Tok Bilong Jehova i Gat Laip
Sampela Bikpela Tok Bilong Buk Kamapim Tok Hait—Namba 1 Hap
TAIM lapun aposel Jon i kalabus i stap long ailan Patmos, em i lukim ol tok profet i olsem driman, o visen, inap 16 olgeta. Long ol dispela visen, Jon i lukim ol wok em God Jehova na Jisas Krais i mekim long de bilong Bikpela—dispela haptaim i kirap long taim Kingdom Bilong God i kamap long 1914, na dispela haptaim bai i pinis bihain long Wan Tausen Yia Bilong Krais i Stap King. Jon i bin raitim Buk Kamapim Tok Hait long yia 96 C.E. samting, na dispela buk i stori gut long ol dispela visen.
Orait nau yumi ken skelim sampela bikpela tok bilong Kamapim Tok Hait 1:1–12:17—ol dispela sapta i stori long sevenpela visen em Jon i bin lukim paslain. Yumi laik kisim save long ol dispela visen, long wanem, ol i makim ol samting i wok long kamap long graun long nau na ol i kamapim klia ol samting Jehova bai mekim klostu nau. Ol manmeri em ol i bilip na ritim ol tok i stori long ol dispela visen, dispela bai mekim gut bel bilong ol na strongim ol.—Hi. 4:12.
“PIKININI SIPSIP” I RAUSIM 6-PELA GRIS KANDEL
Pastaim, Jon i lukim Jisas Krais taim em i kisim pinis glori, na Jon i kisim ol tok we em i mas “raitim long buk na salim i go long ol 7-pela sios.” (KTH 1:10, 11) Bihain long dispela, Jon i lukim wanpela sia king i stap long heven. Man i sindaun long dispela sia king, em i holim long han sut bilong em wanpela pepa ol i bin raunim na pasim strong long sevenpela gris kandel. Dispela man husat i “gutpela man, inap long em i ken . . . opim dispela buk” em “dispela Laion i bin kamap long lain Juda,” o “Pikinini Sipsip . . . i gat 7-pela kom na 7-pela ai.”—KTH 4:2; 5:1, 2, 5, 6.
Namba 3 visen i soim samting i kamap taim “Pikinini Sipsip” i rausim ol gris kandel i pasim buk, kirap long namba 1 gris kandel i go inap long namba 6 gris kandel. Taim em i rausim namba 6 gris kandel, bikpela guria na bikpela de bilong belhat i kamap. (KTH 6:1, 12, 17) Long visen i kamap bihain long dispela, Jon i lukim ‘4-pela ensel i holimpas ol 4-pela win bilong graun,’ i go inap long taim God i putim mak pinis long olgeta manmeri bilong lain 144,000. “Planti manmeri tru” em ol i no bin kisim mak, ol i “sanap i stap long pes bilong sia king na long ai bilong Pikinini Sipsip.”—KTH 7:1, 9.
Bekim Bilong Ol Askim Bilong Baibel:
1:4; 3:1; 4:5; 5:6—Dispela tok, “7-pela spirit” i makim wanem samting? Namba 7 i makim samting em inap olgeta long ai bilong God. Olsem na tok i go long “7-pela sios,” em i go tu long olgeta manmeri bilong God em ol i bung wantaim long 100,000 kongrigesen long olgeta hap bilong graun. (KTH 1:11, 20) Jehova i save givim holi spirit inap long skel bilong wok em i laik mekim. Olsem na dispela tok, “7-pela spirit,” i makim olsem holi spirit i inapim tru wok bilong en long givim save na kamapim blesing long ol manmeri i putim gut yau long dispela tok profet. I luk olsem Buk Kamapim Tok Hait i brukim ol samting em i stori long en long sevenpela sevenpela hap. Namba 7 i makim samting em inap olgeta, na tru tumas, dispela buk i stori long “samting God i laik mekim na tok bilong en i bin hait i stap,” na “God i mekim i kamap tru,” olsem inap olgeta.—KTH 10:7.
