Bikpela Lain i Mekim Wok Bilong God
“Long san na long nait ol i save stap long haus bilong [God ] na mekim wok bilong en.”—KTH 7:15.
LONG Me 31, 1935, bikpela amamas i kamap long wanpela kibung bilong ol Witnes Bilong Jehova long Wosington. Long dispela kibung ol i bin kisim save tru long dispela lain planti manmeri tru bilong Kamapim Tok Hait 7:9 na dispela save i stret wantaim ol narapela tok bilong Baibel na ol samting i wok long kamap long dispela taim.
2 Sikspela wik samting paslain long dispela taim, long bung bilong Kaikai Bilong Bikpela, 10,681 bilong olgeta manmeri i bung (olsem wanpela long olgeta 6-pela 6-pela) i no bin kisim bret na wain bilong Memorial, na 3,688 bilong ol i save autim tok bilong Kingdom bilong God. Bilong wanem ol i no kisim? Ol save ol i bin kisim long Baibel i givim tingting long ol na ol i save, God i no bin singautim ol bilong kisim laip long heven, tasol i gat narapela rot na ol i ken kisim ol gutpela samting long pasin sori bilong Jehova. Olsem na long dispela kibung, taim man bilong mekim tok i askim ol: “Ol man i gat tingting long i stap oltaim long graun, plis yupela kirap sanap,” em nau, wanem samting i kamap? Planti tausen manmeri ol i kirap sanap, na olgeta long kibung i singaut amamas.
3 Ol samting ol i bin lainim long dispela kibung i kirapim ol long wok strong tru long autim tok. Ol i pilim tru olsem nau, paslain long pinis bilong dispela olpela pasin bilong graun, planti manmeri tru—i no sampela tausen tasol—bai i gat rot na ol inap insait long samting Jehova i putim bambai ol man i ken abrusim bagarap na i stap laip, na bai ol i ken tingting long i stap oltaim oltaim long Paradais long graun. Dispela tok i strongim tru bel bilong ol man i laikim tumas tok i tru! Nau ol Witnes Bilong Jehova i save, i gat bikpela wok i stap—em wok bilong amamas. Planti yia bihain, John Booth—em i bin kam insait long Lain Bilong Bosim Ol Witnes—em i tok: “Long dispela kibung mipela i bin kisim planti gutpela samting bilong amamas long en.”
4 Long ol yia bihain long dispela kibung, lain bilong ol Witnes Bilong Jehova i go bikpela hariap tru. Maski ol man i bin mekim nogut tru long ol long taim bilong Namba 2 Pait, insait long 10-pela yia bihain namba bilong ol i go bikpela tru (olsem olgeta wanpela wanpela i kamap 3-pela 3-pela). Long 1935 i gat 56,153 manmeri i autim tok, tasol long 1994, winim 4,900,000 ol i autim tok bilong Kingdom long 230 samting kantri. Bikpela hap tru bilong dispela lain ol i gat tingting long i stap insait long dispela lain Jehova i orait long ol i ken kisim laip i stap oltaim long Paradais long graun na i stap gutpela olgeta. Taim yumi skelim dispela lain wantaim liklik lain, yumi ken tok, tru tumas, ol i kamap bikpela lain moa yet. Ol i no tok tasol olsem ol i gat bilip, nogat. (Jems 1:22; 2:14-17) Olgeta i save autim gutnius bilong Kingdom long ol narapela man. Olsem wanem long yu? Yu insait long dispela lain i stap amamas? Dispela wok bilong autim tok olsem wanpela Witnes, em i wanpela bikpela mak bilong ol; tasol i gat sampela samting moa ol i mas mekim.
‘Sanap Long Pes Bilong Sia King’
5 Long dispela piksa, aposel Jon i bin lukim dispela bikpela lain “ol i sanap i stap long pes bilong sia king na long ai bilong Pikinini Sipsip.” (KTH 7:9) Long dispela hap bilong Baibel, dispela tok “ol i sanap i stap long pes bilong sia king” i makim olsem ol i daun tru long Jehova, em i King. I gat planti samting i insait long dispela. Olsem: (1) Ol i save, i stret Jehova yet i makim wanem samting i stret long ol wokman bilong em i ken mekim na wanem samting i no stret. (Stat 2:16, 17; Aisaia 5:20, 21) (2) Ol i harim tok bilong Jehova taim em i givim tok long ol long rot bilong Baibel. (Lo 6:1-3; 2 Pita 1:19-21) (3) Ol i save ol i mas daun long ol man Jehova i makim bilong i stap wasman bilong ol. (1 Korin 11:3; Efesus 5:22, 23; 6:1-3; Hibru 13:17) (4) Maski ol i gat sin, ol i wok strong long bihainim tok bilong God i kam long rot bilong ol dispela wasman; ol i no bel nogut long mekim—bel bilong ol i laik tru long mekim. (Sindaun 3:1; Jems 3:17, 18) Ol i sanap i stap long pes bilong sia king bilong mekim wok bilong Jehova, na ol i daun tru long em na laikim em tru. Dispela tok “sanap” i makim olsem Man i sindaun long sia king em i orait long dispela bikpela lain. (Skelim wantaim Kamapim Tok Hait 6:16, 17.) I gat wanem as na em i orait long ol?
