait. (KTH 21⁠:27) Ol man i go insait long dispela gutpela taun, i olsem ol i go insait long Paradais. (KTH 2⁠:⁠7) Taim Adam i bin mekim rong na God i rausim em long Paradais bilong bipo, God i putim ol ensel i sanap long dua bilong Paradais na ol i was i stap bambai ol man nogut i no inap i go insait. (Stat 3⁠:24) Olsem tasol ol ensel i was i stap long ol dua bilong taun holi Jerusalem na bai taun i ken stap strong long ol samting bilong spirit. Nau long las taim ol ensel i was i stap na lukautim lain Kristen em God i bin makim ol, nogut doti bilong Babilon i kam insait long ol. Ol bai kamap olsem Nupela Jerusalem.​—⁠Matyu 13⁠:⁠41.

Metaim Taun

 6. (a) Jon i tok wanem long metaim taun? Wok bilong metaim taun i makim wanem samting? (b) Ating wanem as na ensel i tok, meta hia i meta bilong ol man na i meta bilong ol ensel tu? (Lukim sta i gat liklik rait, i stap long dispela pes.)

⁶ Jon i tok moa olsem: “Dispela ensel i toktok wantaim mi, em i holim stik gol bilong metaim dispela taun wantaim bikpela banis bilong en na ol dua bilong dispela banis. Ol 4-pela sait bilong dispela biktaun i gat wankain mak tasol. Longpela bilong en na bikpela bilong en ol i gat wankain mak stret. Ensel i metaim taun long stik bilong en, na mak bilong taun em inap long 2,200 kilomita. Ol 4-pela sait bilong taun na mak bilong antap bilong taun tu, olgeta i gat wankain mak stret. Em i metaim banis bilong taun tu, na banis i go insait inap long 144 meta. Dispela meta em i kain meta ol man i save metaim ol samting long en. Na ensel i metaim banis long dispela meta tasol.” (KTH 21⁠:​15-17) Taim ol i bin metaim haus bilong God, dispela i bin makim olsem Jehova bai truim laik bilong em long wok bilong dispela haus bilong em. (KTH 11⁠:⁠1) Nau ensel i mas metaim Nupela Jerusalem, na dispela i makim olsem Jehova i no senisim tingting o laik bilong em long wok bilong dispela gutpela taun.a

 7. Wanem samting bilong mak bilong dispela taun i narapela kain?

⁷ Taun hia em traipela tru! Em i skwea tru. Sapos yumi bungim longpela bilong olgeta 4-pela sait sait bilong en, em i olsem 2,200 kilomita, na i gat wanpela banis i raunim taun, i go antap inap 144 meta (olsem 65 mita samting). I no gat wanpela taun long graun i bikpela olsem dispela taun; em i bikpela moa yet. Tasol ol tok bilong Kamapim Tok Hait em i tok piksa tasol long ol samting; orait, ol mak bilong dispela taun Nupela Jerusalem bilong heven i makim wanem samting?

 8. (a) Banis bilong taun i go antap inap long 144 meta, na dispela i kirapim yumi long tingim wanem samting? (b) Taim ol i metaim taun, mak bilong en em 12,000 stadia, na olsem wanem long dispela namba? (c) Fopela sait bilong taun, na antap bilong en, na daunbilo bilong en, olgeta i gat wankain mak, na dispela i makim wanem samting?

⁸ Banis bilong taun i go antap inap 144 meta, na dispela i kirapim yumi long tingim lain 144,000 ol yet i dispela taun, em God i bin makim ol long spirit holi long kamap pikinini bilong em. Taim ol i metaim taun, mak bilong en em 2,200 kilomita, tasol long tok Grik ol i raitim olsem 12,000 stadia. (Lukim sta bilong Kamapim Tok Hait 21⁠:16 daunbilo long pes 497 bilong Baibel.) Taim Baibel i kolim sampela tok profet long samting bilong oganaisesen, sampela taim em i kolim namba 12, na dispela namba i makim oganaisesen bilong God. Nupela Jerusalem em i wanpela gutpela samting tru God i bin putim bilong kamapim laik bilong Em bilong oltaim oltaim. Nupela Jerusalem, wantaim King Krais Jisas, i olsem oganaisesen bilong Kingdom bilong Jehova. Na 4-pela sait bilong taun, na antap bilong en, na daunbilo bilong en, olgeta i gat wankain mak taim ol i metaim. Haus lotu Solomon i bin wokim i gat Rum Tambu Tru i stap, na insait long en Bokis Kontrak i stap, na dispela i makim olsem Jehova yet i stap. Ol sait sait na antap na daunbilo bilong dispela rum, long meta em olgeta i gat wankain mak, olsem skwea tru. (1 King 6⁠:​19, 20) Olsem na i stret Nupela Jerusalem tu i olsem, em lait bilong Jehova i pulap long en. Olgeta mak bilong en i stret wantaim. Dispela taun i no gat wanpela hap bilong en i krungut o i nogut liklik.​—⁠KTH 21⁠:⁠22.