1:8, 17—Ol dispela tok, ‘paslain tru na las tru’ na ‘namba wan tru na bihain tru,’ i makim husat? Dispela tok, ‘paslain tru na las tru,’ i makim Jehova na i kamapim klia olsem paslain long em, i no gat wanpela god i gat olgeta strong i bin i stap, na bihain tu bai i no gat. Em yet em i ‘as bilong olgeta samting, na em i save pinisim olgeta wok em i mekim.’ (KTH 21:6; 22:13) Long Kamapim Tok Hait 22:13, Baibel i kolim Jehova olsem man i stap ‘namba wan tru na bihain tru,’ na dispela i makim olsem i no gat wanpela man i bin i stap paslain long em o bai i stap bihain long em, nogat. Tasol ol tok bilong sapta 1 bilong Buk Kamapim Tok Hait i soim olsem dispela biknem, ‘namba wan tru na bihain tru,’ i makim Jisas Krais. Em i namba wan man tru em God i bin kirapim bek na em i kamap spirit long heven na em i no inap i dai moa, na em i olsem laspela man em Jehova yet i bin kirapim bek.—Kl. 1:18.
2:7—Dispela tok, “gaden bilong God” i makim wanem samting? Ol dispela tok i go long ol Kristen God i bin makim, olsem na dispela tok i makim heven—ples we God yet i stap long en. Ol manmeri em God i bin makim na ol i stap gut long em, ol bai kisim prais, olsem ol bai “kisim kaikai long diwai bilong givim laip.” Ol bai i stap laip oltaim oltaim na ol i no inap i dai moa.—1 Ko. 15:53.
3:7—Jisas i kisim “ki bilong Devit” long wanem taim? Em i yusim dispela ki olsem wanem? Taim Jisas i kisim baptais long 29 C.E., em i kamap olsem Man Bilong Kamap King long lain bilong Devit. Tasol Jisas i kisim ki bilong Devit long yia 33 C.E. taim em i kisim biknem na sindaun long han sut bilong God long heven. Long dispela taim em i kisim namba bilong lukautim olgeta wok samting long Kingdom Bilong Devit. Kirap long dispela taim, Jisas i yusim dispela ki long opim rot bilong mekim ol gutpela wok bilong Kingdom. Long 1919, Jisas i putim “ki bilong haus bilong King Devit” long sol bilong “wokboi i gat gutpela tingting.” Em i mekim olsem taim em i makim lain wokboi long “bosim olgeta samting bilong en.”—Ais. 22:22; Mt. 24:45, 47.
3:12—Wanem “nupela nem” bilong Jisas? Dispela nupela nem i makim nupela wok Jisas i kisim na sampela gutpela wok moa Jehova i givim long em. (Fl. 2:9-11) Ol narapela man i no inap save long dispela nem long wankain pasin olsem Jisas i save long en, tasol Jisas i raitim dispela nem long ol brata bilong em long heven, na long dispela rot em i mekim ol i pas gut tru wantaim em. (KTH 19:12) Na em i orait long ol tu i ken mekim sampela gutpela wok em Jehova i bin givim long em.
Skul Yumi Kisim:
1:3. “Taim [bilong God long givim strafe long lain bilong Satan] i laik kamap nau,” olsem na em i bikpela samting long yumi mas kliagut long ol tok bilong Buk Kamapim Tok Hait na mekim ol samting i stret long yumi mekim.
3:17, 18. Sapos yumi laik kisim planti samting bilong spirit, orait yumi mas baim gol long Jisas, em “gol . . . paia i bin kukim na rausim tru olgeta samting nogut i stap long en.” Dispela i makim olsem yumi mas taitim bun long mekim planti gutpela pasin. (1 Ti. 6:17-19) Na tu, yumi mas pasim “waitpela klos,” em samting i makim olsem yumi ol disaipel bilong Krais. Na yumi mas kisim “marasin bilong putim long ai,” olsem ol gutpela tok i stap long ol nius Wastaua bambai yumi inap kliagut long ol tok bilong God.—KTH 19:8.