“Longpela Waitpela Klos”
6 Aposel Jon i tok, ol dispela planti manmeri tru em i lukim, ol i “putim ol longpela waitpela klos.” Waitpela klos i makim ol i olsem stretpela man long ai bilong Jehova. Olsem wanem ol i kamap olsem? Olsem Jon i lukim long piksa, ol i sanap “long ai bilong Pikinini Sipsip.” Ol i bilip olsem Krais Jisas em i “Pikinini Sipsip Bilong God. Em i kam bilong tekewe sin bilong olgeta manmeri bilong graun.” (Jon 1:29) Jon i harim nek bilong wanpela elda, long dispela piksa em i stap long pes bilong sia king bilong God na em i tok: “Ol i bin wasim ol klos bilong ol long blut bilong Pikinini Sipsip, na ol klos i kamap waitpela. Olsem na ol i save sanap long pes bilong sia king bilong God.” (KTH 7:14, 15) Dispela tok piksa long ol i bin wasim klos bilong ol, em i makim olsem ol i bilip long blut bilong Krais i baim bek ol man. Ol i no wanbel tasol long tok bilong Baibel long Krais i dai bilong baim bek ol man. Bel bilong ol i pilim tru, na dispela i senisim pasin tru bilong ol. Olsem na “long bel” yumi save bilip. (Rom 10:9, 10) Dispela i bosim olgeta samting ol i mekim long nau i go inap long bihain bihain tu. Ol i bilip long ofa bilong Krais na ol i givim skin bilong ol long Jehova, na ol i kisim baptais long wara bilong kamapim klia olsem ol i dediket pinis long em, na ol samting ol i mekim long i stap bilong ol i stret wantaim dediket bilong ol. Olsem na nau God i orait long ol. Em i gutpela samting tru, a? Long olgeta taim yumi mas was gut na bai yumi ken i stap olsem long ai bilong Em!—2 Korin 5:14, 15.
7 Oganaisesen bilong Jehova i save tingim tru ol na planti taim em i tokaut long ol tingting na pasin em inap mekim doti o bagarapim klos, olsem pasin Kristen, bilong ol, na maski ol i tok ol i bilong dispela bikpela lain, pasin bilong ol i no stret wantaim dispela lain em Kamapim Tok Hait 7:9, 10 i tok profet long ol. (1 Pita 1:15, 16) Wastaua bilong 1941 na bihain long en i strongim ol tok em i bin mekim bipo, na planti taim em i tokaut olsem i no stret liklik sapos yumi autim tok long ol man na bihain yumi mekim pasin pamuk. (1 Tesalonaika 4:3; Hibru 13:4) Long 1947 Wastaua i tokaut strong olsem lo bilong Jehova long marit Kristen em i wankain long olgeta hap; maski pasin bilong ples i orait long sampela pasin, ol man i marit long tupela o planti meri ol i no inap i stap Witnes Bilong Jehova.—Matyu 19:4-6; Taitus 1:5, 6.
8 Long 1973 ol Witnes long olgeta hap i kisim save olsem ol i mas givim baksait olgeta long tabak, maski ol i stap we—i no long haus Kingdom o long taim bilong autim tok tasol; ol i mas givim baksait long en long ples wok tu na long taim i no gat wanpela man i lukim ol. (2 Korin 7:1) Long 1987 long ol kibung distrik bilong ol Witnes, ol yangpela Kristen i kisim strongpela tok olsem: Bilong i stap stret long ai bilong God ol i mas was gut na no ken giaman tasol long bihainim stretpela pasin Kristen. (Song 26:1, 4) Na planti taim Wastaua i tokaut strong olsem yumi mas sakim ol tingting bilong dispela graun, long wanem, wanpela “pasin bilong Kristen i stap stret olgeta na i no gat asua long ai bilong God Papa bilong yumi, em . . . yumi mas lukautim gut wokabaut bilong yumi yet, bai pasin bilong dispela graun i no ken mekim yumi i kamap doti long ai bilong God.”—Jems 1:27.