God i Wokim Taun Long Ol Gutpela Gutpela Samting

 9. Olsem Jon i tok, God i wokim taun long wanem ol samting?

⁹ Jon i stori moa long dispela taun olsem: “Banis bilong taun em God i bin wokim long ston jaspa. Na em i wokim taun yet long gol tasol, na taun i lait olsem glas. As bilong banis bilong taun, em God i bin bilasim long ol kain kain ston i gat bikpela pe. Namba wan naispela ston long as bilong banis em jaspa. Na namba 2 em blupela ston sapaia. Na namba 3 em ston aget. Na namba 4 em grinpela ston emeral. Na namba 5 em ston sadonikis, em i ret na wait wantaim. Na namba 6 em retpela ston konilian. Na namba 7 em yelopela ston krisolait. Namba 8 em narapela kain grinpela ston beril. Namba 9 em narapela kain yelopela ston topas. Na namba 10 em ston krisopres. Namba 11 em ston haiasin. Na namba 12 em narapela kain retpela ston ametis. Dispela 12-pela dua em 12-pela pel, em ol dispela kain waitpela bis i dia tumas. Ol wan wan dua ol i wokim long wanpela wanpela bikpela pel tasol. Olgeta rot bilong taun ol i wokim long gol tasol, na dispela gol em i klia tru olsem glas.”​—⁠KTH 21⁠:​18-21.

10. Jon i tok, ol i wokim taun long ston jaspa na gol na “long ol kain kain ston i gat bikpela pe,” na dispela i makim wanem samting?

¹⁰ Jehova i wokim dispela taun long ol gutpela samting tasol, na i no ol samting bilong graun, olsem brik o ston samting, nogat. Em i wokim long ston jaspa, na gutpela gol, na “kain kain ston i gat bikpela pe.” Ol dispela gutpela samting i makim ol samting bilong heven, em ol samting i nambawan tru! Long bipo ol i bin karamapim Bokis Kontrak long gutpela gol, na long Baibel gol i makim ol samting i gutpela tru na i gat bikpela pe. (Kisim Bek 25⁠:11; Sindaun 25⁠:11; Aisaia 60⁠:​6, 17) Olgeta hap bilong Nupela Jerusalem, na rot bilong en tu, em i gol tasol, “na dispela gol em i klia tru olsem glas,” na dispela i makim ol samting i gutpela moa.

11. Jehova i mekim wanem na bai dispela lain i olsem Nupela Jerusalem ol i ken lait moa yet na i klin tru long ol samting bilong spirit?

¹¹ Ol man bilong graun i no inap wokim gutpela gol olsem, tasol Jehova inap. Em i “olsem man i save kukim silva long paia na rausim pipia bilong en.” Em i stretim na mekim gut pasin bilong olgeta wan wan bilong Israel bilong spirit ol i stap gut long em, olsem “rausim pasin doti” bilong ol, na bai ol i kamap olsem gol na silva. Ol man em Jehova i stretim na klinim ol pinis, Jehova bai kisim ol tasol bilong wokim Nupela Jerusalem; long dispela rot Jehova i wokim dispela taun long ol ston i gat laip, em ol i lait gut tru long ol gutpela samting bilong spirit.​—⁠Malakai 3⁠:​3, 4.

12. (a) As bilong taun i gat 12-pela ston i dia tumas, na dispela i makim wanem samting? (b) Ol dua bilong taun em ol bis olsem pel, na dispela i kirapim yumi long tingim wanem samting?

¹² Na as tu bilong taun i gutpela tru​—⁠em i gat 12-pela gutpela kain ston i stap long en. Yumi tingim hetpris bilong ol Juda long bipo, long de i gat bung bilong lotu em i save putim laplap bilong bros, em bilong hetpris, na i gat 12-pela narapela narapela gutpela ston i dia tumas i stap long en, kain olsem bilong taun hia. (Kisim Bek 28⁠:​15-​21) Dispela i makim wok pris em Nupela Jerusalem bai mekim, na Jisas bai stap bikpela Hetpris na “lam” bilong dispela taun. (KTH 20⁠:6; 21⁠:23; Hibru 8⁠:⁠1) Wok hetpris bilong Jisas bai helpim ol man, na em bai mekim long rot bilong Nupela Jerusalem. (KTH 22⁠:​1, 2) Na 12-pela dua bilong taun em 12-pela gutpela bis olsem pel, na yumi tingim wanpela tok piksa bilong Jisas em i tok, Kingdom i olsem wanpela bis i gutpela tru. Ol man i go insait long ol dispela dua ol i man bilong tingim tru ol samting bilong spirit.​—⁠Matyu 13⁠:​45, 46; skelim wantaim Jop 28⁠:​12, 17, 18.

