Em Taim Bilong Was i Stap!
“YUPELA i save pinis long dispela taim nau yumi stap long en. Nau em i taim bilong yupela i lusim slip na kirap.” (Rom 13:11) Aposel Pol i raitim ol dispela tok long ol Kristen long Rom 14 yia samting paslain long taim bagarap i painim ol Jerusalem long yia 70 C.E. Long ol samting bilong spirit ol Juda Kristen i was i stap, na ol i no stap long Jerusalem long dispela taim nogut, olsem na ol i abrusim bagarap o wok kalabus. Tasol olsem wanem ol i bin save olsem ol i mas ranawe na i no ken stap long dispela taun?
Jisas i toksave olsem ol birua bai kam banisim Jerusalem na ol bai bagarapim ol manmeri bilong en. (Luk 19:43, 44) Bihain, Jisas i toksave long ol gutpela disaipel bilong em long ol mak bai kamap na i no hatwok long ol i luksave long dispela samting. (Luk 21:7–24) Long ol dispela Kristen i stap long Jerusalem, taim Jisas i tok ol i mas ranawe lusim taun, dispela i makim olsem ol i mas lusim haus na wok bilong ol. Tasol taim ol i was i stap na ranawe, orait dispela i helpim ol long abrusim bagarap.
Taim Jisas i tok profet olsem Jerusalem bai bagarap, ol disaipel bilong em i askim em: “Yu tokim mipela, wanem taim ol dispela samting bai i kamap? Wanem mak bai i kamap pastaim, na mipela i ken save, yu laik i kam bek na dispela graun i laik pinis?” (Matyu 24:3) Bilong bekim askim bilong ol, Jisas i stori long taim em bai kam bek long bihain, na em i skelim wantaim ol samting i bin kamap klostu long taim bilong Bikpela Tait long taim bilong Noa. Jisas i tok olsem dispela Bikpela Tait i bin bagarapim olgeta man nogut. (Matyu 24:21, 37–39) Tok bilong em i makim olsem God bai kirap gen na pinisim ol wok nogut bilong ol man. Orait em bai mekim i go inap long wanem mak? Em bai pinisim tru olgeta pasin nogut bilong dispela graun! (Skelim wantaim 2 Pita 3:5, 6.) Yu ting dispela samting inap kamap long taim bilong yumi?
Yu Ting Olgeta Samting i Stap Wankain Tasol?
I no planti Juda long bipo i bin ting olsem taun holi bilong ol, em Jerusalem, inap bagarap. Na ol manmeri i stap klostu long wanpela maunten paia tasol ol i no lukim wanpela i pairap, ol i gat wankain tingting olsem long dispela maunten paia. Taim ol tok lukaut i kamap, planti taim ol man i save tok, “Mi no ting dispela samting bai kamap long taim bilong mi.” Wanpela man bilong skelim maunten paia, em Lionel Wilson, em i tok olsem: “Ol maunten paia i save pairap long olgeta 200 o 300 yia. Sapos papamama bilong yu i mas lusim haus bilong ol na go long narapela hap, long wanem, wanpela maunten i pairap, bai yu tingting planti. Tasol sapos dispela samting i bin painim ol tumbuna bilong yu, orait em i olsem stori tumbuna tasol.”
Tasol ol stretpela toksave inap helpim yumi long luksave long ol mak bilong bagarap i laik kamap na yumi tingim gut dispela samting. Namel long ol dispela man i bin ranawe lusim maunten Peli, i gat wanpela i save long ol maunten paia na em i save long ol mak bilong en taim em i laik pairap. Na ol i bin luksave gut long kain mak olsem i bin kamap klostu long taim maunten Pinatubo i pairap. Ol man bilong skelim maunten paia ol i bin skelim gut ol samting i wok long kamap insait long maunten na dispela i kirapim ol manmeri i stap long dispela hap long lusim dispela ples.
Tru, sampela bai sakim yet ol mak bilong bagarap i laik kamap na ol bai strong long tok olsem i no gat wanpela samting bai kamap. Ating ol bai tok bilas long ol man i mekim ol samting bilong ranawe. Aposel Pita i tok profet olsem ol dispela kain tingting bai kamap bikpela tru long taim bilong yumi. Em i tok: “Bikpela samting yupela i mas save long en, em i olsem. Long taim bilong las de, ol man bilong tok bilas bai i kamap, na ol bai i bihainim laik nogut bilong bel bilong ol. Bai ol i tok bilas olsem, ‘Em i bin tok olsem em bai i kam bek gen, a? Orait em i stap we? Em i no inap i kam. Taim ol tumbuna i dai, na i kam inap long nau, olgeta samting i stap wankain olsem bipo tru, taim graun i kamap.’ ”—2 Pita 3:3, 4.
