Sapta 6
Kamapim As Bilong Tok Hait
1. Gutpela driman em Kamapim Tok Hait 1:10-17 i stori long en i mas kirapim yumi long mekim wanem?
LONG driman Jon i lukim Jisas i kisim pinis biknem na Jon i pilim tru. Sapos yumi bin i stap long dispela taim na yumi tu i lukim Jisas i stap long bikpela lait na em i gat biknem, ating bai yumi tu i pundaun klostu long lek bilong em olsem Jon i bin mekim. (KTH 1:10-17) Stori bilong dispela driman i stap long Baibel inap long nau bilong kirapim yumi long mekim wok. Olsem Jon, yumi tu i mas pilim tru ol samting dispela driman i makim. Yumi mas tingim gut bikpela namba Jisas i bin kisim—em i stap King pinis, na em i Hetpris na Jas—na yumi mas daun long em.—Filipai 2:5-11.
“Mi Man i Stap Namba Wan Tru na i Stap Bihain Tru”
2. (a) Jisas i kolim wanem nem long em yet? (b) Taim Jehova i tok, “Mi bin i stap pastaim tru” na “las tru,” wanem insait bilong dispela tok? (c) Taim Jisas i tok, “Mi man i stap namba wan tru” na “bihain tru,” dispela i bilong makim wanem samting?
2 Tasol yumi no ken guria nogut. Jisas i tok promis long Jon, olsem nau Jon i stori: “Em i putim han sut bilong en long mi, na em i tok olsem, ‘Yu no ken pret. Mi man i stap namba wan tru na i stap bihain tru. Na mi man bilong i stap laip.’ ” (KTH 1:17b, 18a) Long Aisaia 44:6 Jehova i stori long bikpela namba bilong em yet, em wanpela tasol em i God i gat olgeta strong, na i stret em i tok olsem: “Mi bin i stap pastaim tru na bihain bai mi stap las tru. Na i no gat narapela god moa i stap, mi wanpela tasol.”a Taim Jisas i stori long em yet na em i tok, em i “man i stap namba wan tru na i stap bihain tru,” i no olsem em i tok em i bikpela olsem Jehova, em Bikpela Man bilong wokim olgeta samting. Nogat. Em i kolim dispela olsem wanpela bikpela nem bilong em, em God yet i bin givim long em. Long hap bilong Aisaia, Jehova i tokaut tasol olsem em wanpela tasol em i God tru. Em i stap God oltaim na i no gat narapela god. (1 Timoti 1:17) Long hap bilong Kamapim Tok Hait, Jisas i kolim dispela tok olsem wanpela nem bilong em bilong makim kirap bek bilong em.
3. (a) Olsem wanem Jisas em i “namba wan tru” na “bihain tru” o las tru? (b) Wanem insait bilong dispela tok olsem Jisas i holim “ki bilong Dai na bilong Ples bilong ol man i dai pinis”?
3 Jisas em i “namba wan tru” bilong kirap bek na kamap spirit long heven na i no inap i dai moa. (Kolosi 1:18) Na em i “bihain tru,” olsem laspela man tru em Jehova yet i kirapim bek olsem. Olsem na nau em i “stap laip oltaim oltaim.” Nau em i no inap i dai, olsem Papa bilong em Jehova i no save dai, em Baibel i kolim Jehova olsem “God i save stap laip oltaim.” (KTH 7:2; Song 42:2) Jisas yet bai kirapim bek ol narapela man. Em i tok, “Kirap bek, em mi yet. Na laip, em mi yet.” (Jon 11:25) Na em i tokim Jon: “Bipo mi dai pinis, tasol lukim, nau mi stap laip oltaim oltaim. Na mi holim ol ki bilong Dai na bilong Ples bilong ol man i dai pinis.” (KTH 1:18b) Jehova i givim strong long Jisas bilong kirapim bek ol man i dai pinis. Olsem na Jisas inap tok, em i holim ki bilong opim dua long ol man i kalabus long matmat (“ples bilong ol man i dai pinis”).—Lukim Matyu 16:18.
4. Nau Jisas i kolim gen wanem tok em i bin givim long Jon? Em bilong helpim husat?
4 Nau Jisas i kolim gen dispela tok em i bin givim long Jon, em i tok: “Yu mas raitim tok bilong ol dispela samting yu lukim, em ol samting i stap nau na ol samting bai i kamap bihain.” (KTH 1:19) Jon bai stori long wanem samting moa bilong givim save long yumi na bai yumi amamas long en?