Taun i Lait

13. Wanem sampela tok moa Jon i mekim bilong Nupela Jerusalem? Bilong wanem dispela taun i no gat wok long wanpela haus lotu tru?

¹³ Long taim bilong Solomon, taun Jerusalem i gat haus lotu i stap antap long maunten Moraia long hap bilong not. Tasol olsem wanem long Nupela Jerusalem? Jon i tok: “Mi no lukim wanpela tempel i stap long dispela taun. Nogat. God, Bikpela I Gat Olgeta Strong, wantaim Pikinini Sipsip, tupela yet i stap olsem tempel bilong en. Na dispela taun i no gat san na mun bilong givim lait. Nogat. Bikpela lait bilong God yet i givim lait long taun. Na Pikinini Sipsip em i stap olsem lam bilong taun.” (KTH 21⁠:​22, 23) I no gat wok bilong sanapim wanpela haus lotu tru long dispela taun. Haus lotu bilong ol Juda long bipo em i piksa bilong bikpela haus lotu spirit, na dispela i bin kamap long taim Jehova i bin makim Jisas long spirit holi na em i kamap bikpela Hetpris long yia 29. (Matyu 3⁠:​16, 17; Hibru 9⁠:​11, 12, 23, 24) Na long haus lotu i mas i gat lain pris bilong mekim ol ofa long Jehova bilong helpim ol man. Tasol olgeta bilong Nupela Jerusalem ol i pris. (KTH 20⁠:⁠6) Na taim Jisas i stap long graun, em i bin givim nambawan gutpela skin bilong em long Jehova olsem wanpela bikpela ofa, olsem na i no gat wok moa long mekim sampela ofa. (Hibru 9⁠:​27, 28) Na tu, olgeta man bilong Nupela Jerusalem ol inap toktok stret long Jehova.

14. (a) Bilong wanem i no gat wok long san o mun bilong givim lait long Nupela Jerusalem? (b) Tok profet bilong Aisaia i tok wanem long oganaisesen bilong Jehova long heven? Olsem wanem Nupela Jerusalem i insait long dispela samting?

¹⁴ Taim bikpela lait bilong Jehova i bin go klostu long Moses long maunten Sainai, em i mekim pes bilong Moses i lait strong. Olsem na taim Moses i laik go klostu long ol wanlain bilong em, em i mas karamapim laplap long pes bilong em, long wanem, pes bilong em i lait tumas. (Kisim Bek 34⁠:​4-7, 29, 30, 33) Orait, olsem wanem long Nupela Jerusalem? Lait bilong Jehova i stap long dispela taun long olgeta taim na i no ken i dai, olsem na em bai lait moa yet, a? Tudak i no inap kamap long en. I no gat wok long san o mun bilong givim lait long en. Em yet i lait long olgeta taim na i givim lait long ol samting. (Lukim 1 Timoti 6⁠:16.) Dispela meri wantaim Man bilong em, em King Jisas, i olsem nambawan biktaun bilong oganaisesen bilong Jehova long heven, em “meri” bilong Jehova, olsem Jerusalem i stap long heven. Aisaia i bin mekim wanpela tok long dispela oganaisesen, em i tok: “San bai i no moa i stap olsem lait bilong yu na long nait mun bai i no moa givim lait long yu. Nogat. Mi Bikpela yet bai mi stap olsem san na mun na bai mi givim lait long yu oltaim. Na mi God bilong yu, bai mi stap olsem bikpela lait na strong bilong yu. Bai yu no inap lukim san na mun i go daun na tudak i kamap, long wanem, mi Bikpela, oltaim bai mi stap olsem lait bilong yu. Na olgeta hevi bilong yu bai i pinis.”​—⁠Aisaia 60⁠:​1, 19, 20; Galesia 4⁠:⁠26.

