Yumi save kirap nogut long ol kain hos olsem na ol man i sindaun long en. Tasol yumi kirap nogut tru long ol hos em man bilong raitim ol tok bilong Revelesen long Baibel em i stori long ol. Ol dispela hos i no hos tru; ol i narapela kain. Ol i olsem piksa na i makim samting i stap hait. Planti man ol i no save long as bilong dispela tok piksa long Revelesen.

Lukim dispela fopela hos Bilong Revelesen—ol i ron spid i kam! Ol man i sindaun long hos ol i sindaun gut long en. Wanpela i holim bainat. Lukim kala bilong ol hos. Ol i narapela narapela kain. Wanpela em i waitpela, wanpela em i retpela, wanpela em i blakpela, wanpela em i yelopela. Tru tumas, ol dispela hos i narapela kain!

Man bilong raitim dispela tok long Baibel, em aposel Jon, em i stori gut long ol dispela hos na ol man i sindaun long en. Em i tok: “Mi lukim wanpela waitpela hos, na man i sindaun long en i holim banara. Ol i givim em wanpela hat [king]. Na em i go na i wok long winim pait nau, ․․․ Na narapela hos i kamap, em i retpela. Ol i givim strong long man i sindaun long dispela hos. Na em inap long tekewe gutaim bilong ol manmeri bilong graun na ol i ken kilim i dai ol arapela man. Olsem na ol i givim em wanpela bikpela bainat Bilong mekim dispela wok. ․․․ na mi lukim wanpela blakpela hos. Na man i sindaun long en i holim wanpela skel long han bilong en. Na mi harim samting olsem wanpela maus i toktok ․․․, na dispela maus i tok olsem: ‘Yu skelim wanpela liklik sospen wit long pe Bilong tu kina [pe bilong wok bilong wanpela de]. Na yu skelim tripela liklik sospen bali long pe bilong tu kina [pe bilong wok bilong wanpela de]. ․․․ na mi lukim wanpela yelopela hos. Na man i sindaun long en, nem bilong en Dai. Na [Hades] i bihainim em i kam. Tupela bai i brukim ol manmeri long 4-pela lain, na ol i givim strong long tupela long kilim i dai wanpela lain. Na tupela i kilim ol i dai long bainat, na long hangre, na long kain kain sik, na long ol wel abus bilong graun.”—Revelesen 6:2-8.

Kirap long taim Jon i raitim dispela tok long pastaim, planti man i kaunim, na ol i no save long insait bilong en. Ol dispela narapela kain hos i makim wanem samting? Wanem taim ol i kirap long ron i go? Ol i ron i go na dispela i mekim sampela samting long i stap bilong ol manmeri long nau o nogat? Ol man i gat kain kain tingting long ol samting ol dispela hos na man i sindaun long en i makim, na ol i gat kain kain tingting tu long taim ol hos i kirap long ron i go.

Ol man i gat planti kain kain tingting moa yet long dispela waitpela hos na man i sindaun long en. Olsem: Wanpela bikpela buk bilong ol Katolik (New Catholic Encyclopedia) i tok, dispela waitpela hos i makim olsem ‘gutnius bilong Krais i win o ol bikpela gavman i gat king ol i win.’

Wanpela man i raitim buk na em i stori long tok bilong Danyel na Revelesen long Baibel (buk Daniel and the Revelation bilong Uriah Smith). Em i tok: “Wanpela waitpela hos ․․․ em i gutpela piksa bilong bikpela wok bilong gutnius long taim bilong ol Kristen bilong pastaim. ․․․ Hos i waitpela na dispela i makim bilip bilong ol Kristen long dispela taim i gutpela tru na i no bagarap liklik.”

Na wanpela Baibel i kamapim tu insait bilong ol tok bilong Baibel (The Expositor’s Bible) em i tok: ‘Man i sindaun long namba wan hos em i no makim Krais yet; em i makim wok bilong Krais taim em i kamap strong na i win long pastaim, na i makim dispela wok bai i kamap strong moa long bihain. Yumi kisim save olsem dispela wok i kamap hia long graun, na dispela kingdom i stap namel long yumi, na ol man i birua long dispela bai ol i bagarap.’ Tasol Woodrow Kroll (bilong The Christian Jew Foundation) i tok, man i sindaun long waitpela hos i makim Birua Bilong Krais.