Ol Sta na Ol Lam
5. Jisas i stori olsem wanem long ol “7-pela sta” na ol “7-pela lam”?
5 Jon i bin lukim Jisas i sanap namel long 7-pela lam gol na em i holim 7-pela sta long han sut bilong em. (KTH 1:12, 13, 16) Nau Jisas i kamapim as bilong dispela, em i tok: “Yu bin lukim dispela 7-pela sta i stap long han sut bilong mi, na dispela 7-pela lam gol. Dispela em i olsem tok hait, na as bilong en i olsem: Dispela 7-pela sta, em ol ensel bilong ol 7-pela sios [kongrigesen]. Na dispela 7-pela lam, em ol 7-pela sios [kongrigesen] yet.”—KTH 1:20.
6. Ol “7-pela sta” i makim wanem samting? Bilong wanem Jisas i tok Jon i mas raitim ol dispela tok i go long dispela lain stret?
6 Ol “sta” i olsem “ol ensel bilong ol 7-pela sios [kongrigesen].” Long Kamapim Tok Hait sampela taim ol sta i makim ol ensel tru, tasol Jisas i no ken givim wok long wanpela man bilong graun bilong raitim tok i go long ol ensel long heven. Olsem na dispela “7-pela sta” i mas makim ol man ol i wasman o elda long ol dispela kongrigesen, em ol i olsem ol man bilong givim tok bilong Jisas long ol kongrigesen.b Jisas i tokim Jon long raitim ol tok i go long ol “sta,” long wanem ol i gat wok olsem wasman bilong lukautim ol sipsip bilong Jehova.—Aposel 20:28.
7. (a) Jisas i givim tok long wanpela ensel tasol bilong olgeta wan wan kongrigesen, tasol olsem wanem yumi save, dispela i no makim olsem olgeta wan wan kongrigesen i gat wanpela elda tasol long en? (b) Orait, dispela 7-pela sta i stap long han sut bilong Jisas ol i makim husat tru?
7 Jisas i givim tok long wanpela “ensel” tasol long olgeta wan wan kongrigesen, olsem na ating olgeta wan wan kongrigesen i gat wanpela elda tasol long en? Nogat. Long taim bilong Pol, kongrigesen bilong Efesus i gat sampela elda long en, i no wanpela tasol. (KTH 2:1; Aposel 20:17) Olsem na long taim bilong Jon, taim em i salim ol dispela tok i go long ol 7-pela sta bambai ol i ken kaunim long ol kongrigesen (em kongrigesen long Efesus tu), ol sta i makim olgeta wan wan insait long ol lain elda bilong liklik lain Kristen God i bin makim. Na long nau tu ol wasman i save kaunim ol pas long kongrigesen bilong ol, em ol pas Lain Bilong Bosim Ol Witnes i bin salim. Ol wasman long Lain Bilong Bosim Ol Witnes ol i man em God i bin makim ol na ol i wok aninit long Jisas. Lain elda long olgeta wan wan kongrigesen ol i gat wok bilong helpim kongrigesen long bihainim ol tok bilong Jisas. Ol dispela tok ol i kisim i no bilong helpim ol elda tasol. Nogat. Em bilong helpim olgeta manmeri i bung wantaim kongrigesen.—Lukim Kamapim Tok Hait 2:11a.
8. Ol elda i stap long han sut bilong Jisas na dispela i makim wanem samting?
8 Jisas em i Het bilong kongrigesen, olsem na i stret Baibel i tok ol elda i stap long han sut bilong em—em i bosim ol na stiaim ol. (Kolosi 1:18) Em i Nambawan Wasman bilong sipsip na ol elda i olsem ol nambatu wasman.—1 Pita 5:2-4.
9. (a) Ol 7-pela lam i makim wanem samting? Olsem wanem na lam i makim stret dispela lain? (b) Dispela samting Jon i lukim, ating dispela i kirapim em long tingim wanem samting?