Lait Bilong Ol Lain Man

15. Wanem ol tok bilong Kamapim Tok Hait long Nupela Jerusalem i wankain olsem tok profet bilong Aisaia?

¹⁵ Na Aisaia i tok tu olsem: “Ol arapela lain manmeri bai i lukim dispela lait bilong yu na ol bai i kam long yu. Na ol king tu bai i lukim dispela strongpela lait bilong yu, na ol bai i kirap i kam.” (Aisaia 60⁠:⁠3) Kamapim Tok Hait i makim olsem Nupela Jerusalem i insait long dispela tok bilong Aisaia: “Ol manmeri bilong olgeta lain man bai i wokabaut long lait bilong dispela taun. Na ol king bilong olgeta kantri bilong graun bai i bringim ol gutpela gutpela samting bilong ol i kam long em. Long san ol bai i no inap pasim ol dua bilong banis bilong dispela taun. Ol dua bai i op i stap oltaim, long wanem, nait bai i no kamap long dispela taun. Olgeta bilas na mani samting bilong olgeta lain man, ol bai i bringim i go insait long em.”​—⁠KTH 21⁠:​24-​26.

16. Husat dispela “ol manmeri bilong olgeta lain” ol bai wokabaut long lait bilong Nupela Jerusalem?

¹⁶ Husat dispela “ol manmeri bilong olgeta lain” i wokabaut long lait bilong Nupela Jerusalem? Em ol man bipo ol i bihainim pasin nogut bilong dispela graun, tasol lait bilong dispela gutpela taun long heven i bin lait long ol na nau ol i tanim bel. Dispela “planti manmeri tru” i bilong dispela lain, em “ol i bilong olgeta lain man na bilong olgeta kantri na bilong olgeta kain skin na bilong olgeta tok ples,” na ol i save lotu long God long san na long nait wantaim lain remnan. (KTH 7⁠:​9, 15) Taim Nupela Jerusalem i lusim heven na i kam daun, na Jisas i mekim wok long ol ki bilong dai na matmat na kirapim bek ol man i dai pinis, ol bai bung wantaim ol dispela planti milion manmeri moa, em pastaim ol i bilong “olgeta lain man,” tasol nau ol i laikim tumas Jehova na Pikinini bilong em, em Man bilong Nupela Jerusalem.​—⁠KTH 1⁠:⁠18.

17. Husat dispela “ol king bilong olgeta kantri” ol i “bringim ol gutpela gutpela samting bilong ol” i kam long Nupela Jerusalem?

¹⁷ Na husat dispela “ol king bilong olgeta kantri bilong graun” em ol “i bringim ol gutpela gutpela samting bilong ol i kam long em”? Ol i no king tru bilong dispela graun, long wanem, ol king bilong graun bai kisim bagarap taim ol i pait wantaim Kingdom bilong God long Armagedon. (KTH 16⁠:​14, 16; 19⁠:​17, 18) Orait, olsem wanem? Ating ol dispela king em ol bikman bilong graun ol i tanim bel na ol i kam insait long lain “planti manmeri tru,” a? O ating ol i bin i stap king na ol i bin dai na long nupela taim ol i kirap bek na ol i daun long Kingdom bilong God, a? (Matyu 12⁠:42) Nogat. Long wanem, ol gutpela samting bilong ol dispela kain king em i samting bilong graun, na nau i no gutpela moa. Ol dispela “king bilong olgeta kantri” ol i bringim “ol gutpela gutpela samting” i kam long Nupela Jerusalem, em lain 144,000 tasol, na bipo ol i “bilong olgeta lain man, na bilong olgeta tok ples, na bilong olgeta kain skin, na bilong olgeta kantri,” tasol Jisas i bin “baim bek [ol] . . . bilong givim ol long God” na bai ol i ken mekim wok king wantaim Pikinini Sipsip, em Krais Jisas. (KTH 5⁠:​9, 10; 22⁠:⁠5) Ol gutpela samting bilong ol ol i bringim i kam long taun, em i mekim taun i lait moa.

18. (a) Husat i no inap i go insait long Nupela Jerusalem? (b) Husat tasol inap i go insait long Nupela Jerusalem?

¹⁸ Jon i toktok moa: “Tasol ol samting i doti na ol man i save mekim ol kain kain pasin nogut na ol man bilong tok giaman, ol bai i no inap i go insait long taun. Nogat tru. Ol manmeri nem bilong ol i stap long buk bilong laip, em buk bilong Pikinini Sipsip, ol tasol inap i go insait long dispela taun.” (KTH 21⁠:27) Ol man i gat hap tingting na pasin bilong dispela graun Satan i bosim, ol i no ken go insait long Nupela Jerusalem. “Ol man i save mekim ol kain kain pasin nogut na ol man bilong tok giaman” ol i tambu long go insait, maski ol dua i op i stap long olgeta taim. Ol man bilong lusim bilip na givim baksait long God ol i no ken i stap long dispela taun, na ol man bilong Bikpela Babilon tu ol i no ken i stap long en. Hap lain bilong Nupela Jerusalem ol i stap yet long graun, na sapos sampela man i traim bagarapim gutpela pasin bilong ol, dispela wok nogut bilong ol bai i lus nating. (Matyu 13⁠:​41-​43) Nem bilong ol dispela 144,000 tasol i stap long “buk bilong Pikinini Sipsip,” na ol tasol inap i go insait long Nupela Jerusalem.b​—⁠KTH 13:8; Daniel 12:⁠3.

