Sapta 17
Taim Krais i Kam Bek—Yumi Lukim Em Olsem Wanem?
1. (a) Krais i mekim wanem tok promis? (b) Bilong wanem i gutpela Krais i mas kam bek?
“BAI MI KAM BEK.” (Jon 14:3) Krais Jisas i tok promis olsem long ol aposel klostu long taim em i dai. Ating yu lukim planti hevi moa yet i kamap long graun na yu pilim olsem nau em i gutpela taim bilong Krais i mas i kam bek olsem king na kamapim gutpela taim long graun. Tasol Krais i kam bek olsem wanem? Husat inap lukim em? Ol i lukim em olsem wanem?
2. (a) Taim em i kam bek, em i kisim lain bilong em, em ol aposel tu, i go i stap we? (b) Long dispela hap, ol i gat wanem kain skin?
2 Taim Krais i kam bek em i no kam bilong i stap long graun. Nogat. Em i mas kisim lain bilong em, em ol manmeri ol bai wok king wantaim em, ol i go i stap wantaim em long heven. Jisas i tokim ol aposel: “Bai mi kam bek na mi kisim yupela i go i stap wantaim mi.” (Jon 14:3) Olsem na taim Krais i kam bek, ol manmeri em i kisim ol i go long heven ol i kamap spirit na ol i lukim Krais em tu em i spirit, em i kisim pinis biknem na em i gat bodi bilong heven. (1 Korin 15:44) Tasol olsem wanem long ol narapela manmeri ol i no i go long heven? Ol i lukim Krais taim em i kam bek?
EM I NO INAP KAM BEK OLSEM MAN
3. Baibel i tok wanem na yumi save ol manmeri bilong graun i no ken lukim Krais moa?
3 Taim Jisas i tokim ol aposel, “Bai mi kam bek,” em i tok moa olsem: “Liklik taim na bai ol manmeri bilong graun ol i no ken lukim mi moa.” (Jon 14:19) Jisas i tok klia, taim em i go antap pinis long heven, bihain ol manmeri bilong graun i no ken lukim em moa. Aposel Pol i tok: “Bipo mipela i tingim Krais long skin, tasol nau mipela i no save tingim em olsem moa.”—2 Korin 5:16, NW.
4. Olsem wanem yumi save taim Krais i kam bek em i wanpela spirit i gat bikpela strong na yumi no inap lukim em?
4 Tasol planti manmeri i bilip olsem: Taim Krais i kam bek em bai kisim bek dispela skin bilong em ol i bin nilim long pos, em skin bilong graun, na bai olgeta manmeri long graun ol inap lukim em. Tasol Baibel i tok, taim Krais i kam bek olsem king, olgeta ensel i kam wantaim em na em i “sindaun long sia king bilong en.” (Matyu 25:31) Sapos Jisas i kam olsem man na em i sindaun long wanpela sia king long graun, bai em i stap aninit long ol ensel, a? Tasol Baibel i tok, taim em i kam bek em i spirit na em i gat bikpela nem na namba, winim olgeta narapela ensel long heven. Ol manmeri i no inap lukim ol dispela ensel, olsem na ol i no inap lukim Jisas tu.—Filipai 2:8-11.
5. Bilong wanem Krais i no ken kam bek long skin bilong man?
5 Tru, bipo Jisas i bin daunim em yet na em i kamap man. Em i mas givim gutpela skin bilong em olsem pe bilong baim bek yumi. Jisas i tok: “Dispela bret bai mi givim . . . em i bodi bilong mi. Mi givim bai ol manmeri long graun ol i ken kisim laip.” (Jon 6:51) Jisas i givim skin bilong em olsem ofa bilong helpim ol manmeri. Aposel Pol i tok: “Jisas Krais . . . i givim bodi bilong em yet olsem ofa wanpela taim tasol. Na long dispela em i mekim yumi kamap holi.” (Hibru 10:10) Krais i givim pinis skin bilong em olsem ofa bilong helpim ol manmeri, na em i mas mekim wanpela taim tasol. Olsem na taim em i kam bek em i no ken kisim bek dispela skin na kamap man gen.
EM I NO KISIM SKIN BILONG GRAUN I GO LONG HEVEN
6. Bilong wanem planti manmeri i ting Krais i kisim skin bilong em bilong graun i go antap long heven?
6 Tasol planti man i ting Krais i kisim skin bilong graun i go long heven, long wanem taim Jisas i kirap bek, skin bilong em i no i stap moa long matmat. (Mak 16:5-7) Na tu, taim Jisas i kirap bek em i kamap long ai bilong ol disaipel long skin bilong graun bambai ol i ken save em i kirap bek na em i stap laip. Na wanpela taim em i tokim Tomas long putim han bilong em i go insait long hul i stap long sait bilong em, bambai Tomas i ken save tru em i kirap bek pinis. (Jon 20:24-27) Tasol i no olsem taim Krais i kirap bek em i kisim bek dispela skin bilong graun ol i bin nilim long pos. Nogat.
