Sapta 11
Nem Bilong Yu i Stap Long Buk Bilong Laip?
SARDIS
1. Kongrigesen long Sardis i stap olsem wanem long ol samting bilong spirit? Jisas i mekim wanem tok long ol pastaim?
INAP olsem 48 kilomita longwe long taun bilong nau ol i kolim Akisar (Taiataira) i gat narapela kongrigesen Jisas i salim tok long en, em kongrigesen bilong taun Sardis. Inap olsem 550 yia paslain long Krais, dispela taun em i nambawan biktaun bilong kantri em Lidia na King Krisas i stap long en, em i gat bikpela mani kago moa yet. Tasol long taim bilong aposel Jon, dispela taun i no gat biknem moa olsem long taim bilong King Krisas, na ol manmeri bilong dispela taun i stap nogut. Kongrigesen long dispela taun ol tu i stap nogut—ol i stap nogut long ol samting bilong spirit. Nau Jisas i no mekim sampela gutpela tok long kongrigesen pastaim olsem em i bin mekim long ol narapela kongrigesen. Em i tokim Jon: “Na yu mas raitim sampela tok long ensel bilong sios [kongrigesen] i stap long taun Sardis. Dispela tok i olsem, ‘Mi gat dispela 7-pela spirit bilong God, na mi holim dispela 7-pela sta. Na mi salim dispela tok i kam long yu. Mi save pinis long olgeta pasin yu save mekim. Ol i save tok long yu olsem, “Dispela sios [kongrigesen] i gat laip tru.” Tasol nogat, yu dai pinis.’ ”—KTH 3:1.
2. (a) Bilong wanem ol Kristen long Sardis i mas save, Jisas i gat “dispela 7-pela spirit bilong God”? (b) Ol i tok kongrigesen long Sardis i stap olsem wanem? Tasol dispela tok i stret o nogat?
2 Bilong wanem Jisas i tok, em i “gat dispela 7-pela spirit bilong God”? Long wanem dispela 7-pela spirit i makim spirit holi bilong Jehova i kam long em inap tru. Bihain Jon i tok dispela “7-pela spirit” i olsem “7-pela ai,” na dispela i makim olsem spirit holi bilong Jehova i mekim na Jisas inap lukim gut as bilong ol samting, na ol samting i stap hait tu. (KTH 5:6) Olsem na em inap kamapim long ples klia samting i stap hait na stretim dispela samting. (Matyu 10:26; 1 Korin 4:5) Ol i tok kongrigesen long Sardis i gat laip, olsem ol i save mekim wok. Tasol Jisas inap luksave olsem kongrigesen i dai pinis long ol samting bilong spirit. Bel bilong ol i no kirap moa long mekim wok na i olsem ol i dai pinis, wankain olsem long taim ol i no bin kamap Kristen yet.—Lukim Efesus 2:1-3; Hibru 5:11-14.
3. (a) Bilong wanem “ensel bilong sios [kongrigesen] i stap long taun Sardis” i mas tingim gut olsem Jisas i holim “dispela 7-pela sta”? (b) Jisas i givim wanem strongpela tok long kongrigesen i stap long Sardis?
3 Na Jisas i tokim “ensel bilong sios [kongrigesen] i stap long taun Sardis” olsem em i holim “dispela 7-pela sta.” Em i holim ol dispela elda bilong kongrigesen long han sut bilong em, olsem em i gat strong o namba bilong bosim wok bilong ol long lukautim ol sipsip. Ol i mas givim bel long “lukautim gut ol sipsip.” (Sindaun 27:23) Olsem na ol i mas harim gut ol tok nau Jisas i mekim, olsem: “Yu mas kirap na lusim slip. Olgeta pasin bilong yu i stap yet na i no i dai, em yu mas strongim. Long wanem, mi no lukim wanpela bilong ol pasin bilong yu em i stret olgeta long ai bilong God bilong mi. Dispela gutnius bipo yu bin harim na kisim, em yu mas tingim gen. Na yu mas bihainim gut na tanim bel. Sapos yu no kirap na lusim slip, orait wantu bai mi kam long yu olsem ol stilman i save kam. Na yu bai i no inap save long taim mi laik i kam.”—KTH 3:2, 3.