Wara Bilong Givim Laip

19. (a) Jon i tok wanem long Nupela Jerusalem bai salim ol gutpela blesing i kam long ol man? (b) Wanem taim dispela wara bilong givim laip i kirap long “ran i go”? Yumi save olsem wanem long dispela samting?

¹⁹ Nupela Jerusalem bai salim ol gutpela gutpela blesing i kam long ol man bilong graun, olsem ensel i tokim Jon: “Orait dispela ensel i soim mi wanpela bikpela wara, em wara bilong givim laip, na em i lait tumas olsem glas. Dispela wara i kamap long sia king bilong God wantaim Pikinini Sipsip, na i ran i go namel tru long bikpela rot bilong taun.” (KTH 22⁠:​1, 2a) Wanem taim dispela “wara” i bin kirap long “ran i go”? Jon i tok dispela wara i kirap “long sia king bilong God wantaim Pikinini Sipsip, na i ran” i kam daun, olsem na yumi save dispela wara i kirap long ran bihain long taim “de bilong Bikpela” i bin kirap long 1914, em taim bilong winim namba 7 biugel na autim bikpela tok olsem: “Nau God bilong yumi em i kisim bek yumi pinis, na strong bilong en i kamap pinis long ples klia, na em i stap king. Na dispela man em i makim bilong kisim bek ol manmeri bilong en, em i kisim pinis bikpela namba na strong.” (KTH 11⁠:15; 12⁠:10) Long taim bilong pinis, holi spirit wantaim meri i bin singautim ol man i gat gutpela bel long kam na dring long wara bilong givim laip. Dispela wara bai stap yet i go inap long pinis bilong pasin nogut bilong nau, na long nupela taim tu, taim Nupela Jerusalem ‘i lusim heven na i kam daun.’​—⁠KTH 21:⁠2.

20. Olsem wanem yumi ken save i gat sampela wara bilong givim laip yumi inap kisim long nau tu?

²⁰ Dispela i no namba wan taim ol man inap kisim wara bilong givim laip. Taim Jisas i bin stap long graun em tu i bin toktok long wara bilong givim laip oltaim long ol man. (Jon 4⁠:​10-​14; 7⁠:​37, 38) Na nau Jon bai harim maus i mekim wanpela gutpela singaut: “Holi spirit wantaim meri bilong Pikinini Sipsip tupela i tok, ‘Yu kam.’ Na olgeta man i harim dispela tok, em tu i mas tok, ‘Yu kam.’ Na wanem man nek bilong en i drai, em i mas kam. Man i laik dring, em i mas kam na kisim wara bilong givim laip, em i olsem presen bilong God.” (KTH 22⁠:17) Long nau sampela lain i autim dispela tok long ol man, olsem na yumi save yumi inap kisim sampela wara bilong laip long nau. Tasol long nupela taim bikpela wara bilong givim laip bai kamap long sia king bilong God na ran i kam namel long Nupela Jerusalem na i kam daun long ol manmeri long graun.

21. “Wara bilong givim laip” i makim wanem samting? Olsem wanem dispela driman Esekiel i lukim i helpim yumi long save long dispela samting?

²¹ Dispela “wara bilong givim laip” em i wanem samting? Wara tru i save helpim yumi long i stap laip. Sapos yumi no gat kaikai yumi inap i stap laip inap sampela wik, tasol sapos yumi no gat wara bai yumi dai insait long wanpela wik. Na wara i save klinim ol samting tu na bai sik i no ken kamap. Olsem na dispela “wara bilong givim laip” em i makim wanpela samting bilong helpim ol man long i stap laip na i stap strong. Esekiel tu i bin lukim piksa, o driman, bilong dispela “wara bilong givim laip,” na long driman bilong em, em i lukim dispela wara i kirap long haus lotu na i ran i go daun long solwara Detsi, na mirakel i kamap​—⁠dispela solwara i senis, na ol marasin nogut long en i tekewe, na em i kamap gutpela wara bilong dring, na ol pis i pulap long en! (Esekiel 47⁠:​1-​12) Dispela wara i kirapim bek ol samting i bin dai pinis, na nau yumi save dispela wara i makim wanpela samting God bai mekim long rot bilong Krais Jisas na i bilong helpim ol man i olsem “i dai pinis” na ol i ken kamap gutpela olgeta. Dispela wara em i klin tru na “em i lait tumas olsem glas,” na dispela i makim olsem ol samting God i mekim bilong helpim ol man, em i gutpela tru na i holi. Em i no olsem “ol wara” nogut bilong ol lotu bilong graun i gat nem Kristen na i gat blut i pulap long en na i mekim man i dai.​—⁠KTH 8⁠:​10, 11.

