Yu Mas Save Long Birua Bilong Yu

 1. Long Iden, Jehova i kamapim klia wanem samting long birua bilong yumi?

ADAM i save olsem ol snek i no inap toktok. Olsem na ating em i save olsem wanpela spirit i toktok long Iv long rot bilong snek. (Stt. 3:1-6) Adam na Iv i no save liklik long dispela spirit. Maski i olsem, Adam i mekim disisen long givim baksait long gutpela Papa bilong em long heven, na sapotim man em i no save long en na sakim laik bilong God. (1 Tim. 2:14) Kwiktaim Jehova i kamapim klia husat dispela birua i bin trikim Adam na Iv, na God i tok promis olsem bagarap bai painim em long bihain. Na tu, Jehova i tok lukaut olsem dispela spirit husat i toktok long rot bilong snek, em bai i gat strong long mekim nogut long ol man i laikim God.—Stt. 3:15.

2, 3. Bilong wanem Baibel i no stori planti long Satan paslain long Mesaia i kamap?

² Jehova i gat savetingting, olsem na em i no tokim yumi long nem bilong dispela ensel husat i bikhet long em.a Klostu 2 tausen 5 handret yia bihain long dispela birua i kirapim Adam na Iv long bikhet, God i kamapim nem em i givim long dispela bikhet ensel. (Jop 1:6) Tripela buk long Ol Skripsa Hibru bilong pastaim i stori long dispela nem Satan, mining bilong en “Birua.” Ol dispela buk em 1 Stori, Jop, na Sekaraia. Bilong wanem Baibel i no stori planti long birua bilong yumi paslain long Mesaia i kam?

³ Jehova i no laik givim biknem long Satan, olsem na Ol Skripsa Hibru i no stori planti long Satan na ol wok bilong em. Nambawan risen na Jehova i stiaim ol man long raitim ol tok bilong Ol Skripsa Hibru em bilong tokaut long Mesaia na stiaim ol manmeri i go long em. (Luk 24:44; Gal. 3:24) Taim Mesaia i kamap, Jehova i yusim em na ol disaipel long kamapim klia planti pasin bilong Satan na ol ensel husat i bung wantaim em.b Dispela i stret bikos Jehova bai yusim Jisas na ol lain God i makim long holi spirit long bagarapim na pinisim Satan na ol lain bilong em.—Rom 16:20; Rev. 17:14; 20:10.

 4. Bilong wanem yumi no ken pret long Satan?

⁴ Aposel Pita i tok Satan i olsem “wanpela laion i singaut strong,” na Jon i kolim Satan olsem “traipela snek.” (1 Pita 5:8; Rev. 12:9) Tasol yumi no gat wok long pret long Satan bikos em i no gat olgeta strong wankain olsem God. (Ritim Jems 4:7.) Jehova, Jisas, na ol gutpela ensel i save helpim yumi long sakim birua bilong yumi. Maski i olsem, yumi mas save long bekim bilong 3-pela bikpela askim: Satan i yusim wanem ol samting long mekim wok bos? Olsem wanem em i save yusim ol dispela samting bilong trikim ol man? Wanem sampela samting em Satan i no inap long mekim? Yumi bai kisim bekim bilong ol dispela askim, na tu, skul yumi kisim.

5, 6. Bilong wanem ol gavman bilong graun i no inap kamapim gutaim?

⁵ Taim Satan i bikhet long God, planti ensel i bihainim Satan. Paslain long Bikpela Tait, em i pulim sampela ensel long slip wantaim ol meri long graun. Baibel i stori long dispela samting na i tok long traipela snek i pulim namba 3 hap bilong ol lain sta long heven na tromoi ol i go daun long graun. (Stt. 6:1-4; Jut 6; Rev. 12:3, 4) Taim ol dispela ensel i lusim famili bilong God, ol i stap aninit long wok bos bilong Satan. Ol dispela ensel i no wanpela bikhet lain tasol, nogat. Satan i yusim ol long kamapim wanpela kingdom em yumi no inap lukim long ai, na em yet i stap king bilong en. Em i oganaisim ol bikhet ensel long kamapim ol gavman, na em i givim namba long ol na larim ol i bosim graun.—Efe. 6:12.