4. Olsem wanem tok bilong Pita inap helpim kongrigesen long ‘strongim ol pasin bilong ol i stap yet na i no i dai’?
4 Ol elda long Sardis i mas tingim bikpela amamas ol i bin kisim taim ol i kisim save long tok i tru long pastaim, na ol i mas tingim ol blesing ol i bin kisim. Tasol nau i olsem ol i dai pinis—ol i no wok strong moa long mekim ol wok bilong God. Lam bilong kongrigesen bilong ol i laik i dai, long wanem ol i no mekim ol wok bilong bilip. Sampela yia bipo aposel Pita i bin raitim pas long ol kongrigesen i stap long Esia (ating kongrigesen bilong Sardis i insait long dispela lain). Pita i laik strongim ol dispela kongrigesen bambai ol i givim bel long dispela gutnius ol Kristen i bilip long en na ol i bin autim “long strong bilong Holi Spirit” God i salim “i kam daun long heven”—em “7-pela spirit bilong God” Jon i lukim long driman i makim dispela spirit holi. Na Pita i kirapim tingting bilong ol Kristen long Esia bambai ol i ken tingim olsem ‘God i makim ol pinis, na ol i bilong lain pris bilong lain bilong king, na ol i stap lain manmeri bilong God stret, na em i makim ol bilong em yet, na ol i mas tokaut long olgeta gutpela pasin bilong dispela Man em i bin singautim ol long lusim tudak na bringim ol i kam insait long lait bilong em.’ (1 Pita 1:12, 25; 2:9) Sapos kongrigesen long Sardis i tingim gut ol dispela samting tru God i bin mekim, dispela bai helpim ol long tanim bel na “strongim” ol gutpela pasin i stap yet long ol.—Lukim 2 Pita 3:9.
5. (a) Olsem wanem long pasin bilong ol Kristen long Sardis long givim bel long tok i tru? (b) Sapos ol Kristen long Sardis i no bihainim tok bilong Jisas, wanem samting bai painim ol?
5 Long dispela taim ol i no givim bel moa long tok i tru na i olsem paia i laik i dai. Tasol liklik hap paia i lait yet long bel bilong ol. Olsem na Jisas i laik bai ol i kirapim gen paia; em i laik bai ol i tanim bel na lusim ol pasin nogut em pasin les bilong ol i bin pulim ol long mekim, na bai kongrigesen i stap laip gen long ol samting bilong spirit. (Lukim 2 Timoti 1:6, 7.) Sapos ol i no kirap mekim olsem, bai Jisas i kam long wanpela taim ol i no save long en—“olsem ol stilman i save kam”—bilong givim strafe long ol man nogut, na bai kongrigesen long Sardis i no redi.—Matyu 24:43, 44.
Kam ‘Olsem Stilman’
6. Long yia 1918 olsem wanem Jisas i kam ‘olsem stilman’? Long dispela taim em i lukim wanem kain pasin i stap long ol manmeri i tok ol i disaipel bilong em?