22. (a) Dispela wara i kirap we? Olsem wanem dispela i stret? (b) Wanem ol samting i hap bilong dispela wara bilong givim laip?

²² “Dispela wara i kamap long sia king bilong God wantaim Pikinini Sipsip.” Em i stret, long wanem, ofa Jisas i mekim bilong baim bek ol man em i as bilong ol samting God i mekim bilong helpim ol man long kisim laip oltaim. Jehova i mekim dispela samting, long wanem, em “i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3⁠:16) Na ol tok bilong Baibel em i wanpela samting bilong dispela wara bilong laip tu. (Efesus 5⁠:26) Na i no ol dispela tok i tru bilong Baibel tasol i olsem wara bilong givim laip​—⁠i gat ol narapela samting tu em Jehova i mekim long rot bilong ofa bilong Jisas bilong helpim ol man bilong bihainim tok na bai sin na dai i ken tekewe long ol na ol i ken i stap laip oltaim.​—⁠Jon 1⁠:29; 1 Jon 2⁠:​1, 2.

23. (a) Olsem wanem i stret long wara i ran namel long Nupela Jerusalem? (b) Taim dispela wara i kamap bikpela, wanem tok promis God i bin mekim long Abraham bai kamap tru?

²³ Long taim bilong 1,000 yia bilong Jisas i bosim graun, Jisas wantaim lain 144,000 bai mekim wok long ofa Jisas i bin mekim. Olsem na i stret long dispela wara i ran i kam namel long Nupela Jerusalem. Dispela taun em lain Israel bilong spirit tasol, na ol wantaim Jisas i pikinini tru bilong Abraham. (Galesia 3⁠:​16, 29) Olsem na taim wara bilong laip i ran strong i kam “namel tru long bikpela rot bilong taun” na i kam daun long ol man, bai “olgeta lain long graun” inap kisim ol gutpela samting i kam long rot bilong pikinini bilong Abraham. Dispela bai truim tok promis Jehova i bin mekim long Abraham.​—⁠Stat 22⁠:​17, 18.

Ol Diwai Bilong Givim Laip

24. Jon i lukim wanem samting i stap long tupela arere bilong wara bilong givim laip? Ol i makim wanem samting?

²⁴ Long driman bilong Esekiel em i bin lukim dispela wara i kamap bikpela, na long tupela arere bilong en i gat ol diwai i stap na ol i karim kaikai. (Esekiel 47⁠:12) Na Jon i lukim wanem samting? Em olsem: “Long arere bilong wara, long hap i kam na long hap i go, [ol] diwai bilong givim laip i stap. [Ol] dispela diwai i save karim kaikai 12-pela taim long olgeta yia. [Ol] i karim kaikai long olgeta mun. Na ol lip bilong diwai ol i bilong mekim orait ol manmeri bilong olgeta lain man.” (KTH 22⁠:2b) Ol dispela “diwai bilong givim laip” ol tu i mas makim wanpela hap rot bilong Jehova long givim laip oltaim long ol man i save bihainim tok.

25. Jehova bai redim wanem ol gutpela samting bilong helpim ol man i gat pasin daun ol bai stap long Paradais?

²⁵ Jehova i redim planti samting bilong helpim ol man i gat pasin daun na bai ol i ken stap gut! Ol i ken dring long dispela gutpela wara, na ol i ken kaikai pikinini bilong ol dispela kain kain diwai i save karim kaikai long olgeta taim. Sapos tupela tumbuna bilong yumi i bin amamas long kisim kaikai long ol dispela kain diwai tasol long Paradais long Iden, em gutpela tru, tasol sori tumas​—⁠ol i no bin mekim olsem! (Stat 2⁠:⁠9) Tasol long nupela Paradais bai kamap long olgeta hap bilong graun, na long rot bilong ol lip bilong ol dispela diwai Jehova bai “mekim orait ol manmeri bilong olgeta lain man.”c Dispela ol lip bai winim ol marasin bilong nau long mekim gut ol man i bilip, na em bai strongim ol na helpim ol long kamap gutpela olgeta long spirit na long skin.