⁶ Long rot bilong oganaisesen bilong em, Satan i bosim olgeta gavman bilong graun. Satan i kamapim klia dispela samting taim em i soim “olgeta kingdom bilong graun” long Jisas na tok: “Mi bai givim yu namba long bosim olgeta dispela kingdom, na tu, bai mi givim yu ol nambawan gutpela samting bilong ol. Mi inap mekim olsem, long wanem, olgeta dispela samting i bilong mi, na mi inap givim long man mi laik givim.” (Luk 4:5, 6) Maski Satan i stiaim ol gavman long mekim nogut long ol manmeri, planti gavman i save wok hat long helpim ol. Ating sampela bikman i gat gutpela bel na ol i laik tru long kamapim gutpela sindaun. Ol manmeri i laik tru long kisim gutpela sindaun, tasol i no gat wanpela gavman o bikman bilong graun inap pinisim ol pen na hevi na kamapim gutaim.—Sng. 146:3, 4; Rev. 12:12.

 7. Olsem wanem Satan i yusim lotu giaman na ol wok bisnis long giamanim ol manmeri? (Lukim piksa long kirap bilong stadi.)

⁷ Satan na ol spirit nogut i yusim tu ol lotu giaman na ol wok bisnis long giamanim “olgeta manmeri bilong graun.” (Rev. 12:9) Long rot bilong lotu giaman, Satan i mekim ol tok giaman long Jehova. Na tu, em i wok strong long mekim planti manmeri i lusim tingting long nem bilong God. (Jer. 23:26, 27) Long dispela rot, ol man i ting olsem ol i lotuim God, tasol Satan i trikim ol na ol i lotu long ol spirit nogut. (1 Kor. 10:20; 2 Kor. 11:13-15) Na tu, em i giamanim ol manmeri long rot bilong ol wok bisnis. Olsem, ol man bilong dispela graun i tok olsem nambawan rot bilong i stap amamas em long bungim planti mani kago. (Snd. 18:11) Ol manmeri husat i bilipim dispela tok giaman, ol i givim bel long “mani” na ol i givim baksait long God. (Mat. 6:24) Isi isi pasin bilong ol long laikim mani kago i daunim pasin bilong ol long laikim God.—Mat. 13:22; 1 Jon 2:15, 16.

8, 9. (a) Yumi kisim wanem 2-pela skul long stori bilong Adam na Iv na ol bikhet ensel? (b) Taim yumi save long ol samting Satan i yusim bilong trikim ol manmeri, olsem wanem dispela i helpim yumi?

⁸ Stori bilong Adam na Iv, na ol bikhet ensel i skulim yumi long 2-pela bikpela samting. Namba 1, yumi mas makim olsem yumi bai stap gut long Jehova o yumi bai stap long sait bilong Satan. (Mat. 7:13) Namba 2, ol lain i stap long sait bilong Satan, ol bai bungim hevi tasol. Olsem, Satan i tokim Adam na Iv long ol inap makim wanem samting i gutpela na wanem samting i nogut, na em i givim strong long ol spirit nogut long stiaim ol gavman bilong graun. (Stt. 3:22) Tasol oltaim ol samting Satan i tok promis long givim i save kamapim bikpela hevi. Disisen bilong Adam na Iv, na ol spirit nogut i no helpim ol.—Jop 21:7-17; Gal. 6:7, 8.

⁹ Taim yumi save long ol samting Satan i yusim bilong trikim yumi, olsem wanem dispela i helpim yumi? Dispela i helpim yumi long holim stretpela tingting long ol gavman na ol wok bisnis na kirapim yumi long givim bel long autim tok. Yumi luksave olsem Jehova i laik bai yumi rispektim ol gavman. (1 Pita 2:17) God i laik bai yumi bihainim ol lo bilong gavman sapos ol dispela lo i no pait wantaim lo bilong em. (Rom 13:1-4) Tasol yumi no ken tru sapotim wanpela lain politik o wanpela bikman bilong gavman. (Jon 17:15, 16; 18:36) Satan i laik mekim ol samting bilong bagarapim gutnem bilong Jehova, olsem na yumi laik skulim ol narapela long tok i tru bilong God. Yumi amamas tru long holim nem bilong God, na yumi save olsem pasin bilong yumi long laikim em i winim tru pasin bilong laikim mani na ol narapela samting.—Ais. 43:10; 1 Tim. 6:6-10.