9 Ol 7-pela lam i makim ol 7-pela kongrigesen Jon i raitim ol tok bilong Kamapim Tok Hait i go long ol. Dispela 7-pela kongrigesen em Efesus, Smerna, Pergamum, Taiataira, Sardis, Filadelfia, Laodisia. Olsem wanem na ol lam i makim ol kongrigesen? Long wanem ol Kristen wan wan na olgeta Kristen wantaim long wanpela kongrigesen ol i mas i stap ‘olsem lait long ai bilong ol manmeri’ long tudak bilong dispela graun. (Matyu 5:14-16) Na tu, long haus lotu Solomon i bin wokim i gat ol lam i stap. Olsem na taim Jon i lukim ol dispela lam, ating em i tingim ol kongrigesen bilong dispela lain em God i bin makim ol, na long tok piksa olgeta wan wan kongrigesen i olsem “haus bilong God yet,” olsem ples em spirit bilong God i stap long en. (1 Korin 3:16) Na ol samting bilong haus lotu bilong ol Juda i olsem piksa na i makim ol wok samting bilong dispela lain em God i bin makim ol—ol i bilong i stap “lain pris” long bikpela haus holi bilong Jehova long heven, na bai ol i mekim wok king. Jisas em i Hetpris bilong dispela haus holi na Jehova yet i stap long Rum Holi Tru bilong dispela haus.—1 Pita 2:4, 5, 9; Hibru 3:1; 6:20; 9:9-14, 24.
Ol i Lusim Lotu Kristen Tru
10. Long yia 70, wanem samting i bin painim lain Juda na ol man bilong lotu Juda, em ol i no bin tanim bel?
10 Taim Jon i raitim Kamapim Tok Hait, lotu Kristen i bin i stap inap olsem 60 yia pinis. Taim lotu Kristen i kamap nupela, ol Juda i kirap birua long en i go i go inap 40 yia. Na bihain, olsem long yia 70, bikpela bagarap i painim lain Juda. Ol Juda i no bin tanim bel ol i no i stap moa olsem wanpela lain i gat kantri bilong ol, na samting i holi tru long ai bilong ol, em haus lotu long Jerusalem, em i bagarap.
11. Bilong wanem i stret Nambawan Wasman i givim toksave long ol kongrigesen long bipo long sampela pasin i wok long kamap?
11 Tasol aposel Pol i tok pinis, sampela Kristen em God i bin makim ol, bai ol i lusim lotu Kristen tru. Na ol tok Jisas i givim long lapun Jon i kamapim long ples klia olsem dispela samting nogut i wok long kamap long taim bilong Jon. Jon em i laspela man bilong dispela lain i bin pasim wok bilong Satan long bagarapim lain bilong meri. (2 Tesalonaika 2:3-12; 2 Pita 2:1-3; 2 Jon 7-11) Olsem na i stret Nambawan Wasman bilong ol sipsip bilong Jehova em i mas salim tok i go long ol elda long ol dispela kongrigesen na toksave long ol long dispela pasin bilong lusim bilip em i wok long kamap. Olsem bai ol Kristen i gat stretpela bel ol i ken sanap strong na bihainim yet stretpela pasin.
12. (a) Bihain long taim bilong Jon, ol Kristen i wok long kisim wanem ol bilip giaman? (b) Lotu giaman i gat nem Kristen i bin kamap olsem wanem?
12 Ol kongrigesen long yia 96, ol i harim gut ol tok bilong Jisas o nogat, em yumi no save. Tasol yumi save, taim Jon i dai pinis, kwiktaim dispela pasin bilong lusim bilip em i kamap strong. Ol man i tok ol i “Kristen,” ol i no kolim moa nem bilong Jehova; ol i senisim dispela nem na raitim “Bikpela” o “God” tasol long Baibel. Na inap olsem 350 yia bihain long Krais, dispela bilip bilong God Triwan i bin kam insait long ol kongrigesen. Na ol i wok long kisim bilip olsem yumi gat tewel. Na bihain King Konstantin bilong Rom i orait long lotu “Kristen,” na dispela i kamapim Kristendom, we Gavman na Lotu i wok wantaim inap 1,000 yia. I no hatwok long kamap kain “Kristen” olsem. Sampela lain olgeta ol i stretim liklik sampela bilip haiden bilong ol na ol i kisim dispela nupela lotu. Planti bikpela man bilong dispela lotu giaman i gat nem Kristen ol i kamap hatpela bos bilong gavman, na ol i subim ol man long bihainim ol bilip giaman bilong ol—sapos ol man i no laik bihainim, ol i save kirapim pait long ol na kilim ol i dai long bainat.