7. Taim Krais i kirap bek, olsem wanem yumi save em i kamap wanpela spirit na i go long heven?
7 Baibel i tok klia, olsem: “[Krais] i stap man, na ol i kilim em i dai, tasol long spirit em i kirap na i stap laip.” (1 Pita 3:18) Ol manmeri i gat skin bilong graun ol i no inap i stap long heven. Baibel i stori long ol manmeri ol i bilong kirap bek na i stap long heven na i tok: “Bodi yumi planim, em i bilong graun. Bodi i kirap bek, em i bilong heven. . . . Man bilong dispela graun [olsem man i gat bodi bilong dispela graun] em i no inap kisim kingdom bilong God.” (1 Korin 15:44-50) Ol manmeri i kisim bodi bilong heven na kamap spirit, ol tasol inap i stap long heven.
8. Taim Krais i dai, olsem wanem long skin bilong em, dispela skin bilong graun?
8 Tasol ol disaipel i lukim matmat bilong Jisas i stap nating, a? Olsem na wanem samting i painim skin bilong em? God i kisim. Tasol bilong wanem God i kisim? Em i laik truim wanpela tok profet bilong Baibel. (Sam 16:10; Aposel 2:31) Olsem na Jehova i kisim skin bilong Jisas na ol man i no save Jehova i putim we, olsem em i bin mekim long skin bilong Moses. (Diuteronomi 34:5, 6) Na tu, sapos Jehova i larim skin bilong Jisas i stap long matmat, ol disaipel i no inap save em i kirap bek pinis o nogat. Long wanem long dispela taim ol i no save gut long ol samting God i laik mekim.
9. Taim Krais i kirap bek, olsem wanem bihain Tomas inap putim han bilong em i go insait long hul i stap long sait bilong Krais?
9 Tasol Tomas inap putim han i go insait long hul i stap long sait bilong Jisas, olsem na ating Jisas i kisim bek dispela skin ol i bin nilim long pos, a? Nogat. Jisas i tanim tasol i kamap man o kisim skin bilong man, olsem sampela ensel i bin mekim bipo. Na bilong helpim Tomas long bilip tru, em i kisim wanpela skin i gat mak bilong nil na spia long en. Em i tanim i kamap olsem man tru, em inap kaikai na dring, olsem ol ensel i bin mekim taim ol go lukim Ebraham.—Jenesis 18:8; Hibru 13:2.
10. Olsem wanem yumi save Jisas i tanim narapela narapela skin?
10 Tru, Jisas i kamap long ai bilong Tomas long wanpela skin i kain olsem dispela skin ol i bin nilim long pos. Tasol taim em i kamap long ai bilong ol disaipel, em i tanim narapela narapela skin. Olsem na taim Maria bilong Makdala i lukim em, Maria i ting em i man bilong bosim gaden. Na long ol narapela taim tu ol disaipel i no luksave kwik long em, long wanem skin bilong em i olsem bilong narapela man, tasol ol i harim sampela tok em i mekim o lukim sampela pasin em i mekim na nau ol i save, em Jisas tasol.—Jon 20:14-16; 21:6, 7; Luk 24:30, 31.
11, 12. (a) Taim Krais i lusim graun i go antap, em i go olsem wanem? (b) Olsem na em i mas kam bek olsem wanem?
11 Inap fopela ten de em i stap na sampela taim em i tanim skin bilong man na kamap long ol disaipel. (Aposel 1:3) Na bihain em i go antap long heven. Long dispela taim tupela ensel i tokim ol aposel, “em bambai i kam bek gen wankain olsem nau yupela i lukim em i go long heven.” (Aposel 1:11) Bilong wanem ol i tok olsem? Ol i no tok em bai kam bek long wankain skin; nogat; ol i tok em bai kam bek “wankain olsem nau yupela i lukim em i go.” Orait, taim Jisas i lusim ol aposel na i go antap, em i go olsem wanem? I no gat planti man i bung na singaut samting. Nogat. Ol aposel tasol i save em i go antap. Ol narapela manmeri, nogat.
12 Yumi ken tingim stori bilong Baibel long dispela samting. Baibel i tok: “Ol i lukluk i stap, na em i go antap. Na wanpela klaut i kisim em i go, na ol i no lukim em moa.” (Aposel 1:9) Olsem na taim Jisas i kirap long i go antap, klaut o sno bilong antap i haitim em na ai bilong ol i no inap lukim em moa. Em i spirit na long bodi bilong heven em i go antap. (1 Pita 3:18) Olsem na taim em i kam bek, em i mas i kam olsem spirit, long bodi bilong heven, na ol man i no inap lukim em.