26. Ating ol dispela diwai bilong laip i makim wanem narapela samting tu? Bilong wanem yumi ting olsem?

²⁶ Ol dispela diwai i stap long arere arere bilong wara ol i pulim wara long dispela bikpela wara, yumi ken ting ol inap makim tu lain 144,000, em meri bilong Pikinini Sipsip. Taim ol i stap long graun ol i dringim ol samting God i givim long ol bambai ol i ken kisim laip long rot bilong Krais Jisas. Ol dispela brata bilong Jisas em God i bin makim ol long holi spirit, ol i olsem ol diwai bilong “stretpela pasin.” (Aisaia 61:​1-3; KTH 21:⁠6) Ol i kamapim pinis planti kaikai, olsem gutpela wok, bilong litimapim nem bilong Jehova. (Matyu 21⁠:43) Long taim Kingdom i bosim graun inap 1,000 yia ol bai gat wok long helpim ol man long ol samting bilong ofa Jisas i bin mekim bilong baim bek ol man, na dispela bai “mekim orait ol” na bai sin na dai i pinis long skin bilong ol.​—⁠Lukim 1 Jon 1:⁠7.

No Gat Tudak Moa

27. Wanem ol narapela gutpela samting ol man i go insait long Nupela Jerusalem ol bai kisim? Bilong wanem “olgeta samting God i no laik tru long en . . . i no i stap moa” long Nupela Jerusalem?

²⁷ Bilong go insait long Nupela Jerusalem, em wanpela gutpela samting tru! Sampela man, bipo ol i man nating bilong graun, tasol nau ol inap bihainim Jisas na i go long heven na holim dispela gutpela wok! (Jon 14⁠:⁠2) Jon i kolim sampela gutpela samting ol bai kisim: “Na olgeta samting God i no laik tru long en na God i laik rausim, dispela ol samting bai i no i stap moa. Sia king bilong God na Pikinini Sipsip em bai i stap long dispela taun. Na ol wokman bilong God bai i lotu long em, na ol bai i lukim pes bilong em. Na em bai i raitim nem bilong en long pes bilong ol.” (KTH 22⁠:​3, 4) Taim lain pris bilong ol Israel long bipo ol i mekim nogut wok bilong ol, Jehova i bagarapim ol. (Malakai 2⁠:⁠2) Ol Jerusalem i no bin bilip, olsem na Jisas i no helpim ol moa. (Matyu 23⁠:​37-​39) Tasol long Nupela Jerusalem i no gat wanpela “samting God i no laik tru long en na God i laik rausim,” nogat. (Lukim tu Sekaraia 14⁠:11.) Jehova i traim pinis bel na tingting bilong lain 144,000 taim ol i stap yet long graun, na ol i no bin pundaun; ol i winim pinis ol traim na hevi bilong graun, na ol i ‘senis na i stap gut oltaim na i stap laip oltaim.’ Jehova i save ol i no inap pundaun, olsem em i save Jisas tu i no inap pundaun. (1 Korin 15⁠:​53, 57) Na “sia king bilong God na Pikinini Sipsip em bai i stap long dispela taun,” na dispela bai strongim taun long olgeta taim bihain.

28. Bilong wanem ol man bilong Nupela Jerusalem i gat nem bilong God long pes bilong ol? Wanem ol gutpela samting ol bai amamas long en long bihain?

²⁸ Ol man bilong dispela taun long heven ol i “wokman” bilong God, olsem Jon tu, na nem bilong God i stap long pes bilong ol bilong makim olsem em i Papa bilong ol. (KTH 1⁠:1; 3⁠:12) Ol bai amamas tru long i stap insait long lain bilong Nupela Jerusalem na lotu long Jehova. Taim Jisas i stap long graun em i bin tok promis long ol olsem: “Ol man bel bilong ol i klin, em ol i ken amamas. Bai ol i lukim God.” (Matyu 5⁠:⁠8) Ol dispela wokman bilong Jehova bai lukim stret Jehova long ai bilong ol na lotu long em! Ol bai amamas tru long mekim olsem!