Olsem wanem? Yu bilip olsem yumi stap long “taim bilong las de”? Long wanpela buk (The Columbia History of the World), John A. Garraty na Peter Gay i mekim wanpela askim olsem: “Olsem wanem? Yumi lukim sindaun bilong yumi i laik bagarap?” Na ol dispela man i skelim gut ol hevi bilong gavman, pasin raskol, na pasin bilong bikhet na sakim tok i go bikpela long olgeta hap, ol famili i bruk, ol man bilong saiens na ol nupela save ol i kisim i no inap stretim hevi bilong ol man, ol man i pait bilong kisim namba, na long olgeta hap bilong graun ol man i no tingting moa long bihainim stretpela pasin, na ol i no tingting moa long lotu. Orait nau 2-pela man hia i tok olsem: “Ol dispela samting i kamap i olsem mak bilong toksave olsem pinis i klostu.”
I gat as tru na yumi inap bilip olsem “pinis” i klostu. Yumi no ken pret na ting olsem dispela graun yet bai pinis, nogat, long wanem, Baibel i tok olsem God i bin “putim dispela graun i stap long ples bilong en, na graun i stap strong olgeta. Em i no inap surik liklik. Nogat tru.” (Song 104:5) Tasol yumi mas tingting olsem liklik taim nau ol pasin nogut bilong dispela graun bai pinis, em dispela samting i bin nogutim tru ol manmeri. Olsem wanem na yumi tok olsem? Long wanem, yumi ken lukim planti samting i kamap na i makim olsem pinis bilong pasin bilong dispela graun i laik kamap, em ol dispela mak Krais Jisas yet i bin tok long en. (Lukim blok “Sampela Mak Bilong Taim Bilong Las De.”) Yu ken skelim tok bilong Jisas wantaim ol samting i kamap long graun. Taim yu mekim olsem, dispela bai helpim yu long tingting stret long ol samting yu na famili bilong yu bai mekim. Tasol bilong wanem yu mas kirap mekim long nau?
As Tru na Yumi Mas Was i Stap
Tru, ating ol saientis bai save long taim maunten i laik pairap, tasol ol i no inap save long taim stret bai em i pairap. Olsem tasol, taim Jisas i toktok long pinis bilong pasin nogut bilong dispela graun, em i tok: “Tasol i no gat wanpela man i save wanem de na wanem aua dispela ol samting bai i kamap. Ol ensel long heven i no save, na Pikinini tu em i no save. Papa wanpela tasol em i save.” (Matyu 24:36) Yumi no save wanem taim stret bai pasin bilong dispela graun i pinis, olsem na Jisas i givim tok lukaut long yumi olsem: “Yupela tingim dispela samting. Sapos papa bilong haus i [bin] save pastaim long wanem taim long nait stilman bai i kam, orait em bai i was i stap na em bai i no inap larim stilman i brukim haus na i kam insait. Olsem na yupela tu i mas redi. Pikinini Bilong Man bai i kam long wanpela taim yupela i no ting em bai i kam.”—Matyu 24:43, 44.
Tok bilong Jisas i makim olsem dispela bagarap bai kamap bilong pinisim pasin nogut bilong graun, em bai kamap kwiktaim na ol man bai kirap nogut long en. Yumi tu, maski yumi disaipel bilong em, yumi mas kamapim klia olsem ‘yumi redi.’ Yumi olsem dispela papa bilong haus i bin kirap nogut long taim stilman i brukim haus bilong em, long wanem, em i no save wanem taim dispela stilman bai kam.
Olsem tasol, aposel Pol i tokim ol Kristen long Tesalonaika: “Yupela yet i save pinis, De bilong Bikpela bai i kamap wantu tasol olsem stilman i kam long nait. . . . Yupela ol brata yupela i no i stap long tudak, na yupela bai i kirap nogut long lukim dispela de i kamap, olsem man i kirap nogut long lukim stilman i kam. Nogat.” Pol i tok moa olsem: “Olsem na nogut yumi slip, olsem ol arapela man. Mobeta ai bilong yumi i op i stap, na tingting bilong yumi i klia.” (1 Tesalonaika 5:2, 4, 6) Wanem insait bilong dispela tok olsem “ai bilong yumi i op i stap, na tingting bilong yumi i klia”?
Ol Kristen bilong bipo i bin ranawe lusim Jerusalem, tasol taim yumi ranawe i go long ples bilong hait, yumi no ranawe lusim wanpela taun yumi stap long en, nogat. Bihain long taim em i tokim ol wanbilip long Rom long lusim slip na kirap, Pol i strong long kirapim ol long “lusim olgeta pasin bilong tudak” na “kisim Bikpela Jisas Krais.” (Rom 13:12, 14) Taim yumi bihainim stret lek bilong Jisas, bai yumi was i stap na pilim tru dispela taim yumi stap long en, na yumi was i stap long ol samting bilong spirit na bai God i lukautim yumi taim em i pinisim pasin nogut bilong dispela graun.—1 Pita 2:21.