HUSAT inap save long as bilong tok piksa bilong ol dispela hos long Revelesen? Long Danyel 2:47 Baibel i tok Jehova em i Man bilong kamapim as bilong ol tok hait. Em yet i givim tingting long ol man i raitim tok bilong Baibel. Em i as bilong olgeta tok bilong Baibel, olsem na em i as bilong dispela tok piksa tu, na em inap tokim yumi long insait bilong en. Olsem na yumi mas skelim ol tok bilong em long Baibel na bai yumi inap save long ol samting ol dispela hos i gat kain kain kala ol i makim.—Emos 3:7; 2 Timoti 3:16; 2 Pita 1:21.

Ol tok long kirap bilong Revelesen i helpim yumi long save long as bilong dispela tok piksa, long wanem em i tok ol tok piksa bilong Revelesen i makim sampela samting i mas kamap bihain, olsem bihain long taim aposel Jon i bin raitim ol dispela tok long yia 96 C.E. Long Revelesen 1:10, aposel Jon i tok, ol dispela samting i mas kamap “long de bilong Bikpela.”—Lukim tu 1 Korin 1:8; 5:5.

Orait, yumi ken tingim dispela samting na nau yumi ken skelim ol dispela hos na man i sindaun long en. Pastaim yumi mas save waitpela hos na man i sindaun long en i makim wanem samting tru na bai yumi inap save long ol samting ol narapela hos i makim.

Skelim Tingting Bilong Sampela Man

Tok i kamap paslain long dispela i bin kamapim tingting bilong sampela man long dispela waitpela hos na man i sindaun long en. Sampela man i ting dispela hos na man i sindaun long en i makim ‘gutnius bilong Krais i win o bikpela gavman i gat king ol i win.’ Tasol gutnius bilong Krais i no bin kirapim olgeta man long tanim bel na bilip long ol samting God bai mekim long rot bilong Krais. Na ol bikpela gavman i gat king, ol tu i no win. Nau long dispela taim ol dispela gavman i wok long bruk bruk.

Sampela man ol i ting dispela waitpela hos na man i sindaun long en i makim bilip bilong ol Kristen bilong pastaim i gutpela olgeta. Orait, olsem wanem long dispela tingting bilong ol? Ol dispela man i lusim tingting long wanpela samting, olsem: Dispela tok piksa i makim samting i mas kamap bihain. Jon i raitim dispela tok taim em i stap kalabus long ailan Patmos long yia 96, olsem na dispela tok i no ken makim samting bilong ol Kristen bilong pastaim.

Na sampela man i ting dispela waitpela hos i no makim Krais yet, em i makim wok bilong Krais. Na ol i tok Kingdom bilong em ‘i stap namel long yumi,’ olsem insait long bel bilong yumi. Tasol wok bilong Krais na lotu Kristen i no kamap bihain long taim Jon i raitim ol tok bilong Revelesen. Nogat. Dispela wok i kamap strong paslain long taim Jon i raitim dispela tok.

Taim Jisas i tok, “Kingdom bilong God em i stap namel long yupela,” em i no toktok wantaim ol gutpela disaipel bilong em. Nogat. Em i bekim tok long wanpela askim ol Farisi i bin mekim, em ol i man bilong tupela maus na ol i no bilip long em. Em i laik tokim ol dispela Farisi olsem em yet em i King bilong dispela Kingdom bihain bai kamap na em i stap namel long ol.—Luk 17:21.

Orait, olsem wanem long tingting bilong sampela man ol i ting man i sindaun long waitpela hos em i makim Birua Bilong Krais? Revelesen i tok dispela man “em i go na i wok long winim pait nau, na em i gat wok bilong winim planti pait moa,” tasol Baibel i no tok Birua Bilong Krais bai mekim olsem. Nogat. (Revelesen 6:2) Man i sindaun long waitpela hos em bai win tru. Em i no ken lus long pait. Em bai bagarapim olgeta birua bilong em.