7:13, 14. Ol dispela 24 hetman i makim lain 144,000 taim ol i kisim pinis glori long heven, em ples we ol i mekim wok olsem king na pris. Long lain Israel bilong bipo, King Devit i bin skelim ol pris i go long 24 grup, na dispela i olsem piksa bilong lain 24 hetman. Wanpela bilong ol dispela hetman i tokim Jon long bikpela lain manmeri i makim husat. Olsem na yumi inap save olsem ol Kristen em God i bin makim, ol i bin kirap bek paslain liklik long 1935. Bilong wanem yumi inap tok olsem? Long wanem, long 1935 ol Kristen God i bin makim, ol i kisim save long bikpela lain manmeri i makim husat.—Lu. 22:28-30; KTH 4:4; 7:9.
SEVENPELA BIUGEL I KRAI TAIM OL I RAUSIM NAMBA 7 GRIS KANDEL
Pikinini Sipsip i rausim namba 7 gris kandel. Sevenpela ensel i kisim sevenpela biugel. I olsem ol i bin tilim ol lain man i go long tripela hap, na taim sikspela ensel i winim ol biugel bilong ol, ol i salim toksave bilong kot bilong God i go long “wanpela hap” bilong ol lain man—em lain Kristendom. (KTH 8:1, 2, 7-12; 9:15, 18) Jon i lukim dispela samting long namba 5 visen. Long visen i kamap bihain long dispela, Jon tu i mekim sampela samting, em i kaikai dispela liklik buk na em i metaim haus bilong God. Taim ensel i winim pinis namba 7 biugel, ol lain i stap long heven i singaut strong olsem: “Bikpela bilong yumi wantaim dispela man em i makim bilong kisim bek ol manmeri bilong en, tupela i kamap king bilong olgeta hap bilong graun.”—KTH 10:10; 11:1, 15.
Namba 7 visen i skruim sampela stori moa i go long ol tok i stap long Kamapim Tok Hait 11:15, 17. Wanpela bikpela sain i kamap long heven. Dispela meri long heven i karim wanpela pikinini man. Ol i rausim Satan long heven. Satan i belhat long dispela meri long heven na em i go bilong “pait long ol arapela pikinini bilong [dispela meri].”—KTH 12:1, 5, 9, 17.
Bekim Bilong Ol Askim Bilong Baibel:
8:1-5—Bilong wanem i no gat nois o toktok i kamap long heven? Ol i tromoi wanem samting i go daun long graun? I olsem i no gat nois o toktok i kamap long heven bambai God i ken harim “ol prea bilong ol manmeri bilong [em]” husat i stap long graun. Dispela samting i kamap long pinis bilong Wol Woa 1. Ol Kristen God i bin makim, ol i no bin i go antap long heven long pinis bilong Taim Bilong Ol Arapela Lain, olsem planti manmeri i ting bai kamap. Ol i bin karim planti hevi long taim bilong woa. Olsem na nau ol i beten strong long God i ken stiaim ol. God i harim beten bilong ol, na i olsem ensel i tromoi paia i kam daun long graun na dispela i kirapim ol Kristen God i bin makim long mekim bikpela wok moa. Ol i no planti, tasol ol i kirap autim tok long Kingdom Bilong God long olgeta hap bilong graun, na dispela tok i olsem paia i kukim lain Kristendom. Ol i autim ol strongpela tok lukaut bilong Baibel, na ol dispela strongpela tok lukaut i olsem klaut i pairap. Na ol tok i tru bilong Baibel i kamap ples klia olsem lait bilong klaut i sut i go. Na ol lotu giaman i guria nogut tru, na i olsem bikpela guria i seksekim ol.