6 Toksave bilong Jisas olsem em bai kam “olsem ol stilman i save kam,” dispela toksave i bilong nau tu. Em i bikpela toksave bilong ol Kristen i stap long taim “de bilong Bikpela” i kirap. Bihain liklik long yia 1914, ol samting i kamap olsem Malakai i tok profet pinis: “Bikpela I Gat Olgeta Strong i bekim tok olsem, ‘Harim. . . . wantu bai mi kam na mi stap long haus bilong mi. Yupela i laikim tumas long lukim dispela [man] bilong autim tok bilong kontrak bilong mi. Orait em bai i kam.’ ” (Malakai 3:1; KTH 1:10) Jisas em i dispela man i “autim tok bilong kontrak” na em i bin kam bilong skelim ol manmeri i tok ol i disaipel bilong em. (1 Pita 4:17) Long dispela taim, olsem long yia 1918, ol lain i tok ol i Kristen ol i wok long kapsaitim blut bilong ol man long Namba Wan Pait Bilong Olgeta Hap. Ol dispela lain i dai pinis long ol samting bilong spirit. Taim pait i no kamap yet, ol Kristen tru i bin wok strong long autim tok, tasol long taim bilong pait ol i no wok strong moa na i olsem ol i slip. Sampela elda i gat bikpela wok long lain bilong ol, ol i go kalabus, na klostu wok bilong autim tok i pinis olgeta. Taim spirit bilong Jehova i kirapim ol dispela Kristen tru long yia 1919 na ol i lusim slip, sampela ol i no redi. Sampela ol i olsem ol yangpela meri long tok piksa bilong Jisas, em ol i kranki meri, na ol i no redim ol samting bilong spirit bambai ol inap mekim wok bilong Jehova. Tasol gutpela tru, planti ol i olsem ol yangpela meri i gat save na ol i bin bihainim toksave bilong Jisas, em i tok: “Yupela i mas was gut. Yupela i no save long wanem de na wanem aua Bikpela bilong yupela bai i kamap.”—Matyu 25:1-13.
7. Bilong wanem ol Kristen long nau i mas was i stap?
7 Taim bilong Kristen i mas was gut i no pinis long taim de bilong Bikpela i kirap. Nogat. Taim Jisas i mekim bikpela tok profet bilong em na em i kolim ol samting i mas kamap olsem “mak” bilong taim bilong pinis, em i mekim strongpela tok olsem: “I no gat wanpela man i save wanem de na wanem aua dispela ol samting bai i kamap. . . . Yupela lukaut. Yupela i mas was i stap, long wanem, yupela i no save wanem taim dispela ol samting bai i kamap. Dispela tok mi givim long yupela, em mi givim long olgeta manmeri. Yupela i mas was i stap.” (Mak 13:4, 32, 33, 37) Tru tumas, inap long nau, yumi olgeta, maski yumi bilong liklik lain o bikpela lain, yumi mas was i stap, nogut yumi slip long ol samting bilong spirit. Taim De bilong Jehova i kam “olsem stilman i kam long nait,” yumi no ken slip; ai bilong yumi i mas op na yumi mas was i stap bambai yumi inap winim kot.—1 Tesalonaika 5:2, 3; Luk 21:34-36; KTH 7:9.
8. Liklik lain long nau em Jon i piksa bilong ol, ol i bin mekim wanem na ol i bin helpim lain bilong God long i stap laip long ol samting bilong spirit?
8 Liklik lain long nau em Jon i piksa bilong ol, ol yet i mas was i stap bambai ol i ken kirapim lain bilong God long wok strong na i stap laip long ol samting bilong spirit. Olsem na long olgeta yia ol i save putim sampela bikpela bung long narapela narapela taim bilong yia. Long wanpela yia ol i bin putim 2,981 kibung distrik na inap olsem 10,953,744 manmeri i bung na 122,701 nupela bilipman i bin kisim baptais. Winim 100 yia pinis, liklik lain em Jon i piksa bilong ol, ol i bin mekim wok long nius Wastaua bilong tokaut long nem na laik bilong Jehova. Long taim bilong tupela bikpela pait bilong olgeta hap, ol man i bin mekim nogut tru long ol Witnes Bilong Jehova, tasol sampela tok bilong Wastaua i bin kirapim ol long wok strong i go. Sampela tok olsem long Wastaua (tok Inglis) em olsem: “Ol Man i No Pret Ol i Kisim Blesing” (1919), “Singaut Bilong Kirap Mekim Wok” (1925), “Sanap Strong Long Hevi” (1942).
9. (a) Olgeta Kristen i mas wok long givim wanem askim long skin bilong ol yet? (b) Wastaua i bin kamapim wanem tok bilong strongim ol brata?