9 Ol manmeri em bilip bilong ol i kirapim ol long i stap stret long ol samting bilong spirit na long pasin bilong ol, ol tasol bai “sanap i stap long pes bilong sia king” na God i ken orait long ol taim “bikpela hevi” i kamap pinis. Dispela lain i no kirap tasol long bihainim pasin Kristen, nogat; ol i stap gut na bihainim dispela rot i go inap long olgeta taim bihain.—Efesus 4:24.
‘Ol i Holim Lip Bilong Diwai Pam’
10 Na aposel Jon i lukim ol dispela planti manmeri tru i “holim ol lip bilong diwai pam.” Dispela i makim wanem samting? Ating taim Jon i lukim ol dispela lip bilong diwai pam em i tingim bikpela de bilong ol Juda long i stap long ol haus win, em taim bilong bikpela amamas tru, winim ol narapela bikpela de long kalenda Hibru. Ol i bin mekim long taim ol i kisim pinis kaikai bilong gaden. Olsem Lo i tok long mekim, ol i save kisim lip bilong diwai pam wantaim han bilong ol narapela diwai na ol i wokim ol haus win bilong i stap long en long dispela taim. (Wok Pris 23:39, 40; Nehemia 8:14-18) Na taim ol i stap long haus lotu na mekim song ol i kolim Halel (Song 113-118), ol i save holim ol lip bilong diwai pam. Na taim Jon i lukim ol dispela planti manmeri tru i holim ol lip bilong diwai pam, ating em i tingim dispela taim Jisas i bin sindaun long donki na i go insait long Jerusalem, na bikpela lain bilong lotuim God i holim ol lip bilong diwai pam na ol i amamas na singaut: “God i ken mekim gut long dispela man i kam long nem bilong Bikpela. Em i king bilong Israel.” (Jon 12:12, 13) Olsem na pasin bilong holim ol lip bilong diwai pam i makim olsem ol dispela planti manmeri tru i amamas long Kingdom bilong Jehova na King em i bin makim.
11 Long nau ol dispela planti manmeri tru i kamapim dispela amamas bilong ol taim ol i mekim wok bilong Jehova. Tasol i no olsem i no gat sampela hevi i painim ol, o ol i no save bel hevi o kisim pen, nogat. Tasol taim ol i mekim wok bilong Jehova na mekim ol samting em i laikim, dispela i mekim gut bel bilong ol, na ol dispela hevi i no daunim ol. Wanpela misineri i bin wok wantaim man bilong em inap 45 yia long Guatemala, em stori long dispela na i tok, long hap ol i stap long en i no gat ol samting bilong helpim sindaun bilong ol, na ol i mas wok strong, na taim ol i raun i go long ol ples bilong ol Indian bilong givim tok bilong Kingdom long ol, ol inap kisim bagarap long rot. Long pinis bilong stori em i tok: “Taim mipela i mekim dispela wok, mipela i stap amamas tru.” Maski em i lapun pinis na em i gat sik, laspela hap tok em i bin raitim long buk bilong em i tok: “Mipela i amamas long ol wok bilong mipela, na mipela i kisim gutpela samting long en.” Long olgeta hap ol Witnes Bilong Jehova i gat wankain tingting long wok bilong ol long autim tok.
‘Ol i Mekim Wok Bilong God Long San na Long Nait’
12 Dispela lain i amamas, “na long san na long nait ol i save stap long haus bilong [God] na mekim wok bilong en.” (KTH 7:15) Planti milion manmeri long olgeta hap i mekim dispela wok bilong God. Long sampela hap em i biknait na ol man i slip, tasol long ol narapela hap, san i stap antap pinis na ol Witnes i mekim wok bilong autim tok. Dispela graun i wok long tantanim, olsem na long olgeta taim, long san na nait, ol i litimapim nem bilong Jehova. (Song 86:9) Tasol dispela wok ol i mekim long san na nait, olsem Kamapim Tok Hait 7:15 i stori long en, i makim narapela samting tu ol i mekim.