OLSEM WANEM OLGETA AI I LUKIM EM?
13. Wanem insait bilong dispela tok, ‘olgeta man bai lukim Krais long ai bilong ol yet’ taim em i kam bek?
13 Orait, olsem wanem long tok bilong Revelesen 1:7 i tok: “Harim! Em i laik i kam namel long klaut, na olgeta man bai ol i lukim em long ai bilong ol yet. Olgeta man i bin sutim em long spia na nil, bai ol i lukim em tu. Na olgeta man bilong graun bai ol i tingting planti long em, na bai ol i paitim bros bilong ol yet na krai nogut.” Baibel i no tok ol bai lukim em long ai tru bilong ol; nogat. Ol bai lukim em long tingting bilong ol, olsem ol bai save em i kam pinis.—Efesas 1:18.
14. (a) Ol man i bin “sutim em long spia na nil” ol i makim husat? (b) Bihain, taim olgeta man i save Krais i kam bek pinis na i stap, bilong wanem sampela man bai ol i krai nogut?
14 Ol man i bin “sutim em long spia na nil” ol i dai pinis longtaim. Olsem na ol i makim sampela man bilong nau ol i bihainim pasin bilong ol na mekim nogut long lain bilong Krais nau ol i stap long graun. (Matyu 25:40, 45) Liklik taim na Krais bai kirap kilim i dai ol kain man nogut olsem. Ol i kisim toksave pinis long dispela samting, olsem na taim dispela strafe i painim ol, bai ol i “lukim” o save long as bilong en. Na bai ol i krai nogut!
KRAIS I MAS KAM BEK LONG GRAUN O NOGAT?
15. Sampela taim dispela tok ‘kam bek’ i gat wanem insait bilong en?
15 Taim wanpela man i tok, ‘Bai mi kam bek,’ i no olsem em i mas kam bek tru long dispela ples em i stap long en taim em i mekim dispela tok. Nogat. Olsem bipo Jehova i bin tokim Ebraham: “Bihain wanpela yia i go pinis, bai mi kam bek, na bai Sera i karim pikinini man.” Orait, yu ting God Jehova i kam daun tru long graun bilong mekim dispela samting? Nogat, a? Baibel i tok: “Yawe i helpim Sera olsem em i tok pinis.” (Jenesis 18:14, NW; 21:1) Olsem na taim Jehova i tok, “Bai mi kam bek,” insait bilong dispela tok i olsem bai em i lukluk i kam daun long graun bilong helpim Sera olsem em i tok pinis.
16. (a) Taim Krais i tok ‘Bai mi kam bek,’ wanem insait bilong dispela tok? (b) Wanem taim Krais i kam bek? Na long dispela taim wanem samting i kamap?
16 Olsem tasol taim Krais i tok, “Bai mi kam bek,” i no olsem em i mas kam bek tru long dispela graun. Nogat. Insait bilong dispela tok i olsem: Em i kisim strong bilong bosim graun, na i olsem em i lukluk i kam daun long graun bilong mekim dispela wok. Em i no ken lusim sia king bilong em long heven na i kam daun tru long graun bilong mekim dispela wok. Nogat. Baibel i soim yumi pinis, yia 1914 C.E. em dispela taim God i makim bilong Krais i mas i kam bek olsem king. Long dispela taim wanpela maus i singaut long heven na i tok: “Nau . . . strong bilong [God] i kamap pinis long ples klia, na em i stap king! Na Krais bilong en i kisim pinis bikpela namba!”—Revelesen 12:10.
17. Yumi no inap lukim Krais i kam bek, olsem na em i givim wanem samting long yumi bambai yumi inap save em i kam bek pinis?
17 Yumi no inap lukim Krais i kam bek, tasol yumi inap save em i kam bek pinis. Krais yet i kolim sampela samting yumi inap lukim na i olsem “mak,” na bai yumi inap save em i kam bek pinis i stap, na pasin bilong dispela graun i laik pinis. Orait, nau yumi ken skelim dispela “mak.”
[Piksa long pes 142]
Krais i givim skin bilong em olsem ofa. Em i no ken kisim bek dispela skin na kamap man gen
[Ol Piksa long pes 144, 145]
Taim Jisas i kirap bek, bilong wanem Maria bilong Makdala i ting em i man bilong bosim gaden?
Dispela skin bilong Jisas Tomas i putim han i go insait long en, em dispela skin ol i bin nilim long pos o olsem wanem?
[Piksa long pes 147]
Krais i mas kam bek wankain olsem em i go. Orait, em i go olsem wanem?