9 Olgeta Kristen long ol kongrigesen bilong nau ol i mas wok long skelim pasin bilong ol yet, olsem ol Kristen long Sardis bilong bipo i mas mekim. Dispela em i bikpela samting. Oltaim yumi olgeta i mas askim skin bilong yumi yet, olsem: Pasin bilong mi “em i stret olgeta long ai bilong God”? Yumi no ken skelim pasin bilong ol narapela; yumi mas skelim pasin bilong yumi yet. Olsem wanem? Yumi wok long kisim pasin bilong lusim samting bilong yumi yet bilong helpim narapela man, na yumi save givim bel olgeta long mekim wok bilong God? Wastaua i save kirapim yumi long mekim olsem, long wanem, em i kamapim kain stori olsem: “Yupela i Mas Skelim Gut Pasin Bilong Yupela Yet” na “Yumi No Tingting Moa Long Yumi Yet na Wokabaut.”a I gat ol kain tok olsem bilong helpim yumi, em Baibel i as bilong en, olsem na yumi mas wok long skelim bel bilong yumi na yumi mas bihainim pasin daun na beten na wokabaut stret long ai bilong Jehova.—Song 26:1-3; 139:23, 24.
“Sampela Manmeri”
10. Jisas i lukim wanem gutpela pasin i stap long kongrigesen long Sardis? Dispela i mas kirapim yumi long mekim wanem?
10 Ol tok nau Jisas i mekim long kongrigesen bilong Sardis i strongim bel tru. Em i tok: “Tasol yu gat sampela manmeri i stap yet long Sardis, ol i no bin mekim doti klos bilong ol. Pasin bilong ol dispela lain em i gutpela, inap long ol i putim ol waitpela klos na wokabaut wantaim mi. Sapos man i winim pait, orait mi bai putim dispela kain waitpela klos long em, na mi bai i no inap rausim nem bilong em long buk bilong laip. Nogat. Bai mi autim nem bilong em long pes bilong Papa bilong mi, na long pes bilong ol ensel bilong en.” (KTH 3:4, 5) Ol dispela tok i kirapim na strongim tingting bilong yumi long i stap gut long God, a? Sapos wanpela lain elda i no mekim gut wok bilong ol, ating bai kongrigesen olgeta i no wok strong na bai i olsem ol i slip long ol samting bilong spirit. Tasol ating i gat sampela long kongrigesen, em ol i wok strong yet bambai ol i ken i stap gutpela Kristen na ol i ken i stap klin, na bai ol i gat gutpela nem yet long ai bilong Jehova.—Sindaun 22:1.
11, 12. (a) Taim planti man i bin lusim bilip Kristen tru, ating sampela i bin mekim wanem olsem “sampela manmeri” long Sardis i bin mekim? (b) Long de bilong Bikpela, wanem gutpela samting i bin painim ol Kristen i olsem wit?
11 Dispela “klos” i olsem stretpela pasin i makim man i wanpela Kristen. (Lukim Kamapim Tok Hait 16:15; 19:8.) Ating Jisas i amamas tru long lukim “sampela manmeri,” olsem sampela Kristen long Sardis, ol i pasim yet dispela “klos,” maski planti ol i no wok strong na i olsem ol i slip. Olsem tasol, sampela man i gat nem Kristen ol i kamap hap bilong Bikpela Babilon, em olgeta lotu giaman, na inap planti handet handet yia i no gat lotu Kristen tru long graun. Tasol ating i gat sampela manmeri ol i bin wok strong long bihainim laik bilong Jehova, maski planti ol i no mekim. Ol dispela manmeri ol i olsem ol stretpela manmeri, olsem wit i stap namel long ol gras nogut, em ol manmeri bilong ol kain kain misin.—KTH 17:3-6; Matyu 13:24-29.