29. Bilong wanem Jon i tok, “tudak bai i no kamap moa” long Nupela Jerusalem?

²⁹ Na Jon i tok: “Tudak bai i no kamap moa, na lait bilong ol lam na lait bilong san bai i no gat wok moa. Nogat. God, Bikpela bai i givim lait long ol manmeri.” (KTH 22⁠:5a) Jerusalem bilong bipo, na ol narapela taun bilong graun, em san i givim lait long ol long taim bilong san, na mun i mekim long nait, o ol i gat ol lam samting. Tasol Nupela Jerusalem long heven i no gat wok long ol dispela samting, long wanem, Jehova yet bai givim lait long dispela taun. Na dispela tok “tudak,” sampela taim em i tok piksa bilong hevi i painim man, o em i lusim Jehova. (Maika 3⁠:6; Jon 9⁠:4; Rom 13⁠:​11, 12) Dispela kain samting i no inap kamap long hap em Nambawan Strongpela God i stap long en.

30. Wanem laspela tok bilong Jon long dispela gutpela driman bilong em? Kamapim Tok Hait i tok wanem na yumi amamas long en?

³⁰ Nau Jon i mekim laspela tok bilong dispela driman em i bin lukim, na em i toktok long ol dispela wokman bilong God olsem: “Na ol bai i stap king oltaim oltaim.” (KTH 22⁠:5b) Taim 1,000 yia i pinis, wok bilong baim bek ol man bai i pinis, na nau ol i stap gutpela olgeta, na Jisas bai givim ol i go bek long Papa bilong em. (1 Korin 15⁠:​25-​28) Na bihain long dispela yumi no save wanem wok Jehova bai givim long Jisas wantaim lain 144,000, tasol Kamapim Tok Hait i tok ol bai mekim gutpela wok holi bilong Jehova inap long olgeta taim bihain.

Bikpela Samting Tru Bilong Kamapim Tok Hait

31. (a) Driman bilong Jon long Nupela Jerusalem i makim wanem ol laspela gutpela samting bai kamap? (b) Nupela Jerusalem bai mekim wanem bilong helpim narapela manmeri ol i stap gut long God?

³¹ Laspela stori bilong Kamapim Tok Hait em i stori long Nupela Jerusalem, em meri bilong Pikinini Sipsip, na i stret em i stori olsem. Jon i bin raitim ol dispela tok i go long ol wanlain Kristen bilong em bilong bipo, em ol i gat tingting long kamap spirit i no ken dai moa na ol i ken go insait long Nupela Jerusalem na wok king wantaim Krais Jisas. Hap lain olsem remnan Kristen i stap yet long graun ol tu i gat dispela tingting. Laspela tok bilong Kamapim Tok Hait i stori long lain 144,000, em meri bilong Pikinini Sipsip, ol inap pinis, na ol i go bung wantaim man bilong ol long heven. Ol i bung pinis, na nau Nupela Jerusalem bai mekim wok long ofa bilong Jisas bilong helpim ol man long graun, na ol man bilong bihainim tok ol bai kisim laip i stap oltaim. Long dispela rot Nupela Jerusalem, olsem gutpela meri bilong King, em bai helpim King long kamapim nupela graun bilong i stap oltaim oltaim, em ol stretpela manmeri bilong i stap long graun, na ol dispela samting bai litimapim nem bilong Bikpela King bilong yumi, em Jehova.​—⁠Matyu 20⁠:28; Jon 10⁠:​10, 16; Rom 16⁠:⁠27.

32, 33. Yumi bin lainim wanem ol samting long Kamapim Tok Hait? Dispela i mas kirapim yumi long mekim wanem?

³² Nau yumi laik pinis long skelim ol tok bilong Kamapim Tok Hait, na yumi amamas long ol save yumi bin kisim! Nau yumi save long ol laspela samting Satan na lain bilong em i bin wok strong long mekim, tasol ol i pundaun tru; ol i no bin pasim Jehova long mekim ol stretpela kot bilong em na em inapim tru dispela wok. Bikpela Babilon i mas pinis olgeta wantaim ol narapela wok nogut Satan i bin kamapim. Satan yet wantaim ol spirit nogut bilong em bai kalabus long dispela bikpela hul i no gat as, na bihain moa ol bai kisim bagarap na pinis olgeta. Nupela Jerusalem bai bosim ol samting wantaim Krais long heven, na ol man i dai pinis bai kirap bek na sanap long kot, na bihain ol man bai kamap gutpela olgeta na ol bai i stap laip oltaim long Paradais long graun. Kamapim Tok Hait i kamapim klia tru ol dispela tok! Em i strongim yumi long ‘autim gutnius long olgeta lain man bilong olgeta kantri na bilong olgeta tok ples na bilong olgeta kain skin’! (KTH 14⁠:​6, 7) Yu save taitim bun tru na wok strong long givim bel long mekim dispela bikpela wok?

³³ Bel bilong yumi i amamas tru long ol dispela samting, olsem na nau yumi ken tingim gut laspela tok bilong Kamapim Tok Hait.

[Ol Futnot]