13. Jisas i tokim ol Kristen ol i no ken brukim lain, tasol ol man i lusim pinis lotu Kristen tru ol i bin mekim wanem?
13 Ol dispela man i lusim pinis lotu Kristen tru ol i sakim stret ol tok Jisas i bin givim long ol 7-pela kongrigesen. Jisas i bin toksave long ol Efesus long ol i mas holimpas pasin bilong laikim tru God olsem long taim ol i bilip nupela. (KTH 2:4) Tasol ol dispela Kristen giaman i no givim bel long Jehova na ol i no stap wanbel—ol i kirapim ol pait na narapela i mekim nogut tru long narapela. (1 Jon 4:20) Jisas i bin toksave long kongrigesen bilong Pergamum long ol i no ken brukim lain. Tasol 150 yia samting bihain long Krais i gat kain kain lain bilong lotu, na long nau tu i gat planti tausen kain kain lain bilong lotu i gat nem Kristen, tasol ol i save birua birua.—KTH 2:15.
14. (a) Jisas i tokim ol Kristen ol i mas was gut, nogut ol i dai pinis long ol samting bilong spirit, tasol ol man i holim nating nem Kristen ol i bin mekim wanem? (b) Jisas i tambuim pasin bilong lotuim god giaman na pasin pamuk, tasol ol man i gat nem Kristen, ol i bin mekim wanem?
14 Jisas i bin tokim kongrigesen long Sardis ol i mas was gut, nogut ol i dai pinis long ol samting bilong spirit. (KTH 3:1) Ol man i holim nating nem Kristen ol i kain olsem ol dispela Kristen long Sardis long bipo—kwiktaim ol i lusim tingting long ol wok Kristen ol i mas mekim na ol i givim wok long sampela man tasol bilong autim tok, em ol pris na pasto, na ol i baim ol bilong mekim dispela wok. Jisas i tokim kongrigesen long Taiataira ol i mas was gut long pasin bilong lotuim god giaman na pasin pamuk. (KTH 2:20) Tasol ol lotu i gat nem Kristen ol i orait long ol man i lotuim ol piksa na ol god giaman. Na ol i kirapim ol man long laikim tumas mani kago na long litimapim kantri—ol dispela pasin tu i olsem pasin bilong lotuim god giaman. Tru, sampela tisa bilong lotu ol i tokaut olsem pamuk i samting nogut, tasol ol dispela lotu i no gat tok long ol manmeri i mekim ol kain pasin sem—ol i larim ol tasol.
15. Ol tok Jisas i bin givim long ol 7-pela kongrigesen i kamapim long ples klia wanem samting bilong ol lotu i holim nating nem Kristen? Ol pris pasto bilong ol dispela misin i bin kamap wanem samting?
15 Olsem na ol tok Jisas i bin givim long ol 7-pela kongrigesen i kamapim long ples klia olsem olgeta misin i holim nating nem Kristen ol i no lain tru bilong God Jehova. Tru tumas, ol pris pasto bilong ol i nambawan lain bilong Satan. Aposel Pol i kolim ol dispela pris pasto olsem “man bilong sakim lo” na em i tok, bai ol i “kamap ples klia long strong bilong Satan tasol. Na long pasin giaman bilong Satan [ol] bai i mekim olgeta kain strongpela wok na . . . giamanim ol dispela manmeri.”—2 Tesalonaika 2:9, 10.
16. (a) Ol hetman bilong ol lain i gat nem Kristen ol i bin birua tru long husat? (b) Namel long yia 476-1450 wanem samting i bin kamap long hap bilong ol lain i gat nem Kristen? (c) Taim ol man i lusim Misin Katolik na kamapim ol lotu Talatala, senis i bin kamap na ol i kirap bihainim gen lotu Kristen tru o nogat?