Baibel i Helpim Yumi long Save

Bihain liklik long dispela tok, Man bilong kamapim as bilong ol tok hait em i kamapim long ples klia dispela man i sindaun long waitpela hos em i husat. Long Revelesen 19:11-16 Jon i lukim gen wanpela waitpela hos na ol dispela tok i makim klia man i sindaun long hos em i husat.

Jon i lukim planti samting olsem piksa i makim sampela samting i mas kamap long bihain, na long ol dispela piksa tupela taim em i lukim wanpela waitpela hos, olsem na yumi save dispela hos em wanpela tasol, na ol tok i stori long en i makim narapela narapela wok bilong man i sindaun long dispela hos. Namba tu taim Jon i lukim dispela hos ol i kolim nem bilong man i sindaun long hos. Nem bilong em i olsem: “Man i lukautim gut wok bilong en,” na “Man i save mekim pasin tru tasol,” na “Tok bilong God,” na “King bilong olgeta king, na Bikpela bilong olgeta bikpela man.” Ol dispela nem i helpim yumi long save tru man i sindaun long waitpela hos em i husat. Em Bikpela bilong yumi, Krais Jisas tasol! (Lukim tu Revelesen 17:14.) Tasol dispela tok i makim Jisas long wanem taim? Em i makim em long wanpela taim bihain long taim bilong ol Kristen bilong pastaim, bihain long taim Jon i raitim ol tok bilong Revelesen. Jon i tok, ol i givim wanpela hat king long dispela man i sindaun long waitpela hos, olsem na yumi save dispela i makim taim bilong Krais Jisas i kirap mekim wok king. Jon i lukim em i holim banara tu, long wanem, taim em i kamap king “em i go na i wok long winim pait nau, na em i gat wok bilong winim planti pait moa.”

I gat narapela samting tu i helpim yumi long save dispela tok i makim samting i mas kamap long bihain, em olsem: Taim Jon i lukim ol dispela samting olsem piksa na em i raitim tok bilong Revelesen, em samting olsem 60 yia bihain long taim Jisas i dai na kirap bek na i go antap long heven. Taim em i go bek long heven God i tok, em i mas sindaun long han sut bilong Em na wetim taim bilong God i putim ol birua bilong em “i go aninit long em.”—Hibru 10:12, 13.

Em i Raun i Go

Olsem na waitpela hos i kirap long raun i go taim Krais Jisas i kamap King bilong Kingdom bilong God long heven. Long dispela taim God i salim em i go na givim tok long em olsem: ‘Yu go daunim ol birua bilong yu.’ (Sam 110:2) Wanem taim dispela samting i kamap?

Sam 45:3-7 i stori long Krais Jisas i kisim hat king na kamap king long heven. Na long Hibru 1:8, 9 Pol i kolim tok bilong ves 6 na 7 bilong dispela sam na makim Pikinini bilong God, em Krais Jisas. Ol save na tok bilong Baibel ol Witnes Bilong Jehova i kamapim i makim Krais Jisas i bin kamap king long heven long pinis bilong taim bilong ol man bilong ol arapela lain, olsem long yia 1914.—Luk 21:24.a

Olsem na sapos ol man i tok dispela man i sindaun long waitpela hos em i raun i go paslain long yia 1914, dispela tok i no stret. Na dispela man i sindaun long waitpela hos em i go pas, olsem na ol samting ol narapela hos i makim i mas kamap long wankain taim o bihain long taim em i kirap long raun i go. Olsem na dispela fopela hos na ol man i sindaun long en i raun i go long kirap bilong “taim bilong pinis” long yia 1914 na i kam inap long nau. Kirap long yia 1914 na bihain long dispela taim yumi lukim ol mak bilong “las taim” i kamap.—Danyel 12:4, NW; 2 Timoti 3:1-5, 13.

Ol Narapela Hos na Ol Man i Sindaun long En