10-12. (a) Satan i yusim wanem trap bilong pundaunim ol narapela ensel? (b) Yumi kisim wanem skul long stori bilong ol ensel i bikhet?

¹⁰ Satan i save yusim kain kain rot bilong trikim ol manmeri. Olsem, em i save putim trap bilong pulim ol man long mekim ol samting em i laik bai ol i mekim. Na tu, em i traim long mekim ol manmeri i pret bambai ol i daun long em.

¹¹ Yumi luksave long pasin bilong Satan long trikim planti ensel long bihainim em. Ating em i bin skelim pasin bilong ol inap longpela taim bambai em i ken save long wanem rot em inap pulim ol long bihainim em. Sampela bilong ol dispela ensel i pundaun long trap bilong Satan. Ol i slip wantaim ol meri long graun na kamapim ol pikinini i traipela tru, na ol dispela pikinini i bosim ol manmeri. (Stt. 6:1-4) Na tu, ating Satan i tokim ol olsem ol bai bosim ol manmeri bilong graun. Ating em i mekim olsem bambai em i ken pasim rot bilong pikinini em God i tok promis long kamapim long “lain bilong meri.” (Stt. 3:15) Maski i olsem, long rot bilong Bikpela Tait, Jehova i pasim Satan na ol bikhet ensel long mekim samting ol i tingting long mekim long dispela taim.

¹² Yumi inap kisim wanem skul long dispela stori? Yumi no ken ting yumi no inap pundaun long trap bilong mekim pasin pamuk na kisim pasin antap. Inap planti yia, ol ensel husat i stap long sait bilong Satan, ol i bin stap long ai bilong God. Maski ol i stap long kain gutpela hap olsem, planti bilong ol i larim ol laik nogut bilong ol i kamap strong na ol i pundaun. Olsem tasol, ating yumi stap insait long oganaisesen bilong God inap planti yia. Maski i olsem, ol laik nogut bilong bel inap pundaunim yumi. (1 Kor. 10:12) Olsem na oltaim em i bikpela samting long yumi mas skelim bel bilong yumi na rausim ol tingting na laik bilong mekim pasin pamuk, na yumi mas sakim pasin antap!—Gal. 5:26; ritim Kolosi 3:5.

13. Wanem narapela trap bilong Satan? Olsem wanem yumi inap abrusim?

¹³ Narapela trap Satan i yusim em pasin bilong laikim ol wok bilong ol spirit nogut. Long nau, Satan i no yusim tasol lotu giaman long kirapim ol manmeri long laikim ol wok bilong spirit nogut, nogat. Em i yusim tu ol samting bilong kisim amamas. Ol muvi, ol kompiuta gem, na ol musik samting inap kirapim man long amamas long wok bilong ol spirit nogut. Olsem wanem yumi inap abrusim dispela trap? Oganaisesen bilong God i no save putim lo long ol amamas yumi inap kisim na ol amamas yumi mas sakim. Yumi wan wan i mas skulim maus bilong bel bambai em i stret wantaim ol lo na stiatok bilong God. (Hib. 5:14) Tasol yumi inap mekim gutpela disisen sapos yumi bihainim skultok bilong aposel Pol long larim pasin bilong yumi long laikim God i “no ken i gat pasin giaman long en.” (Rom 12:9) Yumi ken askim yumi yet olsem: ‘Amamas mi laik kisim i soim olsem mi gat pasin bilong giaman? Sapos ol Baibel sumatin o gobek bilong mi i lukim amamas mi kisim, ol bai luksave olsem mi bihainim ol tok mi autim o nogat?’ Tok yumi autim i mas stret wantaim pasin yumi bihainim, na dispela bai helpim yumi long abrusim trap bilong Satan.—1 Jon 3:18.