16 Ol hetman bilong ol lotu na gavman long ol lain i gat nem Kristen, ol i tok ol i wasman bilong lain sipsip bilong God, tasol ol i bin birua tru long ol man i laik kirapim ol man long kaunim Baibel, na long ol man i kamapim klia ol pasin kranki bilong ol i no stret long Baibel. Ol i bin mekim nogut long Jon Hus na long man bilong tanim tok bilong Baibel, em Wiliam Tindel, na ol i kilim tupela i dai. Namel long yia 476-1450 ol man i stap olsem long tudak na ol dispela hetman i bin lusim lotu Kristen tru ol i bosim nogut ol man na ol i mekim nogut tru long ol man i no laik bihainim lotu Katolik. Ol i daunim tru ol man i gat tok long bilip o wok o strong bilong Misin. Ol i kalabusim ol na givim bikpela pen tru long ol i go inap long ol i dai, o ol i pasim ol long pos na kukim ol long paia na kilim ol i dai. Long dispela rot Satan i laik daunim kwik ol manmeri ol inap kamap lain tru bilong “meri” o oganaisesen bilong God. Taim ol man i kirap lusim lotu Katolik na kamapim ol lotu Talatala (olsem long yia 1517 samting), planti lotu Talatala tu i mekim pasin nogut long ol man i gat narapela bilip. Ol tu i gat asua long blut, long wanem ol i bin kilim i dai sampela man ol i wok long i stap gut long God na Krais.—KTH 16:6; skelim wantaim Matyu 23:33-36.
Lain Bilong Meri i No Bagarap
17. (a) Tok piksa bilong Jisas long wit na gras nogut i makim wanem samting i mas kamap bihain? (b) Wanem samting i bin kamap long yia 1918? Na Jisas i bin sakim husat? Em i makim wanpela “wokboi” bilong mekim wanem wok?
17 Jisas i bin mekim wanpela tok piksa long wit na gras nogut, na em i makim olsem taim ol dispela lain i gat nem Kristen ol i bosim graun bai i olsem taim bilong tudak. Tasol kirap long taim ol i lusim lotu Kristen tru inap long nau, i gat sampela Kristen ol i olsem wit—ol i Kristen tru na God i bin makim ol. (Matyu 13:24-29, 36-43) Olsem na taim de bilong Bikpela i kirap long Oktoba 1914, i gat sampela Kristen tru i stap long graun. (KTH 1:10) Long yia 1918, em 3-pela yia hap bihain, i olsem Jehova i bin i kam long haus lotu spirit bilong em bilong skelim lain bilong em. Em i kam wantaim Jisas, em i “man bilong autim tok.” (Malakai 3:1; Matyu 13:47-50) Em taim bilong Bikman i mas sakim ol Kristen giaman, na em i mas makim wanpela ‘gutpela wokboi’ na putim em bilong ‘bosim olgeta samting bilong Bikman bilong em.’—Matyu 7:22, 23; 24:45-47.
18. Wanem “traim” i kamap long 1914? Em taim bilong wokboi i mas mekim wanem?
18 Na em i taim bilong dispela wokboi i mas tingim gut ol tok Jisas i bin tokim Jon long raitim i go long ol 7-pela kongrigesen, olsem ol dispela tok yet i makim. Olsem: Jisas i tok em bai kamap long ol bilong skelim ol, na dispela samting i bin kamap long yia 1918. (KTH 2:5, 16, 22, 23; 3:3) Em i tok long lukautim kongrigesen bilong Filadelfia taim “dispela traim i laik kamap na traim olgeta manmeri long olgeta hap bilong graun.” (KTH 3:10, 11) “Dispela traim” i bin kamap taim de bilong Bikpela i kirap long yia 1914, na bihain traim i painim ol Kristen bambai ol i ken kamapim bel bilong ol, ol i givim bel tru long Kingdom bilong Krais i kamap pinis long heven, o nogat?—Lukim Matyu 24:3, 9-13.
19. (a) Ol 7-pela kongrigesen i makim wanem samting long nau? (b) Wanem bikpela lain i bin kam bung wantaim liklik lain em God i makim? Olsem wanem tok bilong Jisas i stret long dispela lain tu? (c) Yumi mas ting olsem wanem long ol tok Jisas i bin givim long ol 7-pela kongrigesen bilong ol Kristen bilong pastaim?