13 Olgeta wan wan insait long dispela bikpela lain ol i mekim wok bilong God long san na nait. Tasol olsem wanem? Dispela i makim olsem olgeta samting ol i mekim i olsem wok bilong God? Tru, maski ol i mekim wanem, ol i lain long mekim long pasin i save litimapim nem bilong Jehova. (1 Korin 10:31; Kolosi 3:23) Tasol dispela ‘wok bilong God’ ol i mekim, em i wok tru ol i mekim bilong lotuim God. Dispela tok long mekim wok bilong God “long san na long nait” i makim olsem ol i mekim long olgeta taim na ol i wok strong long mekim.—Skelim wantaim Josua 1:8; Luk 2:37; Aposel 20:31; 2 Tesalonaika 3:8.
14 Taim ol i mekim wok bilong Jehova long banis bilong bikpela haus lotu spirit bilong em, ol dispela planti manmeri tru i wok strong long autim tok long olgeta taim. Sampela i putim mak bilong winim, olsem autim tok long olgeta wik. Sampela i mekim wok olsem painia oltaim o painia haptaim. Planti taim ol i save kirap long bikmoning yet long autim tok long ol rot na long ol stua. Bilong helpim ol man i laik harim tok i tru, sampela Witnes i save stadi wantaim ol long Baibel long nait. Na ol i save autim tok taim ol i raun long ol stua na baim kaikai, na taim ol i raun long bas samting, na long belo kaikai, na long telefon tu.
15 Na taim yumi go long ol miting bilong kongrigesen, yumi mekim wok bilong God; na wok bilong sanapim na lukautim ol haus bilong mekim ol bung Kristen long en, em tu i wok bilong God. Na taim yumi wok long strongim na helpim ol brata sista Kristen long ol samting bilong spirit na bilong skin bambai ol i ken mekim yet wok bilong Jehova, yumi mekim wok bilong God. Na i olsem tu long wok bilong ol Komiti Olsem Lain Namelman Bilong Ol Sikman Witnes na Dokta, na ol kain kain wok long Betel, na ol wok volantia long kibung—olgeta i wok bilong God. Tru tumas, taim yumi tingim Jehova long olgeta samting yumi mekim long i stap bilong yumi, yumi save mekim planti wok tru bilong em. Olsem Baibel i tok, “long san na long nait” lain bilong Jehova i save “mekim wok bilong en,” na ol i kisim bikpela amamas long dispela wok.—Aposel 20:35; 1 Timoti 1:11.
‘Bilong Olgeta Kantri na Olgeta Kain Skin na Tok Ples’
16 Dispela ol planti manmeri tru ol i bilong olgeta lain na kantri. God i no save laikim sampela lain tasol na sampela nogat. Ofa bilong Krais Jisas i bilong helpim ol manmeri bilong olgeta lain. Taim tok bilong Baibel long dispela lain planti manmeri tru i kamap ples klia long 1935, ol Witnes Bilong Jehova i autim tok long 115 kantri. Tasol long 1993 samting, wok bilong ol long painim ol man i olsem sipsip i kamap pinis long planti kantri moa, winim 230.—Mak 13:10.
17 Tasol bilong painim ol dispela manmeri, ol Witnes i no save go long ol bikpela lain tasol bilong ol kantri—ol i save go tu long ol liklik lain i gat ol narapela narapela tok ples insait long ol dispela kantri. Bilong helpim ol dispela lain, ol Witnes i save wokim ol buk na nius long 300 samting tok ples, em ol i kamapim ol tok bilong Baibel. Olsem na i gat bikpela wok bilong lainim gut ol man long tanim tok, na i mas i gat ol kompyuta bilong mekim dispela wok, na ol masin bilong wokim ol buk na nius. Insait long 5-pela yia i go pinis, i gat 36 tok ples moa ol i tanim ol buk samting long en, na 98 milion manmeri i save mekim ol dispela tok ples. Na ol Witnes i wok strong long i go long haus bilong ol dispela man bilong helpim ol long kisim save long tok bilong Baibel.—Matyu 28:19, 20.
Winim Taim Bilong “Bikpela Hevi”
18 Taim ol ensel i lusim ol win bilong bagarapim ol samting, olsem Kamapim Tok Hait 7:1 i stori long en, Jehova bai lukautim ol dispela ‘wokman bilong God’ em i makim ol pinis, na em bai lukautim dispela bikpela lain tu, em ol i bin bung wantaim ol long lotuim Jehova. Olsem ensel i bin tokim Jon, ol dispela planti manmeri tru bai abrusim bagarap long taim bilong “bikpela hevi.” Ol bai amamas moa yet na litimapim nem bilong God, na ol bai singaut strong olsem: “God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi”! Na ol gutpela wokman bilong God long heven ol tu bai singaut wantaim ol: “I tru. Yumi amamas moa yet long God bilong yumi, na yumi tokaut long biknem bilong em. Em i gat olgeta gutpela tingting, na yumi givim tenkyu long em, na litimapim nem bilong em. Em i gat strong tru. Yes, olgeta bikpela strong i stap long em.”—KTH 7:10-14.