12 Jisas i tok promis olsem em bai stap wantaim ol dispela Kristen i kain olsem wit “olgeta de, i go inap long dispela taim i pinis.” Jisas i save long ol na long gutpela nem ol i bin kisim. (Matyu 28:20; Saveman 7:1) I gat “sampela manmeri” ol i bin i stap gut long God na ol i stap laip yet taim de bilong Bikpela i kirap. Ol i amamas tru! Long wanem nau ol i stap narapela lain tru long ol lain i gat nem Kristen, em ol i dai pinis long ol samting bilong spirit. God i bungim ol dispela Kristen tru i stap olsem wanpela stretpela lain kain olsem kongrigesen bilong Smerna.—Matyu 13:40-43.
13. Ol Kristen em God i bin makim ol na ol i “no bin mekim doti klos bilong ol,” ol bai kisim wanem ol blesing?
13 Ol Kristen long Sardis i stap strong inap long pinis na ol i no mekim doti “klos,” olsem pasin, i makim ol i Kristen, ol dispela Kristen i kisim gutpela samting ol i bin wet long kisim. Taim Kingdom bilong Krais i kamap pinis long heven long yia 1914, nau God i kirapim bek ol dispela Kristen na ol i kisim laip olsem spirit long heven. Ol i winim pinis pait, olsem na ol i kisim ol waitpela klos bilong makim olsem ol i no bin bagarapim liklik stretpela pasin bilong ol. Ol i bin wokabaut long liklik rot i go long laip, olsem na ol i kisim prais i stap oltaim.—Matyu 7:14; lukim tu Kamapim Tok Hait 6:9-11.
I Stap Oltaim Long Buk Bilong Laip!
14. “Buk bilong laip” em i wanem samting? Nem bilong husat i stap long en?
14 Wanem dispela “buk bilong laip” na nem bilong husat bai i stap oltaim long en? Dispela buk bilong laip em i olsem lista bilong nem bilong ol wokboi bilong Jehova em ol inap long kisim laip i stap oltaim. (Malakai 3:16) Dispela tok long hap bilong Kamapim Tok Hait i stori long nem bilong ol Kristen em God i bin makim. Tasol ol manmeri bilong kisim laip i stap oltaim long graun, nem bilong ol tu i stap long dispela buk. God inap “rausim” nem bilong man long dispela buk. (Kisim Bek 32:32, 33) Ol manmeri bilong liklik lain em Jon i piksa bilong ol, sapos nem bilong ol i stap long buk bilong laip i go inap long taim ol i dai, bai God i kirapim bek ol na bai ol i kisim laip i stap oltaim long heven na ol i no inap i dai. (KTH 2:10) Jisas i autim nem bilong ol dispela manmeri long pes bilong Papa bilong em, na long pes bilong ol ensel bilong Papa. Ol dispela manmeri i kisim gutpela pe tru!
15. Ol manmeri bilong bikpela lain ol i mas mekim wanem na bai God i raitim nem bilong ol long buk bilong laip na nem bilong ol bai i stap oltaim long en?
15 Bikpela lain manmeri, em nem bilong ol tu i stap long buk bilong laip, bai ol i abrusim bagarap long taim bilong bikpela hevi tru. Sapos ol i holimpas bilip i go inap long pinis bilong 1,000 yia bilong wok king bilong Krais, na ol i holimpas yet long taim bilong laspela traim i kamap long dispela taim, orait bai ol tu i kisim gutpela pe—bai ol i kisim laip i stap oltaim long Paradais long graun. (Daniel 12:1; KTH 7:9, 14; 20:15; 21:4) Nem bilong ol bai i stap oltaim long buk bilong laip na God i no ken rausim. Nau yu save long ol dispela tok i bin kamap long rot bilong spirit holi, orait olsem wanem? Yu save givim bel long mekim dispela samting em planti taim Jisas i kirapim yumi long mekim? Em i tok: “Orait man i gat yau, em i mas harim gut dispela tok Holi Spirit i autim long ol sios [kongrigesen].”—KTH 3:6.
[Futnot]
a Lukim Wastaua bilong Julai 15, 2005, na Mas 15, 2005.
[Piksa long pes 57]
Gutpela sapos nem bilong yu i stap oltaim long buk bilong laip