19 Olsem na bikpela truim bilong ol tok bilong Jisas long ol 7-pela kongrigesen em i bin kamap long 1914 na bihain long dispela taim. Nau yumi save, dispela 7-pela kongrigesen i olsem piksa bilong olgeta kongrigesen bilong dispela liklik lain God i bin makim, em olgeta kongrigesen i stap long de bilong Bikpela. Jon em i olsem piksa bilong liklik lain Kristen em God i bin makim. Insait long 70 yia i go pinis bikpela lain bilipman i bin bung wantaim dispela liklik lain, na ol dispela bilipman i wet long kisim laip oltaim long Paradais long graun. Ol tok Krais Jisas i bin givim long ol 7-pela kongrigesen bilong stretim sampela pasin bilong ol, ol dispela tok i stret tu long dispela bikpela lain bilipman, long wanem i gat wanpela kain lo tasol bilong olgeta wokboi bilong Jehova—olgeta i mas bihainim stretpela pasin na i stap gut long Jehova. (Kisim Bek 12:49; Kolosi 3:11) Olsem na ol tok Jisas i bin givim long ol 7-pela kongrigesen bilong Esia Maina i no samting bilong bipo tasol. Nogat. Ol dispela tok inap helpim yumi olgeta wan wan long abrusim bagarap. Yumi mas harim gut ol dispela tok.
[Ol Futnot]
a Sapos yumi skelim tok bilong Aisaia 44:6 long tok Hibru bilong pastaim, yumi ken save Aisaia i kolim dispela tok “pastaim tru” na “las tru” bilong makim olsem Jehova em i God, tasol long Kamapim Tok Hait 1:17 Jisas i kolim kain tok olsem bilong makim wanpela bikpela nem o namba em i kisim.
b Dispela tok Grik (agʹge·los) yumi tanim long tok Pisin olsem “ensel” em i gat narapela insait bilong en tu, i olsem “man bilong autim tok.” Long Malakai 2:7, Baibel i kolim ol pris bilong lain Livai olsem “man bilong autim tok” (tok Hibru, mal·’akhʹ).
[Blok long pes 32]
Taim Bilong Traim na Skelim Man
Jisas i kisim baptais long Oktoba samting long yia 29 na God i makim em bilong kamap King. Tripela yia hap bihain, long yia 33, em i kam long haus bilong God long Jerusalem na rausim ol man i mekim dispela haus i kamap olsem ples hait bilong ol stilman. Olsem na ating i gat 3-pela yia hap namel long taim Jisas i kamap King long Oktoba 1914 na taim em i kam bilong skelim ol man i gat nem Kristen, long wanem, em i mas skelim lain o ‘haus’ bilong God pastaim. (Matyu 21:12, 13; 1 Pita 4:17) Long kirap bilong yia 1918 ol man i birua tru long wok bilong lain bilong Jehova. Traim i painim olgeta na sampela i pret na lusim lain bilong Em. Long Me 1918 ol pris pasto i kirapim gavman long putim sampela hetman bilong Sosaiti Was Taua long kalabus, tasol 9-pela mun bihain ol i lusim kalabus. Bihain, ol i no kotim ol moa long dispela samting. Ol dispela traim i painim lain bilong Jehova i olsem paia i kukim ol na ol i kamap klin, olsem na kirap long yia 1919 ol i kamap strong na ol i wok strong long autim tok bilong Kingdom na tokim ol man, dispela Kingdom tasol inap helpim ol.—Malakai 3:1-3.
Taim Jisas i kirap mekim dispela kot long 1918, ol pris pasto i gat nem Kristen i lus long kot. Ol i bin kirapim ol man long mekim nogut long lain bilong God, na ol i gat bikpela asua long blut, long wanem ol i bin helpim ol lain i insait long Namba Wan Pait. (KTH 18:21, 24) Ol dispela pris pasto i givim bel long oganaisesen ol man i bin kamapim, em Lig ov Nesen, na ol i tok, em rot bilong kamapim gutaim long graun. I kam inap long yia 1919, ol misin i gat nem Kristen wantaim olgeta narapela lotu giaman, ol i lus olgeta long ai bilong God.
[Mep long pes 28, 29]
(Bilong save ol dispela rait i stap we long pes, lukim buk o magasin)
EFESUS
SMERNA
PERGAMUM
TAIATAIRA
SARDIS
FILADELFIA
LAODISIA
[Ol Piksa long pes 31]
Ol misin i gat bikpela asua long blut, long wanem ol i bin mekim nogut long ol man i tanim tok bilong Baibel o kaunim Baibel o holim wanpela Baibel, na ol i bin kilim ol i dai