8:6-12; 9:1, 13; 11:15—Long wanem taim sevenpela ensel i redi long winim ol biugel? Krai bilong ol biugel i kamap long wanem taim? Krai bilong ol biugel i makim wanem samting? Ol ensel i bin givim ol tok bilong stiaim lain em Jon i piksa bilong ol, em lain i bin kisim bek strong. Dispela samting i bin kamap long 1919 i go inap 1922, em haptaim we ol ensel i bin redi long winim ol biugel. Ol dispela lain God i bin makim, ol i wok strong long stretim gen ol samting bilong wok autim tok, na sanapim ol faktori na ofis samting bilong wokim ol buk na nius. (KTH 12:13, 14) Krai bilong ol biugel i makim wok em ol manmeri bilong God i mekim wantaim ol ensel long tokaut long strafe bilong Jehova bai painim lain bilong Satan. Dispela wok i bin kirap taim kibung i kamap long Cedar Point, Ohio, long 1922, na dispela wok i stap yet inap long nau na bai i pinis long taim bilong bikpela hevi tru.
8:13; 9:12; 11:14—Olsem wanem krai bilong laspela tripela biugel i makim ol “bikpela hevi”? Krai bilong fopela biugel bilong pastaim i kamapim long ples klia olsem lain Kristendom i dai pinis long ol samting bilong spirit. Na krai bilong laspela tripela biugel i makim ol bikpela hevi, olsem ol i makim stret tripela samting i mas kamap. Krai bilong namba 5 biugel i makim samting i bin kamap long 1919, taim ol manmeri bilong God i lusim kalabus i olsem “hul” na ol i kamap fri na ol i kirap wok strong long autim tok. Dispela samting i bin givim bikpela pen long lain Kristendom. (KTH 9:1) Krai bilong namba 6 biugel i stori long bikpela lain soldia i sindaun long ol hos na dispela i makim bikpela wok bilong autim tok long olgeta hap bilong graun, kirap long 1922. Krai bilong laspela biugel i makim samting i kamap taim Kingdom Bilong Mesaia i kamap nupela.
Skul Yumi Kisim:
9:10, 19. Baibel i as bilong ol strongpela tok i stap long ol buk na nius i kam long “wokboi i gat gutpela tingting,” na ol dispela tok i gat strong bilong givim pen long man. (Mt. 24:45) Ol dispela tok i olsem tel bilong ol grasopa i gat “nil [bilong skopion] bilong sutim marasin nogut bilong givim pen,” na i olsem ol hos em “tel bilong ol i olsem snek.” Bilong wanem i olsem? Long wanem, ol dispela buk na nius i kamapim ol strongpela toksave bilong taim bilong Jehova long “mekim save long ol birua.” (Ais. 61:2) Yumi mas strongim bel na givim bel tru long tilim ol dispela buk na nius.
9:20, 21. Planti manmeri husat i gat pasin daun na ol i sindaun long ol kantri i no gat nem Kristen, ol i bin putim gut yau long ol tok yumi autim. Tasol yumi save olsem planti bilong ol bai i no inap tanim bel, na Baibel i kolim dispela lain olsem “ol arapela manmeri.” Maski i olsem, yumi wok strong yet long autim tok.
12:15, 16. “Graun”—sampela lain bilong Satan yet long graun, o ol gavman bilong sampela kantri—ol i strongim pasin bilong larim ol man i bihainim wanem lotu ol i laikim. Kirap long 1940 samting, ol dispela gavman, olsem graun, “i opim maus bilong en na i dringim dispela wara [pasin bilong mekim nogut long ol Witnes], snek i bin trautim long maus bilong en.” Tru tumas, taim Jehova i laik mekim, em inap stiaim ol gavman long mekim ol samting bilong kamapim laik bilong em. Olsem na i stret tru long Sindaun 21:1 i tok: “Bikpela i save stiaim tingting bilong king na king i save bihainim laik bilong Bikpela, olsem wara i bihainim baret.” Dispela i mas kirapim yumi long bilip strong long God.