14. (a) Olsem wanem Satan inap pretim yumi? (b) Olsem wanem yumi inap karim dispela hevi?

¹⁴ Satan i traim long pretim yumi bambai yumi lusim pasin bilong yumi long stap gut long Jehova. Olsem, em inap yusim ol gavman long tambuim wok bilong yumi long autim tok. Na tu, em inap yusim ol wanwok o wanskul long tok bilas long yumi bikos yumi laik bihainim ol stretpela lo bilong Baibel. (1 Pita 4:4) Em inap kirapim ol wanfamili long mekim ol tok we inap kirapim yumi long lusim ol miting. (Mat. 10:36) Olsem wanem yumi inap karim dispela hevi? Yumi mas save olsem dispela samting bai kamap bikos Satan i pait long yumi. (Rev. 2:10; 12:17) Na tu, yumi mas tingim bikpela tok i bin kamap—Satan i tok olsem yumi mekim wok bilong Jehova bikos ol gutpela samting bai painim yumi. Em i tok sapos hevi i painim yumi, yumi bai givim baksait long God. (Jop 1:9-11; 2:4, 5) Bikpela samting em olsem, yumi mas askim Jehova long strongim yumi long karim ol hevi. Tingim, God i no inap lusim yumi.—Hib. 13:5.

15. Yu ting Satan inap pasim yumi long bihainim laik bilong yumi? Stori long dispela.

¹⁵ Satan i no inap pasim ol manmeri long bihainim laik bilong ol yet. (Jems 1:14) Tasol planti manmeri i no luksave olsem ol i mekim ol samting we i stret wantaim laik bilong Satan. Taim ol i kisim save long tok i tru, ol inap mekim disisen long ol bai mekim wok bilong God o wok bilong Satan. (Apo. 3:17; 17:30) Sapos yumi tingting strong long mekim laik bilong God, Satan i no inap bagarapim pasin bilong yumi long pas gut wantaim God.—Jop 2:3; 27:5, 6.

16, 17. (a) Satan na ol spirit nogut i no inap mekim wanem ol narapela samting? (b) Bilong wanem yumi no ken pret long beten long strongpela nek?

¹⁶ I gat narapela samting tu em Satan na ol spirit nogut i no inap mekim. Olsem, i no gat wanpela hap bilong Baibel i stori olsem Satan na ol spirit nogut inap save long tingting bilong man. Baibel i tok Jehova na Jisas tasol inap mekim olsem. (1 Sml. 16:7; Mak 2:8) Olsem wanem long pasin bilong toktok o beten long strongpela nek? Yu ting Satan na ol spirit nogut bai harim beten bilong yumi na mekim sampela samting bilong pasim yumi? Yumi no save pret olsem Satan bai lukim yumi mekim wok bilong Jehova. Olsem tasol, yumi no ken pret olsem Satan bai harim beten yumi mekim long strongpela nek. Baibel i stori long planti wokman bilong God em ol i beten long strongpela nek, na ol i no pret olsem Satan bai harim beten bilong ol. (1 Kin. 8:22, 23; Jon 11:41, 42; Apo. 4:23, 24) Sapos toktok na pasin bilong yumi i stret wantaim laik bilong God, yumi ken bilip tru olsem Jehova i no inap larim Satan i mekim wanpela samting bilong bagarapim yumi na bai yumi lus long kisim laip oltaim.—Ritim Song 34:7.

¹⁷ Yumi mas save gut long birua bilong yumi, tasol yumi no ken pret long em. Maski yumi gat sin, Jehova inap helpim yumi long winim Satan. (1 Jon 2:14) Sapos yumi sakim em, em bai lusim yumi. (Jems 4:7; 1 Pita 5:9) Satan i laik tru long pundaunim ol yangpela. Ol yangpela i ken mekim wanem bilong sakim Satan? Stadi i kamap bihain bai bekim dispela askim.