19 Man! Em i taim bilong amamas tru! Olgeta manmeri i stap long dispela taim ol i wokman bilong dispela God em wanpela tasol i God tru! Bikpela amamas tru bilong ol, em bilong mekim wok bilong Jehova. Bai i gat planti wok bilong mekim—em wok bilong amamas! Ol i mas mekim graun i kamap Paradais. Planti tausen milion manmeri i dai pinis ol bai kirap bek na ol i mas lain long bihainim ol lo na tok bilong Jehova. Bai yumi kisim bikpela amamas tru long mekim dispela wok!
Yu Laik Bekim Wanem Tok?
◻ Ol samting i kamap long 1935 i mekim wanem long wok bilong ol Witnes Bilong Jehova long autim tok?
◻ Planti manmeri tru i “sanap i stap long pes bilong sia king,” na dispela i makim wanem samting?
◻ Sapos yumi bilip tru long blut bilong Pikinini Sipsip, dispela i mas mekim wanem long i stap bilong yumi?
◻ Ol i holim ol lip bilong diwai pam, na dispela i makim wanem samting?
◻ Olsem wanem ol dispela planti manmeri tru i mekim wok bilong God long san na long nait?
[Askim Bilong Stadi]
1. Long 1935 ol i bin kisim wanem bikpela save?
2. Wanem samting i makim olsem planti ol i save God i no bin singautim ol bilong kisim laip long heven?
3. Taim ol i kisim save pinis olsem dispela lain planti manmeri tru ol i husat, olsem wanem dispela i givim nupela strong long ol long autim tok? Ol Witnes i gat wanem tingting long dispela samting?
4. (a) Kirap long 1935, wok bilong bungim ol dispela planti manmeri tru i go bikpela inap long wanem mak? (b) Olsem wanem dispela bikpela lain i kamapim long ples klia olsem ol i no bilip nating—bilip bilong ol i kamapim wok?
5. Ol dispela planti manmeri tru i “sanap i stap long pes bilong sia king,” na dispela i makim wanem samting?
6. (a) Ol dispela planti manmeri tru i “putim ol waitpela klos,” na dispela i makim wanem samting? (b) Olsem wanem dispela bikpela lain i kamap olsem stretpela manmeri long ai bilong Jehova? (c) Dispela bikpela lain i bilip long blut bilong Krais i bin baim bek ol man, na dispela i mekim wanem long i stap bilong ol?
7, 8. Olsem wanem oganaisesen bilong Jehova i bin helpim dispela bikpela lain na bai klos bilong ol i stap klin na i no gat doti long en?
9. Taim dispela “bikpela hevi” i pinis, husat ol bai sanap long pes bilong sia king bilong God na em bai orait long ol?
10. Jon i bin lukim ol dispela planti manmeri tru i holim ol lip bilong diwai pam, na dispela i makim wanem samting?
11. Bilong wanem ol wokman bilong God i save kisim bikpela amamas long mekim wok bilong Jehova?
12. Long san na long nait Jehova i save lukim wanem samting hia long graun?
13. Baibel i makim wanem insait bilong dispela tok long ol i mekim wok bilong God “long san na long nait”?
14. Wanem samting bai mekim na wok bilong yumi long autim tok i stret wantaim dispela tok long mekim wok bilong God “long san na long nait”?
15. Wok bilong autim tok na wanem ol narapela wok em i wok bilong God?
16. Baibel i tok dispela lain planti manmeri tru ol i “bilong olgeta kantri,” na dispela tok i wok long kamap tru olsem wanem?
17. Ol Witnes Bilong Jehova i wok long mekim wanem bilong helpim ol manmeri bilong ‘olgeta lain na olgeta kain skin’ long kam insait long dispela lain planti manmeri tru?
18. (a) Taim dispela “bikpela hevi” i kirap, Jehova bai lukautim husat? (b) Wanem ol tok bilong amamas bai kamap long dispela taim?
19. Ol manmeri i abrusim bagarap long dispela taim ol bai givim bel long mekim wanem ol wok bilong amamas?
[Ol Piksa long pes 16, 17]
Ol i mekim wok bilong God long olgeta taim, na ol i givim bel na wok strong long mekim