Ol man i bihainim Krais Jisas ol i amamas long i stap bilong ol, na i stap bilong ol i gat as bilong en. Planti milion Witnes Bilong Jehova i kisim save olsem dispela plang ol Kristen i karim bilong i stap disaipel em i gutpela na i no hatwok long karim. (Matyu 11:29, 30) Namba wan samting man inap mekim bilong kamap disaipel i olsem ol i mas kisim ‘save long God, em wanpela tasol i God tru, na ol i save long Jisas Krais, em God i bin salim i kam.’ (Jon 17:3) Ol Witnes i save go long planti milion haus long olgeta wik bilong helpim ol man “bai ol i ken save long as bilong tok tru.” (1 Timoti 2:4) Ol bai amamas long mekim stadi Baibel wantaim yu long haus bilong yu na i no gat pe. Na taim yu kisim save long Tok Bilong God, yu tu bai bilip tru olsem dispela taim bilong yumi long nau i narapela kain. Tru tumas, em i taim tru bilong was i stap na no ken slip!
[Blok/Ol Piksa long pes 7]
SAMPELA MAK BILONG TAIM BILONG LAS DE
“Ol man bilong sampela lain bai i kirapim pait long ol narapela narapela lain”; ‘gutpela taim bai pinis long graun.’ (Matyu 24:7; KTH 6:4)
Tupela bikpela pait bilong olgeta hap na planti ol narapela pait long dispela taim, ol i pinisim gutpela taim long graun. John Keegan, em man bilong raitim ol stori bilong ol samting i bin kamap bipo, em i tok: “Namba Wan na Namba 2 Pait Bilong Olgeta Hap i narapela kain long ol narapela pait bilong bipo; ol i bikpela tru, na ol i kamap long olgeta hap, na ol i mekim wok long planti mani kago na ol man. . . . Dispela tupela bikpela pait i bin kilim i dai planti manmeri, ol i pinisim planti mani samting na i kamapim planti bagarap long planti hap bilong graun na givim bikpela pen na hevi long planti man, winim ol narapela pait i bin kamap long bipo.” Long nau pait i save bagarapim planti meri na pikinini, winim ol soldia. Wanpela lain bilong Yunaitet Nesen i tok, long 10-pela yia i go pinis, ol i bin kilim i dai 2 milion pikinini long ol pait.—United Nations Children’s Fund.
“Bikpela hangre” (Matyu 24:7; KTH 6:5, 6:8)
Long 1996, pe bilong wit na kon samting i go antap tru. Olsem wanem na pe i go antap tru? Ol kantri i save bungim ol wit na kon samting bilong mekim wok long en long taim bilong hangre, tasol nau ol i sot tru na ol i gat inap olsem bilong 50 de tasol i stap. Pe bilong ol kaikai em ol man i save kisim planti taim i go antap tru na dispela i makim olsem planti handet milion manmeri i stap rabis tru na ol i stap hangre—na planti bilong ol em ol pikinini.
“Graun bai i guria” (Matyu 24:7)
Insait long 2,500 yia i go pinis, 9-pela guria tasol i bin kilim i dai 100,000 manmeri long olgeta wan wan guria. Fopela bilong ol dispela guria i bin kamap bihain long 1914.
“Pasin nogut bai i kamap bikpela” (Matyu 24:12)
Yia 2000 i wok long kam klostu, na pasin nogut, olsem pasin bilong sakim lo, i kamap bikpela tru. Ol paitman i mekim pasin birua na kilim i dai planti man, ol man i kilim i dai ol man, na ol i kilim i dai planti manmeri wantaim—em ol dispela samting i insait long ol pasin nogut i kamap long taim bilong las de.
‘Long sampela hap bai i gat taim bilong bikpela sik’ (Luk 21:11)
Long 1990 i go inap 1999, i luk olsem 30 milion manmeri bai i dai long sik TB. Ol binatang jem bilong kamapim ol sik i kisim bikpela strong na winim strong bilong ol marasin bilong kilim ol. Narapela sik nogut tru i save kilim ol man, em malaria, em i bin kisim olsem 400 milion manmeri na i kilim i dai 2 milion long olgeta yia. I kam inap long yia 1999, ol i ting sik AIDS bai kilim i dai 1.8 milion manmeri long ol wan wan yia. Wanpela nius i tok: “Long nau planti sik nogut tru i painim ol man.”—State of the World 1996.
“Bai ol i autim dispela gutnius bilong kingdom bilong God long olgeta hap bilong graun.” (Matyu 24:14)
Long 1997, ol Witnes Bilong Jehova i lusim 1 bilion aua samting long autim gutnius bilong Kingdom. Winim 5 milion Witnes i save kisim dispela tok i go long ol manmeri bilong 232 kantri long olgeta taim.
[Ol Kredit Lain]
FAO photo/B. Imevbore
U.S. Coast Guard photo
[Piksa long pes 4, 5]
Ol Kristen i ranawe lusim Jerusalem, long wanem, ol i was i stap